“Mabuhi Man Ko o Mamatay,” kapitulo 9 sa Mga Santos: Ang Istorya sa Simbahan ni Jesukristo sa Ulahing mga Adlaw, Volume 1, Ang Sumbanan sa Kamatuoran, 1815–1846 (2018)
Kapitulo 9: “Mabuhi Man Ko o Mamatay”
Kapitulo 9
Mabuhi Man o Mamatay
Sa Dominggo human maorganisar ang simbahan, misangyaw si Oliver ngadto sa pamilyang Whitmer ug sa ilang mga higala sa Fayette. Daghan nila ang misuporta sa paghubad sa Basahon ni Mormon apan wala pa magpasakop sa simbahan. Human mamulong si Oliver, unom ka tawo ang mihangyo niya nga bunyagan sila diha sa duol nga linaw.1
Samtang nagkadaghan ang mga tawo nga miapil sa bag-ong simbahan, ang kabug-aton sa sugo sa Ginoo sa pagdala sa ebanghelyo ngadto sa kalibutan nakapabalaka ni Joseph. Namantala na niya ang Basahon ni Mormon ug naorganisar ang simbahan sa Ginoo, apan hinay kaayo ang halin sa libro ug kadtong nagtinguha nga mabunyagan kasagaran iyang mga higala ug mga paryente. Ug daghan pa kaayo ang kinahanglang makat-unan ni Joseph mahitungod sa langit ug yuta.
Ang mga tawo nga mipasakop sa simbahan sa kasagaran miabut nga nagtinguha sa mga gasa sa Espiritu ug uban nga mga milagro nga ilang nabasahan diha sa Bag-ong Tugon.2 Apan ang gipahiuli nga ebanghelyo misaad sa mga tumutuo og mas maayo pa kay sa mga katingalahan ug mga timailhan. Si Benjamin, usa ka maalamon nga propeta ug hari diha sa Basahon ni Mormon, mitudlo nga kon ang mga tawo monunot sa Balaang Espiritu, ilang masalikway ang ilang makasasala nga kinaiya ug mamahimong mga santos pinaagi sa Pag-ula ni Jesukristo.3
Alang ni Joseph, ang hagit karon mao kon unsaon sa pagpauswag sa buhat sa Ginoo. Siya ug si Oliver nahibalo nga kinahanglan silang mosangyaw og paghinulsol sa tanang katawhan. Ang umahan andam na nga anihon, ug ang bili sa matag kalag mahinungdanon sa mga mata sa Dios. Apan unsaon man sa duha ka batan-ong apostoles—usa ka mag-uuma ug usa ka magtutudlo, ang duha baynte pa kapin—sa pagpauswag sa ingon ka mahinungdanon nga buhat?
Ug unsaon man sa usa ka gamay nga simbahan sa probinsya sa New York nga molambo gikan sa ubos nga sinugdanan niini ug motubo aron makapuno sa tibuok kalibutan?
Human sa mga bunyag sa Fayette, gisugdan ni Joseph ang syento saysentay uno ka kilometro nga biyahe balik sa iyang umahan sa Harmony. Bisan busy kaayo siya sa bag-ong simbahan, kinahanglan dayon niyang tamnan ang iyang umahan kon gusto niya nga dunay maayong ani panahon sa tinglarag. Ang iyang balayranan sa amahan ni Emma sa umahan nalangay na, ug kon mapakyas ang iyang pananom, kinahanglan siyang mangita og laing paagi aron mabayran ang iyang utang.
Sa iyang pagpauli, mihapit si Joseph sa umahan ni Joseph ug Polly Knight sa Colesville, New York. Ang mga Knight dugay nang nagsuporta kaniya, apan wala pa gihapon sila magpasakop sa simbahan. Si Joseph Knight ilabi na gustong mobasa sa Basahon ni Mormon sa dili pa niya dawaton ang bag-ong tinuohan.4
Mipundo si Joseph sa Colesville sulod sa pipila ka adlaw, nagsangyaw ngadto sa mga Knight ug sa ilang mga higala. Si Newel Knight, usa sa mga anak ni Joseph ug Polly, kanunay nga nakig-istorya sa propeta mahitungod sa ebanghelyo. Usa ka adlaw, gidapit siya ni Joseph sa pag-ampo diha sa usa ka miting, apan miingon si Newel nga mas ganahan siyang mag-ampo nga mag-inusara sa kakahoyan.
