Panangikali kadagiti Armastayo ti Panagalsa
Sapay koma ta ikalitayo—iti kaunggan ti biagtayo—ti aniaman nga elemento ti yaalsa a maibusor iti Dios ket suktan dayta iti situtulok a puso ken situtulok a panunot.
Naisurat iti Libro ni Mormon nga agarup 90 a tawen sakbay ti pannakayanak ni Cristo idi inrugi dagiti annak ni Ari Mosiah ti 14 a tawento a mision kadagiti Lamanite. Saan a naballigi ti naaramid a panangyeg kadagiti Lamanite iti adun a henerasion ti pammati iti doktrina ni Cristo. Ita, ngarud, babaen kadagiti namilagruan a panangibabaet ti Espiritu Santo, rinibu kadagiti Lamanite ti napasurot ken nagbalinda a disipulo ni Jesucristo.
Mabasatayo, “Ket kas iti kinainanama a sibibiag ti Apo, kasta met ti kaadu ti namati, wenno kas kaadu ti naiturong iti pannakaammo iti kinapudno, babaen ti panangasaba ni Ammon ken dagiti kabsatna, a mayannurot iti espiritu ti pammaltiing, ken iti pannakabalin ti Dios nga agaramid iti milagro—wen, bayat a sibibiag ti Apo, kas kaadu dagiti Lamanite a namati iti panangasabada, ken namalbaliw iti Apo, ti pulos a saan nagikay.”
Ti tulbek iti manayon a pannakapasurot dagitoy a tattao ket naibaga iti sumaruno a bersikulo: “Ta nagbalinda a nalinteg nga tattao; indissoda dagiti armas ti yaalsada, ket saandan a binusor pay ti Dios, wenno asinoman kadagiti kakabsatda.”
Daytoy a panangtukoy kadagiti “armas ti yaalsa” ket agpadpada a literal ken piguratibo. Kaipapananna dagiti espada ken armas iti gubat ngem kasta met ti panagsukirda iti Dios ken kadagiti bilinna.
Inyebkas ti ari dagitoy a napasurot a Lamanite ti kastoy: “Ket ita kitaen, kakabsatko, … daytoy laeng ti amin a maaramidtayo … ti agbabawi iti amin a basoltayo ken ti adu a pammapatay a naaramidtayo, ken dawaten iti Dios a maikkatda manipud iti puspusotayo, ta ti panagbabawi ti maaramidtayo iti Dios tapno maikkat dagiti mansatayo.”
Paliiwenyo dagiti balikas ti ari—ti panagbabawida ti nangiturong di laeng iti pannakapakawan ti basbasolda, ngem inikkat ti Dios ti mantsa dagidiay a basol ken uray ti tarigagay nga agbasol iti puspusoda. Kas ammoyo, imbes nga agpeggadda iti posible a panagsublida iti dati a kasasaadda a yaalsa iti Dios, inkalida dagiti espadada. Idi inkalida dagiti pisikal nga armasda, a nagbalbaliw ti pusoda, inkalida met ti disposisionda nga agbasol.
Masaludsodtayo no ania ti aramidentayo a mangsurot daytoy a pagtuladan nga, “idisso dagiti armas ti yaalsa” no aniaman dagitoy ken agbalin a “namalbaliw iti Apo” tapno maikkat ti mantsa ti basol ken ti tarigagay nga agbasol iti puspusotayo ken ditay pulos agikay.
Mabalin nga aktibo wenno posibo ti panagalsa. Ni Lucifer ti klasiko a pagarigan iti naigagara a yaalsa, nga, iti lubong sakbay itoy a biag, binusorna ti plano ti pannakasubbot ti Ama ken inummongna dagiti mangbusor met iti daytoy, “ket, iti dayta nga aldaw, adu ti simmurot kenkuana.” Saan a narigat a mailasin ti epekto ti agtultuloy a yaalsa iti panawentayo.
Ti di nasantuan a tallo a kontra-Cristo iti Libro ni Mormon—da Sherem, Nehor, ken Korihor—ti mangipaay iti klasiko a panagadal iti aktibo a yaalsa kontra iti Dios. Ti sapasap a tesis da Nehor ken Korihor ket awan ti basol; ngarud, saan a kasapulan ti panagbabawi, ken awan ti Mangisalakan. “[Dumur-as] ti tunggal tao a mayannurot iti laingna, ken … mamarmek ti tunggal tao a mayannurot iti pigsana; ken saan a krimen ti aniaman nga [aramiden] ti tao.” Laksiden ti kontra-Cristo ti narelihiosuan a turay, a mangiladawan kadagiti ordinansa ken katulagan kas pabuya nga “impasdek dagiti nagkauna a papadi, tapno magun-od iti bileg ken turay.”
