Orekmakihn Kuh Lom, O Zion
Kais sie sesr enenuh in liye ma yohk srihpac nuh sesr ke facluh ac nguhn ke pruhe.
Puhpuhlyuck luhn Leum Jisus Kaist ip askuhlacna ke luti wolacna Lal. In kahlwem wo, puhpuhlyuck luhn Mwet Lahngo ma sruhmuhnyuck in ahkuhtweyac ma pwacye ke ma luhn nguhn nuh ke ma luhn facluh. Pa nuh ke, Wosasuc ke Wuhlweacng Mahtuh sesseslah ke mwe luti lah tohkohsrahi luhn Inkuhsrao el oacna fiten mustard se,1 sie pearl ma arulacna yohk molo,2 sie mwet sifacn lohm ac mwet kuhlwacnsap in imac lal,3 muhtwacn fuhsr singucul,4 ac nuh ke ma puhs sahyac. Ke kuhlwacnsap luhn Leum fin acn Galilea, ma suhmuhslah luti lah “el ac tia kaskas nu selos el fin tia orekmakin pupulyuk”5
Kalmeyac kuh pweng ke sie puhpuhlyuck uh tiacna ahkkahlwemyeyuck suwohs pacl nuhkwewa. Sahyacna, ma sruhmuhnyuck ah ahkkahlwemye ma pwacye muhtahl nuh sin mwet se fal nuh ke luhlahlfongi lal nuh sin God, mwe ahkolah in nguhn lal, ac kena lal in eis mwe luti. Ohinge, mwet se el enenuh in orekmakihn suhkosok in sulaclah lal ac “siyuck, suk, ac towolack”6 in konwack ma pwacye lun puhpuhlyak uh.
Nga lihksrweni pruhe tuh Nguhn Muhtahl fah luti kuht kais sie ke kuht nuhnkuh ke ma yohk srihpac luhn puhpuhlyuck ke kuhfwen macruht na yohk sac.
Kuhfwen Macruht
“Ac Jisus … el sifilpa orekmakin kas in pupulyuk ke el kaskas nu sin mwet uh, ac El fahk,
“Tokosrai lun God ouinge: Oasr sie tokosra su akoo sie kufwen marut nu sin wen se natul,
“El supwalik mwet kulansap lal in som solama mwet ma solsol tari nu ke kufwen marut uh elos in tuku, tuh elos tia lungse tuku.
“Na el sifilpa supwala kutu pac mwet kulansap in fahk nu selos su solsol: Kufwa luk uh akola tari, cow mukul wowo nutik ac cow fusr ma akfatyeyuk anwuki tari, ac ma nukewa akola. Fahsru nu ke kufwen marut uh!
“Tusruktu mwet ma solsol uh pilesru na ac oru na lungse lalos uh: sie som nu ke ima lal, sie som nu ke nien kuka lal.”7
Ke pacl somlah ah, sie pacl ma pwacr yohk emet ke moul luhn mwet Jew pa ahkfuhlwetyeyuck luhn macruht uh—tuhkweni se kuh in sikyak lusen wik se kuh luo. Kain in tuhkweni inge enenuh in ahkoeyucklac wo, ac mwet ma suliyuck nuh kac uh eis solsol lalos na emeet, ac wi e sifiwl ahkacsmakihnyeyuck ke lwen in ahkfuhlwact sac. Mwe sol se sin sie tohkohsrah nuh sin mwet lal ah nuh ke macruht ma oacna macruht sruhmuhnyuck inge oacpacna sie masap. Tuhsruhktuh, puhs mwet ma suliyuck ke puhpuhlyuck se inge elos tiac tuhkuh.8
“In lain mwe sol se ac tiac wi kuhfa luhn tohkohsra pa mukwikwi se lain … wal fuhlwact ac ma ahkkoluk se nuh sin tohkohsrah ac wen nahtuhl. Forlah se luhn sie nuh ke imac lal ac sie pac nuh ke [nien kuhkah lal]”9 ahkkahlwemye luhngse lalos sifacna ac sesuhnak lalos nuh ke luhngse luhn tohkohsrah uh.10
Puhpuhlyuck se kalweniyuck:
“Na el pangonma mwet kulansap lal ac fahk nu selos, Kufwen marut luk akola, tusruk mwet ma nga tuh suli ah elos tia fal in wi.
“Ke ma inge kowos som nu inkanek uh ac pangonma mwet nukewa kowos ac liyauk we nu ke kufwa uh.
