Bujen Lōke jān Jisōs Kraist
N̄e jej deļo̧n̄e m̧weeo im̧ōn Irooj, jej etal ilo juon iaļ in ekkatak ekwojarjar n̄an erom̧ rikaļo̧o̧r ro an Kraist reutiej ļo̧k im ekwojarjar ļo̧k.
Ro jeiū im jatū jitōnbōro, n̄aij jar bwe jen maron̄ in kōkāāl ilo jetōb jān ennaan ko reim̧we jān ritōl ro ad jem̧ļokin wiikin im m̧ōņōņō ilo ta eo jej ņaetan “bujen lōke jān Jisōs Kraist.” Lōke in ej meoeo ak alikkar eo an bōk kōjeraam̧m̧an ko me Anij ej kallim̧ur n̄an ro me rej kōjpārok bujen ko aer im elukkuun mennin aikuj ilo jekjek ko reppen an raan kein ad.
Ekkal in m̧ōko im̧ōn Irooj rekāāl ipeļaakin laļin, iumin tōl eim̧we an Būreejtōn Russell M. Nelson, ekar kōm̧m̧an elap m̧ōņōņō ibwilijin ro uwaan Kabun̄ in im ej jerbal āinwōt juon kakōļļe eaorōk an eddōkļo̧k eo an aelōn̄ in kiin̄ eo an Irooj.
Emeemļo̧kjen kōn en̄jake eo aō ekabwilōn̄lōn̄ ilo aje eo an Feather River California Tampeļ Oktoba eo ļo̧k, ij kōļmenļo̧kjen eļan̄n̄e jet iien jej jabwābwe ilo kalimomo eo an tampeļ kein rekāāl ilo bukwon im jukjukin pād ko ad im kōjekdoon jipadpad eo an bujen ko rekwojarjar jej kōm̧m̧ani ilo tampeļ.
Em̧ōj je juon naan eutiej itum̧aan in kajjojo tampeļ: “E Kwōjarjar N̄an Jeova.” Naan kein reim̧we rej juon kūr ealikkar bwe n̄e jej deļo̧n̄e m̧weeo im̧ōn Irooj, jej etal ilo juon iaļ in ekkatak ekwojarjar n̄an erom̧ rikaļo̧o̧r ro an Kraist reutiej ļo̧k im ekwojarjar ļo̧k. Ilo ad kōm̧m̧ani bujen ko ilo ekwojarjar im̧aan mejān Anij im kallim̧ur n̄an ļo̧o̧r Rilo̧mo̧o̧r, jej bōk kajoor eo n̄an ukōt būruōd, kōkāāl jetōb ko ad, im kam̧wilaļļo̧k jemjerā eo ad Ippān. Jipadpad rōt in ej boktok kwojarjar n̄an jetōb ko ad im ejaake juon ekkeijel ekwojarjar ippān Anij im Jisōs Kraist, eo ej kallim̧ur bwe jenaaj maron̄ jolet mennin letok eo an mour indeeo. Tōprak eo an iaļ in ekwojarjar ej bwe jej aikuj bōk lōke eutiejļo̧k n̄an mour ko ad-raan n̄an-raan ilo bujen ko ad kar kōm̧m̧ani kōn Jisōs Kraist.
Lōke in ej men eo eutiejtata in ekkeijel eo ad ekwojarjar ippān Anij im emaron̄ jipan̄ kōj kōļapļo̧k ad wujlepļo̧k im kam̧m̧oolol Jisōs Kraist im en̄taan in pinm̧uur eo An. Ej kapen maron̄ eo ad n̄an iakwe im jerbal n̄an ro jet, im ej kōkajoorļo̧k jetōb ko ad n̄an mour ilo juon laļ ejerawiwi me emarok im kabweerer. Ij kōkajoor kōj n̄an eļļā jān ine in pere im būrom̧ōj, mijak im kūtōtō, rup bōro im ejeļo̧k kōjātdikdik bwe rikōjdat eo an ej kajjieon̄ in deļo̧n̄ ilo būruōd eļaptata n̄e mour ej pen tok, māllejjon̄ ko reaitok, ak jekjek ko rej eppen. Juon eoon in baibōļ ej letok rōjan̄ n̄an kōj kajjojo ilo ad atartarļo̧k ippān kōto ekajoor in apan̄ ko an laļin rainin: “Koṃwin jab joḷọk ami peran.”
