“Mamafa Tele,” mataupu 11 o le Au Paia: O Le Tala o le Ekalesia a Iesu Keriso i Aso e Gata Ai, Voluma 3, Lototele, Faatamalii, ma le Tutoatasi, 1893–1955 (2021)
Mataupu 11: “Mamafa Naua”
Mataupu 11
Mamafa Naua
I le afiafi o le aso 6 o Aokuso, 1914, sa lafi ai Arthur Horbach, o se tagata e sefulufitu tausaga le matua o le Au Paia o Aso e Gata Ai i Liège, Peleseuma, ao pei o timu to pulufana a Siamani i luga o lona aai.1 I le amataga o lena taumafanafana, sa tagatavaleina ai e se tagatanuu Serepia le suli i le Malo o Europa Austro-Hungarian, ma faaoso ai le taua i le va o Auseteria-Hanikeri ma le Malo o Serepia. E lei leva ae auai faatasi atu i le taua ia malo uma e lua. E oo atu i le amataga o Aokuso, ua tau Serepia, Rusia, Farani, Peleseuma, ma Peretania Tele ma Auseteria-Hanikeri ma Siamani.2
O Peleseuma, i le amataga o se malo e le faaituau, na ulufale atu i le feteenaiga ina ua amatalia e vaegaau a Siamani se osofaiga o Farani e ui atu i le tuaoi i sasae o Peleseuma. O Liège o le uluai aai na fatuina se faalavefau maoae muamua mo le autau osofai. E sefululua olo maualuluga na siomia le aai, ma o le olo muamua na taofia Siamani mai le ulufale atu. Ae o le osofaiga sa le mafaatusalia. E faitau afe fitafita na osofaia ’olo, ma sa amata ona faatoilaloina le puipuiga a Peleseuma.
Sa lei pine ae solia e fitafita Siamani le laina a Peleseuma ma pueina Liège. Sa sosolo atu le au osofai i le aai, gaoia fale, susunu fale tetele, ma tafanaina tagata o le nuu.3 Na sosolaese Afa ma lona tina, o Mathilde, mai fitafita. O le limasefulu pe sili atu foi o isi Au Paia i Liège sa lamatia uma, pei lava o Afa, ae na tu mai pea i lona mafaufau ia faifeautalai na auauna atu i le taulaga. Sa ia faaaluina le tele o lona taimi ma faifeautalai ma iloa lelei i latou. Pe na afaina i latou i le osofaiga?4
Na mavae atu aso. Sa nonofo Afa ma lona tina ma le fefefe i vaegaau a Siamani ma le mamafa o osofaiga na osofaia ai ’olo e lei faapagotaina. Sa faataapeapeina le Au Paia o Aso e Gata Ai i le aai atoa, faatasi ai ma ni nai tagata o le paranesi sa faaputuputu faatasi i se sela. Sa siitia atu se vaega o fitafita i le fale tele mautotogi lea sa masani ona feiloai ai le paranesi. O le mea e lelei ai, o Tonia Deguée, o se tagata matua o le Ekalesia sa tautala i le gagana Siamani, na vave lava ona maua le faatuatuaga o fitafita osofai ma faatauanauina i latou e aua nei faaleagaina le faletele po o ana meaafale.5
Mulimuli ane, na iloa e Afa na saogalemu ia faifeautalai. O le konesula o Amerika i Liège na faatonuina i latou e o ese mai le aai i le aso muamua o le osofaiga i pomu, ae o poloka o le auala na taofia ai i latou mai le mauaina o upu o le aveeseina o Afa po o isi tagata.6
O le mea moni, sa tuua e faifeautalai mai le konetineta atoa o Europa, o latou fanua ma galuega. “Faamalolo uma faifeautalai Siamani ma Farani,” sa uaealesi atu ai Peresitene Iosefa F. Samita i taitai misiona a Europa, “ma faaaoga le faautautaga e tatau ai e uiga i le siitia atu o faifeautalai uma mai atunuu e le masani ai faapea foi ma atunuu o loo mamafa ai fetauaiga i misiona a le Iunaite Setete.”7
Sa vave ona lagona e Afa le toesea o faifeautalai. I le ono tausaga talu ona la auai ma Mathilde i le Ekalesia, sa faalagolago le la paranesi i faifeautalai mo le taitaiga faaleperisitua. O lenei la, na o le pau tagata na umia le perisitua i le paranesi ua na o se aoao ma tiakono e toalua—o se tasi o i latou na o Afa. E lei atoa se tausaga talu ona ia mauaina le Perisitua Arona.8
Ina ua pa’ū atu Liège i lima o Siamani, sa le toe fono faatasi le paranesi. Sa siitia atu fitafita sa nofoia le latou fale fono, ae sa musu le pule o le fanua e tuu le paranesi e feiloai iina. O aso uma o se tauiviga mo le ola ai. Sa oo ina tau le maua ni meaai ma sapalai o aso uma. O le fiaaai ma le faanoanoa na lofituina ai le aai.
