Ko ha Pōpoaki Faka-Kilisimasi mei he Kau Palesitenisī ʻUluakí ki he Fānau ʻo e Māmaní

Ko e ʻUhinga ʻo e Meʻa Fakaofó

Ko e faʻahitaʻu Kilisimasí ko e taha ia ʻo e ngaahi taimi fakaʻofoʻofa taha ʻo e taʻú. Ka neongo ia, ʻoku ʻikai ko e ngaahi meʻaʻofá, ʻulu ʻakaú, ngaahi teuteú pe ko e meʻakaí ʻokú ne ʻai ʻa e faʻahitaʻú ni ke hoko ko ha faʻahitaʻu fonu he ngaahi meʻa fakaofó.

ʻOku toki makehe moʻoni ʻa e faʻahitaʻu Kilisimasí kiate au ʻi he taimi ʻoku ou manatu ai ki hono ʻaloʻi ʻo hotau Fakamoʻuí, ʻa Sīsū Kalaisi.

ʻI heʻetau feinga ko ia ke manatu ki hotau Fakamoʻuí, ʻe tupulaki ʻa ʻetau holi ko ia ke moʻui ʻo hangē ko Ia. Ne ʻikai hoko noa ʻa e hoko ʻa e taimi Kilisimasí ko e taimi ia ʻo e taʻú ʻoku toe angaʻofa, loto foaki, angalelei ange pea toe houngaʻia ange ai ʻa e kakaí.

ʻI heʻetau feinga ko ia ke muimui ki he ngaahi sīpinga ʻa Kalaisí ʻi he faʻahitaʻu ni pea feinga ke fai hotau lelei tahá ke moʻui ʻo hangē ko Iá, tuku ke tau fekumi ki ha ngaahi founga ke hiki hake ʻa kinautolu ʻoku tau feohí. Tuku ke tau fakafiefiaʻi hono ʻaloʻi hotau Fakamoʻuí ʻaki haʻatau hoko ko e kau muimui ʻo Kalaisi ʻi he lea mo e ngāue.

ʻI heʻetau fai iá, ʻoku mau fakamoʻoni atu ʻe hokohoko atu ʻa e tupulaki ʻa e holi ko ia ʻiate kitautolu ke muimui kiate Iá lolotonga e taʻu ʻoku tau ʻamanaki atu ki aí.

Palesiteni Thomas S. Monson

Palesiteni Henry B. Eyering

Palesiteni Dieter F. Uchtdorf

Ko e ʻAloʻí, fai ʻe Nathan Pinnock