Usru nuh ke Ahkkweye
Nga ahkkweye kom in tahfwelah in kampare in fototo nuh sin Pahpah Inkuhsrao ac Jisus Kraist.
Tamuhlwel ac tahmtahel sacohk luhk, nga tarilacna in wi kowos ke toeni luhlahp se inge ke Alu luhn Jisus Kraist luhn Mwet Luhlahlfongi ke Lwen-sahflah. Kuht puhla luhlahlfongi lom ac luhngse lom ke yen kom muhta oasr we. Ahkinsewowoyeyuck kuht ke mwe lutlut wolacna, mwe fahkwack, ac on kahto.
Nga ahkkweye kom in tahfwelah in kampare in fototo nuh sin Pahpah Inkuhsrao ac Jisus Kraist. Ke oacna sie acn ma kom oasr kac ke inkacnek in olwelah, oasr ma upac ac tuhkuh fungul kom.
Oacna ke ninac kiyuck ah tuh fahk nuh sihk ke nga tohrkahskahs fin ma se upac, “Wee, Hal, ahok ac na upac na. Ac na pana ngwacn. Moul uh el mwe srihkeyuck se.”
El fahk ma na wacngihn, ac isrwacsr, ke srihpen oasr ma luo el etuh. Finne upac kuh mac, ma se ma yohk srihpac emeet uh pa in som nuh yohrohl Pahpah Lucng. Ac el etuh lah el kuh in fohlohk nuh yohrohl ke luhlahlfongi lal ke Mwet Lahngo lasr.
El puhla lah El fototo nuh sel. Ke lwen ma el etuh lah el apkuhran in misac, el sramsram nuh sihk ke Mwet Lahngo ke el an ke infuckihl lal. Oasr sruhnguhl se nuh ke sie pac infuckihl siskacn infuckihl lal ah. El isrwacsr ac liye sruhnguhl sac ke el sruhmuhn muh el ac kuhrwacna liyacl uh. Nga srwackna esam ke nga liye sruhnguhl sac ac nuhnkuh ke infuckihl se tohkoh ah.
Ingena el oasr ke facl luhn nguhn. El lohacng na nuh ke opi se ma el luhngse finne upac nuh sel.
Usru in ahkkweye se suc el fihliyac nuh sesr ahkuhtweyucki ke Moroni 7, ke Mormon el ahkkweye wen nahtuhl Moroni ac mwet lal. Usru se inge mwe ahkkweye nuh ke moul wo oacna ke mwe usru lal ninac kiyuck nuh sin sucu lal. Mormon el tahfwelah usru se inge nuh sin nohfohn mwet ma luhngse kuhtanglah ma upac luhn moul in eis moul ma pahtpaht.
Mormon el muhtwacwacack ke fuhs ekahsr emeet ke Moroni 7 ke sie fahkwack ke luhlahlfongi lal ke Jisus Kraist, ke lipufacn, ac ke nguhn luhn Kraist, ma lwelah kuht in etuh ma wo liki koluk kuht in muh kuh in sulaclah ma pwacye.
El fihlilyac Jisus Kraist met, ac nohfohn pac mwet suc oraclah wo in sang ahkkweye nuh sin mwet ma puhlakihn ma upac ke elos fahsr ke inkacnek soko ma ac som nuh inkuhsrao:
“Tuh wacngihn kuhtwena mwet kuh in moliyucklac, in fal nuh ke kahs luhn Kraist, sahyacn na elos ac fah luhlahlfongi ke Inel; ohinge, fin ma inge tui, na luhlahlfongi uh oacyacpac tui; ac koluk ohiyacn mwet uh, tuh elos ac oacna in muh wacngihn molwelah oreklac.
“Tuhsruhk liye, mwet lili sacohk luhk, nga nuhnuhnkuh ma wo keiwos, tuh nga nuhnuhnkuh muh kowos luhlahlfongi Kraist ke srihpen inse puhsisacl lowos; tuh kowos fin tiac luhlahlfongel na kowos tiac fal in oacwaclah inmahsrlon mwet ke alu se inge.”1
Mormon el liyacack puhsisacl lah ma tuhkuh ke fokokoiyacn luhlahlfongi lalos. El liye lah elos luhlahlfongi ke Mwet Lahngo. El ahkkweyaclos ke el fahk luhlahlfongi se inge. Mormon el tahfwelah in sang ahkkweye nuh selos ke el kahsrwelos in liye lah luhlahlfongi ac puhsisacl lalos ac ahkyohkye kuh in oraclah wo lalos ac kuhtanglah ma upac uh:
“Ac sifilpac, mwet lili sacohk luhk, nga kena sramsram nuh suwos ke finsrak. Fuhkah tuh kowos kuh in eis luhlahlfongi, sahyacn na in oasr finsrak lowos?
