Ti Tao a Kinasao ni Jehova
Ni Joseph Smith ket “nabendisionan a nanglukat iti maudi a dispensasion,” ken nabendisionantayo gapu ta inaramidna dayta.
Ti panggepko ita nga aldaw ken iti kanayon ket ti mangpaneknek ken ni Jesucristo, nga Isu ti Anak ti Dios, ti Namarsua ken Mangisalakan ti lubong, ti Manangispal ken Mannubbottayo. Gapu ta “dagiti kangrunaan a pagbatayan ti relihiontayo ket ti pammaneknek dagiti Apostol ken Propeta, maipanggep ken ni Jesucristo,” ita nga aldaw ibinglayko ti pannakaammok ken pammaneknekko iti Mangisalakan a napabileg ken napauneg babaen ti biag ken dagiti pannursuro ti maysa a kangrunaan nga apostol ken propeta.
Ti Pangrugian ti Kinasirib
Iti agsapa ti napintas a nalawag nga aldaw iti panagsusulbod ti 1820, simrek ti 14 ti tawenna a ni Joseph Smith iti maysa a kakaywan iti asideg ti pagtaengan ti pamiliana tapno agkararag maipapan kadagiti basolna ken agdamag no ania a simbaan ti pagkamenganna. Ti napasnek a kararagna, a naidaton iti natibker a pammati, ket nangngeg dagiti kabibilgan a puersa iti uniberso, agraman ti Ama ken ti Anak. Ken ti sairo. Tunggal maysa kadagitoy ti interesado unay iti dayta a kararag ken iti dayta a barito.
Ti aw-awagantayo itan nga Umuna a Parmata ti nangrugian iti pannakaisubli ti amin a bambanag iti daytoy maudi a dispensasion. Ngem para ken Joseph, ti padasna ket personal ken panagsagana pay. Ti laeng kayatna ket ti pammakawan ken panangiturong. Inted kenkuana ti Apo ti agpada. Ti naibaga “a saanak a kumameng iti ania man [kadagiti simbaan]” ket maysa a bilin. Dagiti balikas a, “Napakawanen dagiti basbasolmo.” ket manangsubbot.
Kadagiti amin a kinapudno a masursurotayo iti Umuna a Parmata, ti kangrunaan a nasursuro ni Joseph ket, “Napaneknekak a pudno ti pammaneknek ni Santiago—a ti tao nga agkurang iti kinasirib ket mabalinna ti dumawat iti Dios, ket saanto a mapaidaman.”
Kas kinuna ti maysa nga eskolar: “Ti kapatgan a mensahe ti Umuna a Parmata ita ket ti pannakaammo a ti kababalin ti Dios mangted iti sirib kadagidiay awanan iti dayta. … Ti Dios a nagpakita ken ni Joseph Smith iti sagrado a kakaywan isu ti Dios a mangsungbat kadagiti agtutubo iti panawen ti riribuk.”
Ti padas ni Joseph iti kakaywan ti nangted iti panagtalekna nga agkiddaw iti pammakawan ken panangiturong iti nabati pay a panagbiagna. Ti padasna ti nangted met kaniak iti panagtalek a dumawat iti pammakawan ken panangiturong iti intero a panagbiagko.
Kanayon a Panagbabawi
Idi Septiembre 21, 1823, sipapasnek nga inkararag ni Joseph ti pammakawan, ken nagtalek a gapu iti padasna iti kakaywan tallo a tawen kasakbayanna, sumungbat manen ti langit. Ket kasta ti napasamak. Imbaon ti Apo ti anghel a Moroni tapno isurona ni Joseph ken ipakaammona ti maysa a kadaanan a kasuratan nga ipatarusna babaen ti sagut ken pannakabalin ti Dios—ti Libro ni Mormon.
Agarup 13 a tawen kalpasan dayta, nagparintumeng da Joseph ken Oliver Cowdery iti napasnek, naulimek a panagkararag iti kabarbaro a naidaton a Kirtland Temple. Ditayo ammo no ania ti inkararaganda, ngem nalabit a karaman ti panagkiddawda iti pammakawan, gapu ta, idi timmakderda, nagparang ti Mangisalakan ket impakdaarna, “Adtoy, napakawankayon kadagiti basolyo; nadaluskayon iti imatangko.”
Kadagiti bulan ken tawen kalpasan daytoy a padas, nagbasol manen da Joseph ken Oliver. Ket manen. Ngem iti dayta a kanito, para iti dayta a kanito, kas sungbat iti panagpakaasida ken kas panagsagana iti nadayag a pannakaisubli dagiti tulbek ti priesthood, inaramid ni Jesus ida nga awan basolda.
Ti biag ni Joseph a kanayon a managbabawi ti mangmangted kaniak iti panagtalek nga “umasideg iti trono ti parabur ti Dios ta, magun-od[ko] ti asi.” Naadalko a ni Jesucristo ket “pudno a manangpakawan.” Saanna a mision wenno kababalin ti mangkondena. Immay Isuna tapno mangisalakan.
Panagsaludsod iti Apo
Kas paset ti naikari a “pannakaisubli ti amin a banag,” inyeg ti Apo, babaen ken Joseph Smith, ti Libro ni Mormon ken dadduma pay a paltiing a naglaon iti pakabuklan ti ebangheliona. Naan-anay a nailawlawag dagiti napateg a kinapudno bayat ti maulit-ulit a panagsaludsod ni Joseph iti panangiturong ti Apo. Ibilangmo dagiti sumaganad:
-
Nagtagilasag ken nagtagitulang ti Ama “a marikna a kas iti tao.”