Pagkasunod buntag, miadto si Newel sa kakahoyan ug misulay sa pag-ampo. Usa ka dili maayong pagbati ang miabut kaniya, ug misamot kini sa dayon na niyang pagpauli. Sa pag-abut niya sa iyang balay, ang pagbati grabe na kaayo nga iyang gihangyo ang iyang asawa, si Sally, sa pagkuha sa propeta.
Dali nga miadto si Joseph kang Newel ug nakit-an ang mga sakop sa pamilya ug mga silingan nga mahadlukon nga nagtan-aw samtang ang nawong, mga bukton, ug mga tiil sa batan-on mikirig-kirig. Pagkakita ni Newel kang Joseph, misyagit siya, “Papahawaa ang yawa!”
Wala pa sukad makasulay si Joseph nga mobadlong sa yawa o moayo og tawo, apan nasayud siya nga si Jesus misaad og gahum ngadto sa Iyang mga disipulo sa pagbuhat niini. Dali nga milihok, gigunitan niya ang kamot ni Newel. “Sa pangalan ni Jesukristo,” miingon siya, “palayo kaniya.”
Pagkahuman dayon og sulti ni Joseph, ang pagkirig-kirig nahunong. Nalup-og si Newel sa salog, gikapoy apan wala maunsa, hinayng nagsulti nga nakakita siya sa yawa nga mibiya sa iyang lawas.
Nahingangha ang mga Knight ug ang ilang mga silingan sa gibuhat ni Joseph. Gitabangan sila sa pag-alsa ni Newel ngadto sa higdaanan, misulti si Joseph nila nga mao kadto ang unang milagro nga nahimo diha sa simbahan.
“Gibuhat kadto sa Dios,” mipamatuod siya, “ug pinaagi sa gahum sa pagkadiosnon.”5
Gatusan ka kilometro padulong sa kasadpan, usa ka mag-uuma nga ginganlan og Parley Pratt mibati sa Espiritu nga nag-awhag kaniya sa pagbiya sa iyang panimalay ug pamilya aron sa pagsangyaw sa mga panagna ug espiritwal nga mga gasa nga iyang nakita diha sa Biblia. Gibaligya niya ang iyang umahan nga alkanse ug misalig nga ang Dios mopanalangin kaniya tungod kay gihatag niya ang tanan alang ni Kristo.
Dala ang pipila lang ka mga saput ug kwarta nga igo ra sa ilang pagbiyahe, siya ug ang iyang asawa, si Thankful, mibiya sa ilang panimalay ug mipadulong sa silangan aron sa pagbisita sa pamilya sa dili pa siya mosugod sa pagsangyaw. Hinoon, samtang mibiyahe sila agi sa kanal, milingi si Parley kang Thankful ug mihangyo kaniya sa pagpadayon nga wala siya. Gibati niya ang Espiritu nga naggiya kaniya sa pagkanaog gikan sa sakayan.
“Moapas ra ko dayon,” misaad siya. “Duna koy buluhaton niini nga rehiyon.”6
Minaug si Parley ug milakaw og dise-sais ka kilometro padulong sa kaumahan, diin miabut siya sa balay sa usa ka deacon nga Baptist kinsa misulti niya mahitungod sa usa ka katingalahan nga bag-ong libro nga iyang naangkon. Nangangkon kini nga usa ka karaang rekord, miingon ang tawo, nga gihubad gikan sa bulawan nga mga palid uban sa tabang sa mga anghel ug mga panan-awon. Wala madala sa deacon ang libro, apan misaad siya nga iya kining ipakita ni Parley pagkasunod adlaw.
