Te Autahu‘araa a Aarona
Te autahu‘araa ta outou e mau nei, e horo‘araa taa ê ïa, no te mea te taata tei horo‘a mai i te reira, o te Fatu iho ïa. A faaohipa i te reira, a faarahi, e a ora ia ti‘amâ outou i te reira.
A paraparau ai au i roto i te amuiraa rahi a 25 matahiti i ma‘iri a‘e nei, ua faaite au i te hoê hoho‘a tei vai noa i piha‘iho ia‘u. O ta‘u ïa mootua matahiapo. No farii noa’tura oia i te Autahu‘araa a Aarona e ua faatoro‘ahia ei diakono. Ua rave au i taua taime ra no te paraparau ia’na no ni‘a i te faufaa o te fariiraa i te Autahu‘araa a Aarona.
Na ô atu ra vau i ta‘u mootua :
« Aita vau i oaoa roa i te mau huru o te ao nei ta oe e te tahi atu mau tamaroa e farii nei a rave ai oe i to oe ti‘araa ia riro mai oe ei taata paari. I reira ra, te tahi o matou e mea paari a‘e i te matahiti e e ti‘a no te arai i te ao nei, te ti‘aturi nei au e, aita ta matou ohipa no outou i manuïa, no te mea ua vaiiho matou i teie mau huru i roto i te ao nei. E tuu te reira ia outou i roto i te hoê ti‘araa, e rave rahi o ratou o ta oe e ti‘a ia amui atu, aita i atuatuhia e te hoê taa-maitai-raa e aore râ te hoê faaturaraa no te mau peu faufaa a‘e. No reira, e riro mai te mana o te mau hoa e mea fifi roa e te puai.
« Ua afa‘i mai tatou i roto i to tatou mau fare te ratio, te upaupa faata’i pehe, e te afata teata. Te vai ra te tahi mau mea maitatai ta teie mau tauhaa e horo‘a mai, tera râ, te rahiraa o te mau mea ta tatou e faaroo nei e e mata‘ita‘i nei, aita roa’tu te reira e faauru e e faaitoito i te feia apî tamaroa. Te rahiraa o te mau mea e haapurorohia nei, e mau mea ino ïa. Na te hoê noa pitopito i roto i to outou fare e haamou i roto ia outou te iteraa i te mea maitai e i te mea ino » (« I Confer the Priesthood of Aaron » Ensign, Novema 1985, 46).
Taui noa’tu â te mau tauhaa, tau huru iti noa nei â – eiaha râ no te mau matini aravihi o teie tau. Ua hinaaro vau e ani i te feia apî tamaroa o te Autahu‘araa a Aarona e, ua ite anei ratou eaha te hoê upaupa faata‘i pehe. No ratou aita i ite, o te hoê ïa mea o ta matou e faaohipa nei ia haere i roto i te piha rahi o te fare e e faata‘i ia faaroo matou i te pehe. A feruri na e – na matou e haere ia’na ra, eiaha râ e ta‘ita‘i haere noa na muri iho ia matou na te mau vahi atoa.
Ua haapii atoa vau i to‘u mootua, o Terry, e maha haapiiraa no ni‘a i te aamu o Daniela i roto i te Faufaa Tahito. Ua parau vau ia’na (1) ia tape‘a maitai noa e te mâ i to’na tino, (2) ia faahotu i to’na feruriraa e ia roaa te paari, (3) ia puai e ia pato‘i i te faahemaraa i roto i te hoê ao tei î i te reira, e (4) ia ti‘aturi i te Fatu, i te taime hoa râ e hinaaro ai oe i Ta’na parururaa.
Ua opani au i ta‘u a‘oraa ia Terry na roto i teie mau parau : « Eita teie mau aamu i roto i te papa‘iraa mo‘a e ruau. Hoê â huru to ratou nehenehe i te taime a tai‘o ai oe ei diakono, ei haapii, ei tahu‘a, ei misionare, ei taea‘e hahaere, ei peresideni no te pŭpŭ peresibutero, e aore râ, te huru o te ohipa ta te Fatu e ani mai ia oe ia rave. E haapii te reira mau aamu ia oe ia roaa te faaroo, te itoito, te here i to oe taata tupu, te ti‘aturi, e ia ti‘aturi i te Fatu ». (Ensign, Novema 1985, 48).
Te oaoa nei au ia faaite atu e, ua haapa‘o maitai o Terry i te hopoi‘a ta‘u i horo‘a ia’na a 25 matahiti i ma‘iri a‘e nei. I muri a‘e ua farii oia i te Autahu‘araa a Melehizedeka, ua tavini i te hoê misioni maitai, e i teie taime e peresideni oia no te pŭpŭ peresibutero, e oia’toa e papa no te hoê tamahine haviti mau.
