Kuhtanglah Facluh ac Sokwack Monglac
Sokwack monglac liki nuhkanlah ac fohsack luhn facluh ke kuhtanglah facluh ke wuhlweacng lom sin God.
Tamuhlwel ac tahmtahel sacohk wiyuck, yohk engan luhk in paing kom ke litutacng in Sahpuht na kahto se inge. Kom oasr in nuhnak luhk uh. Nga fwefwelac ke inkwacnek kom oruh pacl nuhkewa ke kom liye mwet sahyac enenuh kahsruh. Nga fwefwelac ke luhlahlfongi ac etuh lom ma kom oruh na oruh uh. Nga tuhng ke ngal, ahsor, ac elyah lom. Nga luhngse kom. Nga ke ahkkweye kom lah Pahpah tuhmasr Inkuhsrao ac Wen Kuloh Nahtuhl, Jisus Kraist, luhngse kom. Elos etuh na pwacye ma nuhkewa yurum, ma wo, enenuh lom, ac pruhe lom in suk kahsruh. Nga pruhe na pruhe, keim tuh kom in puhla luhngse Lalos nuh sum uh.
In puhla luhngse Lalos uh ma na yohk se, ke srihpen lwen nuhkewa oacna in ma kuht lohng liye uh ahsor. Sahp oasr pacl kom ke nokomwacng nuknuk in mutul lom an, an lokweni, ac siyuck sin sie mwet ah in okaskomyak pacl fohs inge tari uh.
Tuhsruhk, tamuhlwel ac tahmtahel sacohk wiyuck, puhkantwen ma wowo meet uh. Ke pacl fahsruh ngoh, kuht e fah liye me ahkkahlwemye se ma yohk emeet ke kuh luhn Mwet Lahngo ma facluh e fahna liye. Inmahsrlon ingena ac pacl se El ac fohlohk ke kuh ac wolacna,1 Elac sang ma wowo, mwe insewowo, ac ma usrnguck nuh sin mwet luhlahlfongi.
Ne ohinge, kuht ingena muhta ke pacl se kuht kuh in fahk muh koflah in ahkuhtweyucki ke sramsram ke facluh uh. Ohiyac ac ma upac nuhkewa inge oruh puhs mwet puhla toasr kuh ullac. Ne ohinge, nuhnkuh ke ma se nga sun ma sahp kuh in se kahlwem in kahsreyuc kom in sokack monglac.
Ke open house se tuhfahna orek tari Tempuhl Washington D.C ah, sie mempucr ke u in open house sac liack eklac na yohk se ke el pwen mwet in sihm nuh tempuhl ah. Ke kuhtuh srihpac sucu fuhsr se wi u in muhtwacta se inge. Sie mwet repohrt ah nuh siyuck na “fuhfahsryucsr” luhn mwet orekma tempuhl ah ke el oruh inte lal lin tempuhl ah. El ke etuh lah fuhfahsryucsr tempuhl uh oacpacna ma upac ke fuhfahsryucsr luhn mwet se ke moul se uh.
Tuhlihk mukul fuhsr se ke sucu sac fahk lah ma se ke pacl se inge. Ke u in muhtwacta sac ilyak nuh ke infuckihl in mwe loang sac, acn se ma mwet uh sikuck muhtuhnte ac oraclah wuhlweacng lalos nuh sin God, ac fahk, “Oh, sun ma sacn. Pa inge acn se ma mwet uh eis monglac ke fuhfahsryucsr tempuhl lalos.”
Nga finsrak tuhlihk mukul se inge in etuh lah ma se el fahk ah pwacye na pwacye. Sahp wacngihn na pwacye etuh lal ke wuhlweacng oreklac lin tempuhl nuh sin God ac olwelah pwacye luhn Mwet Lahngo.
“Fahsru nu yuruk, kowos su orekma ac totola, tuh nga fah sot mongla nu suwos.
“Eis srenenu luk nu fowos ac lutlut sik; … ac kowos fah konauk mongla nuh insiowos.
