“O Lo Tatou Moomooga ma La Tatou Misiona,” mataupu 6 o le Au Paia: O Le Tala o le Ekalesia a Iesu Keriso i Aso e Gata Ai, Voluma 3, Lototele, Faatamalii, ma le Tutoatasi, 1893–1955 (2021)
Mataupu 6: “O Lo Tatou Moomooga ma La Tatou Misiona”
Mataupu 6
O Lo Tatou Moomooga ma La Tatou Misiona
Sa susulu foliga o Hirini Whaanga a o faafeiloaia o ia e se vaega o le Au Paia Maori ma ona uso a faifeautalai i lo latou nuu, Te Horo, i le Motu o le itu i Matu o Niu Sila. Sa fiafia le Au Paia Maori ia Hirini o se tamamatua, ma sa latou mitamita i lana galuega o se faifeautalai faamisiona. Soo se taimi lava e asiasi atu ai o ia i o latou nofoaga, sa latou faafeiloaia o ia ma ana soa i le fuaitau masani lava e tasi: “Haere mai!” Susu mai i totonu!
I Te Horo, sa talitonu ai nisi o tagata i tala e uiga i le agaleagaina o le Au Whaanga i Iuta. Sa faalogo foi nisi o i latou i se tala ua maliu Hirini. I le tafieseina o nei tala, sa fesili atu Hirini, “Pe ua ou foliga ea e pei ua ou oti? Pe o ou foliga ea e pei na agaleagaina a’u?”1
Sa faia e faifeautalai se konafesi e lua aso faatasi ma le Au Paia mai paranesi e sefulu i le eria. Ina ua oo i lona taimi e lauga ai i le faapotopotoga, sa lagona e Hirini le musuia e talanoa e uiga i le faaolataga o e ua maliliu. Mulimuli ane, o le toatele o le au paia i le faapotopotoga na tuuina atu ia te ia igoa o o latou tuaa ua maliliu ina ia mafai ai e ia ma lona aiga ona faatino o latou galuega o le malumalu.2
E lei leva ona uma le konafesi, ae malaga atu Hirini ma le peresitene o le misiona o Ezra Stevenson ma isi faifeautalai e toalua i se nuu mamao e igoa ia Mangamuka. Sa poloaiina ia faifeautalai e o ese mai le nuu i ni nai tausaga na muamua atu ma sa lapataia e aua lava nei toe foi mai. E ui i lea, sa i ai se tagata o le aiga o Hirini sa nofo ai iina, o lea na latou filifili ai e valaau atu ia te ia.
Sa faalatalata atu ma le faaeteete faifeautalai i Mangamuka. Ina ua latou fesili atu mo Tipene, o le aiga o Hirini, sa tau atu ia i latou e faatali i fafo o le nuu. O le taliaina o i latou sa le o se mea fiafia nai lo isi na taliaina i latou i isi nofoaga i la latou malaga, ma sa lotovaivai Hirini.
Ina ua mavae sina taimi, sa oso ae Tipene mai le nuu ma ma faatasi ai ma loimata sa opo atu Hirini i se tangi, po o se sauniga faaMaori o le alofa ma le faaaloalo. Ona latou faia faatasi lea o se taumafataga, ma sa ave e Tipene faifeautalai i se fale manaia. Sa atili faateleina le agaga faauo i totonu o le nuu ma sa valaaulia faifeautalai e lauga atu ia i latou o e na faapotopoto mai.
