Vahe 32
Ko Hotau Mālohingá ʻa ʻEtau Tuí
ʻI he ʻaho 1 ʻo ʻOkatopa 2000, naʻe fakatapui ai ʻe Palesiteni Hingikelī—naʻe taʻu hivangofulu ʻi he taimi ko ʻení—ʻa e Temipale Boston Massachusetts ʻi he fakahahake ʻo e ʻIunaiteti Siteití, ʻo aʻusia ʻene taumuʻa ke ʻi ai ha temipale ʻe teau ʻoku lolotonga ngāue ʻi he fakaʻosinga ʻo e taʻú. Hili ha māhina ʻe ua mei ai, ʻi he teuteu ʻa e kau Kalisitiane ʻi he funga ʻo e māmaní ke fakamanatua ʻa e ʻaloʻi ʻo e Fakamoʻuí pea mo e kamataʻanga ʻo ha mileniume foʻoú, naʻá ne fakatapui ha toe temipale ʻe ua, ʻi Lesafī mo Pooto ʻAlekele, Palāsila. Naʻe ʻi ai mo ha temipale ʻe hongofulu mā hiva naʻe lolotonga langa pe ʻi he tuʻunga palaní. Ko ha aofangatuku lelei ia ki ha taʻu naʻe fakatapui ai ha ngaahi temipale lahi ange ʻi ha toe taimi kimuʻa ʻi he hisitōlia ʻo e Siasí.
Lolotonga ʻo e moʻui ʻa Palesiteni Hingikelií, naʻá ne mamata ki he tupulaki ʻa e Siasí mei ha faʻunga ʻo ha kāingalotu ʻe toko fā kilu, ʻa ia ko honau tokolahi tahá naʻe nofo ʻi ʻIutā, ʻo aʻu ki ha faʻunga kuo laka hake hono kāingalotú ʻi he toko hongofulu mā taha milioná ʻi ha ngaahi fonua ʻe 148. ʻI he 1910, ko e taʻu naʻe fāʻeleʻi ai ʻa e palōfitá, ko ha temipale pē ʻe fā ʻo e Siasí, pea naʻe maʻu ʻa e ʻenitaumení ʻi he lea faka-Pilitāniá pē. Kuo lahi ʻeni ʻa e ngaahi temipale ʻo e Siasí ʻi he funga ʻo e māmaní, pea maʻu ʻa e ʻenitaumení ʻi ha ngaahi lea fakafonua lahi. Naʻe tokoni ʻa e liliu naʻe ueʻi fakalaumālie ki he sīpinga ʻo e temipalé ke malava ai ʻeni.
Ka naʻe ʻikai ko e ngaahi temipalé pē ʻa e ngaahi fale naʻe fakakaukau ki ai ʻa Palesiteni Hingikelií. Naʻe ʻi ai ha taimi naʻá ne fakahaaʻi ai ʻene hohaʻa naʻa ʻikai lahi feʻunga ʻa e Tāpanekale Sōlekí ke hao ai ʻa e tokotaha kotoa pē naʻe fie ʻalu tonu ki he konifelenisi lahí. Ko ia naʻá ne tuʻutuʻuni ke langa ha fale fakatahaʻanga foʻou ʻo liunga tolu ʻa e lahi ʻo e feituʻu nofoʻangá ʻi he Tāpanekalé. Naʻe fakaofo ʻa e Senitā Konifelenisí, ʻa ia naʻe langa ʻi he konga fakatokelau ʻo e Temipale Sikueá pea fakatapui ʻi ʻOkatopa ʻo e 2000, pea naʻe fakafiefia ia ki he palōfitá.
ʻI he malumalu ʻo e tataki ʻa Palesiteni Hingikelií, naʻe hokohoko atu foki hono tali lelei ʻe he Siasí ʻa e tekinolosia foʻoú. Hili ha taimi nounou mei heʻene hoko ko e palesiteni ʻo e Siasí, naʻá ne fakangofua ke faʻu ha uepisaiti ʻe lava ke maʻu ai ʻe he kau fakaʻaongaʻi ʻo e ʻinitanetí ʻa e folofolá, fakamoʻoni ʻa Siosefa Sāmitá, mo e ngaahi lea ʻo e konifelenisi lahí. ʻI he fakaʻosinga ʻo e 2000, naʻe fakakau ʻi he www.lds.org ha ngaahi tatau fakaʻilekitulōnika ʻo e folofolá, taʻu ʻe tolungofulu ʻo e ngaahi makasini ʻa e Siasí, “Ko e Fāmilí: Ko ha Fanongonongo ki Māmani,” mo e “Ko e Kalaisi Moʻuí: Ko e Fakamoʻoni ʻa e Kau ʻAposetoló.”
Hangē ko e vakai ʻa Palesiteni Hingikelī ki he tuʻunga lelei ʻe lava ke aʻusia ʻi he ʻinitanetí ko ha mālohi ki he leleí, naʻá ne vakai foki ki ha kovi ʻi ai. Naʻe fakatupu hohaʻa moʻoni ʻa e ponokalafí. Naʻá ne kolenga ʻo pehē, “Tukunoaʻi ia! Fakaʻehiʻehi mei ai ʻo hangē ko e mahaki fakaʻauhá he ʻoku tatau pē hona natula fakaʻauhá.” Naʻá ne fakahalaiaʻi foki ʻa e ngaohikovia fakatuʻasino mo fakasekisualé peá ne tapou ki he kau taki ʻo e Siasí ke nau tokoni ke ʻave ʻa e kau faihiá ki he fakamaauʻanga totonú.
