Ne Faifai Peá u Tali ʻa e Tukupaá
Jennifer Garrett, Kalefōnia, ʻAmelika
Lolotonga e ʻinitaviu vahehongofulu ʻo e taʻu 2005 ne fehuʻi mai ai ʻe he pīsopé ki homau fāmilí, “ ʻOku fēfē hoʻomou lau Tohi ʻa Molomoná?”
Ne toki ʻosi pē ia ʻemau talanoa fekauʻaki mo hoku ngaahi fatongia ʻi he lotú pea mo ʻapí mo ha ongo kiʻi tamaiki tangatá. Naʻá ku fakamatala ki hono faingataʻa ko ia ke lau ha vahe ʻe taha he ʻaho kotoa pē, ka naʻá ku ʻilo ʻoku ou kumi ʻuhinga. Ko hono moʻoní, neongo ne u fai ha ngaahi meʻa lelei ʻi he ngaahi māhina kuo ʻosí, ne ʻikai ke u feinga ke lau ʻa e Tohi ʻa Molomoná ke ʻosi ʻo hangē ko e tukupā ko ia ne fai mai ʻe Palesiteni Kōtoni B. Hingikelií.1
ʻI he kamata ko ia ʻa e taʻu foʻoú, ne ueʻi au ʻe he Laumālié ke u fakatomala. Ne u ongoʻi ʻo hangē ko e kilia ko Neamaní, ʻa ia naʻá ne ʻuluaki fakafisinga ke fai ʻa e ngāue faingofua ko ia ko e uku ʻi he vai ko Soataní ʻo hangē ko ia ne kole ange ʻe he palōfita ko ʻIlaisá ke ne faí (vakai, 2 Ngaahi Tuʻi 5:1–14). Ko e meʻa faingofua pē ʻa hono lau ʻa e Tohi ʻa Molomoná.
ʻI he Sāpate ʻaukai hono hokó, ne fakamoʻoni ha kau tangata mo e kau fefine ki he hoko ʻa e talaʻofa ʻa e palōfitá ʻi heʻenau moʻuí. Naʻá ku ʻilo ne ʻikai ke u maʻu e ngaahi tāpuaki ko iá ko e ʻikai ke u fakafanongo ki hono leʻó. Ne u fakapapauʻi leva ke lau ʻa e Tohi ʻa Molomoná ke ʻosi ʻi he 2006—pea ʻi he taʻu ka hokó mo e taʻu hoko maí—ke u hangē ko Palesiteni Hingikelií ʻo maʻu ha ʻofa ki ai. [he tohí]
ʻI he fakaʻosinga ko ia ʻo e taʻú, ne u fakakaukau ki heʻeku taumuʻá, ʻo ʻilo ʻe ʻosi pē hono lau e tohí ʻi he ʻosi ko ia ʻa e taʻú. Ne u ʻilo kuó u maʻu ha ngaahi fakakaukau ne ʻikai te u mei maʻu mei ha maʻuʻanga tokoni kehe. Ne u toe ofi ange ki heʻeku Tamai Hēvaní mo e Fakamoʻuí. Ne u maʻu ha ngaahi faingamālie lahi ange ke vahevahe ʻa e ongoongoleleí lolotonga e taʻú ko ʻeku lau ʻa e Tohi ʻa Molomoná peá u fakamoʻoni ki hono moʻoní.
ʻOku ou fakaʻamu ne u fakahoko ʻa e tukupā ko ia ʻa Palesiteni Hingikelī ʻi he 2005. Ne u hangē ko Neamaní ʻo faifai peá ne uku ʻi he vai ko Soataní, ne u mei lava ʻo fiefia ʻi he ngaahi tāpuaki ʻo e Tohi ʻa Molomoná ʻo vave ange ʻi he taimi ne hoko ai ʻení.
ʻOku ou fakamālō kuó u ako ʻa hono mahuʻinga ʻo hono fakahoko e ngaahi tukupā mei he palōfitá neongo ʻene ngali faingofuá. ʻOku ou ʻamanaki atu ki ha taʻu foʻou fonu ʻi he ngaahi tāpuaki mei hono toe lau ʻo e Tohi ʻa Molomoná.