15:4

Chugur Nigey ngak fare Tathapeg

Rok Elder Neil L. Andersen

Ko fare Ulung ko fare Ragag nge L’agruwi Apostle

Napan ni gadaedra sapdad ni ngaed nanged ma gadaed tʼufeg fare Tathapeg, ma arram ni gadaed be palog nagdaed ko tin nu fayleng u daken fapi mʼag rodaed ngak Got, ni gadaed bathil, ma gadaed be tayfan ma gadaed be fol ko fapi machib rokʼ ni yibe gay rogon ni dabni palog nigey rokʼ boech e gidiiʼ nib thil e tin nib michunwanʼraed ngay.

Pi walageg, biney e blayal’ e gube non ngomed ni gimed e gidii’en gachelpen Yesus Kristus. Napan ni aura guy e mich romaed ngak Taathapeg rodad ko biney e naam nge dakean ga’angin yang u fayleng, ma arram ni ribe gel e t’ufeg rog ngomed.

Tomuren e michib rok’, me fith fapi gachalpen Yesus ninge yoeg ngoraed fapi “mog ngomad ko wu’in e ra [Yib fare Bin L’agruw] fa pin’en ni kamog, nge n’en nra yib ni nge dag nike taw ko ngiyal’ ni bay mub riy nge ngiyal’ ni tomuren e fayleng.”¹

Me yoeg Yesus ngoraed e pi n’en nra buch u m’on nra yib ni ga’ar, “ngiyal’ ni gimed ra guy e pin’ey ni urngin ni be m’ug, ma aram e [gamedra] nang ni [fare ngiyal’] i n’em e ke chugur.”²

Bin ba’aray e general conference nike thumur, ku motoyil ko thin rok’ President Henry B. Eyring: “nra bagdaed,” ni ga’ar, “demuturug e gin ni gadaed bay riy, ya gadaed manang ni ngiyal’ ney e kari chugur. … En nrayag ninge guy nga owchen me guy e pi pow ney nibe buch nge tel nra rung’ag fapi thin rok fapi profet era nang ni biney e ba riyul’.”³

Fare Tathapeg e motochiyel nag ngak fapi gachalpen: “Fel’ wa’ath med owchemed, e be guy ban’en: ma tel med, e be rung’ag ban’en.”⁴ Nga ki par e biney e tawa’ath rodaed ni ngeyag ni da motoyilgaed ko fapi thin rok Somoel u daken fapi profet rok’ nge boech gidii ko biney e mo’olung.

Woldug nge Paan

Somoel e weliy ni tomuren e ngiyal’ u mm’on ninge yib fare “woldug’,” ni bugithin ni weliy ni irerram “fare gi milay’ e eram e fayleng,”⁵ nib muma fare gi milay’ e eram e faylengun e par riy nib “kireb,” fa aram ni gidii’ nde t’uf Got roraed madar fol gaed ko fapi motochiyel rok’. Yaedra “woldug nge pan nge ga’ u ta’bang,”⁶ ni yow bay u barba’ rorow.

Irerray rogon e fayleng rodaed nge mada’ ko wub rok’ nib sug ko tin nib fel’ nge tin ni kireb ban’en.⁷

Boech ngiyal da ma thamiy gel. Mu gumaen! Somoel e yoeg ni woldug ni woed ni fan nibe ilal i yaen.⁸ Gadaed gubin e Gidii’en Got ko tin Tomure e Rran, machane aram rogon ni dawarda gelgaed ni rogon ni gadaed ba’adag, gadaed e rib polo’ gum’ircha’endead ni ngaed manged gachalpen.

Gel nag mich Rodad ku Yesus Kristus

Gadaed be guy ni napan nibe yo’or e kireb u fayleng, ma rogon ni ngaed gelgaed ko tin nib thothup, nge rogon e thothup rok’ e pi’in nib t’uf rodaed, era tu’uf ningan chowathiliy, min ayuweg, min gelnag lik’ingin e mich rodaed ngak Yesus Kristus. Apostle Paul e michib nag ngodaed ni ngaed yuluy niged gadaed,⁹ nga but’, ngad fan¹⁰ t’ufeg rok’ Somoel ma gadaed athamgilgaed ngak laked. Chiney i yaen nga mm’on e kari tu’uf ningaed athamgilgaed, min gonop ko tin ni yibe rrin’.¹¹

