Mga Timailhan sa Kalipay
Ang pagtukod diha sa sukaranan ni Jesukristo importante sa atong kalipay.
Samtang nagbiyahe sa eroplano pipila ka tuig na ang milabay tungod sa katungdanan sa negosyo, nadiskobrehan nako nga ako naglingkod tapad sa usa ka tawo nga taga-Netherlands. Ako mahinamon nga nakig-istorya kaniya tungod kay miserbisyo ako sa Belgium ug sa Netherlands isip usa ka batan-ong misyonaryo.
Sa dihang kami nag-ilaila na, siya mihatag nako sa iyang business card nga adunay talagsaon nga titulo sa trabaho nga “propesor sa kalipay.” Ako mikomento sa iyang talagsaon nga propesyon ug nangutana kaniya unsay buhaton sa usa ka propesor sa kalipay. Siya miingon nga siya mitudlo sa katawhan unsaon sa pagbaton og malipayon nga kinabuhi pinaagi sa pag-establisar og makahuloganon nga mga relasyon ug mga tumong. Ako mitubag, “Nindot kana, apan unsa kaha kon ikaw makatudlo usab kon sa unsang paagi kana nga mga relasyon makapadayon lapas pa sa lubnganan ug makatubag og ubang mga pangutana sa kalag, sama sa unsa ang katuyoan sa kinabuhi, unsaon nato pagbuntog ang atong mga kahuyang, ug asa kita paingon human kita mamatay?” Siya miangkon nga pagkaanindot kon kita adunay mga tubag niadto nga mga pangutana, ug ako malipayong mipakigbahin kaniya nga kita aduna.
Karon, ako gusto nga morebyo og pipila ka mahinungdanong baroganan alang sa tinuod nga kalipay nga wala maangkon sa daghang tawo, diin daghang butang ang makapadani apan pipila lang ang tinuod nga mahinungdanon.
Si Alma mitudlo sa katawhan sa iyang panahon, “Kay tan-awa, ako moingon nganha kaninyo adunay daghan nga mga butang nga moabot; ug tan-awa, adunay usa ka butang nga labaw ka mahinungdanon kay kanilang tanan—kay tan-awa, ang panahon dili na layo nga ang Manunubos mabuhi ug moanhi taliwala sa iyang mga katawhan.”1
Kini nga deklarasyon importante usab kanato karon samtang kita nagpaabot ug nangandam alang sa Ikaduhang Pag-anhi ni Kristo!
Busa, ang akong unang obserbasyon mao nga ang pagtukod diha sa sukaranan ni Jesukristo importante sa atong kalipay. Mao kini ang tinuod nga sukaranan, “usa ka sukaranan diin kon ang mga tawo magtukod dili sila mapukan.”2 Ang pagbuhat sa ingon nag-andam kanato alang sa mga hagit sa kinabuhi, bisan unsa pa ang mahitabo.
Daghang tuig na ang milabay, miadto ko sa usa ka Scout camp sa ting-init uban sa among anak nga si Justin. Dihang ang mga kalihokan nagsugod, naghinamhinam siyang mipahibalo nga siya ug ang iyang mga higala gusto nga moangkon sa archery merit badge. Ang pagbuhat niini nagkinahanglan sa mga batang lalaki nga makapasar sa usa ka mubo nga sinulat nga pasulit ug makaigo sa target gamit ang ilang mga pana.
Ang akong kasingkasing nahugno. Niadtong panahona, si Justin medyo huyang tungod sa cystic fibrosis, usa ka sakit nga iyang gisagubang sukad sa pagkatawo. Naghunahuna ko kon makahimo ba kaha siya sa pagbira sa busog pabalik og igo aron ipadala ang pana ngadto sa target.
Dihang siya ug ang iyang mga higala mibiya para sa klase sa archery, ako hilom nga nag-ampo nga dili siya maulawan sa kasinatian. Paglabay sa pipila ka oras nga kabalaka, nakita nako siya nga nagpadulong kanako nga nagpahiyom. “Pa!” siya mituaw. “Akong nakuha ang merit badge! Ako naka-bull’s-eye; naa kadto sa target sunod sa akoa, apan naigo nako ang bull’s-eye!” Iyang gibira pabalik ang busog sa tibuok niyang kusog ug gipalupad ang pana, nga dili na makontrolar ang agianan niini. Mapasalamaton kaayo ko alang niadtong masinabtanon nga instruktor sa archery, kinsa wala gayod moingon, “Gikasubo ko, sayop ang target!” Apan, sa pagkakita sa mga limitasyon ug matinguhaon nga paningkamot ni Justin, siya mabinationg mitubag, “Maayo nga pagkatrabaho!”
