Mataupu 22
E Pei Lava o lo Tatou Alii ma le Matai
I le taeao o le aso 7 o Aperila, 1984, sa nofo ai Ardeth Kapp i le laina pito i luma o le Tapeneko o Sate Leki. O Gordon B. Hinckley, o le na valaauina e avea ma se fesoasoani faaopoopo i le Au Peresitene Sili i le toeitiiti tolu tausaga na muamua atu, sa tu i le pulelaa, ma talosagaina se palota lagolago a pulega ma taitai aoao o le Ekalesia. Sa ia faasilasila mai le valaauina o ni aposetolo fou se toalua, o Russell M. Nelson ma Dallin H. Oaks. Sa ia tuuina mai foi le igoa o Ardeth e avea ma peresitene aoao fou o Tamaitai Talavou.
Sa lagolagoina ma le autasi i latou e le Au Paia i le Tapeneko. “E tuuina atu se faalagiga, e faia se valaau,” na toe manatunatu mulimuli ane ai Ardeth i lana api talaaga, “ma e tali atu tagata o le ekalesia i le alofa.”
E fa masina mulimuli ane, na feiloai ai Ardeth ma ona fesoasoani, o Patricia Holland ma Maurine Turley, ma lona fesoasoani faaletaitai, o Carolyn Rasmus, i se tamai fale i atumauga e latalata i Provo, Iuta. O le Aso Sa muamua lea o le masina, ma na latou o mai o loo anapopogi.
O le taulaiga o la latou anapogi o le Alualu i Luma o le Tagata Lava Ia, o le polokalama a le Ekalesia o mea ua ausia mo tamaitai talavou talu mai le faaiuga o le vaitau o le 1970. Sa avea Ardeth ma se tasi o le au peresitene aoao o Tamaitai Talavou lea na faalauiloaina le Alualu i Luma o le Tagata Lava Ia, ae sa ia lagonaina e toatele tamaitai talavou sa le‘i auai i le polokalama.
Sa talitonu o ia ma ona fesoasoani e manaomia e tamaitai talavou taitasi se lagona sili atu o le faamoemoega paia ma le faasinomaga. Sa latou talitonu foi e tele atu mea e mafai ona faia e fesoasoani ai i tamaitai talavou ia lagona le vaaia ma le talisapaia a o latou saili e osia ma tausia feagaiga ma le Alii.
I le tamai fale, sa lisiina ai e Ardeth, Patricia, Maurine, ma Carolyn ia mataupu faavae lautele sa latou manatu e taua i le olaga ma le soifua manuia o se tamaitai talavou. Ona latou toe solomuli lea i se nofoaga i le togavao e mafaufau loloto ai i le lisi ma faaitiitia i lalo i mataupu faavae e sili ona taua. Ina ua latou toe foi atu i le potu, sa latou iloa ai e tutusa uma lava a latou lisi. Sa siomia i latou i se mafanafana. Sa latou lagonaina sa taitaiina i latou e le Alii i le itu sa‘o.
I lona tulaga o i ai nei, o le Alualu i Luma o le Tagata Lava Ia sa taulai atu i tulaga faatauaina e tutusa ai lotu Kerisiano uma. Sa manatu Ardeth ma ona fesoasoani e tatau ona aofia ai foi talitonuga maoti o le Au Paia o Aso e Gata Ai. A o talanoaina e tamaitai mea e faamamafa atu, sa latou faailoa mai ni tulaga faatauaina se lima e mafai ona fesoasoani i soo se tamaitai talavou, e tusa lava po o fea e nofo ai, ia latalata atili atu i le Atua ma malamalama i lona faasinomaga moni: faatuatua, natura paia, usiusitai, malamalama, ma filifiliga ma le tali atu mo ia lava.
I masina na sosoo ai, na faatulagaina ai e Ardeth ma ona fesoasoani se fono aoao a Tamaitai Talavou ma faamautu ai ni tulaga faatauaina se fitu, e suia ai le usiusitai i le taua o le tagata lava ia, galuega lelei, ma le amiosao. Sa faapipii e Ardeth ni pepa uumi i puipui o le potu o fonotaga a Tamaitai Talavou, ma sa la faatumuina ma isi sui o le aufaatonu le avanoa i malamalamaaga na latou maua mai suesuega ma talanoaga ma tamaitai talavou i le Ekalesia.
Sa talitonu le aufaatonu e tatau i tamaitai talavou taitasi ona iloa po o ai o ia ma pe faapefea ona fetaui o ia i le fuafuaga a le Atua. Sa manaomia e tamaitai talavou taitasi ona maua ni aafiaga faaleagaga, osia ma tausia feagaiga ma le Alii, maua le aloaiaina mo galuega faaKeriso, ma ia lagolagoina e ona taitai perisitua.
