Mataupu 14
Ua Ese Nei
Ia Fepuari 1972, sa lagonaina ai e Elder Spencer W. Kimball le leai o se faamoemoe. O togafitiga o le leisa na aveesea ai le kanesa o lona faa’i ae na faatamaia ai lona leo ua vaivai, ma o lenei ua le mafai ona ia tautala ae na o se musumusu. Sa faaauau foi ona avea le vaivai ona lona fatu ma mafuaaga o lona popolevale ma vaivaiga faaletino. “O loo o’u matua faiaina lava i le tauiviga,” na ia tusia ai i lana api talaaga.
I le mafaufau ai i le le lelei o le soifua o Elder Kimball, sa faamāmāina ai e le Au Peresitene Sili lana faatulagaga o femalagaaiga. Sa auai o ia i faapaiaga o Malumalu o Ogden ma Provo, tuuina atu valaauga i faifeautalai faaolioli, ma fautuaina le Matagaluega o Talafaasolopito fou faatoa faavaeina a le Ekalesia ma lana aufaigaluega faatupulaia o tagata tomai faapitoa. Sa faafetai o ia ona sa mafai lava ona ia auauna atu i le Alii i nei auala, ae o le tele lava o lona popole e uiga i le avea ma se avega i le Ekalesia.
A o faasolo ina faaletonu lona tulaga, sa la feiloai atu ai ma Camilla ia Peresitene Harold B. Lee ma Peresitene N. Eldon Tanner. O Dr. Russell M. Nelson sa faatasi atu ma i latou e tuuina atu tomai faafomai i le talanoaga.
“O au o se tagata ua lata ina oti,” o le faamalamalama mai lea a Elder Kimball. “O loo o’u lagonaina le mou atu o lo’u ola. I le taimi nei e tusa ai ma le solosolo malie o le faaletonu, o lo’u talitonuga e na o le lua masina e mafai ona ou ola ai.
Sa foliga mai e le toe manuia o ia, sa ia ta’u atu ai i le vaega, e aunoa ma se taotoga faigata. O Dr. Nelson, o le sa masani i le faiga faavae, sa faamalamalama mai ai e aofia ai ni taotoga eseese faapitoa se lua. “Muamua, o le a manaomia ona aveese mai o le faatonualatoto faaletonu ma le suia i se faatonualatoto uga,” o lana tala lea. “Lona lua, o le a toe faafouina le alatoto pito i luma i le itu agavale e agai i lalo e ala i se alatoto toe faatulaga mai se isi vaega o le tino.”
“O le a le tulaga lamatia o le a i ai i sea faiga?” na fesili atu ai Peresitene Lee.
I le manatunatu ai i le tele o tausaga o le matua o Elder Kimball, e lei silafia e Dr. Nelson lea tulaga. “E leai so matou poto masani i le faia o taotoga uma ia e lua o gasegase i lenei vaitausaga,” o lana tala lea. “Pau le mea e mafai ona ou fai atu ai o le, o le a manaomia ai se tulaga lamatia e matua maualuga lava.”
“O a’u o se toeaina matua ma ua ou sauni e oti,” o le tala lea a Elder Kimball ma le vaivai. “E mafai e le Alii ona faamaloloina au i le taimi lava lena ma mo le umi e finagalo ai o Ia ia te au. Ae aisea o le a Ia finagalo ai ia te au o lea ua ou faasolo ina matua ma mafai e isi ona faia le mea o loo ou faia ma faia ia sili atu?”
Sa tulai vave ane Peresitene Lee. “Spencer,” na ia fai atu ai, ma tatagi lana moto i luga o lana kesi, “ua valaauina oe! E le tatau ona e oti. E tatau ona e faia mea uma e tatau ona e faia ina ia mafai ai ona e tausia oe lava ma faaauau ona ola pea.”
“Ua lelei,” na saunoa ai Elder Kimball, “o le a ou talia le taotoga.”
E lua masina mulimuli ane, i le isi itu o le Iunaite Setete, e faitau afe teineiti feei na faafeiloaia uso o le au Osmond—Alan, Wayne, Merrill, Jay, ma Donny—a o latou laa atu i luga o se tulaga faafiafia i Hampton, Virginia. I le amata ai i tausaga mai le sefulufa i le luasefulu-lua, sa laeiina ai e le auuso ni ofuvae soloatoa papae o i ai ni kola maualuluga ma ni maa feilafi. Ina ua amata ona latou pepese ma sisiva, sa faaauau pea ona feei mai le au mulimuli ia i latou.
I tua mai o le tulaaga, sa manatu Olive Osmond o se mea manaia le ala na pulatoa atu ai teineiti i ona atalii. Ina ua la faaipoipo ma lana tane, o Siaosi Osmond, i le Malumalu o Sate Leki i le taimi o le Taua Lona II a le Lalolagi, la te lei mafaufauina o le a avea le la fanau ma ni tagata pepese musika iloga—ma o nisi o Au Paia o Aso e Gata Ai e sili ona lauiloa i le lalolagi. O le la fanau tama muamua e toalua, o Virl ma Tom, sa faaletonu a la faalogo, ma sa taumafai se fomai e faatauanau Olive ma Siaosi ia aua nei o la toe maua ni isi fanau. Ae na toe maua e le ulugalii isi e toafitu, o i latou uma e lelei uma faalogo.
