Mataupu 37

O Le A Oo Mai Tali

“O le a sou manatu?”

Sa faaopeopea i le ea le fesili a o faatalitali Marco Villavicencio mo lona faletua o Claudia, e tali mai. O lona pule, o se kamupani fesootaiga i Machala, Ekuatoa, na faatoa ofoina atu ia te ia se avanoa e tatala ai se ofisa fou i Puerto Francisco de Orellana, o se aai laitiiti i le vaomatua o le Amasone i le itu i sasae o Ekuatoa.

Sa fiafia Marco i le tofiga, lea na aofia ai se siitaga, ae sa le manao o ia e fai se tonu e aunoa ma Claudia. O le galuega o le a manaomia ai le siitia atu o le au Villavicencios ma lo la atalii e fa tausaga, o Sair, i le silia ma le fa selau maila le mamao.

O Claudia, e pei o Marco, sa ola a’e i se aai tele, o lea la o le siitia atu i se vaomatua o se suiga tele. Ae sa ia lagolagoina Marco ma manao ia alualu i luma o ia i lana galuega. Sa fiafia foi o ia i le manatu o le siitia atu i se nuu maotua. Sa manatu o ia o le a felata’i atili ai lo latou aiga.

Ae, sa tutusa lava le la fesili ma Marco e uiga ia Puerto Francisco de Orellana: “Pe o i ai le Ekalesia iina?” O i laua uma o ni faifeautalai ua mae’a mai misiona, ma sa taua le Ekalesia ia i laua. Sa la mananao ia ola ae lo la atalii i se nofoaga e mafai ona auai ai i le Peraimeri, a’oa’o le talalelei, ma maua ni aafiaga faaleagaga. Na toeitiiti atoa le lua selau afe o le Au Paia o Aso e Gata Ai i Ekuatoa, ae o le toatele o i latou sa nonofo latalata i aai tetele e pei o Quito, le laumua o le atunuu, ma Guayaquil, lea na faapaiaina ai se maota o le Alii i le 1999.

O Puerto Francisco de Orellana, lea e lauiloa i le lotoifale o El Coca, sa laitiiti pe a faatusatusa atu i ai, e ui ina sa vave ona faatupulaia ina ua maua le suauu iina i ni nai tausaga na muamua atu. I le faaaogaina o le Faasino Upu o le Falelotu i le uepisaite a le Ekalesia, sa saili ai e Claudia se uarota po o se paranesi e latalata i le aai. E leai ni taunuuga o le sailiga, ae i se taimi puupuu mulimuli ane, na ta’u atu ai e uo a Marco ma Claudia ia i laua e uiga i nisi tagata o le Ekalesia o e na siitia atu iina mo galuega.

O le faalogo atu i lenei mea na faamafanafanaina ai Marco ma Claudia. Ina ua uma ona tatalo e uiga i le ofo, sa la filifili e talia le galuega.

Na taunuu le au Villavicencios i El Coca ia Fepuari 2009. Sa i ai le aai i le ogatotonu o le vaomatua mafiafia, ae o le mea na faateia ai le au Villavicencios, sa le’i lagonaina le vavaeeseina mai le isi vaega uma o le lalolagi. Soo se mea lava la te vaavaai i ai, e omai ai lava tagata ma o mo a latou pisinisi.

Ina ua iloa e lo latou pule o le fale o i latou o ni tagata o le Ekalesia, sa ia ta’u atu ia i latou na te iloa le mea e potopoto ai se vaega o tagata o le ekalesia e faitau faatasi ai tusitusiga paia. “Sa ou nonoina atu ia i latou le fale,” o lana tala lea.

Sa faapotopoto lea vaega i taeao uma o Aso Sa i le itula e iva e usu viiga, faitau mai le Liahona, ma suesue i tusitusiga paia. Sa latou faafesootaia foi Timothy Sloan, le peresitene o le Misiona a Ekuatoa Quito, o lē na auina atu ni faifeautalai se toalua e asiasi ia i latou. Ae sa nonofo faifeautalai i le fa itula le mamao ma sa le mafai ona o mai soo i El Coca.

