Talafaasolopito o le Ekalesia
Mataupu 16: Na o Le Aso Lenei

Mataupu 16

Na o Le Aso Lenei

tanetau o loo gogolo atu i lle auala

Ina ua mavae le faaaluina o se tausaga i le Iunivesite o Polika Iaga, sa tonu ia Maeta Holiday e tuu le aoga ae vaavaai mo se galuega. Sa fiafia o ia e auai i vasega o siva eseese ma pese ma siva i siva a le Tupulaga Sa Lamana, o se vaega lauiloa o faafiafiaga a Tagatanuu o Amerika. Ae sa sili ona luitauina o ia i le faigata e nisi o ana vasega, e pei o le fisiki [physics]. I le amataga o le 1974, sa nofo ai o ia i le Aai o Sate Leki ma faigaluega o se tagata faafeiloai i le KSL, le leitio ma le televise a le Ekalesia.

Sa tafafao faamasani foi o ia ma se faifeautalai ua maea lana misiona e igoa ia Dennis Beck. Sa faailoa atu e Dennis Beck o ia lava i se siva i Provo ia Setema na muamua atu, ma sa la sisiva faatasi ai a i le afiafi atoa. Ona ia valaaulia lea o ia la te o i le lotu.

Sa matua faateia lava Maeta. Talu ona tuua le BYU, sa lei toaga o ia i le Ekalesia faapei ona sa i ai o ia i Kalefonia. Ae, sa ia taliaina lava le valaaulia a Dennis ma fiafia e faatasi ma ia iina. Sa malie o ia e toe alu i le vaiaso na sosoo ai, ma e lei umi, ae la tafafao faamasani e le aunoa.

Ao faasolo ina iloa lelei e Maeta ia Dennis, sa ia faamemelo i lona agalelei ma le faamaoni. O ia o se tagata malosi o le Ekalesia sa tausia poloaiga ma alu e le aunoa i le malumalu. Sa fanau i Iuta, sa ia auauna atu i le Misiona a Initia i Matu i le Iunaite Setete i matu, lea na tuputupu ae ai lona alofa i Tagatanuu Amerika sa ia aoaoina ma ia faatauaina ai lona lava tofi o se Amerika Mekisiko. Sa lagona e Maeta le toafimalie ma le faagaeetia i soo se taimi lava e mafuta ai ma ia.

I se tasi aso, pe a ma le ono masina talu ona la feiloai, na sau ai Dennis i lana pikiapu lanumumu tuai, lea sa ia lipeaina ma toefaaleleia. Sa la o e tietie taavale, ona paka lea e Dennis le taavale i luma o le Malumalu fou o Provo ma fesili atu ai ia Maeta pe mafai ona faaipoipo ia te ia.

Mai lava i le taimi a o talavou o ia, sa tauto ai Maeta o le a le faaipoipo lava. Ae ina ua talosaga atu Dennis e la te faaipoipo, na te lei taulai atu i le tete’aga a ona matua po o faaipoipoga e tele a lona tina. Nai lo lena, sa ia mafaufau ia Venna ma Spencer Black ma le la faataitaiga o se faaipoipoga fiafia e mafai ona i ai. “E mafai foi ona ou fiafia,” sa ia mafaufau ai. O lea sa ia fai atu ai ioe.

Mulimuli ane i lena taumafanafana, i le aso 27 o Iuni, na tootuli ai Maeta faafesagai ma Dennis i le Malumalu o Sate Leki. Sa ia ofuina se ofu sa ia faia mo ia lava, e i ai se teuteu i luga atu o le puimanava ma e ufi e le ie leise. O le atagia o le ulugalii i fa’ata tutusa i luga o puipui na foliga mai e leai se mutaaga. Sa i ai i le potu o faamauga faatasi ma i laua, ia ona matua tausi, o Venna ma Spencer, ma le la tama teine o Lusi.

“Ou te mitamita ia te oe,” na fai atu ai Venna ina ua faalogo i le faamau a Maeta. “Sa ma faaaluina le tele o taimi i o ma tulivae, ma tatalo mo oe ina ia e faia filifiliga sa’o.”

A o tootuli Maeta i le fatafaitaulaga faatasi ma Dennis, sa faafetai o ia ona sa tatalo ma le filiga Venna. Sa fusia o ia i le olioli. Sa ia iloa o le faaipoipo atu ia Dennis o le filifiliga sa’o lea.

Na malaga mulimuli ane Maeta i Arisona e faailoa atu Dennis i lona tina. Sa lagona e Evelyn le faagaeetia ina ua ia feiloai atu ia Dennis. Sa fiafia o ia i lona aga malie, faamaoni, ma le tuuto i le Upu o le Poto.

“O ia o se alii lelei,” sa ia fai atu ai ia Maeta. Sa ia faamaonia le filifiliga a lana tama teine.

“Ua lelavā lo’u tino, ua matua lelavā lava, i lenei po,“ sa manatu ai Belle Spafford a o taoto o ia i le moega i le aso 5 o Oketopa, 1974. I le amataga o lena vaiaso, i le konafesi faaletausaga a le Aualofa, sa faamalolo ai e Peresitene Spencer W. Kimball o ia o se peresitene aoao o le Aualofa. O se maofa tuufaatasi na maona a’e i le Tapeneko i Sate Leki, o le matuā faateia ma le faanoanoa na oo i tamaitai i lea talafou. Ae sa iloa e Belle e oo mai le faamalologa, ma sa ia taliaina o le finagalo o le Alii.

Ae sa fetuleni mai i lona mafaufau le tele o mafaufauga i le taimi e tasi. “Ia manatua le mea lenei! Manatua le mea lena!” sa foliga mai na fai mai ai. Sa manao o ia e faamaumauina ona manatu i luga o se pepa, o lea sa ia oso ese ai mai le moega ma amata ona tusitusi. “Aisea o le a e moe ai,” sa ia fesili ifo ai ia te ia lava, “ae ua matua tele naua mea ua matua matagofie mo oe e toe faamanatu i lou mafaufau?”

Sa ia manatuaina le lagona o le le atoatoa lea na sosolo atu ia te ia ina ua valaauina o ia e le Au Peresitene Sili e suitulaga ia Amy Brown Lyman o le taitai o le Aualofa ia Aperila 1945. I le taimi nei, i le luasefulu-iva tausaga mulimuli ane, sa umi atu lana auaunaga nai lo se isi lava peresitene aoao o le Aualofa.