A o laiti, sa aoao ai Alan, Wayne, Merrill, Jay, ma Donny e usu faatasi ma avea ma tagata usu leo malie i luga o se ata o le televise faasalalau faaleatunuu. Ae, ina ua faasolo ina matutua, sa latou mananao e faafesuiai a latou pese tuufaatasi tuai mo se faatinoga o musika e sili atu ona faaonaponei.
O le toatele o tagata talavou sa fiafia i musika tuitui ma kitara e alu i le eletise i pese leotetele. Ae sa popole nisi o taitai o le Ekalesia ona sa matua taufaaoso lava. Sa au i ai Olive ma Siaosi i nei atugaluga, ae sa latou talitonu ma le la fanau e mafai foi e musika leotetele ona faalauiloa foi le lelei. Sa manatu Olive e mafai e ona atalii ona faia se faatosinaga lelei i le lalolagi—pe afai e mafai e a latou musika ona oo atu i le aofia sa’o.
“E i ai sa outou misiona faapitoa,” e na te ta’u atu ai i tama. “Na tuuina atu e le Atua ia te outou lenei taleni mo se mafuaaga.”
I le 1970, sa pu’eina ai e le auuso se pese e ta’ua “One Bad Apple,” faatasi ai ma Merrill ma Donny i le taitaiina o leo. O se pese sa matua iloga lona tautaua, ma na lauiloa ai tama i se taimi vave lava. Ina ua mavae lena, sa galulue malosi Olive ma Siaosi e fesoasoani i o la atalii e tausi poloaiga. A o inu avamalosi isi tagata lauiloa o pese leotetele ma faaaoga fualaau faasaina, sa usitai le au Osmond i le Upu o le Poto. Nai lo le o i ni pati malomaloā, sa faataunuuina e le auuso afiafi faaleaiga faatasi ma lo latou aiga, auai i le lotu, ma faia ni faigalotu a o malaga taamilo.
Ina ua lauiloa, sa feiloai le auuso ma Peresitene Iosefa Filitia Samita, o lē sa faamanatu atu ia i latou lo latou tiute o le faasoa atu e le aunoa o le talalelei. Mulimuli ane, sa faamanatu atu e lona fesoasoani o Harold B. Lee ia i latou o loo vaavaai atu le lalolagi ia i latou ma e mafai ona faamasinoina le Ekalesia e faavae i a latou faatinoga. Sa ia fautuaina i latou e aloese mai tulaga matautia o le ola mama ma ia tutu atu mo mea sa latou talitonu i ai.
“O le a i ai pea lava filifiliga e lua,” na ia aoao atu ai i latou. “Ia filifili i taimi uma le mea o le a aumaia latalata atili ai oe i le malo selesitila.” Ona ia sii maia lea o upu a le Faaola mai le Lauga i luga o le Mauga: “Ia faapea ona pupula atu o lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.”
E lei umi, ae toatele tagata i le Iunaite Setete na latou faafesootaia le Ekalesia ma le au Osmond. Pe a talanoa i le aufaasalalau, e toetoe lava o taimi uma e ta’ua ai e Olive lana tapuaiga ma ona aafiaga i le olaga lelei o le aiga ma musika fiafia. I a latou lava fegalegaleaiga ma le au failipoti, sa talanoa faaaliali ai foi tama e uiga i lo latou faatuatuaga, ma e masani ona auina atu e paaga e taumulimuli ia i latou i le meli ni fesili e uiga i le Ekalesia. Talu ai o le tuputupu ae o le Ekalesia sa faapitoa le televave i le Iunaite Setete, sa masani lava ona i ai uarota ma paranesi i aai sa faafiafia ai le au Osmond, ma faafaigofie ai mo tagata e fiafia e fesootai ma faifeautalai ma feiloai atu i isi Au Paia o Aso e Gata Ai.
Talu ai nei, o le mea moni, sa faaalia ai e le Church News ni vaega o tusi mai tagata o e na oo ina iloa le Ekalesia e ala mai i le au Osmond. O se tasi o ia tagata na amata ona sailiili i le Au Paia o Aso e Gata Ai ina ua uma ona vaai i le fiafia ma le vavalalata o le aiga o Osmond. “Sa ou iloaina e i ai se mea e fesootai ai ma la tou tapuaiga,” na latou tusia ai.
I le taimi o le konaseti i Virginia, sa faatasi atu ai le Osmond au pito laitiiti, e valu tausaga le matua, o Jimmy, i ona uso mo se pese i luga o le tulaga. Sa i ai pea i tua i le tulaga, o Olive faatasi ma lana tama teine e sefululua tausaga, o Marie, na taliina fesili mai se failipoti i le lotoifale.
“Ou te taumafai e fai se fale e mamao ese mai le aiga,” o le faamalamalama atu lea a Olive. Sa manatu o ia ua vavalalata le aiga i le taimi nei ua latou malaga taamilo faatasi. O le mea moni, sa galulue faatasi le auuso i se tuufaatasiga fou naunautai—o se mea e sili atu ona loloto ma patino nai lo soo se mea na latou faia muamua.
“O loo latou faia le mea ua faamoemoe le Atua latou te faia,” o lana tala lea. “O tamaiti e tosina mai ia i latou o loo vaavaai atu ia i latou mo se mea.”
