Ko Hono Fakafiemālieʻi ʻo Lusí
“ Ko e Fakafiemālié ʻokú ne fakafonu ha taha ʻaki ʻa e ʻamanaki leleí mo e ʻofa haohaoá” (Molonai 8:26).
Ne makanumi pē ʻa Lusi ʻi ha tuliki ʻi hono lokí ʻi he haʻu ko ia ʻene faʻeé ke fakalea mai ki ai he pō ko iá.
Ne fehuʻi ange heʻene faʻeé, “Lusi, ko e hā hoʻo meʻa ʻoku fai hená?”
Ne pehē ange ʻe Lusi, “ ʻOku ou fie nofo toko taha pē ʻo fakakaukau,” mo ne pūlou hono sipi lanu engeenga mo matalaʻi ʻakau ʻokú ne saiʻia taha aí ʻa ia ko e kafu ʻa ʻene faʻeé ʻi heʻene kei siʻí.
Ne fehuʻi ange ʻe he Fineʻeikí, “ ʻOkú ke fie talanoa ki ai?” peá ne tangutu hifo ʻi he sea sēlué.
Ne kamokamo pē ʻa Lusi mo kaka hake ʻo tangutu he funga ʻo e Fineʻeikí. Naʻá ne lea leʻo siʻi mo holo pē hono matá ʻaki hono sipí mo pehē, “Naʻá ku fakakaukau ki heʻeku Kui fefine ko ʻIlaisá.”
Ne sēlue māmālie pē ʻa e Fineʻeikí mo ne pehē ange, “ ʻOi. ʻOkú ke ʻiloʻi, ʻoku ʻi hēvani ʻa e Kuifefine ko ʻIlaisá. ʻOku ou tui ʻokú ne fiefia ʻaupito ai.”
Ne mihimihi pē ʻa Lusi mo pehē, “ ʻOku ou ʻiloʻi, ka ʻoku ou ʻofa ki ai pea ʻoku ʻikai ke u fiefia ʻi heʻene ʻalú.”
Ne amoamohi pē ʻe he Fineʻeikí ʻa e ʻulu ʻo Lusí peá ne pehē ange, “ ʻOku ou ʻofa mo au ki ai. Fēfē kapau te ta lotu fekauʻaki mo e meʻá ni?”
Ne tali ia ʻe Lusi pea naʻe tokoniʻi ia ʻe heʻene Fineʻeikí ke lotu, “Sai ia. ʻE Tamai Hēvani, ʻoku ou ongoʻi loto mamahi he mate ʻa e Kui fefine ko ʻIlaisá, ʻoku ou ʻofa ki ai. Ka ʻoku ou ʻiloʻi ʻoku ʻi hēvani pea ʻokú ne fiefia, ʻoku ou ʻiloʻi te u toe sio ki ai ʻi heʻene toetuʻú. Kātaki ʻo tokoni mai ke ʻoua te u loto mamahi. ʻI he huafa ʻo Sīsū Kalaisí, ʻēmeni.”
Hili ʻene “ ʻēmení,” ne tangutu fakalongolongo ʻa Lusi ʻi ha kiʻi taimi siʻi. Peá ne maʻu ha fakakaukau. “ ʻOku ou ʻilo ʻa e meʻa ke faí! Ne talamai ʻe ʻAnitī ʻEma, ʻoku tokoni hono hivaʻi e ngaahi hiva Palaimelí ke ne ongoʻi fiefia. Mahalo ʻoku totonu ke ta fai ia!”
Ne pehē ange ʻe he Fineʻeikí, “Mahalo ko ha fakakaukau lelei ia.”
Ne hivaʻi fakataha leva ʻe Lusi mo e Fineʻeikí ʻa e “Fānau Au ʻa e ʻOtua,” “Fie Siofia Ha Temipale,” mo e “Feinga Ke Hangē ko Sīsuú.” ʻI he ʻosi ʻena hivá ne pehē ange ʻa Lusi, “ ʻE faʻē, ʻoku ou ongoʻi fiefia he taimí ni.”
Ne pehē ange ʻa e Fineʻeikí, “Ne tokoni atu ʻa e Laumālie Māʻoniʻoní ke ke ʻiloʻi ʻa e meʻa ke fai ke ke ongoʻi lelei aí.”
Ne malimali ʻa Lusi peá ne pehē ange, “ ʻOku ou ʻiloʻi. Ne tali mai ʻe he Tamai Hēvaní ʻeku lotú.” ʻI he taimi ní, ʻi heʻene fakakaukau pē ki heʻene Kuifefine ko ʻIlaisá, ʻokú ne ongoʻi māfana ʻo hangē ʻoku fakamāfanaʻi ʻe he sipi ʻoku saiʻia taha aí ʻa hono lotó. Ne fakafiemālieʻi ia.
Ne fanafana ange ʻa Lusi ki heʻene Fineʻeikí kimuʻa peá ne mohé, “ ʻE faʻē ʻoku ou ʻofa ʻiate koe. Pea mo e Kuifefine ko ʻIlaisá foki.”
Tā fakatātaaʻi ʻe Sam Lawlor; laʻitā ʻo Sisitā Matisumoli fai ʻe he Busath Photography