Sa amata ona auai Marco, Claudia, ma Sair i sauniga i Aso Sa i vaiaso uma. I le taimi muamua, na misia e Sair le Peraimeri ma sa mafaufau po o fea o i ai isi tamaiti. Sa misia foi e Marco ma Claudia lo la olaga tuai, ae o le faatofuina o i laua lava i le galuega a le Alii na faaitiitia ai lo la ma’imanatu.

Ina ua o mai faifeautalai i le taulaga, sa talosagaina e Marco la la’ua fesoasoani e saili nisi tagata o le ekalesia. “Faifeau,” na ia fai atu ai, “e tatau ona oulua savavali faataamilo i le aai.” Sa manatu o ia afai e iloa e tagata ia faifeautalai, o le a latou fesili atu ia i la’ua po o fea e mafai ona latou faapotopoto ai ma isi tagata o le ekalesia i le lotoifale.

Sa faasolosolo malie lava ona iloa e tagata o le Ekalesia i le aai le fonotaga ma auai faatasi ma le vaega. A o faatupulaia le vaega, sa avea Marco ma ona taitai. Sa amata ona o mai faifeautalai i vaiaso uma e a’oa’o tagata ma maua nisi tagata o le Ekalesia. E lei umi, ae maua e le Au Paia i El Coca le faatagaga e mulimuli ai i le polokalama autu a le Ekalesia.

Ma faatasi ai ma lenei faatagaga na oo mai ai le pule e faatautaia ai le faamanatuga.

Ina ua iloa e Angela Peterson Fallentine o le a matuā faigata lava ia te ia ma lona toalua ona maua ni fanau moni, sa ia valaau atu i lona tina i le telefoni. “Ou te le iloa pe faapefea ona fai lenei,” na ia fai atu ai. “Ou te le iloa se tasi na oo i lenei mea.” Sa fefe o ia.

Sa faalogologo lona tina ona fesili atu lea pe na te manatuaina Ardeth Kapp, le sa avea muamua ma peresitene aoao o Tamaitai Talavou. “E lei faamanuiaina lava o ia ma lona toalua i se fanau,” sa ia faamanatu atu ai ia Angela, “ae o ia lava o se faataitaiga o le faafoeina o le lē mafai ona fanau e aunoa ma le faatagaina e faamatalaina ai o ia.”

“Aua nei avea lenei mea ma maa faalavea vae mo oe,” sa faaauau ai le tala a lona tina. “Ua ou maua le lagona o le a manaomia ona e faavasegaina le a’oa’oga faavae o le tulaga faatina ma le aiga, aua a leai, o le a avea ma se mea o le a faaauau pea ona oulua fetaiai i aso o totoe o lou olaga.”

Ona ia fai mai lea, “Ou te le iloa pe aisea e tatau ai ona oulua oo ma John i lenei mea po o le a foi le umi o le a i ai, ae afai e mafai ona e onosai pea ma taumafai ia malamalama i mea e mfinagalo le Alii e te a’oa’o mai ai, o le a oo mai tali.”

Sa mafai ona lagona e Angela le alofa ma le lagolagosua a lona tina, ma sa ia teulotoina nei upu a o la fetaiai ma John ma nisi tofotofoga a o suesueina isi ala faamātua, e pei o le vaetamaina ma le faafeusua’i faasaienisi o suaola. Ina ua la vaavaai atu i le vaetamaina e ala i le Tautua a le AAG mo Aiga ma le polokalama a le atunuu o Niu Sila, sa la iloa ai o o la’ua avanoa e vaetamaina ai sa matuai maualalo lava.

A o feagai Angela ma le lē fiafia i lea taimi ma lea taimi, sa faalagolago o ia i le tatalo, anapogi, ma le tapuai i le malumalu mo se fesoasoani. Sa tele ina mafaufau o ia i le Faaola, ma le mautinoa o loo Ia fesoasoani ia te ia e onosaia ona tofotofoga. Ae sa ia moomoo foi ma’imau pe a na tau ina Ia aveesea ia tofotofoga. I nei taimi, na faamāfanafanaina ai o ia e John. Na i ai lona faatuatua o le a lelei mea uma.

