Ewe Apwapwan Epinukunuk
Epinukunuk ew niffang mi manau, ew niffang mi mar nupwen sia anapano ach nuku non Jises Kraist.
Pwi me fefinei achengicheng unusen fonufan, nupwen sia poputani ei auchean fansoun mwichenap, mesen nang repwe chok anefotakich. Sipwe rongorong ewe mongungun ewe Samon seni noun chon angang; sipwe mefi ewe “emwen, awenewen, [me] kinamwein” emwenien ewe Ngun mi Fel, me ach nuku epwe pochokunono.
Unungat ier a no, Preseten Russell M. Nelson a poputani mwichenap ren ekkei kapas: “Nimenimochun pwarata ren ekkewe kapas eis non netipemi repwe fori ei mwich ami oupwe menemenoch ren me ousap nemenono. Ika kose mwo kutta ewe aninis an ewe Ngun mi Fel an epwe anisuk ne rongorong met ewe Samon a mochen kopwe rong non ekkei ru ran, ua tingorekemi oupwe fori iei. Ouse mochen oupwe fori ei mwichenap epwe ew fansoun kametip won ekkewe porous seni ewe Samon me ren Noun kewe chon angang.”
Ekkewe pukefel ra ochufengeni unungat pochokunen kapas: nuku, epinukunuk, awora aninis ngeni mi osupwang. Ewe niffangen epinukunuk ina ew auchean efeioch seni Kot.
Ewe kapas epinukunuk sia nounou ren chommong mettoch sia mochen an epwe fis Awewe ren, “Ua epinukunuku pwe esap pung ran,” ika “Ua epinukunuku ach ewe kumi epwe win.” Ai popun ai upwe afanafan ussun ach epinukunuk mi pin me ese much a anonga non Jises Kraist me ewe kapas allim mi niwinsefanito, me ach “pochokunen osukusuku … kewe feioch mi pwon an aramas pung.”
Ach Epinukunuk ren Manau Ese Much
Ach epinukunukun manau ese much a wor pochokunan seni ewe chenin Kraist me ach pusin mochen, a mut ngeni kich ewe auchean feiochun niwinsefanino ngeni imwach non nang me nonnom feinfeino non kinamwe me pwapwa fiti Samach won Nang, Noun we Achengicheng, ach famini mi tupwen me chienach achengicheng, me ekkewe mwan me fefin seni fonufan mi pung seni neni meinisin me tapin fansoun meinisin.
Won fonufan sia sinei pwapwa me netipengaw nupwen sia tes me anetata pungun. Ach win a feitto seni nuku non Jises Kraist usun ach sia okufu ach tipis, weires, sosot, pungungaw, me kewe sosotun ei manau iei.
Nupwen sia opochokuna ach nuku non Jises Kraist, sia kuna pekinon ach osukosuk ngeni ekkewe feioch me pwon ese much. Ussun ew saram a wateno pochokunen saraman, epinukunuk a asarama ewe fonufan mi rochopwak, me sia kuna ach fansoun mwach mi amwarar.
Epinukunuk a Feitto seni Kot
Seni nepoputan, Samach won Nang me Noun we Anamon ra ennetin mochen efeiochu ekkewe mi pung ren auchean niffangen epinukunuk.
Mwirin ar tou seni ewe atake, Adam me Eve ra kaeo seni emon chon nang ussun ewe pwon an Jises Kraist. Ewe niffangen epinukunuk a emiritieno manauer. Adam a afata, “Mesei ra suk, o non ei manau epwe wor ai pwapwa.” Eve a kapas ussun“ewe pwapwan [ar] ngaseno, me ewe manau esemuch minne Kot a ngeni meinisin kewe mi anneasosich.”
Nupwen chok an ewe Ngun mi Fel a wato epinukunuk ngeni Adam, ewe manamanen ewe Ngunun ewe Samon a emiritieno kewe mi nukuchar ikenai, afata ewe ennetin manau esemuch.
Ewe Chon Amanau a tinato rech emon Chon Ourur, ewe Ngun mi Fel, emon chienach a wato nuku me epinukunuk, a wato kinamwe “esap ussun an fonufan fang.”
“Non ewe fonufan,” ewe Chon Amanau a apasa, “fonufan epwe eriaffoukemi: nge oupwe chok epinukunuk [aponueta ew saramen epinukunuk]; Ngang ua fen okufufatiw fonufan.”
Non fansoun weires, sia fini ach sipwe achifoua ewe Samon non nuku. Sia mosonoson ne iotek, “Esap netipei nge netipom epwe ponueta.” Sia mefi an ewe Samon mutata ach mochen tipetekison, me sia awitiwiti ewe kinamwe mi pwon pwe ewe Samon epwe tinato non An fansoun mi finata.