Ingon niana ang mahitabo kanato kon buhaton nato ang atong labing maayo sa pagsunod ni Kristo ug sa Iyang mga propeta bisan pa sa atong mga limitasyon. Kon kita moduol ngadto Kaniya pinaagi sa pagtuman sa atong mga pakigsaad ug paghinulsol sa atong mga sala, kita malipayong makadungog sa pagdayeg sa atong Manluluwas: “Maayo! Buotan ka ug matinumanon nga sulugoon.”3
Ako mosaksi sa kabalaan sa Manluluwas sa kalibotan ug sa Iyang matubsanong gugma ug gahom sa pag-ayo, sa paglig-on, ug sa pagbayaw kanato kon kita matinguhaong maningkamot sa pagduol ngadto Kaniya. Sa laing bahin, dili mahimo nga kita mosunod uban sa panon ug usab ngadto kang Jesus. Ang Manluluwas mibuntog sa kamatayon, sa sakit, ug sala ug mihatag og paagi alang sa atong kahingpitan sa kataposan kon kita mosunod Kaniya sa tibuok natong kasingkasing.4
Ang akong ikaduhang obserbasyon mao nga importante kaayo sa atong kalipay nga kita mohinumdom nga kita anak nga mga lalaki ug mga babaye sa usa ka mahigugmaon nga Langitnong Amahan. Ang pagkahibalo ug pagsalig niini nga kamatuoran mag-usab sa tanan.
Pipila ka tuig ang milabay, sakay sa eroplano pauli gikan sa usa ka buluhaton sa Simbahan, si Sister Sabin ug ako nakakaplag sa among kaugalingon nga naglingkod luyo gayod sa usa ka dakong lalaki nga adunay tattoo sa usa ka dako, masuk-anon nga dagway diha sa likoran sa iyang upaw nga ulo lakip na ang numero 439.
Pag-abot namo, miingon ko, “Pasayloa ko sir. Ok ra ba kon mangutana ko sa importansya sa numero nga gi-tattoo diha sa likod sa imong ulo?” Wala ko mangahas sa pagpangutana mahitungod sa masuk-anon nga dagway.
Siya miingon, “Ako na. Mao na kon si kinsa ako. Ako ang tag-iya nianang teritoryo: 219!”
Ang Kuwatro siyentos traynta y nuwebe mao ang tinuoray nga numero naa sa iyang ulo, mao nga na sorpresa ko nga nasayop man siya nga unta importante man kadto kaniya.
Naghunahuna ko kon unsa ka makapasubo nga ang pagkatawo ug pagtamod sa kaugalingon niining tawhana gibase sa usa ka numero nga adunay kalabotan sa teritoryo sa gang. Naghunahuna ko sa akong kaugalingon: Kining isog tan-awon nga lalaki kaniadto usa ka gamay nga bata nga kinahanglan pa nga mobati nga adunay bili ug nahisakop. Kon nasayod pa lang unta siya kon kinsa gayod siya ug kon kang kinsa siya nahisakop, kay kitang tanan “gipalit sa usa ka bili.”5
Adunay maalamon nga linya diha sa kanta gikan sa salida Ang Prinsipe sa Ehipto [The Prince of Egypt] nga nag-ingon, “Tan-awa ang imong kinabuhi pinaagi sa mga mata sa langit.”6 Samtang ang kahibalo sa atong balaanong kaliwatan ug mahangtorong potensiyal lawom nato nga gihunahuna og gisabot, kita makahimo sa paglantaw sa kinabuhi isip usa ka may katuyoan, nagpadayon nga panimpalad aron makat-on ug motubo gikan niini, bisan kon ang “atong nakita karon sama lamang sa hanap nga panagway diha sa salamin”7 sa mubo nga panahon.
Ang ikatulo nga timailhan sa kalipay mao ang paghinumdom sa kanunay sa bili sa usa ka kalag. Kita labing makahimo niini pinaagi sa pagsunod sa tambag sa Manluluwas: “Paghigugmaay kamo; ingon nga ako nahigugma kaninyo.”8
Siya usab mitudlo, “Sa matag higayon nga maghimo kamo niini alang sa usa sa labing ubos niining akong mga igsoon, gihimo ninyo kini alang kanako!”9
Ang basahon sa Mga Panultihon maalamong nagtambag, “Ayaw ihikaw ang mga kaayohan ngadto sa nagkinahanglan niini ilabi na kon aduna kay mahimo niini.”10
Dili gyod kita magmahay kon maghinobra ka mabination. Diha sa mga mata sa Dios, ang pagkamabination sama sa dili matandi nga gahom sa Dios. Kabahin sa pagkamabination mao ang pagkamapasayloon ug dili mahukmanon.