Maysa a pagarigan ti aktibo a yaalsa nga addaan iti naragragsak a panagpatingga ket ti estoria ni William W. Phelps. Nagkameng ni Phelps iti Simbaan idi 1831 ket nadutokan a managimprenta iti Simbaan. Inurnosna ti adu a nagkauna a publikasion ti Simbaan, nagsurat iti adu a himno, ken nagserbi a kas eskriba ken ni Joseph Smith. Daksanggasat, ta bimmusor iti Simbaan ken ti Propeta, agingga a nangted iti ulbod a pammaneknek maibusor ken ni Joseph Smith iti korte ti Missouri, a nakatulong iti pannakaibalud ti Propeta sadiay.
Idi agangay, nagsurat ni Phelps ken ni Joseph a dumawat iti pammakawan. “Ammok ti kasasaadko, ammoyo daytoy, ket ammo ti Dios daytoy, … ket kayatko ti maisalakan no tulongandak ti gagayyemko.”
Iti sungbatna, kinuna ti Propeta: “Pudno nga adu ti sinagabami kas resulta ti kababalinmo. … Nupay kasta, nainum ti kopa, naaramiden ti pagayatan ti Nailangitan nga Amatayo, ket sibibiagtayo pay laeng. … Umayka, kabsatko, ta nalpasen ti gubat, ta dagiti gagayyem idi damo ket aggayyemdanto manen. .”
Buyogen ti panagbabawi, inkali ni William Phelps dagiti “armasna ti yaalsa,” ket naawat manen iti naan-anay a pannakilangen, ket saanen a nagikay.
Nalabit ti ad-adda a nasikap a porma ti yaalsa iti Dios, nupay kasta, ket ti di-aktibo a bersion—ti panangilaksid iti pagayatanna iti biagtayo. Dagiti adu a di mangibilang iti aktibo a yaalsa ket mabalinda latta a busoren ti pagayatan ken balikas ti Dios babaen ti panangsurotda iti danada a dida ikankano ti nadiosan a panangiwanwan. Malagipko ti kanta a pinalatak ti kumakanta a ni Frank Sinatra a ti kangrunaan a liniana ket, “Inaramidko iti wagasko.” Awan duadua nga iti biag adu ti lugar para iti bukod a preperensia ken panagpili, ngem no maipapan iti banag a pannakaisalakan ken iti biag nga agnanayon, nasken a ti kantatayo ket, “Inaramidko iti wagas ti Dios,” gapu ta pudno nga awan ti sabali a wagas.
Kas pagarigan, ti pagwadan ti Mangisalakan maipapan iti panagbuniag. Nagpabuniag kas panangipakitana iti kinapudnona iti Ama ken kas pagwadantayo:
“Impakitana kadagiti annak ti tattao a, kas mayannurot iti lasag nagpakumbaba iti imatang ti Ama, ket impaneknekna iti Ama a natulnogto kadagiti bilinna. …
“Ket kinunana kadagiti annak ti tattao: Sumurotkayo kaniak. Gapuna, ay-ayatek a kakabsat, mabalintayo kadi a suroten ni Jesus malaksid no situtuloktayo a mangtungpal kadagiti bilin ti Ama?”
Awan iti “my way” no kayattayo a suroten ti ulidan ni Cristo. Ti panangsapul iti naiduma a dalan nga agturong iti langit ket kas iti awan serserbina a panagtrabaho iti Torre ti Babel imbes nga iti panangawat ken ni Cristo ken ti panangisalakanna.
Dagiti espada ken dadduma nga armas nga inkali dagiti napasurot a Lamanite ket armas ti yaalsa gapu iti no kasano ti panangusarda kadagitoy. Dagita met laeng nga armas nga adda iti annakda a lallaki, a maus-usar a mangidepensa iti pamilia ken wayawaya, ket saan a pulos nga armas ti yaalsa maibusor iti Dios. Kasta met laeng ti napasamak kadagiti kasta nga igam iti Nephites: “Saanda a makirangranget para iti monarkia wenno bileg ngem … makirangrangetda para iti balay ken ti wayawayada, dagiti assawa ken annakda, ken iti amin, wen, para iti seremonia ti panagdaydayaw iti simbaanda.”
Iti kasta met la a wagas, adda dagiti banag iti biagtayo a mabalin a neutral wenno naimbag ngem no di umiso ti panangusartayo, agbalinda nga “armas ti yaalsa.” Ti panagsaotayo, kas pagarigan, mabalin a mangpabileg wenno makapabain. Kas kinuna ni Santiago:
“Ngem ti dila saan a [mabalin] a paammoen ti uray siasino a tao; maysa a dakes a di aginana, napno iti gamut a makapatay.
“Isu ti pangdayawtayo iti Dios, ken Ama, ket isu ti pangilunodtayo kadagiti tattao isuda a naaramid a kaasping ti Dios.
“Iti maymaysa a ngiwat rummuar ti panangidayaw ken panangilunod. Kakabsatko, saan koma a kasta.”
