Ngaahi Lea ʻe Fā, Ngaahi Moʻui ʻe Fā Ne Liliu
ʻI ʻEpeleli mo ʻOkatopa ʻo e taʻu kotoa pē, ʻoku fakafanongo ʻa e Kāingalotu ʻe laui miliona ʻo e Siasí ki he kau tamaioʻeiki ʻa e ʻEikí. ʻOku vahevahe atu heni ʻe ha kau mēmipa ʻe toko fā ʻo e Siasí ʻa e founga hono takiekina ʻenau moʻuí ʻe he konifelenisi lahí ʻi he ngaahi taʻu ko ʻení.
ʻOku Hoko Mai e Ngaahi Meʻa Leleí
Hili ha taimi nounou mei hono maʻu ʻe hoku husepānití ʻa hono mataʻitohi MA., naʻá ne fakakaukau ke toe foki ʻo ako mataʻitohi PhD. Naʻe lōmekina kimaua ʻe he fakakaukaú ni he naʻe matuʻaki faingataʻa e feinga ke maʻu hono mataʻitohi MA. Ne ʻi ai haʻama kiʻi fānau iiki ʻe toko ua pea naʻá ma fakaʻamua ke maʻu ha ngāue lelei pea pehē ki ha ʻapi foki.
ʻI he konifelenisi lahi ʻo ʻOkatopa ʻo e taʻu ko iá, ne vahevahe ai ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi meʻa ne hoko kiate ia fekauʻaki mo ʻene hiki mo hono fāmilí ki Konekitikati ke hoko atu ʻene akó. Ne mau hiki foki mo kimautolu ki Konekitikati ke hoko atu e akó. Naʻá ne fakamatalaʻi leva ʻa e founga ne nau faʻo kotoa ʻa e koloa ne nau maʻú ʻi heʻenau kiʻi kaá—ne mau fai pehē foki mo kimautolu. Naʻá ne fakamatala ʻo pehē ko e taimi ko ia ne kamata ai ʻenau fonongá, ne fuʻu vela ʻa e mīsini ʻo e kaá pea mate ʻo ʻikai ke tuʻo taha pē ka naʻe tuʻo ua! Ne mate tuʻo ua foki mo ʻemau meʻalelé.
Ne faifai péa ne fakamatalaʻi ha meʻa ne toki hoko ʻi haʻane fakaʻuli atu ʻi ha kā ‘oku lelei ‘aupito e misiní ki he feituʻu ko ia ne mate ai ʻenau kaá ʻi he taʻu ʻe 30 kuo hilí. ʻI heʻene fakakaukaú naʻá ne sio loto ai ki heʻene hoko ko ha tamai kei talavou peá ne pehē: “Tamasiʻi, ʻoua naʻá ke lotosiʻi. ʻOua naʻá ke loto foʻi. … ʻOku ʻi ai ha tokoni mo ha fiefia ʻoku hanganaki mei muʻa—pea ʻoku lahi fau ia. … ʻOua naʻá ke loto foʻi. ʻE iku lelei ia ʻi he ngataʻangá. Falala ki he ʻOtuá pea tui ki he ngaahi meʻa lelei ʻe hoko maí.”1 Ne tokoniʻi au ʻe he meʻa ne hoko kia ʻEletā Hōlaní ke u ongoʻi ʻoku mahino mo ʻofaʻi au. Ne ʻomi ʻe heʻene sīpingá ha loto toʻa ke u fekumi ki ha fakamoʻoni fakalaumālie ke ʻilo ko e finangalo ʻo e ʻEikí ki homau fāmilí ke hoko atu ʻa e ako ʻa hoku husepānití. Ne faifai pea ʻosi e ako ʻa hoku husepānití, hili ia ha taʻu ʻe nima pea tānaki mai mo ha fānau ʻe toko ua. Ko e moʻoni ne faingataʻa ʻa e akó ka naʻa mau fiefia. Ne mau muimui ki he fingangalo ʻo e ʻEikí pea naʻá Ne tapuekina fakatuʻasino, fakalaumālie mo fakapaʻanga kimautolu.
Talu mei he konifelenisi ko iá, mo ʻeku faʻa fakakaukau ki he lea ko ia ʻa ʻEletā Hōlaní. Kuó u ako ko e taimi ʻoku ou feinga ke falala ai ki he ʻOtuá ʻo fakafou ʻi he talangofua ki he akonaki ʻa ʻEne kau palōfitá mo e kau ʻaposetoló, ko e moʻoni ʻe hoko mai ha ngaahi meʻa lelei.