“Tuh srenenu luk fisrasr, ac mwe utuk luk mulala.”2
Nuh suwos tamuhlwel ac tahmtahel, nga ahsor kaclos suc som liki Alu uh ke srihpen elos puhlakihn muh wi lalos uh enenuh ma puhkantwen selos. Elos soena sokwack lah oraclah ac karuhnguhnwacng wuhlweacng oruh fihsrwacsr moul uh. Kais sie mwet ma oraclah wuhlweacng la ke acn in pacptais ac lin tempuhl—ac karuhnguhnwacng—elos ahkyohkyelihk inkacnek nuh ke kuh lal Jisus Kraist. Nuhnak muhnahs nuhnkuh ke ma pwacye na usrnguck se ngacn!
Opi nuh ke kuhruhnguhnwacng wuhlweacng weluhl God uh pa kuh inkuhsrao—kuh se ma e ahkkweye kuht in kuhtanglah elyah, mwe sruhf ac mwe lokoalok lasr in wolac. Kuh se inge ahkfihsracsryelah inkacnek lasr. Elos suc ma moulkihn masap fuhlwact luhn Jisus Kraist oasr innek lalos nuh ke kuh fuhlwact se Lal inge. Oruh, elos suc karihngihn wuhlweacng uh oasr acn in monglac se sriyucklac nuh selos ma e sonolos ke kuhpahsr in wuhlweacng lalos nuh sin God.
Met liki Mwet Lahngo el sifacna Eisaclang nuh ke kweok Gethsemane ac Calvary, El sapkihn nuh sin Mwet Sap Lal, “Ke kowos muta faclu kowos ac keok. Tusruktu kowos in pulaik na! Nga kutangla faclu tari!.”3 Tohkoh, Jisus El ngihsre pacna sesr kais sie oacpacna ke El fahk, muh El luhngse kuht in kuhtanglah facluh.4
Tamuhlwel ac tahmtahel sacohk wiyuck, pweng luhk nuh sum misenge uh ke srihpen Jisus Kraist el kuhtanglah facl puhtatlac se inge, ac ke srihpen El iwaclah kais sie sesr, kom kuh pac in kuhtanglah ma koluk luhlahp, nuhnkac kac sifacna, ac facl na use ulac se inge.
Ke srihpen Mwet Lahngo, ke Iwaclah koflah in srihkweyucki Lal, molwelah kais sie sesr ke muhnahs, tahfonglac, ac ma koluk, ac ke srihpen El puhla kewa ngal, elyah, ac toasr kowos puhla tari,5 oruh ke kom auliyak pwacye ac suk kahsruh Lal, kom kuh in kuhtanglah ma upac fin facl se inge.
Kom kuh in kuhtanglah facl koluk ac alsruhngacsr se inge ke nguhn ac nuhnak, suc pa nuh ke fihlwacng, inse fuhlwact, ahngyahng, kosro, sruhnga, rahpkuh, lwemta, ac sahngweng. Tiac elyah lah oasr mwe lusrong ac mwe ahkfohs raunikuhtlac, kom kuh in konacack monglac pwacye—kalmac pa sef ac mihs—finne nuh ke elyah upac fohs lom an.
Ma yohk srihpac pwacye tolu inge pihrihk kihsen siyuck tolu inge:
Ma se meet an, meac kalmac in kuhtanglac facluh?
Ahkluo, kuht e oruh fuhkah?
Ac ahktolu, kuhtanglah facluh e ahkinsewowoye moul lasr uh fuhkah?
Meac kalmac in kuhtanglac facluh? Kalmac pa kuhtanglah mwe sruhf ma elyahi kuht nuh ke ma luhn facluh liki na ma luhn God uh. Kalmac pa in luhlahlfongi ke mwe luti luhn Kraist yohk liki na etuh kahlwem luhn mwet uh. Kalmac pa in engankihn ma pwacye, kahingkihn ma kikiacp ac in eklac “mwet puhsisacl suc fahsr tukun Kraist.”6 Kalmac pa in sulwaclah oacna sie ma luhslah Nguhn. Kalmac pa in “tohlah nohfohn” ke insiac finne ma koluk kuht luhngse.7
Inge, kuhtanglah facluh tiac pa in suwohs ke moul se inge, kuh kalmac pa elyah lom nuhkewa e mwenmwen wacngihnlac—ke srihpen e tiac sikyak. Ac tiac kalmac pa kom e te sifwilpac tahfonglac. Tuhsruhk kuhtanglah facluh kalmac pa ohiyac in tilokihnyac ma koluk lom an e yohkwelihk. Insiom e muhlahlahi fin luhlahlfongi lom ke Jisus Kraist yohkwelihk.8 Kalmen kuhtanglah facluh pa luhngse lom nuh sel God ac Wen Kuloh Nahtuhl e yohkwelihk yohk liki na luhngse lom nuh sin mwet sahyac kuh nuh ke ma nuhkewa sahyac uh.