“Ouinge mwet kulansap elos som nu inkanek uh ac eisani nufon mwet elos liyauk we, mwet wo ac mwet koluk oana sie; ac iwen marut uh arulana tingtingi ke mwet.”11
Facsin ke lwen ingacn pa mwet kol kuhfwen macruht uh—ke puhpuhlyuck se inge, pa tohkohsrah—el ac sang nuknuk fal nuh sin mwet ma solsol uh. Nuknuk fal nuh ke macruht uh atac na fihsracr se, nuknuk ma mwet nuhkwewa kuh in nokomwacng. Ke ohiyac inge, wal ac fuhlwact luhn kais sie wacngihnlac, ac mwet nuhwewa ke kuhfa uh kuh in asramsrami oacna sie.12
Mwet ma solsol nuh ke macruht uh ma tuhkuh ke inkacnek fuhlwact ma ah e wacngihn pacl lalos in konwack kain nuknuk inge elos in kuh in ahkolah ke tuhkweni sac. Oruh, etweyuck lah tohkohsrah se el sang nuknuk luhn lohm sel ah nuh sin mwet solsol inge. Pacl wo ituckyang nuh sin kais sie mwet elos in kuh in nukum nuknuk fal nuh ke macruht sac.13
Ke tohkohsra sac el utyak nuhke iwen macruht uh, el liye mwet ah ac ahkihlacnack lah sie mwet ah tiac nukum nuknuk fal nuh ke macruht. Mwet sac utuckyak nuh met, ac tohkohsra sac siyuck sel, “Mwet kawuk, kom utyak fuka nu in acn se inge ke kom tia nukum nuknuk fal nu ke marut? Ac wacnginna ma mwet sac fahk.”14 Ke kahs oacna sie, tohkohsrah el siyuck, “Kuh efuh kom tiac nukum nuknuk fal nuh ke macruht uh, finne ahkoeyucklac tari nuh sum?”15
Ma na pwacye se lah mwet sac el tiac nukum nuknuk fal nuh ke kuhfa sacohk inge, ac kahs “Tuh wangihnna ma mwet sac fahk” ahkkahlwemye lah wacngihn srihpac wo lal.16
Elder James E. Talmage el sang mwe luti inge ke yohk srihpacn mukwikwi luhn mukul sacn: “Mwet sac suc tiac nukum nuknuk fal oasr mwacta lal ke alsruhngwesr, sesuhnak, kuh ma ahkkoluk sahyac, kahlwem na pwacye ke ma suhmuhslah uh. Tohkohsrah sac arulacna kuhlwacng ke pacl met ah, siyuck muhkwena lah mwet sac utyak fuhkah tiacna nukum nuknuk fal nuh ke macruht uh. Mwet sac el fin kuh in ahkuhtweyac luhmahl, kuh fin oasr kahs in ahkkahlwemye srihpac lal, pwacye elac kahslah; tuh fahkwack nuh sesr lah wacngihnna ma el fahk. Suli luhn tohkohsrah sac sukohsohk nuh sin mwet nukwewa ma mwet kuhlwacnsap lal tuh konwack ah; tuhsruhk kais sie selos enenuh in utyak ke sruhnguhl sac; ac met liki elos sun infuhkihl luhn kuhfa uh, suc tohkohsrah sac fah ilme ekihn el sifacna, kais sie enenuh in nukum nuknuk fal; tuh mwet sesuhfal sac, ke ohiyac sahyac utyak ke acn sahyac; ac ke srihpen el tiac fahsr met liki mwet liyaung sruhnguhl uh, el mwet kikiacp se.”17
Mwet Christian sihm se, John O. Reid, el suhmuhslah lah sulaclah se in tiac nukum nuknuk fal nuh ke macruht uh ahkkahlwemye sesuhnak upac nuh sin tohkohsrah sac ac wen nahtuhl.” El tiac nukum nuknuk fal muhkwena; uh, el sulwaclah in tiac nukum nuknuk sac. El lihkkeke sruhnga nukum nuknuk fal nuh ke kuhfa sac. Top luhn tohkohsrah sac sa ac suwohs: “Kapriya nial ac paol, ac sisella nu in acn lohsr likinum uh. El ac fah tung ac ngalis inwihsel we.”15
Nuhnuhnkuh luhn tohkohsrah sac tiacna ke srihpen mwet sac el tiac nukum nuknuk fal nuh ke macruht muhkwena—tuh oacyacpac lah, “pwacye na, el inse fuhlwact in tiac nukum nuknuk sac. Mwet sac … kena eis ahkfuhlwact luhn kuhfwen macruht uh tuh el tiac luhngse ukwe facsin luhn tohkohsrah sac. El kena oruh ma luhngse lal sifacna. Luhmahl ke el tiac nukum nuknuk fal ahkkahlwemye luhngse sesuwohs lal in lain tohkohsrah sac ac kahs lal.”19
Mwet Pucs Na Pahngonyuck, a Mwet Na Puh Suleyucklac.
Puhpuhlyuck se ahksahfyeyucklac ke kahs pihrihkyuck se inge, “Mwet pus na pangonyuk, a mwet na pu suleyukla.”20
Ma wo, Joseph Smith el sang kuhtuh pac kahs nuh ke fuhs se inge ke Matthew ke lweng moklweyuck lal ke Pwacpuhl: “Mwet pus na pangonyuk, a mwet na pu suleyukla; ohinge tiac nohfohn nukum nuknuk fal nuh ke macruht uh.”21
Solsol se nuh ke kuhfwen macruht uh ac sulaclah se in ipeis ke kuhfa uh siena liki sie sin sie. Solsol se inge ma nuh sin mukul ac muhtwacn nukwewa. Mwet se el kuh pac in eis solsol se ac muhta wi kuhfa uh—tuhsruhk tiac sulweyucklac el in ipeis ke srihpen el tiac nukum nuknuk fal luhn luhlahlfongi luhn Leum Jisus ac Luhng Kuhlwacng Lal. Ohinge, oasr pahng sin God ac top lasr nuh ke pahng sacn, ac mwet pus na pahngonyuk a mwet na pu suleyuklac.22
In wi kuh in welah suleyucklac el tiac ma utuckuh nuh sesr sifacna. Sahyac na, kom ac nga pwacye na kuh in sulaclah in wi solac ke mukwikwi suwohs lasr ke sukohsohk in sulaclah lasr.