Sa tosina atu pea mata o Angela i le folafolaga i le aiga o loo tautau i luga o le puipui. Sa fiafia lava o ia i ona aoaoga. Ae ina ua uma ona iloa lona le mafai ona fanau, sa tele ina ia lagonaina se tiga pe a ia faitauina lona faamautinoaga o le “poloaiga a le Atua mo Ana fanau ia faatupulaia ma faatumuina le lalolagi.” Sa malamalama o ia e le’i solia e i laua ma John ni poloaiga, talu ai e le mafai ona la maua faalenatura ni fanau. Ae a o amata o la’ua togafitiga mo lo la lē mafai ona fanau, sa mafaufau lava Angela pe ua lava mea o loo la faia.

I le taimi lea, na la siitia atu ai i Tauranga, o se aai tele i le Faga o Tele i Niu Sila, ma sa valaauina Angela e avea ma peresitene o Tamaitai Talavou a le siteki. Sa fefe o ia i le valaauga fou. Sa i ai o ia i le amataga o le tolusefulu ma ona tupu tausaga ma sa ia lagonaina le laitiiti tele e ta’u atu i isi taitai le mea e fai. I le taimi lava e tasi, sa popole foi o ia i le matua tele e le mafai ona fesootai atu i tamaitai talavou. Sa ia tatalo ia iloa le auala e taiala ai i latou.

E lei umi ae ia iloaina e mafai ona ia fesootai atu i teineiti i auala na te lei faamoemoeina. Sa laitiiti o ia nai lo o latou matua, ma o le toatele o tamaitai talavou sa vaavaai atu ia te ia ma talia lana fautuaga. E mafai foi ona ia faamalosiauina ma faauo ia i latou i se auala e le mafai e o latou tina. O le leai o sana lava fanau, sa ia iloa ai e mafai ona ia tuuina atu ia i latou le taimi faaopoopo ma fautuaga latou te manaomia mai se tagata matua faatuatuaina.

Sa maua foi e le au Fallentine le olioli i le lagolagoina o isi aiga i la latou uarota ma le siteki. Sa tele ina la faia papakiū, po o tifaga i fafo atu, ma afiafi faaleaiga. I le taimi o konafesi aoao, la te valaaulia ai tamaitai talavou e ‘ai vine suamalie a o lei o i le nofoaga autū o le siteki mo le faasalalauga aoao a Tamaitai Talavou. Talu ai sa faigata ona mamao ese mai aiga i le taimi o le Kerisimasi, sa la faia ai se patī i le Po o le Kerisimasi mo nisi o tagata malaga sa la iloaina mai Aferika i Saute ma le motu o Niue. O nei gaoioiga sa faatumulia ai lava lo la’ua fale i taimi uma i fanau, ma sa fiafia lava Angela ma John e faaalu se taimi faatasi ma i latou ma o latou matua.

I se tasi aso, a o pasia le folafolaga faavaa o le aiga i luga o lona puipui, sa vaaia ai e Angela ona upu amata: “O i matou, o le Au Peresitene Sili ma le Aufono a Aposetolo e Toasefululua o Le Ekalesia a Iesu Keriso o le Au Paia o Aso e Gata Ai, ua matou folafola atu ma le mamalu …”

“Pe ou te talitonu moni ea i lenei mea?” sa ia fesili ifo ai ia te ia lava. “Pe ou te talitonu moni ea o perofeta ma aposetolo nei o loo ta’u maia nei upu?” O ona aafiaga na suia ai le auala na ia faitau ai ma malamalama ai i le folafolaga i le aiga. Ae sa ia iloaina sa molimau faapitoa perofeta ma aposetolo ia Iesu Keriso, ma sa talitonu o ia i a latou upu.

Sa amata ona ia iloa e tele auala e avea ai ma tina, ma sa ia faatuatua o le a la maua ma Ioane le avanoa e avea ai ma mātua i le faavavau. Sa fesoasoani lenei malamalama ia te ia e malamalama ai i le taua o le faaipoipoga ma le aiga i le ata o le faaolataga.

Sa ia manatua le auala na musuia ai ma faagaeetia ai le enisinia ma le taitai o Sasae Tutotonu sa ia feiloai i ai i Uosigitone, DC. O upumoni na a’oa’oina mai ai sa mamana ma talafeagai i lona olaga, ma sa ia faatuatuaina.

