Alang sa Kaayohan sa Inyong Kaliwatan
Ayaw itugot nga mahimong huyang nga sumpay niining matahom nga kadena sa hugot nga pagtuo nga inyong gisugdan, o inyong nadawat, isip usa ka kabilin. Pagmalig-on.
Pipila ka tuig ang milabay, sa dihang nagserbisyo ko didto sa South America Northwest Area ug nagpuyo sa Peru, nakabaton ko og usa ka matahom nga kasinatian nga ganahan nakong ipakigbahin kaninyo.
Nahitabo kini sa dihang paingon na ako nga mopauli human nga na-busy sa mga buluhaton sa pagtapos sa semana. Human nga nakompleto ra sa kataposan ang proseso sa immigration sa tugpahanan [airport], nakakita ko og usa ka mahigalaon nga drayber sa taxi nga nagpaabot nako gikan sa among naandan nga taxi service. Gidala ko niya ngadto sa iyang sakyanan, ug milingkod ko sa luyo andam nang morelaks ug tagamtamon ang hilom nga biyahe padulong sa panimalay. Pag-abot og pipila ka eskina, ang driver nakadawat og tawag sa phone gikan sa iyang superbisor nagsulti kaniya nga sayop ang taxi nga akong gisakyan. Lain nga sakyanan ang gireserba alang kanako, ug ang superbisor mihangyo kaniya nga dad-on ko og balik ngadto sa tugpahanan kon gusto ko nga makig-ilis og mga sakyanan. Ako siyang gisultihan nga dili na kinahanglan, ug makapadayon ra kami. Human sa pipila ka minuto sa kahilom, mitan-aw siya nako diha sa samin ug nangutana, “Mormon ka, dili ba?”
Nan, human nianang makadasig nga pangutana, nasayod ko nga ang akong hilom nga mga gutlo natapos na. Dili ko makapugong sa pagsuhid kon asa padulong ang iyang gipangutana.
Akong nasayran nga ang iyang ngalan si Omar, ang ngalan sa iyang asawa si Maria Teresa, ug sila adunay duha ka mga anak—si Carolina, edad 14, ug si Rodrigo, edad 10. Si Omar namiyembro sa Simbahan sukad niadtong bata pa siya. Ang iyang pamilya kaniadto aktibo, apan usa ka higayon, ang iyang mga ginikanan mihunong sa pagsimba. Si Omar nahimo nga dili na gayod aktibo sa dihang nag-edad siya og 15. Niadtong tungora 40 anyos na siya.
Nianang higayona nakaamgo ko nga dili sayop nga taxi ang akong nasakyan. Dili kadto usa ka sulagma! Ako misulti kaniya kon si kinsa ako ug nga ako anaa sa iyang taxi tungod kay ang Ginoo nagtawag kaniya sa pagbalik ngadto sa Iyang panon.
Nagka-istorya dayon kami bahin niadtong panahon nga siya ug ang iyang pamilya aktibo pa nga mga miyembro sa Simbahan. Siya adunay makalingaw nga mga panumdoman sa maanindot nga mga higayon sa family-home-evening ug pipila ka mga kanta sa Primary. Dayon mikanta siya og pipila ka mga pulong sa “Ako Anak sa Dios.”1
Human nako makuha ang iyang pinuy-anan [address], numero sa telepono, ug pagtugot sa pagpakigbahin niini sa iyang bishop, ako siyang gisultihan nga mangita ko og paagi nga makaadto sa chapel sa iyang unang adlaw sa pagbalik sa simbahan. Among nahuman ang among biyahe gikan sa tugpahanan hangtod sa akong panimalay, ingon man ang among gamayng biyahe ngadto sa iyang kagahapon, ug nag-iyahay na kami og adto sa among padulngan.
Pipila ka semana ang milabay ang iyang bishop mitawag kanako, nagsulti nako nga si Omar nagplano sa pagtambong sa simbahan sa usa ka piho nga Dominggo. Ako siyang gisultihan nga moadto ko didto. Nianang Dominggoha, si Omar didto uban sa iyang anak nga lalaki. Iyang asawa ug anak nga babaye dili pa interesado. Pipila ka bulan ang milabay, ang iyang bishop mitawag nako pag-usab, niining higayona gisultihan ko nga si Omar magbunyag sa iyang asawa ug sa iyang duha ka anak, ug siya midapit nako nga motambong. Ania ang litrato niana nga Dominggo diin kompirmar sila nga mga miyembro sa Simbahan.