E rave rahi te mau mea tei taui i roto i na matahiti e piti ahuru ma pae i ma‘iri a‘e nei. Te tahi atu ohipa tei tupu maori râ, e rave rahi o ta‘u mau mootua tei paari e ua fanau i ta ratou iho mau tamarii. I teie tau mahanahana nei, ua ti‘a vau i roto i te hoê haamenemeneraa no te mau taea‘e tei mau i te autahu‘araa e ua tuu i to‘u na rima i ni‘a i te upoo o ta‘u hina matahiapo e na to’na metua tane i horo‘a ia’na i te Autahu‘araa a Aarona. Noa’tu e, aita to‘u hina i ô nei no te ti‘a i piha‘iho ia‘u i teie mahana, te hinaaro nei au e faatae i ta‘u mau parau ia’na e ia outou paatoa te feia apî tamaroa nehenehe e mau nei i te Autahu‘araa a Aarona.
E haamaitairaa taa ê mau te fariiraa i te Autahu‘araa a Aarona. Te faaite nei te aamu i te mahana hanahana a faaho‘ihia mai ai te autahu‘araa i te fenua nei, i ti‘a ai i te mau tane ia rave faahou i te ohipa ei mono no te Atua a rave ai ratou i te mau oro‘a mo‘a o te autahu‘araa. I te 5 no eperera 1829 i tae mai ai o Olive Kaudere i te fare o Iosepha Semita i Harmony, Pennsylvania. Ua ani o Olive i te peropheta Iosepha Semita no ni‘a i ta’na ohipa iritiraa i te hoê papaa parau tahito, te Buka a Moromona. No to’na ite papû i te natura hanahana o te reira ohipa, ua farii oia ia riro ei papa‘i parau no te faaoti i te ohipa iritiraa. I te fariiraa o Olive ia riro oia ei papa‘i parau, ua tere oioi te ohipa iritiraa i mua.
I te 15 no me 1829, ua tae’ahia ia Iosepha e ia Olive te buka 3 Nephi. Ua tupu to raua oaoa rahi i te tai‘oraa i te aamu o te Faaora tei ti‘afaahou e To’na haereraa i te Pae Tooa o te Râ, e Ta’na mau haapiiraa no ni‘a i te bapetizoraa. A tai‘o ai raua i roto i te 3 Nephi, ua haamata to raua mau feruriraa i te uiui no ni‘a i te bapetizoraa. Eaha te raveraa ti‘a mau o te bapetizoraa, e tei ia vai ra te mana no te rave i teie oro‘a mo‘a faaora? Ua imi raua i te hoê pahonoraa i teie mau uiraa haapiiraa faufaa rahi. Ua faaoti raua e imi i te hoê pahonoraa na roto i te pure, e ua haere raua i te hoê vahi fatata mai i te pae anavai no Susquehanna River. Ua pure raua ma te faaite i te mau hinaaro atoa o to raua aau, e ua vetea te mau ra‘i i mua ia raua. Ua fâ maira te hoê melahi ma te parau mai e, o Ioane Bapetizo oia, e ua parau maira oia ia Iosepha raua o Olive e, te rave ra oia i raro a‘e i te arata‘iraa a Petero, Iakobo e Ioane tei mau i te autahu‘araa teitei a‘e. (hi‘o Iosepha Semita – Aamu 1:72).
« I ni‘a iho ia orua e ta‘u na tavini taea‘e nei, i te i’oa o te Mesia ra te horo‘a’tu nei au i te Autahu‘araa a Aarona ra, o tei mau i te mau taviri no te utuuturaa o te mau melahi, e no te evanelia no te tatarahapa, e no te bapetizo na roto i te utuhiraa no te haamatararaa i te hara ; e e ore roa te reira e iriti-faahou-hia’tu mai ni‘a i te ao nei, e tae noa’tu i te taime e e pûpû faahou atu ai te mau tamarii tamaroa o Levi i te hoê tusia i te Fatu na roto i te parau-ti‘a ra » (PH&PF 13:1).
I muri a‘e ra, ua faati‘a faahou o Olive i te reira ohipa na roto i teie mau parau : « Area râ… a feruri, e a feruri faahou â aue te oaoa i roto i to maua aau e te maere ho‘i, a tuturi ai maua… e a farii ai maua, i raro a‘e i to’na rima, i te Autahu‘araa Mo‘a » (nota i roto i te apiIosepha Semita – Aamu1:71).
I muri a‘e i to te taata tia‘iraa e rave rahi tenetere ia faaho‘ihia mai te mana o te Atua, ua faaho‘i-faahou-hia mai te mana e te hanahana o te Autahu‘araa Mo‘a a Aarona i ni‘a i te fenua nei. I roto i te tuhaa 107 o te Parau Haapiiraa e te Mau Parau Fafau, te ite nei tatou e, no te aha te autahu‘araa iti i parauhia ai e, te Autahu‘araa a Aarona :
« Ua parauhia te piti o te autahu‘araa te Atuathu’araa a Aarona, no te mea ua tuuhia’tu te reira i ni‘a ia Aarona e to’na ra huaai, e hope roa‘e to ratou atoa ra mau u‘i.
