Talafaasolopito o le Ekalesia
Mataupu 6: Faamanuiaga i Soo Se Mea

Mataupu 6

Faamanuiaga i Soo Se Mea

itulau pito i luma o le nusipepa a Naitiria

I le tautotogo o le 1962, sa lofituina ai le sui auai o le fono faatonu o le MIA a Tamaitai Talavou o Ruth Funk i le tele o le galuega. O le a oo mai le konafesi faaletausaga a le MIA, ma o ia o se soa sa tuufaatasia se tala faamusika mo le gaoioiga. O le konafesi, lea na amata i le vaitaimi o le 1890, na aumaia ai le tusa ma le luasefululima afe taitai talavou i le Aai o Sate Leki ina ia maua fautuaga ma aoaoga faamasani mai taitai aoao o le Ekalesia. Sa mananao Ruta ma sui o lana komiti e faatulaga se faaaliga lelei ma manuia mo le konafesi, ma sa latou aoao foi ao faagasolo le faatinoina.

A o latalata mai le faafiafiaga muamua, sa talosagaina Ruta e auai i se fonotaga e uiga i le taulaiga o le Ekalesia. Na te lei iloaina pe aisea na valaaulia ai o ia, ma sa lei naunau o ia e alu. E pei ona sa i ai, sa tau le lava se taimi e vaai ai i lona toalua, o Marcus, ma le la fanau e toafa.

Ae, i le po atofaina, sa faanatinati atu ai Ruta i le fonotaga. O iina na ia maua ai se potu e tumu i tagata, e aofia ai nisi o taitai aoao o le Ekalesia, o talanoaina ai sini autu a le Ekalesia. Sa taitaia le fonotaga e Reed Bradford, o se alii polofesa o mataupu tau agafesootai mai le Iunivesite o Polika Iaga.

Sa lei fai atu e Ruta se tala i le taimi muamua. E ui i lea, i le taufaaiuiuga o le afiafi, sa faapea atu ai Reed, “Sister Funk, e te lei faailoaina mai ni ou manatu.”

“Ia, e i ai ou lagona malolosi,” sa ia tali atu ai. E pei o le toatele o tagata i le Iunaite Setete ma isi nofoaga, ua faateleina pea le popole o tagata o le Ekalesia e uiga i le tatalaina o faaipoipoga, solitulafono a tagata talavou, ma isi atugaluga faaagafesootai. “Ou te lagona e tatau ona faia mea uma e mafaia e faamamafa ai le malosi o le aiga,” o lana tala lea.

Sa maea le fonotaga, ma toe foi atu Ruta i isi ona tiutetauave. Mulimuli ane, ina ua maea le konafesi a le MIA ma sa manuia le faagasologa o le tala faamusika, sa ia maua se valaau i le telefoni mai le aposetolo o Marion G. Romney. “Ruta,” na ia fai atu ai, “ua matou valaauina oe e auauna atu i le Komiti o Faamaopoopo.”

Sa faanoanoa Ruta. “O le a le uiga o le Faamaopoopo?” sa ia fesili ai.

E lei umi ae ia iloaina i se fonotaga faamasani ma Elder Harold B. Lee. O le komiti sa nafa faapitoa ma le faaogatusaina o mataupu aoaoina uma a le Ekalesia ma mataupu faavae autu o le talalelei. Ae o le salalau vave atu o le Ekalesia i le lalolagi atoa, o le a tuu ai foi e le polokalama se faamamafa fou i le perisitua, aiga, ma le auaiga e totonugalemu i le talalelei toefuataiina a Iesu Keriso.

Sa faamatala e Elder Lee le vaaia e le komiti o polokalama mo tagata matutua, autalavou, ma tamaiti. Sa faateia Ruta, ina ua valaauina o ia i le komiti a tagata matutua e ui i le tele o tausaga o lona aafiaga ma le poto masani i le galulue ai ma le autalavou. E pei foi o ia, o isi sui auai o le komiti—e toatolu tamaitai, toalima alii—sa sili ona pisi i o latou tiutetauave tau i galuega ma aiga. O le sui aupito laitiiti e tolusefulu-fa tausaga le matua o Thomas S. Monson, lea faatoa maea ona auauna atu o se peresitene o le Misiona a Kanata faatasi ma lona faletua, o Frances.

A o mavae atu masina, ma sa amata e le komiti ona sailiili i fuafuaga o lesona ua tuanai a le Ekalesia, sa uunaia tagata uma e faailoa saoloto atu o latou manatu a o latou talanoaina le lumanai o mataupu aoaoina a le Ekalesia. Sa i le komiti ni tausaga o suesuega ma galuega i le lumanai, ae sa naunau lava Ruta e faia soo se mea na te mafaia e fesoasoani ai i le Ekalesia ia agai i luma.

I isi nofoaga i le laumua o le Ekalesia, o Henry D. Moyle—o se aposetolo, faipisinisi, ma sa avea muamua ma faauluuluga o le Polokalama Uelefea a le Ekalesia—sa auauna atu o se fesoasoani muamua faatoa valaauina o Peresitene MaKei.

Na muai valaauina o ia e le perofeta e auauna atu i le au peresitene faatasi ma le fesoasoani muamua o J. Reuben Clark ina ua mavae le maliu o Stephen L Richards ia Me 1959. I le lua tausaga mulimuli ane, na amata ai ona tulaga faaletonu le soifua maloloina o Peresitene Clark, o lea na tofia ai e Peresitene MaKei le aposetolo o Hugh B. Brown e faatasi ma i latou o se fesoasoani lona tolu i le au peresitene. Ina ua maliu Peresitene Clark ia Oketopa 1961, sa tofia loa e Peresitene MaKei ia Peresitene Moyle ma Peresitene Brown e avea ma ona fesoasoani muamua ma le lua.

I le avea ai ma fesoasoani muamua i le Au Peresitene Sili, sa aofia ai Peresitene Moyle i vaega uma o le polokalama faafaifeautalai a le Ekalesia, o se tiute sa ia fiafia tele i ai. I le salafa o le lalolagi, e toatele tagata sa fiafia tele i le faaKerisiano, ma sa nafa Peresitene Moyle ma le faamautinoaina e oo atu ia i latou le galuega aoga a misiona uma. I lalo o lana vaavaaiga, na faateleina ai papatisoga i le silia ma le 300 pasene i le lalolagi atoa, ma sa galulue faifeautalai i le averesi o le 221 itula i le masina—44 pasene e sili atu ai nai lo le 1960.