Daghang katuigan ang milabay ang among bag-ong pamilya motan-aw og salida alang sa family home evening. Kaming tanan diha na sa van gawas lang sa usa sa among anak nga mga lalaki ug ang akong asawa, si Valerie. Padulong na mongitngit, ug samtang ang among anak nga lalaki miabli sa pultahan ug midagan paingon sa sakyanan, wala tuyoa napatiran niya ang iyang gihunahuna nga among iring nga tua sa beranda. Dimalas alang sa among anak nga lalaki ug sa akong asawa, nga naa sa iyang luyo, dili kadto ang among iring apan usa ka wala malipay nga skunk, nga mibalos kanila! Kaming tanan mibalik sa balay, diin silang duha naligo ug naghugas sa ilang buhok og duga sa kamatis, ang gituohan nga seguradong paagi aron mawala ang baho sa skunk. Human sila nanglimpyo ug nag-ilis sa ilang mga sinina, kaming tanan nalimpyohan na sa bisan unsa nga baho, mao nga kami nakahukom nga kami OK na nga moadto sa sine.
Pagkalingkod namo sa may likod nga bahin diha sa sinehan, tagsa-tagsa ang mga tawo diha sa among palibot kalit midesisyon sa paggawas aron mopalit og popcorn. Sa dihang mibalik na sila, hinoon, wala ni usa nga mibalik sa ilang orihinal nga gilingkoran.
Nangatawa mi samtang among gihinumdoman kadto nga kasinatian, apan unsa kaha kon ang atong tanang sala adunay baho? Unsa kaha kon atong masimhotan ang atong pagka bakakon, kahigal, pagkamasinahon, o garbo? Kon ang atong kaugalingong mga kahuyang mapadayag, kita malaomon nga mahimong mas mahunahunaon ug mabinantayon sa uban ug, sa samang paagi, sila usab, samtang kita mohimo sa gikinahanglan nga mga kausaban diha sa atong mga kinabuhi. Ganahan ko sa baho sa tabako diha sa simbahan, tungod kay kini nagpaila nga adunay usa ka tawo nga naningkamot sa pag-usab. Sila nagkinahanglan sa atong maabiabihong mga bukton nga mogakos kanila.
Si Presidente Russell M. Nelson maalamong misulti nga, “Usa sa labing sayon nga paagi sa pag-ila sa usa ka tinuod nga sumusunod ni Jesukristo mao ang maluluy-on nga pagtagad niana nga tawo ngadto sa ubang tawo.”11
Si Pablo misulat ngadto sa mga taga-Efeso, “Pagkaloy-anay hinoon kamo ug pagbaton sa malumong kasingkasing alang sa usag-usa ug pagpinasayloay kamo ingon nga gipasaylo kamo sa Dios diha kang Kristo.”12
Isip mga disipulo ni Jesukristo, kita gihangyo sa pagsalig sa Langitnong Amahan ug sa atong Manluluwas ug dili mosulay sa pagpuli Kanila. Si Jesukristo hingpit nga nasayod sa pagkadili hingpit sa tanan ug hingpit nga mohukom nila.
Ang akong ikaupat nga timailhan sa kalipay mao ang pagmintinar og mahangtoron nga panglantaw. Ang plano sa atong Amahan moabot ngadto sa mga kahangtoran; sayon ang pagtutok sa kasamtangang panghitabo matag adlaw diha sa atong mga kinabuhi ug pagkalimot sa umaabot.
Ako natudloan niini nga leksyon sa gamhanang paagi pipila ka tuig na ang milabay sa among 16 anyos nga anak nga babaye, si Jennifer. Siya hapit na magdoble og transplant sa baga, diin ang lima ka masakiton nga lobes sa iyang baga hingpit nga kuhaon ug pulihan sa duha ka himsog nga gagmay nga lobe, nga gidonar sa duha ka talagsaong sama kang Kristo nga mga higala. Usa kadto ka risgo kaayo nga pamaagi, apan sa gabii sa wala pa ang iyang operasyon, si Jennifer hapit mosangyaw kanako uban sa tanan niyang 90 ka libra (41 ka kilo), nga nag-ingon, “Ayaw kabalaka, Pa! Ugma momata ko nga adunay bag-o na nga baga, o momata ko sa mas maayo nga dapit. Bisan asa mahimong nindot.” Kana mao ang hugot nga pagtuo; kana mao ang mahangtorong panglantaw! Ang pagtan-aw sa kinabuhi gikan sa mahangtorong dapit maghatag og katin-awan, kahupayan, kaisog, ug paglaom.