Melinda McLaughlin, Melileni, ʻAmelika
Ne u Ako ke Houngaʻia ʻi heʻeku Kui Fefiné
ʻI heʻeku kei siʻí, neu fiefia ʻi he faitohi ki heʻeku kui fefiné. Naʻá ne nofo mamaʻo pea ko ia ai ne meimei tuʻo taha pē he taʻu ʻa ʻeku sio kiate iá. Ka ʻi heʻeku aʻu hake ʻo finemuí, ne kamata ke u femoʻuekina ʻo ʻikai te u toe faʻa faitohi pea kamata ke mōlia atu ʻa ʻema feohí. ʻI he faʻa haʻu ʻeku Kui fefiné ʻo ʻeva taimi nounou mai ʻi ha ngaahi ʻaho siʻi ki homau ʻapí, ne u faʻa ʻeke ange ha fehuʻi pe fai ha fakamatala nounou kiate ia, ka naʻe ʻikai ke ma fai ha ngaahi pōtalanoa ʻoku mahuʻingamālie pe ongo ki he lotó. ʻI he hoko hoku taʻu 16 ne ʻikai ke u fuʻu ʻiloʻi lelei ia, pea ne ʻikai te u ʻilo pe ʻe anga fēfē haʻaku fakatalanoa ki ai.
ʻI he ʻaho fakaʻosi ʻo e taha ʻo ʻene ngaahi ʻaʻahi maí, naʻá ku nofo toko taha ʻi peito ʻo teuteuʻi e houa kai efiafí pea naʻá ne hū mai ʻo tangutu. Ne u fakalea atu ki ai ka ne hili pē iá ne hangē kuo ʻikai ke u ʻilo pe ko e hā ha lea teu toe fai ange. Ne u ʻilo naʻá ne fie maʻu ke talanoa mai kiate au pea mahalo naʻe lahi ha taimi naʻá ne feinga ai ke kaihaʻasi ha faingamālie ke ma pōtalanoa, ka ʻe anga fēfē haʻaku talanoa mo ha fefine taʻu 75 ne u fakakaukau atu ʻoku ʻikai ha meʻa te ma faitatau ai?
Naʻá ku fakamatalaʻi ange ʻa e meʻa naʻá ku lolotonga kukí ka naʻe ʻikai fuoloa e talanoa ki he tefito ko iá. Ne faifai peá u fehuʻi ange ki heʻeku Kui fefiné pe naʻe anga fēfē ʻa ʻene moʻuí ʻi he taimi ne taʻu tatau ai mo aú. Naʻá ne fai mai ha ngaahi talanoa fekauʻaki mo e ngāué mo e ngaahi ʻekitivitī fakasōsialé, hili iá naʻá ne fakamatala ki heʻene fetaulaki mo ʻeku kui tangatá peá na feʻofaʻakí. Ne u ʻiloʻi ne ʻikai toe kehe ʻa ʻene moʻuí mo ʻene ngaahi fakaʻamu ʻi heʻene kei finemuí mo ia ne u maʻú.
Hili mei ai ha ngaahi māhina siʻi, ne lea ʻa Palesiteni Poiti K. Peeka, Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he konifelenisi lahí ʻo fekauʻaki mo e ngaahi kuí. ʻI heʻene lea, “The Golden Years [Ko e Ngaahi Taʻu Koulá],” naʻá ne lea fekauʻaki mo e fakapotopoto mo e tataki ʻoku lava ke ʻomi ʻe he kāingalotu matuʻotuʻa ʻo e Siasí. Ne hanga ʻe heʻene kaveingá ʻo ʻai ke u fakakaukau ki hoku vā fetuʻutaki mo ʻeku kui fefiné peá u ʻilo ne u tō ʻi ha feohi fakakaumeʻa mahuʻinga moʻoni.
Ne u fakakaukau ai ke u toe tohi ki heʻeku kui fefiné. Ne ʻikai ke u fuʻu fakapapauʻi pe ko e hā ʻa e meʻa ke u tohí ko ia ne u tohi ʻo fekauʻaki mo e ngāué, kaungāmeʻá, fāmilí mo e ngāue ʻoku ou faí. Naʻá ne tali kotoa mai ʻa ʻeku ngaahi tohí peá ne fakamatala mai fekauʻaki mo ha kāinga kehe, ʻene ngoué pea mo e ngaahi ngāue fakaʻaho ʻoku ne faí. ʻI he taimi ne ma toe feʻiloaki aí, ne faingofua ʻaupito ʻa e talanoa mo iá.