Na iloa e Afa o tagata uma i le paranesi na naunau e faapotopoto mo tatalo ma le faamafanafanaga. Ae a aunoa ma se falelotu ma se tasi ua i ai le pule e faamanuia le faamanatuga, e mafai faapefea ona latou toe faaauau o se paranesi?9
A o salalau atu le taua i Europa, sa mafaufau Ida Samita pe mafai faapefea ona ia fesoasoani i fitafita Peretania e tuua le malae o le taua. O ia ma lona toalua, o le aposetolo o Ailama M. Samita, na siitia atu i Livapulu ma le la fanau e toafa pe a ma se tausaga na muamua atu. O Ailama, le atalii ulumatua o Iosefa F. Samita, sa auauna atu o se peresitene o le Misiona a Europa. Sa lagolagoina e Ida le galuega, ae sa ia filifili e le auai i le galuega faafaifeautalai—po o soo se auaunaga i fafo atu o la latou paranesi laitiiti o le Ekalesia—a o i ai pea sana fanau laiti i le fale.10
E ui i lea, i se tasi aoauli, na vaai ai Ida i se faaaliga na tusia e le pulenuu o tamaitai o Livapulu, o Winifred Rathbone, ma valaau atu i faalapotopotoga a tamaitai i le aai e auai faatasi ma isi tamaitai volenitia i Peretania Tele atoa i le toloseina o ofu mafanafana mo fitafita. Na iloa e Ida o le faitau selau o afe o fitafita Peretania, e aofia ai nisi o le Au Paia o Aso e Gata Ai, o le a matua manaomia lava ia lavalava e sao mai ai i le taumalulu o le a oo mai. Ae sa ia lagona e leai sona aoga.
“O le a se mea e mafai ona ou faia e fesoasoani ai i lenei tamaitai?” sa ia fesili ai ia te ia lava. “Ou te lei su’ia lava se mea i lo‘u olaga.”11
Ona foliga mai lea o se leo o talanoa atu ia te ia: “O le taimi lenei mo Aualofa o le Misiona a Europa e laa atu ai i luma ma ofo atu a latou auaunaga.” Sa matua faagaeetia Ida i ia upu. O le Aualofa a Livapulu e toalaiti—toavalu tagata toaaga, i le tele lava—ae e mafai e tamaitai ona faia la latou vaega.12
Faatasi ai ma le fesoasoani a le failautusi o le misiona, sa faatulagaina ai e Ida e feiloai ma Winifred i le aso na sosoo ai. Sa tatavale lona fatu a o lei faia le fono. “Aisea e te alu ai i le pulenuu o tamaitai ma ofo atu a outou auaunaga ma ni nai tamaitai?” sa ia otegia ai o ia lava. “Aisea e te le alu ai i le fale ma aua le aia fua?”
