Mataupu 26
Ou te Fia Auauna Atu.
I le aso na sosoo ma le pomu i Huaraz, na siitia atu ai e fomai ia Manuel Navarro i se falemai i Lima. O iina na faafeiloaia ai o ia e lana peresitene o le misiona, o Enrique Ibarra, ma maua ai se faamanuiaga mai ia Elder Charles A. Didier, o se tasi o le au peresitene o le eria. I le faamanuiaga, na folafola atu ai e Elder Didier e le o toe mamao ona tuua lea e Manuel o le falemai ma toe foi atu i le misiona.
Ina ua uma ona taulimaina isi manu’a o Manuel, na taulai atu fomai i le toe faaleleia o ona foliga manu’a. Na tipi e fasiu’amea le ponaivi o lona alafau ma lavea ai le neura o le mata o lona mata taumatau, ma manaomia ai le aveesea o le mata. O ona matua, o e na o mai i Lima, na la faailoa atu le tala ia te ia. “Atalii,” o le tala lea a lona tina, “o le a latou faia se taotoga.”
Sa te’i Manuel. Sa le’i lagonaina e ia se tiga i lona mata ma, seia oo mai i le taimi nei, sa le iloa pe aisea na fusi ai. Sa faamafanafanaina o ia e lona tina. “Ua ma i ai iinei,” o lana tala lea. “Ua ma i ai faatasi ma oe.”
Faatasi ai ma le lagolago atoa tautupe mai le Ekalesia, na faia ai iā Manuel ni taotoga se tolu e aveese ai lona mata ma toe faaleleia ai lona soketi ua faaleagaina. O le a umi se taimi e toe malosi ai, ma sa manatu tagata o lona aiga lautele e tatau ona toe foi atu o ia i lona nuu i le taimi lava e te’a ai o ia mai le falemai. Ae sa musu Manuel e tuua le misiona. “O la’u konekarate ma le Alii e lua tausaga, ma e le’i uma,” sa ia fai atu ai i lona tamā.
A o faasolo malosi i le falemai, na asiasi atu ia Manuel ia Luis Palomino, o se uō mai lona nuu o loo aoga i Lima. E ui lava o ona manuaga na faigata ai ia te ia ona talanoa ma Luis, ae na amata ona faasoa atu e Manuel lesona faafaifeautalai. Sa faateia ma faagaeetia Luis i le faaiuga a Manuel e faamaea lana misiona.
“Ou te fia iloa po o le a le mea o uunaia ai oe,” o le tala lea a Luis ia te ia. “Aisea ua matuā telē ai lou faatuatua?”
I le ono vaiaso talu ona mavae le pomu, na tuua ai e Manuel le falemai ma amata ona galue i le ofisa o le misiona i Lima. Sa faamalumalu mai pea le taufaamata’u o le faiga faatupu faalavelave, ma sa fefe o ia i taimi uma lava na te vaai ai i se taavale e pei o le taavale na pa. I le pō, sa tauivi o ia e moe e aunoa ma ni fualaau.
O aso taitasi, e sui ai e se tasi o faifeautalai i le ofisa o le misiona ia fusi o Manuel. Sa le mafai e Manuel ona tilotilo i le faaata ma iloa ai lona mata o loo misi. Pe tusa ma le tolu vaiaso talu ona tuua le falemai, na ia maua ai se mata faapipii.
I se tasi aso, na sau ai Luis i le ofisa o le misiona e asiasi ia Manuel. “Ua ou fia papatiso,” na ia fai atu ai ia te ia. “O le a le mea e tatau ona ou faiai?” Sa le mamao le ofisa o le misiona mai le mea sa nofo ai Luis, o lea i nai vaiaso na sosoo ai, sa a’oa’oina ai e Manuel ma lana soa ia Luis vaega na totoe o lesona i se falesa lata ane. Sa fiafia lava Manuel e a’oa’o se uō, ma sa faamaeaina ma le naunautai e Luis sini uma sa ia faatuina faatasi ma faifeautalai.
