Juon Rekoot in Men ko Iaar Jim̧or Loi im Ron̄
Ejjeļo̧k juon iien ekar em̧m̧anļo̧k n̄an erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Ālkin aō kar kadiwōjļo̧k jān jikuuļ in kien, lio ippa, Marcia, kab n̄a kar kāālet n̄an jerbal ilo juon law firm me ej mije ekajet ko ilo im̧ōn ekajet eo. Ke iaar jino jerbal in kaminene, Iaar joļo̧k eļap aō iien n̄an kepooj rikam̧ool ro n̄an kam̧ool ilo iien ekajet ko. Ekar m̧ōkaj aō jeļā bwe m̧ool ko rekar kapeni ilo juon ruum̧ in ekajet āinwōt rikam̧ool ro, ium̧win juon kallim̧ur, rej kam̧ool kōn ta ko raar jim̧or loi im ron̄. Ilo an rikam̧ool ro kam̧ool, naan ko aer raar rekooti im kakoņi. Aolep iien naan ko an rikam̧ool ro rem̧ool rej pedped in kōppopo eo aō.
Ekar jab to bwe in kile bwe ejja naan ko wōt ij kōjerbali aolep raan āinwōt juon lawyer ekar bar naan ko ij kōjerbali ilo kōnono ko aō ilo gospel in. “Rikam̧ool” im “naan in kam̧ool” rej naan ko jej kōjerbali ilo ad kwaļo̧k jeļā im en̄jake ko ad kōn m̧ool eo an gospel eo an Jisōs Kraist.
Ke ikar rejtake āinwōt juon Eria Jiljilimjuonn̄oul, ikar kōpeļļo̧k jeje ko rekwojarjar n̄an ekkatak eddo ko aō im riiti Katak im Bujen Ko 107:25, eo ej ba, “Jiljilimjuonn̄oul ro rej barāinwōt kar kūr … n̄an rikam̧ool ro rejenolo̧k n̄an ro riAelōn̄ ko im lo aolepān laļ.” Ilo am̧ maron̄ ļōmņake, meja eaar kalimjōkļo̧k naan eo “rikam̧ool ro rejenolo̧k.” Ekar alikkar n̄an n̄a bwe ewōr juon aō eddo n̄an kwaļo̧k aō kam̧ool—n̄an kam̧ool kōn etan Jisōs Kraist—jabdewōt jikin ij etal ie ļo̧k.
Elōn̄ waanjon̄ak ko ilo jeje ko rekwojarjar kōn ro raar kam̧ool kōn mejāer im ro raar kam̧ool kōn ta ko raar jim̧or loi im ron̄.
Ke rikanaan eo etto Mormon ekar jino jeje eo an, ekar je, “Im kiiō n̄a, Mormon, ij kōm̧m̧an juon ļo̧o̧k in men ko iaar jim̧or lo im ron̄, im ņa etan Bok in Mormon.”
Rijilōk ro an Rilo̧mo̧o̧r Pita im Jon raar kōmour juon em̧m̧aan ilo etan Jisōs Kraist ri Nazareth. Ke rekar kakien er bwe ren jab kōnono kōn etan Jisōs, raar uaak:
“Eḷan̄n̄e ejiṃwe iṃaan mejān Anij bwe kōmin eọron̄ koṃ eḷap jān Anij, koṃwin ekajete.
“Bwe kōm jab maron̄ in jab kōnono men ko kōm ar loi im ron̄jake.”
Bar juon naan in kam̧ool em̧m̧an ej itok jān Armej ro Rekwojarjarilo Bok in Mormon ro raar pād ilo lotok eo an Rilo̧mo̧o̧r Jisōs Kraist. Ron̄jake kōmeļeļe in kōn kam̧ool eo aer: “Im ilo̧kan wāween in raar kam̧ool: Māj ejjan̄in kar lo, im barāinwōt lo̧jiln̄i rejjan̄in kar ron̄, m̧okta, āindein eļap im kabwilōn̄lōn̄ men kein āinwōt kōm ar lo im ron̄ Jisōs eaar kōnono n̄an Jemān.”