I le amataga o le 1985, sa sauniuni ai Ardeth ma lana fono faatonu e auina atu o latou manatu i le Aufono Faatonu o le Perisitua a le Ekalesia mo le faamaoniga. I lalo o le taitaiga a Peresitene Kimball, sa faateleina ai le faia o faaiuga e ala i aufono i le Ekalesia. O le Aufono Faapitoa a le Perisitua o se tasi lea o aufono faapitoa autu e tolu na faia ni fautuaga mo aiaiga faavae i le Au Peresitene Sili ma le Korama a Aposetolo e Toasefululua. O nei aufono na aofia ai nisi o aposetolo ma isi pulega aoao. I le taimi o le fonotaga a lana au peresitene ma le Aufono Faapitoa a le Perisitua, sa faamoemoe Ardeth e tuuina atu manino le vaaiga mamao a le fono faatonu mo Tamaitai Talavou. Ae sa le mautinoa pe faapefea ona fai.
I se tasi taeao ia Ianuari, na ala vave ai Ardeth ma uu mai se api lanu samasama sa ia teuina i autafa o lona moega. O mea uma sa latou talanoaina ma le aufaatonu talu mai lo latou valaaulia sa tuufaatasia i lona mafaufau e pei o se tuufatasiga matagofie. Sa amata ona ia tusitusi seia oo ina tafe mai upu ma musumusuga e aunoa ma se faalavelave. Ina ua ia tusia i lalo lana upu mulimuli, sa matuai faanoanoa lava o ia faalelagona ae sa siitia faaleagaga. Sa ia iloa le mea e fai atu i le aufono.
I le ono vaiaso mulimuli ane, na tootuli ai Ardeth ma ona fesoasoani i le tatalo i le Maota o le Pulega o le Ekalesia. I ni nai minute, o le a latou tuuina atu ai la latou fuafuaga mo le lumanai o Tamaitai Talavou i le Aufono Faatonu o le Perisitua. Afai sa sa‘o le fuafuaga, sa latou tatalo ai, ia tatala taliga o le usoga i ai. Ae afai e sese, sa latou ole atu i le Alii e tapuni taliga o le aufono.
E lei umi, ae valaaulia i latou i totonu o se potu fono lata ane lea sa nonofo ai Ezra Taft Benson, le peresitene o le Korama a Aposetolo e Toasefululua, ma isi sui o le aufono.
A o tu i luma o le potu, sa amata e Ardeth lana aoaoga. “O la matou taulaiga e le o le tele o mea e fai i polokalama,” na ia saunoa ai, “ae o mataupu faavae autu ia e mafai ona fesoasoani i tamaitai talavou ia iloa ma ola ai i le talalelei.”
Sa ia saunoa e uiga i le tele o faafitauli o loo feagai ma tamaitai talavou i le lalolagi: o ala o faasalalauga ma faasalalauga faataumaoi, solitulafono, amioga lē mamā faalefeusuaiga, faaletonu o le taumafa, faaaogaina leaga o fualaau faasaina ma le ava malosi, pule i le ola. Sa ia tuuina mai faamatalaga e faaalia ai e itiiti lava punaoa, avanoa mo le aloaiaina, ma taitai matutua o tamaitai talavou i le Ekalesia nai lo alii talavou. I le faatusatusaina o polokalama a Tamaitai Talavou ma Alii Talavou, na fai mai ai Ardeth, na te lei fautuaina mai e tatau ona tutusa. Ae, sa manaomia ona latou maua punaoa uma ma le lagolago e manaomia e fesoasoani ai i le autalavou ia manuia.
Mulimuli ane, na fautuaina e Ardeth ma ona fesoasoani le faatulagaina o Tamaitai Talavou i tulaga faatauaina e fitu. “O lena fausaga,” o le tala lea a Ardeth, “e mafai ona maua ai se faasinomaga mo tamaitai talavou ina ia latou malamalama lelei ai ma isi i le uiga o le avea ma se tamaitai talavou.”
Ina ua maea le aoaoga, sa valaaulia e Peresitene Benson le aufono e tutula’i e faailoa atu le taua o le aoaoga. “E le gata ina tatala o tatou taliga,” na ia fai mai ai, “ae faapea foi o matou ala e tafe ai loimata.”
Mulimuli ane i lena aso, na valaau atu ai Elder Dean L. Larsen, o se sui o le aufono, ia Ardeth i le telefoni. “O le a le vave e mafai ona e saunia ai se faasalalauga faasatelite mo tamaitai talavou?” na ia fesili ai.
“E oo atu ia Novema,” o le tala lea a Ardeth.
Sa faateia Elder Larsen. “O le umi lena?”