Human sa operasyon, sa dihang miabot ang dugay nang gipaabot nga adlaw sa pagtangtang sa tubo sa pagginhawa ug sa pagpalong sa ventilator nga nagtabang kang Jennifer sa pagginhawa, kami mabalak-on nga naghulat aron tan-awon kon mogana ba ang iyang duha ka gagmay nga lobe. Dihang miginhawa siya sa unang higayon, misugod dayon siya sa paghilak. Pagkakita sa among kabalaka, dali siyang mituaw, “Nindot kaayo ang moginhawa.”
Sukad niana nga adlaw, ako nagpasalamat sa Langitnong Amahan mabuntag ug magabii sa akong abilidad sa pagginhawa. Kita gilibotan sa dili maihap nga mga panalangin nga dali ra natong mapasagdan kung dili kita mahunahunaon. Sa laing bahin, kon walay gilaoman ug ang tanan gidayeg, ang kinabuhi mahimong sobra ka maanindot.
Si Presidente Nelson miingon: “Matag bag-o nga kabuntagon usa ka gasa gikan sa Dios. Bisan ang hangin nga atong giginhawa usa ka mahigugmaong utang gikan Kaniya. Iya kitang giatiman sa adlaw-adlaw ug nagpaluyo kanato sa matag gutlo. Busa, ang atong unang halangdon nga buhat sa buntag mao ang usa ka mapaubsanon nga pag-ampo sa pagpasalamat.”13
Kana nagdala kanako sa akong ikalima ug kataposang obserbasyon, nga mao nga dili kamo mas magmalipayon kay sa inyong pagka mapasalamaton.
Ang Ginoo mipahayag, “Ug siya kinsa nakadawat sa tanan nga mga butang uban sa pagpasalamat mahimo nga mahimayaon.”14 Tingali kini tungod kay ang pagpasalamat moresulta ngadto sa daghan pa nga laing mga hiyas.
Unsa ang pagbag-o sa atong kahibalo kon matag buntag kita momata nga aduna lamang sa mga panalangin nga atong gipasalamatan sa miaging gabii. Ang pagkapakyas sa pagpasalamat sa atong mga panalangin mahimong moresulta diha sa usa ka pagbati sa pagkadili-kontento, nga mokuha sa atong kamaya ug kalipay nga ipahinabo sa pagkamapasalamaton. Kadtong anaa sa dako ug lapad nga gambalay nagdani kanato sa pagtan-aw lapas pa sa tumong, sa ingon wala hatagi og bili kon unsa hinoon ang importante.
Sa pagkatinuod, ang labing dakong kalipay ug panalangin sa mortalidad makita diha sa kang kinsa kita nahimo pinaagi sa grasya sa Dios samtang kita mohimo ug motuman sa sagradong mga pakigsaad uban Kaniya. Ang atong Manluluwas mohashas ug mopadalisay kanato pinaagi sa mga merito sa Iyang maulaong sakripisyo ug miingon niadtong kinsa andam nga mosunod Kaniya, “Sila mahimo nga ako niana nga adlaw sa panahon nga Ako moabot aron sa pagpundok sa akong mga bahandi.”15
Ako mosaad kaninyo nga kon kita motukod sa atong mga kinabuhi diha sa sukaranan ni Jesukristo; mohatag og bili sa tinuod nato nga pagkatawo nga anak nga mga lalaki ug mga babaye sa Dios; mohinumdom sa bili sa usa ka kalag; momintinar og mahangtorong panglantaw; ug modayeg sa mapasalamaton nga paagi sa atong daghang panalangin, ilabi na ang pagdapit ni Kristo sa pagduol ngadto Kaniya, kita makakaplag sa tinuod nga kalipay nga atong gipangita niining mortal nga panimpalad. Ang kinabuhi aduna gihapon niining mga hagit, apan mas maayo natong maatubang ang matag usa niini inubanan ang katuyoan ug kalinaw tungod sa mahangtorong mga kamatuoran nga atong nasabtan ug gisunod.
Ako mohatag kaninyo sa akong pagsaksi sa katinuod sa Dios, ang atong mahigugmaong Amahan, ug sa Iyang Pinalanggang Anak, si Jesukristo. Ako mopamatuod usab sa [katinuod] sa buhi nga mga propeta, manalagna, ug mga tigpadayag. Pagkadako nga panalangin nga modawat sa mga pahimangno sa langit pinaaagi kanila. Sama sa klaro nga gipahayag sa Manluluwas, “Bisan pinaagi sa akong kaugalingon nga tingog o pinaagi sa tingog sa akong mga sulugoon, kini managsama ra.”16 Diha sa sagradong ngalan ni Jesukristo, amen.