Mo e ʻOfa mei Hoku Ngaahi Tokouá
Naʻá ku fakapapauʻi ange ki heʻeku ongo faiako ʻaʻahí, “ ʻOku mau sai pē.” Ka naʻe ʻaonga lahi ʻena tokoni ʻi he Kilisimasi ko iá.
Ko ʻene ofi ange mai ʻa e Kilisimasí, ko e mafatukituki ange ia hoku lotó. ʻI Nōvemá, ne teʻeki pē ke u maʻu ʻe au mo hoku husepānití ha ngāue tuʻumaʻu. Naʻá ku totongi homau fale nofototongí, ʻuhilá, mo e telefoní mei heʻeku kiʻi paʻanga siʻisiʻi ne maʻú, kae totongi ʻe hoku husepānití ʻa e meʻalelé mei heʻene kiʻi vahe siʻisiʻí foki. Naʻe mālō pē feʻunga hono toengá ke mau moʻui ai. Ne hoko mai ʻa Tīsema mo ha ngāue lahi ange pea mau toe foki pē ki he angamahení, ka he ʻikai ke mau vahe kae ʻoua ke aʻu ki Sānuali. ʻI he ngaahi tūkunga ko ʻení, naʻa mo ha maʻu meʻatokoni fakafiefia he ʻaho mālōloó, he ʻikai lava ia.
Naʻá ku pehē pē kiate au, “ ʻE lelei pē meʻa kotoa.” Naʻá ma toli mo hoku husepānití he faʻahitaʻu māfana ko iá ha lasipeli lahi, ʻo ma ngaohi ha siamu. Naʻa mau kai keke pē mo ha siamu mo ngaohi ʻemau ngaahi meʻaʻofá. Ka ko e taimi naʻe teuteu fiefia ai ʻema fānau fefine ʻe toko tolú (taʻu 6, 8, mo e 14) ʻaki e ngaahi kahoa ne nau ngaohí, mo talanoa ki he meʻa ʻe ala foaki ange heʻenau mātuʻá maʻanautolu he Kilisimasí, naʻe mamahi hoku lotó.
ʻI he efiafi ʻe taha, naʻe taʻeʻamanekina e ʻaʻahi ange ʻeku ongo faiako ʻaʻahí. ʻOku ʻikai foki ke ʻi ai haku ngaahi tuongaʻane pe tokoua tonu, ne hoko moʻoni leva ʻa e kau fafine ʻo e Fineʻofa ʻi homau koló—tautautefito ki heʻeku ongo faiako ʻaʻahí, ko hoku ngaahi tokoua. Naʻá na fakamatalaʻi ʻi he pō ko iá ha lēsoni mālie, pea kamata ke na talanoa ki he ʻaho mālōlō ʻe hoko maí. Naʻá ku fakapapauʻi ange kiate kinaua ʻoku lelei pē ʻa e meʻa kotoa ka naʻá ku talaange ʻe hoko ʻeni ko ha Kilisimasi “masiva” kiate kimautolu. Naʻá na fakapapauʻi mai te na lotua homau fāmilí.
ʻI ha ʻaho ʻe taha, ʻi he ʻalu ange hoku husepānití ke ʻomi au he meʻalelé mei he ngāué, naʻá ne talamai ʻoku ʻikai faʻa tatali ʻa e taha kotoa pē ʻi ʻapi ke u fai mo aʻu ange. Naʻe tuku ange ʻe ha fefine mei homau kiʻi koló ha ʻū puha. Ko e taimi naʻa mau fakaava ai kinautolú, naʻe ʻi ai ʻa e ngaahi meʻakai kotoa pē ʻo e faʻahitaʻú: ko ha fuaʻi ʻakau, kūkisi, lole, mo ha ngaahi koloa meʻakai kehe, ngaahi meʻa teuteu, mo ha ngaahi meʻaʻofa fakaʻofoʻofa ne ʻosi kofukofu. Ne u fonu loʻimataʻia, ʻa ia ko ha loʻimata ʻo e fakamālō. Pea ʻoku ʻikai ko hono ʻosí ia. Naʻe fakaʻohovaleʻi kimautolu ʻe he taha ʻo e ongo fāmili ʻo ʻeku ongo faiako ʻaʻahí ʻi he pongipongi Kilisimasí ʻaki ha ʻū puha meʻaʻofa.
Ko hono fakaikú, ne hoko homau Kilisimasi “masivá” ko ha Kilisimasi fakafiefia moʻoni. Naʻe ʻikai ngata pē hono fakafonu ʻaki homau ʻapí e laumālie ʻo e Kilisimasí ka naʻe toe fakafonu ʻaki ia ʻa e māfana mo e ʻofa ʻa ʻeku ongo faiako ʻaʻahí mo ha kāingalotu kehe ʻo homau koló. Naʻe toki mahino kiate au ʻoku fakalato moʻoni ʻe he ʻEikí ʻetau ngaahi fie maʻú ʻo fakafou ʻi he kakai kehé—tautautefito kiate kinautolu kuó Ne vahe mai mo ueʻi fakalaumālie ke nau tokangaʻi mo tauhi kitautolú.
Tā fakatātā ʻa Gregg Thorkelson