Nianang sama nga Dominggo, ako misulti ni Omar ug sa iyang pamilya nga kon sila andam na, sa usa ka tuig, akoang dungog ang makapahigayon sa ilang pagselyo didto sa Lima Peru Temple. Ania ang litrato niana nga halandomon nga gutlo alang kanamong tanan, gilitratohan usa ka tuig ang milabay.
Nganong akong gipakigbahin kini nga kasinatian diha kaninyo? Ako kining gipakigbahin alang sa duha ka katuyoan.
Una, aron sa pagpamulong niadtong maayo nga mga miyembro nga tungod sa ubang rason nahibulag gikan sa gipahiuli nga ebanghelyo ni Jesukristo. Ikaduha, aron usab sa pagpamulong niadto kanila nga nangapil nga mga miyembro karon kinsa tingali dili pa ingon ka matinud-anon ngadto sa ilang mga pakigsaad sama sa angay unta nilang buhaton. Sa duha ka kahimtang, ang mga henerasyon sa unahan kanila naapektohan, ug ang mga panalangin ug mga saad nga gitagana alang sa ilang mga kaliwatan namiligro.
Atong unahon ang unang sitwasyon, ang maayo nga mga miyembro kinsa mibiya sa dalan sa pakigsaad, sama sa nahitabo sa akong Peruvian nga higala nga si Omar. Sa dihang nangutana ko niya kon nganong midesisyon siya sa pagbalik, siya miingon nga tungod kay siya ug ang iyang asawa mibati nga ang ilang mga anak mahimong mas malipayon sa kinabuhi nga adunay ebanghelyo ni Jesukristo. Mibati siya nga panahon na para mobalik sa simbahan alang sa kaayohan sa ilang mga anak.
Subo kaayo kon kita makahinagbo og dili aktibo nga mga miyembro o dili mga miyembro sa Simbahan kinsa sa usa ka higayon nakabaton sa ebanghelyo diha sa ilang mga pamilya ug nawad-an niini tungod sa desisyon sa ilang mga ginikanan o mga apohan sa pag-undang gikan sa Simbahan. Kana nga desisyon mahimong adunay epekto sa ilang kaliwatan hangtod sa kahangtoran!
Ang ilang mga anak ug mga apo gilikay gikan sa panalipod ug mga panalangin sa ebanghelyo ni Jesukristo diha sa ilang mga kinabuhi. Ang labaw pa gayod nga makaguol, sila nawad-an sa mga saad sa mahangtoron nga pamilya nga diha unta usa ka adlaw niana. Ang desisyon sa usa ka tawo nakaapekto sa tibuok kutay sa mga kaliwatan. Ang usa ka kabilin sa hugot nga pagtuo nabugto.
Apan, sa atong nahibaloan, ang bisan unsang naguba mahimong ayohon pinaagi ni Jesukristo. Tungod niini nga rason, palihog ikonsiderar kini nga imbitasyon gikan ni Presidente Russell M. Nelson: “Karon, kon mipahawa kamo sa dalan, dapiton ko kamo uban sa tanang paglaom sa akong kasingkasing nga balik palihog. Bisan unsa [pa] ang inyong [mga] problema, bisan unsa [pa] ang inyong mga hagit, adunay luna alang kaninyo dinhi, sa Simbahan sa Ginoo. Kamo ug ang mga henerasyon nga wala pa matawo mapanalanginan sa inyong mga buhat karon nga mobalik sa dalan sa pakigsaad2
Karon, atong tukion ang ikaduha nga kahimtang, ang mga miyembro karon kinsa tingali dili pa ingon ka matinud-anon sama sa angay unta nilang buhaton. Sama lang nga ang mga desisyon sa kagahapon nakaapekto sa karon nga mga reyalidad, ang mga desisyon sa karon moapekto sa atong umaabot ug sa umaabot sa mga sakop sa atong pamilya.
Si Presidente Dallin H. Oaks nagtudlo kanato:
“Ang gipahiuli nga ebanghelyo ni Jesukristo nag-awhag kanato sa paghunahuna mahitungod sa umaabot. … Nagtudlo kini og importante nga mga ideya mahitungod sa umaabot aron magiyahan ang atong mga lihok karon.