E tasi le masina mulimuli ane, i le taeao o le aso 12 Aperila, 1972, saunia ai e Dr. Russell M. Nelson o ia lava e faatino le taotoga o le fatu. Sa ia faatinoina le faitau selau o taotoga i lona olaga, ae na lei faia lava i se aposetolo a le Alii. Ma e ui sa ia tatalo e uiga i le taotoga mo Elder Kimball ma mafaufau loloto i le auala sili e faatino ai, ae sa ia le mautinoa e mafai e ia po o soo se fomai tipitipi ona faia ma le manuia.
I lana lava talosaga, na maua ai e Dr. Nelson se faamanuiaga mai ia Peresitene Lee ma Peresitene Tanner i le aso na muamua atu. O le tuuina o o la lima i luga o lona ulu, sa la faamanuiaina ai o ia ina ia mafai ona ia faatinoina le taotoga e aunoa ma se mea sese. Sa la tau atu ia te ia e leai sana mafuaaga e fefe ai i ona le atoatoa. Na tausia mai o ia e le Alii e faatino lenei taotoga.
Na amata le faiga o le taotoga i le ta o le valu. I totonu o le potu tipitipi, na faamoe ai e se fomai tui vaimoe ia Elder Kimball, a o sauni mai ai le fomai fesoasoani a Dr. Nelson faatasi ma nisi o tausimai ma isi tagata o le au faitaotoga. Sa faatalitali lata ane se masini o le fatu-mama, ua sauni e auina atu le okesene ma pamu le toto o Elder Kimball.
I lalo o le taitaiga a Dr. Nelson, sa galulue ai ma le atamai le au galulue e sui le faatonualatoto ua faaleagaina i se itutino uga—o se tamai polo uga i totonu o se pa uamea. O le masini pe tusa ma le afa o le taamilosaga o lona lima matua.
Ina ua uma ona tuu le faatonualatoto i lona nofoaga, sa amata e Dr. Nelson ona su’i. I le faagasolo sa’o ai o lea su’i ma lea su’i, sa faafesootaia lemu le mama i le tafue o le faatonualatoto i le aano o loo siomia ai.
Ona liliu atu lea o lana faatinoga i le mea e sosoo ai i le aloese mai se mea o loo taofia ai le solo lelei atu o le toto i totonu o le fatu. I lona mauaina o se alatoto o loo alu ifo i le fatafata o Elder Kimball, sa ia tipiesea lona pito i lalo ma tuu le alatoto i lalo teisi ifo o le alatoto o loo puni. Sa toe su’i foi e le fomai i ni faasologa laiti, su’i laiti seia oo ina pipii mausali le alatoto maloloina.
A o galue ai o ia, sa maofa Dr. Nelson i le sologa malie na faatinoina ai le taotoga ma le ala na mae’a ai. Sa manaomia ai le faitau afe o femilosaiga faigata, e tofu manaomia e i latou taitoatasi ni metotia ma le tiga. Ae e lei i ai se mea sese e tasi na tupu. Ina ua oo i le taimi e aveese ai Elder Kimball mai le masini o le fatu-mama, e silia ma le fa itula talu ona amata le taotoga, sa faate’i e le aufaigaluega fomai fatu lona fatu i le eletise, ma na vave lava ona toe ola mai.
Ina ua uma le taotoga, sa valaau atu Dr. Nelson ia Peresitene Lee. Sa faapotopoto le Au Peresitene Sili ma le Korama a le Toasefululua i le malumalu, ma anapopogi ma tatalo mo Elder Kimball. A o faamatala ai e Dr. Nelson le faiga o le taototoga, sa ia ta’u atu ai ia Peresitene Lee na ia lagonaina le pei o le tfaate’a polo o le pesipolo lea faatoa uma ona faate’aina se taaloga atoatoa. Sa faalauteleina e le Alii ona tomai, ma faatagaina ai o ia e faatino tonu le taotoga e pei ona folafolaina i le faamanuiaga faaleperisitua.
Sa matuai fiafia lava Peresitene Lee. “O loo faasolo manuia Uso Kimball ma ua aveese mai o ia mai le masini fatu,” na ia tau atu ai i aposetolo. “Ua tali mai le Alii ia tatou tatalo.”
O le masina lava lena, i Rio de Janeiro, Pasila, sa tietie atu ai Helvécio Martins e fasefulu tasi tausaga le matua i le fale mai le galuega ina ua faamalosia o ia e se poloka taavale e taofi. O le laina o taavale i ona luma sa foliga mai e leai se mutaaga, ma sa lei foliga mai o le a vave ona kilia mai le poloka ai o taavale i se taimi lata mai.
Sa faaalu e Helvécio sina taimi e toe manatunatu ai i le le faamalieina faaleagaga sa ia lagonaina mo le tele o tausaga. Talu mai lona talavou, sa galue malosi o ia e alu ese mai ala o le mativa. Sa nofo mai le aoga a o sefulutasi tausaga ma avea ma se tagata tau moli. Mulimuli ane, ina ua siitia atu lona aiga i Rio, sa ia faigaluega o se kiliva meli. Sa faatuatuaina o ia e ona pule ma talisapaia lona filiga. Mulimuli ane, sa ia feiloai ma faaipoipo atu ia Rudá Tourinho de Assis, o lē sa uunaia o ia e auai i le aoga i le po.