Pagkasunod buntag, mibalik si Parley sa balay sa deacon. Mahinamon siyang miabli niini ug mibasa sa ulohang pahina niini. Dayon gitan-aw niya ang luyo sa libro ug gibasa ang mga pagpamatuod sa pipila ka mga saksi. Nadani siya sa mga pulong, ug gisugdan niya ang libro gikan sa sinugdanan. Milabay ang mga oras, apan dili siya makahunong sa pagbasa. Hasol na ang pagkaon ug pagkatulog. Diha kaniya ang Espiritu sa Ginoo, ug nasayud siya nga ang libro tinuod.7
Wala madugay miadto si Parley sa duol nga barangay sa Palmyra, determinado nga mahimamat ang tighubad sa libro. Ang mga tawo sa lungsod mitudlo kaniya ngadto sa usa ka umahan pipila ka kilometro unahan sa dalan. Samtang naglakaw si Parley padulong niana nga direksyon, nakakita siya og tawo ug nangutana siya kon asa niya makita si Joseph Smith. Miingon ang tawo niya nga nagpuyo si Joseph sa Harmony, syento saysentay uno ka kilometro padulong sa habagatan, apan mipaila siya sa iyang kaugalingon nga si Hyrum Smith, ang igsoon sa propeta.
Nag-istorya sila hapit tibuok gabii, ug mipamatuod si Hyrum kabahin sa Basahon ni Mormon, sa pagpahiuli sa priesthood, ug sa buhat sa Ginoo sa ulahing mga adlaw. Pagkasunod buntag, dunay mga sabut sa pagsangyaw nga angayng tumanon si Parley, mao nga gihatagan siya ni Hyrum og kopya sa libro ug gipalakaw.
Giablihan ni Parley ang libro sa sunod nga nakahigayon siya ug nadiskubrihan, sa iyang kalipay, nga ang nabanhaw nga Ginoo mibisita sa katawhan sa karaang Amerika ug mitudlo kanila sa Iyang ebanghelyo. Ang mensahe sa libro, nakaamgo si Parley, mas bililhon pa kay sa tanang katigayunan sa kalibutan.
Sa dihang ang iyang buluhaton sa pagsangyaw natapos na, mibalik si Parley sa balay sa mga Smith. Giabi-abi siya og balik ni Hyrum ug gidapit siya sa pagbisita sa umahan sa mga Whitmer, diin iyang mahimamat ang nagkadako nga kongregasyon sa mga miyembro sa simbahan.
Naghinam-hinam nga makat-on pa, gidawat ni Parley ang imbitasyon. Paglabay sa pipila ka adlaw, gibunyagan siya.8
Sa hinapos nga bahin sa Hunyo 1830, mibiyahe si Emma uban ni Joseph ug Oliver padulong sa Colesville. Ang mga istorya mahitungod sa milagro ni Joseph niana nga tingpamulak mikaylap sa tibuok dapit, ug karon ang mga Knight ug uban pa nga mga pamilya gusto nga magpamiyembro sa simbahan.
Andam na usab si Emma nga magpabunyag. Sama sa mga Knight, mituo siya sa gipahiuli nga ebanghelyo ug sa propetikanhon nga tawag sa iyang bana, apan wala pa siya moapil sa simbahan.9
Human moabut sa lungsod sa Colesville, nakigtambayayong si Joseph sa uban sa pag-dam sa duol nga sapa aron makapahigayon sila og miting sa bunyag pagkasunod adlaw. Hinoon, pagkabuntag, nadiskubrihan nila nga dunay miguba sa dam pagkagabii aron dili madayon ang mga bunyag.
Nasagmuyo, mipahigayon hinoon sila og miting sa adlaw nga Igpapahulay, ug misangyaw si Oliver mahitungod sa bunyag ug sa Espiritu Santo. Human sa wali, usa ka lokal nga ministro ug pipila ka mga miyembro sa iyang kongregasyon mibungkag sa miting ug misulay sa pagbitad palayo sa usa sa mga tumutuo.