Faatasi ai ma lona talaaga i pisinisi, sa mafai ai e Peresitene Moyle ona talisapaia numera maualuluga ma pasene maualuluga. Peitai, i le galuega faafaifeautalai, e laitiiti lava le uiga o le toatele o tagata liliu mai pe afai e le umi a e le toe toaaga mai. Sa manao Peresitene Moyle e faamautinoa e faia e tagata ni suiga tumau i o latou olaga.

E pei o Peresitene MaKei, sa talitonu o ia i le auala “O Tagata Uma o le Ekalesia o se Faifeautalai” e faasoa atu ai le talalelei. Ae sa faapopoleina o ia i le tele o faafitauli na tulai mai i le auai mai o le autalavou i le Ekalesia i le na o le taaalo i au peisipolo a faifeautalai. Ma sa faanoanoa o ia ina ua faamamafaina e misiona numera faatulagaina nai lo le liua moni. A o ia feiloai ma faifeautalai, sa ia uunaia i latou e aoao aiga ma fesoasoani i tagata liliu mai ia lagona le taliaina i le Ekalesia. Sa ia toe ta’ua e manaomia e le autalavou le faatagaga mai o latou matua e papatisoina ai.

E lei leva ona faatulagaina le Komiti Faamaopoopo, ae auai atu Peresitene Moyle i se fonotaga lea na fautuaina ai e Elder Harold B. Lee le faalauteleina o le polokalama faamaopoopo ia faaaofia ai le galuega faafaifeautalai. O le manatu sa le mautonu ai Peresitene Moyle. Sa ia auauna atu i le tele o tausaga faatasi ma Elder Lee i le Polokalama o le Uelefea a le Ekalesia ma le Korama a Aposetolo e Toasefululua, ma sa ia mafaufau ia te ia o se uo mamae. Peitai, e ui ina sa ia faamaonia isi vaega o le faamaopoopoga, ae sa lei ioe o ia i lea tulaga.

O le umi lava e manatua ai e soo se tasi, o le galuega faafaifeautalai sa taitaia e le Au Peresitene Sili. Sa latou tuuina atu valaauga o misiona, tofia peresitene o misiona, ma fesootai sa’o atu i ofisa o misiona. Peitai, i lalo o le talosaga a Elder Lee, o se uso o le Korama a Aposetolo e Toasefululua, nai lo se fesoasoani i le Au Peresitene Sili, o le a taitaia le komiti a faifeautalai a le Ekalesia. O le a maua e le au peresitene ni lipoti tusitusia mai aposetolo o e na asiasi atu i misiona faapea foi ma lipoti tuugutu mai peresitene o misiona ua toe taliu mai, ae o le a faamatuu ese i latou mai le tele o le pulega tuusao i misiona.

I le aso 18 o Setema, na talanoaina ai e Peresitene Moyle ma Peresitene MaKei le fuafuaga faalauteleina o le faamaopoopoga a Elder Lee. O loo lelei lava le polokalama o loo i ai nei, sa ia faimai ai. “Afai e talia lenei fuafuaga fou,” na ia saunoa ai, o le a “aveesea atoa le faatautaia, puleaina po o le tiutetauave mo le galuega faafaifeautalai mai le vaaiga a le Au Peresitene Sili.”

“Sa i ai pea i o tatou lima talu le faavaeina o le Ekalesia,” o le faailoa mai lea a Peresitene MaKei. Ae faatasi ai ma le vave faatupulaia o le Ekalesia, o le a le pine ae faamatuu atu e le Au Peresitene Sili nisi o ana tiutetauave. E onosefulu fa misiona ma e silia ma le sefulu afe faifeautalai na tausia—ma o nei fuainumera o le a faatupulaia pea. I lea taimi ua faaalu ai e Peresitene Moyle ma fesoasoani e toalua le tele o itula i le vaiaso i valaauga faamisiona. Sa latou taulimaina foi fesootaiga e foliga mai e le muta faatasi ma peresitene o misiona i mataupu faaletaitai e pei o le faatauina o fanua mo falelotu.

Sa finagalo Peresitene MaKei i le Au Peresitene Sili e faaauau pea ona valaauina e i latou peresitene fou o misiona, e pei lava ona sa latou faia ai i taimi uma. Ae sa naunau o ia e faalogo atu i suiga o loo i le talosaga a Elder Lee. Sa ia fia faalogo atili e uiga i ai.

I ni nai masina mulimuli ane, i le aso 11 o Ianuari, 1963, sa lomia ai e le Deseret News se ulutala e lei faamoemoeina: “Tatalaina e le Ekalesia le Galuega Faafaifeautalai i Naitiria.”

O le faasilasilaga na oo mai i ni nai aso talu ona foi mai le aposetolo o N. Eldon Tanner ma lona faletua, o Sara, mai Aferika i Sisifo. I le taimi o le malaga e lua vaiaso, sa talanoa ai Elder Tanner ma nisi o taitai Naitiria, feiloai ma le faitau selau o le Au Paia faaolioli, ma faapaiaina le laueleele mo le talaiga o le talalelei toefuataiina. Ina ua toe foi atu le au Tanner i Iuta, sa valaauina e Peresitene MaKei ia LaMar Williams ma isi e auauna atu o ni faifeautalai i Naitiria i le taimi lava latou te maua ai ni visa malaga.

O Salesa Agu, o le taitai o se vaega o le Au Paia faaolioli i Aba, Niaitiria, sa olioli i le talafou. O lana faapotopotoga sa silia ma le 150 tagata, ma sa vave le faatupulaia. Ina ua asiasi atu LaMar i le atunuu i le 1961, sa faauo atu Salesa ia te ia ma faatasi atu ia te ia i vaega o lana malaga asiasi. Sa malamalama lelei o ia ma lana aulotu i le talalelei ma sa i ai se faatuatua tumau i le Toefuataiga. A o lei toe foi atu LaMar i le Iunaite Setete, sa pueina e Salesa se savali mo Peresitene MaKei. “Matou te talitonu o lenei Ekalesia ua i ai faaaliga ma valoaga uma e manaomia e le Atua e taiala ai Lona nuu i le ala sa’o,” na ia molimau atu ai. “O lea o le a matou le teena ai lenei Ekalesia ona o lo matou le mauaina o le perisitua.”

