Anaa sa Dalan sa Ilang Katungdanan
Kamo kinsa karon nagpadayon sa dalan sa inyong katungdanan mao ang kalig-on sa gipahiuli nga Simbahan sa Manluluwas.
Kinasingkasing akong nag-ampo alang sa tabang sa Espiritu Santo samtang ako karong ipahayag ang akong gugma, pagdayeg, ug pasalamat alang sa mga miyembro sa Simbahan ni Jesukristo sa mga Santos sa Ulahing mga Adlaw sa tibuok kalibotan.
Sila sa Kataposang Karwahe
Ang tuig 1947 nagtimaan sa ika-100 nga anibersaryo sa unang mga pioneer nga Santos sa Ulahing mga Adlaw nga miabot didto sa Walog sa Salt Lake. Daghang halandomon nga mga selebrasyon ang gihimo nianang tuiga, ug dili maihap nga pagpahayag sa pasalamat ang gitanyag alang sa mapahinungoron nga mga disipulo ni Jesukristo kinsa nag-unang naghimo og mga agianan, mitukod og mga panimalay, mitanom og mga tanom sa panas nga disyerto, ug mipuyo sa mga komunidad.
Si Presidente J. Reuben Clark, unang magtatambag sa Unang Kapangulohan, mihatag og usa sa labing halandomon ug makapatandog nga pasidungog niini nga matinud-anong mga pioneer diha sa Oktubre 1947 nga kinatibuk-ang komperensiya.
Sa iyang mensahe, si Presidente Clark sa daklit miila sa mga mas nailhan nga mga lider kinsa migiya sa paglalin sa kasadpan, sama nila ni Brigham Young, Heber C. Kimball, Wilford Woodruff, Parley P. Pratt, ug daghan pa. Hinoon, ang iyang nag-unang katuyoan dili ang paghinumdom og usab sa mga nahimo niining importanteng mga indibidwal. Kondili, iyang gitutok ang iyang mga mensahe ngadto sa mga kugihan ug determinado nga mga kalag kansang mga ngalan wala mailhi ni sa opisyal nga paagi matala sa kasaysayan sa Simbahan. Ang matulon-anon nga ulohan sa iyang mensahe mao ang, “Sila sa Kataposang Karwahe.”1
Si Presidente Clark detalyado kaayo nga mihulagway sa mga kinaiya ug mga hagit nga giatubang sa mga nanglalin kinsa mibiyahe sa kataposang gitabonan nga karwahe sa matag usa sa taas nga tren sa mga karwahe nga mitabok sa kapatagan. Gidayeg niya kining wala mailhi ug wala masaulog nga mga bayani kinsa, matag adlaw, matag semana, ug matag bulan, naglisod og ginhawa tungod sa abog nga nakutaw sa tanang karwahe sa ilang atubangan—ug kinsa nakabuntog sa walay hunong nga mga babag nga ilang nasugatan diha sa dalan.
Si Presidente Clark namahayag, “Sila sa kataposang karwahe mipadayon sa unahan, luya ug gikapoy, naghapdos ang mga tiil, usahay hapit mawad-an na sa kadasig, inabagan sa ilang hugot nga pagtuo nga ang Dios nahigugma kanila, nga ang gipahiuli nga ebanghelyo tinuod, ug nga ang Ginoo migiya ug midirekta sa Kaigsoonan didto sa unahan.”2
Siya mitapos sa iyang mensahe uban niining makapadasig nga pagpasidungog: “Niining mapainubsanong mga kalag, hilabihan ang pagtuo, hilabihan ang pagtrabaho, hilabihan diha sa pagpuyo sa pagkamatarong, hilabihan ang pagmugna sa atong bililhon nga panulundon, ako mapainubsanon nga mohatag sa akong gugma, respeto, balaang pagdayeg.”3
Sama sa Pagkamaalagaron
Niadtong 1990, si Presidente Howard W. Hunter, kaniadto Presidente sa Korum sa Napulog Duha ka Apostoles, mihatag og mensahe mahitungod sa gikinahanglan nga mga kontribusyon sa dili maihap nga mga miyembro sa Simbahan kinsa makugihon ug matinud-anong nagserbisyo ug kinsa nakadawat og gamay o walay publikong pag-ila o pagdayeg.
