Ngaahi Pōpoaki Nounou
ʻOku ou ʻIlo ʻOku Moʻoni
Talu mei heʻeku kei siʻí mo ʻeku fanongo ki hono fai ʻe he kāingalotu ʻo e Siasí ʻenau fakamoʻoni ʻo kau ki he Tohi ʻa Molomoná. Ne u fakakaukau ki he kupuʻi lea ko ia, “ ʻOku ou ʻilo ʻoku moʻoní” ko ha ngaahi lea angamaheni pē ia ʻoku lau maʻuloto ʻe he mēmipa kotoa pē. Ne u toki ako pē heʻeku hū ki he malaʻe ʻo e ngāue fakafaifekaú ʻi Naisīliá, ki hono moʻoni ʻo e ngaahi lea ko ʻení.
ʻI ha pō ʻe taha ne u foki mai ai mo hoku hoá ki homa ʻapi nofoʻangá. Ne ma heka pasikala mai ʻi ha kiʻi hala maka mo fakapoʻuli naʻe luoluo ko e tupu mei he ʻuhá. Koeʻuhí ko e vaí pea mo e tūkunga ʻo e halá, naʻe tō ai ʻa hoku hoá mei heʻene pasikalá. Naʻe ʻuli mo viviku—ʻa hono valá, ʻa ʻene kato folofolá—mo e meʻa kotoa pē naʻá ne maʻú.
ʻI he faifai peá ma aʻu ko ia ki homa fale nofoʻangá, ne ma fufulu mo fakamōmoa lelei ʻa e meʻa kotoa pē naʻe maumau ʻi he fakatuʻutāmakí—tukukehe pē ʻa e ongo tatau ʻe ua ʻo e Tohi ʻa Molomoná naʻe kei faʻo ʻi heʻene kató hili ʻa e ʻaho ʻo ʻema malanga fakauluí. Ne u fakakaukau naʻe ʻikai fie maʻu ke ma hohaʻa ki he ongo tatau ko iá he naʻe lahi pē e ʻū tatau ʻi homa fale nofoʻangá.
Hili ha ngaahi māhina mei he meʻa naʻe hokó, ne u kumi holo ha meʻa ke monomono ʻaki ʻeku tohi himi naʻe mahaehaé. Ne u toʻo hake ai ʻa e ongo tatau ʻo e Tohi ʻa Molomoná kuo mōmoa ʻene ʻulí, ʻa ia ne ma tuku ʻi ha funga laupapa pea ne u vakai atu ʻe lelei ʻa hono takafí ke fetongi ʻaki e takafi ʻeku tohi himí. Ka ʻi he ʻamanaki ke u kosiʻi ʻa e takafí, naʻe mahuhuhuhu hoku lotó: ʻIkai ko e tohi ʻeni ʻokú ke malangaʻí? Ko e founga nai ʻeni ke fai ki aí? Ko e hā nai e fakakaukau ki ai hoʻo kau fiefanongó?” Ne u tangutu hifo ʻo fakalaulauloto ʻi ha taimi lōloa. Pea ʻikai leva ke u toe kosiʻi ʻa e takafí ka u fufulu ʻaki ia ha vai koa pea fakamōmoa ʻo hilifaki fakalelei ia ʻi heʻema funga laupapá.
Ne u ʻilo mei he meʻá ni kuo fuʻu fuoloa ʻeku moʻui ʻi ha fakamoʻoni ʻa ha niʻihi kehe ʻo kau ki he Tohi ʻa Molomoná, neongo ne u kau atu ki he seminelí mo e ʻinisititiutí. Talu mei ai mo ʻeku toe vāofi ange mo e tohí ni pea ʻoku ou toe mahuʻingaʻia ange ai. ʻOku ou ʻiloʻi ʻoku tau maʻu ha ʻilo fakapapau ki hono toputapu ʻo e Tohi ʻa Molomoná mei heʻetau ʻiloʻi ia ʻo fakafou he ngaahi meʻa ʻoku aʻusia ʻe hotau lotó. Ne u ʻiloʻi ʻa hono moʻoni ʻo e Tohi ʻa Molomoná ʻi heʻeku lau, fakalaulauloto mo fakaʻaongaʻi ʻa hono ngaahi akonakí.
Tā fakatātā ʻa Gregg Thorkelson