Nge tin nu fayleng ban’en nibe ul’ul’ nibe yo’or u charendaed, rib tu’uf ni dabda rusgaed. Ya Somoel e dariy bi’id nra pagtilin fapi gidii’ rok’ ningar ngongliyed e mag ngak. Bay ba gelngin ba tawa’ath ko thothup riy nge thothup nima powi’iy nge tin nib mat’aw.¹² Biney e gelingin e tawa’ath nib thothup nikan uneg ngay, e gathi be yib ni bachan e gadaed gidii’en e biney e mfen. Ya ma yib u nap’an ni gadaed be gel nag e mich rodaed ngak Somoel Yesus Kristus ma gadaed be fol ko fapi motochiyel rok’, napan ni gadaedra yib ngak ma gadaed t’ufeg. “A’aray ara’ e yafos ndariy n’umngin nap’an,” Yesus ni meybil nag, “ni aram e nge nangem e girdi’ ni kari mmus ni gur e bin riyul’ e Got, miyad nang ko mini’ Jesus Kristus, ni ir e kam l’oeg ke yib.”¹³

Gadaed gubin ni gadaed manang, ni bay e mich nu Yesus Krists nge ni ngan mang gachalpen e gathi kemus ni t’abingiyal’—ya biney e bo’or ya ma gathi t’abingiyal’. Ya ban’en nib thothup, ma be ul’ul’ ulan e yafos rodaed, ni ngaed ul’ul’gaed riy nge mada’ ko ngiyal’ nikad ragbuggaed ko rifrif u ay.

Napan nra ga’ e pan i fithik’ e fayleng, ma uw rogon nrayag ningaed gel niged e m’ag rodaed ngak Somoel ko tin ni bay nga mm’on e rran?

Ba’aray dalip e tafney:

Ngad filed fare Yafos ku Yesus

Bin somm’on, rayag ningaed filed boech mornga’agen e yafos rok’ Yesus, nge fapi michib rok’, nge tin ni mornga’agaen, gelingin, nge fare bayul rok’. Fare Tathapeg e ga’ar, “Mu ninged ngog e tin nbay u lane tafney romed.”¹⁴ Fare Apostle John e pugoran ngodaed, “Ba t’uf Got rodad nge girdi’ ni bochan e Got e som’on ni at’ufegdad.”¹⁵ Napan ni gadaedra guy ma gadaed thamiy e t’ufeg rok’, ma arram ni gel ni gadaedra t’ufeg, nra mom rogon, ma arram ni gadaed lek wo’en Rok ko t’ufeg min ayuweg e gidii’ nib chuchugur dad. Ma urngin e mithmith rodaed ni gadaed be chugur ngak, ma arram ni gadaed be guy nib fel’ rogon.¹⁶ Ma gadaed ra t’ufeg nib gel, ma gadaedra gay rogon ni ngaed boded ir.¹⁷

Ngongliy e M’ag ngak fare Somoel

Bin l’agruw, napan ni gadaedra nang ma gadaed be t’ufeg Somoel, ma arram ni gadaedra adag nib gel ninge pagaen’daed ngak min tayfan. Ma gadaedra ngongliy e m’ag ngak. Gadaedra tabab ko fapi m’ag rodaed ko tawfe, ma gadaed be ul’ul’ ko micheg u napan ni gadaed be kalngaen’ ni gubin e rran, min fith e man’agfan, min gay rogon ningan thapeg fare sakrament ni gubin e wik. Kad michegned ni “gubin ngiyal ma gadadra fol min ayuweg fapi motochiyel rok’.”¹⁸

Napan e bayi fel’ rogondaed, ma gadaed un ko fapi m’ag nge gam’ing ko temple. Napan ni gara guy fapi n’en nib manechubog nib thothup, ulan e nu’un rok’ Somoel, mara fel’ u wun’daed ningaed m’aged daed ngak Got min gel nigey ngay ayuweg rogon.

Ngongliy min ayuweg fapi m’ag era gelnag e t’ufeg rok’ Somoel ulan gum’ircha’ended. Ko biney e pul ulan fare babyor ko Liahona, President Russell M. Nelson e ga’ar: “[Pi] m’ag [Rodaed] ere fekdaed nge chugur ngaedaed ngak. … Got e dariy bi’id mara digey e pi’n nike dugliy ninge laek me fol rok’.”¹⁹ Nge ni key yoeg President Nelson daba, “Napan gubin e yibliynag nifan bin bi’ech e temple, boch reb e gelngin Got nira yib nga dakean e feylang ni nge gelnagdad nge kirebnag e muruwel rokʼ mo’oniyanʼ.”²⁰

Rayag ni ngaed guyed fan ni be powi’iy nag Somoel fare profet rok’ ninge fek e temple i yib nge chugur nag ngodaed?

