Paglakaw diha sa Relasyon sa Pakigsaad uban ni Kristo

Ni Presidente Emily Belle Freeman

Kinatibuk-ang Presidente sa Young Women

Ang Usa kinsa gisakit ug nasamdan alang kanato motugot nga kita magsagubang sa mga hagit sa mortalidad, apan wala Niya gipangayo nato nga moatubang niadto nga mga hagit nga mag-inusara.

Gipakita ko sa dalan sa Israel sa akong suod nga higala nga si Ilan. “Kini gitawag og Dalan ni Jesus,” miingon siya, “tungod kay kini ang dalan gikan sa Nazaret padulong sa Capernaum nga gituohan sa kadaghanan nga gilaktan ni Jesus.” Ako midesisyon dihadiha dayon nga ganahan ko nga molakaw niana nga dalan, mao nga nagsugod ko og plano og biyahe padulong sa Israel.

Unom ka semana sa wala pa ang biyahe, nalisa ang akong bukong-bukong. Ang akong bana nabalaka mahitungod sa piang; ang akong dako nga kabalaka kon unsaon nako paglakaw sa Dalan ni Jesus sa pagkasunod nga bulan. Masinupakon gyod ko, mao nga wala nako gikanselar ang mga tiket sa eroplano.

Nahinumdom ko nga nakigtagbo sa among tiggiya nga Israeli nianang maanindot nga buntag sa Hunyo. Milukso ko gikan sa van ug dayon gibira ang usa ka set sa mga sungkod ug knee scooter. Si Mya, ang among tiggiya, mipasiplat sa akong bendahe ug miingon, “Hala, sa tan-aw nako dili ka makalakaw niini nga dalan sa ingon ana nga kahimtang.”

“Basin dili,” mitubag ko. “Apan walay makapugong nako nga mosulay.” Mitando siya og gamay, ug nagsugod mi. Ganahan ko niya tungod niana, sa pagtuo nga ako makalakaw sa dalan bisan nagtakiang.

Akong gisubay ang sakaon nga agianan ug ang mga dagkong bato sa mubo nga higayon nga ako ra. Dayon, kay natandog sa sinseridad sa akong pasalig, si Mya mibira og nipis nga pisi, gihigot kini sa mga gunitanan sa akong scooter, ug misugod sa pagbira. Iya kong gibira pasaka sa mga bungtod, lahos sa mga tamnanan og lemon, ug subay sa mga daplin sa Dagat sa Galilea. Sa kataposan sa panaw, akong gipadangat ang pasalamat sa akong mapinanggaon nga tiggiya, kinsa mitabang nako nga makahuman og usa ka butang nga dili gayod nako mahuman kon ako ra.

Sa dihang gitawag sa Ginoo si Enoch aron mopanaw sa tibuok yuta ug mopamatuod Kaniya, si Enoch nagduhaduha.¹ Siya usa lamang ka batan-on, dili maayo nga mosulti. Unsaon niya sa paglakaw niana nga dalan sa iyang kahimtang? Siya nabuta sa unsay kakulangan niya. Ang tubag sa Ginoo sa unsay nagpugong niya yano ug dihadiha dayon: “Lakaw uban kanako.”² Sama ni Enoch, kita kinahanglan nga mahinumdom nga ang Usa kinsa gisakit ug nasamdan alang kanato³ motugot nga kita magsagubang sa mga hagit sa mortalidad, apan wala Niya gipangayo nato nga moatubang niadto nga mga hagit nga mag-inusara.⁴ Bisan unsa pa kabug-at ang atong istorya o ang kasamtangang kahimtang sa atong dalan, Siya modapit kanato nga molakaw uban Kaniya.⁵

Hunahunaa ang usa ka batan-ong lalaki nga anaa sa lisod nga sitwasyon kinsa nakigtagbo sa Ginoo sa dapit sa kamingawan. Si Jacob mibiyahe layo sa panimalay. Sa ngitngit nga kagabhion, siya adunay damgo nga dili lang naglangkob og hagdan apan usab naghupot og mahinungdanon nga mga saad sa pakigsaad, lakip na ang gusto nakong tawagon og lima ka tudlo nga saad.⁶ Nianang gabhiona, ang Ginoo mibarog tupad ni Jacob, mipaila sa Iyang Kaugalingon isip ang Dios sa amahan ni Jacob, ug dayon misaad:

Ako nag-uban kanimo.
Panalipdan ko ikaw.
Dad-on ko ikaw pagbalik niining yutaa.
Dili ko ikaw biyaan.
Matuman ang gisaad ko kanimo.⁷

Si Jacob kinahanglan nga mopili. Makapili siya nga mopuyo sa iyang kinabuhi nga makaila lang sa Dios sa iyang amahan, o Siya makapili nga mopuyo sa kinabuhi sa mapasaligon nga relasyon sa pakigsaad uban Niya. Mga tuig ang milabay, si Jacob mipamatuod sa kinabuhi nga gipuy-an sulod sa mga saad sa pakigsaad sa Ginoo: “Ang Dios …nagtubag kanako sa adlaw sa akong kagul-anan, ug nag-uban siya kanako sa dalan nga akong gilaktan.”⁸ Sama sa Iyang gibuhat ni Jacob, ang Ginoo motubag sa matag usa kanato sa atong adlaw sa kagul-anan kon kita mopili nga ipahiuyon ang atong kinabuhi uban sa Iyaha. Siya misaad nga molakaw uban kanato diha sa agianan.