Na, fuhkah, kuht in kuhtanglah facluh? Tohkohsrah Benjamin el luti lah kuht e oruh fuhkah. El luti lah “mwet luhngse ma luhn facluh el sie mwet in lokoalok nuh sin God” ac e fah ne tok ma pahtpaht “sahyacn el lohacng nuh ke kolyuck luhn Nguhn Muhtahl, ac sislah ma luhn mwet luhngse facluh ac eklac sie mwet luhlahlfongi ke iwaclah luhn Leum Kraist.”9 Kais sie pacl kom suk ac ukwe kolyuck luhn Nguhn, kais sie pacl kom oruh oacna sie ma wo—ma ma “mwet luhngse ma luhn facluh” e tiac oruh—kom kuhtanglah facluh.
Kuhtanglah facluh tiac mukwikwi se sikyak ke lwen se kuh luo. Sikyak ke lusen moul lasr ke kuht sikalweni in sruokyac mwe luti luhn Kraist. Kuht tafla luhlahlfongi ke Jisus Kraist ke auliyak pacl nuhkewa ac karihngihn wuhlweacng ma utuckuh nuh sesr ke kuh. Kuht muhta ke inkacnek in wuhlweacng ac ahkinsewowoyeyuck ke kuh luhn nguhn, fwackyuck nuh sesr sifacna, ahkyohkye luhlahlfongi, ac ke luti luhn lipufacn. Moulkihn mwe luti luhn Kraist kuh in use kuh na fokoko pactuhn sasuc nwacsnwacs se, muhsaheack mukwikwi luhn nguhn in moul lasr.10
Ke kuht kampare in moulkihn masap fuhlwact luhn Jisus Kraist, insiacsr ac atacsr e muhtwacwacack in eklac. Mwet Lahngo El sruhk kuhtyak liki facl elyah se inge ke El ahkinsewowoyekuht yohk ke luhngse pwacye, puhsisacl, orekma wowo, kuhlwacng, liacng sifacna, mihs, ac monglac.
Inge, sahp kom e nuhnkuh muh ma inge enenuh in yohk orekma kac liki na in monglac Tuhsruhk pa inge ma pwacye sahflah kac uh: ke facluh luhngse kuh sacn, wal, pwengpweng, ac ma wo nuh ke ikoac ma sang engan, elos tiacna! Etlahl tiac kuh! Wacngihn ma elos oraclah kac sahyacn na acn oalal se nuh ke “mwe insewowo ac ohiyac engan” lalos [suc] “liyacacn masap luhn God.”11
Pwacye na lah e upac yohk ulac in sokwack engan ke acn ma kom koflah sokwack we! Tuhsruhktuh, ke kom sang srenenuh lom nuh sel Jisus Kraist ac oruh orekma luhn nguhn ma e kasrekom kuhtanglah facluh, El, ac El muhkena, oasr kuh in sruhkomyak liki ulul luhn facluh se inge.
Na, kuhtanglac facluh e ahkinsewowoye moul lasr fuhkah? Top nuh kac an kahlwem: ilyak nuh ke wuhlweacng kuhpahsr se wi God kaprikuhti nuh Sel nuh ke inkacnek se ma oruh ma nuhkewa ke moul uh in fihsrwacsr. Nuhnak muhnahs nimet fohsack sihk: Nga tiacna fahk muh orek wuhlweacng oruh moul uh fihsrwacsruh. Pwacyeiyac ah pa, tuhpan ma koluk kac an, ke srihpen mwet lain sacn tiac luhngse kom in sokwack kuh luhn Jisus Kraist. Tuhsruhk kalmacn sang srenenuh lom nuh sin Mwet Lahngo pa oasr inkacnek lom nuh ke kuh ac molwelah Lal.
