Jisōs Kraist ej Unjen Mour ko Ad.
Jetōb ko an armej rej kajjitōk, ilo aer en̄jake iien ko repen, rej jelm̧aeiki im jerbali kōn iakwe eo ekajoor an Jisōs Kraist.
Ilo ad ekkatak kōn mour in, jej pād ilo tōre in n̄an ioon mālijjon̄ ko: būrom̧ōj kōn juon eo ejako, metak kōn nan̄inmej ko, būrom̧ōj kōn jab wānōk, en̄jake jook ak kakkure, būrom̧ōj im marok ilo ejjeļo̧k jerbal, en̄taan ko an baam̧le, metak in ajimakeke, ak būrom̧ōk kōn jekjek ko reppen. Ilo kain rot in, jetōb ko ad rej pukot jipan̄. Jej lukkuun pukote n̄an jeļā: Ia eo jemaron̄ lo aenōm̧m̧an ie? Wōn eo jemaron̄ likūt ad lōke n̄an jipan̄ kōj kōn lōke im kajoor n̄an anjo̧ ioon apan̄ kein? Wōn eo ewōr kijenmej ippān, iakwe, im ekajoor bōtata n̄an ļōn̄aj im jipan̄ kōj?
Jetōb ko an armej rej kajjitōk, ilo aer en̄jake iien ko repen, rej jelm̧aeiki im jerbali kōn iakwe eo ekajoor an Jisōs Kraist. Kōn E, im jān kōjeraam̧m̧an ko kar kallim̧ur kaki ilo gospeļ eo An em̧ōj an kar jepļaaktok, jej pukot uwaak ko jej kapukote. Kōn wōt Pinmuur eo An ejjeļo̧k jem̧lo̧kin me jej bōke āinwōt juon menin letok eaorōk—juon kōn kōjatdikdik, kōmour, im juon jeļā kōn An jouj, niknik in pād ilo mour ko ad. Menin letok in ej peļļo̧k n̄an ro otemjej rej ekkeijel ippān tōmak, bōk aenōm̧m̧an im lo̧mo̧o̧r eo innām E ej letok ilo ejjeļo̧k onāān.
Irooj ej erļo̧ke Pein n̄an kōj kajjojo, juon kōkkaļļe eo ej lukkuun in jinoin in iakwe im jouj eo An ekwojarjar. An karuwaineneik kōj eļapļo̧k jen juon kūr pajjōk; en̄in ej juon kallim̧ur ekwojarjar, kar kapene kōn jouj eo An ejjeļo̧k jem̧ļo̧kin. Ilo jeje ko rekwojarjar, Ej jiron̄ kōj ilo iakwe:
‟Koṃwin itok n̄an Ippa, koṃ otemjej rej jerbal im ban, im Inaaj kakkijeik koṃ.
“Koṃwin bōk Aō ine im likūte i aerami, im katak Ippa; bwe Ij ineeṃṃan im ettā būruō, im koṃ naaj lo an ami kakkije.
“Bwe Aō ine ej em̧m̧an, im men eo Ij ineke e mera.”
An karuwainene ealikkar “kom̧win itok n̄an Ippa” im “kom̧win bōk aō ine” ej kwaļo̧k paotokin m̧wilaļ in kallim̧ur eo An—juon kallim̧ur elukkuun kilep im dedeļo̧k ej kalibubu An iakwe, eletok n̄an kōj juon kōjatdikdik em̧ool: “Kom̧ naaj lo an ami kakkije.”
Ilo ad tiljek n̄an pukot tōl eo an jetōb, jej pād ilo juon oktak eo em̧wilaļ eo ej kōkajoor naan in kam̧ool eo ad. Ilo ad keidi iakwe eo ewāāpen an Jemedwōj Ilan̄ im Jisōs Kraist, būruwōd ej obrak kōn kam̧m̧oolol, ettā bōro, im kōn juon ikdeelel n̄an pād ilo iaļen rikaļoor.
Būreejtōn Russelll M. Nelson ekar katakin: “N̄e mour ko ad rej pedped wōt ilo karōk in lo̧mo̧o̧r eo an Anij … im Jisōs Kraist im gospel eo An, jemaron̄ en̄jake lan̄lōn̄ jekdo̧o̧n ta eo ej waļo̧k—ak ejjab waļo̧k—ilo mour ko ad. Lan̄lōn̄ ej itok wōt jen E.”
