Jurōn Meram im Koon Meram ko
Emaron̄ bar wōr ad make jurōn meram—juon meram eļapļo̧k juon ilo̧k juon,
Ennaan eo aō ej n̄an ro me rej inepata kōn naan in kam̧ool eo aer kōnke rejjan̄in de wōr aer en̄jake in jetōb ko reļlap. Ij jar bwe imaron̄ lewaj jet kaenōm̧m̧an im kam̧ool.
Jepļaaktok eo an gospel eo an Jisōs Kraist ekar jino kōn juon peļļo̧k in meram im m̧ool! Juon jodikdik laddik ilo New York, kōn juon āt eo jeļā kake āinwōt Josep Smith, delo̧n̄ļo̧k ilo juon bukin wōjke n̄an jar. Ekar inepata kōn jetōb eo an im wāween an Anij ļōmņak kake. Ej kappukot jeorļo̧k bōd in jerawiwi ko an. Im ekar tarpok kōn ewi wōt kabun̄ eo en kobaļo̧k ie. Ej aikuji kalikkar im aenōm̧m̧an eo—ej aikuji meram im jeļā eo.
Ke Josep ej bukwelōlō n̄an jar im “ajeļo̧k ikdeelel ko an [buruōn] n̄an Anij,” juon marok lep ej jepooļ ipeļaakin. Juon men enana, elāj, im lukkuun in kajjieon̄ kabōjrak e—n̄an lukwōj loon bwe en jab maron̄ kōnono. Kajoor ko an marok raar kanooj in letlet jon̄an Josep ej ļōmņak enaaj kar mej. A, “[ej] kakkōt kōn aolep [an] kajoor n̄an kūr ioon Anij n̄an kadeor [e] jān kajoor eo an rikōjdat eo ekar nitbwili [e].” Innām, “ilo ejja iien eo wōt ke [e] ej pojak n̄an rum̧ļo̧k ļo̧k ilo jorrāān im kōtļo̧k [e]ō make n̄an ko̧kkure,” ke ekar jab jeļā eļan̄n̄e emaron̄ in kar bar aitokļo̧k an pād, juon meram wōj ej kobrak bukwin wōjke eo, kajeededļo̧k marok eo im rikōjdāt an jetōb eo an.
Juon “jurōn meram” ilōn̄inļo̧k meram eo an al, eo ar wanlaļtak jidik ilo̧k jidik m̧ae an kar wōtlo̧k ioō. Juon armej ej waļo̧ktok, innām bar juon armej. Eo “aiboojoj eo aer eaar eļļāļo̧k jān aolep wāween kōmmeļeļe.” Ilo jinoin, Jemādwōj Ilan̄, ej kōnono kōn etan, “jitōn̄e ļo̧k eo juon—[Josep!] “En̄in ej Nejū Jitōn Bōro. Kwon Ron̄jake E!”
Im kōn an m̧ōkaj an peļļok meram eo im m̧ool eo, Jepļaaktok eo ekar ijjino. Juon jiōbtok eļap an revelesōn ekwojarjar im kōjeraam̧m̧an naaj itok ālkin: jeje ko rekwojarjar rekāāl, kōjepļaaktok an kii ko an priesthood eo, rijjilōk ro im rikanaan ro, kain̄i ko im bujen ko, im bar ejaak eo an Kabun̄ eo emour im m̧ool an Irooj, eo enaaj juon raan kobrak laļ in kōn meram eo im kam̧ool kōn Jisōs Kraist im gospel eo An kōjepļaaktok.
Aolepān menin, im ebar lōn̄, kar jino kōn jar eļap an juon ļaddik im juon jurōn meram.
Kōj ebar wōr make ad aikuj ko reļļap. Jej barāinwōt aikuji anemkwoj jān tarpok ilo jetōb im marok an laļ in. Jej barāinwōt aikuj n̄an jeļā kōn kōj make. Ej juon un Būreejtōn Russell M. Nelson ekar kajjitōk ippād n̄an “Ajeļo̧k [kōj make] ilo aiboojoj in meram eo an Jepļaaktok eo.”
Juon iaan m̧ool ko reļļap an Jepļaaktok eo ej bwe lan̄ ko rej peļļo̧k—bwe jej barāinwōt maron̄ bōk meram im jeļā eo jān ilōn̄. Ij kam̧ool bwe ej m̧ool.
Bōtaab jej aikuj jeļā kōn aujiid in jetōb. Jet iien membōr ro retiljek an Kabun̄ in rej ebbweer im em̧ool jino jakoļo̧k kōnke ejjeļo̧k ippāer en̄jake in jetōb ko reļļap—kōnke rejjan̄in de en̄jake jurōn meram eo aer make. Būreejtōn Spencer W. Kimball ekar kakkōl,“Iien otemjej kōtmene juon men eo kwaļo̧k kadkad in kōn men eļap, elōn̄ renaaj lukkuun likjab jān jiōbtok eo an kōnono eo kar kwaļo̧k.”
