Te mau Hi‘o no te Oraraa mure ore o te Hiero: Hoê Iteraa Papû no te Utuafare
E tauturu te hoê iteraa atea mure ore no te faafariuraa evanelia e te mau fafauraa o te hiero ia tatou ia ite i te mau haamaitaira tao‘a rahi no te u‘i tata‘itahi o to tatou mau utuafare mure ore.
E te mau taea‘e e te mau tuahine here, i te taime a parahi ai ta maua tamaiti i te Pû Haapiipiiraa Misionare no Provo, ua hapono atu te tuahine Gong i te faraoa apî maitai na’na e na to’na mau hoa misionare : Teie te tahi o te mau rata haamauruuru ta te tuahine Gong i farii : « E te tuahine Gong, ua riro taua faraoa mai te faraoa ta‘u i mâtau i te amu i te fare ». « E te tuahine Gong, te mea noa ta‘u e nehenehe e parau wow Ua riro taua faraoa ra ei mea maitai roa‘e tei tae i roto i to‘u vaha mai te taime mai â a amu ai au i te mau enchiladas : « E te tuahine Gong, e mea faahiahia te faraoa ». Ua na ô faahou oia no te hauti, « a haamana‘o mai ia‘u ia ore ana‘e e afaro te oraraa i rotopu ia oe e o Gong Tane ».
Ua here tatou i ta tatou mau misionare – te mau elder, te mau tuahine, te feia faaipoipo paari tata‘itahi. Ua mauruuru tatou e amuri noa’tu no taua misionare taa ê ra tei afa‘i matamua mai te evanelia i faaho‘ihia mai a Iesu Mesia. Te faaite papû nei au ma te mauruuru e taurutu te hoê iteraa atea mure ore no te faafariuraa evanelia e te mau fafauraa o te hiero ia tatou ia ite i te mau haamaitaira tao‘a rahi no te u‘i tata‘itahi o to tatou mau utuafare mure ore.
Te taata faafariu-matamua-hia i roto i to matou utuafare Gong i te Ekalesia a Iesu Mesia i te Feia Mo‘a i te Mau Mahana Hopea Nei o to matou ïa metua vahine, o Jean Gong. Ei tamahine no Honolulu, Hawaii, ua faaroo oia ; ua ite oia ; ua bapetizohia e ua haamauhia oia ; te tamau noa nei â oia i roto i te faaroo. Ua tauturu te mau melo haapa‘o maitai o te Ekalesia i to‘u metua vahine, e mau hoa to’na no te evanelia, e mau piiraa i roto i te Ekalesia, e ua tamau noa oia i te faaamuhia i te parau maitai a te Atua. I roto i te parau o teie mahana, e haamaitai te melo tata‘itahi faafariu-apî-hia, te feia apî paari tata‘itahi e te feia o te itoito faahou i roto i te Ekalesia, e te tahi atu â mau taata, i te mau u‘i ia riro ana‘e ratou ei feia mo‘a i roto i te fetii o te Atua.1
Te hoê utuafare tei atuatu i to‘u metua vahine o te utuafare ïa o Gerrit de Jong tamaiti. Ei aivanaa no te reo tei here i te reo no te aau e no te Varua, ua faaanaanatae o papa ruau de Jong i to‘u feruriraa tamarii na roto i teie mau huru parau ; « Aita â te mau (blackberries) i para atu ra ia uteute ana‘e ratou ». I teie mahana, e parau vau i te feia apî no ni‘a i te mau rave‘a roro uira afa‘ifa‘i, « e tupu te mana‘o pe‘ape‘a i roto i te mau episekopo pii-apî-hia ia tai‘o ana‘e outou i te (blackberries) i roto i te fare pureraa ».
Ua faaipoipohia to‘u na metua, o Walter et Jean Gong, e toru taime – : te hoê oro‘a Tinito na te utuafare fetii, te hoê oro‘a Marite na te mau hoa ; e i roto i te Fare o te Fatu no teie tau e amuri noa’tu.