I le mavae ai o tausaga o le finafinau, na maua ai e Helvécio se tipiloma o le aoga maualuga ma faauu mai le iunivesite ma se faailoga o le tausitusi. Ona amata lea ona faigaluega o ia mo se kamupani suauu, ma na oo mai le taimi na avea ai o ia ma ulu o se matagaluega e silia ma le luaselau tagata faigaluega.
O le taimi lea sa la fiafia ai ma Rudá ma le la fanau e toalua, o Marcus ma Marisa, i valaaulia i gaoioiga faaagafesootai ma tagata iloga. O se olaga e sili mamao atu nai lo se isi lava mea na mafaufauina e Helvécio.
Ae e ui i lona faamanuiaina, sa lagona e Helvécio le le atoatoa. Sa la taumafaia ma Rudá ni lotu eseese, auai i faiga Faaleagaga ma mulimuli ane sailiili i nisi o lotu Kerisiano. Po o fea lava na la o i ai, sa la lagonaina lava o loo i ai se mea o loo misi.
I le nofo ai i le poloka o taavale, sa faatupulaia le le fiafia o Helvécio. Sa ia tatalaina lona faitotoa o le taavale ma laa atu i luga o le auala. “Lo’u Atua e,” sa ia tatalo ai, “Ou te iloa o loo e i ai iina i se nofoaga, ae ou te le iloa po o fea. Mata e mafai ona e le iloa mai le fenumiai o feagai ma lo’u aiga ma au? Mata e mafai ona e le iloaina o loo matou sailia se mea ma e matou te le iloa po o le a lena mea? Aisea e te le fesoasoani mai ai ia i matou?”
Ina ua uma lana aioiga, sa amata ona kilia le auala. Sa toe foi Helvécio i lana taavale ma tietie atu, ma vave ona galo le mea na tupu.
I le lua vaiaso mulimuli ane, na maua ai e le au Martinse se kata na maua mai lalo o lo latou faitotoa. I le tasi itu sa i ai se ata o le Faaola, ae o le isi itu o se faasologa o sauniga mo le O Le Ekalesia a Iesu Keriso o le Au Paia o Aso e Gata Ai.
Sa faagaeetia e le kata ia Helvécio, ma sa ia aveina i le galuega i le aso na sosoo ai.
“Boss, aua e te alu iina,” o le tala lea a se tasi o ana tagata faigaluega. “O se ekalesia lena mo Tagata Amerika i Matu. Afai e te le iloa se tagata o le ekalesia, o le a ou le taumafai lava e alu.”
Sa talitonu Helvécio i lana tagata faigaluega ma tuuese lona fiafia i le Ekalesia. Ae i se taimi puupuu mulimuli ane, na oo atu ai ni faifeautalai se toalua, o Thomas McIntire ma Steve Richards, i le faitotoa o le au Martinse. O le taimi lava na laua ulufale atu ai, na matauina ai e Helvécio se lagona toafimalie na faatumulia ai le fale.
Sa faailoa atu e faifeautalai i laua lava. “O loo ia i ma’ua se faamanuiaga mo lou aiga pe afai e te manao i se faamanuiaga,” na la fai atu ai.
“Ioe,” sa fai atu ai Helvécio. Ae muamua, sa i ai ni ana fesili.
Sa latou talanoaina nisi o faamatalaga lautele e uiga i le Ekalesia, ona faia lea e Helvécio o se fesili faigata—o se fesili na taua ia te ia o se e tupuga mai i tagata pologa mai Aferika. “I le iloa ai o la outou ekalesia e laumua i le Iunaite Setete,” na ia saunoa ai, “e faapefea ona taulimaina e lau tapuaiga ia tagata Uli? Pe faatagaina ea i latou i totonu o le ekalesia?”
Sa foliga maasiasi Elder McIntire. “Alii,” na ia faapea ai, “E te fia iloa moni lava?”
“Ioe,” o le tala lea a Helvécio.
Sa faamalamalama mai e Elder McIntire e faapea e mafai ona papatisoina tagata Uli ma auai o ni tagata o le Ekalesia ae sa le faatagaina ona umia le perisitua pe auai i le malumalu. Sa talia e Helvécio ma Rudá lana tali ma fesiligia nisi fesili e uiga i le perisitua ma le talalelei. Sa taliina ma le toafimalie ma le maeaea lelei e faifeautalai ia fesili taitasi.
E oo ane i le taimi na tuua ai e faifeautalai, ua mavae atu le fa ma le afa itula. I lena po, sa talanoaina ai e Helvécio ma Rudá mea na aoao atu e faifeautalai ia i laua. Sa faagaeetia i la’ua i le lesona a faifeautalai ma lagonaina ua taliina atoatoa a la fesili.
I se taimi puupuu mulimuli ane, sa auai ai le au Martinse i la la uluai sauniga faamanatuga. Sa matagofie le sauniga, ma sa faafeiloaia ma le fiafia i la’ua e le potopotoga. E lei leva, ae tu le peresitene o le paranesi i le fale o le au Martinse ma faailoa atu i laua i ni alii se toalua o le a avea ma o laua faiaoga o aiga.
A o faaauau pea ona auai le aiga i le lotu ma feiloai ma faifeautalai, sa faatupulaia lo latou faatuatua. I se tasi aso, sa la auai ai i se fonotaga e faapitoa le mamana o le Itu o Rio de Janeiro, ma sa la iloa e tatau ona la auai i le Ekalesia.