“Ac meac se kowos ac finsrakkihn an? Liye nga fahk nuh suwos tuh ac fah oasr finsrak lowos ke iwaclah luhn Kraist ac ke kuh luhn sifilpac moulyak Lal, in moulyak nuh ke moul ma pahtpaht, ac ma inge ke srihpen luhlahlfongi lom Kacl in fal nuh ke olwelah uh.
“Ohinge, fin oasr luhlahlfongi luhn sie mwet enenuh se na in oasr finsrak lal; tuh fin wacngihn luhlahlfongi tiac kuh in oasr finsrak.
“Ac sifilpac, liye nga fahk nuh suwos lah tiac kuh in luhlahlfongi ac finsrak yohrohl, sahyacn na el fakpacp, ac inse puhsisacl.”2
Mormon el sifilpac tahfwelah in ahkkweyaclos ke el fahkwack lah elos ac eis mwe sang nuh ke insiyaclos in nwacnwaclah ke luhngse pwacye luhn Kraist. El orwacni nuh selos ma ac sikyak ke luhlahlfongi ke Jisus Kraist, puhsisacl, Nguhn Muhtahl, ac finsrak kuh ke eisyacn molin moul ma pahtpaht. El ahkuhtweyac nuh selos ke ohiyac se inge:
“Tuh wacngihn kuhtwena ma inge wo ye muhtuhn God, sahyacn na fakpacp ac inse puhsisacl; ac fin sie mwet el fakpacp ac inse puhsisacl, ac fahkwack ke kuh luhn Nguhn Muhtahl lah Jisus pa Kraist, enenuh na in oasr luhngse muhtahl yohrohl; tuh fin wacngihn luhngse muhtahl yohrohl na el tiac oacwac; ohinge enenuh na in oasr luhngse muhtahl yohrohl.”3
Ke nga ngwetlah esamwack uh, ingena nga kahlwem ke luhngse pwacye se inge—luhngse pwacye luhn Kraist—ahkkweyeyuck, kolyuck, ac ekuhlah ninac kiyuck ke ma el upackihn ke el srihke in fohlohk nuh yohrohl Pahpah Luhng.
“Ac luhngse muhtahl uh mongfihsrwacsr, ac kuhlwacng, ac tiac sok, ac tiac fihlacng, tiac suk kacl sifacna, ac tiac puhrakwack, tiac nuhnkuh ma koluk, ac tiac engan ke ma koluk tuhsruhk engan ke ma pwacye, tu na kuh ke ma nuhkwewa, luhlahlfongi ma nuhkwewa, finsrak ke ma nuhkwewa, muhtweng ke ma nuhkwewa.
“Ohinge, tamuhlwel sacohk wiyuck, fin wacngihn luhngse pwacye yohrohsr, kuht wacngihn pac, mweyen luhngse pwacye tiac kuh in puhtatlac. Ohinge, fungyang nuh ke luhngse muhtahl, suc pa wo emet, tuh ma nuhkwewa ac puhtatlac—
“Luhngse pwacye pa luhngse suwohswohs luhn Kraist, ac kuhtwena mwet suc oasr luhngse pwacye kwaclos ke lwen sahflah, ma wo nuh selos.
“Ohinge, mwet lili sacohk luhk, pruhe nuh sin Pahpah ke kuhiyacn insiowos nohfohn, tuh kowos in kuh in sesseslah ke luhngse se inge, ma El sang nuh selos nuhkwewa suc fahsr na pwacye tukun Wen nahtuhl, Jisus Kraist; tuh kowos in kuh in wen nuhtin God; tuh ke Elac fah sikme kuht fah oacna El, tuh kuht ac fah liyacl oacna El uh; tuh in oasr finsrak se inge yohrohsr; tuh kuht in kuh in ahknwacsnwacsyeyucklac oacna ke El nwacsnwacs.”4
Nga tarilacna ke mwe ahkkweyeyuck ke srihkasrak ac mwe lutlut lal Mormon. Nga ahkinsewowoyeyuck pac ke usru luhn ninac kiyuck. Mwet pahluh ke pacl lal Adam ah nuh ke pacl ingena uh, ke luti ac srihkasrak, ahkkweyeyuc.
