Ayuweg nga Weliy Mornga’agen e Mich Rom

Keb rok Elder Gary E. Stevenson

Ko fare Ulung ko fare Ragag nge L’agruwi Apostle

Gube piningmed ni ngam gayed rogon ni ngam weliyed e mich romed ko rogon e thin ni gamed be yoeg nge ngongol romed.

Tabolngin I Morngaʼagen

Boch banʼen e ma buch ulan e yafos rodaed ni dan dananged nra buch, bochingiyalʼ e ma buch ni kagdaed bitir. Nggu weliy morngaʼagen reb e bitir u high sukul, fithingan e Kevin, ni melʼeg ni nge milekag ngabang nifan ko sukul rokʼ, baʼaray rogon ni yog.

“Ke taw ngog ni gag e migid, ma fare clerk e fith fithingag. Me sap ko fapi ngochol nibay rok’ me ga’ar, ‘Ere gur e fachi pagal nibe’ u Utah.’

“‘N’en ni gabe yog e karimus ni yigo’ gag?’ Ni kug fith.

“‘Arragon, karimus ni yigo’gur.’ Me pii’ ngog fithingag nibay fare bugithin ni ‘Utah’ nga tanggin. Napan nigu pin nag fithingag, ma wod ni yigo yibe sap ngog.

“Mugu wan ngalan e elevator nibay laal e bitir riy ni ku wod gag. ‘Hey, gabe’ nu Utah. I gur reb e Mormon?’ nike fith reb fapi bitir.

“Ke kirkireb rogog ni gub thil ngak gubin fapi bitir nib thilthil e nam rorad ngog. ‘Arragon’, ni kug fulweg u fithik’ e kirkireb.

“‘I gur facha’ nib michuwun’ i Joseph Smith, nike yog nike guy e angel. Dam mog ni riyul’ nib michuwun’um ko ran’ey, fa danga’?’

“Dan kug nang ko mang e ngog. Fapi bitir ulan fare elevator e yad gubin ni yad be sap ngog. Fanug taw, yad gubin ni yad be lemnag ni gu ba thil. Kug dumomuw u biyang riy machane mu ga’ar, ‘Gu manang ni Joseph Smith e reb e profet rok’ Got.’

“‘Kab e biney u uw?’ Nike yib ko tafney rog. Dan gu nang ni rayag rog. Fapi thin ni gog e rigu thamiy ni rib riyu’.

“‘Arragon, kan nog ngog ni gimed e yigo tiliw e gamed ma lemnag,’ nike yog.

“Machan e bugney e thin, ma dakriy be’ ni non ulan fare elevator nga mada’ ko ngiyal’ nike mab fare mab. Napan nra bagmad nibe fek e chugum rok’, ma yan facha’ nibe minmin.

“De n’uw napan ngay, me ga’ar be’ ngog u tomur rog, ‘Ey, gathi Mormon e kabay reb e Bible rorad nib thil?’

“Oh danga’. Dabug ngki buch biyay. Mug chel ngu sap mug guy reb fapi bitir ni gamow bay ulan fare elevator, fithingan e Christopher.

“‘Fithingan e kanog fare Babyor ku Mormon ngay,’ ni ku fulweg, ni tafney rog e gu ba’adag ni dabkun weliy e biney. Mugu fek e chugum rog mugu tabab ko yan.

“‘Ireyer fare Babyor ni Joseph Smith e pilyeg e thin riy?’ nike fith.

“‘Arragon, i’ir,’ ni kug fulweg lungun. Kug be ul’ul’ ni gube yan, ni gube athapeg ni dabkun tamara’ nigeg.

“‘Ere, ga manang rogon nrayag ninge yag reb e pi babyor ney ngog?’

“Me yib reb e chep nib thothup ko tafney rog ni gu fil mornga’agen ko seminary. ‘Dan gu tamara’ ko gospel rok’ Yesus Kristus.’¹ Napan ni yib e biney e leam ngog, mug thamiy e tamara’ ni kug tamara’ ko n’en nike buch.

“Somm’on ko binem e wik e yigi par e tafney rog ko re chep nem nib thothup. Ku fulweg e duwer ni mornga’agen e Galasia ko urngin nrayag rog, ma ku thapeg e fagar nib bo’or.

