Pea Naʻa Mau Mamata Kiate Koe ʻAnefē ʻOkú ke Puke?
ʻAlaseli Lōpasi Lesenitisi, Velakulusi, Mekisikou
Naʻá ku hoko ko ha Palesiteni ʻo e Kau Finemui ʻo e Uooti Kutielasi Samolá, ʻi Mekisikou mei he taʻu 2003 ki he 2005. ʻI he Kilisimasi kotoa pē ne taʻo ʻe he kau Finemuí mo honau kau takí ha fanga kiʻi fakaneifua ke ʻave ki he kāingalotu matuʻotuʻa ʻo homau uōtí.
ʻI he ʻamanaki ke hoko ʻa e Kilisimasi ʻo e taʻu 2005, ne mau ako ha ngaahi hiva Kilisimasi pea tui mo ha ngaahi tatā mo ha ngaahi sikaafi lanu kulokula. ʻI he faʻahitaʻu momokó, ʻoku ʻuhoʻuha maʻu pē pea havili momoko mei he noaté. Ka naʻe ʻikai taʻofi ai heni ʻa e ʻalu atu ha kau talavou mo e kau finemui ʻe toko hongofulu mā ua nai mo ʻemau uta pai fainaá.
ʻI heʻemau aʻu atu ki he ngaahi ʻapi ʻo e kāingalotu tangata mo fefine matuʻotuʻa ko ʻení, ne mau hiva ʻi he fiefia moʻoni. Ne mau mavahe mei he ʻapi taki taha mo e ongoʻi fiefia he neongo ko ha momeniti siʻi pē, ka naʻa mau ʻomi ha fiefia lahi ʻi heʻemau hivá mo ʻemau paí.
Ko e fefine ne mau ʻaʻahi fakamuimuitaha ki aí ne taʻu lahi ʻa ʻene māmālohi he Siasí. Neongo ne teʻeki feʻiloaki ha taha ʻo e toʻu tupú pea mo Uanita, ka naʻá ma maheni mo hoku husepānití mo ia ʻi ha ngaahi taʻu lahi. Ne ʻikai toe lava ke mavahe mei hono mohengá, puke pea mahino he ʻikai toe sai peá ne toe masiva foki. ʻI he ngaahi ʻaho kimuʻá, ne ʻaʻahi atu ʻa e kōlomu ʻo e kau taulaʻeikí ki hono ʻapí ʻo fai ha ngaahi fakalelei.
ʻI heʻemau aʻu atu ki hono ʻapí, ne u ui atu ʻa hono hingoá. Naʻe ʻikai ha tali pea hokohoko atu pē ʻeku uiuí. Ne faifai peá u fanongo ki ha kiʻi leʻo siʻi ʻokú ne pehē mai, “Hū mai ʻe Sisitā ʻAlaseli.” Ne mau hū atu ʻo hiva ʻi he fiefia mo e loto vēkeveke, neongo ne fakamamahi kiate kimautolu ʻa e tuʻunga naʻá ne ʻi aí. Ne fuoloa siʻi pē mei heni ʻa e longomoʻui ʻa Uanitá. Ko ʻeni, ko e taimi ko ia ne tangutu hake ai ki ʻolungá, ne ʻikai lava e toʻu tupú ʻo fakamaʻumaʻu honau loʻimatá. Ne ongo moʻoni ʻeni kiate ia peá ne fakamālō mai ʻi heʻemau ʻaʻahi angé pea tokoniʻi ia ʻo fakafou ʻi heʻemau ngaahi hiva Kilisimasí ʻoku kei manatuʻi mo ʻofaʻi ia ʻe heʻetau Tamai Hēvaní.
Hili ʻemau mavahe mei hono nofoʻanga fakatōkilaló, ne fakahaaʻi ʻe he toʻu tupú ʻa ʻenau houngaʻia koe faingamālie ne nau maʻu ke hiva ai kiate iá. Ne ʻikai ke nau tokanga kinautolu ki heʻenau iku ʻo viviku mo mokosiá; ne fonu honau lotó ʻi he fiefia koeʻuhí ko ʻenau lava ke vahevahe ha konga siʻi ʻo e fiefia ne nau ongoʻí. Ko e taimi ia ne toki mahino kakato ange kiate au ʻa e ngaahi veesi ko ia ʻoku pehē:
“Naʻá ku mahaki, pea naʻa mou ʻaʻahi mai kiate au. …
“… Naʻa mau mamata kiate koe ʻanefē ʻokú ke mahaki … pea mau ʻalu atu kiate koe?
“Pea ʻe lea ʻa e Tuʻí, ʻo pehē ange kiate kinautolu, Ko ʻeku tala moʻoni atu kiate kimoutolu, Ko e meʻa ʻi hoʻʻomou fai ia ki ha taha ʻoku kihiʻi siʻi hifo ʻi hoku kāingá ni, ko hoʻomou fai ia kiate au” (Mātiu 25:36, 39–40).
Ne u loto mamahi ʻi he mālōlō ʻa Uanita hili pē ia ha ngaahi ʻaho siʻi mei ai, ka naʻá ku ʻiloʻi taʻe toe veiveiua ʻoku ʻofa ʻa e Tamai Hēvaní ʻi Heʻene fānaú. ʻOku ou ʻiloʻi kapau te tau muimui ki he Laumālié, ʻe lava ke tau hoko ko ha meʻangāue ʻi Hono toʻukupú ʻi heʻetau fefaitāpuekinaʻaki.