Talu mai lena taimi, sa tele fetusiaiga a Salesa ma LaMar, ma sa tau le mafai e Salesa ona faatali mo LaMar e toe foi atu ma faatuina aloaia le Ekalesia i Aferika i Sisifo. “Ia i matou uma iinei, o se taimi lenei o le faamoemoe tele,” na ia tusi atu ai ia LaMar ia Fepuari 1963.

Ona sa le mafai ona ia umia le perisitua, o lea sa malamalama ai Salesa o le a le mafai ona ia auauna atu o se peresitene o le paranesi i le taimi lava e faatuina ai le Ekalesia i Naitiria. Peitai, i le taimi o le asiasiga a Elder Tanner, sa faamalamalama atu ai e le aposetolo e faapea o Salesa ma isi taitai Naitiria o le a faaauau pea ona taialaina a latou aulotu o ni taitai itu po o ni vaega e lei faauuina. O le a faatumuina foi e le Au Paia Naitiria valaauga uma e le manaomia ai le faauuina i le perisitua.

I le aluga o vaiaso taitasi, sa faamoemoe Salesa e faalogo atu ua agai atu LaMar i Naitiria. Ae i le toetoe lava o tusi uma na ia auina atu, sa tusia ai e LaMar o loo ia faatali mo le malo o Naitiria e faamaonia lona visa malaga. E leai se tasi e mafai ona faamalamalama le pogai o le faatuai.

Ona oo lea ia Mati, na tau ai Salesa i se tusiga e uiga i le Ekalesia i se nusipepa na ta’ua o le Nigerian Outlook (Vaaiga i Naitiria). Sa faamatalaina e uiga i se tamaitiiti aoga Kolisi Naitiria o le sa asiasi atu i se sauniga a le Au Paia o Aso e Gata Ai i Kalefonia. I le sauniga, sa faateia lea alii i lona iloaina e uiga i le tapulaa o le perisitua ma mafuaaga sa faaaoga e faamalamalama ai.

“Ou te le talitonu i se Atua o lē e talai atu e e mulimuli ia te ia le silisili o le tasi ituaiga tagata e sili atu lo le isi,” na tusia ai e le alii i lana tusiga. Sa talitonu o ia o le a faaleagaina ai le tulaga tauleleia o Naitiria pe a faatuina le Ekalesia i le atunuu.

Ua na o ni nai tausaga talu ona maua e Naitiria lona tutoatasi mai Peretania Tele, ma o le tusiga na atagia mai ai le faateleina o le masalosalo i faatosinaga mai fafo i le atunuu. O le talitonu ai o le tusiga sa i ai se mea e faatatau i le tusi o le visa, na auina atu ai e Salesa i a LaMar. Sa ia manatu o le i ai o se sui aloaia mai le laumua o le Ekalesia e ono fesoasoani e tali atu i le faaleagaina na faia e le tusiga.

Sa lē ioeina e LaMar. Sa fautuaina atu e taitai o le Ekalesia se misiona i Naitiria ona e faitau afe tagata Naitiria sa sailia ma le onosai faifaipea le talalelei toefuataiina. Afai e i ai se tasi o le a tautala e puipuia le Ekalesia i Naitiria, na talitonu LaMar, e tatau lea i se tagata talitonu Naitiria. “Ou te mautinoa o a outou tatalo ma musumusuga o le a outou faia ma fai atu ai na mea o le a faatalitonuina ai taitai o le malo i lo tatou faamaoni,” na ia tusi atu ai.

Sa feiloai Salesa ma Dick Obot, o se isi Au Paia Naitiria faaolioli, ma sa la’ua tuuina faatasi se faasalalauga e uiga i le Ekalesia i le Vaaiga i Naitiria. I lea faasalalauga, sa la’ua molimau atu ai i le Toefuataiga o le talalelei a Iesu Keriso e ala i le perofeta o Iosefa Samita, o le matafaioi a faaaliga i ona po nei i le faatuina o aoaoga faavae, ma le popolega o le Ekalesia mo le manuia faaleagaga ma le faaletino o tagata uma.

Sa faamoemoe Salesa o le a fesoasoani le faasalalauga e suia ai mafaufau ma loto e uiga i le Au Paia. Ae na te lei mauaina le Ekalesia, sa ia ulaula, inu ava malosi, ma ola i se olaga le pulea lelei. O le taimi nei ua ese o ia.

“Ua ou maua le olioli i lo’u olaga, alualu i luma i la’u galuega, ma faamanuiaga i soo se mea,” na ia ta’u atu ai ia LaMar.

Ia Mati 1963, i le fa masina talu ona uma lona papatisoga, na manao ai Delia Rochon e sefulutolu tausaga le matua e totogi le sefuluai. Sa avea o ia o se tagata auai o le paranesi pe tusa ma le luasefulu tagata i Kolonia Suiza, o se aai i Iurukuei i Saute. Sa ia iloa o le sefuluai o se poloaiga, ma sa naunau o ia e faia mea uma na poloaiina ai o ia e le Alii. Na pau lava lona faafitauli o le leai o sana tupe maua.

Sa alu o ia i lona tina, e le o se tagata o le Ekalesia, mo se fautuaga. Sa fautuaina e lona tina na te sailia se auala e maua ai se tupe.

Sa malie se tuaoi matua e totogi Delia e aumaia ia te ia se vai inu mama fou. O aso taitasi, e ave ai e Delia se pesini mataetae i se vaieli e latalata i lona fale, faatumu i le vai pe a ma se kalone, ma ave atu i le fale o le tuaoi matua. Ina ua mavae ni nai vaiaso o le sefeina o ana tupe maua, sa ia aveina atu se peso mo le sefuluai ia Victor Solari, o lona peresitene o le paranesi.

“O le a le tele o le tupe na e maua?” na fesili atu ai le peresitene.

“E tolu peso,” na tali atu ai Delia.

“Ia,” na saunoa ai Peresitene Solari, “O le sefuluai e 10 pasene.” O le tasi peso—o le tasi vaetolu o le mea sa ia maua—sa tēlē naua.

“Ae ou te fia tuuina atu le tupe,” o le tala lea a Delia.