Si Presidente Hunter mipasabot:
“Gisulti kini [mahitungod sa batan-on ug maisog nga Kapitan Moroni]:
“‘Kon ang tanan nga mga tawo maingon, ug naingon, ug maingon bisan kanus-a, sama ngadto kang Moroni, tan-awa, ang mga gahom gayod sa impiyerno nauyog na unta sa kahangtoran; oo, ang yawa wala untay gahom ibabaw sa mga kasingkasing sa mga katawhan.’ (Alma 48:17).
“Pagkanindot nga komplimento ngadto sa usa ka inila ug impluwensyal nga tawo. … Duha ka bersikulo human niana mao ang usa ka pamahayag bahin kang Helaman ug sa iyang kaigsoonan, kinsa adunay dili kaayo dayag nga tahas kay sa kang Moroni, nga mabasa:
“‘Karon tan-awa, si Helaman ug ang iyang mga kaigsoonan sama sa pagkamaalagaron ngadto sa mga katawhan ingon kang Moroni’ (Alma 48:19).”
Si Presidente Hunter mipadayon, “Sa laing pagkasulti, bisan kon si Helaman dili ingon nga nabantayan o nakit-an sama kang Moroni, siya sama sa pagkamaalagaron; nga mao, nga siya nakatabang o mapuslanon sama ni Moroni.”4
Si Presidente Hunter dayon mitambag kanatong tanan nga mahimong sama sa pagkamaalagaron. Siya miingon, “Kon gibati ninyo nga daghan sa inyong gibuhat karong tuiga o sa umaabot nga mga tuig dili kaayo makapabantog kaninyo, pagdasig. Kadaghanan sa labing maayo nga mga tawo nga nabuhi sukad dili usab mga inila. Pagserbisyo ug paglambo, sa matinud-anon ug sa hilom nga paagi.”5
Anaa sa Dalan sa Ilang Katungdanan
Mapasalamaton ko sa minilyon nga mga miyembro sa Simbahan kinsa karon miduol sa Manluluwas6 ug nagpadayon paingon ngadto sa unahan diha sa dalan sa pakigsaad diha sa kataposang mga karwahe sa atong kapanahonan nga mga tren sa karwahe—ug kinsa sa tinud-anay sama sa pagkamaalagaron. Ang inyong lig-on nga pagtuo diha sa Langitnong Amahan ug ni Ginoong Jesukristo ug sa inyong walay pagpakaaron-ingnon, gipahinungod nga kinabuhi nagdasig kanako nga mahimong mas maayong tawo ug disipulo.
Ako nahigugma kaninyo. Ako nagdayeg kaninyo. Ako nagpasalamat kaninyo. Ug ako nagpasidungog kaninyo.
Usa ka pamahayag ni Samuel ang Lamanite diha sa Basahon ni Mormon labing maayo nga nag-sumada sa akong mga pagbati alang kaninyo.
“Ang labaw nga bahin kanila anaa sa dalan sa ilang katungdanan, ug sila naglakaw nga nagmatngon sa atubangan sa Dios, ug sila naninguha sa paghupot sa iyang mga sugo ug sa iyang mga balaod. …
“Oo, ako moingon nganha kaninyo, nga ang labaw nga bahin kanila naghimo niini, ug sila naningkamot uban sa walay kaluya nga kakugi nga sila makadala sa nahibilin sa ilang mga kaigsoonan ngadto sa kasayoran sa kamatuoran.”7
Nagtuo ako sa hugpong sa mga pulong nga “anaa sa dalan sa ilang katungdanan” naghulagway sa masinaboton nga igsoong mga lalaki ug mga babaye kinsa nangita ug naglingkod tapad sa mga tawo nga nag-inusara diha sa mga miting sa simbahan ug diha sa lainlaing mga kahimtang. Kanunay silang naningkamot sa “paghupay niadtong nanginahanglan sa kahupayan,”8 walay gipaabot nga pagtagad o pagdayeg.
Ang hugpong sa mga pulong nga “anaa sa dalan sa ilang katungdanan” naghulagway sa mga kapikas ug mga anak nga nagsuporta sa usa ka kompanyon, ginikanan, o anak nga nagserbisyo sa posisyon sa pagpangulo sa gipahiuli nga Simbahan sa Ginoo. Ang ilang makanunayon, hilom, ug kasagaran wala mailhi nga nagpaluyo nga impluwensya nakapahimong posible sa panalangin sa daghang indibidwal ug mga pamilya sa mga paagi nga bug-os nga masayran lamang sa kahangtoran.