“Ua tatou ese nei ,” o le tala lea a Marcus e sefulutolu tausaga le matua i se vaiaso mulimuli ane a o tietie atu le aiga i le fale mai le Aoga Sa. “E susulu tou foliga, ma ou te iloa le mea ua mafua ai—o le talalelei a Iesu Keriso.”
Sa faatu e Helvécio le taavale i se malologa i autafa o le auala, lea na amata ai ona fetagisi le aiga. Ina ua toe foi atu le au Martinse i le falesa i lena afiafi mo le sauniga faamanatuga, sa la tau atu i lo la peresitene o le paranesi ua la saunia e papatiso.
I se tasi aso i le taimi lea, na fesili atu ai le pule o le au Osmond, o Ed Leffler, i le aiga pe latou te mananao e fai se faaaliga i Egelani. O le pese a le auuso “Down by the Lazy River” ma le puega o le solo a Donny o le “Puppy Love” o ni pese lauiloa i le Iunaite Setete ma Kanata. Sa foliga mai na iloa e tagata uma i Amerika i Matu e uiga i le auuso o Osmond, ma o lea ua matauina foi e talavou i Europa.
“Ioe,” na fai atu ai Olive, “ae i le tulaga e tasi lenei—e mafai ona ou feiloai atu i le masiofo.”
Sa tausua o ia, ae sa manatu mamafa ia Ed i lana tala. “O le a ou vaai pe mafai ona faatulagaina lena mea,” o lana tala lea.
I se taimi puupuu mulimuli ane, sa ta’u atu ai e Ed i le aiga ua mae’a ona ia faatulagaina sea faafiafiaga mo le Masiofo o Elisapeta II ma lona toalua, o Perenise Philip. Ma o le a o’o ina maua e Olive le mea sa ia moomoo i ai. Sa i ai ia i la’ua ma Siaosi se valaaulia e feiloai atu ma le ulugalii tautupu i le taimi o le malologa.
Sa le talitonu Olive. Sa ia faatauina se ofu aloaia ma ni totigilima papae mo le feiloaiga. Sa ia faatauina mai foi se seti fou o tusitusiga paia ma ia lototele e tuuina atu o se meaalofa i le masiofo.
Sa taunuu le au Osmond i Lonetona ia Me ma faaalu ni nai aso e faataitai ai a latou pese. Na faia le faafiafiaga i le aso 22 Me, 1972, i le Lonetona Palladium, o se fale faafiafia lauiloa i le faatausiusiuga i Sisifo o le aai. O se konaseti o le alofa mama ua faasalalauina e faaautu i tagata pese, tagata faatino, ma failotu mai le Malo Aufaatasi ma le Iunaite Setete.
Sa nonofo Olive ma Siaosi i le aofia faatasi ma Marie i le afa muamua o le faaaliga. I le malologa, na pai atu ai Lew Grade, le tamaloa lea na faatulagaina le faaaliga, i le lima o Siaosi. “Sau vave,” o lana tala lea.
Sa tutu i luga Olive ma George ma faatopetope atu ia Lew. Ae na te lei taunuu i le faaiuga o le alasavali, sa iloa e Olive o le a ia tuua lana meaalofa mo le masiofo i lalo o lona nofoa. Mo se sekone lava, sa ia mafaufau ai e uiga i le tuua o tusitusiga paia iina. Ae sa ia faaaluina le tele o le po talu ai i le makaina ma le tusia o faamatalaga i ana fuaitau e fiafia i ai mo le masiofo. Ma sa ia iloa o le a ia le toe maua lava sea avanoa. O le faliu atu i ai, sa ia toe tamoe atu i lona nofoa ma uu mai le tusi.
O le taimi lava na faailoa atu ai e Lew o ia ma Siaosi i luma o le masiofo, sa alu atu Olive i le ulugalii tautupu, ifo atu, faafesuiai ni nai upu ma i laua, ma agai atu loa e aunoa ma le tuuina atu o lana meaalofa. Ona ia toe tepa lea i tua ma iloa ai ua tu Siaosi e talanoa ma Perenise Philip e uiga i lo latou fiafia faatasi e tutulimanu ma le fagogota.
O le iloaina o se isi tagata o le aiga tautupu o loo tu latalata ane, sa alu atu ai Olive ia te ia ma lana kopi o tusitusiga faavae. “E te mafaufau e tuuina atu i le masiofo lenei meaalofa laitiiti pe a ou alu ese?” sa ia fesili ai.
Sa tilotilo atu le tamaloa ia Olive ma se vaaiga fiafia i ona mata. “Elisapeta!” o lana tala lea. “Ua aumai e Mrs. Osmond se meaalofa ia te oe.”
“E maeu le matagofie,” o le tala lea a le masiofo. “Faamolemole susu mai.”
I le lagona maasiasi, sa usitai ai Olive. “Sa ou manao e aumai ia te oe se meaalofa,” sa ia faamatala atu ai, ma le tau le iloa po o fea na ia maua ai upu. “E faigata ona iloa le mea e avatu i se masiofo, o lea na ou aumaia ai ia te oe la matou meatotino e sili ona taua.”
“E mafai ona e aveesea?” na fesili atu ai le masiofo.