Napan ni gadadra yaen ngalan e temple, ma arram kad palog gaed ko tin nu fayleng ban’en ko ngiyal’ ni gadaed be fil mornga’agen e yafos nge tawa’ath nib manechubog nikan pii’ ngodaed ni yib rok’ fare Tathapeg, Yesus Kristus.

Fare Tawa’ath ko Kan ni Thothup

Bin tomur ngay, bịn dalip e tafney rog: ko biney milekag nib Nthothup, ma gadaed be cha’ariy, ayuweg, min rurunguy, fare tawa’ath ko Kan ni Thothup u polo’ i gum’ircha’endaed. President M. Russell Ballard nge Elder Kevin W. Pearson kar yogew mornga’agen thin rok President Nelson ni gu ba yog bayay: “Fapi rran ni bay yib, dabiyoeg ni nge fos e ya’el rok bee’ ni fa’anra dariy e powi’iy, fa fanow, fa golnag, fa ayuw ko fare Kan ni Thothup.”²¹ Biney e ba tawa’ath ndariy reb nib ta’areb rogon ngay. Gadaed be gay rogon ni gubin ban’en nibe buchbuch rodaed ulan reb e rran e rayag ninge ul’ul’ fare Kan ni Thothup nge par rodaed. Gadaed e tamilang ngak e fayleng, ma ngiyal’ nike tu’uf, gadaedra gay rogon ngaed pired ni gadaed bathil ngak boch e gidii’. President Dallin H. Oaks e ke fith ngak fapi fel’yagnren: “[Gama] ‘gay rogon ni ngam par ni gab thil?’ … [Rib ga’] nib ga’ … ko rogon fapi n’en ni gabe mel’eg ulan e yafos rom. … Gabe yaen nga mm’on nib palog ko tin nu fayleng ban’en?”²²

Mu Mel’eg ni ga ba Thil ko fare Fayleng

Bay reb e thin ko social media, ni kug fith ngak gachalpen ni ngar weliyed e pi n’en nikar mel’eged ni kayag ni yaed ba thil ko fayleng. Pag e miri’ay e fulweg nike yoloey e gidii’.²³ Ba’aray in array:

Amanda: I gag reb e ners ni guma muruwel u kalbus. Guma gay rogon ni nggu ayuweg e gidii’ u kalbus ni woed rogon nra rrin’ Kristus.

Rachel: I gag be’ ni guma yoen’ e tang, oran ni ngiyal’ e dagur tin’ug ko mang mad e gube chuw ngay, ndemuturug ko mang e mad e kan pii’ ngog. [Bachan e kan endow nigeg,] ku gog ngak [facha’ ni’ir e producer] ni fapi mad ni nggu chuw ngay e rib tu’uf nib [n’uw pa’ nge ay]. Dani fel’ u wun’raed ko ran’ey … machane rrin’ed ni aram rogon. Dabgu thilyeg e biney e gapas nike yib ni gub sak’iy ni gag reb e michaen’ ngak Kristus ni gubin ngiyal’.

Chriss: I gag be’ ni gubta chingaw’ (gube gay rogon ni nggu pag), rayag ni nggu waen nga temple, nge be’ ni gidii’en e Galasia. Dani mith mornga’ageg ko tin ni’i buch rog napan ni ribgel e chingaw’ ni guma tay fa mich rog ko fare Bayul [rok’ Yesus Kristus].

Lauren: Gube yoloey mornga’agen ba gosgos nib mu’un e classmate rog ngay u high school. Yaed ba’adag ni ngog ban’en nib yaba’, fa nge pow e dumomow rog ngog e thin nib kireb. Ra ul’ul’gaed ni yaed be towasoriyeg, machane rigu athamgil ni dabgu rrin’.

Adam: Bo’or e gidii’ ni dar michuwaen’ ngog ni guma ayuweg fare motochiyel ko galong ma guma palog nigeg ko porgnagraphy. Danra nangedfan gelingin e falfalaen’ nge gapas nima yib ko tafney rog.

Ella: Chitamangig e reb e gidii’ nib mang ko fare ulung ko LGBTQ. Guma gay rogon ni nggu tayfan e gidii’ ma gube par ni gag be’ nib michuwun’ug Kristus ma gub riyul’ ko tin nib michuwun’ug ngay.