A o lei saunoa o ia, sa faamautinoa atu e Ezra i ana au faalogologo e lei sau o ia e faasala i latou ae valaaulia i latou e faasoa mai i le moni o lana savali. Sa faalologo ma le fiafia le faapotopotoga, ma na tali fiafia mai e ni nai alii ana upu. Sa saunoa foi Hirini, ma talai atu ma le lototoa seia oo i le vaeluaga o le po, ina ua momoe ana soa. Ona ia faaauau lea ona talanoa lelei i le amataga o le taeao.3
Sa tatau ia Ezra ma se tasi o alii faifeautalai ona tuua lena taeao, ae na valaaulia e tagata o le nuu ia Hirini ma le faifeautalai o loo totoe, o Siaosi Judd, e aoao atili atu ia i latou. Sa nonofo faifeautalai i aso e fa, sa faia ni sauniga se lima, ma papatisoina ni alii talavou se toalua. Sa talai atu Hirini ma Siaosi i isi nuu, ma papatiso ai nisi tagata e toasefuluvalu i le taimi na latou toe faatasi ai ma Ezra i ni nai vaiaso mulimuli ane.4
Sa faaauau pea ona malaga atu Hirini ma le peresitene o le misiona, e aoao atu le au paia ma aoina mai o latou gafa. E masani lava, a o faalogologo Ezra ia Hirini o talai, sa ia maofa i le tomai o lana uo e faagauai mai tauaofiaga Maori. “E i ai sana molimau malosi ma e faagaeetia ai tagata,” na tusia ai e Ezra i lana api talaaga. “Na te silafia le auala e maua ai le lagona Maori, e sili atu nai lo le mea matou te faia.”5
Ia Aperila 1899, na maua ai e Hirini se faamalologa faamamaluina mai lana misiona. O se lipoti o se nusipepa e faasilasila atu ai lona toe foi atu i le Aai o Sate Leki na viia ai ana galuega i Niu Sila. “Sa tuuina atu se faapotopotoina tele i le galuega i lena laueleele mamao lava,” na faitauina ai. “Sa maua faamatalaga o gafa mai itumalo uma ma sa faamalolosia ma faateleina le faatuatua ma le naunautai o le Au Paia o Maori.”6
O lena tautotogo, sa suesue ai Ioane Widtsoe le kemisi i le Iunivesite o Göttingen i le totonugalemu o Siamani. O lana galuega i le Kolisi o Faatoaga i Logan na taitai atu ai o ia i sailiiliga o le carbohydrates, ma i le Göttingen sa mafai ai ona ia suesue i lalo o le saienisi sinia na taitaiina lana vaega. O lea la ua na o ni nai masina le mamao mai le faamaeaina o lona faailoga faapitoa.
Na faaipoipo Ioane ia Leah Dunford i le Malumalu o Sate Leki i le aso 1 o Iuni, 1898, i le lua masina a o lei siitia atu le ulugalii i Europa. A o lei malaga ese atu, sa vaetofia Ioane o se faifeautalai i Europa e le tuagane o le tina o Leah o Polika Iaga le Itiiti, ma faatagaina o ia e talai atu le talalelei i le taimi na te le tulimata’ia ai lana aoga. Talu ai sa lauiloa Siamani mo ana aoga musika, o le uso o Leah e sefulufitu ona tausaga, o Emma Lucy Gates, na auai atu ia i laua e aoga i le musika. Mai le aso 2 o Aperila, 1899, sa avea ai foi Ioane ma Leah ma matua mitamita o se pepe teineitiiti, o Anna Gaarden Widtsoe, na faaigoaina i le tina o Ioane.7
E ui lava sa lagolagoina e Ioane lona tina ma lona uso laitiiti, o Osborne, o le sa auauna atu i se misiona i Tahiti, ae faafetai na mafai ai e ia ma Leah ona nonofo i Europa ona o se vaega o se taui limafoai tautupe mai Harvard. O Göttingen o se taulaga tuai e i ai se iunivesite sa siomia e aega tumu i laau ma eka o faatoaga. Ona e na o le pau ia o tagata o le Au Paia o Aso e Gata Ai i le aai, o Ioane, Leah, ma Lucy o lea na faia ai a latou lava sauniga faamanatuga ma suesuega o le talalelei. E i ai taimi, e o mai ai faifeautalai mai le Misiona a Siamani i Göttingen e asia i latou.8