Naʻe kei hohaʻa pē ʻa e palōfitá ki he tokolahi ʻo e Kāingalotu naʻe hē mei he Siasí. ʻI he malumalu ʻo ʻene fakahinohinó, naʻe fakamamafaʻi lahi ange ʻe he kau faifekaú ʻa e ului kimuʻa pea papitaisó, pea naʻe fakataha ʻa e kau taki fakamisioná mo e fakasiteikí ʻi ha ngaahi fakataha alēlea fakafekauʻaki foʻou ke aleaʻi ʻa e founga ke tokoniʻi lelei ange ai ʻa e kāingalotu foʻoú. Neongo naʻe hohaʻa ʻa Palesiteni Hingikelī naʻa ʻikai fakalakalaka ʻa e maʻulotu sākalamēnití, ka naʻe poupouʻi ia ʻe he ngāue ki hono pukepuke ʻo e Kāingalotú ʻi he funga ʻo e māmaní.
ʻI he kamataʻanga ʻo e mileniume foʻoú, naʻá ne ʻamanaki lelei ki he toʻu tangata kei tupu haké. Naʻe fakaʻau ke tokolahi ange ʻenau ō ʻo ngāue fakafaifekaú mo e mali ʻi he fale ʻo e ʻEikí. Naʻá ne toe pehē foki naʻa nau ako lelei ange ʻi he ngaahi toʻu tangata ʻo e kuohilí.
ʻI heʻene hoko ko e palesiteni ʻo e Siasí, naʻá ne fakaʻamua ha ngaahi founga ke tokoniʻi ai ʻa e Kāingalotu kei talavoú ke nau maʻu ʻa e ako fakaʻatamai mo e ako ngāue ʻoku nau fiemaʻú. ʻI he konga kimuʻa ʻo e taʻu ko iá, lolotonga ha fakataha ʻa e Poate Ako ʻa e Siasí, naʻá ne ongoʻi hono fakahā ange ʻe he Laumālié ko e Kolisi Likí, ko ha akoʻanga taʻu ʻe ua, ʻoku totonu ke hoko ia ko ha ʻunivēsiti taʻu fā ʻo ui ko BYU–ʻAitahō. ʻE hoko ʻa e faʻahinga liliu peheé ke maʻu ai ʻe he Kāingalotu kei talavoú ha faingamālie lahi ange ke hū ki ha ʻunivēsiti ʻa e Siasí.
ʻI he ʻaho hono hokó, naʻe fakamatalaʻi ʻe Palesiteni Hingikelī ʻa e fakakaukaú ki he kau ʻaposetoló, pea naʻa nau tali ia ʻi he loto-taha. Naʻá ne alēlea leva mo Tēvita A. Petinā, ko e palesiteni ʻo e Kolisi Likí, peá na fakakaukau ʻoku totonu ke tokanga taha ʻa e ʻunivēsiti foʻoú ki hono akoʻi mo hono fakaʻaongaʻi ʻo e ngaahi kalasi ʻi he ʻinitanetí ke fakalahi ʻa e tokolahi ʻo e fānau ako ke lesisita ke akó.
Naʻe ʻikai toe tatali ʻa e palōfitá ʻi hono fanongonongo ʻo e liliú. Naʻá ne pehē, “ʻE hoko ia ko ha faʻunga maʻongoʻonga.”
Kimui ange, naʻá ne fakakaukau lahi ki he kau finemui mo e kau tangata ʻi he ngaahi puleʻanga langalanga haké, tautautefito ki he kau ʻosi ngāue faifekaú. ʻI heʻenau fehangahangai mo e masivesivá mo e siʻisiʻi ʻa e akó mo e faingamālie ngāué, naʻe fakaʻau ke nau loto-foʻi pea hē mei he Siasí. Koeʻuhí ko ʻene fakalotolahí, naʻe kamata ʻa e Kau Pīsopeliki Pulé ke faʻu ha polokalama foʻou ke tuku atu ha fanga kiʻi nō iiki ki he Kāingalotu ʻi he funga ʻo e māmaní ke tokoniʻi kinautolu ke totongi haʻanau ako fakafetauʻaki pe ʻunivēsiti. ʻI hono fakatatau ia ki he Paʻanga Tokoni Hikifonua Tuʻumaʻú, ʻa e polokalama ʻa e Siasí ki hono tokoniʻi ha Kāingalotu ʻIulope ʻe lauiafe ke nau fakataha ki ʻIutā ʻi he 1800 tupú, naʻe palani ʻa Palesiteni Hingikelī ke ui ia ko e Paʻanga Tokoni Fakaako Tuʻumaʻú.
Naʻá ne tohi ʻo pehē, “ʻOku ou ongoʻi ʻoku ueʻi fakalaumālie ʻa e polokalamá ni pea ʻe lava ke faitāpuekina ai ʻa e moʻui ʻa ha kau talavou mo ha kau finemui tokolahi. ʻE lava ke fakalahi ʻenau fakakaukaú mo e ngaahi fakaʻānauá.”
Naʻe fakahoko ʻe Palesiteni Hingikelī ʻi Nōvema ha fakataha lotu makehe maʻá e toʻu tupu ʻo e Siasí. Ke tokoniʻi kinautolu ke nau hoko ko ha kau ākonga lelei ange ʻa Sīsū Kalaisí, naʻá ne fakaafeʻi kinautolu ke nau ako mo akoako ʻa e ngaahi meʻá ni ʻe ono (six Bʻs):
Hili ha māhina ʻe taha mei ai, ʻi he fakaʻosinga ʻo e taʻú, naʻá ne fakakaukau ki heʻene moʻuí mo e angalelei ʻa e ʻOtuá. Neongo naʻe holo ʻa e sino ʻo e palōfitá, ka naʻe malama hono laumālié ʻi he nonga mo e fiemālie. Naʻá ne hiki ʻi heʻene tohinoá ʻi he ʻaho 31 ʻo Tīsema 2000 ʻo pehē, “ʻOku ou ongoʻi houngaʻia lahi ki heʻeku Tamai ʻi Hēvaní mo Hono ʻAlo ʻOfaʻangá. ʻOku tau hanganaki atu ʻi he taimí ni ki ha taʻu foʻou.”