Pamilyar na kaayo si Emma sa oposisyon batok ni Joseph ug sa iyang mensahe. Ang ubang tawo mitawag kaniya nga mangingilad ug miakusar niya nga nangwarta sa iyang mga sumusunod. Ang uban mibugal-bugal sa mga tumutuo, mitawag kanila nga “mga Mormonite.”10 Nagmabinantayon sa kasamok, si Emma ug ang uban mibalik sa sapa sayo nianang pagkasunod adlaw ug miayo sa dam. Sa dihang igo na ang giladmon sa tubig, miubog si Oliver sa tunga-tunga niini ug mibunyag kang Emma, Joseph ug Polly Knight, ug napulo pa ka mga tawo.
Atol sa pagbunyag, dunay pipila ka mga tawo nga nagbarug sa daplin sa sapa, nga dili kaayo layo, ug miyaga-yaga sa mga tumutuo. Si Emma ug ang uban misulay sa pagbaliwala kanila, apan sa dihang ang grupo mipauli na ngadto sa umahan sa mga Knight, ang mga tawo misunod, nagsyagit nga nanghulga sa propeta diha sa dalan. Sa balay sa mga Knight, gusto ni Joseph ug Oliver nga kumpirmahan ang bag-ong nabunyagan nga mga babaye ug lalaki, apan ang grupo sa mga nagyaga-yaga diha sa gawas nahimong saba nga pundok sa mga manggugubot nga miabot na sa mga singkwenta ka tawo.
Nabalaka nga basin atakihon sila, ang mga tumutuo miikyas padulong sa silingan nga balay, nanghinaut nga mahuman sa kalinaw ang mga pagkumpirma. Apan sa wala pa nila mapahigayon ang mga ordinansa, usa ka konstable midakop ni Joseph ug midala niya sa bilanggoan kay maoy hinungdan sa kasamok sa komunidad tungod sa pagsangyaw sa Basahon ni Mormon.
Migahin si Joseph og usa ka gabii sa bilanggoan, dili sigurado kon ang panon sa mga manggugubot modakop niya ug mobuhat sa ilang mga hulga. Si Emma, sa laing bahin, mabalak-on nga nagpaabut sa balay sa iyang igsoong babaye samtang siya ug ang ilang mga higala sa Colesville nag-ampo nga buhian nga luwas si Joseph.11
Sulod sa duha ka adlaw, gihusay sa korte si Joseph ug nakita nga walay sala, apan gidakop ug gihusay na usab sa sama nga mga pasangil. Human sa iyang ikaduhang husay gibuhian siya, ug siya ug si Emma mibalik ngadto sa ilang umahan sa Harmony nga wala pa makumpirmahi isip mga miyembro sa simbahan si Emma ug ang mga Santos sa Colesville.12
Sa ilang panimalay, misulay na usab si Joseph sa pagtrabaho sa iyang umahan, apan ang Ginoo mihatag kaniya og bag-o nga pagpadayag kon unsaon niya paggahin ang iyang oras. “Ikaw mohalad sa imong tanan nga pag-alagad ngadto sa Zion,” mideklarar ang Ginoo. “Sa temporal nga mga paghago ikaw dili makabaton og kusog, kay kini dili imong balaan nga tawag.” Gisultihan si Joseph nga tamnan ang iyang umahan ug dayon molakaw aron sa pagkumpirma sa bag-ong mga miyembro sa New York.13
Ang pagpadayag naghatud og kawalay kasiguroan sa kinabuhi ni Emma. Unsaon nila pagpangita og kapanginabuhian kon ipahinungod ni Joseph ang tanan niyang panahon sa mga Santos? Ug unsa man ang iyang buhaton samtang si Joseph nagserbisyo sa simbahan sa layo? Magpabilin ba siya diha sa panimalay, o gusto ba sa Ginoo nga mouban siya kang Joseph? Ug kon gusto man Niya, unsa man ang iyang tahas diha sa simbahan?