Pe tusa ma le afe tagata o le Ekalesia i Siamani. Sa i ai faaliliuga faa-Siamani o tusitusiga faavae faapea foi ma se mekasini a le Ekalesia e faalua ona maua i le masina, Der Stern. Ae sa na o le toalima le Au Paia Siamani sa umia le Perisitua Mekisateko, ma sa telegese le tuputupu ae.9 O le tele o tagata Siamani sa le talitonu i lotu mai atunuu ese, ma sa masani ona tuliesea mai aai ia faifeautalai. O nisi taimi sa tatau ai i le Au Paia ona feiloai faalilolilo po o lalo o le vaaiga a leoleo.10
I le faaiuga o le tautotogo, na alu ai Lucy e aoga i le Aoga Musika a Berlin. O lona tinamatua o Lucy Bigelow Young na sau mai Iuta la te toalua. Ina ua maea le faamautuuga o le tofamanino a Ioane, na faatasi atu loa o ia, o Leah, ma pepe Anna ma i laua i Perelini. Ona ia amata loa lea ona suʻesuʻe mo lana suega o le tofamanino, o le sitepu mulimuli lea i le faamaeʻaina o lona tikeri. Sa ia faia foi se malaga e ono vaiaso i Nouei ma Tenimaka e folafola atu le talalelei, asiasi i tagata o le aiga, ma sailiili i lona gafa.11
O le le toe i ai i Nouei talu ona ia siitia ese mai le atunuu i le sefulutasi tausaga, sa fiafia ai Ioane i le i ai faatasi ma le toatele o lona aiga. “Sa ou maua se taimi sili ona manaia ma le aiga o lou tina,” na ia tusi atu ai ia Leah ia Setema. “Sa taliaina au ma le mamalu ma faia e pei o ‘se tagata.’”12
Ina ua toe foi atu Ioane i Siamani, sa ia toe malaga atu i Göttingen e fai lana suega a o nonofo ai i Perelini ia Leah ma le pepe. O ana polofesa na foliga mai sa talitonu lelei i lona tulaga manuia, ae sa popole Ioane i le le fiafia o i latou ona o ia.
“Ua ou tuuina atu le mataupu i aao o le Alii,” na ia tusi atu ia Leah i le aso 20 o Novema, le aso o le suega. “Afai ou te le mauaina, lea e faasa e le Atua, o le a ou le soona ita ia te au lava. O le anapogi ma tatalo a outou uma e sili atu ona faafiafiaina ai au nai lo le mea e mafai ona ou tau atu ia te outou.”13
Ina ua oo mai le taimi o lana suega, sa alu atu Ioane i luma o se aufaatonu e silia ma le toasefululua polofesa, na saunia uma e tu’ifesili o ia e uiga i lana sailiiliga. Sa faia e Ioane le mea sili na ia mafaia e tali ai a latou fesili i lo latou faamalieina. Ina ua uma le lua pe tolu itula mulimuli ane, sa latou auina atu o ia i fafo o le potu a o latou filifili i lona taunuuga.
Mulimuli ane i lena afiafi, ina ua uma lana anapogi, na maua ai e Leah se uaealesi mai ia Ioane. “Maoa’e i le alofa tunoa o le Atua,” na faitauina ai. Na ia iloa lelei lava le uiga. Sa pasia e Ioane lana suega ma sa faamaeaina lona faailoga o le tofamanino ma le mamalu maualuga, magna cum laude.14
I ni nai vaiaso mulimuli ane, i le aso 4 Tesema, 1899, na faatalitali ai B. H. Roberts ma le popole i Uosigitone, DC, e ave lana tautoga o le ofisa e avea ma sui faatoa filifilia o Iuta i le Konekeresi o le Iunaite Setete. Sa faaputu i luma o le Fale o Sui Filifilia ni taaiga pepa e luasefulu-valu, e tusa ma le lua futu i le lautele. I luga o i latou, na iloa e B. H. igoa o tagata e fitu miliona o e sa lei mananao e i ai o ia iina.15
Tolu tausaga talu ona mavae lona faiaina i le palota o le 1895, na toe tauva foi B. H. mo le Konekeresi, o le taimi lenei faatasi ai ma le maliega a le Au Peresitene Sili.16 Na manuia lana taumafaiga, ae o le au faitio o le Ekalesia na vave lava ona latou faaaogaina le manumalo e faaleagaina ai le tulaga o le Au Paia o ni tagata e usiusitai i tulafono, lotonuu, ma o tagata e tasi le tagata e faaipoipo i ai. Sa taitaia e faifeau Porotesano ma faalapotopotoga a tamaitai le osofaiga, lapataia ai tagata uma o B. H., o se taitai o le Ekalesiae fai le autaunonofo o le sa tautamaina fanau ma ni ava se tele i le maea ai o le Manifeso, ua malaga atu i Uosigitone e tau mo faaipoipoga faaautaunonofo, faaleagaina o amioga lelei o tagata lautele, ma tuuina atu le paoa faaupufai o le Ekalesia.17