-
Sinagaba ni Jesus saan laeng dagiti basoltayo ngem dagiti pay saksakit, rigrigat, ken sagubanittayo.
-
Nakaro unay ti Pannubbotna isu a nakaigapuan ti panagdara iti tunggal teterremanna.
-
Babaen ti parabur maisalakantayo “kalpasan ti amin a maaramidantayo.”
-
Bayat ti yaasidegtayo ken Cristo, saanna laeng a pakawanen ti basbasoltayo, no di ket baliwanna pay mismo ti kinataotayo “nga awanen ti tarigagaytayo nga agaramid iti dakes.”
-
Kanayon a bilinen ni Cristo dagiti taona a mangbangon kadagiti templo, a pangipakitaanna iti bagina kadakuada ken ipaayanna ida iti bileg nga aggapu iti ngato.
Paneknekak a pudno ken kasapulan amin dagitoy a banag. Paset laeng dagitoy ti pakabuklan nga insubli ni Jesucristo babaen ken ni Joseph Smith kas sungbat iti maulit-ulit a kiddaw ni Joseph a panangiturong.
Agtultuloy a Panagdur-as iti Daytoy a Pagarian
Idi 1842, insurat ni Joseph dagiti nakaskasdaaw a banag a mapasamakto iti daytoy maudi a dispensasion. Impakdaarna a bayat ti aldawtayo, “agkaykaysanto ti nailangitan ken naindagaan a priesthood, tapno mangitungpal kadagitoy naindaklan a panggep; ket bayat ti panagkaykaysatayo iti maymaysa a panggep, a mangituloy a mangpadur-as iti pagarian ti Dios, saan a nasadut a mangnamnama ti nailangitan a Priesthood.”
Iti gayyemna a ni Benjamin Johnson, kinuna ni Joseph, “Benjamin, [no matayak] saanakto nga adayo kenka, ket iti sabali a bangir ti belo, agtultuloyakto latta a makipagtrabaho kenka, ken addaan iti dakdakkel a bileg, a mangituloy a mangpadur-as iti daytoy a pagarian.”
Idi Hunio 27, 1844, napapatay da Joseph Smith ken ti kabsatna a ni Hyrum. Naitanem ti bangkay ni Joseph, ngem agtultuloy ti pammaneknekna a mangaring iti sangalubongan ken iti kararuak.
“Ta nakakitaak iti parmata; ammok dayta, ken ammok nga ammo ti Dios dayta, ket diak mapaglikudan.”
“Diak pulos imbaga kadakayo a perpektoak; ngem awan ti biddut kadagiti paltiing nga insurok.”
“Dagiti kangrunaan a pagbatayan ti relihiontayo ket ti pammaneknek dagiti Apostol ken Propeta, maipanggep ken Jesucristo, a natay, naitanem, ken nagungar manen iti maikatlo nga aldaw, ken immuli sadi langit; ket amin a dadduma a banag ket karaman laeng kadagitoy, a mainaig iti relihiontayo.”
Ti naisao ken ni Juan Bautista ket mabalin met a maisao ken Joseph Smith: “Adda maysa a lalaki nga imbaon ti Dios, nga agnagan iti [Joseph]. … “Saan nga isu dayta a Silaw, ngem naibaon tapno paneknekanna ti dayta a Silaw” … “tapno mangngegda ti mensahe ket mamatida.”
Mamatiak. Mamatiak ken masiguradok a ni Jesus isu ti Cristo, ti Anak ti sibibiag a Dios. Paneknekak a ti sibibiag a Dios isu ti managayat nga Amatayo. Ammok daytoy agsipud ta ti timek ti Apo ti nagsao kaniak, ken kasta met ti timek dagiti katulonganna, dagiti apostol ken propeta, a pakairamanan ken mangrugi ken ni Joseph Smith.
Paneknekak a ni Joseph Smith ket maysa idi ken maysa a propeta ti Dios, maysa a saksi ken katulongan ni Apo Jesucristo. Isu ket “nabendisionan a nanglukat iti maudi a dispensasion,” ket mabendisionantayo gapu ta inaramidna dayta.
Binilin ti Apo ni Oliver ken datayo amin, “Agtakderkayo iti sibay ti katulongak a ni Joseph, a simamatalek.” Paneknekak nga agtaktakder ti Apo iti sibay ti katulonganna a ni Joseph ken ti Pannakaisubli a naaramid babaen kenkuana.
Ni Joseph Smith ket paset itan dayta nailangitan a priesthood a dinakamatna. Kas inkarina iti gayyemna, saan nga adayo isuna kadatayo, ket iti sabali a bangir ti belo, makipagtrabtrabaho pay laeng kadatayo, ken addaan iti dakdakkel a bileg, a mangitultuloy a mangpadur-as iti daytoy a pagarian. Addaan iti rag-o ken panagyaman, itag-ayko ti timekko a “mangidaydayaw iti tao a kinasao ni Jehova.” Ken kangrunaanna, maidaydayaw ni Jehova, a nakisao iti dayta a tao! Iti nagan ni Jesucristo, amen.