Haʻu ʻo Fanongo ki he Leʻo ʻo e Palōfitá
Fakahaaʻi ʻa e ʻOfa ʻi Ho Lotó
Mei he “Ko e Matapā ʻo e ʻOfá,” Liahona, ʻOkatopa 1996, 4, 5, 6.
ʻOku manako ʻa Palesiteni Monisoni ʻi he lau māú. ʻOkú ne faʻa lau maʻu pē ha ngaahi maau ʻi heʻene ngaahi leá, ʻo kau ai ʻa e maau ko ʻeni ʻi laló, “Ko hai ʻoku ʻOfa Lelei Tahá?” Ne paaki ia ʻi ha tohi lēsoni fakaako motuʻa ne tokoni ki hono akoʻi ʻa e fānaú ki he laukongá.
ʻOku fakatupunga ʻe he ʻofá ha liliu. ʻOku ʻomiʻe he ʻofá ha fakamoʻui ki he lotó. Ka ʻoku ʻikai tupu ʻa e ʻofá ʻo hangē ko e vaó pe tō ʻo hangē ha ʻuhá.
Naʻe akonaki ʻa Sīsū ʻo pehē, “ ʻOku ou tuku ʻa e fekau foʻou kiate kimoutolu, koeʻuhí ke mou feʻofaʻaki kiate kimoutolu; pea hangē ko ʻeku ʻofa kiate kimoutolú, ke mou feʻofaʻaki foki kiate kimoutolu” (Sione 13:34).
ʻE lava ʻe he fānau īkí o ako ʻa e lēsoni ʻo e ʻofá. ʻOku nau tali fiefia ha foʻi maau ʻoku manakoa:
Ne pehē ʻe he kiʻi tamasiʻi ko Sioné, “ ʻE faʻē ʻoku ou ʻofa ʻiate koe;”
Pea ngalo leva ʻene ngāué, ka ne tui hono tataá,
Peá ne ʻalu atu ki he heke ʻi he ngoué,
ʻO tuku ke fetuku mai ʻe heʻene faʻeé ʻa e fefié.
Ne pehē ʻe Neli kouʻahe pahapahá, “ ʻE faʻē ʻoku ou ʻofa ʻiate koe”;
“ ʻOku ou ʻofa ʻiate koe ʻo lahi ange he meʻa ʻe ala fakamatalaʻi ʻe he ʻeleló;”
Peá ne fakamatalili mo fakafulofula he vaeua ʻo e ʻahó kakato,
Kae ʻoua kuo fiefia ʻene faʻeé ʻi heʻene ʻalu ʻo vaʻingá.
Ne pehē ʻe he kiʻi taʻahine ko Fané, “ ʻE faʻē ʻoku ou ʻofa ʻiate koe;”
“Ko e ʻaho ní te u tokoni atu he lahi taha te u lavá;
ʻOku ou fiefia ʻi he ʻikai fai maʻu pē ʻa e akó!”
Peá ne sēlue ʻa e pēpeé kaeʻoua kuó ne mohe.
Peá ne ʻeteʻete atu ʻo kumi ʻa e taufalé,
Pea tafi ʻa e falikí mo e efu ʻo e lokí;
Ne femoʻuekina mo fiefia he ʻahó kotoa,
ʻO Faʻa tokoni pea fiefia ʻo hangē ko ia ʻoku totonu ke hoko ki he fānaú.
Pea nau toe pehē—“ ʻE faʻē ʻoku ou ʻofa ʻiate koe.”
Ko ha fānau ʻe toko tolu ne ʻamanaki ke nau tākoto ke mohe;
ʻOkú ke pehē ne lava nai ʻe he faʻeé ʻo ʻiloʻi
Pe ko e fē ʻiate kinautolu ne ʻofa taha ʻiate iá?1
ʻOku maʻu ʻa e holi ko ia ke hiki hake, mo e loto vekeveke ke fie tokoní mo e loto houngaʻia ke foakí mei ha loto ʻoku fonu ʻi he ʻofa. Ko e ʻofa moʻoní ko hano fakaʻata mai ia ʻa e ʻofa ʻa Kalaisí.
Ngaahi tāvalivali ʻa Scott Jarrard