Ti Imana a Nakasagana a Tumulong Kadatayo
No danonentayo ni Jesucristo a sipapammati, addanto a kanayon sadiay.
Idi ubingak pay, nagbakasionkami a sangapamiliaan iti maysa nga aplaya iti kosta ti nakayanakak a pagilian, ti Chile. Naragsakanak a nangbubos iti sumagmamano nga aldaw iti kalgaw a kaduak ti pamiliak. Naragsakanak pay ta impagarupko nga iti kamaudianan makikaduaak ket aramidek ti gagangay nga ar-aramiden ti dua a manongko iti danum a pagraragsakan.
Maysa nga aldaw, napan nagay-ayam dagiti manongko iti yan dagiti dadakkel a dalluyon, ket nariknak a dakkelakon a sumurot kadakuada. Bayat ti panagturongko iti lugar, naamirisko a dakdakkel dagiti dalluyon ngem iti panagkitak iti takdang. Pagammuan, naklaatak iti napardas nga immasideg kaniak a dalluyon. Kasla ti bileg ti nakaparsuaan ti nangsakup kaniak, ket naguyodak iti kaunggan ti baybay. Diak makita wenno marikna ti aniaman a reperensia a punto bayat ti pannakayanudko. Ket idi impagarupko a mabalin nga agpatinggan ti biagkon ditoy daga, nariknak ti maysa nga ima a nangguyod kaniak iti rabaw ti danum. Kamaudiananna, makitak ti init ken makaangesakon.
Nakita ti kabsatko a Claudio ti panangpadasko nga agtignay kas nataengan ket inispalnak. Saanak nga adayo iti takdang. Nupay saan nga adalem ti danum, nariribukannak ket diak naamiris a matulongak koma ti bagik. Imbaga ni Claudio a masapul nga agannadak, ken no kayatko, mabalinnak nga isuro. Iti laksid dagiti adu a danum a nainumko, napigpigsa ti panagpannakkel ken tarigagayko nga agbalin a dakkel nga ubing, ket kinunak, “Sigurado.”
Imbaga ni Claudio a kasapulak a labanan dagiti dalluyon; Imbagak iti bagik a sigurado a maabakak iti dayta a laban kontra iti kasla pader a danum.
Idi umas-asideg ti baro a dakkel a dalluyon, dagus a kinuna ni Claudio: “Kitaennak; kastoy ti aramidem.” Nagtaray ni Claudio nga agturong iti umay a dalluyon ket linangoyna daytoy sakbay a nagawan. Nasdaawak unay iti panaglangoyna isu a diak makita ti sumaruno nga umayen a dalluyon. Gapuna, manen, nairaremnak iti kaunggan ti baybay ket nayanudak. Sumagmamano a segundo kalpasanna, adda ima a nangtengngel iti imak, ket naguyodak manen iti rabaw ken angin. Ti apuy ti kinapannakkelko ket kumapkapuy.
Iti dayoy a gundaway, inawisnak ti kabsatko a makilangoy kenkuana. Kas iti awisna, simmurotak kenkuana, ket naggiddankami a naglangoy. Kasla parmekek ti karikrikut a karit. Sigurado a saan unay a nalaka dayta, ngem naaramidko, gapu iti tulong ken ulidan nga impakita ti kabsatko. Namindua nga inispalnak ti imana; impakita kaniak ti ulidanna no kasano a tamingek ti karitko ken agballigi iti dayta nga aldaw.
Inawisnatayo ni Presidente Russell M. Nelson nga agpanunot iti celestial, ket kayatko a suroten ti balakadna ken yaplikar daytoy iti estoriak iti kalgaw.
Ti Bileg ti Mangisalakan iti Kabusor
No agpanunottayo iti celestial, maawatantayo a maipasangotayo kadagiti karit a kasla dakdakkel ngem iti kabaelantayo a mangparmek kadagitoy. Bayat ti biagtayo iti daga, maipasangotayo kadagiti panangraut ti kabusor. Kas kadagiti dalluyon a nangparmek kaniak iti dayta nga aldaw ti kalgaw, mariknatayo nga awan ti bilegtayo ken kayattayon ti sumuko. Mabalin nga iduronnatayo dagita a “dakes a dalluyon” iti amin a suli. Ngem diyo liplipatan no siasino ti addaan bileg kadagita a dalluyon, ken kinapudnona, iti amin a banag. Isu ti Mangisalakantayo, ni Jesucristo. Adda bilegna a tumulong kadatayo iti tunggal nakalkaldaang a kasasaad wenno dakes a situasion. Uray no saantayo a marikna a nasingedtayo Kenkuana, matulongannatayo latta aniaman ti kasasaadtayo.
Bayat ti panangdanontayo Kenkuana nga addaan iti pammati, kanayonto nga adda Isuna, ket nakasagana ken situtulok a mangtengngel kadagiti imatayo ken mangguyod kadatayo nga ipan iti natalged a lugar.
