Jar, E Epād Ijo
N̄aij karuwaineneik eok n̄an jar n̄an jeļā ke Jemedwōj Ilan̄ epād ijo, jar n̄an eddōkļo̧k n̄an erom̧ āinwōt E, im jar n̄an kwaļo̧k iakwe eo An n̄an ro jet.
Ro jeiū im jatū, n̄aij en̄jake lan̄lōn̄ ilo aō eo̧ron̄ juon im̧we n̄an kōnono n̄an ajri ro!
Leddik im ļaddik ro, ijoko kwoj pād ie ilo laļ in, ikōņaan bwe kwon kwaļo̧k juon men epād ippam̧.
Jemedwōj Ilan̄ ej iakwe kom̧! Kom̧ij ajri ro Nejin. Ejeļā kajjeem̧i. E kōņaan kōjeraam̧m̧an kom̧. Ij jar kōn aolepen būruō ke kom̧ naaj en̄jake iakwe eo An.
Em̧m̧an ke ippami bōk mennin letok ko? Ikōņaan kōnono n̄an kom̧ kōn juon mennin letok ejeņoļo̧k me em̧ōj an Jemedwōj Ilan̄ lewaj n̄an jipan̄ kom̧. Ej mennin letok eo an jar. Jar ej juon mennin jeraam̧m̧an! Jemaron̄ kōnono n̄an Jemedwōj Ilan̄ jabdewōt iien, jabdewōt jikin.
Ke Jisōs eaar pād ioon laļin, Ekar katakin kōj jar. Ekar ba, “Kajjitōk im koṃ naaj bōk.”
Ta kōjeraam̧m̧an ko komaron̄ jar kaki? M̧ool elōn̄, ak rainin ikōņaan kwaļo̧k kōn jilu:
-
Jar n̄an jeļā.
-
Jar n̄an eddōkļo̧k.
-
Jar n̄an kwaļo̧k.
Jen kōnnaan kōn kajjojo iaer.
M̧oktata, Jar n̄an Jeļā
Ta eo kwoj aikuj jeļā?
Ewōr juon al kōn jar me ajri in Būraimere ro rej al kake peļaakin laļin. Ej ijjino kōn juon kajjitōk. Kwojeļā al ta eo? N̄e inkar lukkuun peran, in kar al kake n̄an kom̧!
“Jemedwōj Ilan̄, kwoj lukkuun ke pād ijo? Im kwoj ke ron̄jak im uaak jar ko an aolep ajri ro?”
Ekōjkan am̧ jeļā ke Jemedwōj Ilan̄ ej lukkun pād ijo, jekdoon n̄e kojjab maron̄ lo E?
Būreejtōn Russell M. Nelson ekar karuwaineneik eok n̄an “Lutōk aolepen būruōm̧ n̄an Jemedwōj Ilan̄. … Innām ron̄jake.” Ron̄jake ta eo kwoj en̄jake ilo būruōm̧ im n̄an ļōmņak ko rej itok n̄an kōļmenļo̧kjen eo am̧.
Jemedwōj Ilan̄ ewōr ānbwinnin kanniōk im di ko aiboojoj im ej Jemen jetōb eo am̧. Kōnke Jemedwōj Ilan̄ ewōr aolep kajoor Ippān im Ejeļā aolep men, Ej reitok im loe aolep ajri ro Nejin im maron̄ ron̄jake im uwaake aolep jar. Kwomaron̄ itok im jeļā kōn kwe make ke E ej pād ijo im bwe E ej iakwe eok.
N̄e kojeļā ke Jemedwōj Ilan̄ em̧ool im bwe E ej iakwe eok, komaron̄ mour kōn peran im kōjatdikdik! “Jar, E epād ijo; kōnono, E ej ron̄jake.”