Hili ha māhina ʻe ua mei ai, ʻi he ʻaho 26 ʻo Fēpueli 2001, naʻe tangutu ʻa Talaiasi Kulei mo Malia Teila ʻi ha fale fakatahaʻanga tokolahi ʻi he Laipeli Hisitōlia Fakafāmilí ʻi Sōleki Siti. ʻI muʻa ʻi he lokí, naʻe lea ai ʻa e ʻaposetolo ko Henelī B. ʻAealingí ki ha kau faiongoongo mo ha kau fakaafe makehe ʻe laungeau fekauʻaki mo e ngāue ki he Pangikē Filīmení.
Hili ha ngāue taʻu ʻe hongofulu mā taha ʻa Talaiasi, Malia mo ha kau ngāue tokoni ʻe toko 550 tupu ʻi he Fale Fakapōpula ʻo e Siteiti ʻIutaá, naʻa nau lava ʻo maʻu ha fakamatala fekauʻaki mo e kakai ʻAfilika ʻAmelika kotoa ʻe toko 484,083 naʻe ʻasi ʻi he ngaahi lekōtí. Kimuí ni mai, naʻe kamata ke fakahoko ʻe he Siasí ha tokoni fakatekinikale mo fakapaʻanga ki he ngāué, pea kuo lava ʻeni ke fai ha fekumi ʻi he fakamatalá mo ʻatā ki he kau fakatotolo ʻi he CD-ROM pea ki ha taha pē ʻo e ngaahi senitā hisitōlia fakafāmili ʻo e Siasí.
Naʻe fanongonongo ʻe ʻEletā ʻAealingi ʻo pehē, “Ki he kakai ʻAfilika ʻAmeliká, ʻoku fakafofongaʻi ʻe he ngaahi lekooti ʻa e Pangikē Filīmení ʻa e lahi taha ʻo e ngaahi fakamatala fakapepa ʻo e hako ʻoku ʻiloa ke kei moʻuí. ʻI he kahaʻu vave maí, ko ʻemau fakaʻamú foki ia ke tuku atu ʻa e fakamatala kuo tānakí taʻetotongi ʻi he uepisaiti fakatohihohoko ʻa e Siasí, FamilySearch.org.”
ʻI he ngaahi ʻaho kimuʻa pea fakahoko ʻa e fanongonongo ko ʻení, naʻe fakataha ʻa Talaiasi mo e kau taki ʻi he Potungāue Hisitōlia Fakafāmilí ke palani hono tuku atu ʻo e ngaahi fakamatalá. Naʻá ne fakakaukau, “Te tau fakahoko moʻoni ʻeni. ʻE hoko moʻoni ia.”
Naʻe ʻikai maʻu pē ke fuʻu fakapapau ʻa e ikuʻanga ʻo e ngāué. ʻI he kamataʻangá, kuo hoko hono maʻu ʻa e ngaahi hingoa ki he ngāue fakatemipalé ko ha konga fakalotolahi ʻo e ngāué. Ka ʻi he konga loto ʻo e ngaahi taʻu 1990 tupú, naʻe hōloa hono poupouʻi ʻe he Siasí ʻa e kakaí ki hono fakahū ʻo e ngaahi hingoa ʻo kinautolu naʻe ʻikai kau ki he Siasí ki he temipalé. Naʻe hoko ʻa e liliú ko ha meʻafua mahuʻinga mo fiemaʻu ia ke fakaʻapaʻapaʻi ʻa e ngaahi fāmili ʻo e pekiá, ka naʻe tupu ai ha tuai ʻo e ngāué. Ko hono olá, naʻe liliu ʻe Talaiasi mo Malia ʻena tokangá ki hono faʻu ha meʻangāue fakatotolo ke tokoni ki he kakai ʻAfilika ʻAmeliká ke maʻu ʻenau ngaahi kuí.
Naʻe ʻosi hono tānaki ʻe he kau pōpulá ʻa e ngaahi hingoá ʻi ʻOkatopa ʻo e 1999. Hili iá, naʻa nau fakapapauʻi fakalelei ʻenau ngaahi fakamatalá pea—neongo ha tāpuni uike ʻe tolu ʻa e fale fakapōpulá—naʻa nau fakakakato ʻa e ngāué ʻi he kongaloto ʻo Siulai 2000.
Naʻe tangi ha taha ʻo e kau pōpula naʻe tokoni ʻi hono fakafekauʻaki ʻa e ngāué ʻi he taimi naʻe ʻosi aí. Naʻe ʻikai ke ne teitei ʻamanaki ʻe liliu lahi ia ʻe he ngāué ʻo hangē ko ia naʻe hokó. Naʻá ne lau ha ngaahi lekooti fakalotomamahi ʻo hono ʻave ʻo e ngaahi tamai mo e ngaahi faʻē ngāue pōpulá mei honau ngaahi fāmilí. Naʻe ʻasi ʻi ha ngaahi lekooti kehe hono fanaʻi ʻo e kakaí ʻo maté. Naʻe fakamatala ha lekooti ʻe taha naʻá ne maʻu fekauʻaki mo ha pēpē ʻi he fale fakapōpulá naʻe ʻikai hano hingoa ʻa ia naʻe fakafetongi ʻaki ha meʻangāue faama.