Ae sa tafiesea e Ida lea manatu. Sa i ai le Alii faatasi ma ia. I lona lima sa ia tauaveina ai se tamai kata na lolomi ai ni faamatalaga e uiga i le Aualofa ma lona faamoemoega. “Afai e mafai ona ou tuuina atu ia te ia lenei kata,” sa ia fai ifo ai ia te ia lava, “O le a ou alu.”13
O le ofisa o le tamaitai pulenuu sa i ai i se fale tele sa avea ma nofoaga tutotonu mo lana galuega alofa. Sa faafeiloai e Winifred ia Ida ma le agaga alofa, ma sa vave ona mou atu le popole o Ida a o ia ta‘u atu i le tamaitai pulenuu e uiga i le Aualofa, le Ekalesia, ma le Paranesi laitiiti a Livapulu. “Ua ou sau e ofo atu la matou auaunaga e fesoasoani ai e suisui mo fitafita,” sa ia faamatala atu ai.14
Ina ua uma ona tuuina atu lana savali, sa sauni Ida e tuumuli, ae na taofi o ia e Winifred. “Ou te manao e te maimoa faataamilo i lo matou fale,” na ia fai atu ai, “ma vaai i auala o loo faagaioia ai la matou galuega.” Sa ia taitaia Ida e ui atu i potu tetele e sefulufitu, sa faatumulia i latou taitasi i ni tamaitai e toasefululua pe a o loo galulue malosi. Ona ia aumaia lea o Ida i totonu o lona ofisa tumaoti. “O le auala lenei matou te tausia ai a matou faamaumauga,” na ia fai atu ai, ma faaali atu ia te ia se tusi. “O mea uma tou te faia mo i matou o le a tusifaamaumauina i lenei tusi o se galuega e faia e le Aualofa O Le Ekalesia a Iesu Keriso o le Au Paia o Aso e Gata Ai.”
Sa faafetai atu Ida ia te ia. “O le a matou faia le mea sili matou te mafaia,” o lana tala lea.15
O lena tautoulu, sa tolose ai le Aualofa i Livapulu. Sa latou faaaofia ai foi a latou uo ma tuaoi e fesoasoani. Ina ua mavae se vaiaso, sa latou faitauina le lata i le fasefulu le au tolose. Sa aoaoina e Ida lava ia e tolose ma amata ona galue i le tele o sikafu lapopoa. I le talosaga a le au peresitene aoao o le Aualofa i le Aai o Sate Leki, sa vaetofia ai Ida e lona toalua e avea ma peresitene o Aualofa i le Misiona a Europa. Faatasi ai ma le le saogalemu o le konetineta o Europa mo femalagaaiga, sa amata ai ona malaga o ia i totonu o Peretania atoa e faatulaga ni Aualofa fou, aoao o latou tagata auai, ma sue mai i latou e tolose mo fitafita. I le iuga, na fatuina e tamaitai ma tufatufa atu le tusa ma le lua afe-tolu selau o lavalava na suilimaina.16
Sa maua e Ida ma isi sui o le Aualofa ni tusi ma ni faamalo mai taitai taua i Peretania Tele atoa. “Afai o faalapotopotoga uma a tamaitai i Peretania Tele o le a galulue e pei ona faia e tamaitai o le Au Paia o Aso e Gata Ai,” sa tusia ai e se tasi o tamaitai, “o le a leai se mea e mananao ai a tatou fitafita.”17
“O lipoti o tagata oti ma le faatafunaga o loo faia i Europa ua inosia ma taufaatauvaaina,” na tusia ai e Peresitene Iosefa F. Samita ia Ailama M. Samita i le aso 7 Novema, 1914. I le lua masina na muamua atu, na taofia ai e vaegaau a Farani ma Peretania le autau a Siamani i se taua faamasaatoto i le Vaitafe o Marne i matusasae o Farani. Sa mulimuli mai isi taua, ae e leai se isi itu na faamanuiaina i le matautia o se osofai. O lea la ua tatao i lalo autau i se faamoega apogaleveleve o puipuiga o le faatautee i le isi itu o le nuu maotua o Farani.18
