Falfalaen’ nge Gubinfen

Keb rok Elder Gerrit W. Gong

Ko fare Ulung ko fare Ragag nge L’agruwi Apostle

Falfalaen’ nib riyul’ nima athamgil nge ngiyal’ nib gubinfen ngak e pi’in ni ba’adag e daf rok e wo’ ko falfalaen’.

Pi fagar rog, pi walageg nib pumo’on nge bpin, kagamanang nibe mich u wun’med , fa ba’adang nibe mich u wun’med, nifan e falfalaen’ nib gubinfen?

Nira buch e yafos. Gadad ba “tugul.” Tha’ rodad ba mang nib mo’omaw. Ga’ lam rok e feylang, ni bo’or e gidii’, nibe cham riy, nibay e baen. Machane, ulan e “gum’ircha’dad,”¹ gadad ma mich u wun’dad, fa gadad ba’adag ni ngad mich u wun’dad, u demtrug e nam, demtrug e rogon, falfalaen’ nge gubinfen e bariyul’ nge ra buch.

“Falfalaen’ nge gubinfen” e gathi e pin’en nib baen fa pi yaat. Falfalaen’ nib riyul’ nima athamgil nge ngiyal’ nib gubinfen ngak e pi’in ni ba’adag e daf rok e wo’ ko falfalaen’. Wo’ rok nike sunmiy ufithik e t’uf nira fal’eg e milekag nib falfalaen’ nge gubinfen.

Bo’or ban’en ninge falfaen’dad ngay nge tin ninge falaen’ u wun’dad. Machane, dariy gubin dad e machalbog, ta’ab rogon ko demtrug e tabinaw. Pi tha’ rodad ni tay e bu’un e t’uf, non, nge reb pin’en nge ma tay e bu’un e magawon, gafgow, nge bochi yay amith nib ga’.

“Rogon nma yim’ urngin e girdi’ ni bochan e yad ta’ab girdi’ Adam, e aram rogon ni gubin e girdi’ ni bay ni faseg ko yam’ ni bochan e kar ta’ab girdi’gad Kristus.”² Faseg ko yam’ ni bochan e kar ta’ab girdi’gad Kristus nibe tay e bu’un yafos nib manimus—To’owath rok ngodad ko faskoyam’. Napan ni ngad fasgad nibay e mich nge fol, faseg ko yam’ ni bochan e kar ta’ab girdi’gad Kristus nibe tay e bu’un e yafos nib manimus nib falfalaen’ ngak got nge pi’in ni gadad ba’adag.

Ulan e rogon nib fel’, profet rok Somoel ma fekdad chuchugur ngak e Tathapegdad, udakaen e pi gam’ing nib thothup ulan e temple nge pi micheg nira yib ngodad u bo’or e pi tafen. Bay e ngongol rodad nib ga’ nge tawa’ath ni ngad piryeged e gonop ko tin thothup nib be’ech, t’uf, kalngaen’, nge n’agfan ngodad nge tabinaw rodad, daba nge gubinfen.

Kug thapeg e rayog, gube weliy la’agrew e pi’nen nib thothup ni ke buch ngak e fagar rog marunga’agen e rogon ni Yesus Kristus nike peth e pi tabinaw udakaen napan ni ke golnagraed ko damomuw.³ “Dariy tungun mab manechubog,”⁴ “nib ga’ ko yam’,”⁵ Bayul rok Yesus Kristus ma ayuweg ni nge pii’ e gapas nifan e tin nike buch nge pii’ athap nifan e tin nira buch.

Napan ni kar un ko Galasia rok Yeusu Kristus nifan e gidii’ rok ko tin tomur e rran, fagar rog nge figirngiy kar filew e mabgol dabi mang ko “madako e yam’ ra th’aabmed.” Ulan e na’un rok Somoel, pi tabinaw rayog ni nge (m’ag) u ta’abong ko manimus.