Ato kining gitawag og paglakaw sa dalan sa pakigsaad—usa ka dalan nga nagsugod sa pakigsaad sa bunyag ug mopadulong ngadto sa mas lawom nga mga pakigsaad nga atong gihimo sulod sa templo. Tingali nakadungog mo niadtong mga pulong ug naghunahuna sa tsekan nga mga kahon. Basin ang tanan ninyo nga nakita mao ang dalan sa mga kinahanglanon. Ang mas duol nga pagtan-aw mopadayag og usa ka butang nga mas namugos. Ang usa ka pakigsaad dili lamang mahitungod sa usa ka kontrata, bisan kon kini importante. Kini mahitungod sa relasyon. Si Presidente Russell M. Nelson nagtudlo, “Ang dalan sa pakigsaad mahitungod gayod sa atong relasyon uban sa Dios.”⁹

Ikonsiderar ang pakigsaad sa kaminyoon. Ang petsa sa kasal importante, apan sama ka importante mao ang relasyon nga naumol pinaagi sa kinabuhi nga magkaubang gipuy-an pagkahuman. Sama katinuod sa relasyon sa pakigsaad uban sa Dios. Ang mga kondisyon nahan-ay na, ug adunay mga gilaoman samtang nagpadayon kini. Apan Siya nagdapit sa matag usa kanato sa pagduol kon mahimo nato, uban sa bug-os nga katuyoan sa kasingkasing, ug “mopadayon sa unahan”¹⁰ uban Niya sa atong kiliran, mosalig nga ang Iyang gisaad nga mga panalangin moabot. Ang kasulatan nagpahinumdom kanato nga kasagaran kadto nga mga panalangin moabot sa Iyang kaugalingon nga panahon ug sa Iyang kaugalingon nga paagi: 38 ka tuig,¹¹ 12 ka tuig,¹² dihadiha dayon.¹³ Kon ang imong dalan nanginahanglan, ang Iyang pag-agak anaa.¹⁴

Ang Iyang misyon mao ang pagtabang nato gikan sa ubos nga kahimtang. Si Jesukristo mosugat nato kon asa kita sa kon unsa kita. Kini mao ang ngano sa tanaman, sa krus, ug sa lubnganan. Ang Manluluwas gipadala aron motabang nato sa pagbuntog.¹⁵ Apan ang pagpabilin kon asa kita dili modala sa kaluwasan nga atong gipangita. Sama nga Siya wala mobiya ni Jacob didto sa hugaw, ang Ginoo wala magtinguha sa pagbiya ni bisan kinsa kanato kon asa man kita.

Ang Iya usab nga misyon mao ang pagtabang nato nga mabayaw. Siya mobuhat diha sa sulod nato¹⁶ aron mobayaw nato ngadto sa kon asa man Siya ug, diha sa proseso, mopahimo nato nga mahisama kon unsa Siya. Si Jesukristo miabot aron sa pagbayaw nato.¹⁷ Gusto Niya nga motabang nato nga mamahimo. Mao kini ang ngano sa templo.

Kinahanglan natong hinumdoman: dili lang ang giagian ang mopabayaw nato; kini mao ang kauban––ang atong Manluluwas. Ug kini ang ngano sa relasyon sa pakigsaad.

Sa dihang naa ko sa Israel, gibisita nako ang Paril sa Kasadpan [Western Wall]. Alang sa mga Judeo, kini mao ang labing balaan nga dapit sa Israel. Kini na lang ang nahibilin sa ilang templo. Kadaghanan magsul-ob sa ilang labing nindot nga sapot kon sila mobisita niining balaan nga dapit; ang ilang pagpili sa isul-ob usa ka simbolo sa ilang debosyon sa ilang relasyon sa Dios. Mobisita sila sa paril aron sa pagbasa sa kasulatan, sa pagsimba, ug sa pagpadangat sa ilang mga pag-ampo. Ang pangamuyo alang sa usa ka templo taliwala nila mihurot sa ilang matag adlaw, ilang matag pag-ampo, kini nga pangandoy alang sa usa ka balay sa pakigsaad. Nakadayeg ko sa ilang debosyon.