Sa salalau atu le taua i Europa i sasae atoa, i Aferika ma Sasae Tutotonu, ma i le mamao e pei o motu i le Vasa Pasefika. O tala i nusipepa o le feteenaiga na oo mai i le mafaufau o Peresitene Samita le faaaliga a le Alii i le 1832 e uiga i taua. Na muai valoiaina, “Ona sasao atu ai lea o taua i luga o atunuu uma.” “Ma o le a faapea, e ala i le pelu ma le faamasaatoto, ona faanoanoa e e nonofo i le lalolagi.”19
I le Aso Sa, 24 Ianuari, 1915, na valaau atu ai le perofeta i tagata o le Ekalesia i le Iunaite Setete ma Kanata e saofaga i se tupe mo toomaga mo le Au Paia Europa e le tagolima. “O le auala aupito tuusao lenei o le aapa atu i na tagata o le Ekalesia o e o loo manaomia le fesoasoani,” na ia folafola atu ai.20 I le tali atu i ai, e silia ma le fituselau uarota ma paranesi na aoina tupe ma auina atu foai i le ofisa o le Au Epikopo Pulefaamalumalu o le Ekalesia. Ona auina atu lea o le tupe i le ofisa o le misiona i Livapulu mo Ailama e tufatufa atu i le Au Paia i Europa, e tusa lava po o le a le itu na latou lagolagoina i le taua.21
I ni nai masina mulimuli ane, sa malaga ai Peresitene Samita ma le epikopo pulefaamalumalu o Charles W. Nibley e iloilo se tulimanu e sili atu ona toafilemu o le lalolagi: o le faatoaga a le Ekalesia e ono afe-eka i Laie, Hawaii.22 I Honolulu, na feiloai ai nei alii e toalua ma le aposetolo ma le sui o le Iunaite Setete o Reed Smoot, lea na o mai i atumotu faatasi ma lona faletua, o Allie, e faaleleia lona soifua maloloina ma asiasi atu i le fono faitulafono a Hawaii. Faatasi ai ma Aperaamo ma Minerva Fernandez, o e sa talimalo ia Siaosi Q. Cannon i le taimi o lana asiasiga mulimuli i atumotu, sa la malaga atu ai i Laie ma sa fiafia i se taumafataga fiafia ma le fa selau o le Au Paia.23
I nai aso na sosoo ai, a o asiasi atu Peresitene Samita i tagata o le Ekalesia ma maimoaina le faatoaga, sa fiafia o ia e vaai i le Au Paia Hawaii o uluola faaleagaga ma faaletino. Toeitiiti sefulu afe le Au Paia ua nonofo nei i atumotu. Na lolomiina talu ai nei le Mataupu Faavae ma Feagaiga ma le Penina Tau Tele i le faaHawaii. E silia ma le limasefulu falelotu o le Au Paia o Aso e Gata Ai ua i ai i atumotu, ma o Laie lava ia sa i ai se aoga a le Ekalesia. Sa faamatagofieina foi e le Au Paia i Laie o latou fanua ma auala i fugalaau ma laau mausali.24
Sa faateleina foi le Ekalesia i isi vaega o atumotu o le Pasefika. Ua maua nei le Tusi a Mamona ma isi anomea a le Ekalesia i gagana Māori, Samoa, ma le FaaTahiti. Sa i ai i le Misiona a Tahiti se masini lomitusi ma sa lolomiina ana lava lomiga faavaitaimi a le Ekalesia i Tahiti, Te Heheuraa Api.25 I Toga, sa toe mauaa ai foi le Ekalesia ina ua uma ona tapunia i le galuega faafaifeautalai mo le silia ma le sefulu tausaga. Sa tapuai le Au Paia i Ausetalia, Samoa, ma Niu Sila i paranesi malolosi faatasi ma Aualofa, Aoga Sa, ma aufaipese. I le 1913, na tatalaina ai foi e le Ekalesia le Kolisi Faifaatoaga a Māori i Hastings, Niu Sila. Sa aoaoina e le aoga ia alii talavou i le faifaatoaga ma isi galuega.26
I le aso 1 o Iuni, i le latou afiafi mulimuli i Laie, sa savavali ai Peresitene Samita ma Epikopo Nibley ma Elder Smoot i se falelotu i le tumutumu o se mauga maualalo e vaai atu i le taulaga. Sa tu ai iina le falelotu talu mai le 1883. O lona igoa o, I Hemolele, o lona uiga “E Paia i le Alii,” o le fasifuaitau faatusi paia lava lea e tasi na faaali mai i fafo o le Malumalu o Sate Leki.27