Alma, ej kōnono n̄an nejin Hilamōn, kean̄: “Im kiiō, O nejū m̧aan Hilamōn, lo, kwōj pād ilo an inono, im kōn menin, ij akweļap n̄an eok bwe kwōn eo̧ron̄ naan kein aō im katak jān eō; bwe ijeļā bwe jabdewōt eo enaaj likūt aer lōke ilo Anij naaj rejetake er ilo mālejjon̄ ko aer, im inepata ko aer, im en̄taan ko aer, im naaj kōjerkak er ilo raan eo āliktata.”
Hilamōn, eaar kōnono n̄an ļōm̧aro nejin, kwaļo̧k kōn pedpedin katak eo n̄an likūt Rilo̧mo̧o̧r bwe en unjen mour ko ad: “Keememej, keememej, bwe ej ioon ejm̧aan in ad Ripinmuur, eo ej Kraist, eo Nejin Anij, bwe kom̧ij aikuj kalōk pedped ko ami.”
Ilo Matu 14 jej katak bwe ālkin ron̄ kōn mij eo an Jon ri Peptaij, Jisōs ekar pukot bwe en make ļo̧k iaan. Ijoke, juon jarlepju eļap eaar ļoor E. Kōn tūriam̧okake im iakwe, im jab kōtļo̧k wōt bwe An būrom̧ōj en mijeļo̧k E jān mijen eo An, Jisōs ekar karuwaineneik er, kājmour ro rinan̄inmej ilubwiljier. Ke ej jota, rikaļoor ro rej ioon juon apan̄: juon jarlepju in armej eaar jabwe m̧ōn̄ā ippāer. Rikaļoor ro raar katmane bwe Jisōs en kar jilkinļo̧k jar eo n̄an kapukot m̧ōn̄ā, ijoke Jisōs, kōn eļap iakwe im katmane ko, ekar kajitūkin rikaļoor ro n̄an naajidik er.
Ke rikaļoor ro rekar jipan̄ kōn apan̄ in ejidimkij, Jisōs ekar kwaļo̧k An lōke im iakwe n̄an Jemān, koba ippān juon iakwe ekajoor n̄an armej ro. E ekar jiron̄ jarlepju eo bwe ren jijjet ioon ujooj eo, im ej bōk ļalem pilawe im ruo ek, E ej leļo̧k kam̧m̧oolol n̄an Jemān, bōk maron̄ an Anij ioon An mālim im kajoor.
Ālkin An leļo̧k kam̧m̧oolol, Jisōs ekar ruje pilawā eo, im ro rikaļoor ro raar ajije n̄an armej ro. Kabwilōn̄lōn̄ eo, m̧ōn̄ā eo eaar jab bwe wōt ak eaar lutōkļo̧k, kōn 12 bwe in iep. Kumi eo raar m̧ōn̄ā ekoba ļalem taujin armej, ippān tok rej kōrā im ajri ro.
Kabwilōn̄lōn̄ in ej kwaļo̧k juon katak em̧wilaļ: ke rekar ioon apan̄ ko, epidodo mijek men ko ad reppen. Ijoke, Jisōs Kraist ekar waanjon̄ak eo ekajoor n̄an mije wōt Jemān, leļo̧k kam̧m̧oolol, im kile uwaak ko n̄an apan̄ ko ad rejjab iien otemjej pād ilo kōj make ak ippen Anij.
N̄e jej ioon men ko reppen, ekkā ad kōļmenļo̧kjeņ kōn wāween ad jerbali. Apan̄ ko ad remaron̄ kōm̧ad kōj, ak pedpedin katak eo emaron̄ jerbal n̄an ad anjo̧ ioon apan̄ ko ad n̄an kōttōpar eo ad. Ilo ad likūt Kraist bwe en unjen ļōmņak im jerbal ko ad jej, leļo̧k kōj make ilo jipan̄ im kajoor eo An. Kōkm̧anm̧anļo̧k in ejjab kadikļo̧k ad appan̄; ijjelo̧kin, ej jipan̄ kōj tarmetoiki kōn jipan̄ eo an tōl ekwojarjar. Āinwōt juon tōprak, jej loe uwaak ko im jipan̄ eo rej wanlōn̄tak jān juon wūn ekwojarjar. Kakkaajiriik ļōmņak in Kraist-en ioļapļap ekakajoor ļo̧k kōj kōn peran im loļo̧kjeņ n̄an ukōt māllejon̄ ko ad n̄an anjo, kakeememej kōj bwe kōn Rilo̧mo̧o̧r eo, jekdoon jorrāān rōt eo emaron̄ in erom juon iaļan eddōkļo̧k im ļapļo̧k ilo jetōb.