I le aso 14 o Oketopa, 1990, na faia ai e Manuel le papatisoga o Luis. Sa faalavelave pea ia te ia lona manu’a, ae o le tulaga faigata na mafai ai ona ia papatisoina se uō mai lona nuu—o se mea na te lei faamoemoeina e fai i lana misiona. Ina ua sau Luis i fafo mai le vai, sa la feopoai, ma sa lagona e Manuel le malosi o le Agaga. Sa ia iloaina sa mafai foi ona lagonaina e Luis.
Ina ia faamanatuina lenei faatasiga, na avatu ai e Manuel se Tusi Paia iā Luis. “Pe a pogisa aso,” na tusia ai e Manuel i le faavaa i totonu, “tau lava o le manatua o le aso lenei, le aso na e toe fanau ai.”
I le taimi lea i Iuta, na maua ai e Darius Gray se telefoni mai lana uo o Margery “Marie” Taylor, o se tagata faapitoa i gafa o Aferika Amerika i le Potutusi o Talafaasolopito o Aiga a le Ekalesia i le Aai o Sate Leki. Faatoa ia mauaina ni lola o ata ninii o loo i ai ni faamaumauga taua a Aferika Amerika, ma sa faigata ona ia taofia lona fiafia. “E tatau ona e sau iinei ina ia mafai ona e talisapaia,” o lana tala lea.
I le fiafia, na malie ai Darius e feiloai ma ia. O le Potutusi o Talafaasolopito o Aiga o le nofoaga autu aupito telē lea o gafa i le lalolagi, ma e faitau selau afe tagata na asiasi atu i ai i tausaga taitasi. Ina ua faatoa alu Darius i le faletusi, e itiiti lava se mea na ia iloa e uiga i ona tuaa e sili atu nai lo mea na ia aoina mai tala faaleaiga ma ata. O Marie lea na fesoasoani ia te ia e saili nisi tali. E ui e le o se tagata Uli o ia, ae sa faamaonia lona avea ma se taiala atamai i le faailoaina atu o Darius i faamaumauga e uiga i lona aiga ma le talafaasolopito o tagata Uli i le Iunaite Setete.
Ina ua taunuu atu Darius i le Potutusi o Talafaasolopito o Aiga, sa faaali atu e Marie ia te ia faamaumauga na ia mauaina. O le Freedman’s Savings and Trust Company na faatagaina e le Konekaresi a le I.S. i le 1865 e fesoasoani e tuuina atu le saogalemu tautupe i tagata Amerika Aferika na fanau saoloto ma sa faapologaina muamua. E silia ma le selau afe tagata na faatulagaina ni teugatupe i le faletupe, ae na le manuia ina ua mavae le iva tausaga, ma faaaoga ai tupe na galulue malosi ai ona tagata.
E ui lava i le toilalo o le faletupe, ae sa matuā taua tele ana tusi o faamaumauga i tagata e suesueina gafa. O fanau a tagata na faapologaina, sa masani ona tauivi e saili ni faamatalaga auiliili e uiga i o latou tuaa. O faamaumauga e masani ona faaaoga e tagata e faailoa ai igoa o aiga ma aso—e pei o lisi o fanuatanu, lesitala o tagata palota, ma tusi faamaonia o le fanau ma le maliu—sa le maua ia pepa mo tagata na faapologaina pe sa le’i mauaina lautele. Ae peitai, o faamaumauga a le Freedman’s Bank, na aofia ai le anoanoai o faamatalaga patino e uiga i e umia le tusi tupe, e aofia ai igoa o tagata o le aiga ma le mea na faapologaina ai i latou. O nisi faamaumauga sa i ai foi faamatalaga faaletino o tagata na faaaogaina.
Sa vave ona iloa e Darius le taua o lenei faamatalaga mo tagata Amerika Aferika. Ae o faamaumauga lava ia na avea ma se faafitauli tele mo tagata suesue. O failautusi na tausia tusi na faamaumauina igoa ma faamatalaga auiliili o e umia tusi tupe i le faasologa na latou o mai ai e fai se tusi tupe, ae le o le faasologa o le alafapeta. O lona uiga sa tatau i tagata suesue ona suesueina tusi o faamaumauga i lea laina ma lea laina seia oo ina latou mauaina faamatalaga sa latou sailia. Ina ia aogā, sa manaomia ona faatulaga lelei ia faamaumauga.