I El Coca, Ekuatoa, sa vave ona faia ai e Marco Villavicencio se galuega o le tatalaina o se ofisa o fesootaiga i le aai, ae o le puleaina o lea ofisa o se luitau i aso taitasi. O ana tagata faigaluega sa fou i le galuega ma sa manaomia a’oa’oga faamasani a o lei mafai ona latou faafetaiaia lelei manaoga o tagata faatau. Ona sosoo ai lea ma le mataupu o le sailia o tagata e faaaogaina. Talu ai e fou le ofisa, o lea na faaalu ai e Marco ma lana vaega le tele o o latou taimi e feiloai ai i tagata ma faalauiloa atu la latou pisinisi. Ae peita’i, sa latou galulue malosi, ma sa faatupula’ia le ofisa.

E ui lava ina pisi Marco, ae sa ia faaavanoaina se taimi mo lona aiga ma le Ekalesia. O masina taitasi e mavae atu, e faateleina ai le toatele o tagata na o mai i sauniga faamanatuga i taeao o Aso Sa. Sa saunia e le Agaga o le Alii le toatele o tagata mo le talalelei toefuataiina a Keriso. Sa latou naunau e iloa e uiga i le Atua ma Lona alofa.

Ua tele taimi i le vaiaso e o mai ai faifeautalai i le aai e a’oa’o tagata ma valaaulia i latou i le lotu. Sa mafaufau Marco ma Claudia po o le a le umi e alu ai a o le’i avea la latou vaega ma se paranesi.

E fitu masina talu ona taunuu le au Villavicencios i El Coca, ae asiasi atu le peresitene o le misiona o Timothy Sloan i le aai. Talu ai ona sa taitaia e Marco le vaega a le Ekalesia i le lotoifale, sa talosagaina o ia e Peresitene Sloan e faailoa atu o ia i le Au Paia a o latou malaga taamilo i El Coca.

Mo le taeao atoa ma le aoauli, sa ave ai e Marco le peresitene o le misiona i le aai. Sa faapitoa lava le fiafia o Peresitene Sloan e feiloai i e umia le Perisitua Mekisateko, ma sa ia faatalanoaina nisi o i latou. A o malaga mai lea nofoaga i lea nofoaga, sa ia fesili atu foi ia Marco e uiga i lona aiga, galuega, ma le poto masani i le Ekalesia.

I le faaiuga o le aso, sa ta’u atu ai e Peresitene Sloan ia Marco e manao e talanoa. Sa la o atu i le fale lea sa faia ai e le Au Paia a latou fonotaga ma maua ai se potu gaogao. Ona ta’u atu lea e Peresitene Sloan sa ia tatalo e sue se peresitene o le paranesi i le aai. “Sa ou lagonaina o oe o lena tagata,” o lana tala lea. “E te taliaina lenei valaauga a le Alii?”

“Ioe,” o le tala lea a Marco.

O le aso na sosoo ai, 6 Setema, 2009, na faatulaga ai e Peresitene Sloan le Paranesi a Orellana ma vaetofia ai Marco e avea ma ona peresitene. I le vaiaso mulimuli ane, na auina atu ai e le ofisa o le eria o le Ekalesia i Quito ia nofoa, laupapa, kesi, ma isi mea mo le nofoaga o fonotaga a le paranesi.

Sa tele taitai fou o le paranesi, e aofia ai Claudia, o le sa avea ma peresitene o Tamaitai Talavou. O le toatele o taitai sa itiiti so latou poto masani i le Ekalesia, o lea na avea ai e Marco le a’oa’oina o se faamuamua sili. Sa manao o ia ia avea taitai o le paranesi ma faataitaiga o le alofa ma le auaunaga faaKeriso. Sa ia faaaogaina punaoa uma sa ia maua—tusi lesona ma vitio uma a le Ekalesia—e fesoasoani ai i taitai fou e a’oa’o o latou tiutetauave. Talu ai ona sa amata ona taatele telefoni feaveai i le aai, o lea na te valaau atu ai i tagata o le paranesi pe auina atu ni feau tusitusia i le aluga o le vaiaso e faatautaia ai pisinisi a paranesi, fuafua ai gaoioiga, ma faafetaiaia ai manaoga o ona uso a Au Paia.