Naʻe maʻu ʻe ha kau pōpula tokolahi ha ngaahi aʻusia liliu moʻui tatau. ʻI ha taimi ʻe taha, naʻe vakai ʻa e kouʻotineitá ki ha tokotaha ngāue tokoni naʻe tangi. Naʻe pehē ʻe he pōpulá, “ʻoku ʻikai ke u tui ki he founga naʻe ngaohi ai e kakaí ni.” Naʻe fakatokangaʻi ʻe he kouʻotineitá ʻi hono hili atu hono nimá ʻi he uma ʻo e taha tokoní, naʻe tā-tatauʻi ʻa e tangatá ʻaki ha fakaʻilonga ʻo ha kulupu taukaveʻi ʻo e kakai hinehiná.
Koeʻuhí kuo maʻu ʻeni ʻa e fakamatalá, naʻe pau ke kumi ʻe Talaiasi mo Malia ha founga ke fakafaingamālieʻi ai ia ki he kau fakatotoló—ko ha meʻa naʻe ʻikai ke na maʻu ʻa e ngaahi maʻuʻanga tokoni ke fakahoko ʻakí. Naʻe ʻi ai ha uepisaiti tohi hohoko manakoa naʻa nau fie fakatau ʻa e fakamatalá ʻaki ha paʻanga ʻe laumano, ka naʻe ʻikai tali ʻe Talaiasi mo Malia, ʻi heʻena ongoʻi ʻe hala ke na maʻu ha tupu mei he ngāue ʻa e kau pōpulá. Ka, naʻá na foaki ia ki he Siasí ko ha fetongi ʻo hono fakaʻatā ia ki he tokotaha kotoa pē naʻá ne fie fakaʻaongaʻi iá.
ʻI he polokalama tukuange ʻo e CD-ROM, ʻa ia naʻe fakamafola ki Uāsingatoni, DC, mo ha ngaahi kolo kehe ʻe hongofulu mā taha ʻi he ʻIunaiteti Siteití, naʻe fakatou lea ai ʻa Talaiasi mo Malia fekauʻaki mo e ngāué. Naʻe pehē ʻe Talaiasi ʻoku fakamatala ʻa e ngaahi lekōtí ki ha ngaahi talanoa fakamamahi mo taʻefakafiemālie. Naʻá ne talaange ki he kau faiongoongó, “ʻOku ou tui ko e taimi lahi ʻoku tau faʻa ilifia ke talanoa fekauʻaki mo e matakalí, ka ko ha meʻa moʻoni ia. ʻOku totonu ke tau fevahevaheʻaki fakataha ʻi he hisitōliá.”
Naʻá ne tui ko e fāmilí ko e uho ia ʻo e ngāué. Naʻá ne pehē, “ʻOkú ne ʻai ke ke ʻiloʻi hono mahuʻinga ʻo e fāmilí. Naʻa mo e ʻātakai ʻo e nofo populá, naʻe faingataʻa ki he kakaí ke nau fetokoniʻaki. Naʻa nau ngāueʻi ia, naʻa nau fetokoniʻaki. ”
Naʻe tui ki ai ʻa Malia. Naʻá ne pehē, “ʻI heʻeku ʻilo fekauʻaki mo e ngaahi lekooti ʻa e Pangikē Filīmení, naʻá ku fakakaukau ki hano fakangata ʻe he kau ʻAfilika ʻAmeliká ʻa e ngaahi haʻi ʻo e nofo pōpulá kae tanumaki ʻa e ngaahi haʻi ʻo e fāmilí.” Naʻá ne fakaʻamu ʻi he taimi ko iá ʻe hokohoko atu hono fakatahaʻi ʻe he ngaahi lekōtí ʻa e ngaahi fāmilí.
Naʻá ne pehē, “Ko e taumuʻa ia ʻo e meʻa kotoa pē.”
ʻI he taimi naʻe ui ai ʻa Felisinito Konitelelasi ke hoko ko ha pīsope ʻi Sanitiako, Sileí, naʻe tukuange hono uaifi ko Veloniká mei heʻene hoko ko e palesiteni Fineʻofa ʻo e uōtí. Ka naʻe ʻikai fuoloa kuó ne maʻu ha uiuiʻi foʻou: ko ha faiako semineli mo ʻinisititiuti fakasiteiki.
Kuo taʻu lahi hono fakalele ʻo e ʻinisititiuti fakalotu ʻa e Siasí ʻo ofi ki he ngaahi ʻunivēsiti ʻi he ʻIunaiteti Siteití. Ka ʻi he konga kimuʻa ʻo e 1970 tupú, naʻe kamata liliu ʻe he kau taki ʻi he Potungāue Ako ʻa e Siasí ʻa e ʻinisititiutí ke ngāue ʻi he ngaahi siteiki ʻi he funga ʻo e māmaní. Naʻe fakaʻatā ʻe he liliú ʻa e kakai lalahi kei talavou kotoa pē ʻi he Siasí, ʻo ʻikai ko e fānau ako ʻunivēsití pē, ke nau maʻu ha lelei mei he polokalamá. Naʻe tokangaʻi ʻe he kau pule fakavahelahi ʻi he Potungāue Ako ʻa e Siasí ʻa e ngaahi kalasí, pea naʻe teuteu ʻe he ngaahi siteikí ha kau faiako.