Būreejtōn Joseph F. Smith ekar bar kakeememej bwe “Irooj ekar dāpij jān eō menin bwilōn̄ ko [ke ikar dik], im kwaļo̧k m̧ool eo n̄an eō, ļain im bar ļain, naan in kain̄i im bar naan in kain̄i, ijin jidik im ijjuweo jidik.”
En̄in ej jon̄ak eo an Irooj, ro jeiū im jatū. Ijello̧kin jilkintok n̄an kōj juon jurōn meram, Irooj ej jilkintok n̄an kōj juon meram eļapļo̧k, innām bar juon, im bar juon.
Meram kein reļļapļo̧k rej wōnm̧aanļo̧k wōt in lutōk tok iood. Jeje ko rekwojarjar rej katakin bwe Jisōs Kraist ej “meram eo im … mour eo an laļ” bwe An “Jetōb eo ej leļo̧k meram n̄an em̧m̧aan [im kōrā] otemjej ej itok ilo laļ in,” im bwe An meram “[ej] kobrak ļap in lan̄,” leļo̧k “mour n̄an aolep men ko otemjeļo̧k.” Meram eo an Kraist ej lukkuun pād ipeļaakid.
Eļan̄n̄e jaar bōk menin letok eo an Jetōb Kwojarjar im jej kajjieon̄ n̄an kōjerbal tōmak, ukweļo̧k, im kautiej bujen ko ad, innām jej erreo ejjab m̧ūjkōk ad bōk meram kein rekwojarjar. Ilo naan eo ban meļo̧kļo̧k an Elder David A. Bednar, “jej ‘mour pedped ioon revelesōn.’”
Im mekarta, aolepād wōj oktak. Ejjeļo̧k ruo armej rej en̄jake meram eo im m̧ool eo an Anij ilo juon wōt jekjek. Bōk jet iien n̄an ļōmņak kōn ekōjkan am̧ en̄jake meram im Jetōb eo an Irooj.
Bōlen kwar en̄jake ļapļo̧k meram im naan in kam̧ool āinwōt “aenōm̧m̧an [kar kōnono] n̄an am ļōmņak kōn [juon] men” me ekar kainepataik eok.
Ak āinwōt juon im̧we—juon ainikien emera—me ekar tōt “ilo ļōmņak eo am im ilo būruōm̧” im kar libjōrjōr eok n̄an kōm̧m̧an em̧m̧an, eo āinwōt jipan̄ juon armej.
Bōlen kwar pād ilo juon kūlaaj ilo m̧ōn jar eo—ak ilo juon kāām an jodikdik—im kar en̄jake juon ikdeelel ekajoor n̄an ļoor Jisōs Kraist im tiljek wōt. Bōlen em̧ool kwar jutak im kwaļo̧k juon naan in kam̧ool me kwar kōjatdikdik ekar m̧ool innām kar en̄jake ekar m̧ool.
Ak bōlen kwar jar im kar en̄jake juon kam̧ool ekam̧ōņōņō bwe Anij ej iakwe eok.
Kwar bōlen ron̄ an juon kwaļo̧k naan in kam̧ool kōn Jisōs Kraist im ekar un̄ur būruōm̧ im kar kobrak eok kōn kōjatdikdik.
Bōlen kwar riit ilo Bok in Mormon im juon eoon ekar kōnono n̄an būruem, āinwōt n̄e Anij ekar likūti ijone n̄an kwe—innām kwoj kab kile bwe aaet E ekar.
Kwar bōlen en̄jake iakwe eo an Anij n̄an ro jet ke kwar jerbal n̄an er.
Ak bōlen kwar kakkōt n̄an en̄jake Jetōb ilo iien eo kōnke kōn inepata ak mijak ak wōr menin letok eo aorōk im tōmak eo n̄an reilikļo̧k im kile m̧o̧ktaļo̧k kar “tūriam̧o an Irooj.”
Men eo ij ba ej bwe elōn̄ wāween ko n̄an bōk meram eļapļo̧k jān lan̄ an naan in kam̧ool. Aaet, erkein rej jejjo iaer. Remaron̄ in jab eļļap, bōtaab aolepāer rej ejaake jidik in naan in kam̧ool ko ad.
Ro jeiū im jatū, ijjan̄in kar lo juon jurōn meram, ak, āinwōt kom̧ ikar en̄jake elōn̄ meram ko reļļapļo̧k rekwojarjar. Ilo iiō ko, ikar kajjieon̄ in kaorōk kain en̄jake rōt in. Ij lo bwe ilo aō kōm̧m̧ane, ij kile im keememej em̧ool eļōn̄ iaer. Erkein rej jet waanjon̄ak ko jān mour eo aō make. Remaron̄ in jab lukkuun kōbalbal n̄an jet, ak reaorōk n̄an n̄a.
Ij keememej aō kar juon jodikdik eo ebōt ilo juon iien peptaij. Ke iien jar eo ekar tōn ijjino, ikar en̄jake an Jetōb eo libjōrjōr eō n̄an jijet im kwaļo̧k aō kautiej. Ikar jijet laļļo̧k im kar ikōn̄ wōt ilo aolepān kweilo̧k eo.