Sa mafaufau i ai Peresitene Solari i lenei mea. “Ia,” sa ia fai mai ai, “fai se taulaga anapogi.” Sa ia faamatalaina po o a taulaga anapogi ma sa fesoasoani i a Delia e faatumu lana uluai lisiti foai.

I se taimi puupuu mulimuli ane, sa talosaga ai Peresitene Solari e feiloai ma Delia. E lei valaauina muamua lava o ia i lona ofisa, o lea sa popole ai o ia. Sa o se tamai potu sa i ai se kesi uamea ma ni nai fatatusii sa laina ai tusi lesona a le Ekalesia. Ina ua ia nofo i se nofoa i tafatafa o le kesi, sa lei papa’i ona vae i le fola.

Sa taulai sa’o atu lava Peresitene Solari i le mataupu. Sa faatoa siitia ese atu le peresitene o le Peraimeri a le paranesi mo se galuega faafaiaoga i se isi eria, ma sa manao Peresitene Solari e suitulaga ai Delia.

I taimi ua tuanai, sa masani ona taitai faifeautalai i tulaga faaleautaitai o paranesi. Ae o Tomasi Fyans, o le peresitene o le Misiona a Iurukuei, sa o se tagata talitonu mausali i le faamaloloina o faifeautalai Amerika i Matu mai tofiga faaleautaitai ma valaau i ai le Au Paia i le lotoifale. O le faia o lea mea na avea ma se faamuamua mo misiona a Amerika i Saute talu mai le malaga asiasi a Elder Kimball i le konetineta i le 1959. O le tuuina atu o nisi avanoa i le Au Paia i le lotoifale—e oo lava i le Au Paia o e sa na o le sefulutolu tausaga le matutua—sa vaaia o se laasaga taua agai i le faatuina o siteki i Amerika i Saute.

E lei alu lava Delia i le Peraimeri a o laitiiti. Na te lei iloaina moni le mea e faia e se peresitene o le Peraimeri. Ae, sa ia taliaina lava le valaauga, ma sa ia maua se lagona lelei.

Ae sa popole o ia i le ala o le a tali atu ai ona matua i le talafou. Sa tatala le la’ua faaipoipoga, ma e leai se tasi o i la’ua e auai i le Ekalesia. O le aiga o lona tamā o ni Porotesano a’ia’i ma sa latou le faamaonia lona avea ai ma tagata o le Ekalesia. Sa sili atu ona taliaina e lona tina Katoliko ona talitonuga, ae sa popole o ia i le faalavelave ai o le valaauga i ona tiutetauave i le fale ma le aoga.

“O le a ou talanoa i lou tina,” na saunoa ai Peresitene Solari.

Sa manaomia sina faatalitonuina, ae sa ausia e le peresitene o le paranesi ma Delia se maliega ma lona tina: O le a faia e Delia ana feau i le taeao po o le Aso Toonai, o le aso e faia ai le Peraimeri i lana paranesi, ona faatagaina lea o ia e faia soo se mea na te manaomia e faataunuu ai ona tiute i le Ekalesia.

Ina ua uma ona vaetofiaina o ia, sa galue loa Delia i lona valaauga fou. Talu ai e laitiiti tele lana paranesi, o lea sa nafa ai o ia ma le taitaiga ma le aoaoina o tamaiti o le Peraimeri. Mo se aoaoga faamasani, sa tuuina atu ai e Peresitene Solari ia te ia se tusi lesona mafiafia a le Peraimeri ma ni pepa o faatonuga e lua itulau.

“Afai e i ai ni au fesili,” na ia fai mai ai, “tatalo!”

A o lei saunia lana lesona muamua, sa faitau e Delia ia faatonuga. Ona ia tatalaina lea o le tusi lesona a le Peraimeri, tuu ona lima i luga o itulau, ma punou lona ulu.

“Tama Faalelagi,” na ia fai atu ai, “E tatau ona ou aoao atu lenei lesona i tamaiti, ma ou te le iloa pe faapefea. Faamolemole, fesoasoani mai ia te a’u.”

Pe tusa o le taimi lava lea e tasi, sa malaga atu ai Suzie Towse e sefuluvalu tausaga i luga o se nofoaafi mo Lonetona. Ua toeitiiti atoa le lua tausaga talu ona papatiso o ia i le Paranesi a Beverley, ma o lea ua alu atu o ia e auauna atu i se misiona o se failautusi i le ofisa o le Matagaluega o Fale a le Ekalesia i le Malo Tuufaatasi.

Sa le fiafia ona matua ua ia tuua le aiga. O le mea moni, o lona tina, o le sa auai i le Ekalesia ae lei leva ona auai Suzie, sa i ai ni lagona faigata e faasaga i le Ekalesia ina ua faatiga se faifeautalai ia te ia. Ae e lei faavaivaia ai Suzie. O le auauna atu i se misiona sa avea ma ana sini talu ona auai i le Ekalesia.

O Geoff Dunning, o se alii talavou mai lana paranesi, na faaeeina o ia i le nofoaga o nofoaafi. Sa auai o ia i le Ekalesia pe a ma se tausaga na muamua atu, ma sa avea i laua ma ni uo a o auauna atu faatasi i le komiti faaaumea a le paranesi. O le molimau malosi ma le galue malosi o Geoff na gauai atu ai taitai o le Ekalesia i le lotoifale, ma sa auauna o ia i ni valaauga eseese.

A o malaga atu o ia i saute, sa tulimatai atu Suzie e auauna atu i le Matagaluega o Fale. Ua amata e le Ekalesia lana polokalama faafaifeautalai galue i Europa ia Iulai 1960. E lei leva ae amata ona valaauina e peresitene o misiona le faitau selau o le Au Paia i le lotoifale, e aofia ai nisi o alii talavou o e sa tumau le toaaga ina ua uma ona auai i le Ekalesia e ala i au peisipolo o le misiona, e auauna atu o ni “faifeautalai faufale.” O lea la ua mafai nei e le Au Paia Peretania ona tulimatai atu e fono i potu fou tetele o falesa nai lo falefaafiafia mautotogi e feomai ai. O le mea moni, ua leva ona faaalu e Suzie ma Geoff le tele o afiafi ma Aso Toonai e fesoasoani ai i le galuega a faifeautalai faufale i se falesa i Beverley.