A o tupu tele le ita i le palota a B. H., na auai foi le faatonu o William Randolph Hearst i le finauga. O le naunautaʻi e faaaoga le finauga e faamalosia ai le faʻatau atu o lana nusipepa o le Aai o Niu Ioka, na lolomiina ai e Hearst tala mataga e uiga ia B. H. ma le Ekalesia, o lo o faaalia mai ai na taufaamataʻu i amioga lelei a Amerika. O le talosaga o igoa e fitu miliona i luga o le fola a le Maota, o le mea moni, na faaputuputu e le nusipepa a Hearst e faamalosia ai le au faitulafono ai faafitia B. H. lona nofoa i le Konekeresi.18
E leʻi leva ona maeʻa le aoauli, ae poloaina loa B. H. e faia lana tautoga o le tofi. A o savali atu o ia i le pito i luma o le potu, sa tu i luga se sui o le konekeresi ma faatuina ma le filemu se lafo e le aveese B. H. mai le Maota ona o ana mau faaipoipoga. Na faaluaina le lafo e le isi sui o le konekeresi. “O ia e fai se autaunonofo,” o le tala lea a le alii, “ma o lona filifilia o se osofaiga i luga o le aiga o Amerika.”19
O le aso na sosoo ai, na taumafai ai B. H. e faamautinoa i le au faitulafono e leai sona manaʻo e faʻaaoga lona tulaga fou e puipuia ai faaipoipoga faaautaunonofo. “Ou te le o i ai iinei e lagolagoina,” na ia tau atu ai ia te i latou. “E leai se taimi e finau ai mo lena mafuaaga. O se fesili ua uma ona foia.”20
I le le talitonu i ai, na tofia ai e le Maota se komiti faapitoa o le Konekeresi e toe iloilo le tulaga ma le natura o ana faaipoipoga faaautaunonofo. Sa faapitoa lo latou atuatuvale ona sa faaauau pea ona ia nonofo faatasi ma ana ava autaunonofo ma le mauaina o ni fanau faatasi ma i latou. Ina ua tuuina mai e le komiti se faamaoniga o nei sootaga, na finau pea B.H. na te le i faalauaiteleina le tetee i le tulafono. E toatele alii o le Au Paia o Aso e Gata Ai sa faaauau pea ona nonofo ma ni ava autaunonofo sa latou faaipoipo i ai a o lei faailoaina le Manifeso, ma sa latou le talitonu o le faia o lena mea o le a solia ai la latou maliega e usitai i tulafono a le Iunaite Setete mai le taimi lena i luma. Ae sa le ioeina lava e le komiti, ma i le aso 25 o Ianuari, 1900, sa palota ai se toatele o le Maota o Sui e vavaeeseina o ia.21
O le faateaga o B.H. mai le Maota o Sui na itulau pito i luma o nusipepa o le atunuu atoa. I Iuta, sa faamemelo le Peresetene Sili i le puipuia ma le lototele o B. H. o ana mataupu faavae i Uosigitone, ae na latou salamo ona o le tulaga le lelei na aafia ai le Au Paia o Aso e Gata Ai ona o le faaiuga o le palota. Na toe faasaga atu foi faitioga a le aufaasalalau Amerika i le Ekalesia.22
E ui lava o nisi o mea na lipotia mai e nusipepa e le sao, ae sa sao i latou i le itu autu: sa i ai pea autaunonofo i le Ekalesia. Ma sa le na o le faapea o alii ma tamaitai na faatumauina a latou faaipoipoga faaautaunonofo ina ua mavae le Manifeso.23 O le ola ai, aoaoina, ma le mafatia mo autaunonofo mo le silia ma le afa seneturi, e toatele le Au Paia e le mafai ona vaai faalemafaufau i se lalolagi e aunoa ma lena mea. O le mea moni, o nisi o sui o le Toasefululua—o lo o galulue faatasi ma le faamaoniga a George Q.Cannon, Joseph F. Smith, po o latou faatonu—na faia filemu faaipoipoga faaautaunonofo fou i le valu tausaga talu mai le Manifeso. I lena taimi, e toafa le au aposetolo sa faaipoipo foi i ni ava faaautaunonofo.