Bwebwenato in Alma eo edik ilo Bok in Mormon eo ej kwaļo̧k juon bwebwenatoon lo̧mo̧o̧r im juon m̧wilaļ in an jelete ioļapļapin mour eo an armej ipeļaakin Kraist. Ilo jinoin, Alma ekar jutak āinwōt ri jum̧ae Kabun̄ eo an Irooj, tōl ļo̧k elōn̄ bwe ren jebwābwe iaļ in wanōk eo. Ijoke, juon jerbal ekwojarjar, kar bōk jikin lotok eo an juon enjeļ, kar kōmeļeļeik e jān kōm̧m̧an ko an rebōd.
Ilo iien ko an reppen, kar kaen̄taanan im kar aikuj in pukot juon wāween an etal jen en̄taan ilo jetōb, Alma ekar kemeemejmej katak ko an jemān kōn Jisōs Kraist im kajoor in Pinmuur eo An. Kōn juon būruwōn ikdeelel n̄an lo̧mo̧o̧r, ekar kōņaan ukweļo̧k im kajjitōk ilo m̧ool tūriam̧o eo an Irooj. Iien in eaorōk kar m̧ool n̄an kile bwe kar aikuj jipan̄, mije Kraist ilo ļōmņak ko an āinwōt an kar Alma kar lukkuun pukot tūriam̧o eo An, ekar bōktok juon oktak ekabwilōn̄lōn̄. Jerawiwi ko m̧okta im ebweer raar jako im kar bar bōk jikin jān juon en̄jake eļļā ilo en̄jake in lan̄lōn̄ im aenōm̧m̧an.
Jisōs Kraist ej ad kōjatdikdik im uwaak eo n̄an metak ko an mour in. Jān en̄taan eo An, Eaar kōļļāiki jerawiwi ko ad im kar bōk ioon E make aolep en̄taan—metak, jab wānōk, būrom̧ōj, im mijak—im E ej jeorļo̧k bōd im kāmour kōj n̄e jej lōke ilo E im kappukot n̄an ukōte mour ko ad n̄an em̧m̧anļo̧k eo. E ej ad Rikājmour, rikaenōm̧m̧an im rikōkāāl bōro ko ad jān An iakwe im kajoor, āinwōt ke E eaar kājmour elōn̄ tōre eo An ion laļ. E eo ej dān in mour, kakūrm̧ool menin aikuj ko ad ilowa tata in jetōb ko ad armej kōn An iakwe eļap im jouj. In ej āinwōt juon kallim̧ur eo E eaar kōm̧m̧ane n̄an kōrā in Sameria eo ilo aebōj eo, leļo̧k “juon aebōj ej to̧o̧rtok n̄an mour indeeo.”
Ij kwaļo̧ kam̧ool eo epen bwe Jisōs Kraist emour, bwe Ej tōl ilo menin, Kabun̄ in An ekwojarjar, Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ij kwaļo̧k kam̧ool bwe E ej Rilo̧mo̧o̧r an laļin, Irooj in Aenōm̧m̧an eo, Kiin̄ in kiin̄ raņ, Irooj in irooj raņ, Ripinmuur eo an laļ in, Ij kapene kōn jeļā in bwe jej bar pād ilo ļōmņak im en̄jake ko An. Āinwōt juon kallim̧ur n̄an menin, E eaar bar kōjepļaaktok Kabun̄ in An ilo raan kein āliktata im kar kūr Būreejtōn Russell M. Nelson āinwōt rikanaan eo An im Būreejtōn eo an Kabun̄ in ilo iien in. Ijeļā bwe Jisōs Kraist ekar letok An mour bwe jen maron̄ bōk mour indeeo.
Ilo ad kajjieon̄ likūt E bwe en unjen mour ko ad, revelesōn ko rej waļo̧ktok n̄an kōj, An aenōm̧m̧an ej jepooļ kōn̄, im Pinmuuro eo an Indeeo ej bōktok jeo̧rļo̧k bōd im kōmour. Bwe ilo E jej lo kajoor n̄an anjo̧, peran n̄an bōke, aenōm̧m̧an eo eļļā jān jeļā otemjej. Jemaron̄ kajjieon̄ kajjojo raan n̄an epaake ļo̧k E, eo ej unjen men otemjeļo̧k, meram eo ej tōl ļo̧k kōj n̄an bar m̧aan mejān Jemedwōj Ilan̄. Ilo āt eo ekwojarjar etan Jisōs Kraist, amen.