Ro jeiū im jatū, rainin ij kwaļo̧k aō kam̧ool im kōm̧m̧ane juon rekoot in ta ko iaar jim̧or loi im ron̄ ilo iien jerbal eo aō āinwōt juon Jiljilimjounn̄oul an Irooj Jisōs Kraist. Ilo aō kōm̧m̧ane, ij kam̧ool n̄an kom̧ kōn juon Jemedwōj Ilan̄ eo ej iakwe im Nejin eo ejouj, Jisōs Kraist, eo ekar en̄taan, mej, im bar jerkak n̄an letok mour indeeo n̄an ro nejin Anij. Ij kam̧ool kōn “juon jerbal men in bwilōn̄” im bwe em̧ōj an Irooj letok Pein bar juon alen n̄an kōjepļaaktok gospel eo ioon laļin jān rikanaan im rijilōk ro An rōmour. Ij kam̧ool ekkar n̄an ta ko iaar jim̧or loi im ron̄, ejjeļo̧k iien en ekar em̧m̧anļo̧k jān iien in n̄an erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ijeļā menin jān jeļā eo aō make, ejenolo̧k jān jeļā ko jet, kōn wōt ta ko iaar jim̧or loi im ron̄.
Ilo iiō eo aō āliktata ilo high school, n̄an kadiwōjlo̧k jān jemenere ij aikuj kwaļo̧k etan aolep tampeļ ko 15 an Kabun̄ in. Pijaan kajjojo tampeļ rekar pād m̧aan in kūlaaj eo, im ij aikuj kar jeļā ia ko kajjojo rej pād ie. Kiiō, iiō ko tokālik, enaaj juon apan̄ eļap —kōn335 tampeļ ko rej jerbal im tampeļ ko kar kōjeļļā kaki—n̄an kwaļo̧k kajeer kajjojo. N̄a make em̧ōj aō loe elōn̄ iaan m̧ōkein m̧ōn Irooj im kam̧ool bwe Irooj ej letok kōjeraam̧m̧an ko An im kain̄i ko n̄an elōn̄ ļo̧k ajri ro Nejin ipeļaakin laļin.
Ro m̧ōtta ilo FamilySearch rekar katakin eō ke rej kadeļo̧n̄ elōn̄ļo̧k jān juon milien āt n̄an FamilySearch kajjojo raan. N̄e kwaar jab lo ro jibum̧ im jim̧m̧am̧ inne, ij karuwaineneik eok n̄an bar etale ilju. N̄e ej itok n̄an kobaik Israel ilo turājet in rōn̄ōl eo, ejjeļo̧k iien en ekar em̧m̧anļo̧k n̄an erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata jān rainin.
Ke kom̧ro kar karūttoļo̧k ajri ro nejūm̧ ilo Twin Falls, Idaho, meļeļe eo am kōn Kabun̄ ilo aolepen laļin in ekar dik. Ke kar kūr eō n̄an juon Ritōl Eutiej, kar jitōn̄ kom̧ro Marcia n̄an jerbal ilo Pacific Eria, juon jikin kōm ejjan̄in kar pād ie. Kom̧ro kar m̧ōņōņō n̄an ellolo stake jān lōn̄ in New Zealand n̄an laļ, im juon tampeļ me kar aje ilo 1958. Ekar juon iaan tampeļ ko 15 me iaar aikuj in kar kakeememeji ilo jemenere. Jekar lo tampeļ ko ilo bukwon ro reļļap ilo Australia, im stake ko ipeļaakin jikin en. Ekar wōr am kūrļo̧k n̄an Samoa, ijo ewōr 25 stake ko, im Tonga, ijo eitōn jimettan in rej membōr in Kabun̄ in. Ekar wōr juon am kūr ilo aelōn̄ in Kiribati, ijo kōm kar lo ruo stake ko. Ekar wōr am kūr n̄an loļo̧k stake ko ilo Ebeye, Marshall Islands, im Daru ilo Papua New Guinea.