“E tatau ona faatulaga uma ia vaega,” o le tali lea a Ardeth. “O le a leai so tatou avanoa lona lua.”
I le aso 14 o Tesema, 1984, na faapaiaina ai e Peresitene Gordon B. Hinckley se fale o le Alii i le Aai o Kuatemala, Kuatemala. A o ia tilotilo atu i ai, sa maofa Carmen O‘Donnal, le faatina o le malumalu fou, i le tuputupu ae faavavega o le Ekalesia i Amerika Tutotonu ma Saute.
I le 1948, ina ua papatisoina Carmen i se tamai vai taele i saute o le Aai o Kuatemala, sa avea o ia ma se tasi o tagata muamua na auai i le Ekalesia i Kuatemala. O le taimi nei ua silia ma le 30,000 le Au Paia o Aso e Gata Ai i le atunuu, e silia ma le afa o i latou na papatisoina i le fa tausaga talu ai. Sa faateleina le toatele o tagata i le itulagi sa osia feagaiga e mulimuli ia Iesu Keriso, ma o le fausiaina o le malumalu sa avea ma totonugalemu o lenei galuega.
“Ua faatagaina a’u e le Alii ou te ola e vaai i lenei vavega i o‘u lava mata,” na ia saunoa ai i le taimi o le faapaiaga.
A o lei valaauina o ia o se faa-tinā o le malumalu, sa galulue Carmen ma lona toalua o Ioane i le Malumalu o le Aai o Mekisiko, lea na faapaiaina ia Tesema 1983. O le maota muamua lea o le Alii i Mekisiko, lea sa silia ma le 360,000 tagata o le ekalesia—e sili atu nai lo se isi lava atunuu e tautatala faaSipaniolo i le lalolagi. O nisi o i latou na auai i le faapaiaga o Isabel Santana ma Juan Machuca, o faiaoga muamua i le Centro Escolar Benemérito de las Américas, o e na faaipoipo i le silia ma le sefulu tausaga na muamua atu. Ua latou nonofo nei i Tijuana, Mekisiko, lea sa faigaluega ai Juan mo le Ofisa o Aoga a le Ekalesia.
I le itu mamao i saute, sa faaauau pea ona olaola le Ekalesia i Pasila. Ina ua faapaiaina le Malumalu o São Paulo i le 1978, sa i ai i le atunuu le 56,000 o le Au Paia i siteki e sefululua. E oo atu i le amataga o le 1985, ua faatupulaia le auai i le tusa ma le 200,000 i siteki e fasefulu fitu. Ma a o tuputupu ae le Ekalesia, sa faapena foi tiutetauave o Hélio da Rocha Camargo. Ina ua maea lana auaunaga o se epikopo o le Uarota Lua a São Paulo, sa avea o ia ma se peresitene o le siteki i São Paulo, o se peresitene o le misiona i Rio de Janeiro, ma o se sui o le Risone o le Toasefululua. Ona oo lea i le aso 6 o Aperila, 1985, na lagolagoina ai o ia o se tasi o le Korama Muamua a Fitugafulu, le uluai pulega aoao mai Pasila.
“O se aafiaga lenei ou te lei manao lava e maua,” sa ia fai atu ai i le Au Paia i le Tapeneko o Sate Leki. Ae sa mausali lona faatuatua i le talalelei toefuataiina, e pei o le toatele o isi taitai i le lalolagi atoa. “Ou te iloa o loo soifua le Alii,” na ia molimau mai ai. “Ua ou iloa o au o se atalii o le Atua, ma o lenei talalelei o le fuafuaga lea mo le fiafia o fanau uma a le Atua i lenei lalolagi.”
I Chile, i le taimi lea, ua silia nei ma le 130,000 le Au Paia i siteki e fa sefulu. E lei leva ona faia le faapaiaga o le Malumalu o le Aai o Mekisiko, ae olioli le Au Paia i Chile i le faapaiaga o le Malumalu o Santiago Chile, le uluai maota o le Alii i se atunuu e tautatala faaSipaniolo. E faitau afe le Au Paia na faapotopoto mo le sauniga, o nisi o i latou na malaga i le faitau selau o maila i le pasi.
Sa i ai Carlos ma Elsa Cifuentes i le malumalu mo le faapaiaga. O Carlos o se tasi o uluai tagata o le ekalesia i Chile. I le 1958, na faalatalata atu ai ni faifeautalai se toalua ia te ia i lona faletaavale i tuafale, faailoa atu i laua lava o ni sui o Iesu Keriso, ma fesili atu pe fia aoao e uiga i le Ekalesia. Sa papatisoina o ia i se taimi puupuu mulimuli ane. I le 1972, ina ua faatuina le uluai siteki i Chile, sa valaauina ai Carlos e avea ma ona peresitene.