Machane fagar rog dabun ni nge m’ag ngak e chitimangin. “De mang e figirngiy nib mangili ngak e Chitamangeg. De mang e chitimangen nib mangil ngak e pifak,” ni ke yog. “Thingari soen e chitimangig.” Dariy e ba’adag rog ni nggu rrin’ e muruwel rok ulan e temple nge ma’g ngak ko gubinfen.”

Madako ta’areb e duw, nike blaynag abich rok, meybil, non ngak e Somoel marunga’agen e chitimangin. Reb e rran, ni ke ba’adag. Muruwel rok ko temple ke ma’. Tomuren, nike yog, “Ulan e od rog e chitimangeg ni ke yib ngog ufithik e lik’ay, ni bay e maed nib wechwech. Nike thil. Ke ga’ar, ‘Musap nggog. Gubin yang rog nike be’ech. Kammagar nikam rrin’ e muruwel rog ulan e temple.’” Chitimangin ke ul’ul, “Sakiy nga lang nge sul ngak fare temple; walageg nib pumo’on ba’adag ni nge thapeg e tawfe.”

Fagar rog nike yog, “Tha’ rog nge pi’in ni kar maed be soen ni ba’adag e bee’ nira rrin’ed e ngongol rok.”

“Gag nge girdi’ ko birog e tabinaw,” keyog, “fare temple e ir e tafen ko golnag, fil, nge lemnag nifan e Bayul rok Yesus Kristus.”

Bin l’agrew e ban’en nike buch. Reb e fagar rok nike piryeg bo’or e pi chepen e tabinaw rok nib kakrom. Ir ba’adag ninge nang e thingtaw.

Reb e rran u kakadabul, fagar rog nike yoeg nike thamey e ya’el nib pumo’on ulan e singgil rok’. Pumo’on ney ba’adag ni ngan pir’eg nge e tabinaw ni ngar nanged marunga’agen. Pumo’on ney ke kirebaen’ bachane ologoch rok machane nike kalngaen’. Pumo’on ney nike ayuweg e fagar rog ni nge nang ni dariy e tha’ uthilin row nge ir gathi e thingtaw rok. “U reb e thin,” fagar rok keyog, “Kug pir’eg e thingtaw nge fil ni ir gathi e bee’ e chepin ko tabinaw rog nike yog ir e thingtaw.”

Napan nike moem nag e tha’ rok ko tabinaw, keyog e fagar rog, “Gube thapeg e matawon, e gapas. Ma ayuwegeg ni nggu nang marunga’agen e tabinaw rog.” Baga’ar e fagar rog, “Fa’an bay e papangiraed nib mataltal de yipfan’ gubin e gakiy ir nib kireb. Rogon ni ngad yib u feylang ir gathi ga’fan ko mini’ e bee’ rodad napan ni ngad dared.”

Fapi babyor nib thothup nge pin’en nike buch nib thothup rodad nifan e golnag nge gapas, ni tay e bu’un ko pi’in ulan e tafen e ya’el, ba dag lal’ e yalen ko michib.

Bin Somo’on: Nib ga’ ko e wo’en e bayul nge falfalfaen’ rok’ Got, Yesus Kristus, u dakaen e Bayul Rok’, nike micheg nagdad ninge m’ag e ya’el rodad nge dowdad, “dabiyog ni nge kii’ bayay, ere [ngad] thapeged e falfalaen’ nib sug.”⁶

Bin L’agrew—mang nib ta’abrogon ngak Kristus—ma yib napan ni ngad muruwel e mich nge thapeged e pi wa’amgin ko kalngaen’.⁷ Woed ulan e yafos ney, ni ta’abrogon ni gubinfen. Fapi gam’ing ko temple dabi thilyegdad fa pi’in nibay u tafen e ya’el. Machane pi gam’ing nib thothup ir e rogon ni nga fal’eg e micheg nira machalbog nagdad ngak fare Somoel, nima pii’ ngodad e gapas Ngak nge reb e bee’.

