Gel ngak e Fayleng nge Bang ni Ngan Toffan Riy
Wenig rog ngom ko re kadbul ney e ngam gay e toffan ko momawʼ, ma dani tomilang rogon, nge gafgow riy ningam gel ko fayleng u daken fapi mʼag rom ngak Got.
Pi walageg, ri gub falfalaen’ ngay ni nggu non ngomed ko re kadbul ney ko Madnom. Gubin ngiyal’ ma gamed bay u wun’ug. Ri gub falfalaen’ ngay ko rogon ni gamed ma pii’ e ayuw ngak e gidii’ nibe tu’uf e ayuw roraed. Ma kube falaen’ e tafney rog ko rogon e mich romed ni gamed be dag bayay nge bayay. Ma guma yor nag e tin nibe tomal nag gum’ircha’enmed, kirbaen’ romed, nge tin nibe m’agfan’med ngay. Guba’dag med. Gube micheg nag ngomed ni Chitamangdaed nibay u Tharmiy nge Fak, Yesus Kristus, e gab t’uf rorow. Ma yow manang e tin nibe buch rom, tin ni gabe rrin’ nib fel’, tin nib tu’uf rom, nge meybil rom ko tin nib tu’uf rom. Bayay nge babay, gube meybil nifan ngom ni ngeyag ni ngam thamiy e tu’ufeg Rorow nifan ngom.
Thamiy e t’ufeg Rorow e rib ga’fan, ko ngiyal’ ney ni ke yo’or e cham nge kirbaen’ nibe yilegdaed ni gubin e rran. Sana bay boch e rran ni gabe athapeg ni ngam par ulan e mad rom ko mol, maga bichiyem nga pa’am ni wod ya’an bbat’, maga fith ngak be’ ni nge pugem ko ngiyal’ nike m’ay e cham u fayleng.
Machane, pi walageg, bo’or ban’en ni rib fel’ ni kabay nga mm’on. Ko boch e rran nibay nga mm’on, gadaedra guy gelingin fare Tathapeg ni rib gel ni dariy bi’id nikan guy ni arragon. U thilin e ngiyal’ ney nga mada’ ko ngiyal’ ni bay u sul “gelingin nge falʼngin,”1 Ma bayi tawa’ath nag, e gidii’ ,me pii’ e ma’ang’ang ngak e pi’in nibay nib yul’yul’.
Arragon, gadad bay ko bangiyal’ u fayleng ni kari gel e momaw’ ko par riy. Tiney nib momaw’ e be karang e gafgow ma be tomal nag e gidii’. Machane, ba’aray mornga’agen ban’en nike buch ni sana rayag ni nge pii’ e tomilang ngom me pire’eg bang ni ngan toffan riy.
Ngiyal’ nike mab fare Temple u Washington D.C, bay reb e gidii’en e galasia ni micheg ban’en ni buch ko napan nibe yib e gidii’ ni bata yoloy mornga’agen bugi ban’en ngalan fare temple ni yibe guy ya’an. Bay reb e tabinaew ni par nib chugur ko reb e pi gidii’ ney nima fek ya’an e milekag. Bay reb e pi gidii’ ney ni yugbe fith e duwer ko mornga’agen fare “milekag” ko temple ngak reb fapi patron. Ba’adag ninge nang ko temple e ba fanethin ko tin nibe buchbuch rok’ be’ nge lane yafos rok’ u fayleng.
Bay reb e pagal nib bitir ulan fare tabinaew ni rung’ag e biney e sabathin. Napan ni taw e biney e ulung ngalan fare singgil ko endowment, ma changar fare fachi pagal me yup’ pa’ ko fare altar, ko gin nima ragbug e gidii’ riy ngar ngongliyed e m’ag ngak Got, me ga’ar, “Oh, rib mangil e binem. Ba’aray tigil’ e gin nima tofan e gidii’ riy nibe milekag ulan e temple.”
Dagur lemnag ni manang e chi pagal ney ni bigel buguwan e n’en nike guy make yog. Bay ni dani nang e tha’ u thilin e m’ag ni yima fel’eg u rom ulan e temple ngak Got nge n’en ni micheg nag fare Tathapeg:
“Mired ngog, ni gimed gubin e pi’in ke aw parowmed i fek e n’en nib tomal ni gimed be fek, mu gu’ pi’ e toffan ngomed.
“Mu feked e mat’ rog ngam ted nga pomed, mi gimed folwok rog; … mi gimed pir’eg e toffan.