E oo atu i le taimi o le faapaiaga o le Malumalu o Santiago Chile, ua vaivai le tino o Carlos i le kanesa. Ae sa ia maua le malosi e tu ai ma molimau atu ma le naunautai. “Ou te iloa e aunoa ma se masalosalo o le galuega lenei a le Alii,” na ia saunoa ai. “Ou te iloa o loo soifua le Atua. Ou te iloa o loo soifua Iesu Keriso, Lona Alo.” Na maliu Carlos i se masina mulimuli ane.
I Atenitina tuaoi, sa faaauau ai le fausiaina o se maota o le Alii i Buenos Aires. O Betty Campi e limasefulu-fa tausaga le matua sa avea ma peresitene o le Peraimeri a le siteki i se nuu maotua e igoa ia Mercedes. I lona soifuaga atoa, sa ia vaaia ai le tuputupu ae o le Ekalesia i Atenitina mai se tamai akone i se laau malosi, e pei lava ona valoia e le aposetolo o Melvin J. Ballard o le a tupu. I le 1942, le tausaga na papatiso ai o ia, sa tusa ma le fituselau tagata o le Ekalesia i Atenitina. O lenei ua toeitiiti atoa le valusefulu afe le aofai. Sa umia ma le faamaoni e Betty se pepa faataga aoga o le malumalu, ma le naunautai i le faatalitali i le aso e mafai ai ona ia faaaogaina i lona atunuu.
Ma e le‘i tuua lava na o Atenitina. I isi nofoaga i Amerika i Saute, sa agai i luma fuafuaga mo malumalu i Kolomupia, Peru, ma Ekuatoa. Na valoia e Polika Iaga ma Iosefa F. Samita o le a faatuina malumalu i le salafa o le lalolagi. O lenei la ua taunuu.
Ina ua uma lona papatisoga, sa naunau Olga Kovářová e faasoa atu lona fiafia i lona aiga ma uo. Ae ona sa le‘i iloa e le malo i Siekisolovakia le Ekalesia, sa ia iloa ai o le a faatapulaaina ona avanoa. E lē gata i lea, sa ola a‘e lana tupulaga i se sosaiete e lē talitonu i le Atua ma e itiiti lava se mea na latou iloa e uiga i lotu. Afai e taumafai o ia e ta‘u atu i tagata e uiga i le Ekalesia, atonu latou te le malamalama i le mea o loo ia fai atu ai.
A o ia mafaufau ma tatalo e uiga i le auala e faasoa atu ai ona talitonuga, sa ia talanoa atu ia Otakar Vojksvka e uiga i lona faafitauli. “E mafai ona avea oe ma se faiaoga yoga,” o lana tala lea. E lei faasaina e le malo ia aoaoga o le yoga, ma sa vaai Otakar i ai o se auala lelei e feiloai ai i tagata fou ma faia le galuega a le Atua.
I le taimi muamua, sa manatu Olga sa ese lava lana fautuaga. Ae a o ia mafaufau atili i ai, sa ia iloaina sa i ai se mea sa ona mafaufauina.
O le aso na sosoo ai, na lesitala ai Olga mo le aoaoga faamasani mo le avea ma se faiaoga yoga. E le‘i leva ona uma lana kosi, ae amata ona ia faia‘oga i se faletaalo i Uherské Hradiště, o lona nuu i le ogatotonu o Czechoslovakia. Sa faate’ia o ia i le lauiloa o kosi. Sa eseese le toatele o vasega mai le 60 i le 120 tagata aoga. Sa lesitala tagata o vaitausaga uma mo ana lesona, ma naunau e aoao atili e uiga i le soifua maloloina faaletino ma le mafaufau.
I vasega taitasi, sa aoao atu ai e Olga ia gaoioiga yoga sosoo ai ma se lesona faigofie e faavae i mataupu faavae moni. Sa ia faaaogāina gagana e lē faalelotu, e faaaogā ai upusii faagaeetia mai tusisolo ma faifilosofia i Europa i sasa‘e e lagolago ai mea sa ia a’oa‘oina atu.
E ala i lana aoaoga, na iloa ai e Olga le tele o le fiaaai o ana tagata aoga mo ni savali e sili atu ona lelei i o latou olaga. O nisi tagata sa foliga mai sa auai i ana vasega mo na o lesona.
E lei umi, ae la faailoa atu ma Otakar nisi o a laua tagata aoga i le Ekalesia, ma o nisi o i latou na filifili e papatiso.
Sa matua taliaina lelei vasega o lea na faatuina ai e Olga ma Otakar ni tolauapiga yoga mo a laua tagata aoga na manana’o ai. E 50 tagata na faaaluina ni malologa mo le vaiaso atoa i le taimi o le taumafanafana e faamanuiaina ai mai aoaoga a Olga ma Otakar.