I fafo atu lava o le fale, sa ta‘u atu ai e Peresitene Samita ia Elder Smoot sa la talanoaina ma Epikopo Nibley le avanoa e fausia ai se fale o faaeega paia po o se malumalu laitiiti i Laie, talu ai o le Ekalesia i Hawaii sa malosi lona tulaga. Sa ia fautuaina le siitia atu o I Hemolele i se isi nofoaga ina ia mafai ona fausia se malumalu i luga o le tulaga.28
Sa fiafia Elder Smoot i le manatu. I le amataga o lena vaiaso, ina ua uma ona auai i le falelauasiga o se tagata matua o le Au Paia o le sa mauaina ona faaeega paia i tausaga ua mavae i Iuta, sa faapena foi ona mafaufau i ai. Mo le tele o lona talafaasolopito, sa fausia e le Ekalesia malumalu e latalata i le tele o tagata o le Au Paia. Ae i le 1913, sa faapaiaina ai e Peresitene Samita se nofoaga mo se malumalu i Cardston, Alberta, Kanata, lea sa i ai nei ni siteki se lua. O le taimi muamua lea ua faataatia ai fuafuaga e fausia se malumalu mo le Au Paia o e sa nonofo mamao ese mai le tino autu o le Ekalesia.29
“Uso e,” na saunoa atu ai Peresitene Samita i ana soa, “Ou te lagona le uunaiga e faapaia lenei eleele mo le fausiaina o se malumalu i le Atua, mo se nofoaga e mafai ona o mai ai tagata o Motu o le Pasefika ma faia a latou galuega faalemalumalu.” Sa ia faailoa atu na te lei logoina le Korama a Aposetolo e Toasefululua po o isi uso o le Au Peresitene Sili e uiga i le mataupu. “Ae afai e te manatu o le a leai se tetee i ai,” na ia fai atu ai, “Ou te manatu o le taimi lenei e faapaia ai le eleele.”
Sa faagaeetia Elder Smoot ma Epikopo Nibley e uiga i le manatu, o lea na ofoina ai e le perofeta le tatalo o le faapaiaga i le nofoaga lea.30
E oo atu i le taumafanafana o le 1915, ua le o toe i ai se taufaamatau a le au Fouvale i Mekisiko i kolone a le Ekalesia i Mekisiko i matu. E toatele aiga na toe foi atu i o latou fale i kolone ma sa nonofo ai i le filemu. O le taimi lea, o nisi o le au kolone, e aofia ai Camilla Eyring ma lona aiga, na filifili e nonofo ai pea i le Iunaite Setete.31
Ae sa eseese tulaga i San Marcos, lea ua avea ai nei Lafaele Monroy ma peresitene o se paranesi e tusa ma le fasefulu tagata o le Au Paia. I le aso 17 o Iulai, na faoa ai e se vaega o fitafita fouvale le nuu, faatu le latou nofoaga autu i se fale tele i le ogatotonu o le taulaga, ma poloaiina Lafaele, o se fai lafu manu faamanuiaina, e tuuina atu aano o manufasi mo i latou.32
I le faamoemoe ai e faamalie le autau, sa tuu atu ai e Lafaele ia i latou se povi e fasi. O le au fouvale o ni tagata Sapatiso, po o tagata e mulimuli ia Emiliano Zapata, o se tasi o le tele o taitai fouvale na tauva mo le puleaina o le malo o Mekisiko. Mo le tele o masina, sa tauivi ai le au Sapatiso ma autau a Venustiano Carranza, po o le Carrancistas, i le eria faataamilo i San Marcos. I le mulimuli ai i le fautuaga a le peresitene o le misiona o Rey L. Pratt, sa taumafai ai Lafaele ma ona uso a Au Paia e alo ese mai le taua, ma le faamoemoe o le a tuua filemu i latou e autau. Sa avea San Marcos ma se nofoaga filemu mo le Au Paia na faaaunuua i sauaga i Mekisiko tutotonu, seia oo ina taunuu atu le au fouvale.33
Sa i ai faatasi ma le Au Paia i San Marcos le tina o Lafaele, o Jesusita, ma lona toalua, o Guadalupe, o e na papatisoina uma ia Iulai 1913. O Peresitene Palate, o le sa tuua mo le Iunaite Setete, sa faaauau pea ona fesoasoani i le paranesi mai mea mamao.34