Te himene nei ta tatou mau tamarii Paraimere: Oh, j’aime voir le temple [Mea au na‘u ia hi‘o i te hiero]. E haere au i reira i te hoê mahana2 Te fafau nei ta tatou feia apî ia « farii i te mau oro‘a no te hiero ».3
Ua ti‘a iho nei au i roto i te hoê Fare no te Fatu i piha‘iho i te hoê tane e te hoê vahine faaipoipo ti‘amâ tei haere mai i reira no te farii i te mau haamaitairaa na roto i te fafauraa. Ua ani au ia raua ia tape‘a maoro noa i te taime matamua roa a riro ai raua ei tane e ei vahine faaipoipo i te roaraa e 50 matahiti ; e i muri iho i taua 50 matahiti ra, ia haamata faahou no te taime piti.
Ua hi‘o vau ia‘u iho e teie nei na taata faaipoipo haviti roa i roto i te mau hi‘o no te hiero – hoê hi‘o i teie pae, e hoê hi‘o i tera’tu pae. Ua horo‘a mai te mau hi‘o o te hiero i te mau hoho‘a o te toro atu ra i roto i te oraraa amuri atu.
Te faahaamana‘o mai nei te mau hi‘o o te hiero ia tatou e « natura e e fâ hanahana » ; to te taata tata‘itahi ; e « e faati‘a te mau oro‘a e te mau fafauraa mo‘a i roto i te mau hiero mo‘a i te taata tata‘itahi ia ho‘i faahou atu i mua i te aro o te Atua e i te mau utuafare ia tahoêhia no te ora-mure-ore ».4 e na roto i te here e te haapa‘o amui-maitai-raa, e nehenehe ïa ta tatou e horo‘a i te mau tamarii te mau aa e te mau pererau.
I roto i te mau hi‘o no te oraraa mure ore o te hiero, ua fâ mai ia‘u te Teni Gong Matamua, fanauhia i te matahiti 837 i muri mai i te poheraa o te Mesia i te Tuhaa Apatoa no Taina e te mau u‘i i muri mai no te utuafare Gong e tae noa mai i to‘u metua tane, te 32raa o te u‘i o to matou utuafare. To‘u taea‘e, to‘u tuahine e o vau nei o te 33raa ïa o te u‘i o to matou utuafare ; ta‘u mau tamaroa e to ratou mau fetii, o te 34raa ïa o te u‘i ; ta maua mootua tamaroa, te 35raa ïa o te u‘i tei tapa‘ohia no te utuafare Gong. I roto i te mau hi‘o no te oraraa mure ore o te hiero, aita i nehenehe ia‘u i te ite i te omuaraa aore râ te hopearaa o te mau u‘i.
E ua feruri au eiaha noa i te apaparaa o te mau u‘i i muri mai, i te apaparaa atoa ra o te mau auraa utuafare i muri mai. I te hoê pae, ua ite au ia‘u iho ei tamaiti, ei mootua tamaroa, ei hinarere, e tae atu i te Teni Gong Matamua. I roto i te mau hi‘o i te tahi atu pae, ua ite au ia‘u iho ei metua tane, ei papa ruau, ei tupuna tane. E nehenehe ia‘u ia hi‘o i ta‘u vahine o Susan, ei tamahine, ei mootua tamahine, ei hina tamahine e i te tahi atu pae, ei metua vahine, ei mama ruau, ei tupuna vahine.
I roto i te mau hi‘o no te oraraa mure ore o te hiero, ua haamata vau i te ite i ta‘u vahine e o vau iho ei mau tamarii na to matou mau metua e ei mau metua no ta maua mau tamarii, ei mootua no to matou mau metua tupuna e ei metua tupuna no ta maua mau mootua. E niiniihia mai i ni‘a i to tatou mau varua te mau haapiira rahi no te oraraa tahuti a haapii mai ai e a haapii atu ai te mau ti‘araa mure ore oia ho‘i te tamarii e te metua, e te metua e te tamarii.