Sa moomoo Olga i ona matua, o Zdenĕk ma Danuška, ina ia lagonaina le fiafia lava lea e tasi na maua e ana tagata aoga i le tolauapiga, ma sa ia tatalo soo mo i laua. Ae o tapuaiga sa le o se vaega taua o olaga o ona matua i aso taitasi, ma sa leai se paranesi i lo latou taulaga. E tatau ona faia ma le faaeteete e Olga le talanoaga.
I le iloaina o loo tauivi lona tina ma le ulu tiga, na fai atu ai Olga i se tasi aso, “Tina, ou te fia aoao atu ia te oe le auala e malolo ai ma faamalosia ai nisi o maso i lou ua. Atonu e fesoasoani ia te oe.”
“E te iloa ou te faatuatuaina pea oe,” o le tali lea a lona tina.
Sa faataitai e Olga ni nai gaoioiga faigofie ma fautuaina lona tina e faaauau pea ona faia na o ia. I ni nai masina, na mou ese atu ai le tiga o le ulu. Sa fiafia uma o ia ma le tamā o Olga i le yoga ma auai i se tasi o tolauapiga yoga. I totonu o ni nai aso, na faatofuina atoatoa ai lona tama i le tolauapiga ma o le fiafia sili atu lea ua ia vaaia ia te ia. Sa taliaina foi e lona tina ia faiga masani ma manatu sa faasoaina atu i lesona. E lei umi ae amata foi ona faasoa atu e Olga ona talitonuga ia i laua.
Sa vave ona fiafia ona matua i le Tusi a Mamona ma ona aoaoga. Sa la’ua mauaina foi ni molimau ia Iosefa Samita o se perofeta a le Atua. E lei umi, ae filifili uma lona tina ma lona tama e auai i le Ekalesia.
Sa papatisoina i la’ua i le vaituloto lava lea e tasi na maua ai e Olga le sauniga. Ina ua mavae lena, sa toe foi atu Olga ma ona matua i le fale ma nonofo faataamilo i le laulau o le umukuka, ma uulima ma fetagisi ma le olioli. “O lenei mea e manaomia ona patipatia,” o le tala lea a lona tina.
Sa la’ua faia le meaai mama e sili ona fiafia i ai Olga ma faasoa atu a latou molimau i le tasi ma le isi. I ona foliga ataata, na fai mai ai lona tama, “E tutupu amataga tetele i totonu o puipui laiti!”
“Maimau pe ana mafai ona e lagonaina o’u lagona i totonu,” o le tala lea a Henry Burkhardt. “Ou te moomoo foi pe ana mafai ona ou ta‘u atu ia te outou le tele o lo’u lotofaafetai i lo‘u loto i lenei taimi.”
O le aso 29 o Iuni, 1985. Sa tu Henry i se pulelaa i le Malumalu o Freiberg Siamani Temokarasi, ma lauga atu i se potu e tumu i le Au Paia o e na o mai mo le faapaiaga o le malumalu. O Peresitene Gordon B. Hinckley na tatalaina sauniga i le amataga o lena taeao, ma sa saunoa foi Elder Thomas S. Monson.
Sa le‘i toe avea Henry ma peresitene o le Misiona a Dresden. Nai lo lena, sa ia maua le faamamaluga o le lauga atu i le Au Paia o se peresitene fou faatoa valaauina o le Malumalu o Freiberg.
“Ua silia ma le tolusefulu tausaga,” na ia saunoa ai, “o lo‘u manao lea e fai se mea e mafai ai e le Au Paia i lenei atunuu ona o i se maota o le Alii.” Sa ia saunoa e uiga i le taimi na faamauina ai i laua ma lona faletua o Inge i le Malumalu o Suisilani i le 1955, a o lei tapunia le tuaoi i le va o Siamani Sasae ma Sisifo. O lea la ua matua fiafia lava o ia ona o le Au Paia i le GDR ma isi atunuu i lalo o faatosinaga faaupufai a le Soviet Union sa i ai se malumalu i Freiberg.
“O le finagalo lea o le Alii,” na ia saunoa ai. “Na mafai e le Alii ona fausia lenei fale, o se fale e mafai ona tatou maua ai faamanuiaga e le mafai ona tuuina mai i se isi lava nofoaga nai lo iinei i Lona maota.”