Nasayud sa tinguha ni Emma alang sa giya, ang Ginoo namulong ngadto kaniya sa usa ka pagpadayag nga gihatag pinaagi ni Joseph. Gipasaylo Niya siya sa iyang mga sala ug mitawag kaniya nga “pinili nga babaye.” Gisugo Niya siya sa pag-uban ni Joseph sa iyang mga biyahe ug misaad, “Ikaw i-orden pinaagi sa iyang mga kamot sa pagpatin-aw sa mga kasulatan, ug pag-awhag sa simbahan.”
Gihupay usab Niya ang iyang mga kahadlok mahitungod sa ilang panalapi. “Ikaw kinahanglan dili mahadlok,” mipaniguro Siya kaniya, “kay ang imong bana motabang kanimo.”
Ang Ginoo dayon misugo niya sa pagpili og sagrado nga mga himno alang sa simbahan. “Kay ang akong kalag mahimuot sa awit sa kasingkasing,” miingon Siya.14
Wala madugay human sa pagpadayag, si Joseph ug Emma mibiyahe ngadto sa Colesville, diin si Emma ug ang mga Santos didto nakumpirmahan na gayud. Samtang ang bag-ong mga miyembro midawat sa gasa sa Espiritu Santo, ang Espiritu sa Ginoo mipuno sa kwarto. Ang tanan nagmaya ug midayeg sa Dios.15
Sa wala madugay niana nga ting-init, naimpas ni Joseph ug Emma ang ilang umahan uban sa tabang sa mga higala ug mibalhin ngadto sa Fayette aron makagahin si Joseph og dugang nga panahon sa simbahan.16 Hinoon, human sa ilang pag-abut, ilang nasayran nga si Hiram Page, usa sa Walo ka mga Saksi ug usa ka teacher sa Aaronic Priesthood, misugod sa pagtinguha og pagpadayag alang sa simbahan pinaagi sa unsay iyang gituohan nga bato sa manalagna.17 Daghang mga Santos, lakip ni Oliver ug ubang mga sakop sa pamilyang Whitmer, nagtuo nga gikan sa Dios kini nga mga pagpadayag.18
Nasayud si Joseph nga nag-atubang siya og usa ka krisis. Ang mga pinadayag ni Hiram misunod sa pinulongan sa kasulatan. Namulong kini mahitungod sa pag-establisar sa Zion ug sa pag-organisar sa simbahan, apan usahay misukwahi kini sa Bag-ong Tugon ug sa mga kamatuoran nga gipadayag sa Ginoo pinaagi ni Joseph.
Dili sigurado kon unsay angayang buhaton, nagpulaw si Joseph sa pag-ampo usa ka gabii, nangayo og giya. Nakasinati na siya og oposisyon kaniadto, apan dili gikan sa iyang mga higala. Kon kusganon siyang molihok batok sa mga pinadayag ni Hiram, mahimong mapasakitan niya kadtong mituo niini o makuhaan og kadasig ang matinud-anong mga Santos sa pagtinguha og pinadayag sa ilang kaugalingon.19 Apan kon dili niya ipanghimaraut ang sayop nga mga pagpadayag, mahimong makuhaan ang pagsalig sa mga tawo sa awtoridad sa pulong sa Ginoo ug mobahin-bahin sa mga Santos.
Human sa daghang mga oras nga walay tulog, nakadawat si Joseph og pagpadayag nga gitumong ngadto ni Oliver. “Walay usa nga itudlo sa pagdawat og mga sugo ug mga pagpadayag niini nga simbahan gawas sa akong sulugoon nga si Joseph Smith,” mideklarar ang Ginoo, “kay ang tanan nga mga butang kinahanglan gayud himoon sa kahusay, ug pinaagi sa pag-uyon sa tanan diha sa simbahan.” Gisugo sa Ginoo si Oliver sa pagtudlo niini nga baruganan ngadto ni Hiram.