Sa fesili atu Marie ia Darius pe mafai e sui o le Vaega o le Kenese ona fesoasoani e tusia ma faasinoupu ia faamaumauga, ae e le lava tagata na maua le taimi—po o se komepiuta patino—e fai ai le galuega. Sa tusi atu Darius i se tasi o aposetolo e fesili atu pe mafai ona fesoasoani mai le Ekalesia. A o faailoa atu e le aposetolo lona lagolago, sa ia fai mai e le mafai e le Ekalesia ona faia le galuega faatino. I lena taimi, e le’i lagolagoina e le laumua o le Ekalesia ia galuega faatino o le sailia o igoa. Sa taulimaina e siteki ma uarota lena galuega.
I le tauau ai ina uma filifiliga, ae sa i ai se isi manatu o Marie. I le luasefulu-lima tausaga ua mavae, na faatuina ai e le Ekalesia le silia ma le afe lua selau nofoaga autu o talafaasolopito o aiga i atunuu e fasefulu lima. O nei nofoaga autu o nofoaga ia e mafai ai e tagata i totonu ma fafo atu o le Ekalesia ona aoao atili e uiga i o latou tuaa. E masani lava, sa faapipii nofoaga autu i siteki, ae sa iloa e Marie e lei leva ona tatalaina se nofoaga autu o talafaasolopito o aiga i le Falepuipui o le Setete o Iuta. E mafai e pagota ona faaaoga le nofoaga autu mo le itula i se vaiaso. Ae faapefea pe afai na la aumaia i latou ma Darius e fesoasoani i le galuega faatino a le Freedman’s Bank?
Sa talanoa Marie ma le faatonu o talafaasolopito o aiga i le falepuipui, ma e lei umi ae galulue malosi ni pagota na ofo mai i faamaumauga.
Ia Setema 1990, sa alu ai Alice Johnson i vasega i le Kolisi Faafaiaoga o le Tamaiti Paia i Takoradi, Kana. Ua silia ma le tausaga talu ona taofia e le malo le faagaoioiga o le Ekalesia i le atunuu, ma faafuasei ai ona faamutaina lana misiona. I le taimi muamua, sa le mautinoa e ia le mea e sosoo ai e fai. Ae i le fautuaga a lona uso, sa filifili ai o ia e avea ma se faiaoga, ma sa taliaina o ia e le kolisi faaleaoaoga mo le tausaga faaleaoaoga na sosoo ai.
A o faaauau pea le taofiga, i lea masina ma lea masina, sa faamasani ai Alice ma isi tagata o le Ekalesia i tapuaiga i le aiga. O Emanuelu Kissi, le peresitene o le Itu o Accra Kana, na avea ma sui peresitene o le misiona ma pulefaamalumalu o le Ekalesia i le atunuu. Sa tele ina malaga o ia i Kana atoa, e asiasi ma faamalosia le Au Paia. Na faatagaina e le malo ia “auaunaga taua” a le Ekalesia ina ia tumau le tatalaina mo se taimi le tumau, ma faatagaina ai nisi o tagata faigaluega o le Ekalesia e faaauau pea ona galulue i le uelefea, aoaoga a le Ekalesia, ma le faletusi. Sa le mafai e le Au Paia ona totogi le sefuluai pe tuuina atu taulaga, ae o nisi sa tuuese a latou tupe maua, ma faatalitali ma le onosai mo le taimi e mafai ai ona latou toe faia ni foai.
E le pei o William Acquah ma le Au Paia na faafalepuipuiina mo sina taimi puupuu i Cape Coast, e leai se sauaina na oo ia Alice i le taimi o le taofiga. E faapotopoto o ia ma ni nai uō i Aso Sa i se fale patino e aai ma feinu i le faamanatuga, tatalo, ma faia lauga. O ona matua, o e sa faaauau pea ona auauna atu i le la misiona e aunoa ma le faiga o se pine po o ni ofu faafaifeautalai, e asiasi atu ia te ia i soo se taimi lava la te i ai i le eria. Ae sa lagona e Alice e pei o loo tu pea o ia a o faatalitali mo sauniga masani a le Ekalesia e toe faaauau.