Ua faaite te papa‘iraa mo‘a i to tatou Faaora mai « te Metua e te Tamaiti ».5 Tei parahi i te tino nei e tei auraro te tino i te hinaaro o te Metua, ua ite to tatou Faaora nahea i te faaora ia tatou, To’na nunaa taata, i roto i to tatou mau mauiui, mau ati, mau faahemaraa, mau ma‘i, e tae noa’tu i te pohe.6 No te « pouraa i raro a‘e roa i te mau mea atoa »,7 i nehenehe ai i to tatou Faaora ia rave i to tatou mau paruparu e ia amo i to tatou mau oto. « Ua rave mau râ oia i to tatou paruparu, e ua hopoi ê atu oia i to tatou oto … ; [e no to te Faaora] paruparu e ora’i tatou ».8
Mai te taime o te mau apooraa i te ra‘i ra, ua imi noa to tatou Faaora i te rave i te hinaaro a To’na ra Metua. E nehenehe teie hoho‘a o te Metua e te Tamaiti e tauturu i te tatara i te parau « o te tuu noa i to’na ora no‘u nei, e ora ïa to’na ».9 Te imi nei to te ao i te haamaha i to’na iho hinaaro. Teie râ aita e mana i roto ia tatou no te faaora ia tatou iho. Tei roto râ Ia’na. Aita e oti‘a e e hopea,10 na te Taraehara rahi ana‘e a to tatou Faaora e horomii te pohe, te taime, te area, te iria, te inoino, te ohipa tano ore, te mo‘emo‘e, e te oto.
I te tahi mau taime e hape te mau mea noa’tu e ua rave maitai tatou. E heva te hoê Arenio hara ore e te viivii-ore, to tatou Faaora, e o tatou e no tatou. Ia haamana‘o noa â tatou Ia’na,11 e nehenehe Oia e ti‘a i piha‘iho ia tatou « i te mau taime atoa, e i roto i te mau mea atoa, e i te mau vahi atoa ta [tatou] e parahi ra ».12 « E mea paari a‘e To’na ti‘aturiraa i te mau tape‘araa no te pohe ».13 Na roto i te hutiraa ia tatou Ia’na ra, te huti atoa ra ïa to tatou Faaora ia tatou i to tatou Metua i te Ao ra. Noa’tu e te vai nei te mau mea maitai ore i ni‘a i te fenua nei, e nehenehe ta tatou e ti‘aturi i to tatou Metua i te Ao ra no te faahope « te opuaraa rahi a te taraehara, i reira te parau-ti‘a, te aroha, e te maitai e farerei ai i roto i te hoêraa hanahana ».14
Te hoê semeio no te mau hoho‘a ta tatou e ite i roto i te mau hi‘o no te oraraa mure ore o te hiero o te mea ïa e nehenehe ta ratou – ta tatou – e taui. I to Jean e Walter Gong tomoraa’tu i roto i te fafauraa apî e te mure ore, ua iriti raua i te e‘a no te mau tupuna (mai te Teni Gong Matamua) ia taatihia e no te mau huaai ia fanauhia i roto i te fafauraa. A haamana‘o e : ia noaa ana‘e ia tatou te mau tuahine aore râ te mau taea‘e atoa, e haamaitai ïa tatou i te mau u‘i.
Tei roto te ao nei i te arepurepu15 tera râ tei roto « ana‘e i Ta’na Ekalesia mau te ora »,16 te vaira te faaroo e te mata‘u ore Te faaite hua nei au na roto i te mau parau a te Aposetolo Paulo :
« Ua ite mau ho‘i au e, e ore te pohe, e ore ho‘i te ora, …
« E e ore te teitei, e ore ho‘i te haehaa, e e ore atoa te mau mea e hamanihia nei, e ti‘a ia faataa ê ia tatou i te aroha o te Atua, i roto i to tatou Fatu ia Iesu Mesia ra ».17
Te faaite nei au ma te haehaa : te ora nei te Atua. « E horoi ïa Oia i to tatou mau roimata atoa »18 – eiaha râ te mau roimata oaoa ia ite ana‘e tatou na roto i te mau hi‘o o te oraraa mure ore o te hiero e ua tae tatou i te fare, ma te mâ e te viivii-ore, e to tatou mau u‘i utuafare tei taatihia e te mana autahu‘araa i roto i te here, e ia tuo, « hosana, hosana, hosana ». Na roto i te i‘oa o Iesu Mesia ra, amene.