Ewe Aposel Paul a afanafana, “Ewe Koten epinukunuk [epwe] ourakemino ren … pwapwa me kinawe … , pun ami epinukunuk epwe napeno,” “pwapwa non epinukunuk; engino non riaffou;” “ren manamanen ewe Ngun mi Fel.”
Ew Nesen ren Epinukunuk
Ewe Soufos Moronai a sinei won pwisin winikapan ussun an wor epinukunuk non Kraist non fansoun riaffou. I a awewei nonomun an osukosuk:
“Ua chok anamon. … Ese wor … ian upwe feinno ian.”
“Use pwarano inisi … ren nuokusun ika repwe nieino.”
Echipworun, non ei rochopwaken me opwosupwosun fansoun, Moronai a maketiw an saman ewe kapasen epinukunuk.
“Ika a wor an emon aramas nuku mi auchea epwe wor an apinukunuk; pun me nukun nuku ese tongeni wor apinukunuk.”
“Iwe met ami oupwe apinukunuku? … Epwe wor ami epinukunuk ren ewe achasefan an Kraist me ewe manamanen an manausefan, an epwe manaueta ngeni manau esemuch.”
Pwi me fefinei, epinukunuk ew niffang mi manau, ew niffang mi mar nupwen sia anapano ach nuku non Jises Kraist. “Nuku ina ewe [pisekin pwarata ren mettoch sia epinukunuku.” Sia ouweta ei pisek—ewe pwarata kewe minen eppetin ach nuku— seni iotek, kewe pwon non tempel mi pin, aponueta kewe annuk, sopweno ne kametip won kewe pukefel me kewe kapasen ekkewe soufosun ikenai, angei ewe sakament, me anisi ekkoch, me fen ngeni Kot iteiten wik fengen me pwich Souneng.
Ew Imwen Epinukunuk
Sipwe epeti ach epinukunuk non fansoun napanon ekkewe mettoch mi ngaw, ewe Samon a fen emweni Noun soufos an epwe oueta An kewe tempel.
Nupwen sia tonong non imwen ewe Samon we, sia mefi ewe Ngunun Kot, a anetata ach epinukunuk.
Ewe tempel a pwarata ewe peias mi poon me ena manau pekinon ewe eppet a sopweno fan iten meinisin.
Ren ekkana ese wor chiener ese much, manamanen kewe angangepin a apungano pwe meinisin aramas mi tuppwen repwe angei meinisin feioch mi pwon.
Mi wor epinukunuk mi tekia nupwen ew pean pupunu ra fotopuku epek ewe antare ar repwe riri fengen, esap ren chok fansoun nge pwan fein feinno chok.
Mi wor ew watten epinukunuk fan itach non kewe pwon ra for ngeni ach kewe tappin aramas non fansoun mwach, inamo ika met nonomur me akkom.
Ese wor metek, ese wor semwen, ese wor pungungaw, ese wor riaffou, ese wor met epwe tongeni ekirochano ach epinukunuk nupwen sia nuku me komochunuk ngeni ach kewe pwon mi pin ngeni Kot non ewe imwen ewe Samon. A ew imwen saram, ew imwen epinukunuk.
Nupwen Ese Wor Epinukunuk
Sia kechiw ren netipengaw nupwen sia kuna ewe netipechow me epinukunukungaw non ekkana ese wor ar epinukunuk non Kraist.
Ua karan chok katon seni towaw ew pean pupunu ewe a wor ew fansoun a wor ar nuku non Kraist nge mwirin ra ekiekin oukano ar nuku. Ra fetanoch non ewe fonufan, me ra kuna pwapwa non ar ekiek me ewe kounon ar nuku.
Mettoch meinisin a murinno tori ewe fansoun ewe mwan mi pupunu, mi chok chiwen anuon me pochokun, a mwitir semwen me mano. Ussun ew epetin tinen ewe akkar, ra epeti ewe saramen ewe Nau, me met ewe a fis ew epetin epinukunuk. Punuwen ewe mwan ewe, non an ese mochen etiwa, a chok nom non an tirukoruk, metekin ese moneta, ese tongeni an epwe ekinamwei noun kewe semirit. An ekiek a ureni pwe manauan a nom non tetenoch tori ewe weiweitan fansoun ese chiwen kuna nesor. An epinukunukungaw a wato rochopwak me fatafatangaw.
Epinukunuk non Osukosuken Netipeta
Mut ngeni ei upwe anonnou fengeni an metekin epinukunukungaw ngeni an ew famini epinukunuk non Kraist non ew fansoun netipeta.