Mulimuli ane, ia Novema 1990, na iloa ai e Alice ua aveesea e le malo lana tapu i le Ekalesia. Mai lava i le amataga o le taofiga, sa finau ai Peresitene Kissi ma isi Au Paia i taitai o le malo ina ia faamutaina tapu. I le tali atu i faamatalaga sese e uiga i aoaoga a le Ekalesia, sa latou tusia ai ni tusi uumi e faamatala ai aoaoga faavae ma talafaasolopito o le Ekalesia ma talosagaina ai faafesagai taitai o le malō. Ina ua faatu mai e taitai ni atugaluga e uiga i le faasaina muamua o le perisitua a le Ekalesia, sa faamalamalama atu e le Au Paia e faapea, sa olioli tagata Uli i aia tatau uma a soo se isi lava tagata i le Ekalesia. O isi ekalesia sa tetee i le Au Paia o Aso e Gata Ai sa puipuia foi le aia tatau a le Au Paia e tapuai ai i le taimi lava na latou vaai ai ua lamatia lo latou lava saolotoga faalelotu ona o le taofiga.
O se tagata autu i le aveesea o le tapu o Isaako Addy, le pule faarisone o le Ekalesia mo mataupu faaletino i Ghana. O ia o le uso fai matua o le peresitene o Ghana, o Jerry Rawlings. Sa feeseeseai le auuso, ma sa lei manao Isaako e talanoa ma Jerry e uiga i le taofiga. Ae peitai, i se tasi aso, sa talosagaina ai e Georges Bonnet, le faatonu o mataupu faaletino mo Aferika, o ia e tatalo seia oo ina faamaluluina lona loto i lona uso. Sa faia e Isaako, ma sa pai atu le Agaga i lona loto. Sa malie o ia e feiloai ma Jerry. Sa la talanoa i lena po, ma e oo atu i le faaiuga o le talanoaga, ua uma ona la foia o la feeseeseaiga. O le aso na sosoo ai, na filifili ai le malo e faamuta le taofiga.
Sa ootia Alice ina ua toe foi mai o ia i sauniga lautele a le Ekalesia mo le taimi muamua i le sefuluvalu masina. Na toeitiiti atoa le selau o le Au Paia na auai i le Paranesi a Takoradi i lena aso, ma na silia ma le lua itula na alu ai le sauniga ona o le toatele o tagata na o atu e tuuina atu a latou molimau.
Sa lagona e Alice le fiafia ma le popole a o ia mafaufau i tagata liliu mai i lana misiona i Koforidua. Sa ia mafaufau pe na latou tumau faamaoni i le talalelei i le tausaga ma le afa ua mavae. Sa ia iloaina o nisi tagata o le Ekalesia na faatupulaia le lotovaivai ma tuua le lotu.
E lei leva ona uma le taofiga, ae faatulagaina siteki muamua e lua i Kana. I Cape Coast, sa valaauina ai le tamā o Alice, o Billy Johnson, e avea ma peteriaka o le siteki. O le taimi lea, na faatagaina ai e le malo le Au Paia e toe faaauau le galuega faafaifeautalai i le atunuu. Sa valaau atu Grant Gunnell, le peresitene fou faatoa valaauina o le Misiona a Ghana Accra, ia Alice mo se faatalanoaga. Sa ia mauaina le onosefulu o faifeautalai o e sa auauna atu a o lei oo i le taofiga ma sa fia iloa pe latou te naunau e toe foi atu i le misiona.
“E te fia toe foi mai e auauna atu i se misiona pe a uma le aoga?” na ia fesili ai.
“Leai,” sa ia fai atu ai e aunoa ma le faatuai. “Ou te fia auauna atu i le taimi nei.”
“E a?” na fesili ai le peresitene, ma le te’i i lana tali vave.
“Ou te fia faia nei lava,” sa ia toe fai atu ai. O lana faamuamua lava o le auauna atu i le Atua, ma sa naunau o ia e taofi lana aoga mo Ia.
E lei umi, ae toe lipoti atu Alice i le misiona. Ina ua ia ta’u atu i lona tamā, o se alii sa tuuto atu le tele o lona olaga i le tala’iina o le talalelei toefuataiina, sa lei faateia o ia.
“O lo’u afafine lena,” o lana tala lea.