O se tasi o mea na maua e le paranesi mai le Ekalesia o se komepiuta e mafai ona faaaoga ai le initoneti. Na fatuina e le Ekalesia se polokalama faakomepiuta e ta’ua o Auaunaga mo Tagata ma Taitai e fesoasoani ai i taitai ma failautusi i le lotoifale e faamaumau ma lipoti atu sefuluai, auai, ma isi faamatalaga i le sa’o ma le saogalemu. Sa masani Marco i komepiuta mai lona poto masani i le pisinisi faatekinolosi, ma sa vave ona ia a’oa’oina le auala e faaaoga ai le polokalama. Ae peita’i, e seāseā ona faaaogā komepiuta i El Coca, o lea na ia faaali atu ai fo’i i nisi o taitai fou le auala e faaaogā ai. O le mea e lelei ai, na taialaina i latou e le Agaga, ma o i latou o ni tagata a’oa’o naunautai o e na vave ona fetuunai i tekinolosi.

I fonotaga a le aufono o le paranesi, sa faasoa saoloto atu ai e Marco ma isi taitai o latou manatu i le auala e fesoasoani ai i tagata o loo latou tausia. Na malamalama le aufono e manaomia e tagata uma o le paranesi ona atiina ae se molimau ia Iesu Keriso. I fonotaga ma gaoioiga a le paranesi, sa talanoa soo ai Marco ma isi taitai e uiga ia Keriso, ma fatuina se siosiomaga e mafai ai e tagata asiasi ma tagata fou o le ekalesia ona lagonaina Lona alofa ma o mai ia te Ia.

E tasi le masina talu ona faatulagaina le paranesi, ae faasalalauina e le Ekalesia lana konafesi aoao faaleafatausaga i le leitio, televise, satelite, ma le initoneti. E ui lava na oo atu nei alaata i le tele o eria o le lalolagi, ae e lei maua e le paranesi i El Coca le televise satelite po o se fesootaiga malosi i le initoneti e faasalalau ai le konafesi. Ae peitai, e lei leva, ae auina atu e le ofisa o le Ekalesia i Quito i le paranesi se lipine i le gagana Sipaniolo o le konafesi i le DVD.

I le faamoemoe e toe faaaoga le aafiaga o le matamata tuusao i le konafesi, na filifili ai Marco ma isi taitai o paranesi e faaali le lipine i le aluga o se faaiuga o le vaiaso, ma vaevaeina i sauniga. Sa latou faatulagaina nofoa, televise, ma faaleotele leo i le falelotu ma auina atu ni valaaulia faapitoa i tagata taitoatasi o le ekalesia. O Claudia sa nafa ma le faafeiloa’ia o tagata pe a o latou taunuu.

O le aso o le sauniga muamua, na o mai ai le Au Paia i o latou ofulotu o le Aso Sa. O nisi sa masani i le konafesi aoao, ae o isi sa le iloa po o le a le mea o le a oo i ai. Sa faatumulia le potu e le Agaga a o faalogologo lelei tagata uma i failauga ma fiafia i musika a le Aufaipese a le Tapeneko.

O le toatele o tagata fou sa manatu o le Ekalesia e laitiiti ma e i le lotoifale. Ae ui o lea, a o latou matamata i le konafesi, sa latou iloa ai o i latou o se vaega o se faalapotopotoga i le lalolagi atoa. E pei foi o i latou, e faitau miliona isi Au Paia sa galulue faatasi e faalautele le galuega a le Alii.

I le amataga o le 2010, e silia ma le 170,000 tagata o le Ekalesia sa nonofo i motu o le Atu Keripiane. I le Ripapelika Tominika, o le lua vaetolu o nei Au Paia, e sefuluvalu siteki ma misiona e tolu. I le 1998, na faatuina ai e le Ekalesia se Nofoaga Autu mo le A’oa’oina o Faifeautalai i Santo Domingo, le laumua o le Ripapelika Tominika, e saunia ai faifeautalai o Keripiane mo le galuega. I le lua tausaga mulimuli ane, ia Setema 2000, na sau ai Peresitene Hinckley i le aai e faapaia le Malumalu o Santo Domingo, le maota muamua o le Alii i le itulagi.