Nuhnak muhnahs lohacng nuh ke kahs suleyucklac ke fuhs ma oacpacna ke Doctrine and Covenants:
“Tuh liye, mwet pucs na pahngonyuck, a mwet na puh suleyucklac. Ac kuh efuh elos tiac sulweyucklac?
“El fahk lah elos tiacna solac ke srihpen insiaclos luhngse ma luhn facluh, ac elos moulkihn ahkfuhlwact luhn mwet uh.”23
Nga luhlahlfongi muh ma ke fuhs ekahsr inge arulacna fahkwack kahlwem. Wacngihn tahk in mwet se God el sulwaclah muh el luhngse suc kuht finsrak inesr oasr pac kac. El tiac srwelah “mwet sulweyucklac” uh in mwet na puh. Sahyacna, heart lasr kena lasr sunak lasr ke wuhlweacng ac akwuck muhtahl luhn wosasuc, ahkostwen lasr nuh ke masap, ac yohk liki nuhkwewa, luhng kuhlwacng ac pahkotwen luhn Mwet Lahngo oruh ma inge kwewa fahklah kuht oacwaclah muh mwet suleyucklac luhn God.24
“Tuh kuht oaru orekma in suhmuhslah, in mokleack tuhlihk nahtuhsr, ac oacyacpac mwet wiyacsr, in luhlahlfongi Kraist, ac in fohlohkyang nuh yurun God; tuh kuht etuh lah ke luhng kuhlwacng kuht moliyucklac, tukun ma nuhkwewa ma kuht kuh in oruh.”25
Ke kahfofoiyacn kais sie lwen ac ke ma okahrkahr luhn facluh ma kuht moulkihn uh, kuh in oruh kuht tilac lohacng nuh ke ma ne tok ma pahtpaht ma yohk srihpac emet uh ke kuht nuhnkuh muh ma pwacr, ma kahsruhp, ac ma pwengpweng uh yohk srihpac liki na ma muhtahl uh. Nuhnkuh lasr ke “ma luhn facluh” ac “ahkfuhlwact luhn mwet uh” ac kuh in oruh in wacngihnlac wal luhn wounsese meet lasr ke kihtihn na ma se kuht oraclah.26
Olwelah ac Fahkwack Luhlahlfongi
Nga ke kalweni kahs in ahkweye luhn Leum nuh sin mwet Lal sruhmuhnyuck sin mwet pahluh Haggai ke Wuhlweacng Mahtuh: “Akihlen ma sikyak nu suwos.”27
Kais sie sesr enenuh in akihlen ma luhn facluh ac ma muhtahl yohk srihpac lasr ac pruhe in akihlen ma ma ac kuh in tulohkihnyac mwe insewowo puhs ma Pahpah Inkuhsrao ac Mwet Lahngo elos kena acse nuh sesr. Nguhn Muhtahl el fah kahsrwe kuht in liye lah suc kuht uh na pwacye.28
Ke kuh kampare in suk ke mwe sang luhn muhta in liye ac insrwac in lohng,29 nga olwelah lah kuht ac fah eis kahsruh in ahkkweye kuhpahsr olwelah lasr nuh sin Leum moul. Kuht ac fah oacyacpac eis kuh luhn God in moul lasr30—ac in ahksahfye kuht ac fah kewana pahngohnyuck ac sulweyuck nuh ke kuhfwen Leum.
“Nguhtwaclihk, nguhtwaclihk; orekmakihn kuh lom, O Zion.”31
Zion enenuh in yohkelihk ke ma kahto, ac ke ma muhtahl; ip kacl uh enenuh in ahkweyeyuck. Zion el enenuh elan tuyak ac nokomwacng nuknuk kahto lal.”32
Nga fahkwack ke engan mwe loh luhk ke ma muhtahl ac ma pwacye luhn God moul, Pahpah Ma Pahtpaht tuhmasr, ac Wen Kuloh Nahtuhl, Jisus Kraist. Nga fahkwack lah Jisus Kraist El Mwet Lahngo ac Mwet Molwelah lasr, ac El moul. Ac nga oacyacpac lohoh lah Pahpah ac Wen Elos sikyang nuh sin tuhlihk mukul se Joseph Smith, ac muhtwacwacack fohlohkohnwack wosasuc luhn Mwet Lahngo ke lwen sahflah. Nga pruhe tuh kais sie sesr in suk ac ahkinsewowoyeyuck ke muhta in liye ac insrwac in lohng, ke ine muhtahl luhn Leum Jisus Kraist, amen.