Ina ua maea le misiona a Manuel Navarro ia Mati 1991, sa o mai ona matua i Lima e piki o ia. Talu ai e le’i nofo o ia i se siteki, o lea na faamalolo ai o ia e le peresitene o le misiona i le lotoifale mai le auaunaga. Ae e le’i saunia lava Manuel e toe foi i Nazca, lona nuu moni i Peru i saute. Sa ia folafola atu i se uo i lana eria mulimuli o le a sau o ia i lona papatisoga, o lea sa latou nonofo ai ma ona matua i le aai mo se isi vaiaso.
I se tasi taeao, na o atu ai Manuel ma lona tamā e faatau se falaoa mo le malūtaeao. Na iloa e lona tamā ua galo ia te ia ona aumai se tupe, o lea na ia toe liliu ai ma toe agai atu i totonu. “Faatali atu ii,” o lana tala lea.
Na faateia Manuel. I le mavae ai o le i ai o se soa faale-misiona mo se taimi umi, sa ese le lagona o le tuuatoatasi i le auala. Ina ua mavae sina taimi, sa filifili o ia e toafilemu. “Ua le o toe avea a’u ma se faifeautalai,” sa ia mafaufau ai.
E ui lava ina ua toe foi atu i Nazca, ae sa tauivi lava Manuel e fetuunai i le olaga pe a uma le misiona—aemaise lava i lona manu’a. Sa sili atu ona faigata le faatalofa ma le mata e tasi. Sa faaauau pea ona tuu lona lima i le nofoaga sese. Ona amata lea ona taaalo se uso i lana paranesi ma ia i le ping-pong, ma o le tuliloaina o le polo laitiiti, paepae ma le mata e tasi na fesoasoani ia te ia e atiina ae ai se vaaiga loloto atili.
Ia Aperila, na siitia atu ai Manuel i se aai e telē atu, o Ica, e amata ana aoaoga i le iunivesite i inisinia taavale. E itiiti ifo ma le selau maila le mamao mai Nazca, ma sa i ai ana uo ma aiga sa nonofo ai iina. Sa nofo o ia i le fale o le uso o lona tinā i se potu sa ia nofo ai mo ia lava. Sa popole lona tina ia te ia ma e toetoe lava o po uma e valaau atu ai ia te ia i le telefoni. “Atalii,” sa masani ona ia fai atu ai ia te ia, “manatua pea e tatalo.” Soo se taimi lava na te lagona ai le tigā, sa ia tatalo mo le malosi ma maua ai le sulufaiga i le Alii.
Ina ia uunaia le Au Paia talavou e le’i faaipoipo e feiloai ma fegalegaleai, sa ofoina atu e le Siteki a Ica ni vasega inisitituti ma sa i ai se vaega o tagata matutua nofofua sa faia gaoioiga ma faigalotu. Na maua e Manuel se aiga i nei gaoioiga ma i lana uarota fou i Ica. E ui e masani ona sioa atu tamaiti i le lotu i lona mata faapipi’i, ae sa taulimaina o ia e tagata matutua e pei o isi lava tagata o le ekalesia.
I se tasi aso, sa valaaulia ai Manuel e feiloai ma Alexander Nunez, le peresitene o le siteki i Ica. Sa masani Manuel ia Peresitene Nunez talu mai lona talavou i Nazca, ma sa asiasi atu Peresitene Nunez i lana vasega seminare o se taitai faamaopoopo mo le Polokalama o Aoga a le Ekalesia. Sa matuā faamemelo lava Manuel ia te ia.
I le taimi o le faatalanoaga, sa valaauina ai e Peresitene Nunez ia Manuel e auauna atu i le aufono a fautua maualuga a le siteki.
“Oka!” Na fai atu ai Manuel ia te ia lava. E masani lava, o le Au Paia o loo auauna atu i valaauga o siteki sa matutua atu ma sili atu lo latou poto masani nai lo ia. Ae sa faaalia e Peresitene Nunez lona talitonuga ia te ia.