Ālkin iien jerbal in jipan̄ ko am ilo aelōn̄ ko ilo Pacific, kar kūr kom̧ro n̄an jerbal ilo Philippines. Iaar ļo̧kjenaō, Kabun̄ eo an Jisōs Kraist ilo Philippines eļapļo̧k an eddōk jān aō kar ļōmņake. Kiiō ewōr 125 stake ko, 23 mijen ko, im 13 tampeļ ko rej jerbal ak em̧ōj kōjeļļā kaki. Iaar kam̧ool kōn juon kabun̄ eo ewōr elōn̄ļo̧k jān 850,000 membōr in ilo laļ eņ. Ekōjkan aō kar jaje kōn Kabun̄ eo an Kraist ipeļaakin laļin?
Ālkin jilu iiō ilo Philippines, kar kajjitōk bwe kom̧ro en jerbal ilo Missionary Department. Kūr eo aō ekar bōk kom̧ro n̄an mijen ko ipeļaakin laļin. Meļeļe eo aō kōn Kabun̄ in ilo aolepen laļin ekar ļapļo̧k. Kar kūr kom̧ro Marcia n̄an loļo̧k mijen ko ilo Asia. Kom̧ro kar lo juon stake center eaiboojoj ilo Singapore, ippān member, ro retōmak im rōm̧m̧an. Kom̧ro kar loļo̧k member ro im mijenede ro ilo juon m̧ōnjar ilo Kota Kinabalu, Malaysia. Kom̧ro kar lo mijenedee ro ilo Hong Kong im kar bōk koņaam ilo juon kweilo̧k eo eļap an stake ippān Armej ro Rekwojarjar ro, retōmak.
En̄jake in em̧m̧an kar bar āliji bwe kom̧ro en kar lo mijenede ro im member ro ilo peļaakin Europe, ilo Latin America, Caribbean, im ilo Africa. Kabun̄ eo an Jisōs Kraist ej pād ilo juon eddōkļo̧k eo ekajoor ilo Africa.
Ij juon rikam̧ool kōn Jepļaaktok eo an gospel eo an Jisōs Kraist me ej wōnm̧aanļo̧k wōt im kakūrm̧ool kanaan eo an Josep Smith bwe “m̧ool eo an Anij enaaj wōnm̧aanļo̧k wōt ilo kajoor, utiej, im anemkwōj, m̧ae ej rōplo̧ke aolep laļ, lo aolep mejatoto, po ļo̧k ilo aolep aelōn̄, im ron̄ kōn aolep lojiln̄i.”
Mijenede ro ad rōm̧m̧an rej kiiō kobrak laļin ilo jon̄an eo ekajoor 74,000. Jerbal ippān doon ippān membōr ro, rej peptaiji elōn̄ļo̧k jān 20,000 armej aolep allōn̄. Ejjab to ekar 18-, 19-, im 20-iiō dettan likao im jiron̄ rein ro me, kōn jipan̄ eo an Irooj, ej kwaļo̧k kabwilōn̄lōn̄ in n̄an aiintok doon. Jej loe jiron̄ im likao rein ilo jikin dikdik ko ilo Vanuatu im ilo bukwōn ļapļap ko ilo New York, Paris, im London. Em̧ōj aō lo aer kwaļo̧k kōn Rilo̧mo̧o̧r ilubwiljin jarlepju ko ilo Fiji im kweilo̧k ko reļļapļo̧k ilo jikin ko ilo Texas, California, im Florida ilo United States.
Kwonaaj lo mijenede ro ilo aolep kona ko an laļin rej kōjerbal 60 kajin ko roktak n̄an kakūrm̧ool enaan eo eļap an Rilo̧mo̧o̧r ilo Matu 28: “Innām koṃwin ilọk, im kōṃṃan ri aelōñ ko otemjej bwe ren ri kaḷora,im peptaij er ilo etan Jema im Nejin im Jetōb Kwōjarjar.” Ij nōbar mijenede ro an Kabun̄ in kar m̧okta im kiiō n̄an kakeememej diktak in epepen in kōn karuwainene eo an Būreejtōn Russell M. Nelson n̄an itok im aiintok Israel.