“Sa pagtandi, kitang tanan nakaila og mga tawo kinsa nagpakabana lamang karon: mogasto karon, maglipay karon, ug dili maghunahuna alang sa umaabot.
“… Samtang kita mohimo og mga desisyon karon, kinahanglan mangutanan kita, ‘Unsa ang sangpotanan niini?3 Ang atoa ba nga kasamtangang mga desisyon modala kanato ngadto sa hingpit nga kalipay karon ug sa kahangtoran, o kini modala kanato ngadto sa kasub-anan ug mga luha?
Ang uban mahimong maghunahuna, “Dili man ta magkinahanglan nga mosimba sa matag Dominggo,” o “Dili ko mosuporta sa mga lider sa Simbahan kabahin niining hisgotanan.”
“Apan,” sila moingon, “kami nakahibalo nga ang Simbahan tinuod, ug kami dili gayod mobiya sa ebanghelyo ni Jesuskristo.”
Kadtong adunay mga hunahuna nga sama niini wala makaamgo sa negatibo nga epekto niining “dili mainiton” nga matang sa pagkamiyembro sa ilang kinabuhi ug sa kinabuhi sa ilang kaliwatan. Ang mga ginikanan mahimong magpabilin nga aktibo, apan ang risgo sa pagkawala sa ilang mga anak taas—niining kinabuhia ug sa kahangtoran.
Kalabot niadtong kinsa dili makapanunod sa celestial nga himaya uban sa ilang mga pamilya, ang Ginoo nag-ingon, “Kini mao sila kinsa dili mga maisog diha sa pagpamatuod ni Jesus; busa, sila dili makabaton og korona diha sa gingharian sa atong Dios.”4 Mao ba kana ang atong gusto sa atong kaugalingon o sa atong mga anak? Dili ba kita angay nga mahimong mas maisogon ug dili kaayo taphaw alang sa atong kaugalingon nga kaayohan ug sa kaayohan sa atong kaliwatan?
Si President M. Russell Ballard namulong usab og susama nga kabalaka:
“Alang sa uban, ang imbitasyon ni Kristo sa pagtuo ug pagpabilin padayon nga malisod—o lisod dawaton. … Pipila sa mga disipulo nanglimbasog sa pagsabot sa piho nga palisiya o pagtulon-an sa Simbahan. Ang uban makakita og problema sa kasaysayan sa Simbahan o sa mga apan sa pipila ka mga miyembro ug mga lider, kaniadto ug karon. …
“… Ang desisyon nga ‘dili na makiglakaw’ uban sa mga miyembro sa Simbahan ug sa pinili nga mga lider sa Ginoo adunay malungtaron nga epekto nga dili kanunay masabtan sa pagkakaron.”5
Pagkasubo nga kabilin nga ipasunod—ug sa unsa man nga rason? Bisan unsa man kini, dili igo ang pagbalewala sa negatibo nga espirituhanong epekto nga mahimo niini sa mga henerasyon nga umaabot.
Minahal kong mga kaigsoonan, kon kamo miagi sa usa niining duha ka sitwasyon nga akong gihisgotan sa akong mensahe, palihog ikonsiderar pag-usab ang dagan sa inyong binuhatan. Nasayod kamo nga adunay usa ka plano alang kanato niining kinabuhia. Kamo nasayod nga ang mga pamilya mahimong mahangtoron. Nganong inyo mang irisgo ang inyong pamilya? Ayaw itugot nga mahimong huyang nga sumpay niining matahom nga kadena sa hugot nga pagtuo nga inyong gisugdan, o inyong nadawat, isip usa ka kabilin. Pagmalig-on. Kini ang inyong higayon sa pagbuhat niini, ug ang Ginoo makatabang kaninyo.
Gikan sa kinauyokan sa akong kasingkasing, dapiton ko kamo sa paghunahuna mahitungod niini, sa pagtan-aw sa unahan ug sa pagtimbang-timbang “Unsa ang sangpotanan niini” ug, kon gikinahanglan, mahimong igo nga maisogon aron mausab ang inyong dalan alang sa kaayohan sa inyong kaliwatan. Sa ngalan ni Jesukristo, amen.