O le Au Paia na faʻaipoipo ina ua maeʻa le Manifeso na latou talitonuina e leʻi lafoai atoa e le Alii le faaipoipoga faaautaunonofo ae na aveesea le poloaiga paia mo le Au Paia e lagolagoina ma puipuia o se faiga masani a le Ekalesia.24 I le Manifeso, e le gata i lea, sa fautuaina e Wilford Woodruff le Au Paia e usitai i tulafono e tetee atu i le faaautaunonofo i le Iunaite Setete. Peitai, e leai sana tala i le pepa e uiga i tulafono a Mekisiko po o Kanata. O le tele o autaunonofo fou na tutupu i na atunuu, ma sa faia se vaega toaitiiti i le Iunaite Setete.25
I le taimi nei, i le lotolotoi o le paʻu o le palota a B. H. Roberts, na amata ai ona vaaia e taʻitaʻi o le Ekalesia le afaina o le lagolagoina o se tagata o le Au Paia e faia tulaga faaautaunonofo e tauva mo se avanoa i le malo. E le o se mea na latou faamoemoe e toe faia.26
Ia Aperila 1900, sa toe foi atu ai Zina Presendia Card, le afafine o le peresitene aoao o le Aualofa o Zina Young, i le fale i Cardston, Kanata, i le mavae ai o le faaaluina o le tele o vaiaso faatasi ma lona tina e 79 tausaga le matua i le Aai o Sate Leki. I le taimi o le asiasiga, sa malaga atu ai o ia ma lona tina i le Siteki o Oneida i Idaho i Saute e lauga i se konafesi a le Aualofa.
“Sa ia tu atu ma le lelei i le malaga, ma saunoa e pei o se agelu i ona uso,” sa lipoti atu e Zina Presendia i se tusi i lona uso laitiiti o Susa Gates. “Ua ou mitamita lava ia te ia.”
Ae o Zina Presendia sa popole e uiga i le matua o lona tina. O Cardston sa tusa ma le fitu selau maila le mamao mai le Aai o Sate Leki. Afai na faafuaseʻi ona sui le soifua maloloina o lona tina, atonu e le mafai e Zina Presendia ona toe vaai ia te ia ae leʻi maliu.27
I Cardston, sa faaauau ai e Zina Presendia ona tiutetauave o se peresitene o le YLMIA a le siteki o Alberta. E sefulufa tausaga talu ona talosaga atu Peresitene Ioane Teila i lana tane, o Charles Card, e taitai se vaega o le Au Paia faaautaunonofo i Kanata. Talu mai lena taimi, sa faavaeina ai e le Au Paia le tele o nuu i Alberta i Saute. O le Siteki a Cardston sa faavaeina i le 1895, faatasi ai ma Charles o le peresitene. E ui lava ua latalata ina maeʻa le vaitaimi o pulega a le Au Paia o Aso e Gata Ai, ae sa faaauau pea ona see atu aiga fou ma pisinisi i lea itu, ma fesoasoani e fausia le Ekalesia.28 O lenei sa toʻatele le autalavou laiti a le Au Paia i le eria, ma sa popole tele Zina Presendia mo latou.