Ina ua uma ona tuuina atu e Lafaele le povi, sa amata ona talanoa nisi o ona tuaoi i le au fouvale. O se tasi tuaoi, o Andres Reyes, sa le fiafia e uiga i le faatupulaia o le aofai o le Au Paia i le eria. E toatele tagata Mekisiko sa tetee i faatosinaga mai fafo i lo latou atunuu, ma o Andres ma isi i le taulaga na le fiafia i le au Monroy mo le tuua o lo latou faatuatuaga Katoliko e auai i se ekalesia e fesootai lautele ma le Iunaite Setete. O le mea moni e faapea, o le tamaitai matua o le au Monroy, o Natalia, sa faaipoipo i se tagata Amerika na atili ai ona masalosalo le nuu i le aiga.35
O le faalogoina o lenei mea, sa toe mulimuli atu ai fitafita ia Lafaele i lona fale ma pue faapagotaina o ia a o fai lana malutaeao. Sa latou faatonuina o ia e tatala le faleoloa o le aiga, ma fai atu o ia ma lona uso faaletulafono mai Amerika o ni tagata taitai i le autau a Carrancista o e sa nanaina auupega e faaaoga e faasagatau ai i le au Sapatiso [Zapatistas].
I le faleoloa, na maua ai e Lafaele ma fitafita ia Vicente Morales, o se isi tagata o le Ekalesia, o loo faia ni galuega e ese mai ai. I le talitonu ai o ia foi o se fitafita Carrancista, sa puefaapagotaina o ia e fitafita ma amata ona lagaina le faleoloa a o latou saili mo ni auupega. Sa aioi atu Lafaele ma Vicente e mama i la’ua, ma faamautinoa atu i autau e le o i laua o le fili.
Sa lei talitonu fitafita ia i laua. “Afai lua te le tuuina mai ia i matou au auupega,” na latou fai mai ai, “o le a matou tautaua oulua mai le laau aupito maualuga.”36
Ina ua aveese faamalosia e le au Sapatiso ia Lafaele mai le fale, sa taufetuli atu ona tuafafine o Jovita ma Lupe ia i laua. Sa aapa muamua atu Jovita i fitafita, ae sa latou le amanaiaina ana aioiga. Na taunuu mai Lupe i le taimi tonu lava e vaai atu i le taofia faamalosi e le au fouvale lona uso. “Lupe,” na alaga atu ai Jovita, “ua latou puefaapagotaina au!”
E oo atu i le taimi lea, ua faatulagaina se motu o tagata faataamilo ia Lafaele ma Vicente. O nisi tagata sa uuina maea i o latou lima ma alalaga, “Faatautau i laua!”
“O le a le tou mea laa fai? E mama lo‘u tuagane,” o le tala lea a Lupe. “Talepe i lalo le fale pe afai e manaomia, ae o le a e le mauaina ni auupega.”
Sa valaau atu se tasi o le motu o tagata e pue faapagota foi ma ia. Sa topetope atu Lupe i se laau lata ane ma pipiimau i ai i le mea sa ia mafaia, ae sa uu mai o ia e fitafita fouvale ma faigofie ai ona aveese o ia.37 Ona latou toe foi atu lea i le fale o Monroy ma puefaapagotaina Natalia.
Sa ave e le au fouvale tuafafine uma e toatolu i lo latou nofoaga autu ma tuu i totonu o potu eseese. I fafo, sa ta‘u atu ai e nisi o tagata i fitafita o Lafaele ma Vicente o ni “Mamona” o e na faaleagaina le taulaga i la laua tapuaiga uiga ese. E lei faalogo muamua lava fitafita i lea upu, ae sa latou avea o se uiga o se mea leaga. Sa la aumaia alii e toalua i se laau umi ma tautau ni maea i luga o ona lala malolosi. Ona latou tuu lea o faamatasele i o la ua. Afai o le a lafoaia e Lafaele ma Vicente la laua tapuaiga ma auai i le Au Sapatiso, na fai mai ai fitafita, o le a faasaolotoina i laua.
“O la‘u tapuaiga e pele ia te a’u nai lo lo‘u ola,” na fai atu ai Lafaele, “ma e le mafai ona ou lafoaia.”