ʻI Sileí, naʻe fakalele ʻa e ako fakalotu lolotonga ʻo e uiké ʻi ha taimi fakataha mo ha ngaahi ʻapiako lautohi mo e ako māʻolunga ʻa e Siasí ʻa ia naʻe laka hake ʻi he ngaahi ʻapiako ʻe hongofulu mā uá. Ka naʻe totongi mamafa ki he Siasí ke fakalele ha ngaahi ʻapiako ʻi he fonua kotoa pē naʻe ʻi ai ha kāingalotu, pea naʻe pehē ʻe he tuʻutuʻuni ʻa e Siasí, ko hono maʻu pē ʻe he Kāingalotú ha ngaahi ʻapiako fakaʻatamai feʻungá, ʻe tāpuni leva ʻa e ngaahi akoʻanga ʻa e Siasí. ʻI he 1981, naʻe tāpuni ʻe he Siasí hono akoʻanga fakaʻosi ʻi Sileí pea kamata ke fakafalala ʻataʻata pē ki he seminelí mo e ʻinisititiutí ke maʻu ai ʻe he Kāingalotú ha ako fakalotu.
Naʻe fakahaaʻi ʻe he ngaahi fakatotoló naʻe meimei ke mālohi ange ʻa e kau ako ʻinisititiutí ʻi he Siasí ʻiate kinautolu naʻe ʻikai ʻinisititiutí. Ka ʻi Sileí, ko ha toko taha pē nai mei ha kau taautaha Siasi ʻe nima naʻe lesisitá. ʻI he taimi naʻe uiuiʻi ai ʻa Veloniká, ko ha fānau ako pē ʻe toko tolu pe fā ʻi he siteikí naʻa nau faʻa ʻalu maʻu pē ki he ʻinisititiutí.
Naʻe tui ʻa Velonika naʻe ʻi ai ha fatongia mahuʻinga ʻo e ngaahi kalasi ʻinisititiutí ʻi hono tokoniʻi ʻo e toʻu tupú ke nau fakalakalaka ʻo ofi ange ki he ʻOtuá. Naʻá ne kamata talanoa fekauʻaki mo e ʻinisititiutí ki he kakai lalahi kei talavou kotoa pē—mo e mātuʻa ʻa ha tokotaha lahi kei talavou—naʻá ne fetaulaki mo ia ʻi he lotú. Naʻá ne ʻaʻahi foki ki he kau pīsope ʻo e uooti takitaha, ʻo kole ange ke nau fakaafeʻi ʻa e toʻu tupú ke nau kau mai ki he ngaahi kalasí. Naʻe poupou ha tokolahi ʻo e kau pīsopé, tautautefito ki he taimi naʻá ne vahevahe ai ʻene tui ki he mahuʻinga ʻo e ʻinisititiutí. Naʻe ʻikai fuoloa, kuo kau atu ha fānau ako ʻe toko nimangofulu tupu ki he ʻinisititiutí.
Koeʻuhí naʻe haʻu hangatonu ha tokolahi ʻo ʻene fānau akó mei he ngāué pe akó, naʻe ʻikai ke nau faʻa maʻu ha taimi ke maʻu meʻatokoni ai kimuʻa pea kamata ʻa e kalasí. ʻI he hohaʻa ʻa Velonika he ʻikai ke nau lava ʻo tokanga taha ki heʻene ngaahi lēsoní kapau ʻoku nau fiekaiá, naʻá ne fakapapauʻi ʻoku ʻi ai ha meʻa ke kai ʻe he kau akó ʻi heʻenau aʻu atú. Naʻá ne faʻa teuteu maʻanautolu ha foʻi keke pe kiʻi kai maʻamaʻa. Naʻá ne teuteu ʻi he taimi ʻe niʻihi ha meʻa lahi ange, hangē ko ha tunutunu pe ko ha meʻatokoni kehe. Ka he ʻikai ke ne teitei tala ki he kau akó ʻa e meʻakai ke nau ʻamanaki ki aí, ʻi heʻene fakaʻamu ʻe fakaʻaiʻai kinautolu ʻe heʻenau fifili pe ko e hā ʻa e meʻakaí ke nau haʻu ki he kalasí.
ʻI he kamataʻanga ʻo e taʻú, te ne fehuʻi ki heʻene fānau akó pe ko e hā ʻoku nau fie akó. Makatuʻunga ʻi heʻenau fakamatalá, naʻá ne akoʻi ha ngaahi kalasi ʻi he ngaahi folofola ʻoku fakaʻaongaʻi ʻe he Siasí, teuteu ki he temipalé mo e ngāue fakafaifekaú, pea mo e mali taʻengatá.
ʻI hono fakaʻaongaʻi ʻe Velonika ʻa e tohi lēsoni ʻinisititiutí ko ha kamataʻangá, naʻá ne teuteuʻi ʻene lēsoní ʻi he faʻa lotu, ʻo kumi ha ngaahi founga ke fakamatalaʻi ai ʻa e ngaahi faingataʻa fakaʻaho ʻo ʻene kau akó. Naʻá ne saiʻia ke ʻanalaiso fakaveesi ʻa e folofolá ke poupouʻi ʻene kau akó ke nau fakakaukau lahi ange ki he moʻui mo e ngaahi akonaki ʻa e kakai mo e kau palōfita ne nau akó. Naʻá ne poupouʻi foki ʻa e toʻu tupú ke nau fai ha ngaahi fehuʻi.
Te ne pehē ange, “Kapau he ʻikai ke u ʻilo ʻa e tali ki hoʻo fehuʻí pe ko ha meʻa ʻokú ke hohaʻa ki ai, te u kumi hake ia pea te u ʻoatu ʻa e talí—pe ko haʻata kumi fakataha ia.”