Sa matua taumamao lava Cardston mai isi nofoaga, peitaʻi o ona tagata talavou e leʻi sao i latou mai faʻamaʻi e pei o taaloga faitupe ma le ava malosi. O nisi tagata matutua i le taulaga, sa ia iloaina, sa latou faia ni faataitaiga leaga mo le tupulaga talavou.29
E le gata i lea, sa manino lava o le autalavou o le Au Paia o Aso e Gata Ai i Cardston ma isi nuu e manaomia ona aoaoina atili e uiga i le ola mama. A o lei oo i le Manifeso, sa tele ni avanoa sa maua e tamaitai talavou e faaipoipo ai ma sa masani ona faia i se tausaga laitiiti. Ae ui i lea, o le tupulaga faiae na fuafua e faaipoipo i se taimi mulimuli ane, ma o nisi, aemaise lava o tamaitai, sa lei faaipoipo. O le uiga o lenei mea, o le toatele o tagata talavou sa faamoemoe e tumau i le mama mo ni vaitaimi uumi.30
Sa talanoaina e Zina Presendia nei faafitauli i se fonotaga tuufaatasi a le YLMIA ma le YMMIA a le Uarota a Cardston i le amataga o Me. “O fiafiaga o se taimi e masani ona aumaia ai le faanoanoaga mo le olaga atoa,” sa ia lapataia ai le autalavou. “E tatau ona tatou saili mo le lotomaualalo ma le alofa mama ma faia i isi e pei ona tatou mananao ia faia ai.”31
O lena tautotogo ma le taumafanafana, sa ia auai atu ai foi i nisi o sauniga o le YLMIA a le Uarota a Cardston. Sa feiloai le asosi i aoauli o Aso Lulu taitasi. O Mamie Ibey, o le peresitene e luasefulu-tolu tausaga le matua o le asosi o le uarota, sa masani ona taitaia fonotaga a o aoao atu e isi lesona. O isi masina uma lava, na faia ai foi e tamaitai talavou se sauniga molimau, ma tuu atu i tagata taitoatasi o le vaega se avanoa e molimau atu ai i lana tupulaga.32
I le aluga o le tausaga 1900, na lolomiina ai e le Tusi Talafaamaumau a le Tamaitai Talavou se faasologa o lesona e sefululua-vaega e taua o le “Ethics for Young Girls.” O masina uma lava e faaali mai ai se lesona fou, ua mamanuina taitasi e fesoasoani ai i tamaitai talavou ia iloa le sao mai le mea sese. O autu sa aofia ai le faamaoni, amio pulea, lototele, ola mama, ma le migao. O se faasologa o fesili e mulimuli ai i lesona taitasi, e uunaia ai tamaitai talavou e iloilo ma talanoaina anomea.33
Sa talitonu Zina Presendia o le auai atu e le aunoa i le MIA e mafai ona fesoasoani i le autalavou ma uunaia a latou faatinoga mo le lelei sili atu. I fonotaga, sa uunaia tamaitai talavou e tutu ese mai mea o le lalolagi ma mea sese. “E le tatau lava ona tatou maasiasi i le upumoni,” o le mea lea na aoao atu ai e Zina Presendia i latou, “e le faapea foi o i tatou o Mamona.”34
Sa ia uunaia foi o latou matua e taialaina i latou i luga o le ala o le amiotonu. I le amataga o lena tausaga, a o asiasi atu i se siteki i Idaho, sa ia faalogo atu i lona tina o toe fai mai se mea na aoao atu e Iosefa Samita i le Aualofa i Navu: “Toto ni manatu lelei i mafaufau o le fanau. Latou te matauina a tatou faataitaiga.” Sa talitonu Zina Presendia o lenei upumoni na faaaoga foi i Cardston.
“E tatau ona tatou faia ni faataitaiga lelei mo a tatou fanau,” na ia faamanatu atu ai i isi taitai ia Iulai, “ave i latou i o tatou lima ma o tatou loto, ma aoao i latou e aloese mai mea leaga uma.”35
I le afiafi o le aso 10 o Tesema, 1900, na vaaia ai e George Q. Cannon atumotu o Hawaii mo le taimi muamua talu mai lana misiona iina i le 1850. I le luasefulu-tolu o tausaga, sa avea ai o ia ma uii o uluai faifeautalai e toasefulu o le Au Paia o Aso e Gata Ai na auina atu i atumotu. O lenei, i le avea ai ma se fesoasoani i le Au Peresitene Sili, sa ia toe foi atu ai i le faamanatuina o le limasefulu tausaga o lo latou taunuu ma le amataga o le Ekalesia i Hawaii.36