“Ya re mat’ ni gura pi’ ngomed e ba mom, ma tomalngin e ren’en ni gu ra tay nga pomed e ba ba’ud.”2
Pi walageg, be kirban’ug ngak e gidii’ nibe digey e Galasia ni bachan e yadbe lemnag ni kaygi gel gelingin e muruwel ko biney. Dawur pire’egned ni ngongliy nge ayuweg fapi mʼag era mom nag e yafos rodaed! Ra bagdaed nima ngongliy e mʼag ko tawfe fa ulan e temple—me fol riy—e bay gelingin nib gel nibe yib rokʼ Yesus Kristus. Wenig mu tafney nag e biney nib riyulʼ!
Tawaʼath nima yib ni bachan e yibe ayuweg fapi motochiyel rokʼ Got e bugi gelingin nibe yib u tharmiy—ba gelingin nibe piiʼ gelingdaed ni ngad gel gaed ko fapi sikeng, fapi lumel, nge tin nibe amith nag gumʼirchaʼendaed. Biney e gelingin e ma mom nag e kanawoʼ rodaed. Piʼen nima fol ko tin ni tolang e motochiyel rokʼ Yesus Kristus e bay ere gelingin ney roraed nib tolang. Arragon, piʼen ni yaed be fol ko fapi mʼag e rayag ni yaedra toffan ni biney era yib u daken e thaʼ roraed ngak Got.
U mmʼon ni piiʼ fare Tathapeg ir ninge gafgow ulan faregi milʼay u Gethsemane nge Calvary, me yog ere bugithin ni baʼaray ngak pi gachalpen, “Bayi gafgow nagmed e fayleng: machane dab mu rusgad; Ya kug gel ko fayleng.”3 U tomuren, me yog ngodaed ni ngar rrinʼed nib taʼab rogon ko biney napan ke yoeg, “I gag e gura ni ngeyag ni ngam gel ko fayleng.”4
Pi walageg, mulwol rog ngomed e dabaʼ e bachan e ke yag rokʼ Yesus Kristus ninge gel ko fayleng, nga bachan fare bayul rokʼ ni fan ngodaed, ma arram ni krayag rom ni gara gel ko denen, mag pag, nge biney e fayleng nib sug ko kirbaenʼ.
Bachan fare Tathapeg, u daken fare Bayul rokʼ nib manechubog, e ke thapeg dad ko pi nʼen ni gadaed moʼowar riy, tin ni kad oloboch gaed riy, nge bachane ke buch rokʼ ma manang gelingin e amith riy, kirbaenʼ riy, nge tomal ni gabe yaen u fithikʼ,5 napan ni gara kalnganʼum u fithikʼ e yulʼyulʼ mag pag nge ayuweg nem, ma rayag ni ngam sakʼiy ngalang u daken e biney e fayleng nib sug ko kireb nge kribaenʼ.
Ma rayag ni gara gel ko tin nibe moʼowar nigem ma be magaf nigem u roy u fayleng, nib muʼun e tarfangin, ufanthin, dumomuw, darngal, fananikan, chugow, fekyaed, nge tamdag ngay. Demuturug rogon e pi nʼen nib yilegnem, ya rayag ni gara pireʼeg e bin riyulʼ e toffan—nibe yipfan e gapas nge baʼud—nra yib ni demuturug e nʼen nibe buch rom.
Biney nib riyulʼ e bay dalip i duwer nib chagil ngay ni rib gaʼfan:
Bin sommʼon, mang e be yip’fan ni ngan gel ko fayleng?
Bin lʼaguw, uw rogon ni rayog ni ngad rrinʼed e biney?
Nge bin dalip, uw rogon ni ngan gel ko fayleng e rayag ninge tawaʼath nag e yafos rodaed?
Mang e be yip fan ni ngan gel ko fayleng? Be yipfan ni ngan gel ko lumel ni ngad digey e tin nu fayleng banʼan min sap ko tirokʼ Got banʼen. Be yipfan ni nge pagaenʼuy ko yalen rokʼ Kristus ma gathi pagaenʼuy ko lloweanʼ ko gidiiʼ. Be yipfan ni ngan fil e tin nib riyulʼ, min pag e ban, min mang ni “piʼin nib sobutʼaenʼ ni gidiiʼen Kristus.”6 Be yipfan ni ngan taleg ney ko tinra tuluf fare Thothup nge chuw. Be yipfan ni ngan “pag e denen” ni ri gadaed baʼadag ni gadaed ma rrinʼ.7
Chiney, gel ko fayleng e dar yipfan ni nge poloʼ e yafos rodaed, ma kudar yipfan ni ra chuw fapi gafgow rodaed—ya dabi buch ni arragon. Ma ku dar yipfan ni dakriy biʼid ni gara rrinʼ e oloboch. Machane gel ko fayleng e be yipfan ni ra gel gelingim ngam pag e denen. Ya gumʼirchaʼem era munguy ni ku wod fare mich rom ngak Yesus Kristus nra gaʼ i yaen.8 Gel ko fayleng e be yipfan ni tʼufeg rodaed ngak Got nge Fak era gaʼ i yean ni rib gel ko tʼufeg ngak beʼ fa banʼen.