Konan̄in ke en̄jake ajimakeke? Juon raan leddik eo jibūm Ashley ekar jiljilijno an iiō, kar e wōt iaan ejeļo̧k juon m̧ōttan n̄an ikkure ippān ilo jikin ikkure eo. Ke ej jutak ijo, en̄jake an jab aorōk im aer jab loe, juon ļōmņak ekar itok n̄an kōļmenļo̧kjen eo an: “Kōttar! Ijjab make iaaō! Kraist epād ippa!” Ashley ekar jubuke ioļapļap in jikin ikkure eo, pokpe, im jar n̄an Jemedwōj Ilan̄. Iien eo ej kōpelļo̧k mejen, juon leddik rettan wōt ej jutak ijo im kajjitōk ippān n̄e ekōņaan ikkure. Ashley ekar jeļā, “Jaorōk ippān Irooj, im jejamin make iaad.”
Jet iien komaron̄ kōņaan jeļā etke juon men epen ej waļo̧k ilo mour eo am̧ ak etke kojjab bōk kōjeraam̧m̧an ko kwaar jar kaki. Ekkā wōt kajjitōk ko rem̧m̧antata n̄an kajjitōkin Jemedwōj Ilan̄ ejjab etke ak ta.
Kwoj ke keememej ke Nipai im baam̧le eo an rekar kwole ke raar itoitak ilo bulōn wōjke ko? Ke Nipai im ļōmaro jein im jatin raar etal im kakijen, Nipai ekar būlo̧ke lippen eo an. Nipai ekar jab kajjitōk etke.
Nipai ekar kōm̧m̧an juon lippen kāāl kōm̧m̧an jān aļaļ im kar kajjitōk ippān jemen, Liai, ia eo emaron̄ etal im kakkijen ie. Liai ekar jar, im Irooj eaar kwaļo̧k n̄an er ia eo Nipai emaron̄ etal ie ļo̧k. Jemedwōj Ilan̄ enaaj tōl eok n̄e kwoj kajjitōkin E ta eo kwomaron̄ kōm̧m̧ane im ta eo kwomaron̄ ekkatak.
Kein karuo, Jar n̄an Eddōkļo̧k
Jemedwōj Ilan̄ ekōņaan jipan̄ eok eddōkļo̧k! E ej lukkun iakwe kōj jon̄an E eaar jilkintok Nejin, Jisōs Kraist, n̄an kwaļo̧k iaļ in mour eo n̄an kōj. Jisōs ekar en̄taan, mej, im kar bar jerkakpeje bwe jerawiwi ko ad remaron̄ jako im jen eddōkļo̧k n̄an erom̧ āinwōt E.
Kokņaan ke eddōkļo̧k ilo kijenmej ak ilo m̧ool? Kwokōņaan ke eddōkļo̧k ilo juon kapeel? Bōlen kwōjookok im kōņaan eddōkļo̧k ilo peran. “Jar, E epād ijo”! Kōn Jetōb eo An, buruōm̧ emaron̄ oktak, im kwomaron̄ bōk kajoor.
Eo m̧ōtta ekāāl Jonah ekar je: “ekutkut aō en̄jake mijak ilo iaļ eo aō ļo̧k n̄an jikuuļ in jibbon̄. Ij inepata kōn men ko āinwōt rum̧ij, meloklok juon men, im bōk teej ko. Ke eaar 10 aō iiō, iaar jino jar ilo aō ettōrļo̧k n̄an jikuuļ ippān jinō. Ij kajjitōk jipan̄ eo ij aikuji, im jar kōn bar baam̧le eo aō. Ij bar ļōmņak kōn men ko n̄aij kam̧m̧oolol kaki. [Jar n̄an Jemedwōj Ilan̄ ekar] jipan̄ eō. Jet iien ijjab en̄jake aenōm̧m̧an iien eo wōt ke ij diwōj jān wa eo, bōtaab ilo iien eo n̄aij pād ilo kūlaajruum̧ eo, n̄aij en̄jake aenōm̧m̧an.”
Tōmak eo an Jona ej eddōkļo̧k ilo an jar aolep raan innem bun̄ m̧aanļo̧k wōt.