“Ioe,” o le tala lea a Olive, “O loo ia te a’u le tasi e tutusa lelei lava.”
Sa vaai atu le masiofo i tusitusiga paia. “Faafetai lava, Mrs. Osmond. “O le a ou faatauaina lenei mea,” o lana tala lea. “O le a ou tuuina i luga o la’u fata.”
Sa to’a Olive ma talanoa puupuu e uiga i lona aiga ma le masiofo. Ona la toe foi atu lea i o la nofoa e matamata i tama o faatino le latou faafiafiaga.
Mulimuli ane, a o sauni le aiga e felelei atu i lo latou aiga, sa fesootai atu Ed Leffler ia Olive. “O le a sou manatu?” o lana fesili lea.
“O se fiafiaga o le olaga atoa,” o le tala lea a Olive. “Sa mafai foi ona ou tuuina atu ia te ia se kopi o le Tusi a Mamona.”
“O le a le mea na e faia?” Sa fai atu ai Ed, ma le le fiafia. “O le mea lena e sili ona leaga e mafai ona e faia.” Sa ia faamalamalama mai e faapea, i le avea ai ma ulu o le Ekalesia o Egelani, sa lei i ai le masiofo i se tulaga e talia ai aoaoga o le Tusi a Mamona.
O upu a Ed na faaatuatuvaleina ai Olive. Na te lei fuafuaina e faatiga i se tasi. Sa na ona ia talitonu sa i ai i le masiofo se aia tatau e faalogo ai i le talalelei toefuataiina e pei lava o se isi lava tagata. Pe sa ia faia moni ea se mea sese?
O le taimi lava na nonofo ai le aiga i le vaalele ma faamautu ai tagata uma, sa saofai i lalo Olive ma amata ona faitau ana tusitusiga paia. Sa matala itulau, ma sa pupula ona mata i le Mataupu Faavae ma Feagaiga1:23: “Ina ia mafai ona folafola atu le atoatoaga o la’u talalelei i e vaivai ma e faatauvaa i tuluiga o le lalolagi, ma i luma o tupu ma pule.”
O upu na faamafanafanaina ai Olive. Sa sola ese ona masalosaloga, ma sa ia iloa sa ia faia le mea sa’o.
I le afiafi o le aso 15 o Iuni, 1972, sa ataata ai Maeta Holiday e sefuluvalu tausaga a o ia tu ai faatasi ma le i le silia ma le lima selau tagata matutua o le aoga maualuga i se faletaalo i Kalefonia i Saute. I ni nai minute, o le a maua e ia ma ana uo i le vasega a latou tipiloma o le aoga maualuga ma amata le isi vaega o o latou olaga. Sa latou ofuina ni pulou ma ni ofu talaloa tutusa, faatasi ai ma tamaitai aoga i laei lanumumu ae o alii aoga i lanu uliuli.
Mo Maeta, o le faauuga o lona uiga o lona taimi i le Polokalama o le Faaaogaina o Tamaiti Aoga Initia ua faamutaina. E le o toe mamao ona tuua lea o lona aiga tausi e amata se olaga fou mo ia lava. E pei o le toatele o tagata faauu o le polokalama o le faaaogaina, sa ia fuafua e auai i le Iunivesite a Polika Iaga. E silia ma le limaselau Tagata Nuu o Amerika, o le toatele o i latou o Navajo e pei o Maeta, o loo auai i le taimi nei i le IPI. Sa ofoina atu e le aoga ni sikolasipi limafoai i nei tamaiti aoga, ma sa fesoasoani matua tausi a Maeta, o Venna ma Spencer Black, ia te ia e talosaga mo le fesoasoani.
Na iloa e Maeta o le a faaauau pea ona lagolagoina o ia e Tagata Uli. Ina ua sau o ia e nonofo faatasi ma i latou i le fa tausaga na muamua atu, sa vave ona la taulimaina o ia e pei o se afafine. Sa la tuuina atu ia te ia se aiga mautu ma fesoasoani ia te ia e lagona, mo le taimi muamua i lona olaga, e faapea o ia o se vaega o se aiga agaalofa. Ma e ui ina sa auai o ia i le Ekalesia a o lei taitai ona ia nofo faatasi ma i latou, ae sa la faaali atu ia te ia le tulaga e mafai ona i ai se aiga pe a faatotonugalemu i aoaoga a Iesu Keriso.
E le o tamaiti aoga uma i le polokalama o le faatulagaina na i ai ni aafiaga lelei i o latou aiga na tausia. O nisi o tamaiti aoga sa lei lagonaina le taliaina i o latou aiga e tausia pe fealofani ma o latou matua fai po o tei. O isi na teenaina taumafaiga a o latou aiga tausi e uunaia i latou e faailoa atu i latou i aganuu e le o ni Tagatanuu o le eleele. I le taimi lava lea e tasi, na maua ai e nisi o tamaiti aoga ni auala e faataua ai o latou talatuu ma o latou aafiaga i le polokalama o le faatulagaina o tofiga. Sa latou toe foi atu i nofoaga atofaina, faamalolosia o latou nuu, ma ola i le faataunuuina o olaga e pei oni Au Paia o Aso e Gata Ai iina.