I lena taimi, sa mafatia o ia i le tele o tofotofoga patino, e aofia ai le kanesa o le susu ma le maliliu ai o lona toalua ma lana tama teine. E ui i lea, i lalo o lana taitaiga, sa auauna atu le faalapotopotoga i tagata na aafia i le Taua Lona Lua a le Lalolagi, fausia le Maota o le Aualofa, amataina sauniga a le Aualofa i afiafi mo tamaitai galulue, uunaia polokalama i le puipuiga mai sauaga faatautala ma le vaetamaina o tamaiti, ma tuuina atu fesoasoaniga faaopoopo i nuu e ala i isi auaunaga faaagafesootai.

Talu ai nei lava, sa faatautaia ai e Belle ma lana aufaatonu aoao ni suiga i le lesitala o le Aualofa e uunaia ai nisi tamaitai e auai. I tausaga ua mavae, na saini ai tamaitai e auai i le faalapotopotoga ma totogi ai lesitala faaletausaga e avea ma tagata o le faalapotopotoga. O lea la ua le toe faaauauina nei tupe totogi, ma sa otometi lava ona lesitala tamaitai uma i le Ekalesia i le Aualofa i le taimi lava na atoa ai lona sefuluvalu tausaga.

“O nei tausaga sa pisi, faigata, ma luitauina, ae na sili atu le tauia e sili atu nai lo’u malosi e fuatia ai,” na tusia ai e Belle. Sa agalelei le Alii ia te ia. “E tele taimi ua Ia tuuina mai ai ni manatu i lo’u mafaufau ma e oo lava i upu i lo’u gutu na mafai ai ona ou fetaiai ma tulaga faigata pe aveesea ai ni faafitauli faatautee.”

O lē na suitulaga ia te ia, o Barbara B. Smith, o le a manaomia le fesoasoani paia lava lea e tasi a o ia taialaina le Aualofa i se lumanai o suiga faifaipea. I tausaga mulimuli o Belle i le avea ai ma peresitene aoao, o le faatulagaga mo aia tatau a tamaitai ua maualuga lona agai pea i luma i le Iunaite Setete i le toatele o tamaitai, talavou ma matutua, na fesiligia matafaioi masani o itupa ma galulue faasaga i le le talafeagai ma le le tutusa o le taulimaina o tamaitai.

I le mulimuli ai i taumafaiga faaletulafono faapena i isi atunuu, sa pasia ai e le Konekeresi a le Iunaite Setete le Suiga Tutusa o Aia Tatau i le 1972. Na saili le suiga e toe faatulaga le Faavae o le I.S. ina ia aofia patino ai aia tatau faaletulafono mo tamaitai. O lea la ua faatalatalanoaina e tagata lautele o Amerika le lumanai o le suiga. Afai e faamaonia e le tolu-vae-fa o setete, o le a avea ma tulafono o le laueleele.

Mo nisi tagata, o le suiga na foliga mai o se fofo lelei i tulaga o le le laugatasia o itupa i le faatulagaga faaletulafono. O isi tagata, e aofia ai le toatele o tagata o le Ekalesia, sa lei mautinoa lelei.

Sa tuuina atu talu ai nei e Belle ona manatu i le suiga ma le faatulagaga ua siitia a tamaitai i se lauga i se vaega o tagata tomai faapitoa faapisinisi i le Aai o Niu Ioka. “O loo i ai nisi o mea o loo faatiga ai tamaitai lena e tatau i ai le lagolago,” na ia saunoa ai, ma taua ai le totogi tutusa mo galuega tutusa ma faiga talafeagai mo le faafaigaluegaina. Ae sa popole o ia o le faatulagaga mo tamaitai o le a taitai atu ai i le faavaivaia o matafaioi a le avā, tina, ma le tausiaiga. Sa talitonu o ia o le suiga i aia tatau faaletulafono a se tamaitai e tatau ona oo mai e ala i faigamalo i le lotoifale, setete, ma le malo, ae le o le suia o le Faavae.

A o ala umi ai ma toe taumanatu Belle i le leva o lana nofoaiga o se peresitene aoao o le Aualofa, sa ia lagonaina le lotofaafetai ua fefiloi ma se lagona matagofie o le toomaga ma le olioli ua pau atu ona tiutetauave i luga o tauau fou. “O loo i ai i totonu o lo’u agaga,” sa ia tusi ai, “se lagona o le filemu ma le folafolaga lelei mo le lumanai—o lo’u lumanai patino ma le lumanai o la’u Aualofa pele.”

Faatasi ai ma lenei lagona o le filemu, na iu ai ina sauni o ia e moe. “O le a ou malolo i le po nei,” na ia tusia ai, “aua i lo’u loto o le faamautinoaga lea o loo lelei mea uma.”

Pe tusa o le taimi lea, i Cape Coast, Kana, na vaai ai Billy Johnson i ata ma igoa o peresitene ua mavae o le Ekalesia i le itulau i luma o se nusipepa faalelotu i le lotoifale. I talaane o ata sa i ai ni tusiga sa tauleagaina ai le Ekalesia ma ona taitai. Sa manino lava le taumafai o le nusipepa e toto le le mautonu i tagata o le aulotu ua faatupulaia a Billy.

Sa faitioina Billy ma ona tagata talitonu mo lo latou faatuatua i le talalelei toefuataiina i le tele o taimi ua mavae. Sa taufaifai nisi tagata ia Billy mo le lafoaia o le tapuaiga a lona talavou. Sa latou fai mai sa tapuai le Au Paia ia Iosefa Samita ma sa le talitonu i le Atua. O isi na faailoa mai e leai ni alii Uli na umia le perisitua i le Ekalesia ma sa ulagia ia Billy ma i latou na mulimuli atu ia te ia mo le faamaimauina o o latou taimi.

Sa faigata ona tumau faamaoni i le lotolotoi o na osofaiga. I se tausaga na muamua atu, sa le fiafia ai tagata o le faapotopotoga ina ua mavae le tele o tausaga, sa leai se tasi na sau e papatiso i latou. Sa vave ona talosagaina e Billy ona soo e auai faatasi ma ia i le anapogi ma le tatalo. A o latou faia lea mea, sa lagona e nisi o tagata se uunaiga mamana o le a le pine ae o mai faifeautalai i Kana.

E ui ina sa faamautinoa atu e lenei uunaiga i le faapotopotoga, ae sa le’i taofia ai sauaga. Sa popole nisi o tagata o le ekalesia ina ua latou vaai i le nusipepa o faitioina perofeta, ma le le iloa po o le a le mea e fai. Sa tatalo faatasi Billy ma i latou ma uunaia i latou e leai lava ma se taua o tusiga a nusipepa. “Tau lava o le tiai ese,” na ia fai atu ai.

Ae sa lagona foi e Billy le vaivai. I se tasi po, sa alu ai o ia i le falelotu e tatalo. “Tama, e ui lava ou te talitonu i le Ekalesia, o le Ekalesia moni lenei i le lalolagi i aso nei,” na ia fai atu ai, “ou te manaomia le malosi atili ma le faamaoniga sili atu e molimau atu ai e uiga i le Ekalesia.”