“Ma ku pire’eg ni rigub falfalaen’ ko tiliw rog.

“Ku pii’ ngak Christopher bakan fare Babyor ku Mormon. Me yol ngog, nibe yog ngog nike pining e missionaries ngalan e tabinaw rok’.

“Ku nang ni dab ’ug tamara’ ni nggu weliy e tin nib michuwun’ug ngay.”²

Athamgil rok’ Kevin e ke pii’ e athamgil ngog ni nggu weliy e tin nib michuwun’ug ngay. Biney e athamgil e ma buch ni gubin ngiyal’ ko gidii’en e Galasia nib yul’yul’ u daken e fayleng. Napan ni bay gu weliy e tafney rog, ma gube piningmed ni ngam lem niged e pi duwer ni ba’aray:

Gu manang ma gu manang fan ko mang e michuwun’ug ngay?
Gu manang rogon ni nggu weliy e tin nib michuwun’ug ngay?
Mang e momaw’ riy ni ngan weliy mornga’agen e mich rog?
Uw rogon nrayag ni nggu ayuweg e tin nib mich ngay?

Gu manang ma gu manang fan ko mang e mich?

Mich rom e tin ni rib ga’fan ngom, nib ga’ nib peth rogon ko rogon e thamtham nib thothup. Pi thamtham ney e baga’ ni yima weliy mornga’agen ni wod e “lam ni rib achig laman.”³ Bugi ban’en nib michuwun’um ngay fa llowaen’ rok ko tin nib riyul’ ban’en nibe thogthog nag fare Kan ni Thothup. Napan ni gara nang e biney ma arram nra mom ngom ko n’en ni ngam mog fa n’en ni ngam rrin’. Pi n’en nib ga’fan ko mich rom, fare micheg nibe tay fare Kan ni Thothup, nib mu’un e:

Got e ir e Chitamangim nu Tharmiy; ma gur e bitir rok’. Gab tu’uf rok’
Yesus Kristus e bay nib fos. I ir e fak Got nibay nib fos ni’ir e fare Tathapeg nge fare Bayul rom.
Joseph Smith e ir e profet rok’ Got nikan mel’eg ninge fulweg yarmen e Galasia rok’ Yesus Kristus.
Fare Galasia ku Yesus Kristus ni Fan ko Gidii’en Got ko Tin Tomur e Rran e Galasia nib fulweg rok’ Got nibay u dakean e fayleng.
Galasia rok’ Yesus Kristus nikan fulweg yarmen e bay e profet riy nib fos nibe gagiyeg nag rogon.

Gu manang rogon ni nge weliy e tin nib michuwun’ug ngay?

Weliy e mich rom e wod ni gabe weliy e tin nib michuwun’um ngay nib thothup ngak boch e gidii’. Gadaed gidii’en e Galasia, wod ni gadad ma weliy e tin nib michuwan’dad ngay ulan e mo’olung ko Galassia fa wod ni gamew be non be’ ko tabinaw rom, fa tafagar, nge ku boch e gidii’.

Reb rogon nrayag ni ngam dag e mich rom e rogon pingim nib mat’aw. Mich rom ngak Yesus Kristus e gathi kemus rogon ko n’en ni gabe yog—ya kabang nibe dugliyem ko gur mini’.

Gubin ngiyal’ ni gabe yog fa gabe dag ya’an ni gabe lek Yesus Kristus, ma arram ni gabe pining boch e gidii’ ningar “bad ngak Kristus.”⁴

Gidii’en e Galasia e gubin ngiyal’ ni yad be par nib michuwan’rad Got, ko gubin ban’en, nge gubin yang.⁵ Bo’or kanawo’en nrayag ni ngan rrin’ e biney ko tin nibay ko online nrayag ningan weliy mornga’agen nib thothup. Rayag ni ngad daged e t’ufeg, magdaed pii’, min pining e gidii’, u online. Tweet, yol rom ngak be’, nge thin nrayag, ni gara weliy ko social media nrayag ninge dag rogon nike thilyeg e gospel rok’ Yesus Kristus e yafos rom.

Mang e momaw’ riy ni ngam weliy mornga’agen e mich rog?