ʻI he ʻalu ke tokolahi ange ʻa e kalasi ʻinisititiutí, naʻe fakaʻau ke uouangataha ange ʻa e kau akó. Naʻa nau fiefia ʻi he feohi mo iá pea mo e niʻihi kehé. Taimi ʻe niʻihi, ʻi heʻenau fehangahangai mo ha ngaahi palopalema fakatāutahá, ʻe haʻu ʻa e fānau akó ki ai ke maʻu ha faleʻi. Naʻá ne tapou maʻu pē kiate kinautolu ke fakaleleiʻi ʻenau ngaahi hohaʻá mo e kakai totonú.
Naʻá ne talaange kiate kinautolu, “Sio, talanoa ki hoʻo pīsopé pe ki hoʻo tamaí pe faʻeé, koeʻuhí kapau ʻoku ʻi ai ha palopalema ʻi ʻapi, kuo pau ke ke fakaleleiʻi ia ʻi ʻapi. Pea kapau ʻoku ʻikai ha founga ke fakaleleiʻi ʻaki, ʻalu ʻo talanoa mo hoʻo pīsopé. Ko e meʻa lelei taha ia ke faí.”
Naʻe mahino kia Velonika naʻe fehangahangai ʻene kau akó mo ha ngaahi faingataʻa. ʻI he taimi ko iá, naʻe hōloa ʻa e tuʻunga fakaʻekonōmika ʻo Sileí, pea naʻe fifili ha kakai kei talavou tokolahi ʻe niʻihi pe te nau lava fēfē ʻo fakapaʻanga ʻenau akó, mali, mo ohi hake ha fāmili. Naʻe tautau ʻi he holisi ʻo Veloniká ha fakaʻilonga naʻe pehē ai “Tui ʻi he Foʻi Laka Kotoa Pē,” pea naʻá ne tui ko e ngāue ʻi he tuí mo fakaʻaongaʻi ʻo e ngaahi akonaki ʻa Sīsū Kalaisí ʻi he moʻui fakaʻahó, ʻe maʻu ai ha ngaahi ola lelei.
Naʻá ne talaange ki heʻene fānau akó, “Te tau humu maʻu pē. Ka te tau maʻu maʻu pē ʻa e toʻukupu ʻo e ʻEikí ke tokoniʻi kitautolu.”
ʻI Mē ʻo e 2001, naʻe mavahe ai ʻa Sepi Solesitā mei hono ʻapi ʻi Iloʻilo Siti, Filipainí, ke nofo mo ngāue ʻi he ʻIunaiteti Siteití—ko ha fakaʻānaua naʻá ne maʻu talu mei he ʻunivēsití. Naʻe ʻi ai hano ngaahi kaungāmeʻa mo e kāinga mei Filipaini naʻa nau ʻosi hiki ki ʻAmelika, pea naʻa nau moʻui fiefia mo lavameʻa. Naʻá ne fakakaukau, “Mahalo te u lava foki ʻo maʻu ʻa e fakaʻānaua ko iá.”
Naʻe ʻikai saiʻia hono uaifi ko Melitiané ʻi he fakakaukau ʻo ʻene mavahe mei ʻapi ke hiki ki he tafaʻaki ʻe taha ʻo e māmaní. Naʻá ne talaange ki ai, “Ko koe pē ia ʻoku fakaʻānaua peheé. ʻOku ʻikai ke u fiemaʻu ʻe au.” Naʻe ʻi ai hona ngaahi foha taʻu hongofulu tupu ʻe toko tolu ke ohi hake, ko ha pisinisi fakafaitoʻo ke fakalele, mo ha ngaahi uiuiʻi faka-Siasi ke fua. Naʻe ʻikai mahino kiate ia ʻa e ʻuhinga naʻá ne fie ʻalu aí.
Naʻá ne faleʻi ange, “ʻOku fiemaʻu ke ke fakakaukau fakapotopoto ki ai. ʻI heʻeta hoko ko ha husepāniti mo e uaifí, ʻoku fiemaʻu ke ta nofo ʻi ha fale pē ʻe taha.”
Neongo ia, naʻe ʻikai ke loto ʻa Melitiane ke taʻofi ʻa e fakaʻānaua ʻa Sepí, pea faifai ʻo ne loto ki heʻene mavahé. Naʻá na fakatou ʻiloʻi naʻe nofo vāmamaʻo ha ngaahi mātuʻa Filipaini tokolahi, ʻo nofo ha hoa ʻe taha ʻi he ʻOtu Filipainí kae ngāue ʻa e tokotaha ʻe tahá ʻi muli. Ko e hā ka ʻikai ke na lava ai ʻo fai ʻa e meʻa tataú?
ʻI he ʻIunaiteti Siteití, naʻe hiki ʻa Sepi ʻo nofo mo haʻane faʻētangata ʻi Longi Piisi, Kalefōnia, ko ha kolo ʻi he matāfanga fakahihifo ʻo e fonuá. Naʻá ne maʻu ha ngāue ʻi ha faʻitoka ʻi ha falemahaki ofi mai pē. Naʻe faingataʻa ʻa e taimi poʻulí, pea naʻe faingataʻa ʻa e ngāué, ka naʻe totongi lelei, pea naʻe fiefia ʻa Sepi ʻi he ngāué.