Ina ua taunuu faifeautalai o le Au Paia o Aso e Gata Ai i le Ripapelika Tominika i le 1978, pe tusa ma le sefulu ma ona tupu tagata o le Ekalesia—na o le pau lea o le Au Paia i le atunuu—na feiloai ma i latou i le malaevaalele. O nisi o i latou na aofia ai Rodolfo ma Noemí Bodden. O le au Boddens ma nisi o le la fanau na auai i le Ekalesia i le tolu masina na muamua atu e ala i a laua uo o John ma Nancy Rappleye ma Eddie ma Mercedes Amparo. I tausaga na sosoo ai, sa auauna faamaoni ai Rodolfo ma Noemí i le Ekalesia.

Na salalau atu le talalelei toefuataiina i isi atunuu o Keripiane i ni auala faapena. I Jamaica, o se motu i sisifo o le Ripapelika Tominika, sa talai atu ai e faifeautalai o le Au Paia o Aso e Gata Ai le talalelei i le amataga o le vaitau o le 1850. Ae e lei faatuina le Ekalesia iina seia oo ina fiafia i ai tagata liliu mai Jamaica o Victor ma Verna Nugent i le vaitau o le 1970. I se tasi aso, na maua ai e Victor ma Verna se Tusi a Mamona mai se tagata Amerika sa latou faigaluega faatasi, o Paul Schmeil. Sa ia faailoa atu foi ia i latou le ata tifaga a le Ekalesia Sailiga a le Tagata mo le Fiafia, ma lana savali, faatasi ai ma le faataitaiga faaKeriso a Paulo, na musuia ai Victor.

I le aso 20 o Ianuari, 1974, na papatisoina ai le aiga o Nugent. I le fa tausaga mulimuli ane, ina ua uma ona tatalaina e le faaaliga a Peresitene Spencer W. Kimball faitotoa mo le au Nugents ma isi tagata e tupuga mai i Aferika uli ina ia maua faamanuiaga atoatoa o le perisitua, sa faamauina le aiga i le Malumalu o Sate Leki.

O le tausaga lava lena, 1978, na papatisoina ai e se isi tagata Amerika o le Au Paia o Aso e Gata Ai, o Greg Young, ana uo o John ma June Naime i Barbados. E silia laitiiti ma le tausaga mulimuli ane, na faatulagaina ai le uluai paranesi i Barbados faatasi ai ma John o le peresitene o le paranesi ma June o se peresitene o le Aualofa. Mulimuli ane, sa avea Barbados ma laumua o le Misiona a Initia i Sisifo, ma sa salalau atu le talalelei mai iina i Grenada, Guadeloupe, Saint Lucia, Martiniquee, Saint Vincent, Farani Kaiana, Sint Maarten, ma isi atunuu tuaoi.

I Haiti, i le taimi lea, na iloa ai e Alexandre Mourra mai Haiti na fanau mai Chile e uiga i le Ekalesia mai se tagata o lona aiga na mauaina se kopi o le Tusi a Mamona ma isi lomiga a le Ekalesia mai faifeautalai i Florida. Ina ua uma ona faitau i le molimau a le perofeta o Iosefa Samita, sa talosagaina e Alexandre sana lava Tusi a Mamona ma maua ai se molimau i lona moni. Talu ai e lei i ai le Ekalesia i Haiti, sa lele atu ai o ia i Florida, feiloai ma le peresitene o le misiona iina, ma papatisoina ai ia Iulai 1977. Ona toe foi atu lea o ia i lona aiga i Port-au-Prince ma a’oa’o atu isi i le talalelei. I le tasi le tausaga mulimuli ane, na asiasi atu ai le peresitene o le misiona i Haiti ma faatautaia le papatisoga o uo a Alesana e luasefulu-lua.

Sa faaauau pea ona tuputupu a’e le Ekalesia i Haiti i tausaga na sosoo ai, e ui lava i vevesi faaagafesootai ma faaupufai lea sa masani ona lofituina ai le atunuu. E oo atu i le iuga o le 2009, ua tusa ma le sefuluono afe le Au Paia ua salalau solo i siteki e lua ma itu e lua. Sa tofotofoina lo latou malosiaga i le aso 12 o Ianuari, 2010, ina ua taia Haiti i se mafuie faataumaoi, ma solofa ai fale ma fasiotia ai le silia ma le lua selau afe tagata, e aofia ai le fasefulu lua o le Au Paia o Aso e Gata Ai.