I ni nai itula talu ona uma ona ia iloa atu atumotu, sa tuta Siaosi ma le latou pasese i le uafu i Honolulu i le motu o Oahu. Sa ia nofo i le po faatasi ma le Au Paia o Aso e Gata Ai i Hawaii o Aperaamo ma Minerva Fernandez ma faaalu le aso na sosoo ai i se taumafataga pe tusa ma le afe le Au Paia i se falelotu. O nisi sa auai sa papatisoina e Siaosi i le taimi o lana misiona. O isi o ni fanau ma ni fanau a ni tagata sa ia aoaoina.37
Sa ala ae Siaosi i le taeao na sosoo ai, 12 Tesema, ma le le mautonu e uiga i le talanoa atu i tagata Hawaii i le fiafia i le faamanatuina o le 50 tausaga. I le avea ai ma se faifeautalai talavou, sa ia faamemelo i lona tomai i le tautala atu ma le tusitusi i le gagana Hawaii. Ae sa seasea ona ia faaaogaina talu mai le taimi na sau ai i le fale, ma o lea ua popole o ia ona o le a le fiafia le au paia i lana fesasisasia’i i le gagana.38
Sa faia le faafiafiaga i se fale-tifaga fou i Honolulu. Sa faaaoga e taitai o le Ekalesia i le lotoifale se faili manaia, e lua aufaipese mai Honolulu ma Laie, ma isi vaega faamusika. I se fale o le malo lata ane, sa saunia ai foi e le Au Paia se taumafataga tele o taumafa Hawaii ma valaaulia tagata uma o le nuu e o mai. Ia Siaosi, sa foliga mai sa auai le aai atoa i le faafiafiaga.39
Ina ua oo mai le taimi mo Siaosi e lauga ai, sa amata lana lauga i le gagana Peretania, ma toe tomanatu ai i uluai aso o lana misiona, o nisi o ana soa na lafoai le galuega ma e sa nonofo ai tagata o le au paia e tautatala i le faaPeretania e leai se fiafia i le talalelei. “O iina na ou tetee ai,” na toe faamatala ai e Siaosi, “ma sa ia tautino atu lona naunau e nofo ai i nei atumotu ma galue ai i ona tagata.”40
A o ia saunoa, sa lagona e Siaosi le malosi o le Agaga i ona luga. O upu faaHawaii na faafuasei ona toe foi mai ia te ia, ma o lona le mautonu na alu ese atu ina ua amata ona ia tautala i le gagana. Sa maofa ma fiafia le Au Paia Hawaii . “Oka se manaia,” na fai mai ai se tasi, “o lona manatuaina o la matou gagana i nei tausaga uumi tele!”41
Sa faaauau pea le fiafia i le aso na sosoo ai, ma sa toe saunoa atu foi Siaosi i le Au Paia ma le mautinoa i la latou gagana. “Ua sili atu lou lagona i le aso nai lo sootaga e fusia faatasi ai le nuu o le Atua,” na ia tau atu ai ia te i latou. “O le mea e o mai ai tagata e talitonu i le talalelei ma o ifo i lalo i le vai o le papatisoga, e faateleina ai lo latou alolofa i le tasi ma le isi.”42
Sa faaalu e Siaosi le sili laitiiti atu ma le tolu vaiaso ma le au paia i Hawaii. A o i ai i le motu o Maui, sa asiasi atu o ia i le aai o Wailuku, lea sa ia maua ai lona uluai manuia i le avea ai ma se faifeautalai. Sa tele suiga i le taulaga na tauau a le mafai ona matauina, ae na faigofie lava ona ia maua le fale o ana uo o Ionatana ma Kitty Napela, o i laua uma na maliliu i le tele o tausaga ua mavae. O le au Napela sa pei o se aiga ia Siaosi, ma o Ionatana sa avea ma ona uso sa faaliliuina le Tusi a Mamona i le faaHawaii.43
A o ia asiasi atu i atumotu, sa maua e Siaosi ni uo fou se tele, e aofia ai Tomizo Katsunuma, o se alii Iapani na auai i le Ekalesia a o aoga i le Kolisi o Faatoaga i Iuta. Sa ia feiloai foi ia i latou na avea ma tagata o le ekalesia io latou olaga atoa, e ui i lo latou faamaoni, e lei mauaina lava sauniga o le malumalu. I le ootia ai ona o o latou tulaga, sa ia uunaia i latou e ola agavaa e ulu atu i le malumalu ma faaaoga le faatuatua o le a musuia e le Alii Lana perofeta e aumaia faamanuiaga o le malumalu ia i latou.44
I le aso o le malaga ese atu o Siaosi, e faitau selau le au paia ma le faili i le lotoifale na faafeiloaia lana taavale solofanua i le uafu i Honolulu. I le avea ai ma se taga mulimuli o lo latou alofa, sa agai atu ai i luma nisi o tamaiti e luasefulu ma le au paia matutua ma ufitia o ia i ula felanulanuai. Ona ia pe’a ai lea i luga o lona vaa, ma sa taina e le faili se fati faamavae.