Andrade: Ku dugliy u wun’ug ni nggu ul’ul’ ko yaen nga galasia napan nike dugliy gathon e tabinaew rog ni dab kar uned.

Bin Tomur, ku Sherry: Gamad bay ko ba een ni tofen e nu’un rok’ fare governor ni rib ga’. Yad ba piiʼ ngodad e wine ko fare “toast.” Mu gog ni ran e rayag ni nggu nʼum, dariyfan ni arram rogon nike yoeg fapi gidiiʼ ni biney e rib kireb yaʼan. Ku toast gaed ngak fare governor, mug kol e ran rog nggu chubiy naglang ni rib tolang! Ma fare governor e dani kireb u waenʼ.

Gaʼar President Nelson, “Arragon, gabe par u fayleng, machane yalen rom e rib thil ko tin nu fayleng banʼen nra ayuwegnem ni damu fek e makaʼalit ko fayleng.”²⁴

Anastasia, rib e mitin u Ukraine, nibay u haspital nibe gargel nag fak ni pagal me tabab e bomb u Kyiv ko bin baʼaray e February nike thumur. Yibi bing reb e nurse e mab me gaʼar ni rib tumgin laman, “Fek fakam, ngam bichiy ko mad, ma ga yib ngalan a hall —e chiney!”

Taʼaboch riy, me gaʼar Anastasia:

“Dan gu tafney nag ni rofen ni gura mang a mitin e rib gel e momawʼ riy, … machane … gube gay rogon nggu sap ko … tawaʼath ni be buch nge maʼangʼang ni gube guy. …

“Chiney, … ni momaw ni rayog ni ngu nʼagfan fapi gidii ni ke rrin boʼor a tin nib kireb … , machane i gag e gachalpen ku Krisuts, ni bay e mich rog ni rayog ni gu ra [nʼagfan]. …

“Dan gunang ko mang era buch nga mmʼon … machane gu manang ni ayuweg fapi mʼag rog era ulʼulʼ nge piiʼ fare Thothup ngog, … nra ayuweg ney nge piiʼ e falfalaenʼ nge athap, … ko ngiyalʼ nib gel e momawʼ.”²⁵

Fare micheg ko Yafos nib Manimus nge Rir nib Celestial

Pi walegeg, ke yib tawaʼath ngog ko fare tʼufeg ku Taathapeg rodad, Yesus Kristus. Mich u wunʼug ni Ir ba fas nge Ir ba gagyeg nag muruwel nib thothup Rok. Dabiyog ni gu ba weliy adag rog Ngak.

Gadaed gubin ma gadaed e “fapi bitir ko fare mʼag” nibe suguy daken e fayleng nge nam nge gubin mit e yalen nibay ko nam, nib pireʼ nib pag e million, ni gadaed be soen nag fare wub rokʼ Somoel niʼir e Tathapeg rodaed. Piiʼ e tamilang ngak e gidiiʼ nibay u charendaed, arram rogon ni gadaed be powiʼiy e arʼarʼ rodaed, tafney rodaed, nge tin ni gadaed be melʼeg, nge ngongol rodaed. Napan ni gadaedra gay u poloʼ i gumʼirchaʼ daed ni ngaed nanged ma gadaed tʼufeg fare Tathapeg, ma arram ni gadaed be palog nagdaed ko tin nu fayleng u daken fapi mʼag rodaed ngak Got, ni gadaed bathil, ma gadaed be tayfan ma gadaed be fol ko fapi michib rokʼ ni yibe gay rogon ni dabni palog nigey rokʼ boech e gidiiʼ nib thil e tin nib michunwanʼraed ngay.

Rib felʼ e biney e milekag gadaed e wuldog ko faregi milayʼ, nib boech i ngiyalʼ e ba momawʼ machane ba gapas ni bachan e mich rodaed. Napan ni gara pag e tʼufeg rokʼ fare Tathapeg nge suguy lan gumʼirchaʼem, ma ri gube micheg nag ngom, e gapas, falfalaenʼn nra yib ni demuturug e pi nʼen nibe yib ngalan e yafos rom. Fare Tathapeg ke micheg ngodad: “Gu [ra mukun nag e gidiiʼ rog nga taʼabang, ni woed rogon fare fanethin ko woldug nge farengi milayʼ, ni fare woldug era thapeg e yafos ni manechubog, mara thapeg fare flaʼab ko celestial.”²⁶ U dakean fithngan Yesus Kristus, amen.