Ina ua lulū le mafui’e, sa feiloai Soline Saintelus ma lona epikopo i lo latou falelotu i Port-au-Prince. Sa faigaluega lona toalua o Olghen i se faletalimalo i le lotoifale. Sa la faanatinati atu i le fale i lo la fale mautotogi, lea sa vaavaaia ai e se tausitama le la fanau laiti e toatolu. Na avea le fale ma se faupu’ega o mea ua faaleagaina.

“Tama Faalelagi e,” sa tatalo ai Olghen, “afai e te finagalo ai, afai tau lava o se toatasi o la’u fanau e ola, faamolemole, faamolemole fesoasoani mai ia i ma’ua.”

Mo le sefulu itula, sa ia eliina ai le faatafunaga ma tuaoi ma tagata laveai, ma aio’i atu i le Atua e fesoasoani ia i latou e sue tamaiti. I se tasi taimi, sa faalogo ai Olghen i le tamaitiiti matua, o Gancci e lima tausaga, o usuina le pese “O A’u o se Atalii o le Atua,” o lana pese e sili ona fiafia i ai. O lona leo na taitai atu ai le aufaigaluega e laveai o ia, ona tei, ma le latou tausitama.

I nai vaiaso na sosoo ai, sa fesoasoani ai le Ekalesia i taitai o le lotoifale ma faalapotopotoga o fesoasoaniga alofa i le sauniaina o fomai, faleie, meaai, nofoa faataavalevale, sapalai faafomai, ma isi mea e manaomia. Na tatalaina ai foi falelotu e saunia ai se malutaga ma se sulufaiga mo le toatele o tagata na tuua ua leai ni fale ona o le faalavelave. Mulimuli ane, na fesoasoani le Ekalesia i tagata e saili ni galuega ma amata ni pisinisi fou.

Ina ua uma ona laveaiina, sa aveina atu Gancci Saintelus i Florida mo le togafitiga o manuaga ogaoga. O iina, na o mai ai tagata o le Ekalesia i le lotoifale e fesoasoani i le aiga o Saintelus, ma aumai ia i latou meataalo, meaai, napekini, ma isi sapalai. O lo latou agalelei na maligi ai loimata o Olghen.

“Ou te matua faafetai lava i la’u ekalesia,” o lana tala lea.

Ia Setema 2010, na toeitiiti lava maea ai ona faataatia e tagata o Luputa, Ripapelika Temokarasi o Congo, paipa mo le paipa o le vai mamā e lagolagoina e le Ekalesia. I le talanoa ai ma se tusitala, sa faamamafa mai ai e le peresitene o le itu o Willy Binene le taua o le paipa.

“E mafai ona ola le tagata e aunoa ma le eletise,” na ia saunoa ai. “Ae o le leai o se vai mamā o se avega e toetoe lava a faigata tele ona tauaveina.”

Pe na iloa e le failipoti pe leai, ae sa saunoa mai Uili mai se olaga o aafiaga. I le avea ai ma se tagata a’oga fai eletise, e le’i naunau o ia e nofo i Luputa, o se aai e leai se eletise. Na suia ana fuafuaga, ma sa lelei lava lona taulimaina—na lauolaola lava—e aunoa ma se eletise. Ae o ia ma lona aiga, ma aiga uma i le eria, na mafatia i aafiaga tiga o faama’i e afua mai i le vai. Ina ia puipuia i latou lava i le lotu, sa oo lava ina latou ositaulaga e faatau mai ni fagu vai mamā mo le faamanatuga.

O lea la, faatasi ai ma nai galuega faaopoopo, ua toeitiiti lava suia le olaga i Luputa. Mai lava i le amataga o le galuega faatino, o pitonuu uma i totonu ma autafa o le aai sa tofia i aso e galulue ai i le faiga o paipa. I na aso, na vave taunuu mai ai loli mai le ADIR, le faalapotopotoga o loo pulea le galuega faatino, i le pitonuu e piki volenitia ma ave i le nofoaga o galuega.