Sa maofa lava Henry, i le mavae ai o le tele o tausaga o feagai ma tetee a le malo i le Ekalesia, na fausia le malumalu ma ni nai faafitauli laiti. Ina ua uma ona maua e Henry le fanua mo le galuega faatino, sa galulue le tusiata o le Ekalesia o Emil Fetzer ma taitai, tusiata fale, ma enisinia i le GDR e faamautu le mamanu mo le malumalu. I le musuia ai i fausaga masani a Siamani, sa latou tasi ai i se fale faigofie, faaonapo nei e i ai faamalama tioata ma se olo e tasi e faaofuofu i luga o le faitotoa.
Na faia le suotosinaina o le eleele i se taimi puupuu mulimuli ane. Na faate‘ia Henry ona o le to’atele o taitai o le malo na auai i le sauniga, na punonou o latou ulu i le taimi o le tatalo. O le faufale o se kamupani a le malo, o lea sa leai ai se faafitauli i le galuega faatino i le faamautuina o tagata faigaluega po o le faamaoniaina o pemita. Na faatagaina e le malo le Ekalesia e faaaoga se paipa o le kesi faalenatura e lata ane ina ia le manaomia ai ona faamafanafanaina le malumalu i le malala. Ma sa mafai e Henry ma Emil ona maua ni moli tautau fe’ilafi se tolu mo le potu selesitila ma potu o faamauga, o se mea e seāseā maua i le GDR.
Atonu o le mea na sili ona faate’ia ai, o le naunautaiga o le malo e faaaloalo i le paia o le maota. E ui lava sa faatagaina faaletulafono taitai e mataituina soo se fonotaga faalelotu i soo se taimi i le atunuu, ae sa malilie le malo e lē faia i totonu o le malumalu. O le mea moni, i le faagasologa atoa o le fausiaina, sa faaaloalo ai taitai i le Ekalesia, ona aoaoga, ma ana faiga masani. Ina ua oo i le taimi o le fale tatala, na toeitiiti atoa le ivasefulu afe tagata na o mai e maimoa i le fale.
“Ou te faafetai ma lo‘u toalua, ou uso e ma tuafafine, ona ua mafai ona ma auauna atu ia te outou iinei i lenei maota,” na tau atu ai e Henry i le Au Paia i le faapaiaga. “Ua ma faia ma le fiafia.”
Ina ua mavae le saunoaga a Henry, sa tula’i Inge ma tuuina atu lana molimau o se faatinā o le malumalu. “Ou te fia tau atu ia te outou e lei i ai lava se taimi na sili atu ai lo‘u lagonaina o le olioli nai lo le mea ou te lagonaina pe a ou i ai i le maota o le Alii,” sa ia tautino mai ai. “Pe a ou mafaufau i o tatou uso ma tuafafine talavou o e o le a maua le avanoa i se lumanai lata mai e amata ai o latou olaga faatasi iinei i le malumalu, ua faamauina faatasi, ma o le a fananau mai foi a latou fanau ma lenei agaga i totonu, ua toe faatumulia lo‘u loto i le agaga faafetai.”
“Ou te talitonu o loo tatou taumafai uma lava ia avea atili e faapei o lo tatou Alii ma le Matai,” sa ia faaauau ai, “ma ou te tuuina atu la‘u molimau ia te outou a tatou o mai iinei i Lona malumalu paia ma a tatou saunia e auauna atu, ona mafai lea ona tatou faia lena mea.”
I le aso 18 o Iulai, 1985, e faitau afe tagata Iutaia Orthodox, sa oofu i ofutele uliuli masani ma pulou e faaofuofu, na faapotopoto e tetee i le Pa i Sisifo o Ierusalema. Faatasi ai ma le faamalosiauga a le au aoao sili o le aai, sa ifo ai i lalo tagata auai ma taulotoina tatalo e masani ona faataatia ese mo aso o faanoanoaga. I luga ae o i latou sa tautau ai se fu‘a lanumumu tele ma se savali manino: “Mamona ia taofi nei loa la outou galuega faafaifeautalai.”
Talu mai le suotosinaina o le eleele i le tausaga na muamua atu, sa tumau le alualu i luma o le Ekalesia i le Nofoaga Autu o le BYU Ierusalema mo Suesuega i Sasae Lata Atu. Ae i lena taimi, na manatu ai tagata Orthodoxi o le aai o le nofoaga autu o se taufaamata’u i le talitonuga faa-Iutaia. Sa sili ona latou popole i le tulaga tauleleia o le Ekalesia mo le galuega faafaifeautalai. Ina ua mavae le Fasiotiga Tele o Tagata, ina ua faaumatia e le pulega a le ‘au Nasi le faitau miliona o tagata Iutaia, sa matuā nofouta le to’atele o tagata Iutaia Orthodox i Kerisiano o loo sa‘ilia tagata liliu mai i o latou tagata. Sa latou fefefe o le a avea le Nofoaga Autu o Ierusalema ma nofoaga autu o gaoioiga faafaifeautalai a le Au Paia o Aso e Gata Ai i Isaraelu.