Na maua e Suzie lona valaauga e auauna atu mai ia Grant Thorn, o le peresitene o le Misiona fou i Matusasae Peretania. O le tausaga aupito maualalo mo tamaitai talavou na valaauina i misiona talai sa luasefulu-tasi, ae o faifeautalai faufale e mafai ona valaauina i se vaitausaga laiti ifo. Talu ai sa galue Suzie o se failautusi i se kamupani tausitusi, sa ia iloa ai le auala e faamaea ai ni galuega eseese o le ofisa. Ina ua faatalanoaina o ia e le Matagaluega o Fale e uiga i lona poto masani i le galuega faafailautusi, sa pasi o ia “ma le maualuga tele.”

I Lonetona, na siitia atu ai Suzie i se fale mautotogi faatasi ma isi tamaitai faifeautalai e toalua. Sa latou amata i taeao taitasi i le ofisa i se tatalo, se viiga, ma se mau. O le vaega na totoe o latou taimi sa faaaluina e ta ai tusi, tusia minute i fonotaga, tusia faamatalaga pupuu, ma auai ma tausia faamaumauga o faapaiaga o falesa.

Faatasi ai ma falesa o loo fausiaina sa i ai se falelotu i Merthyr Tydfil, Uelese, o le nofoaga na fanau ai le tina o Peresitene MaKei. O le suatia o lona eleele na tupu ia Mati 1961, ma na malosi le alualu i luma o le galuega ia Ianuari 1963, ina ua tonu i le perofeta e faapaiaina patino e ia le fale. I le isi valu masina na sosoo ai, sa tuuto ai e faifeautalai ma le Au Paia le silia ma le tolusefulu afe itula e fausia ai le falesa, ma faamaeaina i le aso 23 o Aokuso.

E lua aso mulimuli ane, ae o mai Suzie ma le afe toluselau o isi tagata i le falelotu fou mo le faapaiaga. O le taimi lava na ia vaai ai ia Peresitene MaKei, sa faatumulia lona agaga i se lagona o le filemu ma le alofa. Sa ia iloaina i lena lava taimi lona i ai i le mea o loo afio ai le perofeta a le Atua.

I ni nai masina talu ona uma le faapaiaga, sa maua ai e Suzie se tusi faaootia loto mai lona tina. “Afai e te le sau nei i le fale,” na tusi atu ai lona tina, “e le tatau lava ona e toe foi mai.”

Sa lei manao Suzie e faatiga i ona matua, ae sa lei manao foi o ia e tuua lana misiona. “O nisi taimi e faigata ona iloa le mea e fai pe a fautuaina oe e ou matua i se mea e fai ae aoao atu e le Ekalesia se isi mea,” sa ia tautino atu ai i se tusi ia Geoff. “Ua sili ona ou lagona le le mautonu ma le popole.”

E lei umi, ae ia tau atu ia Peresitene Thorn lona faafitauli. “Nofo ma faauma lau misiona,” na ia fautua atu ai. “O le a saunia e le Alii se ala.”

Sa teufatuina e Suzie lana fautuaga. “O le a malamalama o’u matua i se aso,” sa ia fai atu ai ia Geoff. “Ou te iloa ou te le alu ese lava mai lo’u aiga pe ana le o le galuega a le Alii.”

Ina ua tuuina atu e Elder Harold B. Lee ma lana komiti le latou fuafuaga faaiu mo le faamaopopoga faaleperisitua i le Au Peresitene Sili ma le Korama a Aposetolo e Toasefululua i le amataga o le 1963, sa vave lava ona faamaonia e Peresitene MaKei. “E matagofie le mea atoa,” na ia fai atu ai.

O le fuafuaga ua aofia ai le polokalama atoa a le Ekalesia, o se faalautelega taua o le uluai poloaiga a le komiti e faamaopoopoa mataupu aoaoina. O le a le toe lolomiina e faalapotopotoga a le Ekalesia ia lesona po o le tuuina atu o aiaiga faavae e aunoa ma se taitaiga mai le au pulega aoao. Na vaevaeina e le polokalama fou le puleaina o le Ekalesia i ni eria se fa—uelefea, gafa ma le malumalu, faiaoga o aiga, ma faifeautalai. O nei eria taitasi o le a vaavaaia e se komiti pe tusa ma le luasefulu-lima tagata, e taitaia e se aposetolo po o le epikopo pulefaamalumalu.

Ina ua saunoa Elder Lee e uiga i le polokalama o faamaopoopoga i le konafesi aoao ia Aperila, sa ia faamalamalama mai o le aiga o le faavae lea o se olaga amiotonu ma sa i ai faalapotopotoga a le Ekalesia i lalo o le pule o le perisitua e fesoasoani ai ma lagolagoina. “O luga o nei faavae,” na ia saunoa ai, “ua taialaina ai matou i a matou suesuega faalefaamaopopoga o mataupu aoaoina ma gaoioiga a le perisitua ma faalapotopotoga uma a ausilali.”

Sa faatuatua Peresitene Moyle ma Peresitene Brown i le valaauga o Peresitene MaKei o se perofeta a le Atua. Ae, e ui lava i lana faamaoniga o le polokalama, sa i ai ni o la le mautonu e uiga i nisi o ona vaega. Ina ua uma ona fefautuaai ma Elder Lee, sa tuuese e Peresitene Brown ona popolega, ma sa taliaina e Peresitene Moyle le tele o le fuafuaga. Ae sa faaauau pea ona ia fesiligia pe tatau ona latou suia le vaavaaiga o misiona mai le Au Peresitene Sili i le Korama a Aposetolo e Toasefululua.

Sa avea Elder Lee ma Peresitene Moyle ma se paaga vavalalata mo le tele o tausaga. Ina ua valaauina Peresitene Moyle i le Au Peresitene Sili, sa tau le mafai ona taofiofia e Elder Lee lona olioli. “Sa toetoe lava a le talitonuina lona moni,” na ia tusia ai i lana apitalaaga. Mulimuli ane, ina ua maliu le faletua o Elder Lee, o Fern, sa faamafanafanaina o ia e Peresitene Moyle ma sa saunoa i lona falelauasiga. Ia, sa moomoo Elder Lee ia maua le lagolago ma le loto atoa a lana uo mo le faamaopoopoga.