Kein kajilu, Jar n̄an Kwaļo̧k
Kwomaron̄ jar n̄an jipan̄ n̄an kwaļo̧k iakwe eo an Jemedwōj Ilan̄ n̄an ro jet. Jān Jetōb eo An, Jemedwōj Ilan̄ enaaj jipan̄ eok kile juon eo ebūrom̧ōj im komaron̄ kaenōm̧m̧an er. E emaron̄ jipan̄ eok kwaļo̧k An iakwe ilo am̧ jeorļo̧k an ro jet bōd. E emaron̄ lewaj n̄an eok peran n̄an jipan̄ juon im kwaļo̧k n̄an er ke er rej nejin Anij. Kijejeto ko am̧ remaron̄ jipan̄ ro jet jeļā im iakwe Jisōs im Jemedwōj Ilan̄ āinwōt kwe.
Ilo aolepen mour eo aō iaar jar bwe jema en erom̧ juon uwaan Kabun̄ eo an Jisōs Kraist im Armij ro Rekwojarjar ilo Raan ko Āliktata. Ke iaar juon leddik jidikdik, iaar jeļā ewi jon̄an kōjeraam̧m̧an ko e maron̄ bōk. Baam̧le eo am emaron̄ bōk kōjeraam̧m̧an eo n̄an liāp ippān doon n̄an indeeo. Baam̧le eo aō, ro m̧ōtta, im n̄a ekutkut am jar kake, bōtaab ekar jab kobatok ilo Kabun̄ in. Jemedwōj Ilan̄ ejjab booje jabdewōt armej n̄an kōm̧m̧an kāālet. Emaron̄ jilkintok uwaak in jar ko ad ilo wāween ko jet.
Ke iaar tōpar iiō eo ekkar, iaar bōk kōjeraam̧m̧an in petriak eo aō. Ilo kōjeraam̧m̧an eo, petriak eo ekar jiron̄ eō men ko rem̧m̧antata imaron̄ kōm̧m̧ani n̄an jipan̄ baam̧le eo aō pād ippān doon ilo lan̄ ej bwe in juon waanjon̄ak in gospel eo an Jisōs Kraist. Men eo in imaron̄ kōm̧m̧ane!
Jema eaar mour ļo̧k n̄an 86 an iiō. Ļalem iiō mokta jān an jako, ikar bōk juon en̄jake in lan̄lōn̄ ekwojarjar. Jemedwōj Ilan̄ ekar kōtļo̧k bwe in jeļā jān Jetōb eo An ke jema ekōņaan bōk kōjeraam̧m̧an ko an gospel eo an Jisōs Kraist! Ijjamin meļokļok raan eo iaar jubuke ilo lokatok eo ilo tampeļ ippān sister eo aō im ļaddik ro jeiū/jatū n̄an liāp ippān ro jinem im jemam. Iaar jino jar kōn kōjeraam̧m̧an in jen ke iaar juon Būraimere, im kar bōke ke ij juon būbū.
Bōlen kwoj jar kōn kōjeraam̧m̧an ko n̄an baam̧le eo am̧ im ro jet kwoj iakwe er. Jab Ebweer! Jemedwōj Ilan̄ enaaj kwaļo̧k n̄an eok ta eo komaron̄ kōm̧m̧ane.
Kwaļo̧k n̄an Jemedwōj Ilan̄ ta eo ilo būruōm̧. Ilo am̧ m̧ool ilo kajjitōk jipan̄ eo An, kwonaaj bōk Jetōb eo An n̄an tōl eok. Jar aolep raan enaaj kobrak eok kōn iakwe ñan Jemedwōj Ilan̄ im Jisōs Kraist. Menin enaaj jipan̄ eok kōņaan ļoor Er ilo aolepen mour eo am̧!
Ļōmņake ta ko renaaj waļo̧k n̄e aolep ajri ro ilo Africa, South America, Asia, Europe, North America, im Australia rej jar kajjojo raan. Aolepen laļin emaron̄ naaj jeraam̧m̧an kōn iakwe an Anij eļapļo̧k!
N̄aij karuwaineneik eok n̄an jar n̄an jeļā ke Jemedwōj Ilan̄ epād ijo, jar n̄an eddōkļo̧k n̄an erom̧ āinwōt E, im jar n̄an kwaļo̧k iakwe eo An n̄an ro jet. Ijeļā E emour im ej iakwe kom̧ “Jar, E epād ijo.” Ilo āt eo ekwojarjar etan Jisōs Kraist, amen.