Ere, uw rogon, nrayag ni ngan gelgaed ko fayleng? Pilung Benjamin e ke yog ngodaed rogon. Ke michib nag ni “ya gidiiʼ nib fekyath e toʼogor rokʼ Got,” ma bayi paer riy ni aram rogon ni dabi thil biʼid “ma kemus ni faʼanra mʼag ir ko fare Kan ni Thothup, me pag e fekyath nge mang reb i gidiiʼen u dakean fare bayul rokʼ Kristus ni ir Somoel.”9 Gubin ngiyalʼ ni gara gay mag rrinʼ ni wod rogon nibe thogthog nag fare thothup, gubin ngiyalʼ ni gabe rrinʼ banʼen nib mangil—bugi banʼen ni “gidiiʼ nib fekyath” e dabi rrinʼ—ma arram ni gabe gel ko fayleng.
Gel ko fayleng e darma buch ulan taʼareb e rran fa lʼagruw. Ya ma buch ulan e yafos rodaed u napan ni yibe sul u daken ni boʼor yay ni yibe gay rogon fapi machib rokʼ Kristus. Ma arram ni gadaed be gay rogon e mich ngak Yesus Kristus ni gadaed be kalngaenʼ ni gubin e rran min fol ko fapi motochiyel rokʼ nibe piiʼ gelingdaed. Ma gadad be gay rogon ni ngad pired u daken fare piʼi kanawoʼen e motochiyel ni yira tawaʼath nagdaed ko gelingiy nib thothup, nge yiʼiy nifan ngodaed, nge mich rodaed nra gel, nge angel nra pigpig ngodaed. Fol ko yalen rokʼ Kristus e irreram e bin gelingiy ni thʼabi gel ni yibe par ni yib yulʼyulʼ, ni gadaed be par ni gadaed ba thothup.10
Napan ni gadaed be gay rogon ni ngaed pired ni wod fapi motochiyel rokʼ Yesus Kristus ni thʼabi tolang, ma gumʼirchaʼendaed era tabab nge thil. Ma fare Tathapeg era chubiy daed ngalang ko biney e fayleng me tawaʼath nagdaed ko tʼufeg, sobutʼeanʼ, gol, piʼ ayuw, ayuwegem, gapas, nge toffan nra piiʼ ngodaed.
Chiney, sana bay mu tafney nag ni biney e bod ba muruwel nib thothup ningan rrinʼ ma wod ni dani wod lingan e toffan. Baʼaray e tin nib riyulʼ ni morngaʼagen e renʼey: Bayi dag e fayleng gelingin, tin nibay rokʼ, tin nib sug rokʼ, nge rogon e falfalaenʼ, machane dariy rokʼ! Ya dabiyag rokʼ! Nʼen nibe dag e bugi banʼen nibe yonʼ lon e “falfalaenʼ ni dariy nʼumngin” ko [piʼin] ni yaed “mafol ko fapi motochiyel rokʼ Got.”11
Rib riyulʼ ni ba gel e magaf ni ngan gay e falfalaenʼ u biyang ni dabiyag ni ngan pireʼeg riy! Ma faʼanra, gara fek nga dakenem fare yok rokʼ Yesus Kristus mag rrinʼ e muruwel nib thothup ningam gel ko fayleng, ma ir, ni karimus ni ir, e bay gelingin nra chubiyem ngalang ko biney e fayleng.
Chiney, uw rogon ni ngan gel ko fayleng e rayag ninge tawaʼath nag e yafos rodaed? Biney e rib tomilang rogon: un ko mʼag nibay e thaʼ riy ngak Got era mʼagdaed ngak ni wod ni gubin banʼen ko yafos e ran mom nag rogon. Wenig motoyil ko nʼen ni gube yipfan ko biney: dagur yog ni ngongliy e mʼag ngak Got ere mom nag e yafos rodaed. Biney, e kab taʼab rogon ni faʼanra kan thilyeg u butʼ, bachan fare togopuluw e dabun ningam pireʼeg fare gelingin Yesus Kristus. Machane fek nga dakenem fare yok rokʼ fare Tathapeg e be yipfan ni rayag ni ngam thapeg fare gelingin Rok nge fare gelingin e bayul rokʼ.