I vaiaso na sosoo ai, na asiasi atu ai Manuel i ana uarota na tofia i ai. I le taimi muamua, sa ia popole ia te ia lava a o ia galulue faatasi ma taitai o le uarota. Ae sa ia aoao e taulai atu i le valaauga, ae le o ia lava. A o ia suesueina le tusitaulima a le Ekalesia ma lipoti atu i le siteki, sa le toe fefe o ia i le laitiiti tele mo lona tofiga. Sa ia iloaina sa fiafia o ia e faasoa atu lana molimau i le Au Paia i le siteki, auai i faigalotu, ma uunaia tagata talavou e auauna atu i misiona.
E le’i mou ese atu faafitauli na mafua ona o manu’aga o Manuel. O nisi taimi, pe a tuua na o ia, e lagona e ia le faanoanoa ma le gatete pe a mafaufau i le osofaiga na ia mafatia ai. Sa tumu tusitusiga paia i tala faavavega o tagata faamaoni na faamaloloina mai vaivaiga pe faasaoina mai tulaga lamatia. Ae sa latou faamatala mai foi tala o tagata e pei o Iopu ma Iosefa Samita, o e na mafatia i tigā ma le lē tonu e aunoa ma le laveaiina vave. E i ai taimi, pe a mafaufau o ia i ona manuaga, ona mafaufau lea o Manuel, “Aisea na tupu ai lenei mea ia te au?”
Ae na ia iloaina lava ua faamanuiaina o ia i le faasaoina mai le osofaiga. I masina na sosoo ma lona manu’a, na tulimataia ma fasiotia ai e tagata faatupu faalavelave tagata o le Ekalesia ma faifeautalai, ma faasalalauina ai le faanoanoa ma le fefe i le Au Paia i Peru. Ae na suia mea uma. Na amata ona osofaia e le malo o Peru faiga faatupu faalavelave, ma ua faaitiitia ai osofaiga. Ma i le Ekalesia, sa taliaina ai e le Au Paia i le lotoifale se taumafaiga e ta’ua o le “Faalagolago i le Alii,” lea na valaaulia ai i latou e anapopogi, tatalo, ma faatino le faatuatua ina ia laveaiina i latou mai sauaga i lo latou atunuu.
Na iloa e Manuel o ana meaaoga ma le auaunaga i le Ekalesia na fesoasoani ia te ia e taulima ai ona faigata. Sa ia faalagolago i le Alii ma mafaufau soo ia te Ia.
I le taimi na toe foi mai ai Manuel mai lana misiona, na malaga atu ai Gordon B. Hinckley, le fesoasoani muamua i le Au Peresitene Sili, i Hong Kong e vaai i nofoaga e ono i ai mo se maota o le Alii. I le avea ai ma se aposetolo talavou, sa ia vaavaaia le atiina ae o le Ekalesia i Asia, ma sa matuai fiafia lava o ia i lona alualu i luma. Ua i ai nei i le itulagi le lua selau afe o le Au Paia ma malumalu e fa, o loo i ai i Iapani, Taiuani, Korea i Saute, ma Filipaina. E ui e le’i i ai se Ekalesia i atunuu e pei o Myanmar, Laos, Monokolia, ma Nepal, ae ua amata ona mauaa paranesi fou i Sigapoa, Initonesia, Meleisia, ma Initia.
O Hong Kong, o le nofoaga lea e i ai le ofisa o le Eria a le Ekalesia i Asia, o se teritori o Peretania. Ae peitai, i le ono tausaga, o le a pasia ai le pule i le itulagi mai le Malo Aufaatasi i le Ripapelika o Tagata Saina.
O se vaega o le tuufaasolo atu, na folafola mai ai e Saina e faamamaluina faiga faaletamaoaiga ma faaupufai a Hong Kong ma faaaloalo i faiga faalelotu a ona tagatanuu. E ui lava i lea, faatasi ai ma le sefuluvalu afe o le Au Paia o loo nonofo i le teritori, sa lagona e taitai o le Ekalesia le faamalosia e fausia se maota o le Alii iina a o lei siitia atu le pule.
Sa faaaluina e Peresitene Hinckley se aso e vaavaai ai i nofoaga eseese, ae na te lei mauaina ni filifiliga taugofie. I isi eria o le lalolagi, e mafai e le Ekalesia ona aloese mai le faatauina o fanua taugatā o le aai e ala i le fausiaina o malumalu i pitonuu. Ae o Hong Kong o se vaipanoa e silia i le lima miliona le aofai o tagata, ma e toetoe lava a lē mafai ona maua se fanua talafeagai.