Adu ti adda iti publiko ken personal a diskurso ita a dakes ti panggepda ken naulpit ti espirituda. Adu ti saritaan a bulgar ken naalas, uray kadagiti agtutubo. Daytoy a kita ti panagsasao ket “armas ti yaalsa” maibusor iti Dios, a “napno iti sabidong a makapatay.”
Ibilangyo ti sabali pay a pagarigan ti maysa a banag a kangrunaanna a nasayaat ngem agbalin a yaalsa maibusor kadagiti nadiosan a bilin—ti karera ti maysa a tao. Masarakan ti pudno a pannakapnek iti propesion, bokasion, wenno serbisio, ket magunggonaantayo amin iti naaramidan ken pinataud dagiti napasnek ken talentado a tattao iti adu a benneg ti panagregget.
Kaskasdi, posible a ti debosion iti karera ti agbalin a kapatgan a pokus ti biag ti maysa a tao. Agbalin a maikadua ti amin a banag, agraman ti aniaman nga ipaay ti Mangisalakan iti panawen ken talento ti maysa a tao. Para kadagiti lallaki ken babbai, ti panangilaksid kadagiti nainkalintegan a gundaway iti panagasawa, ti di pannakitipon ken panangitag-ay iti asawa, di panangaywan iti annak, wenno uray ti panangliklik iti bendision ken responsabilidad a panangpadakkel iti ubing para iti panagdur-as iti karera ket pagbalinenna ti nadayaw a gapuanan a porma ti yaalsa.
Sabali pay a pagarigan ti maipapan iti pisikal a kinataotayo. Ipalagip kadatayo ni Pablo a masapul nga idaydayawtayo ti Dios iti bagi ken espiritu ket daytoy a bagi ti templo ti Espiritu Santo, “nga inted ti Dios, ket saanyo a kukua ti bagiyo.” Gapuna, addaantayo iti nainkalintegan nga interes a mangbusbos iti panawen a mangaywan iti bagitayo agingga a kabaelantayo. Manmano kadatayo ti makadanon iti kangatuan a gapuanan a nakitatayo itay nabiit kadagiti atleta iti Olympic ken Paralympic, ket makapaspasar ti dadduma kadatayo kadagiti epekto ti edad, wenno ti inawagan ni Presidente M. Russell Ballard a “panaglukay ti pagkapet.”
Nupay kasta, patiek a maay-ayo ti Namarsua kadatayo no aramidentayo ti amin a kabaelantayo a mangaywan iti nakaskasdaaw a sagutna a pisikal a bagi. Maysa a pagilasinan ti iyaalsa ti panangdadael, panangtulaw, wenno panangabuso iti bagi, wenno di panangsurot iti nasalun-at a wagas a panagbiag. Kasta met, ti kinaubbaw ken ti panangayat unay iti pisikal a bagi, langa, wenno kawes ket mabalin a kita ti nakaro a yaalsa, a mangiturong iti maysa a tao nga agdayaw iti sagut ti Dios imbes nga iti Dios.
Kamaudiananna, ti panangikali iti armastayo ti yaalsa a maibusor iti Dios ket kaipapananna iti panangawis ti Nasantuan nga Espiritu, ikkaten ti nailubongan a kinatao, ken agbalin a “santo babaen ti pannubbot ni Cristo nga Apo.” Kaipapananna ti panangyun-una iti umuna a bilin iti biagtayo. Kaipapananna ti panangpalugod iti Dios nga agballigi. No ti ayattayo iti Dios ken ti determinasiontayo nga agserbi Kenkuana iti amin a bileg, panunot, ken pigsatayo ti pagrukodan a panghusgaantayo iti amin a banag ken pangngeddengtayo, naikalitayon dagiti armastayo ti yaalsa. Babaen iti parabur ni Cristo, pakawanento ti Dios dagiti basol ken yaalsatayo iti napalabas ken ikkatennanto ti mulit dagita a basol ken yaalsa iti puspusotayo. Inton agangay, ikkatennanto pay ti aniaman a tarigagay a dakes a kas ti inaramidna kadagiti Lamanite a napasurot iti napalabas. Kalpasanna, datayo met ket “saan[to] a pulos agikay.”
Mangyeg iti naisangsangayan a rag-o ti panangikalitayo kadagiti armas ti yaalsa. Iti amin a napasuroten iti Apo, “agkantatayo [iti kansion ti] manangsubbot nga ayat.” Pinasingkedan ti Nailangitan nga Amatayo ken ti Anakna, ti Mannubbottayo, ti awan patinggana a panagkumitda iti ultimo a ragsaktayo babaen ti kaindaklanan nga ayat ken sakripisio. Inaldaw a mapasarantayo ti ayatda. Sigurado a makasubadtayo babaen ti ayat ken kinamatalektayo. Sapay koma ta ikalitayo—iti kaunggan ti biagtayo—ti aniaman nga elemento ti yaalsa a maibusor iti Dios ket suktan dayta iti situtulok a puso ken situtulok a panunot. Iti nagan ni Jesucristo, amen.