Falfalaen’ rodad ra manged nib sug napan ni ngad thamiyed e murunguy nge n’agfan rok Yesus Kristus nifandad. Nge napan ni ngad pii’ e ma’ang’ang ko e murunguy Rok nge n’agfan ngak gubin e gidii, fare murunguy ni ngad thapeged nge fare murunguy rayog ni ngar thilyeg e pufthin nib kireb nga pufthin nib mat’aw.⁸

Bin Dalip: Got e manangdad ma gadad bt’uf rok’ nib polo’. “Dariy be’ nrayag ni nge bannag Got,”⁹ ma dabiyog ni ngan baen nag. Ufithik e murunguy nge pufthin nib machalbog, me chalongbiy dad nga pa’ ni ayuw pi’in nib muding nge kalngaen’.

Ulan e Temple nu Kirtland, fare profet Joseph Smith nike guy ulan yi’iy e walagen Alvin nike thap ulan e gil’ilungun ni celestial. Ke balyangan’ fare Profet Joseph, bachane Alvin ni ke yim’ umon ni ke thapeg e gam’ing nib thap ko tawfe.¹⁰ Ma pii’ e gapas, fare Somoel ni ke weliy e mangfan: Fare Somoel “nira pufthin nag[dad] nifan ko fapi muruwel [rodad], nge fapi ar’ar’ u gum’ircha’[dad].”¹¹ Ya’el rodad ma dag ngodad e ngongol nge ba’adag rodad.

Ufithik e magar, gadad manang ni gidii’ be fasgad nge “gidii’ nike yim’ nike kalngaen’ e ran thapeg nag, ni fa’an yaed ra fol ko fapi yalen ko nu’un rok Got”¹² nge Bayul rok Kristus. Ulan e tafen ko ya’el, pi’in ni bey e denen nge kar oloboch nira thapeged e rogon ni ngar kalngaen’.¹³

U pin’en nib thil, pi’in niba mel’eg e ngongol nib kireb, nima lemnag ni soen ko kalngaen’, fa pi’in niba lemnag ni ba’adag ni nge th’ab e motochiyl bachane rayog ni nge kalngaen’ ra fek e pufthin rok’ Got nge bayib e “tamilang laniyaen’daed u rogon gubin i thibngiraed.”¹⁴ Dabiyog ni ngad denengad u Sabado, nge lemnag rangad thapeged e n’agfan napan ni ngad fek fare sakrament ko Madnom. Ngak e pi missionary fa reb e bee’ nima lemnag fa’an ni ngam fol e Ya’el ni bayip’fan dabiyog ni ngar fol e motochiyl ko mission fa pi motochiyel, wenig ni ngam puguran ma fol e pi motochiyel ko mission fa pi motochiyel ma pinning e Ya’el. Gadad gubin ni dabi soen e kalngaen’dad. Fapi tawa’ath ko kalngaen’ ma tabab napan ni ngam tabab e kalngaen’.

Bin Aningeg: Somoel ma pii’ ngodad e rogon nib thothup ni ngad manged boed Ir napan ni nigad rrin’ed e pi ngongol ko temple nib thap nifan e pi’in dabiyog ni ngar rrin’ed nifan rad. Gadad ra mang nib’ fel’ nge machalbog¹⁵ napan ni ngad manged e “tathapegdad … udakaen e burey nu Zion.”¹⁶ Napan ni ngad pigpig ngak reb e bee’, fare Kan ni Thothup ko Micheg e rayog ni nge ga’nag e gam’ing nge machalbog nag gubin gidii’. Gali cha’ney rayog ni ngar fal’eg nge ga’nag e micheg nib thilyeg, ufithik e ngiyal’ nira thapeged e tawa’ath ko fare micheg ko Abraham, Isaac, nge Jacob.