Sa mafaufau Peresitene Hinckley pe tatau ona fausia e le Ekalesia se malumalu i luga o se tasi o fanua laiti ua uma ona umia i le aai. Sa ia vaai faalemafaufau i se fale maualuga e tele faamoemoega, ma fola maualalo e avea o se falesa ma se ofisa o le misiona.
“O fogafale pito i luga e tolu e mafai ona avea ma malumalu,” sa ia mafaufau ai. “E mafai ona faia e aunoa ma ni faafitauli.”
O se avanoa manaia. Ae e le’i fausia lava e le Ekalesia se fale faapena, ma sa le’i mautinoa pe o le filifiliga sili lena mo le Au Paia i Hong Kong.
I le aso 15 o Iuni, 1991, na patipatia ai e le Budapest Opera House iloga o Hanikeri a o faatinoina e le Aufaipese a le Tapeneko lana faafiafiaga mulimuli mo se aofia e afe fa selau tagata. O nisi o i latou na auai i le konaseti o Elder Russell M. Nelson ma lona faletua o Dantzel. Sa latou malaga faatasi ma le aufaipese i se malaga taamilo e tolu vaiaso i atunuu eseese o Europa.
Sa faaaluina e Elder Nelson le lima tausaga e taitai ai taumafaiga a le Ekalesia e faaleleia atili ana sootaga ma malo i Europa Tutotonu ma Sasae. O le tele o atunuu, e aofia ai Hanikeri, na suia mai le taitaiga faakomunisi. Ua olioli nei Siekisolovakia i le saolotoga atoatoa o tapuaiga, ma ua aloaia e le malo le Ekalesia. Na avea Siamani Sasa’e ma Siamani Sisifo ma atunuu e tasi, ma faamutaina ai tapu tuai i le GDR. Ua faatagaina nei faifeautalai i Polani, Hanikeri, Palekeria, Romania, Slovenia, ma Kalaotia.
O le malaga taamilo a le aufaipese o se avanoa e fausia ai alalaupapa. Ma mai le leo o le patipatia, na faia ai e le konaseti le mea tonu lava lena.
“Ou te manao ia e iloa,” sa fai atu ai se tasi alii Hanikeri i se tagata o le aufaipese ina ua maea le faafiafiaga, “o a’u ma lo’u toalua, ma te talitonu foi i le Atua. Ma te malamalama i mea o loo ta’u mai e a tou musika ia i matou.”
O le aso na sosoo ai, na saunoa ai Elder Nelson i se sauniga faamanatuga i se potu tele o le faletalimalo e vaai agai atu i le mauga lea sa ia faapaiaina ai Hanikeri mo le talaiga o le talalelei i le fa tausaga na muamua atu. Sa faatasi o ia ma ni nai tagata i lena taimi, e aofia ai le tagata e toatasi o le Ekalesia i Budapest. O lea la ua fa selau le Au Paia i le atunuu.
Na malaga le aufaipese mai Hanikeri i le atu Auseteria, Siekisolovakia, Siamani, Polani, ma le Soviet Union. Sa feiloai Elder Nelson ma Elder Dallin H. Oaks i le ripapelika o Soviet o Aremania, lea na tuuina atu ai e le Ekalesia fesoasoaniga alofa ina ua mavae se mafuie faataumaoi. Talu mai le asiasiga a Elder Nelson i le Soviet Union i le 1987, na tupu ai ni suiga tetele faaupufai ma agafesootai i le atunuu. Ua faateleina le avanoa mo tagata mai fafo, ma ua saili nei e tagata o le tele o malo o Soviet Union le puleaina o a latou mataupu tau i le lotoifale. Sa tele atu foi le saolotoga o tapuaiga i le itu, ma sa faatupulaia le fiafia i tapuaiga.
E ui lava sa leai se aloaia o le Ekalesia i le Soviet Union, ae sa leai se mea na taofia ai tagatanuu o Soviet Union mai le malaga atu i fafo, mauaina o le talalelei toefuataiina, ma toe aumai faatasi ma i latou pe a latou toe foi mai i le aiga. E oo atu i le 1990, ua lava le Au Paia i Leningrad, Rusia, ma Tallinn, Estonia, e resitala ai le Ekalesia i na aai. I le taimi lea, sa tofia ai faifeautalai ma le Au Paia i Finelani e lagolago atu i tagata fou liliu mai.