Ri kugbe micheg fare michib rokʼ President Ezra Taft Benson: “Pumoʼon nge bpin nira sapeg e yafos rokʼ ngak Got era pireʼeg nrayag nira sug lane yafos rokʼ ko bin baʼaray ni yigo ir rokʼ. Ra gelnag e falfalaenʼ roraed, me gaʼnag e tafney roraed, me papaynag e tafney roraed, … me piiʼ gelingin e thothup roraed, me yoʼor nag e tawaʼath roraed, me yoʼor nag e falʼel roraed, me piiʼ e gapas ngoraed, me ayuweg e pi tafagar roraed, me kuma piiʼ e gapas nge yib.”12
Tiney ni rib felʼelʼ e ma yib ngak e piʼen nibe gay e ayuw u tharmiy ninge gel ko fayleng. Ko ngiyalʼ ney, ngkug ulʼulʼnag ngog ngak gidiiʼen e Galasia fare muruwel nigu piiʼ ngak e falʼyangren rodaed ko bin baʼaray e May nike thumur . Ni kugog ngorad kafram—ma gube wenignag ngomed e chiney—ni ngam muruweliy e birom e mich ngak Yesus Kristus nge fare gospel rokʼ. Muruwliy rogon. Maga ayuweg ni nge ga’ i yaen. Maga duruwiʼiy ko tin nib riyulʼ banʼen. Damu gathay ko thin ko pumoʼon nge bpin nge tiroraed e lloweanʼ. Napan ni gara ulʼulʼ ngam gelnag e mich rom ngak Yesus Krsitus mag rrinʼ ni irreray e bin thʼabi gaʼfan e murwel rom, ma arram ngam sap nag e maʼangʼang ni bayi buch ulan e yafos rom.13
Wenig rog ngom ko re kadbul ney e ngam gay e toffan ko biney e fayleng nib momawʼ, ma dani tomilang rogon, nge gafgow riy ningam gel ko fayleng u daken fapi mʼag rom ngak Got. Mog ngak u fithik e meybil rom nge pingim ni riga baʼadag ni ngam gel ko fayleng. Mu fith ngak ninge tomilang nag e maenʼay rom me piiʼ e ayuw ngom ko tin nibe tuʼuf rom. Gubin e rran, mag yoloy nga butʼ e tafney nibe yib ngom napan ni gabe meybil; mag rrinʼ u fithik e yulʼyulʼ. Man nga temple ni boʼor yay mag gay rogon ngam nangfan rogon nibe machib e temple ngom ko rogon nrayag ni ngam gel ko biney e fayleng nibe mul.14
Wod rogon ni ku gog sommʼon, fare mukun rokʼ pi u Isreal e irreram e bin thʼabi gaʼfan e muruwel nibe buch e daken e fayleng e chiney. Re muruwel rodaed ney ni rib gaʼfan e yibe ayuweg e gidiiʼ nike falʼag rogon, ma baʼadag, ni nge thapeg Somoel ko napan fare wub rokʼ ni bay i tay, gidiiʼ nikar muʼgaed i dugliy ni yaedra leak Yesus Kristus, gidiiʼ ni falfalaenʼraed ko matʼwonraed nrayag ningar melʼeged ni ngar pired ko tin nib tolang e thothup, nge fapi motochiyel rokʼ Yesus Kristus nib thothup.
Gube piningmed, oh pi walageg, ni ngam manged e pi gidiiʼ ney nib yulʼyulʼ. Mu ayuweg mag tayfan fapi mʼag rom ko gubin banʼen nikam dugliy ni gara rrinʼ. Ma napan ni gara pag Got nge gagiyeg nag e yafos rom, ma ri gube micheg ngom e gapas nib gel, falaflaenʼ, nge fare toffan.
Nge fare gelingin fare thothup nikan piiʼ matʼwon ngog, e gube yibliyem ni ngeyag ni ngam gel ko biney e fayleng. Gube yibliyem ni ngam gaʼnag e mich rom ngak Yesus Kristus mag fil rogon ni ngam fek nga dekenem fare gelingin. Gube yibliyem ni ngam nang e tin nib riyulʼ ko tin nib kireb. Gube yibliyem ni ngam tinʼum ko tirokʼ Got banʼen maga pag e tin nu fayleng banʼen. Gube yibliyem ni ngam guy e tin nib tuʼuf rokʼ e gidiiʼ nib yilegnem maga piiʼ gelingin e piʼin nib tuʼuf rom. Bachan e Yesus Kirstus e yag rokʼ ninge gel ko biney e fayleng, arram rogon ni krayag rom e biney. Gube micheg u dakean fithngan Yesus Kristus nib thothup, amen.