Bin tomur, bin laal: ma fil fare motochiyl nib gol¹⁷ ayuweg ko kalngaen nge na’agfan nima pinningdad ni ngad pii’ reb e gidii’ ta’abrogon e pi’nin ne ba’adag.

Bochi yay e ba’adag rodad ni ngad n’agfan reb e bee’ ma pii’ gali chaney ni rayog ni nge mich u wun’um ni ngad kalngaen’ nge thapeg e n’agfan. Bochi yay e gum’ircha’med ni ba’adag e kalngaen’ nge e rogon ni nge n’agfan ra yib uthilin reb e pi ngiyal’. Tathapegdad ir e Ta’ayuw ngak Got, machane Ir ma ayuwegdad ni ngad fekdad nge gubin reb Ngak. Ni bay e amith nge gafgow nib gel, faleg e tha’ rodad nge golnag ulan e gum’ircha’med, ni rib maath ni ngad guy rogon ni yigo gur. Machane Tharmiy rayog ni nge pii’ e gelgin nge gonop ni gadad ra nang e ngiyal’, nge rogon thingarda pag.

Gathi yigo gadad napan ni ngad nanged e gathi yigo gadad. Tathapegdad ni manang.¹⁸ Ni bay e ayuw rok’ fare Tathapegdad, rayog ni ngad pag e uf’uf’ rodad, athamgil rodad, pi denen rodad ngak Got. Machane gadad ra thamiy napan ni ngad tabab, gadad ra manged nib sug napan ni ngad pagaen’ Ngak ni nge sug nag e tha’ rodad.

Somoel, ni ma guy nge manag gubin ni machalbog, nima n’agfan mini ni ba’adag; ni gadad (ni bay e denen) thingar n’agfan gubin bee’. Napan ni ngad dared nga Somoel rodad, dabda lemniged bo’or marunga’agen dad. Dabda pufthin bo’or nge gadad ma n’agfan bo’or. Pagan’um ko ngongol Rok’, n’agfan, nge murunguy¹⁹ era fek cham, damomuw, amith, pog, kireb pufthin, nge pi magawon ko dow nge tafney nira buch bachane bay e dow u yafos ney. Falfalaen’ nge gubinfen dabi yip’fan ni gubin e tha’ ra manged nib falfalaen nge gubinfen. Machane napan bay e biyu’ e duw napan ke m’ag Satan²⁰ rayog ni nge pii’ ngodad bo’or e rogon ni ngad t’ufgad, nanged, nge fal’eg e rogon napan ni ngad ta’ermadliy nifan e gubinechubog.

Rayog ni ngad piryeg e rogon ko tharmiy ulan gubin dad.²¹ Muruwel nge falngin rok Got nima fekdad falfalaen’ nge gubinfen.²² Yafos nib manimus nge tolang ir e nanged Got nge Yesus Kristus ere, udakaen e gelngin, tafen romed ir e tafen rodad.²³

Pi walageg, Got ni Chitimangdad nibay u Tharimy nge Fakag nib T’uf rok ma fasgow. Yow ma pii’ e gapas, falfalaen’, nge golnag ngak uringin mfen nge thin, gubin e tabinaw, nge gubindad. Prefet rok Somoel ma powi’iydad. Thogthog ma ul’ul’ daba’. Gube athap ni ngad yib chuchugur ngak e Tathapegdad ulan e na’un rok Somoel nib thothup, nge gube athap ni nge fekdad nga Got nge gubindad napan ni ngad ta’areb nag gum’ircha’dad u ta’abang ngo fithik e t’uf woed Kristus, tin riyul’, nge murunguy ni gubin ngiyal’—daba’ nge gubinfen, u falfalaen’ nge gubinfen. Ulan Yesus Kristus, rayog nira buch; ulan Yesus Kristus, ireray e tin riyul’. Gube tay e mich rog udakaen e fithingan nib thothup Yesus Kristus, amen.