In Sie sin Sie nuh sin Leum
Wosasuc folohkyak luhn Jisus Kraist fahkwelihk ip yohk ke sie sin sie ke ma nuhkwewa inmahsrlon muhtwacn ac mukul, kewana in moul se inge ac ne tok ma pahtpaht.
Ke kuht tuhfahnna pahyuckyak ah, muhtwacn sacohk kiuck el ke lutlut on. Kena in ahkenganyacl, nga plwacni ma wowo se in ahklutye muhtwacn se suc nga luhngse yohk. Nga som nuh ke stoh in on se ac molwelah ohkohn se in mwe sang se. Nga rahrahlac fihliyac pwepuh kac ah nuh lin pohk se ac sang nuh sel,tuhpan top in kuloh lal nuh sin mukul luhngse ac saohklacna se tuhmwacl inge.
Ke el ikacslah pohk srihsrihk sac ac liye koano ah, el ngwetma nuh sihk ke luhngse ac fahk, “O, mukul sacohk luhk, kom arlacna wo! Tuhsruhk tuh lwelah ngan siyuck kihsen siyuck se: Mwe sang se pa inge kuh soemoul se?” Tukun kuht tuhkweni sramsram ke mwe sang sac, kuht sulaclah in tilac moli. Kuht tuhlik lutlut srihklac mani lasr, oacna mwet fuhsr sahyac suc tuhfanna pahyuckyak. Ohiyac se inge kahsreyuc in akihlen yohk srihpaciyacn ip yohk ke sie sin sie ke ma nuhkwewa ke moul in pahyuck se ac in orekmakihnyuck fuhkah in kahsreyuc ac muhtwacn kiyuck uh in insiac sefanna ac nuhnak sefanna.1
Wosasuc folohkyak luhn Jisus Kraist fahkwelihk ip yohk ke sie sin sie ke ma nuhkwewa inmahsrlon muhtwacn ac mukul, kewana in moul se inge ac nwe tok ma pahtpaht. Finne oasr taluhn ac kunohkohn ma tuhkuh lucng nuh sin kais sie, muhtwacn ac mukul oacna sie ac yohk srihpac nuh ke plwacn in engan luhn God nuh sin tuhlihk Nahtuhl.2 Ma se nge tuhkuh pwacye na emeet ke Leum el fahk muh tiacna wo mukul se in muhkwena; Oruh Elac oraclah sie kahsruh ah nuh sel.”3
Ke plwacn luhn Leum, “kahsruh fal” pa sie selos suc e fahsr finpisac nuh ke finpisac weluhl Adam in sie sin sie ke ma nuhkwewa.4 Pwacyena, Eve el mwe insewowo inkuhsrao nuhke moul lal Adam. Ke mwe sang lucng ac nguhn in el, el kahsrwel Adam elos in tuhkweni sie sin sie oraclah plwacn in engan luhn God nuh sin mwet nuhkwewa.5
Lwelah kuht in motko ke ip yohk luo ma ahkweye sie in sie inmahsrlon mukul se ac muhtwacn se. Mwe luti se emet pa kuht nuhkwewa in oacna sie nuh sin God.6 Ke mwe luti luhn wosasuc, ma tiac oacna sie ke mukul se ac muhtwacn se tiacna yohk srihpac liki olwelah ma pahtpaht ma God El sang nuh sin wen ac acn Nahtuhl. Mwet se tiac kuh in eis yohk usru lal ke wolacna celestial liki sie ke moul ma pahtpaht.7 Mwet Lahngo El suli kuht nuhkwewa, tuhlihk nuhtin God, “in tuhkuh nuh Yorohl, in ipeis ke wolacna Lal, ac El tiac lahfwekihn oacna sie suc tuhkuh nuh Yorohl.”8 Pwacnwacng, ke srihpac se inge, kuht nuhkewa oacna sie nuh Sel.
Ke mukul tuhmwac kuh muhtwacn kiac kahlwem ac orekmakihn ip yohk se inge, elos tiac oraclah muh elos pa prestuhn kuh vice prestuhn ke sucu lalos. Wacngihn mwet fuhlwact kuh mwet ten ke pahyuck, ac sie ac tiacna fahsr met kuh tok liki sie. Elos tuhkweni fahsr oacna sie, tuhlihk wolacna nuhtin God. Elos muhtacwacack in ma sefanna ke nuhnak, kena, ac srihpac luhn Pahpah Tuhmasr Inkuhsrao ac Jisus Kraist,9 kol ac pen sucu se in ma sefanna.
