Makūtkūt ko an juon Kijeek Ettiņo̧
Anij ej ron̄jake aolep jar ko jej liļo̧k im ej uwaaki kajjojo iaer ekkar n̄an iaļ eo E ekar ļōm̧e n̄an wāppen eo ad.
Ro jeiū im jatū, ikar ekkatak juon katak eaorōk jān iien eo āliktata ikar pād ilo pulpit in im̧aan ilo kar Oktoba 2022 eo. Katak eo ej: eļan̄n̄e kwojjab leļo̧k juon kōnono ekkar, maron̄ kamoik eok jān kweilo̧k ko reļļap iien ko tok. Komaron̄ loe rekar maron̄ jitōn̄ eō m̧oktata ilo m̧wen̄an in ilo kweilo̧k in. Ta eo komaron̄ jab loe, ej bwe ij pād ioon juon kōjem̧ eo im epidodo kein depdep eo an. Eļan̄n̄e kōnono in eban waļo̧k ilo juon jekjek ekkar, iban maron̄ lo kom̧ ilo kweilo̧k ko jet.
Ilo jetōbin in al eo aiboojoj ippān kuwaer in aiboojoj, ejjab to ikar katak jet katak ko bwe, kōņ jipan̄ eo an Irooj, ij ļōmņak n̄an kwaļo̧k n̄an kom̧ rainin. Menin enaaj kōm̧m̧an bwe kōnono in en juon eo aorōk n̄an n̄a.
Eo elukkuun baj iooktok eō im kōmettak iaan aolep ko iar iooni ilo jet iien ko rej mootļo̧k kōn jako eo an kōrā eo pāleeō ejitōnbōro, Pat. E ekar kōrā eo em̧m̧antata ikar jeļā kajjeen—juon kōrā eo pālele im m̧am̧a eo ewāppen, ij jan̄in kar ekōnono kaki jet iaan kadkad ko an rekabwilōn̄lōn̄, an menin letok in kōnono, an jetōb. Ekar kwaļo̧k juon kōnono juon iien im taitōļ eo ekar “Kakūrm̧ool Jon̄ak in Kōm̧anm̧an eo Am̧.” Ilo aō lale em̧ōj an kakūrm̧ool jibadbad eo eaar kar kōm̧anm̧an kake eļapļo̧k jān jabdewōt armej imaron̄ ļōmņake. E ekar juon leddik eo eļap tokjān nejin Anij, juon kōrā in waanjon̄ak kōn Kraist. Ikar lukkuun em̧m̧aan eo ejeraam̧m̧an n̄an joļo̧k 60 iiō ko in mour eo aō ippān. N̄e inaaj m̧ool ilo erreo, liāp eo am ej kōmelet bwe imaron̄ mour ippān indeeo.
Bar juon en̄jake ekar waļok 48 awa ko ālkin iien kallib eo an kōrā eo pāleeō. Ilo iien eo, kar buuļ kake eō n̄an aujipitōļ kōn juon nan̄inmej enana im ekauwōtata. Tokālik ikar joļo̧k wiik ko emān jinoin ilo week ko jiljino in aō pād im diwōj deļo̧n̄ ilo ICU im ilo an ikkut aō mourtok im bar do̧lool.
Enan̄in aolep men ko iaar iooni ilo aujipitōļ ilo jinoin iien eo ej ilo aō jab maron̄ keememej. Ta eo ekar pād wōt im imaron keememeje ej juon iaļ eo iaar etal ie ļo̧k itulūkin aujipitōļ, itulūkin ijo im ej āinwōt jem̧ļo̧kin indeeo. Ijjab maron̄ lukkuun kōnono kōn aolepān ta ko rekar bōk jikier ilo iien in, ak imaron̄ kwaļo̧k bwe jidik in ta eo ikar bōke n̄an rōjan̄ n̄an ro̧o̧ltok n̄an jerbal in aō kōn eļapļo̧k aikuij, ļapļo̧k kakūrm̧ool, ļapļo̧k mijōk wōt Rilo̧mo̧o̧r, im ļapļo̧k tōmak ilo naan ko An.