ʻOku ou fakamālō koeʻuhi ko ha lea ʻi he konifelenisí ne haʻu ʻi ha taimi ne u mateuteu ai mo loto ke u toe feohi mo ʻeku kui fefiné. Ne u ʻilo ʻi he ngaahi lea ʻa Palesiteni Pēká ʻa e ʻikai te u fakatokangaʻi ʻa e “ngaahi maʻuʻanga tokoni mahuʻinga [ia] ʻo e potó mo e taukeí mo e fakahinohino ʻa e laumālié”2 ʻa ia ne maʻu heʻeku kui fefiné. Ko ʻeni kuó u houngaʻia ʻi he fefine fakaʻofoʻofá ni pea kuo faitāpuekina au ʻe heʻene tā sīpingá mo e feohi fakakaumeʻá.
Laura A. Austin, ʻIutā, ʻAmelika
Naʻá ku ʻIloʻi Pē ʻIate Au
ʻOku ou fie fakahā ko e taimi ko ia ne u ʻalu atu ai ʻo ngāue fakafaifekaú, ne siʻi ʻa ʻeku ʻilo fekauʻaki mo e palani ʻo e fakamoʻuí pea mo e Tohi ʻa Molomoná. Ne u ʻilo ne ʻikai loloto ʻa ʻeku fakamoʻoní ʻo hangē ko e fakaʻamú pea ko e olá ko ʻeku ongoʻi taʻefeʻunga ʻi heʻeku hoko ko e faifekaú.
Ne u hangē pē ko e kāingalotu Falanisē ʻo e Siasí he taimi ko iá, naʻe teʻeki ke u ʻalu au ki ha fakamafola ʻo e konifelenisi lahí. Ne mau faʻa toki ʻalu pē ki hono toe fakamafola maí, ʻo mau fanongo ki he konifelenisí ʻi he lea faka-Falaniseé ʻi hono fakahoko mai ʻe ha tokotaha fakatonulea. Ko ʻeni ne u hoko ko ha faifekau ʻi Uelesi ʻo lea faka-Pilitānia pea te u fanongo tonu ki he leʻo ʻo e palōfitá, ko Palesiteni ʻEselā Tafu Penisoni (1899–1994).
ʻI he kamata ko ia ʻa e fakatahá, ne hiva ʻa e haʻofanga fakalotofonuá fakataha mo e kāingalotu ne ʻi he Tāpanekalé ʻi Sōleki Sití. Ne u hiva foki peá u ʻohovale ʻi he fuʻu fiefia mo e lata ne u ongoʻí. Ne fakamoʻoniʻi ʻe he ngaahi ongo ko ʻení ko e mēmipa au ʻo e Siasi ʻo Sīsū Kalaisí.
Lolotonga ko ia ʻeku tangutú, ne haʻu ha fakakaukau kiate au: “ ʻE fēfē kapau te u kole ki he ʻEikí ke Ne fakapapauʻi mai kiate au ko Palesiteni Penisoní ko ʻEne palōfita?”
Naʻá ku ʻiloʻi te u lava ʻo “kole ki he ʻOtuá” (Molonai 10:4), ka naʻá ku manavasiʻi naʻa faifai peá u fakatupu houhau kiate Ia ʻi heʻeku ngaahi fehuʻí. Hili haʻaku fakakaukau ʻi ha ngaahi miniti ki ai, ne u pehē ke u ʻahiʻahi pē muʻa. Ne u punou ʻo kole ki he ʻEikí ke Ne fakamoʻoniʻi mai kiate au ko e tangata ko ia ʻoku ʻamanaki ke leá ko ʻEne palōfita, tangata kikite mo maʻu fakahā. Ne ʻikai fuoloa ne haʻu ha ongo nonga mo fiefia moʻoni ki hoku lotó. Ne u hiki hake hoku ʻulú, ʻāʻā hake hoku matá peá u fakafanongo ki he fakamoʻoni ʻa Palesiteni Penisoni ʻo fekauʻaki mo e Tohi ʻa Molomoná.
ʻI he momeniti ko iá, ne u ʻiloʻi ʻiate au pē ʻoku tataki ʻe he ʻEikí ʻa e Siasí ʻo fakafou ʻi ha palōfita kuo fili. Ko hono ola ʻo ʻeku fakamoʻoni ko iá ko ʻeku mavahe mei he konifelenisí mo ha ngaahi taumuʻa foʻou peá u ʻilo ʻe makatuʻunga pē meiate au ʻa ʻeku aʻusia kinautolú. Ne u liliu ʻa e meʻa ne u tokanga ki ai ʻi heʻeku ngāue fakafaifekaú peá u hanganaki fiefia atu ki haʻaku ʻalu ki he ngaahi konifelenisi lahi ʻi he kahaʻú. Ne u nofo ʻo ʻamanaki fiefia atu ki hono ʻomi ʻo e ngaahi makasini ʻa e Siasí kae lava ke u lau ʻa e ngaahi lea toputapu ʻa e kau tamaioʻeiki ʻa e ʻEikí.