M̧okta jān mijen eo aō, ikar mijak elan̄n̄e naan in kam̧ool eo aō ekar jab bwe an kajoor. Ejjeļo̧k juon ilo baamle eo aō ekar jerbal āinwōt juon mijenede, im ikar jaje n̄e imaron̄ in kar kōm̧m̧ane menin. Ij keememej aō lukkuun ekkatak im jar n̄an bōk elōn̄ļo̧k kam̧ool ko rem̧ool kōn Jisōs Kraist. Innām juon raan, ke ikar akweļap ippān Jemādwōj Ilan̄, ikar en̄jake juon en̄jake ekajoor an meram im okmāņāņ. Im ikar jeļā. Ikar lukkuun jeļā.
Ij keememej aō kar ruj juon bon̄ jejjo iiō tokālik kōn juon en̄jake kōn “juon ennaan kajju jān Jetōb Kwojarjar” jiron̄ eō bwe inaaj kar kūr n̄an jerbal ilo doulul eo an elder ro. Ruo wiik ko tokālik kar kūr eō.
Ij keememej juon kweilo̧k eļap ke juon membōr ejitōnbōro in Doulul eo an Jon̄oulruo Rijjilōk ro ekar kōnono kōn ejja lukkuun naan ko kōn naan in kam̧ool eo ikar jiron̄ juon m̧ōtta ikar kōjatdikdik n̄an ron̄.
Ij keememej aō kar bukwelōlō ippān buki būratōr ro n̄an jar kōn juon m̧ōttam eo ekar emenono kōn mijjiin in jipan̄ emenono ilo juon aujpitōl edik im ettoļo̧k ālkin an menono eo an kar bōjrak. Ke kōm kar juon wōt ilo būruōm n̄an akweļap kōn mour eo an, ekar ruj im tūm̧wi mijjiin in jipan̄ menono eo jān būruōn make. E ej jerbal rainin āinwōt juon stake būreejtōn.
Im ij keememej aō ruj kōn juon en̄jake ekajoor in jetōb ālkin juon ettōņak alikkar kōn juon m̧ōtta jitōnbōro im rikatakin kar jab kōtmene an m̧ōkaj an mej, ekar lukkuun kabūrom̧ōj eō. E ekar ettōn̄ dikdik im lem̧ōņōņō. Ikar jeļā ekar OK.
Erkein jet iaan meram ko reļļapļo̧k aō. Ekar wōr am̧ make en̄jake ko—meram eo am̧ make em̧ōkaj an kobrak kōn naan in kam̧ool. Ilo ad kile, keememej, im aiin ļapļo̧k in meram kein “kobaik,” juon men aiboojoj im kajoor ej jino in waļo̧k. “Meram ej eddāp n̄an meram”—“m̧ool ej jiburlepe m̧ool.” Lukkuun keien im kajoor eo an juon naan in kam̧ool eļapļo̧k ej kapenļo̧k im ej koba ippān bar eo juon, innām bar juon, im bar juon. Ļain im bar ļain, naan in kain̄i im bar naan in kain̄, ijin juon meram eļapļo̧k im ijuweo juon meram eļapļo̧k—juon edik, ekar kaorōk iien ilo jetōb ilo juon iien—ijo ej eddōkļo̧k ilowaad juon un jān meram ekar kobrak, en̄jake ko ilo jetōb. Bōlen, ejjeļo̧k juon meram eļapļo̧k an kajoor ak meramļo̧k n̄an ejake juon naan in kam̧ool edipio, ak ippān doon remaron̄ erom juon meram me marok in pere ejjab maron̄ anjo̧ ioon.
“O innām, ejjab m̧ool men in ke?” Alma ej kajjitōk. “Ij ba n̄an kom̧, Aaet, kōnke en̄in ej meram.”
“Men eo ej jān Anij ej meram,” Irooj ej katakin kōj, “im e eo ej bōk meram, im wōnm̧aanļo̧k wōt ilo Anij, ej bōk eļapļo̧k meram; im meram in ej meramļo̧k im meramļo̧k m̧ae raan eo eweeppān.”
Meļeļe in, ro jeiū im jatū, bwe kōn iien im kōn “niknik eļap,” jej barāinwōt maron̄ wōr ad make jurōn meram—juon meram eļapļo̧k juon ilo̧k juon. Im ilo ioļapļap in joor jab in, jenaaj barāniwōt lo juon Jemād Ilan̄ eo em̧m̧an kūr kōj kōn etad, ba kajjieen n̄an kōj Rilo̧mo̧o̧r, Jisōs Kraist, im kajjitōk ippād n̄an “Ron̄jake E!”
Ij kwaļo̧k kam̧ool kōn Jisōs Kraist, bwe E ej meram eo im mour eo an aolepān laļ in—im an laļ eo am̧ im aō make.
Ij kam̧ool bwe E eo em̧ool im emour Nejin Anij eo em̧ool im emour im bwe E ej jutak ibōran Kabun̄ in em̧ool im emour, jipan̄ im tōl jān rikanaan ro im rijilōk ro An rem̧o̧ol im remour.
Bwe jen kile im bōk meram aiboojoj eo An innām kāālet E ioon marok an laļ in—aolep iien im indeeo. Ilo etan Jisōs Kraist, amen.