A o sauni le Ekalesia e falauiloa atu le polokalama fou, sa amata ona faamasani Elder Lee ia Joan Jensen, o se faiaoga o lana tupulaga ma e lei faaipoipo lava. Ina ua uma ona filifili e faaipoipo, sa la’ua talosaga atu ia Peresitene MaKei pe mafai ona ia faatinoina le sauniga, ma sa malie i ai le perofeta ma le loto fiafia.

O le aso a o lumanai le faaipoipoga, sa talosaga atu ai Elder Lee ia Marion G. Romney, o le sa avea foi ma se uo mamae ma Peresitene Moyle, e avea ma se tasi o molimau. A o feiloai faatasi nei alii e toalua, sa savali atu Peresitene Moyle ma talosaga pe mafai foi ona ia auai i le sauniga. I sina taimi, na mou ese atu ai le mamao i le va o nei alii e toalua, ma sa le toe taua o laua eseesega i le faamaopoopoga.

“E te manao e avea ma se molimau?” O le fesili lea a Elder Lee.

Na ootia le loto o Peresitene Moyle. “E te faatagaina a’u e fai ma molimau?”

“Afai o le a faatinoina e Peresitene MaKei le ma faaipoipoga ma o oulua o ni molimau,” na saunoa ai Elder Lee, “o le a manaia tele.”

O le taeao na sosoo ai, sa faamauina ai e Peresitene MaKei ia Harold ma Joan o se tane ma se ava i le Malumalu o Sate Leki. Sa avea Elder Romney ma Peresitene Moyle o ni molimau i le sauniga paia.

I ni nai masina mulimuli ane, ia Setema, na lele atu ai Peresitene Moyle i Florida, i sautesasae o le Iunaite Setete, e asiasi i le 300,000 eka o lafu povi sa umia e le Ekalesia ma faagaoioia e fesoasoani e faatupe ai lana polokalama e tausia ai e matitiva.

I le taimi lea, sa i ai Elder Lee i Hawaii e pulefaamalumalu i se konafesi faalesiteki. I se tasi taeao po, sa fafagu ai o ia e se telefoni mai Iuta. O Peresitene Brown lea na valaau atu e faailoa atu ia te ia ua maliu Peresitene Moyle a’o moe a o i ai i le lafumanu i Florida. I le faateia ai, sa toe foi atu ai Elder Lee i se vaalele i lena lava taeao.

E tolu aso mulimuli ane, i le falelauasiga o Peresitene Moyle, sa tulai ai Elder Lee i le pulelaa o le Tapeneko i Sate Leki ma saunoa e uiga i le faauoga na la faasoaina ma Marion G. Romney ma Henry D. Moyle.

“O i matou o ni alii loto-malolosi, ma finau, o i matou ia e toatolu,” na ia saunoa ai. “Ae ou te manatu e lei i ai lava ni alii se toatolu na sili atu ona faaaloalo o le tasi i le isi nai lo matou.”

  1. Funk, Oral History Interview, 126–27, 129; Peterson and Gaunt, Keepers of the Flame, 106–9; Au Paia, voluma 3, mataupu 4; “General Boards Guide Mutual Aides through Days of Play, Study, Work,” Church News, June 23, 1962, 3–4.

  2. Funk, Oral History Interview, 126–27; “Outlines Assist Parents to Teach Gospel,” Church News, Jan. 13, 1962, 14.

  3. Funk, Oral History Interview, 126–27; Spencer W. Kimball, in One Hundred Thirty-First Semi-annual Conference, 33; Mintz and Kellogg, Domestic Revolutions, 179, 194–205; Holt, Cold War Kids, chapter 3; Patterson, Grand Expectations, 369–71; Relief Society, General Board Minutes, volume 34, Feb. 21, 1962, 39–40.

  4. Funk, Oral History Interview, 127; Funk, “Ruth, Come Walk with Me,” 119–20; “General Boards Guide Mutual Aides through Days of Play, Study, Work,” Church News, June 23, 1962, 3. Autu: Tuputupua’e o le Ekalesia; Faamaopoopoga; Harold B. Lee

  5. Curriculum Department, Priesthood Correlation Executive Committee Minutes, June 12, 1962, 40; Funk, “Ruth, Come Walk with Me,” 119–20; “Pres. Monson Reports Canada Mission Labors,” Church News, Feb. 3, 1962, 6. Autu: Thomas S. Monson

  6. Curriculum Department, Priesthood Correlation Executive Committee Minutes, Nov. 1, 1962, 58; Funk, “Ruth, Come Walk with Me,” 120–21; Pulsipher, Ruth Hardy Funk, 113–15; Norman R. Bowen, “Announcement Made of First Application of Church Correlation Program,” Church News, Dec. 29, 1962, 14.

  7. Poll, Working the Divine Miracle, chapters 9 and 10; Anderson, Prophets I Have Known, 146–53; McKay, Diary, May 19, 1959; June 12, 14, and 18, 1959; June 21–22, 1961; Oct. 6 and 12, 1961; Romney, Journal, Oct. 27, 1960; Nov. 3, 1960; Dec. 7, 1960; Brown, Abundant Life, 131–32. Autu: Au Peresitene Sili

  8. McKay, Diary, June 12 and 26, 1959; Poll, Working the Divine Miracle, 199–205; Anderson, Prophets I Have Known, 147–48; First Presidency, Minutes, Sept. 18, 1962, First Presidency, General Administration Files, 1923, 1932, 1937–67, CHL; Mullin, Short World History of Christianity, 275, 280, 290. Autu: Tuputupu A‘e o le Galuega Faafaifeautalai

  9. Henry D. Moyle, Address, Berlin Mission Missionary Conference, Oct. 18, 1961, 185–87, Henry D. Moyle Papers, CHL; First Presidency to Mission Presidents, Nov. 30, 1962, David O. McKay Papers, CHL; Henry D. Moyle, Address, Mission Presidents’ Seminar, June 26, 1961, 7–8, Missionary Department, Seminar for Mission Leaders, CHL; Tanner, Journal, July 17, 1961; June 6, 1962; July 17, 1962.

  10. Poll, Working the Divine Miracle, 211; Quorum of the Twelve Apostles, Missionary Committee Minutes, Nov. 20, 1962; Henry D. Moyle, Address, French East Mission Supervising Elders’ Conference, Feb. 12, 1963, 131, Henry D. Moyle Papers, CHL; Marion D. Hanks to First Presidency, Apr. 17, 1962; First Presidency to Marion D. Hanks, May 11, 1962; Mark E. Petersen to First Presidency, Feb. 8, 1961, First Presidency, Mission Correspondence, 1964–2010, CHL.