N’en nib momaw’ riy e wod ni dan mu nang ko mang e ngamog. Matthew Cowley, reb e Apostle ni kakrom, e weliy e biney ni buch rok’ napan nib 17 nin pii’ ninge yan ko mission rok’ nga New Zealand ni laal e duw:

“Dabiyog pagtalin fapi meybil ku papa rog napan kug waen. Dug rungag e meybil nib boech pidorrang u lane yafos rog. Bin tomur e thin rok ngog, ‘Pagal rog, ni ngam maen e mission; ngam fil; ngam ngongoliy e machib rom; nge boechngiyal napan ba yib e pinning ngom, ga ba lem nag ni kam ngongoliy nib fel’, machane napan ga ba sakiy nga lang, ga ba patalin gubin e ban’en.’ Kug rin e biney boech.

“Mu ga’ar, ‘Mang e ngam rrin’ u napan nike chuw gubin ban’en ko tafney rom?’

“Me ga’ar, ‘Mu sak’iy u rom u fithik’ gelngim nrayag rom, maga micheg ni Joseph Smith e reb e profet rok’ Got, mara yib ko tafney rom nge thin ni ngam mog u langam … nge mada’ ngak gum’ircha’en e gidii’ nibe motoyil ngom.’ Ni aram rogon, nima mil e tafney rog… mission … , e ayuwegneg ni nggu weliy e mich rog ngak e fayleng ko napan e ngiyal’ ni kuruth nag fare Masta. Boch i ngiyal’ ma gimed gay rogon. Fa’anra dariy ban’en ni ngam moged, micheg ni Joseph Smith e reb e profet rok’ Got, ma fare cheppin e Galasia era suguy nag e tafney rom.”⁶

Ku wod, President Dallin H. Oaks ni weliy, “Boch i ngiyal’ ma mich e fel’ ni yibe nang rogon i rrin’ ko bin ba’aray ni yibe meybil nag.”⁷ Fare Thothup e ma micheg ko gidii’ nibe non nge gidii’ nibe motoyil nib chuchugur rogon.

Reb kanawo’en nib momaw’, e wod rogon ni weliy Kevin, yibe rus ngay. Wod rogon ni yoloy Paul ngak Timothy:

“Got e gathi ke pii’ ngodad a ya’al ko murus, ya gelngin, nge tu’ufeg. …

“Dab mu tamra’ ni ngu’um weliy murung’agen e Somol rodad.”⁸

Thamiy e murus e daram yib rok’ Somoel ya ma yib rok’ fare mo’oniyaen’. Michan’uy, ni wod rogon Kevin, e rayag nra ayuweg nem ngam gel ko mit ney e thamtham mag weliy e tin nibay u gum’ircha’em.

Uw rogon nrayag ni nggu ayuweg e tin nib michuwun’ug ngay?

Michuwun’ug ni mich e ban’en nibay rodaed, machane, fa’anra ba tu’uf ni nge par mab tu’uf ningan ayuweg nge ga’, Alma e machib nag ni thingar da ayuweged e mich rodaed ni rib gel.⁹ Ya napan ni gadaedra rrinʼ ni aray rogon “ma ra thaey likʼngin, me tugul nge gaaʼ, me piiʼ e waʼamngin.”¹⁰ Ma faʼanra dabin rrinʼ e biney, “ma aram me mororoy.”¹¹

Ra reb fapi gidiiʼen e bin Sommʼon e Presidency make powiʼiydad ko rogon ni ngad ayuweged e mich.

President Henry B. Eyring e ke machib nag ngodad “durwiʼiy yay ko thin rokʼ Got, meybil, nge fol ko fapi mochiyel rokʼ Somoel e rib tuʼuf ni ngan rrinʼ ni gubin ngiyalʼ ni nge yag ni nge ulʼulʼ fare mich rom nge gaʼ me monʼog.”¹²

President Dallin H. Oaks e ke pug oren ngodad ni faʼanra nge par e mich rodad, “mab tuʼuf ni ngad feked fare sakrament ni gubin e wik (muguy ko D&C 59:9) ni ngeyag ni ngad thapeged fare tawaʼath ni ‘gubin ngiyalʼ me par e thothup rokʼ [rodad]’ (D&C 20:77).”¹³

Nge President Russell M Nelson ni fin gi machib nag:

“Duruwiʼiy e [e mich rom] ko tin nib riyulʼ. …

“… Mu suguyem ko thin rokʼ e profet ni kakrom nge profet ni chiney. Mu fith ngak Somoel ko uw rogon nrayag ni ngam rungʼag laman nib felʼ rogon. Man nga temple ni gubin ngiyalʼ mag un ko muruwel nifen e cheppen e tabinaw.