Mo lana vaega, sa matuai lofituina lava Maeta i ona aafiaga tiga a o laitiiti. Sa lei manao o ia i le ituaiga olaga na ola ai ona matua po o matua matutua. Peitai, sa uunaia o ia e Venna e faataua lona tupuaga o Navajo. “E tatau ona e mitamita po o ai oe,” sa ta’u atu ai e Venna ia te ia i se tasi taimi. “E silafia e le Atua e faapitoa oe aua o le Tusi a Mamona e faatatau i lou nuu.” E pei o le toatele o le Au Paia i lena taimi, sa malamalama Venna i folafolaga o le Tusi a Mamona e faatatau i Tagata Nuu o Amerika. Ina ua ia tilotilo atu ia Maeta, sa ia vaaia ai se e tupuga mai ia Liae ma Sarai, ua agavaa mo faamanuiaga o le feagaiga.
“Maeta, ou te manao i lenei mea mo oe,” na fai atu ai Venna. “Ou te manao ia e faaipoipo i le malumalu i se aso. Ma ou te manao ia e alu pea i le lotu, ma ou te fia faailoa atu ia te oe e faapitoa oe, ma e matou te alolofa ia te oe.
A o maua e Maeta lana tipiloma, sa lei malamalama atoatoa o ia pe talia mea uma na aoaoina ai o ia e Venna. Ma o le tele o lona faamemelo i lona aiga tausi, na te le iloa pe mafai ona ia maua se faaipoipoga faamanuiaina po o se aiga lava ia. Ina ua uma ona molimauina le tatalaina o le faaipoipoga a ona matua ma le tauiviga a lona tina e tausi lana lava fanau, sa leai sona fiafia i le faaipoipoga po o le tausia o se aiga.
Ina ua maea lona faauuga, sa iloa e Maeta ua taliaina lana talosaga i le IPI. A o ia alu atu i le pasi i Provo, sa ia mafaufau e uiga i lona lumanai—ma lona faatuatua. O le auai i le lotu ma le seminare sa avea o se vaega taua o le Polokalama o le Faaauai o Tamaiti Aoga Initia. Ae pe na manao o ia e avea le talalelei toefuataiina ma se vaega o lona lumanai?
“Ia, afai ou te alu i le IPI, ou te mafaufau po o le a le mea e tatau ona ou faia,” sa ia mafaufau ai. “Pe tatau ona avea au ma se vaega o le Ekalesia pe le tatau foi ona ou faia?”
Sa amata ona ia mafaufau e uiga i lesona sa ia aoaoina mai ia Venna ma Spencer. Sa lei faigofie lona olaga, ae sa faamanuiaina o ia e nonofo faatasi ma i latou ma avea ma se vaega o lo latou aiga.
“Ou te talitonu i le Atua,” sa ia mafaufau ai. “Sa i ai o ia iina i lenei taimi atoa.”
I le aso 26 Aokuso, 1972, na mafai ai e Isapela Santana ma lona toalua, o Juan Machuca, ona lagonaina le fiafia ua siomia ai a o la paka le la Volkswagen samasama i fafo atu o le Auditorio Nacional i le Aai o Mekisiko. E silia ma le sefuluono afe le Au Paia mai Mekisiko ma Amerika Tutotonu na o mai faatasi i le nofoaga autu tele mo gaoioiga mo se konafesi aoao i le eria. Mo le toatele, o le konafesi o lo latou taimi muamua lea e faalogologo ai i pulega aoao o saunoa mai patino.
Ua amata ona faia e le Ekalesia konafesi aoao a eria i lalo o le taitaiga a Peresitene Iosefa Filitia Samita. Talu ai o le toatele o tagata o le Ekalesia sa le mafai ona auai i le konafesi aoao i le Aai o Sate Leki, o konafesi i le lotoifale na tuuina atu ai ia i latou se avanoa e faapotopoto faatasi ai ma maua faatonuga mai pulega i le lotoifale ma taitai aoao. O le uluai konafesi aoao a le eria sa faia i Manaseta, Egelani, i le 1971. Faatasi ai ma le silia ma le valusefulu afe tagata o le Ekalesia, o Mekisiko sa o le nofoaga autu o le faitau aofai aupito toatele o le Au Paia i fafo atu o le Iunaite Setete, ua avea ai o se nofoaga lelei e faia ai se konafesi faapena.
Sa maofa Isapela ma Juan a o la agai atu i le nofoaga autu o le gaoioiga. Sa i ai tagata o le Ekalesia mai Mekisiko atoa ma le mamao ese e pei o Kuatemala, Honduras, Costa Rica, ma Panama. O nisi o le Au Paia na malaga i le tolu afe maila ina ia i ai iina. O se tasi o tamaitai mai matusisifo o Mekisiko na tataina tagamea a ona tuaoi mo le lima masina ina ia lava se tupe e maua e alu ai i le malaga. Sa totogi e nisi o le Au Paia lo latou ala e ala i le faatauina atu o tako ma tamale, fufuluina o taavale, po o le faia o galuega i le lotoa. O isi na faatauina atu meatotino pe nono mai ni tupe ina ia mafai ona latou o mai. Sa anapopogi ni nai tagata ona sa leai ni a latou tupe mo meaai. O le mea e lelei ai, na tuuina atu e Benemérito le fale mo le toatele o le Au Paia mai mea mamao.