Sa dihang nakauli na ko gikan sa Israel, mas naminaw ko og maayo sa mga panaghisgotanay palibot nako kabahin sa mga pakigsaad. Nakabantay ko sa mga tawo nga mangutana, Nganong kinahanglan man ko nga molakaw sa usa ka dalan sa pakigsaad? Kinahanglan ba ako nga mosulod sa usa ka balay alang sa paghimo og mga pakigsaad? Nganong magsul-ob man ko sa balaan nga sapot? Kinahanglan ba ako nga mohatag og gibug-aton diha sa relasyon sa pakigsaad uban sa Ginoo? Ang tubag niining maayo ug importante nga mga pangutana yano lang: kini nakadepende sa unsa nga ang-ang sa relasyon nga gusto nimong masinati uban ni Jesukristo.¹⁸ Matag usa nato kinahanglan nga modiskobre sa atong kaugalingon nga tubag niadtong lawom nga personal nga mga pangutana.

Mao kini ang akoa: Naglakaw ko niini nga dalan isip usa ka “hinigugmang anak nga babaye sa langitnong mga ginikanan,”¹⁹ balaanong giila²⁰ ug hugot nga gisaligan.²¹ Isip anak sa pakigsaad, ako takos nga modawat sa gisaad²² nga mga panalangin. Ako mipili²³ nga molakaw uban sa Ginoo. Ako gitawag²⁴ aron mobarog ingon nga usa ka saksi ni Kristo. Kon ang dalan mabati nga lisod na kaayo, ako gilig-on²⁵ uban sa makapatakos nga grasya. Matag higayon nga ako molabang sa bakanan sa Iyang balay, ako makasinati og mas lawom nga relasyon sa pakigsaad uban Niya. Ako gibalaan²⁶ sa Iyang Espiritu, gitugahan²⁷ sa Iyang gahom, ug gi-set apart²⁸ aron sa pagtukod sa Iyang gingharian. Pinaagi sa proseso sa inadlaw nga paghinulsol ug sinemana nga pag-ambit sa sakramento, ako nakat-on nga mahimong dili matarog²⁹ ug moadto ug maghimog maayong mga butang.³⁰ Naglakaw ko niini nga dalan uban ni Jesukristo, naglantaw sa gisaad nga adlaw nga Siya mobalik pag-usab. Dayon ako mahimong maselyohan nga Iyaha³¹ ug ibayaw isip usa ka balaan³² nga anak nga babaye sa Dios.

Mao kini nganong naglakaw ko sa dalan sa pakigsaad.

Mao kini nganong naghupot ko sa mga saad sa pakigsaad.

Mao kini nganong mosulod ko sa Iyang balay sa pakigsaad.

Mao kini nganong nagsul-ob ko sa balaan nga sapot isip kanunay nga pahinumdom.

Tungod kay gusto ko nga mopuyo sa mapasaligon nga relasyon sa pakigsaad uban Niya.

Tingali ikaw usab. Pagsugod kon asa ka.³³ Ayaw tugoti ang imong kahimtang nga mobabag nimo. Hinumdomi, ang gikusgon o nahimutangan diha sa dalan dili sama ka importante sa paglambo.³⁴ Hangyoa ang usa ka tawo nga imong gisaligan kinsa naa sa dalan sa pakigsaad sa pagpaila nimo ngadto sa Manluluwas nga ilang nailhan. Pagkat-on og dugang mahitungod Niya. Hatagi og gibug-aton ang relasyon pinaagi sa pagsulod ngadto sa pakigsaad uban Niya. Dili mahinungdanon ang inyong edad o inyong kahimtang. Makalakaw ka uban Kaniya.

Pagkahuman namo og lakaw sa Dalan ni Jesus, wala kuhaa og balik ni Mya ang iyang pisi. Iya kining gipabilin nga nakahigot sa akong scooter. Sa misunod nga pipila ka adlaw, ang akong tinedyer nga mga pag-umangkong lalaki ug ang ilang higala nagpuli-puli og bira nako latas sa mga kalsada sa Jerusalem.³⁵ Ilang giseguro nga dili nako malabyan ang mga istorya ni Jesus. Napahinumdoman ko sa kalig-on sa umaabot nga henerasyon. Makakat-on mi gikan ninyo. Kamo adunay bug-os nga tinguha nga makaila sa tiggiya, si Jesukristo. Kamo misalig sa kalig-on sa pisi nga mopahiuyon nato ngadto Niya. Kamo talagsaon nga gigasahan sa pagpundok sa uban ngadto Kaniya.³⁶

Salamat na lang, kita naglakaw nga magkauban niini nga dalan, motawag og pagdasig samtang nagpanaw.³⁷ Samtang kita mopakigbahin sa atong personal nga kasinatian uban ni Kristo, kita makapalig-on og personal nga debosyon. Niini ako mopamatuod sa ngalan ni Jesukristo, amen.