Thierry Hotz, Falanisē
Talaange ʻOkú ke ʻOfa ʻIate Kinautolú
ʻI he konifelenisi lahi ʻo ʻOkatopa 2007, ne lea ai ʻa ʻEletā Kalauta R. M. Kositā ʻo e Kau Palesitenisī ʻo e Kau Fitungofulú fekauʻaki mo e ʻoua naʻa fakatoloi ki ʻapongipongi ʻa e meʻa te tau lava ʻo fai ʻi he ʻaho ní, kae tautautefito ki heʻene fekauʻaki mo hotau ngaahi fāmilí.3 ʻI he fakaʻosi ʻene leá, naʻá ne vahevahe ha ngaahi kupu mei he maau ʻa Noma Koaneti Māleki [Norma Cornett Marek]. Ne ongo moʻoni ki hoku lotó ʻa e pōpoaki mo e ngaahi lea ʻo e foʻi maau ko iá pea naʻá ne fakalotolahiʻi au ke u kamata ke fakahaaʻi maʻu pē ʻa ʻeku ʻofá ki heʻeku ongo mātuʻá, tuofāfiné mo hoku kaungāmeʻá.
Ko e moʻoni ne u ʻofa pē au ʻi hoku fāmilí mo hoku kaungāmeʻá kimuʻa peá u fanongo ki he lea ko ia ʻo e konifelenisí, ka naʻe ʻikai ke u anga ʻaki hono fakahaaʻi ange ʻi he ʻaho kotoa pē ʻoku ou ʻofa ʻiate kinautolu. Mahalo ne nau fie maʻu ke nau toutou fanongo maʻu pē ki he ngaahi lea mahuʻinga ko iá meiate au. Ne ʻikai te u fakapapauʻi pe te nau tali fēfē ia, ka ʻi heʻeku maʻu ha tali ʻoku fakafiemālie mo leleí, ne u pehē ke hokohoko atu ʻeku fai iá. ʻI he ngaahi māhina ne hokó, ne u vakai ki hono fakamālohia ʻa hoku vā fetuʻutakí koeʻuhí ko ʻeku tokanga ki he ngaahi lea ko ia ʻa ʻEletā Kositaá.
ʻOku ou hoko he taimí ni ko ha faifekau taimi kakato ʻoku nofo mamaʻo ʻi ha maile ʻe lau afe mei hoku ʻapi ʻi Kositā Liká. ʻOku ou taʻelata, ka ʻoku sai pē ia. ʻOku ou ʻilo ʻoku nau ʻofa ʻiate au pea ʻoku ou ʻilo foki ʻoku nau ʻilo ʻoku ou ʻofa ʻiate kinautolu. ʻOku ou ongoʻi ha nonga he naʻá ku (pea ʻoku ou kei) fakaʻaongaʻi maʻu pē ʻa e ngaahi faingamālie ke fakahaaʻi ʻa ʻeku ʻofá.
ʻOku ou fakamālō ʻoku tau maʻu e faingamālie ke fanongo maʻu pē ki he kau taki kuo fili ʻe he ʻOtuá. ʻOku ou ʻilo ko e taimi ʻoku tau muimui ai kiate kinautolú, ʻe faitāpuekina ʻa ʻetau moʻuí mo e moʻui ʻa kinautolu ʻoku tau ʻofa aí.
ʻEletā Hugo Lino Rivera Mena, Misiona ʻAitahō Poisí
Ne tatau ʻa e meʻa ne hoko ki homau fāmilí mo ia ne hoko kia ʻEletā Hōlaní. Ne tokoni ʻa ʻene fakalotolahi ko ia ke “tui ki he ngaahi meʻa lelei ʻe hoko maí” ke u ongoʻi ʻoku mahino mo ʻofaʻi au.
Tā fakatātaaʻi ʻe Mike Malm
Ne u kole ki he ʻEikí ke Ne fakamoʻoniʻi mai kiate au ko e tangata ko ia ʻoku ʻamanaki ke leá ko ʻEne palōfita.
Konga naʻe toʻo mei he Ko Kalaisi mo e Talavou Koloaʻiá, tā ʻe Heinrich Hofmann, ʻi he angalelei ʻa e C. Harrison Conroy Co.