Sa toso e fitafita maea seia oo ina tautau mai Lafaele ma Vicente mai o la ua ma ua matapogia. Ona tatalaina lea e le au fouvale o maea, toe faate’i ia tama, ma faaauau pea ona faatigaina i laua.38
I tua i le faleoloa, sa tumau pea le sailiga a le au fouvale mo auupega. Sa tauanau atu Jesusita ma Guadalupe e leai ni auupega. “O lo‘u atalii o se tagata filemu!” Na fai atu ai Jesusita. “Ana faapea e leai, e te manatu ea e te mauaina o ia i lona fale?” Ina ua toe poloaiina e fitafita e vaai i auupega a le aiga, sa tuu atu e le au Monroy ia kopi o le Tusi a Mamona ma le Tusi Paia.
“E le o ni auupega na,” o le tala lea a le au fouvale. “Matou te mananao i auupega.”
I le aoauli, i le laumua o Zapatista, sa tuufaatasia ai e le au fouvale ia le au Monroy i le potu e tasi. Sa faateia Lupe i foliga vaaia o Lafaele. “Rafa, o loo lavatoto lou ua,” sa ia fai atu ai ia te ia. Sa savali atu Lafaele i se paipa i totonu o le potu ma fufulu ona foliga. Sa foliga to‘a o ia ma sa lei foliga ita, e ui i mea uma na tutupu.
Mulimuli ane, sa aumai e Jesusita meaai i lana fanau. A o lei alu ese atu o ia, sa tuuina atu e Lafaele ia te ia se tusi na ia tusia i se kapeteni Sapatista sa ia iloaina, i le sailia o lana fesoasoani e faamaonia ai lona taumamaina. Sa ave e Jesusita le tusi ma alu e sue le kapeteni. Ona faamanuiaina lea e le au Monroy ma Vicente le latou meaai, peitai, ae latou te lei aai, sa latou faalogoina le pa’o o savali ma auupega i fafo atu o le faitotoa. Sa valaau atu fitafita mo Lafaele ma Vicente, ma sa o atu i fafo nei alii e toalua. I le faitotoa, sa fai atu Lafaele ia Natalia la te o faatasi, ae sa tulei e leoleo o ia i totonu.
Sa tilotilo atu le auuso i le tasi ma le isi, ma sa tatavale o laua fatu. Sa faamalumalu mai le filemu ia i laua. Ona vaeluaina lea o le po i le pao o pulufana.39
Sa lagona e Ailama M. Samita se avega mamafatu i ona tauau a o ia mafaufau i le tulaga i Europa. I le avea ai ma peresitene o le Misiona a Europa, sa vave lava ona ia mulimuli i le faatonuga a le Au Peresitene Sili ma aveese mai faifeautalai mai Siamani ma Farani i le taimi lava na amata ai le taua. Ae sa ia le mautinoa po o le a le mea e fai i faifeautalai i atunuu e le o faaituau po o eria o loo fevataua’i, e pei o Peretania Tele. Na tuuina atu e le Au Peresitene Sili ia te ia ni nai faatonuga i le auala e faaauau ai. “Matou te tuua le fesili mo oe e filifili ai,” na latou tusia.40
Sa faalua ona feiloai Ailama ma faifeautalai i le ofisa o le misiona e talanoaina le ala sao o le faatinoga. Ina ua maea sina talanoaga, sa latou malilie e faamalolo na o faifeautalai i le konetineta o Europa, ae tuua ai faifeautalai i Peretania Tele e faamaea a latou misiona e pei ona fuafuaina. Ona tusi atu lea o Ailama i peresitene o misiona i le konetineta, ma faatonuina i latou ma o latou fesoasoani e nonofo ai pea i o latou tulaga ina ia faatumauina le Ekalesia i o latou eria. O le vaega o totoe o faifeautalai o le a o ese.41
O le taimi nei, i le tasi le tausaga mulimuli ane, na faatumulia ai nusipepa i tala e uiga i le osofaiga a Siamani i vaa tau ma vaa la’u pasese a Peretania. Ia Me 1915, sa fanaina ai e se vaamaulu a Siamani le Lusitania, o se vaa la‘u pasese i Peretania, ma fasiotia ai le toeitiiti afe luaselau o tagata ma le auvaa. O le tolu masina mulimuli ane, na faamagoto ifo ai se isi vaa la‘u pasese a Peretania e le au Siamani, o le Arapi, mai le talafatai o Aialani. Sa i ai i luga o le vaa se faifeautalai ua toe foi mai lea na toeitiiti lava maliu i le osofaiga.