Ro jeiū im jatū jitōnbōro, ro rej bōk lōke em̧ool ilo bujen ko kar kōm̧m̧ani iloan m̧weeo im̧ōn Irooj jān Jisōs Kraist ewōr ippaer juon iaan kajoor ko me jemaron̄ kōjerbal ilo mour in.
Ilo ad kar ekkatak kake Bok in Mormon eo ilo Itok, Ļo̧o̧r Eō iiō in, jekar kam̧oole an kar Nipai kwaļo̧k waanjon̄ak in kajoor an kain bujen lōke in jān tōmak eo an ke ekar jelm̧ae mennin jelliktak ko im apan̄ ko, āinwōt bōk pileij ko āinwōt ke Irooj ekar jiron̄e. Nipai, mekarta ekar lukkuun būrom̧ōj kōn leln̄on̄ im jab tōmak eo an Leman im Lemuel, ekar dāpdep ilo an kar lōke bwe Irooj enaaj kōtļo̧kļo̧k pileij ko n̄an er. Ekar ba n̄an ļōm̧aro jein, “Āinwōt Irooj emour im āinwōt ad mour, jejamin naaj wanlaļļo̧k n̄an jemād ilo āne jem̧aden m̧ae iien jej kōtōprak men eo Irooj eaar jiron̄ kōj.” Kōnke kōn lōke eo an Nipai ilo kallim̧ur ko an Irooj, ekar maron̄ kōtōprak ta eo kar jiron̄ e n̄an kōm̧m̧ane. Tokālik, ilo visōn eo an, Nipai ekar lo kajoor in kain lōke rōt in, ekar je, “N̄a, Nipai, iaar lo kajoor in Lamb an Anij, bwe ekar bun̄ ioon ro rekwōjarjar jān kabun̄ eo an Lamb eo, im ioon armej in bujen ko an Irooj, … im raar pojak kōn jim̧we im kōn kajoor in Anij ilo aiboojoj eļap.”
Em̧ōj aō loe kallim̧ur im kajoor an Irooj rej toorļo̧k ilo mour ko an ajri ro nejin Anij, kōkajoor er n̄an jelm̧ae jekjek ko an mour in. Raan eo ej jem̧ļo̧k ļo̧k kōrā eo pāleō ekar roltok n̄an m̧weeo ālkin an kar kabun̄jar ilo tampeļ eo im jiron̄ eō jon̄an an kar im̧we kōn ta eo ekar en̄jake ijo. Ke liin ej deļo̧n̄ļo̧k ilo m̧weeo im̧ōn Irooj, ekar loe juon em̧m̧aan ilo juon wiiljea jidik wōt an em̧akūtkūt im juon kōrā eapan̄ an etetal im kōjerbal juon jokoņ, erro jim̧or rej itok ilo peran n̄an kabun̄jar n̄an Irooj ilo m̧weeo Im̧ōn. Ke ļio ippa ej etetalļo̧k iloan jikin initiatory eo, ekar loe juon sister eo ekar jako juon iaan pā ko pein—im kar kōjerbal wōt eo rājet n̄an jerbal ilo—aiboojoj im utiej jabdewōt jerbal kar leļo̧k n̄an e.
Ke lio ippa im n̄a ekar kōnono kōn en̄jake in, kōm ekar kōjemļo̧ke ilo wōt erreeo im būruōn lōke ilo kallim̧ur ko indeeo Anijej letok jān bujen ko rekwojarjar kar kōm̧m̧ani Ippān ilo m̧weeo Im̧ōn emaron̄ kōm̧m̧an bwe rikaļo̧o̧r ro an Kraist rekabwilōn̄lōn̄ ren likūt m̧ōko m̧weer ilo raan eo elukkuun m̧ōļo, mekarta ta jekjek ko aer make ilo mour in.
Ro jera jitōnbōro, n̄e ewōr juon men emaron̄ wōr ippad—im juon men me jemaron̄ leļo̧k n̄an ro nejid im jibūd me enaaj jipan̄ er kajjojo ilo melejon̄ ko im̧aan—naaj maron̄ lōke ilo bujen ko kōm̧m̧ane jān Jisōs Kraist. An lōn̄ ippaer mennin enaaj jipan̄ er mour āinwōt an kar Irooj kallim̧ur rikaļo̧o̧r ro An retiljek: “ro rikaļoora renaaj jutak ilo jikin ko rekwōjarjar, im rej jamin em̧m̧akūt.”