Ke sie sin sie wowo uh, “luhngse tiac ma in sruokyac tuhsruhk pa wiwina, … ip ke orek tuhlihk pa srihpac luhn mwet.”10 “Fin wi na pwacye, mukul tuhmwac ac muhtwacn kiac fahsrweni nuhke sie ‘leumi fuhlwact’ ma ac ‘wacngihn kuh srihsrihk’ ac acl ke moul nguhn nuh selos ac tuhliihk nahtuhlos ‘nwe tok ma pahtpaht.’”11
Ip yohk ahkluo pa Masap Fuhlwact, lutiyuck sin Mwet Lahngo ke Luti Lal fin Finohl uh: “Oru nuh sin mwet ngia oapana ma kom lungse elos in oru nu sum.”12 Ip yohk se inge fahklah puhla luhn toeni, kahsruh sie sin sie, ma sefanna , ac tahpuhk tuhkuh ke masap fuhlwact ahkluo, “Kom fah lungse mwet tulan lom oana ke kom lungse kom sifacna.”13 Som oacpacna nuhkeip luhn Christian sahyac ah pa nuh ke muhtweng, mongfihsrwacsr, inse puhsisacl, ac kuhlwacng.
In ahkohnye kahlwem la ke orekmakihnyacn ip yohk se inge, kuht kuh in liye kuhpahsr muhtahl ac ma pahtpaht sin God inmahrsrlon pahpah ninac se emet kiyacsr, Adam ac Eve. Elos mahno sefanna lac,14 oraclah ma na fokoko se ma lwelah elos in tuhkweni fahsr kac ke suhnak, srui, ac luhngse, muhlkuhnlah kaclos sifacna ac suk in kahsruh sie sin sie ke fuhfahsryucsr lalos nuh ke moul ma pahtpaht.
Ohiyac inge pa ma kuht luhngse eis ke pahyuck insese lasr misenge. Ke sil lun tempuhl, muhtwacn se ac mukul se ilyak nuhke olwelah muhtahl luhn pahyuck ke olweacng sasuc ac kawihl. Ke ohiyac se luhn pristut inge, elos eis mwe insewowo kawihl ac kuh wolacna in kol mukwikwi luhn sucu lalos ke elos moulkihn wuhlweacng elos orwaclah. Ke pacl se nge ne tok, elos fahsr nuh meet ac sie sin sie ke ma nuhkewa nuh sin Leum, yohkna ke kunohkohn wolacna luhn kais sie ke karingihn ac kol sucu lalos.15 Karingihn ac kol orekma pa tuhkweni ac akacsruhi kunohkohn, kalmac pa ninac ac pahpah “enenuh in kahsruh sie sin sie in oacna sie”16 ac kuhsruh sie sin sie kol lohm selos.
“Kalmacn karihngihn pa in ahkyohk, luti, ac kahsruh mempucr ke sucu, suc ahkfahsryeyuck ke “kahsrwelos in lotwelah ma pwacye luhn wosasuc ac ahkyohkye luhlahlfongi ke Pahpah Tuhmasr Inkuhsrao ac Jisus Kraist” ke acn in luhngse. Kalmacn kol pa “kahsruh kol mempucr ke sucu in folohk moul yurin God. Ma inge oreklac ke kuhlwacnsap ac luti ke mongfihsrwacsr, inse phusisacl, as luhngse pwacye.” Nwacnwack pac “kol mempucr ke sucu in pruhe, lutlutkihn wosasuc, ac ip sahyac luhn ahkfuhlwact. Pahpah ninac tuhkweni orekma,” ukwe srikasrak luhn Jisus Kraist, ”in ahkfalye kunohkohn [yohk luo] inge.”17
Yohk srihpac in liye lah kafucrmacn ke sucu uh ukwe mwe srikasrak luhn patriarch, sienna kuhtuh liki kolyuck luhn pristut ke alu uh.18 Pactuhn se ke patriarch ah fahk lah muhtwacn kiyac ac mukul tuhma oasr mwacta lalos nuh sin God ke ahkfalyeyacn kunohkohn muhtahl ke sucu lalos. Pa oruh enenuh in sie sin sie ke ma nuh kwewa, kena in moulkihn ip yohk nuhkwewa ke ma suwohs ac sang pacl in kapkapwack ke acn in luhngse ac kahsruh sie sin sie.19 Kunohkohn sacohklacna inge tiac srihsrngiyac lah suc kac fuhlwact ac tiac lwelah in oasr ahkkoluk, wal, kuh nuhnkuh lah oasr mwet fuhlwact ke sucu uh.