Sa ia aioi atu i le Alii e faaali mai o Ia lava. Ona moe ai lea o ia ma miti na ia vaai i le Malumalu o Sate Leki, ua tumu i le malamalama, ua alu ifo mai le lagi. Sa lei pine ae siomia o ia e le fale. “Johnson, aua nei aveesea le faatuatua i la’u ekalesia,” na fetalai mai ai le siufofoga o le Alii. “Pe e te talitonu i ai pe leai, o la’u ekalesia moni lenei i le lalolagi i aso nei.”

Ina ua ala a’e Billy, sa le’i toe popole o ia i sauaga. “Ua fetalai mai Tama,” o lana tala lea. “O le a ou le toe fefe lava.”

I aso na sosoo ai, sa sili atu le malosi o lagona o le faatuatua o Billy i soo se taimi lava na ia faalogo ai i se tasi o faitioina le Ekalesia, ma sa ia galue e faamalosia ona uso a tagata talitonu. “O le a i ai se taimi o le a oo mai ai le Ekalesia,” na ia molimau atu ai. “O le a tatou vaai i le matagofie o le Ekalesia.”

I le 1974, i le lima tausaga talu ona faamavae o se taitai o le Nofoaga o Tamaiti Matuaoti Songjuk, sa tatalaina ai e Hwang Keun Ok se fale fou mo teineiti i Seoul, Korea i Saute. Ua ia tausia nei teineiti e toasefulufitu, o nisi o i latou o ni e o le Au Paia o Aso e Gata Ai, ma fesoasoani i isi ia maua ni aiga vaetamaina e ala i le Tender Apples Foundation [Faalapotopotoga Apu Agamalu]. Sa lagolagoina foi e le faalapotopotoga isi vaega o tamaiti, e aofia ai le nofoaga mo tama ua maliliu o latou matua. Sa tatalaina foi e Keun Ok se aoga faataitai e aoaoina ai le fanau aupito laiti a Korea o e sa manaomia le fesoasoani.

E ui ina laiti ifo nai lo le vaega o pesepesega sa i ai i le nofoaga o tamaiti ua maliliu o latou matua, ae sa faatino pea e Apu Agamalu faaaliga i le televise ma faia ni konaseti. Sa pisi soifuaga o teineiti, ma sa faamautinoa e Keun Ok e latou te lagonaina le fiafia i le faatasi ai ma ia. O po o Aso Gafua uma sa ia faapotopoto ai i latou mo se afiafi faaleaiga.

Pe a ia le o tausia ana teineiti, sa auauna atu Keun Ok i tamaitai o lana itu o se peresitene o le Aualofa. O lona valaauga na fesootai ai o ia ma Eugene Till, le peresitene fou faatoa valaauina o le Misiona a Korea. Sa popole Peresitene Till i le toatele o tagata Korea e leai se mea na iloa e uiga i le Ekalesia, e ui ina sa i ai se siteki ma se inisitituti ola o mataupu faalelotu i Seoul. O le mea moni, sa ia iloaina ai e itiiti ifo ma le 10 pasene o tagata Korea na iloaina le igoa atoa o le Ekalesia. Ma o i latou o e sa iloaina le Ekalesia sa le masani ona i ai so latou manatu lelei e uiga i ai. E le gata i lea, sa faatapulaaina e le malo le aofai o faifeautalai Amerika na faatagaina i le atunuu.

Ae afai e mafai e Peresitene Till ona faaali atu i taitai Korea e totonugalemu aiga i le Ekalesia, atonu o le a naunau le malo e tatala ona tapu i le galuega faafaifeautalai.

I se tasi aso, sa ia aapa atu ai ia Keun Ok mo se fesoasoani. Sa i ai ni faifeautalai i le misiona sa latou faaaofiaina musika i a latou aoaoga. E pei o le au Osmonds, sa latou talitonu o musika lauiloa e mafai ona musuia ai tagata i savali e uiga i le talalelei toefuataiina. I se tausaga na muamua atu, na faalauiloa ai e le au Osmonds le O Le Fuafuaga, o se lipine pese sa latou galulue ai mo ni nai tausaga. I le tulaga faamusika, sa foliga mai o le lipine ua pei o isi lipine na pueina e aufaaili lauiloa o ia taimi. Ae sa faia e le au uso se taumafaiga faapitoa e tusi ni pese e uiga i tulaga uma i le ata o le faaolataga, mai le muai olaga i le faaeaga. E ui ina sa faaleaogaina e le au faitio le lipine ona o ona autu o le Au Paia o Aso e Gata Ai, ae o lana savali e faatotonugalemu i le talalelei na oo atu ai i le toatele o tagata talavou i Amerika i Matu, Europa, ma Ausetalia.

O taumafaiga faamusika a faifeautalai i Korea i Saute sa tauagafau i faatusatusaga, ae sa tutusa lava a latou sini. O le taitai o le vaega, o Elder Randy Davenport, na tusia le tele o uluai pese a le vaega, ma sa faatulagaina e Elder Mack Wilberg le musika. Sa latou ta’ua i latou lava o se Tafailagi Fou.

O le iloaina o le gafatia o le vaega, na fesili atu ai Peresitene Till ia Keun Ok pe o le a auai faatasi atu Apu Agamalu ma New Horizon [Tafailagi Fou] i se konaseti o le Kerisimasi. Sa vaai Keun Ok i le taua o le i ai o Apu Agamalu e faasoa atu le talalelei toefuataiina ma, ina ua uma ona feutagai ma Stan Bronson, sa ia ioe i ai.

O le konaseti o le Kerisimasi sa manuia tele, ma sa ioe tagata uma o le Tafailagi Fou ma Apu Agamalu o se tuufaatasiga talafeagai. Sa amata ona latou malaga faataamilo faatasi i le atunuu ma maua ai se aofia lautele i polokalama o televise ma leitio. O Apu Agamalu sa faapitoa lava le lauiloa i nofoaga o le militeli, lea na faamanatu atu ai i le toatele o tagata o le faapotopotoga a latou lava fanau i le Iunaite Setete. O faifeautalai i Le Tafailagi Fou, i le isi itu, sa lauiloa i aofia i Korea, o e sa fiafia e vaai atu i tagata faafiafia Amerika o tautatala ma pepese i le faaKorea. Sa faaauau ona pueina faatasi lipine.