Ekōjkan ad bōk lōke rōt in jān Jisōs Kraist? Ej itok jān ettā bōro, likūt Jisōs bween unjen mour ko ad, mour jān pedped in katak ko an gospel eo an Jisōs Kraist, bōk kain̄i ko an lo̧mo̧o̧r im mour utiejtata, im kautiej bujen ko jej kōm̧m̧ani ippān Anij ilo m̧weo Im̧ōn ekwojarjar.
Ilo enaan in ikilōk eo an ilo kweilo̧k eo eļap Oktoba 2019, rikanaan eo ad ejitōnbōro ekar kakeememej kōj kōn juon bun̄ten ne eaorōk ilo tōpare bujen lōke, ekar ba: “Erreo eo an kajjojo armej n̄an deļo̧n̄e m̧weo im̧ōn Irooj ej aikuji eļap m̧aanjabpopo eo ilo jetōb. … Erreo eo an kajjojo armej ej aikuj juon oktak em̧ool an ļōmņak im bōro n̄an erom āinwōt Irooj, n̄an erom juon citizen em̧ool, n̄an erom juon waanjon̄ak em̧m̧anļo̧k, im n̄an erom juon armej ekwojarjarļo̧k.” Kōn mennin, n̄e jenaaj ukōt keppopo eo ad n̄an deļo̧n̄e tampeļ eo, jenaaj ukōt en̄jake eo ad ilo tampeļ, eo enaaj ukōt mour ko ad ilikin tampeļ eo. “Innām am peran enaaj kanooj kajoor ilo im̧aan mejān Anij; im katak in priesthood eo enaaj wōt-dikdiki am āinwōt m̧ōļawi jān lan̄.”
Juon bisop ijeļā kajjen ej kūr kūlaaj eo erūttotata ilo Būraimere āinwōt kūlaaj in “keppopo n̄an tampeļ”. Jānwōde eo bisop eo ekar boktok ro uwaan kulaaj eo im rikaki ro n̄an opiij eo an, ijo raar kōnono kōn ekōjkan aer naaj kōjerbal aolepen iiō eo n̄an keppopo in deļo̧n̄e tampeļ. Bisop eo ej bōk iien n̄an etale kajjitōk ko rekkar n̄an intōrpiu n̄an pepa in mālim n̄an deļo̧n̄e tampeļ eo, ko me renaaj kar bar kobaik ilo katak ko an Būraimere ro aer. Ej karuwaneneik ajri ro n̄an keppopo bwe n̄e renaaj itok n̄an opiij eo an bisop iiō eo tok juon, renaaj lōke, bujen lōke, pojak n̄an bōk juon aer pepa in mālim n̄an deļo̧n̄e m̧weo im̧ōn Irooj. Iiō in ekar wōr emen leddik ro raar lukkuun m̧ōņōņō, pojak, im lōke n̄an etal n̄an tampeļ eo ke raar kōņaan bwe bisop eo en būriini aer pepa in mālim n̄an deļo̧n̄e tampeļ ilo Raan in Nu IIō eo ilo 12:01 a.m.
Keppopo ejjab n̄an armij ro wōt rej etal n̄an tampeļ kein kajuon. Kōj aolep aikuj in keppopo aolep iien n̄an etal n̄an m̧weeo im̧ōn Irooj. Juon stake ijeļā kake ekar bōk m̧ato eo “Pedped ilo m̧weeo, rie jān Kabun̄ in, im jibadōkļo̧k tampeļ.” Jibadōkļo̧k ej juon naan ekaitoktok limo me meļeļein ke mije juon iaaļ, bōtaap bar meļeļein ke kakoņ ak kōjpārok in, meļeļe kake, im kijejeto, jeļā ilo alikkar. Kiiō ad jibadōkļo̧k tampeļ ej kakonļo̧k kōj n̄an Rilo̧mo̧o̧r, ej letok n̄an kōj tōl ko rekkar im pen ilo ad lukkun lale bwe ewōr ippād bujen lōke jān Jisōs Kraist. Kōn mennin, kōj aolep jej aikuj kōļapļo̧k kain ekkeijel rōt in jān ad tokāļik kōm̧m̧ane iien ko ad ippān Irooj ilo m̧weeo Im̧ōn ekwojarjar, mekarta n̄e tampeļ eo ej epaak ak etoļo̧k.