« Te tumu i parauhia’i te autahu‘araa iti ra no te mea ïa e tuatiraa te reira no tei rahi a‘e oia ho‘i te Autahu‘araa a Melehisedeka, e tei te reira te mana no te haapa‘oraa i te mau oro‘a tahuti nei. …
« Te mana e te tura ho‘i no te autahu‘araa iti a‘e, oia ho‘i te Autahu‘araa a Aarona, o te mauraa ïa i te mau taviri no te tautururaa a te mau melahi, e no te haapa‘o i te mau oro‘a tahuti nei, te faaiteraa a te evanelia, te bapetizoraa no te tatarahapa no te haamatararaa i te hara, ia au i te mau fafauraa e te mau faaueraa ». (PH&PF 107:13‐14, 20).
Eita te feia apî no te Autahu‘araa a Aarona e farii noa i te tura e te mana ia riro ei ti‘a no te Fatu no te raveraa i ta ratou mau hopoi‘a no te autahu‘araa, ua farii atoa râ ratou i te mau taviri no te tautururaa a te mau melahi.
E te feia apî no te Autahu‘araa a Aarona, te faaite papû atu nei au ia outou e, ua ruuruuhia te Fatu na roto i te mau fafauraa hanahana ia haamaitai mai i to outou oraraa ia au i to outou haapa‘o. Mai te mea e, e haapa‘o outou i te reo faaara o te Varua Maitai e ia pee i Ta’na arata‘iraa, e farii outou i te haamaitairaa o te tautururaa a te mau melahi. Na teie haamaitairaa e horo‘a mai i te paari, te ite, te mana e te hanahana i to outou oraraa. Teie te hoê haamaitairaa papû ta te Fatu i fafau mai ia outou.
Tau ava‘e i ma‘iri a‘e nei ua haere atu vau i roto i te pureraa iritiraa mana‘o a te hoê paroita. Te hoê o te mau taata tei ti‘a mai no te faaite i to’na iteraa papû o te hoê ïa tauturu haamaramarama no te Autahu‘araa a Aarona. Ua riro to’na iteraa papû ei faaiteraa ia‘u i te hoê hi‘oraa apî no ni‘a i te auraa no te hoê taata tei mau i te Autahu‘araa a Aarona ia mau i te mau taviri o te tautururaa a te mau melahi.
Ua faaite teie tauturu haamaramarama i te tahi mau iteraa to’na no ni‘a i te Autahu‘araa a Aarona o te paroita i taua po‘ipo‘i ra. A haere mai ai oia i te fare pureraa, ua ite oia e piti na diakono apî e te vehi rata no te moni hapaeraa maa i roto i te rima te haere ana‘e ra i te fare o te mau melo. Ua faahiahia oia i to raua huru faanehenehe maitai roa no te sabati e ta raua huru raveraa i ta raua ohipa ma te hanahana. I muri iho ua apee raua e piti tahu‘a no te haere e faatere i te oro‘a i roto i te hoê nohoraa sotiare no te mau taata huma melo e te huma roro. Teie te taime matamua no teie na tamarii ia haere i roto i teie fare, e ua parau to raua tauturu haamaramarama i te tura e te maru o ta raua raveraa i ta raua ohipa no te autahu‘araa.
I muri iho, ua faati‘a mai te tauturu haamaramarama i te hoê iteraa poto roa tei haaputapû roa i to’na aau, i te mea e, ua faahaamana‘o mai te hoê o te mau tahu‘a ia’na i te auraa mau ia riro ei ti‘a mau no Iesu Mesia – oia ho‘i, e melahi tauturu. Ua tae teie tahu‘a apî e opere nei i te pape na te amuiraa i piha‘iho i te hoê taata « trisomique ». No teie huru to’na, aita e nehenehe ia’na ia rave i te hoê hapaina pape oro‘a no te inu. Ua ite oioi teie tahu‘a apî i te fifi. Ua tuu oia i to’na rima aui i muri i te upoo o taua taata ra ia nehenehe ia’na ia inu, e i to’na rima atau ua rave oia i te hapaina e ua hopoi maru noa i te utu o taua taata ra. Ua itehia te mauruuru i ni‘a i te hoho‘a mata o taua taata ra – e hoho‘a ïa no te hoê taata tei tauturuhia e te tahi atu taata. E ua haere faahou teie tahu‘a faahiahia e rave i ta’na ohipa opereraa i te pape haamaitaihia i te tahi atu mau melo o te amuiraa.