Sa i ai se taimi na tatau ai ia Keun Ok ona nanā lona faatuatuaga. O lea la ua aofia ai i le Apu Agamalu ma le Tafailagi Fou le igoa o le Ekalesia i faatinoga ma faatalanoaga uma. I konaseti, sa i ai faifeautalai faamisiona iina e ta’u atu i tagata nisi mea e uiga i le Ekalesia. O faifeautalai na tu’itu’i atu i faitotoa sa tele ina talia i totonu, faatasi ai ma tagata sailiili e fai mai sa latou iloaina le igoa o le Ekalesia mai se konaseti po o se lipine. I nisi o nofoaga, e fuafua ai e faifeautalai se konaseti e tuuina atu i se nofoaga faitele e faateleina ai le aofai o tagata atonu e naunau e faalogo ia i latou.

A o faasolo ina lauiloa le Apu Agamalu ma le Tafailagi Fou, sa faatautaia e Peresitene Till se sailiiliga ma iloa ai o le aofai o tagata e nonofo ma faataamilo i Seoul o e sa faalogo i le Ekalesia ua valu nei mai le sefulu. O le mea e sili ona taua, o lagona o le toatele o i latou sa i ai e uiga i le Ekalesia sa matuai lelei lava.

E ui ina sa latou o mai mai talaaga ma aganuu eseese, ae sa fesoasoani lava le Tafailagi Fou ma le Apu Agamalu e faasalalau faatasi le talalelei, e tasi le pese i le taimi.

Ia Aperila 1975, o Henry ma Inge Burkhardt na faitau afe maila le mamao mai le fale. I le valaaulia a le Au Peresitene Sili, sa laua malaga atu ai i Iuta mai le Ripapelika Temokarasi o Siamani e auai i le konafesi aoao. O le malaga o se avanoa e seāseā tupu mo se ulugalii o le Au Paia o Aso e Gata Ai sa nonofo i se atunuu sa faatumauina ai le pulea lelei o ona tuaoi ma ona tagatanuu.

E le o le taimi muamua lea o Henry i le Aai o Sate Leki. Sa valaaulia i laua ma Inge e Peresitene Iosefa Filitia Samita ma ona fesoasoani e auai i le konafesi aoao i le fa tausaga na muamua atu. O le iloaina o le a faitauina e taitai Siamani i Sasae le valaaulia, sa tusia ai ma le faaaloalo e le Au Peresitene Sili o latou faamoemoega mo le filemu i le lalolagi, usoga aoao, ma isi mataupu faavae sa faalauiloa e le GDR. Sa faamaonia e le malo le talosaga mo femalagaaiga a Henry, ma sa auai o ia i le konafesi aoao i le 1972.

I lena taimi, sa lei faatagaina e le GDR Inge e o ma ia, o le lagona fefe ne’i le toe foi mai le ulugalii pe afai e faatagaina i laua e tuua faatasi le atunuu. Peitai, i le lua tausaga na sosoo ai, na maua uma ai e fesoasoani o Henry i le au peresitene o le Misiona a Dresden le faatagaga e malaga ai i le konafesi aoao faatasi ma o latou taitoalua, ma tuuina atu ai i le au Burkhardt le mafuaaga e faamoemoe ai o le a faamaonia e taitai o le malo le isi talosaga o le visa e sosoo ai a Inge. Ae ina ua latou talosaga e auai i le konafesi i le 1975, sa toe teena foi le talosaga a Inge.

Ina ua ia iloa le faafitauli o Inge, sa ofoina atu e taitai o le Ekalesia i le Aai o Sate Leki se tatalo faapitoa mo ia i le malumalu. Ma ina ua apili e Henry ma Inge le faaiuga, sa faamaonia e le malo le visa e aunoa ma se faafitauli.

O le auai i le konafesi sa o se aafiaga tulaga ese. Sa tatalaina e Spencer W. Kimball le konafesi mo le taimi lona tolu o se peresitene o le Ekalesia. O lana savali e mo le Au Paia o Aso e Gata Ai i le salafa o le lalolagi. Sa toeitiiti atoa le 700 siteki ma misiona e 150 i le lalolagi atoa, ma i le aluga o le tausaga ua tuanai, sa mafai ai ona ia feiloai ma le Au Paia i konafesi aoao a eria i Amerika i Saute ma Europa. Sa ia faapaiaina foi se malumalu i Uosigitone, DC, na fofogaina mai ai se malumalu fou i São Paulo, Pasila, ma amatalia ai ni fuafuaga mo se malumalu i le Aai o Mekisiko. E masani lava, a o fono ai ma le Au Paia, sa ia uunaia i latou e “faalautetele a latou laa,” pe faateleina a latou taumafaiga, i le faasoaina atu o le talalelei.

O lenei, a o ia lauga atu i le Au Paia i le konafesi aoao, sa ia uunaia i latou ia ola i ni olaga mama. Sa ia ta’usalaina ponokalafi ma le faapau pepe, o se faiga na faatagaina talu ai nei i le Iunaite Setete. Sa ia uunaia foi le Au Paia e toto ni togalaau, faasoa atu le talalelei, ma faatuina le Ekalesia i o latou atunuu moni. “O le faapotopotoina o Isaraelu,” na ia saunoa ai, “e faatinoina pe a talia e tagata o atunuu mamao le talalelei ma nonofo ai pea i o latou lava atunuu moni.”

O se savali na talanoa loloto atu ia Henry ma Inge i o la aafiaga i le Ekalesia. I le luasefulu tausaga na muamua atu, ina ua la filifili e toe foi i le GDR ina ua uma ona faamauina i le Malumalu o Suisi, sa la ositaulagaina lo la avanoa e faataitai saoloto ai la la’ua tapuaiga ma auai atu e le aunoa i le malumalu. Ae o a latou faataitaiga ma le taitaiga na fesoasoani ai e faapotopoto le Au Paia e le gata i le GDR ae faapea foi i Hanikeri, Polani, ma Siekisolovakia, lea na faia ai e Henry ma isi taitai o le Ekalesia Siamani i Sasae ni asiasiga faavaitaimi.

A o lei toe foi atu i le fale, sa talanoa Henry ma Peresitene Kimball e uiga i le tauiviga a le Ekalesia ma le malo i le GDR. Sa masalosalo Peresitene Kimball e mafai e le Ekalesia ona faaleleia lona tulaga iina e ala i feutagaiga faapolokiki. “Afai e te manao e vaai i se suiga o mea i Siamani i Sasae, e tatau ona amata ia te oe lava ia,” na ia fai atu ai ia Henry. “E tatau ona e faamalosia oe lava e faauo atu i tagata komenisi. E le mafai ona e taofia ni lagona le fiafia e faasaga ia i latou. E tatau ona e suia lau vaaiga atoa ma ou uiga faaalia.”

Sa ofo Henry i le mea na fautuaina mai e le perofeta. “E te le iloa le au komenisi,” sa ia fia fai atu ai. “E le mafai ona e atiina ae se sootaga lelei ma i latou. E tetee i latou i tapuaiga.” Sa ia manatuaina le tele o taimi na faatiga ai o ia e le au pulega ma taumafai e lafo o ia i le falepuipui.