Rikanaan eo ad ejitōnbōro, Būreejtōn Russell M. Nelson, ej kakeememej kōj kōn pedped kein raorōk ilo an kar ba: “Tampeļ eo ej pād ilo ioļapļap in kōkajoorļo̧k eo an tōmak eo ad im kajoor in jetōb eo ad kōnke Rilo̧mo̧o̧r im katak ko An rej lukkuun mour eo an tampeļ eo. Men otemjej katakin ilowaan tampeļ eo, jān kōmeļeļe im jān Jetōb eo, ej kōļapļo̧k ad meļeļe kōn Jisōs Kraist. Kain̄i ko An raorōk rej liāpe kōj n̄an E kōn bujen ko rekwojarjar an priesthood. Innām, ilo ad kōjparoki bujen ko ad, E ej letok n̄an kōj An kōmour, kajoor in kōkajoorļo̧k. Im o, ewi jon̄an ad naaj aikuji kajoor eo An ilo raan ko rej pād im̧aan.”
Rilo̧mo̧o̧r ekōņaan bwe jen pojak in m̧eļeļe, kōn eļap jeļā, lukkuun jejjōt in kilen m̧akūtkūt ilo ad kōm̧m̧an bujen ko ippān Jemedwōj Ilan̄ ilo Etan. E kōņaan bwe jen keppopo n̄an en̄jaake jeraam̧m̧an ko ad, kallim̧ur ko, im eddo ko; n̄an pojak in bōk ļōm̧ņak ko ilo jetōb im jeļā ko jej aikuji ilo mour in. Ijeļā ke n̄e Irooj ej loe jekdoon jidikin juon ikdeelel ak meram in kijejeto in jerbal jim̧we ilo ad m̧ōņōņō in kōm̧m̧an bwe E en unjen mour ko ad, im ilo kain̄i im bujen ko jej kōm̧m̧ani ilo m̧weeo Im̧ōn, E enaaj kōjeraam̧m̧an kōj, ilo wāween eo An ewāppen, kōn kabwilōn̄lōn̄ ko im jouj ko jej aikuji.
M̧weeo im̧ōn Irooj ej ijo jemaron̄ in oktak ilo wāween ko eutiejļo̧k im kwojarjarļo̧k. Kiiō, n̄e jej diwojļo̧k jān tampeļ eo, kar oktak jān ad kōjatdikdik ilo kallim̧ur in bujen ko, bōk kajoor jān lan̄, jej bōk tampeļ eo ippād tok n̄an m̧ōko im̧ōd im mour ko ad. Ij kam̧ool n̄an kom̧ ke an pād ippad jetōb in m̧weeo im̧ōn Irooj ilo kōj ej ukōt kōj, ilo m̧ool.
Jej barāinwōt jeļā jān tampeļ eo bwe eļan̄n̄e jej kōņaan bwe Jetōb in Irooj en dāpdep wōt ilo mour ko ad, ejjab aikuj wōr ippad en̄jake ko rejjab jouj ņae jabdewōt armij. Leļo̧k jikin ilo būruōd ak kōļmenļo̧kjen ko ad n̄an en̄jake kein rejjab jouj ak ļōm̧ņak ko renana enaaj kwaļo̧k naan im m̧akūtkūt ko renana, mekarta ilo social media ak ilo m̧ōko im̧ōd, ekōm̧m̧an bwe Jetōb eo an Irooj en em̧akūt jān būruōd. Kōn mennin, jouj im jab joļo̧k ami lōke, bōtaap, kōtļo̧k bwe am̧ lōke en kajoorļo̧k.
Jerbal in ekkal eo an tampeļ ko renaaj wōnm̧aanļo̧k wōt n̄an kam̧ōņōņō, im̧we, im kōjeraam̧m̧an kōj. Bōtaap eļapļo̧k an aorōk, ilo ad ukōt keppopo eo ad n̄an deļo̧n̄e tampeļ eo, jenaaj ukōt en̄jake eo ad ilo tampeļ, eo me enaaj ukōt mour ko ad ilikin tampeļ eo. Oktak in en kobrak kōj kōn lōke ilo bujen ko ad rekwojarjar jaar kōm̧m̧ane ippān Anij kōn Jisōs Kraist. Anij emour, Jisōs ej ad Rilo̧mo̧o̧r, im en̄iin ej Kabun̄ eo An em̧ōj an jepļaaktok ioon laļin. Ij kwaļo̧k m̧o̧o̧l kein ilo kautiej ilo et eo ekwojarjar etan ad Rilo̧mo̧o̧r, Jisōs Kraist, amen.