Ij kam̧ool rainin bwe em̧ōj aō lo jepļaaktok in an gospel in an Rilo̧mo̧o̧r kōn meja make im ron̄ kōn lojiln̄ū make. Ij juon rikam̧ool kōn jerbal eo an Anij ipeļaakin laļin. Ejjeļo̧k iien en ekar em̧m̧anļo̧k n̄an erom̧ juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata jān rainiin.
Bōlen im̧we eo ekabwilōn̄tata ej kōn Jepļaaktok in me iaar kam̧oole ej kom̧, membōr ro retōmak an Kabun̄ in ilo aolepen laļin. Kom̧, Armej ro Rekwojarjar, rikaļo̧o̧r ro an Jisōs Kraist, Nipai ekar kōmeļeļe kake er ilo Bok in Mormon, ke eaar lo raan kein ad im kar kam̧ool, “Im ālikin men kein, n̄a, Nipai, iaar lo kajoor in Lamb an Anij, bwe ekar bun̄ ioon ro rekwōjarjar jān kabun̄ eo an Lamb eo, im ioon armej in bujen ko an Irooj, ro raar ejjeplōklōk ioon aolepān mejān laļ; im raar pojak kōn jim̧we im kōn kajoor in Anij ilo aiboojoj eļap.”
Ij kam̧ool bwe em̧ōj aō lo kōn mej ko meja make ta eo Nipai ekar loe—kom̧, Armej ro Rekwojarjar in bujen ro ilo aolep laļ, pojak kōn jim̧we im kajoor an Anij. Ke iaar pād ilo jikin kōnono eo im̧aan ilo juon iaan laļ ko reļļap ilo laļin, Irooj ekar im̧we kōļmenļo̧kjen eo aō kōn juon men me Kiin̄ Benjamin ekar katakin ilo Mosaia 2 ilo Bok in Mormon. Brent, “Ikōņaan bwe kom̧in ļōmņak kōn jekjek eo ejeraam̧m̧an im ekōm̧ōņōņō an ro raar kōjparok kien ko an Anij. Bwe lo, rej jeraam̧m̧an ilo aolep men ko otemjeļo̧k, jim̧or ilo kanniōk im jetōb.”
Ij kam̧ool n̄an kom̧ bwe em̧ōj aō loe menin kōn mej ko meja make im ron̄ kōn lojiln̄ū ilo aō kar ioon kom̧, Armej ro Rekwojarjar ro retōmak an Anij ipeļaakin laļin ro rej kōjparok kien ko. Kom̧wij ajri in bujen ro nejin eo Jemed. Kom̧ij rikaļo̧o̧r ro an Jisōs Kraist. Kom̧ij bar jeļā ta eo ijeļā kōnke kom̧ kar bōk ami make kam̧ool kōn m̧ool eo an gospel eo an Jisōs Kraist em̧ōj an jepļaaktok. Rilo̧mo̧o̧r ekar katakin, “A e ṃōṇōṇō mejemi, bwe rej lo; im lọjiln̄emi, bwe rej ron̄.”
Ium̧win tōl eo an Irooj im tōl eo an rikanaan im rijilōk ro An, jej wōnm̧aanļo̧k wōt im kepooj mijenede ro, kōm̧m̧an im kōjparok bujen ko rekwojarjar, kalōk Kabun̄ eo an Kraist ipeļaakin laļin, im bōk kōjeraam̧m̧an ko me rej itok ilo ad kōjparok kien ko an Anij. Jej ippān doon. Kōj jej ajri ro nejin Anij. Jej jeļā wōn E im jej iakwe E.
Ij koba ippāmi aolep, ro m̧ōtta, ilo ad ippān doon ilo kam̧ool bwe men kein rem̧ool. Jej kōm̧m̧ane juon rekoot in ta ko jaar jim̧or loi im ron̄. Kwe im n̄a jej rikam̧ool ro rej kam̧ool. Bwe kōn kajoor in ej kobaik kam̧ool in bwe jej wōnm̧aanļo̧k wōt kōn tōmak ilo Irooj Jisōs Kraist im gospel in An. Ij kwaļo̧k kam̧ool eo aō bwe Jisōs Kraist emour. Ej ad Rilo̧mo̧o̧r im ad Ripinmuur. Ilo etan Jisōs Kraist, amen.