Nga sifil ahkkweye mwe luti lal Prestuhn Ezra Taft Benson: “Mukul ac muhtwacn suc ekuhlah moul lalos nuh sin God e konwacack lah El kuh in oruh ma puhs ke moul lalos liki na ma elos kuh in oruh. El ac ahkloalye luhngse lalos, ahkyohkye mwemwe lalos, ahksaye nuhnak lalos, … ahkmuhlahlahye nguhn lalos, ahkpuhsye mwe insewowo lalos, ahkyohkye inkacnek lalos, ahkwoye nguhn lalos, sang kawuck, ac kahkuhnlah mihs nuh faclos.”12
Ma wo tiac kuh in kapsreyuck inge ukaclos suc suk kahsruh inkuhsrao in kahsrwelos kuhtanglah facluh se inge. Nuh ke sahflahiyac, nga suli nuh suwos mempucrs nuhkewa ke Alu uh sap soko pacna nga sang nuh sin mwet mahtuh fuhsr ke Mei ah. Nga kwacfelos ingoh—ac ngihsre sum ingena—in sifacna kol luhlahlfongi lom kacl Jisus Kraist ac wosasuc Lal. Orekma kac. Liyacacng in muh kapwack. Kihte ke ma pwacye. Nimet ahkfohkfohkye ke etuh stuhuh luhn mukul ac muhtwacn wacngihn luhlahlfongi la. Ke kom kalweni in ahkfokokoye luhlahlfongi lom ke Jisus Kraist in pa emeet uh, tuhpan ma usrnguck ma e tuhkuh nuh ke moul lom.13
Nguhsr luhk nuh sum ke olitu se inge uh pa in sokwack monglac liki nuhkanlah ac fohsack luhn facluh ke kuhtanglah facluh ke wuhlweacng lom sin God. Lwelah Elan etuh ke pruhe ac mukwikwi lom lah kom sang na pacye in kuhtanglah facluh. Siyuck Sel elan ahkkahlwemye nuhnak lom ac in suhpwacma enenuh lom an. Kais sie lwen, suhmuhslah nuhnak ma tuhkuh nuh sum ke kom pruhe; na kom oaru in ukwe. Oruh in yohk pacl kom sislah tempuhl ac suk in kahlwem lah tempuhl e kahwsrekom fuhkah in tuyak liki facl puhtatlac se inge.14
Oacna ke nga fahk meet ah, fahsrweni luhn Israel pa orekma yohk srihpac se emeet ma ahkfahsryeyuck fin facluh misenge. Sie ip yohk srihpac ke fahsrweni se inge pa in ahkoelah mwet ma kuh, ahkolah, ac suwohs in eis Leum ke Elac sifil tuhkuh; mwet ma sulaclah Jisus Kraist tari liki facl puhtatlac se inge, mwet ma engankihn sulaclah lalos in moulkihn masap fuhlwact, muhtahl luhn Jisus Kraist.
Nga pahng nuh suwos, tamuhlwel ac tahmtahel sacohk wiyuck, in muhtacwacack in kain in mwet suwohs se inge. Engankihn ac ahkfuhlwactye wuhlweacng lom Ke kom sang God elan kuhtanglah moul lom an, nga olwelah nuh sum mihs, puhla wo, engan, ac ahok, monglac.
Ke kuh luhn mwet sap muhtahl utuckuh nuh sihk, nga ahkinsewowoye kom ke fahsr lom in kuhtanglah facluh se inge. Nga ahkinsewowoye kom in ahkyohkye luhlahlfongi lom ke Jisus Kraist ac in sifil ahkwoye fuhkah in eis kuh Lal. Nga ahkinsewowoye kom in kahingkuhnlah ma pwacye liki ma suhtuh. Nga ahkinsewowoye kom in lohacng yohk nuh ke ma luhn God liki na ma luhn facluh se inge. Nga ahkinsewowoye kom in liye enenuh luhn mwet raunikomlac ac ahkkweyaclos suc kom luhngse. Ke srihpen Jisus Kraist el kuhtanglah facluh se inge, kom kuh pac. Nga fahkwack ma inge ke ine muhtahl luhn Jisus Kraist, amen.