O le manatu o le faia o ni uo ma i latou o se mea inosia.

I se Aso Sa susulu i le atunuu na faatamaia e le taua o Viatename, sa ui atu ai Nguyen Van The, o le peresitene o le Paranesi a Saigon, i le faitotoa i fafo o se vila sitaili faaFarani e avea ma falelotu i le lotoifale. I le taimi lava lena, na siomia ai o ia e tagata o le paranesi, o o latou foliga ua tumu i le le fiafia ma le faamoemoe. “Peresitene Nguyen Van The! Peresitene Nguyen Van The!” sa latou alalaga ai. “O le a se tala fou o ia te oe?”

Sa i ai lana talafou, ae sa ia le mautinoa pe o le a faapefea ona tali atu i ai le paranesi. Sa savali atu o ia i le faitotoa o le falesa, ma sa mulimuli atu le Au Paia ia te ia, ma alalaga atu nisi fesili. E aunoa ma le tali atu, sa faatalofa atu The ma pōopō papatua o tagata. O Cong Ton Nu Tuong-Vy, o le peresitene o le Aualofa ma le faaliliutusi sinia o le Tusi a Mamona faaViatename, na ia uuina lona lima.

“O le a se fautuaga o ia te oe, Peresitene Nguyen Van The?” sa ia fesili ai. “O le a se mea ou te ta’u atua i le usoga?”

“Sau i totonu, Sister Vy,” o le tala lea a Nguyen Van The. “O le a ou ta’u atu ia te oe mea uma ou te iloa pe a uma le sauniga faamanatuga.” Ona ia uunaia lea o i latou uma sa i le tumutumu ina ia fifilemu. “O le a taliina uma a outou fesili.”

Mo le tele o tausaga, sa fevaevaea’i lava Viatename. Na tulai mai ni fevaevaeaiga e lei leva ona uma le Taua Lona II a le Lalolagi ina ua aveese e vaegaau a Viatename ia taitai faakolone Farani o e sa pulea Viatename talu mai le faaiuga o le seneturi lona sefuluiva. Ina ua teena e vaega faasagatau i Viatename i Saute taitaiga faakomenisi, ona oo ane ai lea o fetauaiga i le va o vaega faakurila. Sa tau vaegaau a Amerika faatasi ma le au Viatename i Saute mo le toeitiiti atoa le sefulu tausaga, ae o le maualuga o tagata manunua ma maliliu, na mafua ai ona le aloaia le taua i le Iunaite Setete, ma taitai atu ai i le solomuli malie ma o ese mai ai le ISA mai le taua. O lenei ua lalata mai vaegaau a Vietiname i Matu i le laumua i saute o Saigon, ma o tagata uma na totoe o Amerika ua sauni e o ese.

O le taunuu mai o vaegaau a Viatename i Matu na faamata’uina ai le faamutaina o le Paranesi a Saigon. E oo atu i le vaiaso na muamua atu, ina ua tuua e le faifeautalai mulimuli o le Au Paia o Aso e Gata Ai le atunuu, sa vaaia e le paranesi tagata fou o auai i masina taitasi. E silia ma le luaselau le Au Paia i Viatename sa tapuai e le aunoa ma tagata o le Ekalesia mai le Iunaite Setete. O lenei sa fefefe le Au Paia Viatename i le au Viatename i Matu o le a faasalaina i latou mo lenei mafutaga. O nisi o tagata o le Ekalesia ua uma ona faataapeapeina, o le toatele o i latou na auai atu i potopotoga o tagata i le nofoaaga o vaalele, ma le faamoemoe e sosola ese mai le atunuu.

A o ulufale atu Nguyen Van The i le falesa ma nofo i le pito i luma o le potu, sa mafai ona ia faalogoina le taalililili mai o fana tetele—ma o nisi o pomu pāpā na foliga mai e matautia ma ua lalata mai. Sa ia malamalama lelei i lo latou tulaga pagatia e foliga o se mea malie. O le taua na aumaia ai fitafita Amerika o e na faailoaina atu o ia ma le toatele o le Au Paia i Viatename i le talalelei toefuataiina. O lea la o lena lava taua na faataapeapeina ai le paranesi. Sa ia lagona e pei o loo auai o ia i se falelauasiga mo le faapotopotoga toalaiti.

Pe tusa ma le 125 tagata o le paranesi i le fonotaga ina ua tu i luga The ma agai atu i le pulelaa. Sa latou foliga popole, ma o le toatele o i latou sa fetagisi. Sa ia lagonaina foi le ootia, ae sa tumau pea lona faato’ato’a a o ia amatalia le sauniga faamanatuga. Sa usuina e le Au Paia le “O Mai, Outou o le Au Paia” ma taumamafa i le faamanatuga. Ona tuuina atu lea e The lana molimau ma valaaulia isi e faia foi faapea. Ae a o tutu le Au Paia ma faasoa atu a latou molimau, sa le mafai ona ia taulai atu ia latou upu. Sa tilotilo atu le Au Paia ia te ia i lenei taimi o faalavelave, ma sa ia lagonaina le le atoatoa.

Ina ua maea le sauniga, sa logoina e The le Au Paia e faapea, sa naunau le Ofisa o le Iunaite Setete e aveese mai tagata o le Ekalesia ma soo se tasi o loo sauniuni mo le papatisoga. Ae o le Au Paia e i ai aiga e le o ni tagata o le Ekalesia e tatau ona a le o le tuua e pele ia i latou po o le nonofo foi o latou ma o latou aiga. O lenei tala na mafua ai ona fetagisi nisi o le Au Paia i le lototiga. “Ae a lo’u aiga?” sa latou fesili ai. “E le mafai ona ou alu ese e aunoa ma lo’u aiga!”

Faatasi ai ma le fesoasoani a tagata o le paranesi, na fatuina ai e The se lisi po o ai le Au Paia o le a muamua ona o ese. E ui i le talosaga a le ofisa o le amepasa, o le lisi na aofia ai lava le toatele o aiga ma uo a tagata o le paranesi e le auai i le ekalesia. O le faletua o The, o Lien, ma le la fanau laiti e toatolu sa i ai ma le Au Paia i luga o le lisi. Sa tauanau atu tagata o le paranesi ia vave o ese loa le aiga o The, ina ia mafai ona ia gauai atoa atu i le aveesea mai o isi tagata uma. I le avea ai ma peresitene o le paranesi, sa lagona e The o lona tiute le avea ma tagata mulimuli e aluese.

O Lien ma le fanau, faatasi ai ma lona tina ma ona uso, na felelei ese atu mai Saigon i ni nai itula mulimuli ane.