Ua faaite te tauturu haamaramarama i te mau mana‘o tei tupu i roto ia’na i taua taime nehenehe ra i roto i to’na iteraa papû. Ua parau oia e, ua ta‘i marû noa oia i te oaoa, e ua ite a‘e ra oia e, tei roto te Ekalesia i te mau rima papû o teie mau melo aupuru, haapa‘o tei mau i te Autahu‘araa a Aarona.
I te hoê taime ua parau te peresideni Ezra Taft Benson e : A faaite mai ia‘u i te hoê tamaiti tei vai mâ noa i te pae morare e tei haere tamau noa i te mau pureraa. A faaite mai ia‘u i te hoê tamaiti tei faaohipa i to’na autahu‘araa e ua roaa ta’na parau tu’ite no Te Hopoi‘a i te Atua e e Eagle Scout oia. A faaite mai ia‘u i te hoê tamaiti tei haafeti‘ahia i te séminaire e te vai ra to’na iteraa papû puai no te Buka a Moromona. A faaite mai ia‘u i te hoê tamaiti mai te reira te huru, ei reira vau e faaite atu ai ia outou i te hoê tamaiti o te nehenehe e faatupu i te semeio na te Fatu i roto i te misioni e i roto i to’na oraraa taatoa » (« To the ‘Youth of the Noble Birthright’ », Ensign, Me 1986, 45).
E te mau metua o teie mau feia apî tamaroa e feia apî tamahine nehenehe, te horo‘a’tu nei matou ia outou i te hopoi‘a mo‘a ia haapii i ta outou mau tamarii i te mau parau haapiiraa o te autahu‘araa mo‘a. E mea ti‘a i ta outou mau tamarii ia ite i to ratou apî-roa-raa ra i te haamaitairaa ia farii i te autahu‘araa mure ore o te Fatu, e eaha te ti‘a ia ratou iho ia rave e farii ai ratou i te reira mau haamaitairaa.
E te mau episekopo, te mau nei outou i te mau taviri o te autahu‘araa no te faatere i te feia apî tamaroa o te Autahu‘araa a Aarona, no te parahi i roto i te apooraa e o ratou e no te haapii ia ratou i ta ratou mau hopoi‘a no te autahu‘araa. E mata na outou i te hapapû e, te mau tamaiti tata‘itahi tei ti‘amâ no te farii i te Autahu‘araa a Aarona, te maramarama ra oia i te mau titauraa e te haamaitairaa e tae mai i ni‘a ia’na i roto i to’na ti‘araa ei taata tei mau i te autahu‘araa. A tauturu ia’na ia haapii i te faaohipa i te autahu‘araa i teie nei na roto i te horo‘araa ia’na i te mau ohipa faufaa e na roto i te tautururaa ia’na ia tavini e ia tauturu ia vetahi ê.
E te feia apî tamaroa e, te faaue atu nei au ia outou ia patu i to outou oraraa i ni‘a i te hoê niu o te parau mau e te parau ti‘a. O te reira ana‘e te niu e vai papû ai i mua i te mau aroraa o teie nei oraraa e o te vai e amuri noa’tu. Te autahu‘araa ta outou e mau nei, e horo‘araa taa ê ïa, no te mea te taata tei horo‘a mai i te reira, o te Fatu iho ïa. A faaohipa i te reira, a faarahi, e a ora ia ti‘amâ outou i te reira. Te hinaaro nei au ia ite outou e, e iteraa papû taa ê to‘u iho no to’na mana. Ua rau te huru to’na haamaitairaa i to‘u oraraa.
Te faaue atoa’tu nei au ia outou ia faataa outou i teie mahana, e e faatura outou i teie haamaitairaa rahi e ia faaineine ia outou no te haere i mua i roto i te toro‘a tata‘itahi o te Autahu‘araa a Aarona – diakono, haapii, e tahu‘a. A faaineine ia outou iho no te haamaitairaa rahi no te fariiraa i te Autahu‘araa a Melehizedeka, e titauhia ho‘i ia outou ia ti‘amâ outou no te farii i te reira hou a tavini ai outou ei misionare rave tamau. Te hinaaro nei te Fatu ia faaineine outou ia outou iho no Ta’na ohipa, te hopoi‘a rahi hoa râ o te horo‘ahia ia outou ia faaite i Ta’na evanelia i to te ao nei. Te fafau atu nei au ia outou e, mai te mea e, e faaineine outou ia outou no te farii i Ta’na autahu‘araa mo‘a, e ninii papû mai Oia i te mau haamaitairaa i ni‘a i to outou upoo. Te vaiiho atu nei au i teie faaiteraa na roto i te i‘oa o to tatou Fatu e Faaora, oia o Iesu Mesia ra, amene.