Ang hugpong sa mga pulong nga “anaa sa dalan sa ilang katungdanan” naghulagway sa mga indibidwal kinsa, human mitalikod sa Dios, mapaubsanong mibalik ngadto Kaniya sa makausa, mibalik ngadto Kaniya pag-usab,9 naghinulsol sa ilang mga sala, ug nangita sa makalimpyo ug makaayo nga gahom sa Pag-ula sa Manluluwas. Ang pagduol ngadto kang Kristo10 pinaagi sa pagbalik ngadto sa dalan sa pakigsaad gikan sa makasasala nga mga pagtipas ngadto sa “gidili nga mga dalan”11 importante sa espirituhanong paagi ug higpit sa matarong nga paagi. Samtang sila nagpadayon sa unahan uban ang hugot nga pagtuo ug dili kapoyan sa pagbuhat og maayo, sila nagpahimutang sa tukoranan sa usa ka mahinungdanon nga buhat sa ilang indibidwal nga mga kinabuhi,12 “ngadto sa tanan nga mga kaliwatan ug alang sa kahangtoran.”13
Ang hugpong sa mga pulong nga “anaa sa dalan sa ilang katungdanan” naghulagway sa matarong nga mga indibidwal kinsa nangandoy nga masangon ang yugo sa Manluluwas diha kanila pinaagi sa mga ordinansa ug mga pakigsaad sa Iyang ebanghelyo—apan mahimong dili tugotan sa pagbuhat sa ingon sa mga hinungdan nga dili nila kontrolado. Ako mosaad nga ang inyong personal nga kasakit mahupay ug ang inyong pagkamasulundon ug pagkamatinud-anon sa mapailobon nga pagtugyan sa inyong kabubut-on ngadto sa Dios pagagantihan “sumala sa kaugalingong tukma nga panahon sa Ginoo.”14 “Mahimong may paghilak sa gabii, apan sa pagkabuntag mobanos ang kalipay.”15
Ang hugpong sa mga pulong nga “anaa sa dalan sa ilang katungdanan” naghulagway sa dinasig nga mga maghuhubad [translators] ug mga magbabatbat [interpreters] sa tibuok kalibotan kinsa nagserbisyo sa Ginoo pinaagi sa pagtabang sa mga higala ug mga miyembro nga “makapaminaw sa kahingpitan sa ebanghelyo sa [ilang] kaugalingong dila, ug sa [ilang] kaugalingong pinulongan.”16 Ang ilang mga tingog, sinyas nga pinulongan, ug gihubad nga mga dokumento nagpahayag sa mahangtorong mga kamatuoran, apan pipila lang kanato ang nakahibalo sa ilang mga ngalan o kaha nagpahayag sa pagpasalamat. Pinaagi sa gasa sa mga pinulongan diin sila napanalanginan, ang mga maghuhubad ug mga magbabatbat nagserbisyo nga makugihon, dili hakog, ug, kasagaran, wala mailhi aron matabangan ang mga katawhan nga makadawat sa espirituhanong gasa sa hugot nga pagtuo pinaagi sa pagbasa ug pagpaminaw sa pulong sa Dios.17
Ang hugpong sa mga pulong nga “anaa sa dalan sa ilang katungdanan” naghulagway sa matinud-anon nga minyo nga mga lalaki ug mga babaye kinsa nagtahod sa ilang responsibilidad sa pakigsaad sa pagdaghan ug pagpuno sa yuta, ug kinsa napanalanginan og kalig-on ug paglahutay sa pakigbisog sa ilang mga anak diha sa mga miting sa sakramento. Diha sa nagkaanam nga makalibog nga kalibotan nga gilibotan sa mga katalagman ug nasayop nga mga prayoridad, kining maisogon nga mga indibidwal wala magtagad sa sekular nga mga tingog nga nagdayeg sa pagkamahunahunaon sa kaugalingon; ilang gitahod ang kabalaan ug importansya sa kinabuhi sa plano sa Langitnong Amahan sa kalipay alang sa Iyang mga anak.