Ang pinadayag dayon mitawag ni Oliver sa pag-adto sa sobra usa ka libo ka kilometro padulong sa kasadpan nga bahin sa Estados Unidos aron sa pagsangyaw sa gipahiuli nga ebanghelyo ngadto sa mga American Indian, kinsa mao ang mga nahibilin sa balay ni Israel. Miingon ang Ginoo nga ang siyudad sa Zion pagatukuron duol niini nga katawhan, nga susama gayud sa saad sa Basahon ni Mormon nga ang Dios moestablisar sa Bag-ong Jerusalem sa kontinente sa Amerika sa wala pa ang Ikaduhang Pag-anhi ni Kristo. Wala Niya gisulti ang eksakto nga dapit sa siyudad, apan misaad Siya nga ipadayag kana nga impormasyon sa dili madugay.20
Paglabay sa pipila ka adlaw, sa usa ka komperensya sa simbahan, gisalikway sa mga Santos ang mga pinadayag ni Hiram ug nagkahiusa nga mipaluyo ni Joseph isip ang bugtong tawo nga makadawat og pagpadayag alang sa simbahan.21
Gitawag sa Ginoo si Peter Whitmer Jr., Ziba Peterson, ug Parley Pratt sa pagkuyog ni Oliver sa misyon ngadto sa Kasadpan.22 Si Emma ug ubang mga babaye, sa kasamtangan, misugod sa paghimo og mga sinina alang sa mga misyonaryo. Nagtrabaho og dugay matag adlaw, gilambod nila ang mga balahibo sa karnero aron mahimong hilo, gilala o gigansilyo ang hilo aron mahimong panapton, ug gitahi ang panapton og tagsa-tagsa.23
Bag-ohay lang nga nakabalik si Parley sa Fayette uban ni Thankful human ipaambit ang ebanghelyo kaniya ug sa ubang mga sakop sa iyang pamilya. Sa dihang mibiya siya padulong sa Kasadpan, mitipon si Thankful kang Mary Whitmer, kinsa malipayong miabi-abi kaniya sa iyang panimalay.
Sa pagpadulong sa Missouri, nagplano si Parley nga magdala og ubang mga misyonaryo ngadto sa estado sa Ohio, diin nagpuyo ang iyang kanhi pastor, si Sidney Rigdon. Nanghinaut si Parley nga mainteresado siya sa ilang mensahe.24
Nianang sama nga ting-init, sa usa ka lungsod nga duha ka adlaw biyahion gikan sa Fayette, nakita ni Rhoda Greene si Samuel Smith, ang igsoon sa propeta, diha sa iyang pultahan. Nahimamat na ni Rhoda si Samuel sa sayo nianang tuiga sa dihang mibilin siya og kopya sa Basahon ni Mormon sa iyang balay. Ang iyang bana, si John, usa ka pabalhin-balhin nga tigsangyaw sa laing tinuohan, ug nagtuo si John nga binuang lang ang libro, apan misaad siya nga iya kining dad-on sa iyang pagsangyaw ug kolektahon ang mga ngalan sa tanan nga interesado sa mensahe niini.
Gipasulod ni Rhoda si Samuel ug gisultihan niya nga hangtud nianang puntoha walay tawo nga mipakita og interes sa Basahon ni Mormon. “Kinahanglan nimong kuhaon ang libro,” miingon siya. “Morag dili interesado si Mr. Greene nga mopalit niini.”
Gikuha ni Samuel ang Basahon ni Mormon ug mobiya na unta sa dihang miingon si Rhoda nga gibasa niya kini ug ganahan siya niini. Mihunong si Samuel. “Akong ihatag nimo kini nga libro,” miingon siya, nga giuli ang kopya. “Ang Espiritu sa Dios nagdili kanako sa pagkuha niini.”
Napuno sa emosyon si Rhoda samtang gikuha niya og balik ang basahon. “Hangyoa ang Dios nga hatagan ka og pagpamatuod sa katinuod sa buhat,” miingon si Samuel, “ug mobati ka og mainiton nga pagbati sa imong dughan, nga mao ang Espiritu sa Dios.”