  11. Quorum of the Twelve Apostles, Missionary Committee Minutes, Nov. 20, 1962; First Presidency to Mission Presidents, Nov. 30, 1962, David O. McKay Papers, CHL; Henry D. Moyle, “Jurisdictions and Procedures for Missions,” Mar. 18, 1961, 13–14, 16, Henry D. Moyle Papers, CHL; Tanner, Journal, Feb. 2 and June 6, 1962; British Mission, Manuscript History and Historical Reports, July 11, 1962.

  12. Council Minutes, Aug. 30, 1962, First Presidency, General Administration Files, 1923, 1932, 1937–67, CHL; Romney, Journal, Aug. 30, 1962, and Feb. 1, 1963; First Presidency, Minutes, Sept. 18, 1962, First Presidency, General Administration Files, 1923, 1932, 1937–67, CHL; Anderson, Prophets I Have Known, 148–49; Henry D. Moyle, Address, New England Mission Missionary Conference, May 21, 1962, Henry D. Moyle Papers, CHL; Poll, Working the Divine Miracle, 85, 183–84.

  13. First Presidency, Minutes, Sept. 18, 1962, First Presidency, General Administration Files, 1923, 1932, 1937–67, CHL; tagai foi Tanner, Journal, July 28, 1962; “Church Officials Visit 21 Missions in Europe,” Church News, Aug. 11, 1962, 3; ma le McKay, Diary, Aug. 9, 1962.

  14. First Presidency, Minutes, Sept. 18, 1962, First Presidency, General Administration Files, 1923, 1932, 1937–67, CHL; Quorum of the Twelve Apostles, Missionary Committee Minutes, Oct. 4, 1960, ma Jan. 7, 1964; Spencer W. Kimball, Journal, Nov. 21, 1963; tagai foi, mo se faataitaiga, Spencer W. Kimball to First Presidency, May 29, 1964; ma le J. Vernon Sharp and Fawn Hansen Sharp, Andes Mission Report, Oct. 30, 1963, First Presidency, Mission Correspondence, 1964–2010, CHL. O Autu: Au Peresitene Sili; Korama a le Toasefululua

  15. First Presidency, Minutes, Sept. 18, 1962, First Presidency, General Administration Files, 1923, 1932, 1937–67, CHL; “Spirit of Conversion Places 75,500 on Mission Records,” Church News, Dec. 30, 1961, 4.

  16. “Church to Open Missionary Work in Nigeria,” Deseret News and Salt Lake Telegram, Jan. 11, 1963, B1; “Elder Tanner Arrives Home after Two-Year Assignment in Europe,” Church News, Jan. 12, 1963, 3; Tanner, Journal, Dec. 24 and 28–30, 1962; Jan. 2, 1963; McKay, Diary, Jan. 10, 1963; tagai foi “Envoys to Go to Nigeria LDS Mission,” Salt Lake Tribune, Jan. 12, 1963, B9.

  17. First Presidency, Minutes, Oct. 11, 1962; Missionary Setting Apart Blessing for LaMar Williams, Nov. 21, 1962, First Presidency, Mission Correspondence, 1964–2010, CHL; David O. McKay to N. Eldon Tanner, Sept. 4, 1962, David O. McKay Papers, CHL; McKay, Diary, Jan. 10, 1963; LaMar Williams, Memorandum, Jan. 16, 1963, David O. McKay Papers, CHL; “Five Missionaries Sent to Nigeria,” Church News, Jan. 19, 1963, 7. Autu: Naitiria

  18. McKay, Diary, Jan. 10, 1963; Charles Agu to LaMar Williams, Feb. 14, 1963; Feb. 18, 1963, Missionary Department, Africa and India Correspondence, CHL; Williams, Journal, Oct. 23 and 28–31, 1961; Nov. 1–2, 5, ma le 12, 1961, [24]–[26], [29]–[30], [32]; Charles Agu and LaMar Williams to David O. McKay, Nov. 3, 1961, LaMar S. Williams Papers, CHL; LaMar Williams to Charles Agu, Dec. 20, 1961; June 5, 1962; Dec. 17, 1962, Missionary Department, Africa and India Correspondence, CHL. Autu: Faatapulaaga o le Perisitua ma le Malumalu

  19. Tagai, mo se faataitaiga, LaMar Williams to Charles Agu, Jan. 17, 1963; Mar. 12, 1963, Missionary Department, Africa and India Correspondence, CHL.

  20. Charles Agu to LaMar Williams, Mar. 16, 1963, Missionary Department, Africa and India Correspondence, CHL; “Evil Saints,” and Ambrose Chukwu, “They’re Importing Ungodliness,” Nigerian Outlook (Enugu), Mar. 5, 1963, 3, i le Williams, Journal, Mar. 5, 1963, [55]–[63]; “Race and the Priesthood,” Gospel Topics Essays, ChurchofJesusChrist.org/study/manual/gospel-topics-essays.

  21. Allen, “West Africa before the 1978 Priesthood Revelation,” 210–11; Charles Agu to LaMar Williams, Mar. 16, 1963; Apr. 30, 1963, Missionary Department, Africa and India Correspondence, CHL; tagai foi LaMar Williams to Charles Agu, Apr. 17, 1963, Missionary Department, Africa and India Correspondence, CHL; and Stevenson, “Latter-day Saint Experience in West Africa,” 591.

  22. LaMar Williams to Charles Agu, May 28, 1963, Missionary Department, Africa and India Correspondence, CHL.

  23. Charles Agu to LaMar Williams, June 8, 1963, Missionary Department, Africa and India Correspondence, CHL; Charles Agu and Dick Obot, “What You Ought to Know about The Church of Jesus Christ of Latter-day Saints,” Nigerian Outlook (Enugu), June 26, 1963, 5, i le Williams, Journal, [79].

  24. Charles Agu to LaMar Williams, June 8, 1963, Missionary Department, Africa and India Correspondence, CHL; tagai foi Charles Agu to LaMar Williams, July 11, 1963, Missionary Department, Africa and India Correspondence, CHL.