Ijjab maron̄ bōjrak aō ļōm̧ņake bwe ikar bōke juon visõn eo aō make kōn juon revelesōn me kar leļo̧k n̄an Jon̄oulruo ro enan̄in 200 iiō ko remootļo̧k:
“Kwo naaj kam̧ool kōn Eta … [im] naaj jilkinļo̧k naan eo Aō n̄an jem̧ļo̧k ko in laļ. …
“… Jibbon̄ ilo̧k jibbon̄; im raan ilo̧k raan kōtļo̧k bwe ainikien kakkōl am en ilo̧k; im n̄e bon̄ ej itok jab kōtļo̧k bwe ro rej pād ilaļ in ren kiki, kōnke ekkōnono eo am. …
“Jerkak[,] … kotak debwāāl eo am, [im] ļoore Eō.”
Ro jeiū im jatū jitōn bōro, jān tōre eo iaar en̄jake menin, ikar kajjieon̄ n̄an kotak aō debwāāl eļapļo̧k ilo tiljek, kōn eļapļo̧k wāween n̄an pukot ia eo imaron̄ lelōn̄ļo̧k juon ainikien emāņāān ainikein rijilōk eo im ej kakkōļ ilo jibbon̄, ilo rālep, im ilo bon̄.
Menin eaar tōlļo̧k n̄a n̄an m̧ool eo kein kajilu eo ekar itok ilo allōn̄ ko ekar ļap būrom̧ōj, nan̄inmej, im en̄taan. Ekar juon kōkāāl in kam̧ool eo an im kam̧oolol eo ejjeļo̧k jem̧ļo̧kin kōn uwaak in jar ko eļap an Kabun̄ in—jar ko ami—ko im ikar maron̄ jeraam̧m̧an jeni. Eban jem̧ļo̧k aō kam̧m̧oolol kōn kajjitōk ko an taujin armej ro, āinwōt kōrā eo emej pāleen, ejjab bōjrak an pukot jipan̄ an lan̄ ilo eta. Ikar bōk kōjeraam̧m̧an ko an priesthood eo, im ikar lo an kūlaaj eo aō ilo high school jitlo̧k kōn n̄a, āinwōt jejjo ward ko rekar kōm̧m̧ane ilo Kabun̄ in. Im eta jon̄an ne ekar pād ilo laajrak in virtual jar eo ilo aolep tampeļ ilo Kabun̄ in.
Ilo kam̧m̧oolol in aō eļap kōn aolepān men kein, ikar kobaļo̧k ippān G. K. Chesterton, eo ekar ba “leļo̧k kam̧m̧oolol ej juon iaan men ko raorōk im wāween kōketak ko n̄an kōļmenļo̧kjeņ; im … kain kam̧m̧oolol in ej m̧ōņōņō eo me ej ļapļo̧k kōn kabwilōn̄ im kautiej.” Kōn aō make “bwilōn̄ eļap im kautiej,” ij kam̧m̧oolol kom̧ aolep im kam̧m̧oolol Jema Ilan̄, eo ekar ron̄jake jar ko ami im kōjeraam̧m̧an mour eo aō.