O le aso na sosoo ai, na tu’i pomu ai e le au Viatename i Matu le malaevaalele i Saigon, ma faatamaia ai le auala vaalele ma taofia ai vaalele o femalagaaiga a le militeli mai le tulaueleele. Ona oo lea, i le isi fasefulu-valu itula, na aveesea ai e helikopa ia tagata Amerika na totoe ma po o ai lava tagata sulufai Viatename e mafai ona latou aveina. Sa faatopetope atu The i le amepasa a le I.S., ma le faamoemoe e saili se auala mo ia ma isi Au Paia o loo i ai pea i le aai. Ina ua ia taunuu atu, ua mu le fale ma o le asu na lilofia ai le lagi. Sa potopoto i fafo le au fuimu ma le potopotoga o tagata, ae o le amepasa lava ia ua gaogao. Ua tuua e tagata Amerika le aai.

I le naunau ai e fesoasoani i tagata o le paranesi o loo totoe ia sosola ese, na feosofi ai The ma se usoo le Au Paia, o Tran Van Nghia, i luga o se uila afi e saili se fesoasoani mai le Koluse Mumu Faavaomalo. Ae e lei umi ae latou feiloai ma le anoanoai o tagata o loo tamomoe ma le le mautonu i se auala e tasi le itu e agai ai. O se tanetau ma se fana lapoa sa taavale vave mai ia i la’ua.

Sa seu ese e Nghia mai le auala, ma sa la lalafi ma The i totonu o se alavai. Sa taavalevale ane pea le tanetau i o la tafatafa, ma galulu ai le eleele a o pasi atu.

Ua i ai nei Saigon i lima o Viatename i Matu.

E tasi le vaiaso mulimuli ane, ia Me 1975, na laa ese ai Le My Lien mai se pasi tumu i se tolauapiga faamiliteli e latalata i San Diego, Kalefonia, i le Talafatai i Sisifo o le Iunaite Setete. I ona luma sa i ai se nuu mafola o faleie na faatulagaina e malutia ai tagata sulufai e sefuluvalu afe mai Viatename. O le mutia ma le oneone na ufitia ai le lotoa, ma laau sa ta’i tasitasi ona tutu mai i le tafailagi. Sa savavali solo tamaiti i ofu peleue lapopoa o le militeli, ma sa feoai solo tagata matutua i le aso ma ni foliga le fiafia.

E ui ina sa faatasi le tina ma uso o Lien ma ia, ae sa ia lagonaina le le mautonu. Sa faafaufau o ia mai lana malaga i le tolauapiga. Sa leai sana tupe ma sa laitiiti se iloa o le faaPeretania. Ma sa i ai lana fanau e toatolu e tatau ona tausia a o faatalitali se talafou e uiga i lona toalua i Viatename.

I lo latou aso muamua i le tolauapiga, sa faafeiloaia ai Lien ma isi tagata o le Paranesi a Saigon—o le tele lava o tamaitai—e volenitia ma pine e faailoa atu i latou o ni tagata o le siteki a Kalefonia i le lotoifale. Sa faailoa atu e se tamaitai sa lelei ona laei o ia o Dorothy Hurley, le peresitene o le Aualofa a le siteki. O ia ma isi volenitia o le siteki sa i ai iina e tufatufa atu meaai, lavalava, ma vailaau faafomai i le Au Paia sulufai, faatulaga i latou i itu o faiaoga o aiga, ma faatuina le Peraimeri ma le Aualofa. Ia Lien, sa foliga mai uso o le Aualofa o ni agelu.

Sa faaaluina e tagata o le Paranesi a Saigon le aoauli i se malaga maimoa i le tolauapiga. O le gasēsē iliili i lalo o vae, a o faasino atu ia Lien ma lona aiga le potu tele e aai faatasi ai, ma auaunaga a le Koluse Mumu, ma falelaitie. O le savaliga umi na alu ai le aoauli atoa, ma tuua ai Lien ua vaivai. Sa itiiti ifo lona mamafa nai lo le ivasefulu pauna, ma sa vaivai tele lona tino e gaosi ai lsuasusu mo lana tama teine laitiiti, o Linh.

I lena po, sa taumafai ai Lien i le mea sili na te mafaia e faamafanafana ai lana fanau. E leai ni planikeke na saunia e le tolauapiga ae na o le tasi le moega pepe. O lana fanau tama, o Vu ma Huy, na faaofiofi i luga o le moega pepe ao moe le pepe i se moega faatautau na mamanuina e Lien mai se ie ma ni pepa ma ni pa’u.

Sa leai se mea mo Lien e taoto ai, o lea sa moe ai o ia i le faatausiusiuga o le moega o pepe, ma faalagolago atu i se pou o le faleie. Sa malulu po, ma sa leai se mea na faia e le ea malulu e fesoasoani ai ia te ia mo lona soifua maloloina ua faateteleina le leaga. E lei umi ae maua o ia i le mamapala.

E ui i lona ma’i, sa alapo lava Lien i taeao taitasi e aumai ni fagususu laiti se ono mo lana pepe ma fafaga tama. I le taimi o le taumafataga, sa faatumulia le faleai i tagata o loo faatalitali mo lo latou taimi e aai ai. Faatasi ai ma lana tama teine i ona lima, sa ia fesoasoani i lana fanau tama e asu ma ave a laua ipu’ai. Seiiloga lava ua uma ona aai lana fanau ona toe foi atu lea o ia e aumai sana lava meaai.

Sa ootia le loto o Lien ina ua ia vaaia isi tamaiti o faatalitali ma le fiaaai i le laina. Talu ai sa vave ona leai ni meaai i le fale tele, mess hall, e masani lava ona tufa atu e Lien meaai i tamaiti e faamautinoa ai ua latou aai. Sa toe faasoa atu e nisi a latou karoti ma broccoli ia te ia.

Sa ia tatalo e le aunoa ina ia tumau le malosi o lona toalua, ma le talitonu afai e mafai ona ia sao mai i lona tulaga pagatia, ona mafai foi lea ona ia gafatia lona tulaga. Sa lei faalogo o ia i se tala mai ia te ia talu mai lana solaaga mai Saigon. Ae i ni nai vaiaso talu ona taunuu o ia, na sau ai Elder A. Theodore Tuttle o le Aufono Muamua a Fitugafulu i le tolauapiga ma tuuina atu ia Lien se savali patino mai ia Peresitene Spencer W. Kimball, o lē sa asiasi atu i le tolauapiga ma feiloai ai ma tagata sulufai a o lei leva ona taunuu atu o ia iina.