Ti Mangisalakan ken ti Pagwadanna iti Ministering
No agpanunottayo ti celestial, bigbigentayo ni Jesucristo kas awan pakapilawanna nga ulidan ti ministerio. Adda pagtuladantayo iti nasantuan a kasuratan nga idi timmulong a kaduana dagiti disipulona iti maysa a tao a nagkasapulan iti tulong, pannakaispal, wenno bendision bayat ti panangyawatda kadagiti imada. Kas iti estoriak, ammok nga adda sadiay ti kabsatko, ngem saan nga umdas ti kaaddana sadiay para kaniak. Ammo ni Claudio a marigatanak, ket timmulong a nangilung-aw kaniak iti danum.
Sangpaminsan, ipagaruptayo a kasapulan laeng nga addatayo sadiay para iti maysa nga agkasapulan, ngem adu a panawen nga ad-adu pay ti maaramidantayo. Ti kaadda ti agnanayon a pannirigan ti makatulong kadatayo nga umawat iti paltiing tapno mangipaay iti naintiempuan a tulong kadagiti agkasapulan. Mabalintayo ti agpannuray iti pannarabay ken pammaregta ti Espiritu Santo a mangilasin no ania ti tulong a kasapulan, no temporal a suporta a kas iti liwliwa iti rikna, taraon, tulong kadagiti inaldaw nga aramid, wenno naespirituan a tarabay a pangtulong iti dadduma iti panagdaliasatda nga agsagana, agaramid, ken agdayaw kadagiti sagrado a katulaganda.
Nakasagana ti Mangisalakan a Mangispal Kadatayo
Idi ni Pedro, ti senior nga Apostol, “nagna iti rabaw ti danum, tapno mapan ken ni Jesus … nagbuteng; ket nangrugin a lumned,” kalpasanna “inyikkisna, a kunkunana, Apo, isalakannak.” Ammo ni Jesus ti pammati ni Pedro nga umasideg Kenkuana iti rabaw ti danum. Ammona met ti buteng ni Pedro. Segun iti salaysay, ni Jesus ket “dagus nga … inyunnatna ti imana, ket iniggamanna,” nga insaona ti sumaganad a balikas: “O sika a bassit ti pammatina, apay a nagduaduaka?” Dagiti balikasna ket saan a mangbabalaw ken ni Pedro no di mangipalagip nga Isu, ti Mesias, ket kaduana ken dagiti disipulonana.
No agpanunottayo ti celestial, awatentayo ti pammatalged iti pusotayo a ni Jesucristo ket pudno a Mangisalakantayo, Manangitandudotayo iti Ama, ken Mannubbottayo. Bayat ti panangaramattayo iti pammati Kenkuana, isalakannatayo manipud iti managbasol a kasasaadtayo, iti labes dagiti karit, kinakapuy, ken kasapulantayo ditoy temporal a biag, ken itedna kadatayo ti kadakkelan iti amin a sagut, a ti biag nga agnanayon.
Saan a Sumuko Kadatayo ti Mangisalakan
Saan a simmuko kaniak ti kabsatko iti dayta nga aldaw no di ket nagtultuloy tapno masursurok no kasano nga aramiden dayta iti bukodko. Nagtultuloy, uray no kasapulan dayta ti panangispalna kaniak iti mamindua. Nagtultuloy, uray no diak nagun-od dayta idi damo. Nagtultuloy tapno maparmekko dayta a karit ken agballigiak. No agpanunottayo ti celestial, mabigbigtayo nga addanto iti adu a gundaway ti Mangisalakantayo a mangipaay iti tulong no kayattayo ti agsursuro, agbalbaliw, mangparmek, mangdaer, wenno agballigi iti aniaman a mangyeg iti pudno ken agnanayon a ragsak iti biagtayo.
Dagiti Ima ti Mangisalakan
Ipalagip ti nasantuan a kasuratan ti agnanayon a simbolo ken kaipapanan dagiti ima ti Mangisalakan. Iti pangsubbot a sakripisiona, naduyok dagiti imana kadagiti lansa a mangipadeppa Kenkuana iti krus. Kalpasan ti Panagungarna, nagparang kadagiti disipulona iti naan-anay a bagi, ngem nagtalinaed dagiti lamma kadagiti imana a kas palagip iti awan patinggana a sakripisiona. Kanayon nga idiayana ti imana kadatayo, uray no ditayo makita wenno marikna dayta iti damo, gapu ta Isu ti pinili ti Nailangitan nga Amatayo nga agbalin a Mangisalakantayo, ti Mannubbot iti amin a sangkataw-an.
Matengngeltayo, ni Jay Bryant Ward
Ti Ima ti Dios, ni Yongsung Kim
No panunotek ti celestial, ammok a saantayo a mabaybay-an nga agmaymaysa iti daytoy a biag. Bayat a sanguentayo dagiti karit ken pannubok, ammo ti Nailangitan nga Amatayo dagiti kabaelantayo ken ammona a kabaelantayo nga ibturan wenno parmeken dagiti pakarigatantayo. Masapul nga aramidentayo ti pasettayo ken agturongtayo Kenkuana nga addaan pammati. Ti Ipatpategna nga Anak, ni Jesucristo, ti mangisalakan kadatayo ken kanayonto nga adda. Iti naganna, ti sagrado a nagan ni Jesucristo, amen.