Ro jeiū im jatū, ij kam̧ool bwe Anij ej ron̄jake aolep jar ko jej liļo̧k im ej uwaaki kajjojo iaer ekkar n̄an iaļ eo E ekar ļōme n̄an wāppen eo ad. Ij kile bwe enan̄in ejja iien in wōt elōn̄ armej ro rekar jar kōn jepļaaktok in ājmour eo aō, jon̄an wōt nōm̧ba in kūrub eo ekilep—ekoba n̄a—kar jar kōn jepļaaktok in ājmour eo an kōrā eo pāleeō. Ij kam̧ool bwe aolep jar kein ruo rekar ron̄jaki im kar uwaaki jān Jemedwōj Ilan̄ eo etūriamo̧, aaet men̄e jar ko n̄an Pat rekar jab uwaaki ekkar n̄an wāween eo ikar kajjitōk. Ej n̄an un ko wōt Anij wōt ejeļā kaki etke uwaak in jar ko rej oktakļo̧k jān ad kōjatdikdik—ak ij kallim̧ur eok rej ron̄jaki im er rej uwaaki ekkar n̄an iakwe eo An ejjab likjab im iien eo An ejjejet.
Eļan̄n̄e jej “kajjitōk im jab pere,” ejjeļo̧k juon jon̄ak n̄an n̄āāt, ia, ak kōn ta jej aikuj jar kake. Ekkar n̄an revelesōn ko, jej aikuij “jar iien otemjej.” Jej aikuj in jar, Amulek ekar ba, n̄an “ro rej pād ipeļaakimi,” kōn jo̧o̧r eo me “eļap tokjān jar eo em̧m̧an an [armej] e wanōk.” Jej aikuj jar ellaaj n̄e jej pād ijoko rejenolo̧k im epidodo n̄an ad kōm̧m̧ane. Eļan̄n̄e menin ejjab maron̄ kōm̧m̧an, rej aikuj in jar ilo ejjeļo̧k ainikien im m̧ool. Jej al bwe jar ko ren “makūtkūt in kijeek [ko] rettino,” aolep iien aikuj in leļo̧k, ekkar n̄an Rilo̧mo̧o̧r Make, n̄an Anij Jemed Indeeo ilo etan Nejin Jitōn Bōro Emake Wōt.
Ro m̧ōtta jitōn bōro, jar ko ad rej awa eo ad em̧m̧antata, ikdeleel eo em̧ool,” ad wāween kabun̄jar eo an eļam waan tata, erreo tata Jej aikuj jar ippād make, ilo baam̧le ko ad, im ilo jarlepju ko an jabdewōt dettan. Jej aikuj in kōjerbal jar āinwōt juon kein kattōrak ņae kapo, im eļan̄n̄e ewōr jabdewōt iien jej en̄jake n̄an jab jar, jemaron̄ in lukkuun kile bwe m̧akoko ejjab itok jān Anij, Eo im ej jan̄uwaade an kōnono ippān ajri ro Nejin jabdewōt iien im aolep iien. Ilo m̧ool, jet iaan kijejeto kein n̄an dāpij kōj jān jar rej kaju itok jān rikapo eo. N̄e jejjab jeļā ekōjkan ak jejjet in ta n̄an jar kake, jej aikuj jinoe, im wōnm̧aanļo̧k, m̧ae iien Jetōb Kwojarjar eo ej tōl kōj n̄an jar im jej aikuj in leļo̧k. Wāween kepaak in emaron̄ erom̧ juon eo jej aikuj kūr n̄ane n̄e jej jar kōn rikōjdat ro ad im ro rej kōjerbale kōj.
Eļaptata, jemaron̄ reilo̧k n̄an waanjon̄ak eo an Rilo̧mo̧o̧r, eo ekar emakijkij, im emakijkij an jar. Ak ekar kabwilōn̄lōn̄ aolep iien n̄an n̄a ke Jisōs ekar en̄jake aikuj eo n̄an jar aolep iien. Ekar jab ke wāppen? Kōn ta eo E enaaj aikuj in jar kake? Ekwe, ikar itok im kile bwe E barāinwōt, ippād, aikuj in “pukot [mejān] Jemed, tōmak naan eo An, im lōke tūriamo̧ eo An.” Jān iien n̄an iien, Ekar ilo̧k jān jukjukinpād bwe En make iaan m̧okta jān an taļļon̄e lan̄ kōn jar ko An. Ilo iien ko jet, Ekar jar ilo an kōnono ippān jejjo armej. Innām Enaaj pukot lan̄ ilo etan jarlepju ko rekar kobrak itūrin toļ jidik eo. Jet iien jar eo ekar kaiboojoj nuknuk ko An. Jet iien ekar kaiboojoj turin mejān. Jet iien Ekar jutak im jar, jet iien Ekar būkwelōlō, im juon kōttan Ekar pedowane im jar.