ʻI he fakaʻosinga ʻo e uiké, naʻá ne ʻalu ʻo lotu ʻi hono uōtí peá ne ʻaʻahi ki hono kāingá mo ʻene faʻētangatá. Naʻá ne saiʻia hono maʻu ha ngaahi kaungāmeʻa foʻoú pea fakaʻau ke maheni lelei ange mo hono kāingá. Ka naʻá ne ongoʻi taʻelata foki pea ʻofa ki hono uaifí mo e fānaú. Naʻá na feinga mo Melitiane ke na talanoa ʻi he telefoní ʻi he ʻaho kotoa pē, ka naʻe mamafa ʻaupito ia. Ke telefoni mamaʻo ki Filipainí, naʻe pau ke ne fakaʻaongaʻi ha ngaahi kaati telefoni ʻo totongi ʻaki ha paʻanga ʻe hongofulu ʻi he houa.
Hili ʻa e ngāue ʻa Sepi ʻi ha māhina ʻe nima ʻi Kalefōniá, naʻá ne kamata fakakaukau fakamātoato ke foki ki he ʻOtu Filipainí. ʻE vavé ni pē ha ʻosi ʻa e ʻaonga ʻo ʻene visá, pea kapau naʻá ne fie hoko atu ʻene ngāue ʻi he ʻIunaiteti Siteití, naʻe fiemaʻu ke ne fakalōloa ia. Naʻá ne fakakaukau ʻi ha kiʻi taimi ke haʻu ʻa Melitiane mo ʻena fānau tangatá ke fakataha mo ia, ʻo nau nofo ai pē ai, ʻi he taimi pē te ne maʻu ai ha paʻanga feʻungá. Ka naʻe ʻikai fie nofo ʻa Melitiane ia ʻi he ʻIunaiteti Siteití, pea naʻe ʻikai ke ne fie nofo ai taʻe kau ai hono fāmilí.
ʻI he pongipongi ʻo e ʻaho 11 ʻo Sepitema 2001, naʻe puke fakamālohi ai ʻe ha kau fakaehaua ha vaka uta pāsese ʻe tolu ʻi he fakahahake ʻo e ʻIunaiteti Siteití pea fakapaaki kinautolu ʻi ha ngaahi fale ʻi Niu ʻIoke Siti mo e feituʻu Uāsingatoni, DC. Naʻe tō mo ha vakapuna ʻe taha ko hono faá ia ʻi ha loto ʻataʻatā hili hano fakafepakiʻi ʻe he kau pāsesé ʻa e kau puke fakamālohí. Naʻe mate ha kakai ʻe meimei toko tolu afe ʻi he ngaahi ʻohofí pea tupu ai e feʻiteʻitani mo ha manavahē. Lolotonga ʻa e tēngihia ʻa e kakai ʻi he funga ʻo e māmaní, naʻe fuakava ʻa e ʻIunaiteti Siteití mo kinautolu naʻa nau kaungā-kaú ke “tauʻi” ʻa e ngaahi kulupu ne nau fakahoko ʻa e ʻohofí.
ʻI he mamata ʻa Sepi ki he ongoongo televīsone fekauʻaki mo e meʻa fakamamahi ne hokó, naʻe ʻikai ke ne toe ongoʻi malu ʻi he feituʻu naʻá ne ʻi aí. Naʻá ne fie fakataha mo hono uaifí mo e fānaú. Naʻe kei taʻu siʻi hono ngaahi fohá. Naʻa nau fiemaʻu ha taha ke tataki mo fakamālohia kinautolu ʻi heʻenau matuʻotuʻa angé. Naʻe fiemaʻu ke ne ʻi ʻapi mo kinautolu mo ʻenau faʻeé.
Hili ha ngaahi ʻaho siʻi mei he puke fakamālohí, naʻe heka ʻa Sepi ʻi ha vakapuna ki he ʻOtu Filipainí. Naʻá ne foki vave ange ʻi he taimi naʻe palaní, ka naʻe ʻikai haʻane fakaʻiseʻisa. Naʻá ne fakatokangaʻi ko e fiefia moʻoní, naʻe ʻikai maʻu ia mei he lavameʻa fakamāmaní. Naʻe maʻu ia ʻi he fāmilí.
Hili ha māhina ʻe taha mei he ʻohofi ʻi he 11 ʻo Sepitemá, naʻe lea ʻa Palesiteni Hingikelī ki he Kāingalotú ʻi he konifelenisi lahí fekauʻaki mo e fepakipaki ʻoku fakalalahí. Naʻá ne pehē, “ʻOku tau moʻui ʻi ha faʻahitaʻu ʻoku fai ai ʻe ha kau tangata angatuʻu ha ngaahi meʻa fakamamahi mo fakalilifu. Ko hotau mālohí ʻa ʻetau tui ki he Māfimafí. He ʻikai ha meʻa ʻi he lalo langí te ne lava ʻo taʻofi e ngāue ʻa e ʻOtuá. ʻE ala hiki hake ʻe he filí hono ʻulu palakuú. Mahalo ʻe faingataʻaʻia ʻa māmani ʻi he ngaahi taú mo e ongoongo ʻo e taú, ka ʻe laka ki muʻa ʻa e ngāué ni.”
Naʻá ne hoko atu ʻo pehē, “Pea ʻi heʻetau laka atu ki muʻá, ʻofa ke tau tāpuekina e faʻahinga ʻo e tangatá ʻaki ha tokoni ki he taha kotoa, ʻo hiki hake ʻa kinautolu ʻoku loto-foʻi mo ngaohikoviá, fafangaʻi mo fakakofuʻi ʻa e fiekaiá mo e faingataʻaʻiá, ʻo fakahaaʻi ʻa e ʻofá mo e fie tokoní kiate kinautolu ʻoku ʻikai kau ʻi he Siasi ko ʻení.”