I le avea ai ma peresitene o le itu, sa manao Uili e avea ma se taitai e faata’ita’i i ai. I aso na tofia ai lona pitonuu e faigaluega, sa ia faataatia ese lana galuega faatausima’i ae amata ona eli. I le va o Luputa ma le punavai o le vai mamā sa i ai le tele o maila o mauga ma vanu. Talu ai o le paipa sa faaaoga ai le kalave, sa tatau ai i tagata volenitia ona eli le alavai ma tatanu paipa ina ia mautinoa ai o loo tafe lelei le vai.

Sa eliina e Uili ma volenitia mea uma i lima. O le alavai e tatau ona sefuluvalu inisi le lautele ma tolu futu le loloto. I nisi o nofoaga, o le oneone, ma sa vave le alu o le galuega. I isi nofoaga, o se pā’ō o a’a laau ma papa, ma sa o se galuega faigata tele. Sa na ona tatalo lava o tagata volenitia ina ia lē avea afisosolo ma faamoega o iniseti taufeū ma mea e tuai ai le agai i luma. I se aso lelei, e mafai ona latou eliina le toeitiiti lima selau futu o le alavai.

Sa galulue le Au Paia i le Itu o Luputa i ni sifi faapitoa e faaopoopo atu i o latou tofiga masani a pitonuu. I na aso, sa auai ai alii o le Ekalesia i volenitia masani i le eliina o le alavai a o saunia e tamaitai mai le Aualofa ni meaai mo tagata faigaluega.

O le tautinoga a le Au Paia i le galuega faatino na fesoasoani i isi e a’oa’o atili ai e uiga i lo latou faatuatua. Sa vaai tagata i le eria i le Ekalesia o se faalapotopotoga sa vaavaai atu e le gata mo ona lava tagata ae faapea foi mo le nuu lautele.

Ina ua uma le fausiaina o le paipa ia Novema 2010, e toatele tagata na o mai i Luputa e molimauina le taunuu mai o le vai. O vaieli tetele, sa faamalumalu ifo i luga o tulaga maualuluga, sa fausia i le aai e teu ai le vai mai paipa. Ae na taumānatunatu nisi tagata pe mafai moni lava e le paipa ona aumaia le vai e faatutumu ai tane. Sa i ai ia Uili lava ia ona masalosaloga.

Ona tatala lea o faitoto’a, ma sa faalogoina ai e tagata uma le gogolo mai o le vai ua tafe mai i faatanoavai. Na sosolo atu le olioli tele i le motu o tagata. O le tele o nofoaga laiti o vai simā, e tofu ma le tele o gutupaipa, ua mafai nei ona tufaina atu vai mamā i Luputa atoa.

Ina ia faailogaina lenei galuega, sa faia ai e le aai se fiafia e sami ai. O nei faafiafiaga na aumaia ai le sefululima afe o tagata mai Luputa ma nuu tuaoi. O nisi o malo faaaloalogia o taitai o le malo ma ituaiga, taitai ADIR, ma se tasi o le au peresitene o le Eria a le Ekalesia i Aferika Sautesasae. I luga o se tasi o tane vai sa tautau ai se fu’a tele ma ni mataitusi lanumoana sesega:

FAAFETAI I LE EKALESIA

FAAFETAI I LE ADIR

MO LE VAI FEAVEA’I

Ina ua taunuu mai le auvalaaulia ma alaala i lalo o fale na fausia faapitoa, sa usuina e se aufaipese talavou a le Au Paia o Aso e Gata Ai ni viiga.

O le taimi lava na faatulaga ai tagata uma, ma fifilemu le motu o tagata, sa sii i luga e Uili se meafaaleoteleleo i lona gutu ma saunoa atu i le aofia o se sui o le Ekalesia i le lotoifale. “E pei lava ona faia e Iesu le tele o vavega,” na ia saunoa ai, “o le asō o se vavega le oo mai o le vai i Luputa.” Sa ia ta’u atu i le motu o tagata sa lagolagoina e le Ekalesia le paipa mo le nuu atoa, ma sa ia fautuaina tagata uma ina ia faaaogaina lelei.

Ma i soo se tasi lava na tau mafaufau pe aisea na fiafia ai le Ekalesia i se nofoaga e pei o Luputa, sa ia tuuina atu se tali faigofie.

“O i tatou uma o fanau a lo tatou Tama Faalelagi,” na ia saunoa ai. “E tatau ona tatou faia mea lelei i tagata uma.”