Moul lal Adam ec Eve, tukun elos som liki Imac luhn Eden, ahkkahlwemye mwe luti ke ataptapi inmahsrlon ninac ac pahpah in tuhfahlah ac kol sucu lalos. Oacna ke mwe luti in puk luhn Moses, elos tuhkweni orekma in kihlihng infohk uh ke fiyoh in kemkahtuh in karihngihn enenuh luhn mahno ke sucu lalos;20 elos use tuhlihk nuh fin facluh;21 elos tuhkweni pahngon inen Leum ac lohng Puhsrwacl “tuhkuh ke innek soko nuh ke Imac luhn Eden; 22 elos eis masap luhn Leum ac tuhkweni ahkos masap uh.23 Na elos luti ma [inge] nuh sin wen ac acn nahtuhlos24 ac tiacna tui in tuhkweni pruhe nuh sin God fal nuhke mwe enenuh lalos.25
Tamuhlwel ac tahmtahel sacohk wiyuck, karingihn ac kol elos inkacnek na wowo, wacngihn sahflahiyac. Oasr mwet se kuh in kunweyucki in oruh ma se tuhsruhktuh tiac el muhkwena pa e oruh uh. Ke pahpah ninac yohk luhngse la kahlwem ke kunohkohn yohk luo inge, elos ac tuhkweni orekma in kahsruh ac karihngihn tuhlihk nahtuhlos ke ma luhn mahno ac ma luhn nguhn. Elos kahsruh pac tuhlihk nahtuhlos in kuhtanglah ma sensen in nguhn ke moul lasr misenge ke elos lotwelos kahs wowo luhn Leum ma El tuh sang nuh sin mwet pahluh Lal ah.
Finne mukul tuhmwac ac muhtwacn kiac kahsruh sie sin sie ke kunohkohn wolacna lalos, “suhkahpahs, misac, kuh kuhtwena ohiyac kuh in orwaclah eklac ke ma kunacn kais sie nuh ke karihngihnyacn sucu.”26 Kuhtuh pacl uh sie sin mukul kuh muhtwacn inge kuh in oruh kewana kunohkohn luhn mukul se ac muhtwacn se, finne ma na ingena kuh ma ne tok.
Nga tuhfahna ohsun sin muhtwacn se ac mukul se suc moul oacna nga tuhfahnna fahk ngacn. In muhkwena wacngihn tahfeyac, kais sie, inmahsrlon sucu lalos ac in sie sin sie wi Leum, sulaclah in sang moul lalos nuhke karingihn moul in nguhn ac moul in ikoac luhn tuhlihk nahtuhlos. Elos tiacna tohllah wuhlwelah elos oraclah in tempuhl nuh sin Leum ac olwelah ma pahtpaht Lal finne upac fahsrwelihk lalos ah. Kwewana suk kahsruh luhn Leum ke ma nuhkwewa ke elos kampare in muhtweng ma upac lalos in fahsr ke inkacnek suwohs. Elos luhlahlfongi lah Leum El ac karingihn enenuh lalos, tiacna ke moul se inge muhkwena, tuhsruhktuh ne tok ma pahtpaht. Kwewana karingihn tuhlihk nahtuhlos ke elos lotwelos ke mongfihsrwacsr, inse puhsisacl, ac luhngse pwacye finne oasr pacl upac ke moul uh. Ke etwacack luhk, pahpah ninac wacngihnlac tahfeyac inge tiacna ahngyang sin God ke ma koluk ke moul lalos. Sahyacna, elos fahsrot nuh met ke kahlwem suwohs luhn finsrak ac luhlahlfongi ke mwe insewowo luhn Leum Elac sang nuh selos. 27
Tamuhlwel ac tahmtahel, Mwet Lahngo el fihliyac mwe srihkasrak na wowo ke tuhkweni ac akacsruhi ac mwe lutlut ke pahpah tuhmasr inkosrao. El pruhe ke mwet tuhma lutlut lal, ac fahk, “Tuh elos in ma se fanna; oacna ke kom, Pahpah, an in nga, ac nga in kom, tuh elos in kuh pac in sie in kacssr: … tuh elos in sie, oacna ke kuht sie uh.”28
Tamuhlwel ac tahmtahel, nga fahkwack nuh suwos lah ke kuht—muhtwacn ac mukul—tuhkweni orekma sie sin sie pwacye, kuht ac puhla engan sefanna ma lutiyuck sin Mwet Lahngo fin kuht ahkfalye kunohkohn fulwact ke pahyuck lasr. Nga olwelah nuh suwos, ke inen Jisus Kraist, insiyac ac “maeni in ma se ac in luhngse sie sin sie,“29kuht ac eis engan in yohk ke fuhfahsryucsr nuh moul ma pahtpaht, ac kuh lasr in kuhlwacnsuhpuh sie sin sie ac tuhkweni kapwack in yohk.30 Nga mwet liyactwen ke ma pwacye inge ke ine muhtahl luhn Mwet Lahngo Jisus Kraist, amen.