I le toe tagai atu i le au paia i luga o le uafu, sa iloa e Siaosi o le a ia le faagaloina lava i latou. “Aloha nui,” sa latou valaau atu ai ia te ia, e faaalia ai lo latou alolofa ma le agaga faamavae. “Aloha nui.”45
“Ua oo mai se seneturi fou i luga o le lalolagi i le aso.”
Sa toe lagonaina le leo o LeRoi Snow i le Tapeneko i Sate Leki a o ia faitauina upu amata o se savali na tusi atu ai lona tama, o Lorenzo Snow i malo o le lalolagi.46
O le aso 1 o Ianuari, 1901, o le aso muamua o le seneturi lona luasefulu. O le tau i fafo sa matuai malulu lava, ae e sili atu ma le fa afe tagata na tuua le mafanafana o o latou fale i lena taeao e faamanatu ai le mea na tupu i se sauniga faapitoa ma le perofeta, isi au pulega aoao, ma le Aufaipese a le Tapeneko. O le Falefetafai lava ia na teuteuina mo le faamoemoe, ma faataupe i luga o paipa o le okeni ni fuifui o moli eletise o loo sipela ai le upu “Susu mai.”47
O le nofonofo ai i luga o le tulaga, e le mamao mai le mea na tu ai LeRoi, o Peresitene Snow lava ia, o lona leo na faaleagaina e le fulu. Faatasi ai ma isi au paia i totonu o le potu, sa ia faalogologo atu ma le naunautai ao faitau e LeRoi le savali. Na faʻaulutalaina “Faʻafeiloaʻi i le Lalolagi,” na atagia mai ai le ofoofogia o sailiga faʻasaienisi ma le faaleleia o tekinolosi o le selau tausaga talu ai ma sa faaalia ai le faamoemoe o Peresitene Snow mo le seneturi a sau.
I le savali, sa ia valaau atu ai i taitai o le lalolagi e lafoai le taua ma saili le “manuia o tagata” nai lo le “faatamaoaigaina o se tuuga po o le faalautelega o se malo.” Sa ia tautino mai, “Ua i ai le mana i o outou lima e saunia ai le ala mo le Tupu o Tupu, o lana puleaga o le a i luga o le lalolagi atoa.” Sa ia uunaia i latou e faalauiloa atu le filemu, tuu se mutaaga o le saua, ma galulue faatasi e faamutaina le mativa ma siitia le au le taualoa.
Na ia talosagaina foi le mauoa ma le mativa ina ia saili ni auala agaalofa atu e ola ai. “Ua latalata mai le aso o lo outou togiola,” na ia tau atu ai i e matitiva. “Ia faautauta i le manuia.” I le au mauoa, sa ia fautua mai ai ma le agalelei: “Tatala a outou pusa, tatala nonoa o a outou ato tupe, ma o atu i pisinisi o le a avatu ai le galuega i e le faigaluega ma faʻamalolo ai le malaia e tau atu ai i le amio leaga ma le solitulafono lea e fetuu ai ou taulaga tetele ma faʻaleagaina ai le siosiomaga mama i ou tafatafa.”
Sa ia molimau atu e uiga i le Alii ma Lana talalelei toefuataiina. “O le a Ia mautinoa lava le faataunuuina o Lana galuega,” na tautino mai ai e Peresitene Snow, “ma o le seneturi lona luasefulu o le a faailoga ai lona alualu i luma.”
Mulimuli ane, sa ia faamanuiaina tagata o le lalolagi, i soo se mea lava latou te i ai. “Tau ina ia i ai le susulu o le la i luga o oe,” o lana tala lea. “Talosia ia tuli e le malamalama o le upumoni le pouliuli mai i o outou agaga. Tau ina ia faʻateleina le amiotonu ma faʻaitiitia le amioletonu ma alu pea tausaga o le seneturi. Tau ina ia manumalo le faamasinotonu ma tulieseina le amio piopio.”
“Ia tuu atu nei upu, e fai ma leo o le ‘Au Mamona’ i atumauga o Iuta, ia o atu i le lalolagi atoa,” na ia tautino atu ai, “ma ia faailoa atu i tagata uma o lo tatou manao ma le tatou misiona e mo le faamanuiaga ma le faaolataga o tagata uma.”48