Daghang magtiayon ang misalig usab sa Dios sa dihang ang matarong nga mga tinguha sa ilang mga kasingkasing wala matuman kon sa unsa nga paagi o kanus-a sila naglaom ug nagdamgo. Sila “naghulat sa Ginoo”18 ug wala magpangayo nga Iyang matuman ang ilang mortal nga mga tagal. “Kay sukad sa sinugdanan sa kalibotan wala ang mga tawo makadungog ni makabati pinaagi sa dunggan, wala ni usa ka mata nakakita, O Dios, gawas kanimo, unsa ka dako nga mga butang ang imong giandam alang [kanila] nga naghulat kanimo.”19
Ang hugpong sa mga pulong nga “anaa sa dalan sa ilang katungdanan” naghulagway sa liboan ug liboan ka lider sa nursery ug mga magtutudlo sa Primary kinsa nahigugma ug nagtudlo sa mga bata sa Simbahan matag Adlaw nga Igpapahulay.
Hunahunaa ang mahangtorong epekto sa serbisyo nga gihatag niining maunongon nga mga disipulo—ug ang talagsaong mga panalangin nga gisaad niadtong nangalagad sa mga bata.
“Ug iyang [Jesus] gikuha ang usa ka gamayng bata ug gibutang niya kini diha sa ilang taliwala; ug sa nakugos niya kini, miingon siya kanila,
“Bisan kinsa nga tungod sa akong ngalan magadawat sa usa ka gamayng bata nga ingon niini, magadawat kanako; ug bisan kinsa nga magadawat kanako, magadawat dili nako, kondili kaniya nga mao ang nagpadala kanako.”20
Ang hugpong sa mga pulong nga “anaa sa dalan sa ilang katungdanan” naghulagway sa mapahinungoron nga mga anak nga malumong nag-atiman sa tigulang nga mga ginikanan, sa usa ka kulang sa tulog nga inahan nga naghupay sa usa ka nahadlok nga bata samtang nagbantay nga ingon og usa ka “babaye nga leon sa ganghaan” sa iyang panimalay,21 sa mga miyembro sa Simbahan nga moabot og sayo ug magpabilin nga ulahi aron sa pagpahimutang ug paghipos sa mga lingkoranan, ug sa mga dinasig nga mga indibidwal kinsa nagdapit sa pamilya, mga higala ug mga kauban sa pag-anhi ug pagtan-aw, pag-anhi ug pagtabang, ug pag-anhi ug pagpabilin.22
Akong gihulagway ang pipila lamang ka pinili nga mga ehemplo sa nagtuman sa pakigsaad ug maunongon nga mga disipulo ni Jesukristo sama kaninyo kinsa nagpadayon nga “anaa sa dalan sa [inyong] katungdanan.” Minilyon ka dugang nga mga ehemplo sa mga Santos sa Ulahing mga Adlaw kinsa mihalad sa ilang “tibuok kalag”23 ngadto sa Dios makita diha sa mga panimalay nga nakasentro kang Kristo ug diha sa mga yunit sa Simbahan sa tibuok kalibotan.
Kamo nahigugma ug nagserbisyo, naminaw ug nagkat-on, nag-amuma ug naghupay, ug nagtudlo ug nagpamatuod pinaagi sa gahom sa Espiritu Santo. Kamo nagpuasa ug nag-ampo sa kanunay, ug nag-anam sa pagkalig-on ug pagkalig-on diha sa ilang pagpaubos, ug nagkahugot ug nagkahugot diha sa pagtuo ni Kristo, ngadto sa pagpuno sa ilang mga kalag uban sa hingpit nga kalipay ug kahupayan, oo, ngadto sa paglimpyo ug pagbalaan sa [inyong] mga kasingkasing, diin nga pagbalaan moabot tungod sa …pagtugyan sa [inyong] mga kasingkasing ngadto sa Dios.”24
Saad ug Pagpamatuod
Sila sa kataposan nga karwahe, ang tanan kinsa sama sa pagkamaalagaron, ug kamo kinsa karon nagpadayon sa dalan sa inyong katungdanan mao ang kalig-on sa gipahiuli nga Simbahan sa Manluluwas. Ug sama sa gisaad sa Ginoo nga, “tanan nga mga trono ug mga kamandoan, gagmay nga mga gingharian ug mga gahom, mapadayag ug ihatag diha sa tanan kinsa milahutay nga maisogon alang sa ebanghelyo ni Kristo.”25
Ako nagmaya sa hilabihan sa pagsaksi nga ang Langitnong Amahan ug ang Iyang Hinigugmang Anak buhi ug ang Ilang mga saad segurado, sa sagradong ngalan ni Ginoong Jesukristo, amen.