Rue me-ew ier a no ewe at e karan uputiw noun tetenin nei at, Ben Andersen, me punuwan ewe, Robbie, a fiti ewe elikapter sein uwouwen mi samau seni nenier non Idaho ngeni Salt Lake City. Ua wareiti ewe pioing, iwe Ben a awewei ewe osukosuk, eniuokusun manauen nour ewe ren osukosuken ngasangasan. Am ouwa wata poum won chamwen Trey ewe kukkun. Ewe Samon a fefeiochu i ren soposoponon manau.
A reirei ngasangasen Trey non ewe aewin wiken manauan, pwan chommong me murin. Nupwen kewe ier a pasino, a pwano pwe mi auchea epwe ekesiwin ngasangasen Trey. Ika mo mokutukutun inisin mi oukuk, an nuku a napeno. I a makkei, “Esap mo fan ew upwe mefi netipengaw ren pusin inisi pun ua fen sinei fansoun meinisin ewe auchean awora nuku non Jises Kraist me ew kapasen pwarata ussun ewe kokkotun amanaju.”
Trey a chok onomu won noun ewe fon ei kapas seni Preseten Nelson:,“Ewe pwapwa sia mefi ese nap met a fori ngeni nonnomun manauach me mettoch meinisin a fis ren met sia anonga manauach won.”
Trey a makkei “Ngang ua fen chok awitiwit fiti pwapwa ai upwe fori angangen misin, nge … nei kewe docter rese mut ngeniei ai upwe fori angangen misin tori epwe mosor ew ier mwirin ai ewe ekesiwin ngasangsei. … Ua fen wata ai nuku non Jises Kraist.”
Trey a meseik ren an a ketiw me non ewe pekin tumunun nounoun mwoni me BYU nepoputan ei semester, nge a kon fen meseiken pwapwa nesoponon ewe July nupwen a angei ewe kokkon won fon an epwe etto ren ewe pioing ren an ewe angangen ekesiwini ngasangasan.
“Ew ier,” Trey a apasa, “iwe upwene no won ai misin.”
Mi wor watten met a ewitiwiti nupwen a tonong non ewe rumwen reirei. Nge, non atun ewe angangen reirei mi wor eniwokusun osukosuk, iwe Trey ese chiwen tongeni memef.
Inan ewe, Robbie, a apasa: “Enimu ina ewe ran a kon watte enetipengawan … am ouwa chok achocho ngeni ne ekinamwei ami ekiek. … Ua nenenotam use mour ren ai chok sotuni ne amonata mettoch meinisin. … Nge Ammon, ua pwata fiti ew wesewesen memefin pwapwa. Esap chok kinamwe; esap ren ai use etiwa. Ua mefi pwapwa ren nei we, me ua mefi pwapwa ren ai uwa inenapan. … Ben a nenneno kai mwei, iwe nupwen a wor ach tufichin kapas, Ben a nenneno fiti pwan chok ewe memmef ua mefi.”
Ben a awewei: “Fatafatochun ekiek a feitto ngeni manauei nupwen Kot a aitiei seni An Ngun mi Fel. Ua neno kunok 4:00 winingach me uwa ur ren kinamwe me pwapwa use tongeni awewei. Nge ifa usun ei epwe tufich? … Manon Trey a fokkun ametek, me ua fokkun positi. Nge ewe Samon ese nikitikem non watten riaffou. … Ua witiwit ngeni ew apwapwan chusefan.”
Ewe Pwonen Epinukunuk
Trey a maketiw non noun puken tichikin porousen inisin ekkei kapas seni an Preseten Nelson afanafanen mwichenap: “Ese tufich ne mefi pwapwa nupwen noum semirit a riaffou ren ew semwen ese tongeni chikar ika nupwen ka tou seni om angang ika nupwen punuwom a amam en. Iwe nge ina ewe pwapwa ewe Chon Amanau a awora. An pwapwa esap much, epwe afata ngenikich pwe ach kewe osukosuk epwe chok fis non fansoun mochomoch’ [Doctrine and Covenants 121:7] me.”
Pwi me fefinei, ewe kinamwe oua kukuta meni esap mwitir ngeni kemi ussun ami mochen, nge Ua pwon ngenikemi pwe nupwen ami nukunuk non ewe Samon, An kinamwe epwe feitto.
Amo sipwe tumunu ach auchean nuku, feinno mwach fiti ew saramen epinukunuk mi unusoch. Ua pwarata pwe ach epinukunuk ach ewe Chon Amanau, Jises Kraist. Non I, meinisin ach onotan mi pung repwe sineno. I ewe Koten epinukunuk—ewe pwapwan epinukunuk I mi manau me I a tongek. Non iten Jises Kraist, amen.