Hili ha ngaahi māhina siʻi mei ai, naʻe fakahoko ʻi Sōleki Siti ʻa e Vaʻinga ʻOlimipiki Faʻahitaʻu Momoko ʻo e 2002, ko ha meʻa naʻe ʻamanaki ki ai ʻa Palesiteni Hingikelī ʻi ha ngaahi taʻu lahi. Neongo ʻa e ngaahi ʻohofi fakatautoitoi kimuí ni maí, ka naʻe ʻomi ʻe he ngaahi vaʻingá ha kau ʻaʻahi fakavahaʻapuleʻanga tokolahi fau ki ʻIutā, kau ai ha kau faiongoongo ʻe lauiafe ne nau vēkeveke ke fai ha ngaahi fehuʻi fekauʻaki mo e tukufakaholo mo e anga fakafonua fakalotu ʻo e koló. Naʻe fakamahinoʻi ʻe Palesiteni Hingikelī ʻa e tuʻunga poupou ʻa e Siasí ʻaki ʻene fanongonongo ki he kakaí he ʻikai malanga ʻa e kau faifekaú ki he kau folau ʻeveʻeva ʻOlimipikí. Ka ʻe kei fakahoko pē ʻe he Siasí ha tokoni ki he kau faiongoongó mo e kau ʻaʻahi kehé ke nau ako fekauʻaki mo e Kāingalotú.
ʻI ʻOkatopa ʻo e 2001, naʻe tuku ange mai ai ʻe he kau taki ʻo e Siasí ha uepisaiti foʻou naʻe fakataumuʻa ke tali ʻa e ngaahi tefitoʻi fehuʻi fekauʻaki mo e ngaahi tui mo e founga ngāue ʻa e Siasí. Lolotonga ʻo e ngaahi vaʻingá, naʻe fokotuʻu foki ʻe he Siasí ha senitā mītia ʻi he Fale Fakamanatu ʻo Siosefa Sāmitá maʻá e kau faiongoongó. ʻE lava ke kau atu ha taha pē ʻoku fie ʻilo fekauʻaki mo e Siasí mo hono ngaahi akonakí ki he Maama ʻo Māmaní, ko ha fakaʻaliʻali ʻoku fakatefito ʻia Kalaisi fekauʻaki mo e hisitōlia ʻo e Siasí pea mo e pōpoaki ʻo e ongoongolelei kuo fakafoki maí, ʻa ia naʻe fakahoko ʻi ha ʻaho ʻe fā ʻi he uike ʻi he Senitā Konifelenisí.
Hili ʻa e ngaahi meʻa ne hoko ʻi he ʻaho 11 ʻo Sepitemá, naʻe ʻi ai ha hohaʻa lahi ki he tuʻunga malú ʻi he ngaahi vaʻingá. Naʻe fokotuʻutuʻu ha ngaahi founga maluʻi lahi ʻi he ngaahi feituʻu ʻOlimipiki takitaha, ka naʻe ngāue mālohi ʻa e kau fokotuʻutuʻú ke tauhi ʻa e Laumālie fakafiefia ʻo ha kolo ʻokú ne fakalele ʻa e ʻOlimipikí. Ke tokoni ke lele lelei ʻa e ngaahi vaʻingá, naʻe fakaʻatā ʻe he Siasí ha ngaahi maʻuʻanga tokoni ki he Kōmiti ʻOlimipiki Sōlekí, ngaahi tauʻanga meʻalele maʻá e kakaí, mo ha ngaahi ngāue kehekehe. Naʻe hiva ʻa e Kuaea Tāpanekalé ʻi muʻa ʻi ha haʻofanga kakai ʻe toko tolu piliona ʻi he funga ʻo e māmaní lolotonga ʻo e ngaahi polokalama fakaavá. Pea naʻe tokoni ha Kāingalotu tokolahi, kau ai ha kau ʻosi ngāue fakafaifekau ne nau hoko ko ha kau liliu lea, ʻaki hono foaki taʻetotongi honau taimí.
Hili ʻa e ʻosi ʻa e ngaahi vaʻingá, naʻe tohi ʻa e palōfitá fekauʻaki mo e ngaahi meʻa naʻe hokó ʻi heʻene tohinoá. Naʻá ne tohi ʻo pehē, “Kuo tāpuekina lahi ʻa e Siasí ʻe he ngaahi ʻOlimipiki ko ʻení. Kuo teʻeki ai ke mau fai ha malanga fakahangatonu, ka kuo mau maʻu ha ngaahi kaungāmeʻa mo ha ngaahi maheni ʻi he funga ʻo e māmaní. Ko e kakai ko ia naʻe teʻeki ai ke nau fanongo ʻiate kitautolú kuo nau maʻu ʻeni ha kiʻi ʻilo.”
Naʻá ne fakakaukau ki he tokolahi ʻo e kakai māʻolunga, kau taki ʻo e ngaahi siteití, mo e kau taki fakangāue ne omi ki he koló ke fiefia ʻi he ngaahi vaʻingá. Naʻa nau fakamanatu mai ai ha kikite naʻe fai ʻe Pilikihami ʻIongi ʻe hoko ʻa Sōleki Siti ko ha “talitaliʻanga ʻo e ngaahi puleʻangá,” ko ha feituʻu ʻe ʻaʻahi ki ai ʻa e ngaahi tuʻí mo e kau ʻemipolá.
Naʻe tohi ʻe Palesiteni Hingikelī ʻo pehē, “Kuo fakahoko ʻa e kikité ʻi he meʻa kuo tau fakatokangaʻi ʻi he uike ʻe ua kuohilí. Ko ʻeni kuo tau mālōlō hifo ʻo foki ki he ngāué.”