“Ou te molimau atu o le a faasaoina lou toalua,” na folafola mai ai le savali a le perofeta, “ma o le a toe faatasia outou o se aiga i le taimi a le Alii lava ia.”

O lenei, a o luelue e Lien lana pepe o tagi i taeao taitasi, sa ia tagi foi. “Faamolemole,” sa ia aioi atu ai i le Alii, “ia tau lava ina ou sao i lenei aso.”

  1. Maeta Beck and Dennis Beck, Oral History Interview, 29–33, 47, 88, 123–24; Shumway and Shumway, Blossoming, 98; “BYU ‘Lamanite Generation’ a Big Hit on Florida Tour,” Church News, Jan. 8, 1972, 4. Autu: Fesootaiga o Ala Faasalalau

  2. Beck, Journal, Dec. 17, 1973; Maeta Beck and Dennis Beck, Oral History Interview, 74–76, 80–83, 93–94, 100–101; Shumway and Shumway, Blossoming, 99–100.

  3. Beck, Journal, Dec. 17, 1973; Shumway and Shumway, Blossoming, 99–100; Maeta Beck and Dennis Beck, Oral History Interview, 124.

  4. Maeta Beck and Dennis Beck, Oral History Interview, 45–46, 73–74, 101–5, 124; Beck, Journal, Oct. 28, 1974.

  5. Maeta Beck and Dennis Beck, Oral History Interview, 39–45, 109–10, 125; Shumway and Shumway, Blossoming, 100. Ua faasa’oina upusii mo le faitauina; o le uluai punaoa o loo i ai le “Sa ia tau mai ia te au sa laua faaaluina le tele o taimi i o laua tulivae, ma tatalo mo au ina ia ou faia filifiliga sa’o.”

  6. Maeta Beck and Dennis Beck, Oral History Interview, 39–41, 44, 76, 124, 137–38.

  7. Spafford, “My Feeling upon Being Released as President of Relief Society,” [1]–[3]; Derr, Cannon, and Beecher, Women of Covenant, 307, 347. Autu: Belle S. Spafford

  8. Tanner, Journal, May 6, 1971; “Willis Earl Spafford,” Deseret News and Salt Lake Telegram, Jan. 28, 1963, A14; “Mary S. Kemp,” Salt Lake Tribune, Mar. 30, 1964, 26; “Relief Society Leader Dies at 86,” Salt Lake Tribune, Feb. 4, 1982, B3.

  9. Au Paia, voluma 3, mataupu 32; Derr, Cannon, and Beecher, Women of Covenant, 305–46; Relief Society, General Board Minutes, volume 35, Jan. 6, 1965, 208; volume 36, Mar. 23 ma Nov. 16, 1966, 45–46, 153; Hangen, “Guide to a Generation,” 83; Spafford, Oral History Interview, 67–73.

  10. Relief Society, General Board Minutes, volume 36, Mar. 23, 1966, 45; volume 37, May 22, 1968, 117; volume 39, Feb. 10, 1971, 151–52; Mar. 24, 1971, 181–82; volume 4, Apr. 4, 1973, 133–34; Marion G. Romney and Boyd K. Packer to the First Presidency and Council of the Twelve, Mar. 5, 1971; Relief Society General Presidency to Marion G. Romney and Boyd K. Packer, Mar. 31, 1971, in Relief Society, General Board Minutes, volume 39, Mar. 31, 1971, 192A–92B; “Statement of Financial Condition of Relief Society,” Aug. 31, 1971, Relief Society, General Board Minutes, volume 39, 286; Derr, Cannon, and Beecher, Women of Covenant, 345; Handbook of Instructions of the Relief Society, 43–44. Autu: Aualofa

  11. Spafford, “My Feeling upon Being Released as President of Relief Society,” [3].

  12. Derr, Cannon, and Beecher, Women of Covenant, 347–48; Spruill, Divided We Stand, 14–41; Hartmann, From Margin to Mainstream, 48–106; Bruley, “Origins of the Women’s Liberation Movement in 1960s Britain,” 67–78; “Educator Sees Rebuff to Equality Bill as ‘Humiliating Mistake,’” Salt Lake Tribune, Apr. 22, 1973, B1. Autu: Suiga Aia Tatau Tutusa

  13. Public Communications Department, General Authority Advisers Minutes, May 29 and July 16, 1974; Belle S. Spafford, “The American Woman’s Movement,” July 12, 1974, First Presidency, General Correspondence, CHL; “Happy Homemakers Still Abound in Liberated World,” Democrat and Chronicle (Rochester, NY), Aug. 20, 1974, C5.

  14. Spafford, “My Feeling upon Being Released as President of Relief Society,” [3].

  15. Johnson, “History of The Church of Jesus Christ of Latter-day Saints in Ghana,” [2]–[3]; Joseph Johnson, Oral History Interview [1988], 20–21; Joseph Johnson, Oral History Interview [1998], 6; Joseph Johnson to First Presidency, Sept. 9, 1978, International Mission Files, CHL.

  16. Johnson, “History of The Church of Jesus Christ of Latter-day Saints in Ghana,” [3]; Joseph Johnson, Oral History Interview [1988], 26; Joseph Johnson, Oral History Interview [1998], 6.

  17. Joseph Johnson, Oral History Interview [1988], 21; Joseph Johnson, Oral History Interview [1998], 6.

  18. “Girls Fill Home with Music, Love,” Church News, Nov. 23, 1974, 14; Bronson, Oral History Interview, 12–14, 45, 48–49, 53–54, 57–58, 66–69, 88–89, 101; Hwang, “Hwang Keun Ok,” 293; Shirleen Meek Saunders, “Whang Keun-Ok: Caring for Korea’s Children,” Ensign, Oct. 1993, 48–49. Autu: Afiafi Faaleaiga

  19. “Girls Fill Home with Music, Love,” Church News, Nov. 23, 1974, 14; Till, Till, and Munoa, Oral History Interview, 4, 31; Greg Hill, “Singing Elders Took Korea by Storm,” Church News, Nov. 29, 2008, 6; Gunter, Oral History Interview, 5–6; “First Institute Building Under Way in Korea,” Church News, Aug. 23, 1975, 14; Bronson, Oral History Interview, 50–51; Eugene Till to Stan Bronson, Oct. 15, 1975, Stanley Bronson, Tender Apples Collection, CHL; Hinckley, Journal, June 8, 1973. Autu: Korea i Saute

  20. Eugene Till to First Presidency, June 30, 1977, First Presidency, Mission Correspondence, 1964–2010, CHL; Choi, “History of The Church of Jesus Christ of Latter-day Saints in Korea,” 196–97; Till, Till, and Munoa, Oral History Interview, 4–5.