Sahyacn mwet ma nga etuh ac wi sucu lalos, nga sulaclah in tiac suk ke ma upac lalos kuh in sruhmuhn ke mwe insewowo lalos nuh sin mwet nuhkwewa. Tuhsruhk ma nga liye tari ahkkweyeyuc in eklac wolac liki met ah.
Nga ac fahk ke sie fahkwack na fototo ke ahkkweye se luhn muhtwacn kiyuck uh, ke srihpen nga sensen in ahkkolukye el tiac luhngse mwet nuhkwewa in etuh kac. Nga oruh ma inge ahkwoyac. El tiac suk mwet uh in kaksakuhnuhl.
Kuht macruht yac 60 lac. Ke srihpen pacl loeloes sacn nga kahlwem ke kalmacn kahs inge, luhlahlfongi, finsrak, puhsisacl, mongfihsrwacsr, tiac suk ma la sifacna, enganwack ke ma pwacye, tiac nuhnak koluk, ac lucng liki ma nuhkwewa, luhngse pwacye.5 Yohk ma nga etaclah ke pacl sacn, nga fahkwack lah mwet uh kuh in eis nohfohn ma wolacna inge nuh ke moul lalos ke elos kuhtanglah ma upac uh.
Miliacn suwos suc lihpsre sramsram se etuh ke kain in mwet inge. Puhkantwen suwos pa kain mwet inge. Kuht nohfohn enenuh srihkasrak in ahkkweye ac kawuck ma luhngse kuht.
Ke kom wi mwet se ac ekihn mwet luti se nuh sel; kom aholuhl Leum. Nuhnkuh ke ma Elac oruh kuh fahk. El ac solwaclos in fahsr nuh Yohrohl. El ac ahkkweyaclos. El ac akihlen ac kaksakihn muhtwacwacackiyacn eklac ma elos enenuh in oruh. Ac el pa srihkasrak se ma wo emeet elos in etahin.
Wacngihn mwet kuh in oruh nohfohn, tuhsruhk ke kom lohng toeni luhlahp se inge, kom kuh in etuh lah kom oasr ke inkacnek pwacye. Mwet Lahngo El etuh ma upac lom. El etuh ke kuh in kapwack ke luhlahlfongi, nuhnak, ac ohiyac lom.
Masap ac akwuck muhtahl ma el use tiac mwe srihkasrak in kaprikomi. Mwe insewowo pa inge in sruhkkomyak in eis nohfohn mwe sang luhn God ac in fohlohklac nuh yohrohl Pahpah tuhmasr Inkuhsrao ac Leum, suc luhngse kom.
Jisus Kraist el molwelah molin ma koluk lasr uh. Kuht kuh in eis mwe insewowo nuh ke moul ma pahtpaht fin oasr luhlahlfongi lasr Kacl in fal kuht in auliyak ac eklac oacna sie tuhlihk, nwacsnwacs ac ahkolah in eis mwe sang yohk liki mwe sang nuh kwewa luhn God.
Nga pruhe tuh kom in eis suliyuck Lal ac kom in sang pac nuh sin tuhlihk sahyac nahtuhl Pahpah Inkuhsrao.
Nga pruhe ke misinacri fin facluh nohfohn. Lwelah tuh elos in mokleyuck in ahkkweye kais sie mwet in kena in luhlahlfongi lah suliyuck se inge ma sel Jisus Kraist me sin mwet kuhlwacnsap Lal suc eis Inel nuh faclos.
Nga fahkwack lah El moul ac kol Alu Lal. Nga mwet lohoh Lal. Prestuhn Russell M. Nelson el pa mwet pahluh luhn God fin facluh nohfohn. Nga etuh ma inge pwacye. Ke ine muhtahl luhn Jisus Kraist, amen.