Ua ani te Peresideni Monson i te mau Misionare, ua faaara e Pae Hiero Apî

Na te peresideni Thomas S. Monson i iriti i te 180raa o te Amuiraa Rahi Afa Matahiti a te Ekalesia, tei faatupuhia i te mahana maa e te sabati, 2 e te 3 no atopa 2010, na roto i te aniraa i te mau melo ia tavini i te misioni e na roto i te faaararaa e pae hiero apî.

Ua tapiti faahou te peresideni Monson i te aniraa « i te mau taure‘are‘a ti‘amâ e te paari » ia faaineine no te tavini ; ua farii poupou i te mau tamahine tei hinaaro nei e tavini ; e ua faaite i te hinaaro o te Ekalesia « e ia rahi atu â te feia faaipoipo misionare » no te tavini.

« Te ohipa misionare e hopoi‘a ïa na te autahu‘araa », te na reira ra oia, « e hopoi‘a ta te Fatu e tia‘i nei ia rave tatou, tatou tei farii i te mau mea e rave rahi ».

Ua faaara te peresideni Monson e pae hiero apî tei faaineinehia te paturaa i Hartford, Connecticut, Marite ; Indianapolis, Indiana, Marite ; Lisbon, Fenua Potiti ; Tijuana, Mehiko ; e Urdaneta, Philipino.

Na roto i teie mau hiero apî, e tae‘ahia e 23 hiero tei faaarahia e aore râ, te patuhia nei. Ia oti teie mau hiero e 23 i te patuhia, e taea‘ahia e 157 hiero a te Ekalesia na te ao nei.

« E tamau noa tatou i te patu i te hiero », te na reira ra te peresideni Monson. « … E mata na tatou i te tamau noa ma te haapa‘o i te haere i te hiero, o te patuhia nei i piha‘iho e piri roa i to tatou mau melo » (« E tae atu i te Taime e Farerei Faahou ai Tatou », Liahona e Ensign, Nov. 2010, 4).

E riro te mau hiero apî e hiero matamua na te Ekalesia i te fenua Potiti, i Indiana e i Connecticut. E riro te hiero no Urdaneta te toru o te hiero a te Ekalesia i te fenua Philipino e te hiero no Tijuana o te ahuru ma toru ïa hiero i Mehiko.

I roto i na ava‘e e ono mai te amuiraa rahi no eperera e tae atu i te amuiraa rahi no atopa, ua haamo‘a te Ekalesia e maha hiero apî : Te hiero no Gila Valley Arizona, no Vancouver British Columbia, no Cebu City Philipino, e no Kyiv Ukraine. Ua faanahohia e haamo‘a faahou i te hiero no Laïe Hawaii i te 21 no novema 2010, i muri a‘e i te mau faaapîraa rarahi.

[NO TRANSLATION]