“… Pag e mich rom ni nge mang e nʼen ni thʼabi gaʼfan ulan e yafos rom.”¹⁴

Thin Tomur

Pi walageg, gube micheg ngon ni napan ni gara nang fan fare mich, nge napan ni gara weliy morngaʼagen, mara mom ngom ma dabkum rus, mara ayuwegnem ni ngam ngam chugluy mag ayuweg e biney ni rib gaʼfan, niʼir e mich rom.

Gadad ba tawaʼath ko woʼen e profet ni kakrom nge profet ni chiney ko tin ni kar michib niged ngodaed ni morngaʼagen e mich rorad ni rib gel.

Tomuren ni yimʼ Kristus, me sakʼiy Peter nge michig:

“Me ere susun e gimed gubin ni go’ ngam nanged … fithingan Jesus Kristus nu Nazareth, ni ir fa’anem ni mu kuruth niged nge mu’ me faseg Got ko yam’ … nre mo’on ni ba’aray nib sak’iy u roy u p’eowchemed. …

“… Ya dakuriy yugu reb e ngachal ngabang u roy u fayleng ni pi’ Got ngak e girdi’, ni ir e rayag rok ni nge thapegdad ngak Got.”¹⁵

Amulek, ni lek e woʼen e mich ni michib nag Alma “bay gu micheg ngomed ni pinnʼey e ba riyulʼ. Musap gaed, gube yoeg ngomed, ni gumnang ni Kristus e bay yib nga fithikʼ e gidiiʼ, … ma bayi piiʼ ir ni bayul ni fan ko pi denen ko gidiiʼ nu fayleng; ya fare Somoel ni Got e ke yoeg.”¹⁶

Joseph Smith nge Sidney Ridden, u tomuren nikar michegew fare yiʼiy ni fos fare Tathapeg ko yamʼ, are michegnew:

“Arame chiney, tomuren urngin e mich nikan piʼ nifan, irerray fare mich, bin tomur ko gubin, nikan piiʼ nifan: Nibay nib fos!

“Ya kug guyed, nibay ko bin ni matʼaw i paʼ Got; ni kug rungʼaged fare lam ni micheg niʼir e bin riyulʼ ma karimus e en ni fak Got.”¹⁷

Pi walageg, gube pining med ni ngam gayed rogon ni ngam weliyed e mich romed ko rogon e thin nge rogon e ngongol romed. Biney e ke buch rug ni dawri nʼuw napan, tomuren ba moʼolung u South America, ulan ere moʼolung ney nib sug ko gidiiʼ. Napan ni gu muʼgad ko fare muʼulung me yib ba thamtham ngog, ni gu kirkireb riy ningu weliy e mich rog. Napan ni gu rrinʼ ni wod rogon fare thamtham nike yib ngog, mugu micheg ni Yesus Kristus e fak Got nibay nib fos niʼir e fare Tathapeg ko fayleng. Gubin banʼen ni thil ko ngiyalʼ nem. Fare thothup ni yib ngalan fare singgil e reb alamrin. Wod ni gubin e gidiiʼ nike thamiy. “Far Kan ni Thothup … ba machib nag morngaʼagen fare Chitamangiy nge fare Fak.”¹⁸ Ma kari falfalaenʼug ngay nigu athamgil nggu weliy e mich rog.

Napan nra buch e biney, maga rrinʼ me falfalaenʼ ngay. Ya garam thamiy fare Thothup napan ni gara rrinʼ e biney.

Gube micheg nag ngom—ni Got e Chitamangdaed nibay u Tharmiy, Yesus Kristus e bay nib fos, nge Fare Galasia ku Yesus Kristus ni Fan ko Gidiiʼen Got ko Tin Tomur e Rran e Galasia rokʼ Got nibay e dabaʼ u daken e fayleng nibe gagiyeg nag fare profet rodad, President Russell M. Nelson. U dakean fithngan Yesus Kristus, amen.