Luk ej kōmeļeļeiki metak eo an Jisōs Kraist ilo An en̄taan kōn jerawiwi ko ad ilo Jikin Kallib Gethsemane “kaļapļo̧k An jar.” Ekōjkan an juon eo ekar wāppen kaļapļo̧k an jar? Jej kōtmāne bwe aolep jar ko An rekar m̧ool, aaet ilo kakūrm̧ool katok in pinmuur eo An im jān metak eo ekar itok ippān katok in pinmuur eo an Jisōs Kraist en jerbal n̄an aolep armej im aolep jekjek, Ekar en̄jake metak im pen, eddo in kajjitōk eo An āliktata, bōtōktōk enaaj itok jān aolep ānbwinnin.
Ilo meļeļe in anjo̧ eo an Kraist ioon mej in kanniōk im mennin letok eo An n̄an n̄a n̄an aō maron̄ mour elōn̄ wiik ko ak allōn̄ ko ilo mour in, ij kwaļo̧k kam̧ool em̧ool kōn m̧ool eo an mour indeeo im aikuj eo n̄an ad m̧ool ilo karōk eo ad n̄an e.
Ij kwaļo̧k aō kam̧ool bwe ke Kraist ej itok, Enej aikuj kile kōj—ejjab āinwōt membōr ro rej lōlō ilo rekoot in peptaij eo ak eļapļo̧k āinwōt ro reniknik ilo kallim̧ur ko aer, tiljek ilo tōmak, rikaļoor ro rej kōjparok bujen ko. Menin ej juon un eaorōk n̄an kōj aolep, ijjelo̧kin jej ron̄jake ajļo̧k in ekabūrom̧ōjm̧ōj: “I ar jaje kom̧,” ak, āinwōt an Josep Smith ukōt naan in, “[Kom̧] ar jaje kajeeō.”
Ilo m̧ool, jekar jipan̄ kōn jerbal in—eļap jipan̄. Jej aikuj in tōmak ilo enjeļ ro im kabwilōn̄lōn̄ ko im kallim̧ur ko an priesthood eo ekwojarjar. Jej aikuj in tōmak ilo menin letok eo an Jetōb Kwojarjar, kareel eo em̧m̧an an baam̧le ko im ro m̧ōttad, im kajoor eo erreo an iakwe eo an Kraist. Jej aikuj tōmak ilo revelesōn im rikanaan ro, rilolo ro, im rikwaļo̧k revelesōn ro, im Būreejtōn Russell M. Nelson. Jej aikuj in tōmak bwe jān jar im akweļap im wāppen eo ad make me jemaron̄ lukkuun wanlōn̄ļo̧k n̄an “Toļ Zaion, … jikin kwelo̧k eo an Anij emour, jikin eo ilan̄, eo ekwōjarjar jān aolep.”
Ro jeiū im jatū, ilo ad ukweļo̧k jān jerawiwi ko ad im lukkuun itok n̄an “tūroon in tūriamo eo,” etal jān im̧aan Mejān jibadbad ko im kajjitōk ko an būruwōd, jenaaj pukot tūriamo̧ im jeorļo̧k bōd ilo pein Jemed Indeeo, im Nejin epokake, im wāppen im erreo. Innām, ippān Job im aolep tōmak eo erreo, jenaaj lo juon laļ “elukkuun em̧m̧an” n̄an meļeļe. Ilo etan Jisōs Kraist, amen.