Sa wala madugay, human nga miuli na ang iyang bana, misulti si Rhoda kaniya mahitungod sa pagbisita ni Samuel. Sa pagsugod, nagpanagana si John nga mag-ampo mahitungod sa libro, apan gikombinser siya ni Rhoda nga mosalig sa saad ni Samuel.
“Nasayud ko nga dili siya mosulti og bakak,” miingon siya. “Usa siya sa maayo kaayo nga mga tawo nga akong nakaila.”
Si Rhoda ug John nag-ampo mahitungod sa libro ug nakadawat og pagpamatuod sa katinuod niini. Gipaambit dayon nila kini sa ilang pamilya ug mga silingan, lakip ang manghud ni Rhoda nga si Brigham Young ug iyang higala nga si Heber Kimball.25
Pagka-tinglarag, ang trayntay otso anyos nga si Sidney Rigdon matinahurong naminaw samtang si Parley Pratt ug ang iyang tulo ka kauban mipamatuod kabahin sa usa ka bag-ong buhat sa kasulatan, ang Basahon ni Mormon. Apan dili interesado si Sidney. Sulod sa katuigan, giawhag niya ang katawhan diha ug libut sa barangay sa Kirtland, Ohio, nga mobasa sa Biblia ug mobalik ngadto sa mga baruganan sa simbahan sa Bag-ong Tugon. Ang Biblia kanunay nga naggiya sa iyang kinabuhi, gisultihan niya ang mga misyonaryo, ug igo na kini.26
“Ikaw ang nagdala sa kamatuoran ngari kanako,” mipahinumdom si Parley kang Sidney. “Mohangyo ako karon kanimo isip higala sa pagbasa niini alang kanako.”27
“Ayaw pakiglalis kanako mahitungod niini,” miinsister si Sidney. “Apan basahon nako ang imong libro ug akong tan-awon kon sa unsang paagi ang mga pagtulun-an niini may kalabutan ngadto sa ako nang gituohan.”28
Mihangyo si Parley kang Sidney kon mahimo ba silang mosangyaw ngadto sa iyang kongregasyon. Bisan kon maduha-duhaon siya sa ilang mensahe, gitugutan sila ni Sidney.
Human mibiya ang mga misyonaryo, mibasa si Sidney og pipila ka bahin sa libro ug nakita nga dili siya makalimud sa kamatuoran niini.29 Sa dihang si Parley ug Oliver nagsangyaw na sa iyang kongregasyon, wala siyay tinguha nga pasidan-an ang mga tawo batok sa libro. Sa dihang mibarug siya aron mamulong diha sa katapusan sa miting, gikutlo niya ang Biblia.
“Sulayi ninyo ang tanang butang,” miingon siya, “sagupa ninyo ang maayo.”30
Apan nagpabiling dili sigurado si Sidney kon unsay buhaton. Ang pagdawat sa Basahon ni Mormon nagpasabut nga mawad-an siya sa iyang trabaho isip usa ka pastor. Aduna siyay maayo nga kongregasyon, ug mihatag sila kaniya, sa iyang asawa, si Phebe, ug sa ilang unom ka anak og komportable nga kinabuhi. Ang ubang tawo sa kongregasyon nagtukod pa gani og balay alang kanila.31 Makahangyo ba gayud kaha siya sa iyang pamilya nga biyaan ang kakomportable nga ilang gitagamtam?
Nag-ampo si Sidney hangtud nga ang usa ka pagbati sa kalinaw miabut kaniya. Nasayud siya nga ang Basahon ni Mormon tinuod. “Wala kini ipadayag kanako og tawo,” nakatuaw siya, “apan gipadayag kini kanako sa akong Amahan nga anaa sa langit.”32
Gipaambit ni Sidney ang iyang mga pagbati kang Phebe. “Mahal ko,” miingon siya, “kausa misunod ka kanako ngadto sa kakabus. Andam ka ba sa pagbuhat og usab niini?”
“Gihunahuna na nako ang mga sangputanan,” mitubag si Phebe. “Akong tinguha nga buhaton ang kabubut-on sa Dios, mabuhi man ko o mamatay.”33