  25. Rochon, Interview, 1–2, 12–13, 47–49; Colonia Suiza Branch, Minutes, Nov. 18, 1962, ma Feb. 24, 1963, 231, 247; Delia Rochon to James Perry, Email, Dec. 2, 2021, Delia Rochon Interviews, CHL; Solari, Oral History Interview, [3]; Rochon, Come and See, 1–2, 12.

  26. Rochon, Interview, 12–13, 47–49; Delia Rochon, Tithing Slip, Apr. 14, 1963, Delia Rochon Interviews, CHL. Ua faasa’oina upusii mo le sa’o atoatoa; o le uluai punavai, na faasa’oina mulimuli ane e le tagata na faatalanoaina, e “tolu tālā.” Autu: Sefuluai

  27. Rochon, Come and See, 8–9; Rochon, Interview, 21–22; Colonia Suiza Branch, Minutes, Apr. 28, 1963, 256; A. Theodore Tuttle to First Presidency, Mar. 27, 1962, First Presidency, Mission Correspondence, 1964–2010, CHL; Grover, Land of Promise and Prophecy, 162–66. O Autu: Valaauga i le Ekalesia; Iurukuei

  28. Rochon, Come and See, 8–9; Rochon, Interview, 2, 6, 16–18, 21–22; Delia Rochon to James Perry, Email, Jan. 4, 2022, Delia Rochon Interviews, CHL.

  29. Colonia Suiza Branch, Minutes, Apr. 28, 1963, 256; Rochon, Interview, 21–22; Rochon, Come and See, 9–11. Autu: Peraimeri

  30. Dunning, “My Life and Legacy,” 4–6, 13; Dunning and Dunning, “Conversion Story at Beverley,” [2], [3]; Dunning and Dunning, Email Interview [Sept. 12, 2021]; Beverley Branch, Manuscript History and Historical Reports, Mar. 3, 1963; Suzette Dunning and Geoff Dunning to James Perry, Email, Mar. 17, 2022, Suzette Towse Dunning and Geoffrey Dunning Papers, CHL.

  31. McKay, Diary, July 6, 1960; “Labor-Missionary Program Adopted for European Chapels,” Church News, July 9, 1960, 7–8; European Mission, Historical Report, Dec. 31, 1960, 312–17; “237 Attend British Labor Mission Conference,” Church News, Mar. 10, 1962, 14; “The Building Programme,” Millennial Star, July 1960, 283; Wendell Mendenhall, “Buildings for Britain,” Millennial Star, July 1960, 284–92; Fletcher, Oral History Interview, 8.

  32. Dunning and Dunning, “Conversion Story at Beverley,” [3], [6]–[9]; Dunning and Dunning, Email Interview [Sept. 12, 2021]. Autu: Polokalama o Fale

  33. Dunning, “My Life and Legacy,” 6–8; N. Eldon Tanner, “Elder Tanner Notes Progress in West European Mission Area,” Church News, Dec. 29, 1962, 7; Quorum of the Twelve Apostles, Missionary Committee Minutes, Feb. 6, 1962; Boyd K. Packer to Donald Fry, July 26, 1962, Missionary Department, Executive Secretary General Files, CHL; Perry, Brown, and Blease, “If the Walls Had Ears,” 125, 136, 139, 183.

  34. McKay, Diary, Aug. 25, 1963; Mahoney, “Merthyr Tydfil Chapel.” Autu: Uelese

  35. McKay, Diary, Aug. 25, 1963; George L. Scott, “Merthyr Tydfil: New Church Era in Wales,” Church News, Sept. 7, 1963, [6]–[7]; Dunning, Oral History Interview, 5–6; Dunning, “My Life and Legacy,” 8–9; Dunning, Email Interview [July 21, 2021].

  36. Dunning, Oral History Interview, 5–6; Dunning, “My Life and Legacy,” 16.

  37. Suzette Towse to Geoffrey Dunning, Apr. 1, 1964, in Dunning, “My Life and Legacy,” 17; Dunning, “My Life and Legacy,” 16–17; Suzette Towse to Geoffrey Dunning, Mar. 30, 1964, i le Dunning, Excerpts from Letters and Journals, [6]. Ua faasa’oina upusii mo le faitauina; o le uluai punaoa o loo i ai le “Ou te lagona le le mautinoa e uiga i mea ma lagona le le mautonu ma le popole.”

  38. Council Minutes, Feb. 7, 1963, First Presidency, General Administration Files, 1923, 1932, 1937–67, CHL; Romney, Journal, Feb. 7, 1963; Hunter, Journal, Feb. 7, 1963; Harold B. Lee, i le One Hundred Thirty-Third Annual Conference, 88; Lee, Diary, Aug. 30, 1962, and circa Feb. 7–9, 1963.

  39. Council Minutes, Feb. 7, 1963, First Presidency, General Administration Files, 1923, 1932, 1937–67, CHL; Harold B. Lee, i le One Hundred Thirty-Third Annual Conference, 82, 85–86; “Chairmen Announced for Four Priesthood-Centered Committees,” Church News, Apr. 13, 1963, 9.

  40. Lee, Diary, Feb. 2 ma le 22, 1963; Apr. 2–4 ma le 11, 1963; Tanner, Journal, Apr. 1–8, 1963; Romney, Journal, Feb. 1 and Apr. 2, 1963; Hugh B. Brown, i le One Hundred Thirty-Seventh Semi-annual Conference, 113–14; McKay, Diary, Apr. 3, 1963.

  41. Poll, Working the Divine Miracle, 183–84, 213–14; Lee, Diary, June 12, 1959; Henry D. Moyle, Funeral Remarks for Fern Tanner Lee, Sept. 26, 1962, 438–41, Henry D. Moyle Papers, CHL.

  42. Goates, Harold B. Lee, 358; Lee, Diary, Jan. 11 and June 16, 1963; Romney, Journal, June 16–17, 1963; McKay, Diary, June 17, 1963. O upusii ua faasa’oina mo le faitauina; o le uluai punaoa o loo i ai le “Sa ou fesili atu pe manao e avea o ia ma se molimau” ma “o le a avea i laua ma molimau.”

  43. “He Invests Mormons’ Money,” Fortune, Dec. 1957, 65; Poll, Working the Divine Miracle, chapter 12.

  44. Lee, Diary, Sept. 6–19, 1963; Harold B. Lee, Funeral Remarks for Henry D. Moyle, Sept. 21, 1963, 5, First Presidency, General Administration Files, 1923, 1932, 1937–67, CHL.