O lipoti o le tetee o le Orthodox i le galuega faatino na faapopoleina ai le Au Peresitene Sili, na uunaia ai i latou e auina atu aposetolo o Howard W. Hunter ma James E. Faust i Ierusalema. Sa lisiina lelei e le Ekalesia le fanua mo le Nofoaga Autu o Ierusalema, ma sa leai ni tetee faalauaitele i le taimi o le vaega muamua o le galuega faatino. Sa faaauau foi ona olioli le nofoaga autu i le lagolago a le pulenuu o Ierusalema o Teddy Kollek ma isi taitai Iutaia i le aai. O le mea moni, o le fausiaina o le nofoaga autu ua leva ona faamaeaina lona vaega lona fa.
O le aso na sosoo ma le tetee i le Pa i Sisifo, na feiloai ai Elder Hunter ma Elder Faust ma A’oa’o Menachem Porush, o se sui Orthodox o le Palemene a Isaraelu, i lona ofisa i Ierusalema. Sa lolofi ane fo‘i nisi o taitai Orthodox i totonu o le potu.
“Matou te fia talosaga atu ia te outou o ni uo ia outou o ese filemu mai le galuega faatino,” o le tala lea a A’oa’o Porush i le au aposetolo. O ia o se tagata lapoa, ma malosi, ae sa tautala o ia i se leo pulea, ma le faaaloalo. “Ou te le iloa pe tou te talisapaia atoatoa le taua o le mea na tupu i le Pa i Sisifo,” sa ia faaauau ai. “Sa faapotopoto faatasi A’oa’o mai Isaraelu atoa e faailoa mai lo latou tetee.”
“Matou te lagona e leai se mea sese na matou faia i le faatuina o lo matou nofoaga autu iinei,” o le tala lea a Elder Faust ia te ia. Ua silia ma le sefululima tausaga talu ona o mai tamaiti aoga BYU i Ierusalema e aunoa ma ni faalavelave. O lo latou faamoemoega o le suesueina lea o talafaasolopito ma aganuu i le lotoifale, ae le o le faatautaia o le galuega faafaifeautalai. E pei o Pulenuu Kollek, sa talitonu taitai o le Ekalesia e mafai ona faasoa faatasi ma le filemu le Nuu Paia e faatuatuaga eseese.
“Ua matou iloa a outou polokalama malolosi faafaifeautalai a le autalavou,” o le tala lea a se isi a’oa’o i totonu o le potu. “E le mafai ona matou taliaina na polokalama iinei.”
“Sei o tatou malilie o le a tou taofia le fausiaga mo se vaitaimi e lua vaiaso,” o le fautua mai lea a A’oa’o Porush. “O le a ou lele atu i le Aai o Sate Leki e faamatala atu i taitai talafeagai le manaomia ona taofia o le fausiaina.”
“E le mafai ona matou taofia le fausiaga,” na fai atu ai Elder Hunter. “O loo matou i ai i lalo o le konekarate.”
“Ua tele fale ua ou fausiaina,” o le tala lea a A’oa’o Porush, “ma ou te iloa e mafai ona faia ni fetuunaiga e taofi ai fausiaga.”
“E le mafai ona matou taofia le fauga,” na toe fai atu ai Elder Hunter, “ae e mafai ona faaauau pea ona tatou talanoaina mataupu ina ia mafai ai ona foia o tatou eseesega.”
“Faamolemole toe mafaufau i ai,” sa faatauanau mai ai le aoao.
I le afiafi na sosoo ai, na valaau atu ai aposetolo i le aoao e faailoa atu iā te ia e le’i suia o la’ua mafaufau. O le a faaauau pea le fausiaga.
O le taimi lava na la toe foi atu ai i le Aai o Sate Leki, sa feutagai ai Elder Hunter ma Elder Faust ma le Au Peresitene Sili ma le Korama a Aposetolo e Toasefululua e uiga i le tele o isi mea e mafai ona latou faia ina ia maua ai le faatuatuaina e i latou o e na tetee i le galuega faatino.
Ina ia faaalia sa tautino le Ekalesia e le faia se galuega faafaifeautalai e ala i le Nofoaga Autu o Ierusalema, sa talosagaina ai e le Au Peresitene Sili ma le Korama a le Toasefululua ia Elder Hunter, Elder Faust, ma le peresitene o le BYU o Jeffrey R. Holland e tusi se maliega aloaia e le faia ni tala’iga e faamautinoa atu ai i taitai faalelotu ma faaupufai i Isaraelu.