A o faatali le au Machuca i le laina e ulufale ai i le faletele, sa tu mai se taavale latalata ane, ma laa atu i fafo Spencer W. Kimball ma lona faletua, o Camilla. Ua fa masina talu ona uma le taotoga o le fatu o Elder Kimball, ma ua lava lona malosi e toe faaauau ai le tele o ona tiutetauave i le Korama a Aposetolo e Toasefululua. O le mea moni, sa faatulagaina o ia e lauga atu i le Au Paia mulimuli ane i lena aoauli.
E ui ina sa fesoasoani Iosefa Filitia Samita e fuafua le konafesi, ae na maliu o ia a o lei mafai ona auai. O lona maliu na faailogaina ai le faaiuga o le tele o tausaga o se olaga umi ma tuuto o le auaunaga e fai ma sui o le Ekalesia ma ona tagata. I le avea ai ma se aposetolo, sa ia tusia lautele e uiga i aoaoga faavae o le talalelei ma autu faasolopito, sa faalauiloa ai galuega o gafa ma le malumalu, ma faapaiaina ai Filipaina ma Korea mo le talaiga o le talalelei. I le avea ai ma peresitene o le Ekalesia, sa ia faatagaina ai uluai siteki i Peru ma Aferika i Saute, sa matua faateleina seminare ma inisitituti i le salafa o le lalolagi, toe faafou fesootaiga faalauaitele a le Ekalesia, ma matagaluega faapolofesa a le Ekalesia.
“E leai se galuega e mafai e soo se tasi o i tatou ona auai i lena mea e taua e pei o le talai atu o le talalelei ma le fausiaina o le Ekalesia ma le malo o le Atua i luga o le fogaeleele,” na ia ta’u atu ai i le Au Paia i lana konafesi aoao mulimuli. “Ma o lea tatou te valaaulia ai fanau uma a lo tatou Tama, i soo se mea, ia talitonu ia Keriso, ia talia o Ia e pei ona faaalia mai e perofeta soifua, ma ia auai faatasi ma Le Ekalesia a Iesu Keriso o le Au Paia o Aso e Gata Ai.”
O lona sui, o Harold B. Lee, na vaetofia talu mai lena taimi e avea ma peresitene o le Ekalesia, na avea ai Elder Kimball ma peresitene fou o le Korama a Aposetolo e Toasefululua.
O le taimi lava na maua ai e Isapela ma Juan le faitotoa i le Auditorio Nacional, sa la maua ni nofoa i le faitau afe o le Au Paia. Sa i ai i le faletele ni laina se fa o nofoa faataamilo i se eria o le tulaga. Sa faatumulia le tulaga i se aufaipese a tagata o le Ekalesia mai Mekisiko i matu. I o latou luma sa i ai se pulelaa ma se vaega o nofoa e maualuga le lagolagoina mo le au pulega aoao ma isi failauga.
Sa tatalaina le konafesi i se saunoaga mai ia Peresitene Marion G. Romney, o lē sa soifua ma tupu ae i kolone o le Au Paia o Aso e Gata Ai i Mekisiko i matu ma sa lei leva ona avea ma se fesoasoani i le Au Peresitene Sili. I le lauga ai i le faaSipaniolo, sa ia ta’u atu ai ia i latou lona alofa mo le Au Paia o Mekisiko ma Amerika Tutotonu ma lona talisapaia o le malo o Mekisiko.
Ona saunoa lea o Peresitene N. Eldon Tanner, i le faamanatuina o le malosi o le Ekalesia i Mekisiko ma isi malo e tautatala faaSipaniolo o Amerika. “O loo tupu le tuputupu ae, ma ua atiina ae le taitaiga i le lalolagi atoa,” na ia tautino atu ai e ala i se faamatala upu. Ina ia fesoasoani i nei taitai atiae, o le Tusitaulima Aoao o Faatonuga a le Ekalesia, sa lei leva ona fesootai ma faaliliuina i le silia ma le sefululua gagana, e aofia ai le faaSipaniolo. E mafai e taitai i le lalolagi atoa ona taitai le Ekalesia e tusa ai ma le mamanu lava e tasi.
“E ofoofogia le vaaia o le auala o loo taliaina ai e tagata le talalelei ma o mai i totonu o le Ekalesia ma le malo o le Atua,” na molimau atu ai Peresitene Tanner, “o le tuuina atu uma o molimau i faamanuiaga e maua ai e i latou, i le iloaina o le Ekalesia a Iesu Keriso.”
O le faalogo atu i failauga na lagona ai e Isapela le fiafia e avea ma se Tagata Mekisiko o le Au Paia o Aso e Gata Ai. O lona aotauina i Benemérito na aoaoina ai o ia i le taua o le avea ma se tagata o le Ekalesia, o le faia o le talalelei toefuataiina o se vaega tutotonu o lona olaga. Ina ua faatoa taunuu o ia i le aoga, sa avea o ia ma se teineitiiti fefe e aunoa ma se lagona manino o lona gafatia faaleagaga. Ae sa faamanuiaina o ia e ona faiaoga i le anoanoai o auala. Sa ia atiina ae se faiga masani o le suesue ma le tatalo i aso taitasi, ma sa ia savali ma le mautinoa ma se molimau faamaoni o le upumoni.
O le taimi nei, ua siomia e le toatele o le Au Paia, sa le mafai ona ia tatalia ae ua na o le fiafia. “Ou te sau mai iinei,” sa ia mafaufau ai. “Ou te auai i lenei mea.”