A o nafa le alii ma le faatulagaina o malaga mo faifeautalai ma le malaga atu o le Au Paia na sopoia le Atelani, sa tauivi Ailama ia iloa pe faapefea ona tali atu i le faalavelave.42 O le toatele o faifeautalai Amerika i Peretania sa matua naunau lava e toe foi i le fale ma sa latou naunau e faia soo se tulaga lamatia ina ia oo atu ai iina. E faapena foi ona tuu e le Au Paia femalagaai lo latou manao e faapotopoto i Iuta i luma atu o lo latou saogalemu faaletagata lava ia.
Ina ia faafaigataina mataupu, sa totogiina e le Ekalesia se kamupani vaa i Peretania e taulimaina faigamalaga uma e faatatau i le Ekalesia e sopoia ai le Atelani. I le le mafai ai ona vaai atu i se auala faamaoni e alu ese ai mai le konekarate, sa talitonu Ailama e le mafai e le ofisa o le misiona ona totogi ni pasese faaletulafono mo le Au Paia i vaa a Amerika, e ui ina sa manatu i latou ua saogalemu ona sa lei tau le Iunaite Setete ma Siamani.
I le aso 20 Aokuso, 1915, sa ia tusi atu ai i le Au Peresitene Sili e uiga i le faafitauli. Ua uma ona ia totogiina pasese mo nisi o faifeautalai ma tagata faimalaga a le Au Paia i luga o le Scandinavian, o se vaa a Peretania-Kanata na tuua Livapulu i le aso 17 o Setema. Ae o lenei ua ia fesiligia pe tatau ona ia tuu atu i latou e o.
“O le tauaveina toatasi o le tiutetauave toetoe lava a mamafatu mo o‘u tauau,” na ia tusi atu ai. “Ou te aioi atu ma le lotomaualalo ina ia outou fautuaina a‘u e uiga i lenei mataupu, ina ia mafai ona ou lagonaina o loo ogatusa atoatoa a’u faatinoga ma o outou manaoga.”43
I se vaiaso a o lei faatulagaina le faimalaga ese atu o le Scandinavian sa maua ai e Ailama se uaealesi mai le Au Peresitene Sili: “O tagata e faimalaga mai i vaa a le au fouvale e tatau ona avea ma a latou matafaioi i latou lava.” Afai e filifili le Au Paia e malaga i lalo o se fu‘a Peretania, ona latou faia lea i lo latou lava tulaga lamatia.44
Sa fua ma le faaeteete e Ailama ana filifiliga. Sa manino lava le le mananao o le Au Peresitene Sili e uunaia le Au Paia e malaga i vaa ia e ono osofaia. Ae peitai, sa le‘i avanoa vaa saogalemu a Amerika i le Au Paia sei vagana ua latou filifili e malaga na o i latou lava mai le Ekalesia. Ma e tusa lava pe na latou faia, o le tau taugata o le malaga i luga o se vaa o Amerika e ono taofia ai i latou mai le faimalaga atu.
“Ou te lagona le ita i le lamatia o a tatou Au Paia i luga o le vasa,” na ia tusia ai i lana apitalaaga. Ae sa ia iloa e i ai le mea sa tatau ona ia faia. “Talu ai e le i faatonuina i tatou e aua le faia,” na ia tusia, “o le a tatou faia pea ma faalagolago i le Alii.”45
I le aso 17 o Setema, 1915, na faatofa atu ai Ailama i ni faifeautalai se toafa ma ni tagata malaga e tolusefulu-fitu i luga o le Scandinavian.46 Ona pau lea o le mea sa mafai ona ia faia o le faatali mo le upu o lona taunuu saogalemu atu i lona taunuuga.