Na faamaeaina e le komiti le maliega i le aso 1 o Aokuso. O le aso na sosoo ai, na malaga atu ai Peresitene Holland mo Ierusalema ma le pepa o faamatalaga i lona aao.
I le avea ai ma se peresitene o le Aualofa i Soweto, Aferika i Saute, sa manao ai Iulia Mavimbela i tamaitai uma o lana paranesi ia lagona le faaaloalogia ma le taliaina. I lona olaga atoa, sa ia vaaia ai le sauaina o tamaitai ona o le leai o ni tupe po o o latou tulaga faaagafesootai. Sa ia moomoo mo tagata uma sa ia vaaia ina ia taulimaina ma le mamalu.
I le taimi lea, sa faia ai e tamaitai i le Ekalesia ni lesona faalemasina o le “tausiaiga” lea sa latou suesueina ai mataupu faavae o le ola tutoatasi, puleaina o tupe, fesoasoaniga muamua, meaai paleni, ma le puipuia mai faamai. I le iloaina ai o le toatele i Soweto sa i ai i faigata tautupe, sa aoao ai e Iulia ia tamaitai o le Aualofa i le auala e teu ai meaai ma teu ai vai, le auala e teu ai tupe, ma le auala e ola ai mai ni mea itiiti. Sa ia uunaia i latou e toe faaleleia o latou lavalava tuai nai lo le faatauina o ni ofu fou.
I se tasi taimi, na foa‘i atu ai e se tasi ni lavalava ma isi mea i le paranesi. Toetoe lava o tagata uma o le Aualofa sa manaomia le fesoasoani, ma sa tatalo Iulia i le auala e tufatufa atu ai foai i le tulaga talafeagai. Sa uunaia o ia e le Alii e tuu atu i tagata taitoatasi o le Aualofa se fasi pepa ua tusia ai se numera. Ona ia se’iina lea o fuainumera ina ia maua ai e tamaitai uma se avanoa talafeagai e filifili ai se mea mai foai.
E ui lava o le tele o lesona a le Aualofa sa faia i le gagana Peretania, ae sa saunia e Iulia ni lesona i le gagana Sotho ma le Zulu mo tamaitai e le lelei le gagana Peretania. Ina ua tofia uso o le Aualofa e auauna atu le tasi i le isi o ni faiaoga asiasi, sa faalagolago o ia i musumusuga mo le taitaiga. “O le tagata lenei e finagalo le Alii e te asiasi i ai,” o lana tala lea i uso fou ua valaauina. “Iloilo manaoga o lena aiga, ona mafai lea ona tatou talanoaina faatasi mea e mafai ona tatou faia mo i latou o se aiga.”
A o taitaia e Iulia le Aualofa i Soweto, sa ia mulimuli i le alualu i luma i le fausiaina o le malumalu i Johannesburg. Sa faapitoa lava lona tulimatai atu i le vaaia o le faatagata o le agelu o Moronae o sii i luga o le tumutumu aupito maualuga o le malumalu. Ae ina ua oo mai lena aso, sa faia ai e tagata e tetee i faiga faailogalanu i Soweto se “sōsō ese,” o se solo tetee a le nuu atoa e taofi ai le faigaluega ma fai faatauga i eria o tagata papa’e o Johannesburg.
Sa lagolagoina e Iulia le faamoemoe a tagata faiupufai, ae sa filimaoti o ia e molimauina lenei tulaga iloga i le fausiaga o le malumalu. Sa faatasi ai ma le atalii o lana tama, na laua agai atu ai i Johannesburg. E leai se tasi na taofia pe fesiligia i la’ua i le auala. I le nofoaga o le malumalu, sa mafai ai ona la molimauina le faatuina o le faatagata.
O le tausaga mulimuli ane, i le aso 14 o Setema, 1985, na maua ai e Iulia ona faaeega paia i le maota o le Alii. Mo le taimi muamua, sa ia lagonaina ai se lagona o le auai atoatoa—o se feagaiga o le tasi ma ona tuagane ma uso i le talalelei, e ui lava i o latou eseesega i ituaiga ma gagana. Ma, mulimuli ane, sa faamauina o ia i lana tane ua maliu, o Ioane, ma i ona matua.
“Oka se aso ina a matagofie lenei!” sa ia olioli ai. “Ua tele naua faamanuiaga ua tuuina mai ia te au.”
“O le a ou tautino atu ma le fiafia, i le aso nei, ou te ola ai ina ia mafai ona ou agavaa pea e sau i le maota o le Alii ma auauna atu ia te Ia, lo‘u Faaola ma le Togiola,” o lana tala lea. “Oi, ou te matua talisapaia lava le iloaina o a’u ma le mafuaaga ua ou i ai iinei.”
“E moni lava, e suamalie le olaga, ma ua taumasuasua la‘u ipu.“