  21. Till, Till, and Munoa, Oral History Interview, 4–8, 29–31; Davenport, Oral History Interview, 1–2, 6, 7–11; Osmond and Romanowski, Life Is Just What You Make It, 127–29; Osmond and Osmond, Oral History Interview, 12–18, 26; see also Dunn, Osmonds, 190–96, 239–46.

  22. Till, Till, and Munoa, Oral History Interview, 4–7, 29–30; Davenport, Oral History Interview, 1–2, 6, 7–11; Wilberg, Oral History Interview, 2; Gunter, Oral History Interview, 1–2, 4–5; Korea Seoul Mission, Historical Records, Sept. 13, 21–24, and 28, 1974, [7]–[8].

  23. Till, Till, and Munoa, Oral History Interview, 7–10; Bronson, Oral History Interview, 67; Hwang, “Hwang Keun Ok,” 293–94; Gunter, Oral History Interview, 7, 11, 13; Davenport, Oral History Interview, 6–12; Wilberg, Oral History Interview, 2, 5–7.

  24. Till, Till, and Munoa, Oral History Interview, 7–8, 11–12, 18–19; Davenport, Oral History Interview, 8–12; Gunter, Oral History Interview, 6, 16–17.

  25. Till, Till, and Munoa, Oral History Interview, 11; Greg Hill, “Singing Elders Took Korea by Storm,” Church News, Nov. 29, 2008, 6; Eugene Till to First Presidency, June 30, 1977, First Presidency, Mission Correspondence, 1964–2010, CHL; Bronson, Oral History Interview, 13–14; Shirleen Meek Saunders, “Whang Keun-Ok: Caring for Korea’s Children,” Ensign, Oct. 1993, 48–49; Davenport, Oral History Interview, 8–9, 13; Gunter, Oral History Interview, 6. Autu: FaaleKelope [Globalization]

  26. Monson, Journal, Mar. 27, 1975; Robert Barker to Victor Wolf, Dec. 10, 1974; First Presidency to Henry Burkhardt, Apr. 21, 1971, First Presidency, Mission Correspondence, 1964–2010, CHL; Kuehne, Henry Burkhardt, 68–72, 78–79. Autu: Konafesi Aoao

  27. Robert Barker to Kent Brown, Mar. 7, 1972; Robert Barker to Steven Vitale, Nov. 1, 1972; Robert Barker to Chief of the Consular Section, Oct. 13, 1973; Robert Barker to Henry Burkhardt, Feb. 18, 1975, First Presidency, Mission Correspondence, 1964–2010, CHL; Monson, Journal, Mar. 27, 1975; Kuehne, Henry Burkhardt, 69–72.

  28. Spencer W. Kimball, “Why Call Me Lord, Lord, and Do Not the Things Which I Say?,” Ensign, May 1975, 4–7; Kimball and Kimball, Spencer W. Kimball, 416–20; J M. Heslop, “Stockholm: ‘Burning Memory,’” Church News, Aug. 24, 1974, 3; J M. Heslop, “Area Conference in Brazil,” Church News, Mar. 8, 1975, 3; Hunter, Journal, Jan. 9, 1975; Kapp, Journal, Oct. 19, 1974; J M. Heslop, “Missionary Effort—‘Lengthen Our Stride,’” Church News, Oct. 19, 1974, 3, 10. Autu: Spencer W. Kimball

  29. Au Paia, voluma 3, mataupu 39; Kuehne, Henry Burkhardt, mataupu 5.

  30. Burkhardt, Oral History Interview [1991], 21–22; Monson, Journal, Oct. 9, 1982; Burkhardt, Journal, July 17, 1975; Mehr, “Enduring Believers,” 150; Kuehne, Mormons as Citizens of a Communist State, 104; First Presidency to Henry Burkhardt and Charles Broberg, Apr. 24, 1972, First Presidency, Mission Correspondence, 1964–2010, CHL. O Autu: Feeseeseaiga Tulaga Faapolokiki Faavaomalo; Ripapelika o Siekisolovakia; Siamani; Hanikeri; Polani; Solovakia

  31. Kuehne, Henry Burkhardt, 79-82.

  32. Nguyen and Hughes, When Faith Endures, 1, 5–7. Ua faasa’oina upusii mo le sa’o atoatoa; nai lo le “The,” uluai punaoa o loo i ai le sipelaga o upu o le “Tay.”

  33. Nguyen and Hughes, When Faith Endures, 5; Britsch, From the East, 429–31.

  34. Kiernan, Việt Nam, 385–91, 395–451; Taylor, History of the Vietnamese, 446–47, 478–83, 536–619.

  35. Nguyen and Hughes, When Faith Endures, 1, 6, 119; Britsch, From the East, 435–37.

  36. Nguyen and Hughes, When Faith Endures, 1, 7, 11.

  37. Nguyen and Hughes, When Faith Endures, 7, 14–17.

  38. Nguyen and Hughes, When Faith Endures, 6, 10, 17–18, 127–28; “Saigon Branch Evacuation List,” May 13, 1975, First Presidency, General Correspondence, CHL; Le, Oral History Interview, 1–3.

  39. Nguyen and Hughes, When Faith Endures, 8, 128–33, 136–37; Nguyen, “Escape from Vietnam,” 29.

  40. “Saigon Branch Evacuation List,” May 13, 1975, First Presidency, General Correspondence, CHL; Le, Oral History Interview, 3, 19, 31–32; Ferren Christensen, Address, Newport Beach California Stake, Stake Conference, May 4, 1975, [00:13:40]–[00:18:14], [00:31:03]–[00:31:42]; Jack E. Jarrard, “To Help Viet Refugees: Church Members Open Their Hearts,” Church News, May 17, 1975, 4; Spencer W. Kimball, Journal, May 3, 1975.

  41. Le, Oral History Interview, 2–3, 10, 16, 21, 27.

  42. Le, Oral History Interview, 9–12; Jack E. Jarrard, “A New Home in America,” Church News, May 31, 1975, 5; Jack E. Jarrard, “To Help Viet Refugees: Church Members Open Their Hearts,” Church News, May 17, 1975, 4, 10; Ferren Christensen to Spencer W. Kimball, May 9, 1975, Welfare Services Department, Vietnamese Refugee Files, CHL.

  43. Le, Oral History Interview, 3–5, 9–10, 16–19; Nguyen and Hughes, When Faith Endures, 236.

  44. Le, Oral History Interview, 5–6, 10, 13–15, 23.

  45. Le, Oral History Interview, 14, 22, 25–28, 39; Nguyen and Hughes, When Faith Endures, 151–52; “Saigon Branch Evacuation List,” May 13, 1975, First Presidency, General Correspondence, CHL; Jack E. Jarrard, “Viet Mormons Arrive in U.S.,” Church News, May 10, 1975, 3, 13.

  46. Le, Oral History Interview, 23.