I Moscow, sa maofa ai Elder Nelson i le faapalepale o le malo o Rusia i le Ekalesia. I nai tausaga ua mavae atu, sa ia sopoia ai le Atelani mo ni nai taimi e feiloai ai ma taitai o malo i Europa i sasa’e. I le taimi muamua, sa seāseā ona latou fiafia e vaai ia te ia, ma sa masani ona ia lagonaina e leai ni fua o ana taumafaiga. Ona saunia lea e le Alii se ala e agai ai i luma.
Ua i ai nei se paranesi a le Au Paia i Leningrad. Sa maua foi e tagata o le Ekalesia i aai o Vyborg ma Moscow le faamaoniga a le malo mo a latou faapotopotoga laiti. Sa ofoofogia le alualu i luma, ma sa faamoemoe Elder Nelson e le o toe mamao ona aloaia lea o le Ekalesia i Rusia atoa, i le malo aupito tele i le Soviet Union.
Ina ua mae’a se konaseti a le Aufaipese a le Tapeneko i le Bolshoi Theater i Moscow, sa sopoia e le au Nelson ma Elder Oaks le auala i le Faletalimalo o le Metropol, lea sa faia ai e le Ekalesia se taumafataga o le afiafi pe a uma le faafiafiaga. Sa auai Elder Nelson i le tele o na taumafataga o le afiafi ma le taliaina o lenei malaga maimoa e faafetai ai ia Beverly Campbell, le faatonu o le Ofisa o Mataupu Faavaomalo a le Ekalesia i Uosigitone, DC. I lenei matafaioi, sa faatulaga ai e Beverly ni fonotaga ma fausia ni sootaga i le va o sui o le Ekalesia ma taitai o malo i le salafa o le lalolagi.
I le taumafataga o le afiafi, sa tulai mai ai Elder Nelson i se meafaaleoteleleo ma faafetai atu i le toatele o tagata mamalu mo le malaga mai. Ona ia valaaulia lea o Alexander Rutskoi, le sui peresitene o Rusia, e faatasi ma ia i luma o le aofia. “Matou te faafetai,” o le tala lea a Elder Nelson, “i le i ai o soo se faamatalaga e te manao e fai.”
“A’u malo pele,” o le tala lea a le Sui Peresitene Rutskoi, “ua matou fiafia i lenei afiafi i le mauaina o le avanoa e faafeiloai ai nei malo iinei faatasi ma i tatou i le po nei. Ou te fia faitau atu ia te outou le fomu lesitala lenei, lea e tusia i le aso 28 o Me, 1991, lea e lesitala ai Le Ekalesia a Iesu Keriso o le Au Paia o Aso e Gata Ai i le Ripapelika Rusia Soviet Union Socialist.”
A o faitauina e le Sui Peresitene Rutskoi le pepa o faamatalaga, sa lofituina Elder Nelson. Sa faamoemoe o ia o le a vave ona oo mai le faasilasilaga faalauaitele, ae na te lei faamoemoeina i lena po. O le mauaina o le aloaiaina o lona uiga o le a mafai e le Ekalesia ona auina atu nisi faifeautalai i Rusia, lolomi ma tufatufa atu lomiga a le Ekalesia, ma faatuina nisi faapotopotoga.
O le aso na sosoo ai, i le lotolotoi o asiasiga i taitai o le malo faatasi ai ma Elder Oaks ma nisi, sa alu atu ai Elder Nelson i se tamai paka e latalata i le Kremlin ma faia se tatalo o le faafetai i le Alii.
I le vaiaso mulimuli ane, na asiasi atu ai aposetolo e toalua ia Peresitene Benson i lona fale mautotogi i le Aai o Sate Leki. Sa latou faaali atu ia te ia se kopi o le pepa o faamatalaga na lesitala ai le Ekalesia i Rusia ma ta’u atu ia te ia ua faatuina nei le Ekalesia i Europa i sasae.
Ina ua ia faalogo i le tala, sa susulu fofoga o Peresitene Benson i le olioli.