Te Haapiiraa mai e te Haapiiraa’tu i te Evanelia
Te mea hau atu i te faufaa o te huru ïa aore râ te varua a haapii ai te orometua haapii.
Ei melo no te peresideniraa rahi o te Haapiiraa Sabati, ua mana‘o vau e e ti‘a ia‘u ia haamata i ta‘u mau parau i teie nei po‘ipo‘i ma te parau atu, « Iaorana e te mau piahi ».
Ta‘u parau poro‘i i teie mahana na te taato‘araa ïa o te feia tei piihia no te haapii, noa’tu eaha te pŭpŭ i reira outou i te taviniraa e melo faafariu-apî anei outou aore râ e orometua haapii e rave rahi mau matahiti i te haapii-noa-raa.
Eita vau e paraparau atu no ni‘a i te « nahea » i te haapiiraa’tu « nahea » râ i te haapiiraa mai. Te vai nei te hoê huru-ê-raa mau i roto i te mea ta te hoê orometua e parau e te mea ta te mau piahi e faaroo aore râ e haapii mai.
A feruri na maa taime iti i te hoê orometua haapii tei faatupu i te hoê tauiraa i roto i to outou nei oraraa. Eaha te mea i roto ia’na tei faahaamana‘o ia outou i te mea i haapiihia, no te hinaaro i te ite i te parau mau no outou iho, no te faaohipa i to outou ti‘amâraa e ia rave, eiaha noa ia ravehia mai tei parauhia, ia haapii mai ra ? Eaha te mea i roto i teie nei orometua haapii tei faataa ê ia’na i te toe‘a o te mau orometua haapii ?
Ua parau te hoê orometua e e papa‘i buka tei manuïa : « Te mea tei hau roa’tu i te faufaa i roto i te haapiiraa mai o te huru ïa. Te huru o te hoê orometua haapii ».1
A tapa‘o na e te mea hau atu i te faufaa rahi i roto i te haapiiraa mai e ere ïa te rahiraa matahiti i riro mai ai te hoê orometua ei melo no te Ekalesia aore râ te rahiraa ite i te haapii o te hoê taata aore râ te ite iho o te orometua haapii no te evanelia aore râ te mau rave‘a no te haapii. Te mea hau atu i te faufaa o te huru ïa aore râ te varua e haapii ai te orometua haapii.
I roto i te apooraa haapiipiiraa a te feia faatere na te ao atoa nei, ua faati‘a o Elder Jeffrey R. Holland i teie nei aamu : « I roto i te mau matahiti e rave rahi, ua here au i te aamu ta te peresideni Packer i faati‘a no ni‘a i te orometua o te haapiiraa sabati, i to William E. Berret apîraa. Ua piihia te hoê taea‘e paari no te fenua Danemaka no te haapii i te hoê piha haapiiraa a te mau tamaroa ha‘uti e te maniania. … Aita oia e parau maitai i te reo marite ; te vai noa ra to’na tuuraa reo Danemaka teiaha. E mea paari roa oia, e maa rima huru rahi no te taata faaapu. Ua titauhia ia’na ia haapii i teie nei mau tamaroa oviri 15 matahiti te paari. I roto i te tereraa mau, e au ra eita roa’tu teie nei faanahoraa e tano maitai roa ra. I parau noa na te taea‘e Berrett – e teie te tuhaa ta te peresideni Packer i faahiti – ua haapii noa teie taata ia ratou ; e taa ê noa’tu i taua mau fifi ra, e taua mau taoti‘araa ra, ua putapû te aau o taua mau tamaroa ha‘uti e te maniania e 15 matahiti te paari e teie taata e ua haataui i to ratou ra mau oraraa. E teie te iteraa papû o te taea‘e Berrett « Ua nehenehe ia matou ia tamahanahana i to matou mau rima i te auahi no to’na faaroo ». 2
E here te mau orometua tei manuïa i te haapiiraa i te evanelia. E mea anaanatae ratou i te evanelia. E no te mea ua here ratou i ta ratou mau piahi, te hinaaro nei ratou e ia mana‘o ratou mai ia ratou i mana‘o e ia ite i te mau mea ta ratou i ite. Te haapiiraa i te evanelia o te faaiteraa ïa i to outou here no te evanelia.
Te mau taea‘e e te mau tuahine, eita te huru o te hoê orometua haapii e haapiihia, e mea haruhia mai râ.3
No reira, nahea ïa ia faatupu i te huru i titauhia no te riro ei orometua haapii maitai ? Te hinaaro nei au e aparau atu e maha ture tumu no ni‘a i te haapiiraa i te evanelia.
A tahi, a tai‘o rahi i te mau papa‘iraa mo‘a. Eita e nehenehe ia tatou ia here i te tahi mea tei ore i itehia e tatou. A faatupu i te peu no te tai‘oraa i te mau papa‘iraa mo‘a i te mau mahana atoa, taa ê atu i te faaineineraa no ta outou haapiiraa. Hou e nehenehe ai ia tatou ia haapii i te evanelia e ti‘a ïa ia tatou ia ite i te evanelia.
Te faaherehere noa ra te peresideni Monson i te haamana‘oraa i te orometua o te Haapiiraa Sabati i to’na apîraa. Ua parau oia e : « I to‘u tamariiraa i raro a‘e au i te arata‘iraa a te hoê orometua haapii maitai roa tei faaurûhia e tei faaroo e o tei here ia matou. To’na i‘oa o Lucy Gertsch. I roto i ta matou piha Haapiiraa Sabati, ua haapii oia ia matou no ni‘a i te hamani-raa-hia o te ao, te hi‘araa o Adamu, te tusia taraehara a Iesu. Ua arata‘i mai oia i roto i ta’na piha haapiiraa te mau manihini hanahana mai ia Mose, Iosua, Petero, Toma, Paulo e oia atoa te Mesia. Noa’tu e aita matou i ite mata atu ia ratou, ua haapii râ matou i te here, te faatura e ia riro mai ia ratou ra te huru ».4
Ua nehenehe ia Lucy Gertsch ia ani i teie nei mau manihini hanahana ia tomo mai i roto i ta’na piha haapiiraa no te mea ua matau oia ia ratou. Ua riro ratou ei mau hoa herehia e ana. No reira, ua haapii atoa ta’na mau piahi i te « here, te faatura e ia riro mai ia ratou ra te huru ».
Ua parau te Fatu ia Hairamu Semita, « e titau i te faaite i ta‘u nei parau, ia na mua râ i te noaa i ta‘u nei parau ».5 Ua riro teie faaararaa no tatou tata‘itahi.
Ua faauea te Fatu ia tatou ia imi i te mau papa‘iraa mo‘a,6 ia oaoa ia ratou,7 e ia faaherehere ia ratou.8 A imi u‘ana ai e a feruri ai tatou i te parau a te Fatu, e parahi mai ïa To’na Varua i piha‘iho ia tatou. E e ite ïa tatou i To’na ra reo.9
I muri noa‘e i to‘u pii-raa-hia ei peresideni tĭtĭ, ua farii to matou peresideniraa tĭtĭ i te haapiipiiraa a te hoê Hitu Ahuru Area. I roto i te haapiipiiraa, ua ui au i te hoê uiraa ta’na ho‘i i pahono, « E uiraa maitai roa te reira. E haere na tatou i te Buka Arata‘i a te Ekalesia no te pahonoraa ». Ua haere ihora matou i roto i te buka arata‘i, e te vai ra i reira te pahonoraa i ta‘u uiraa. Te tahi taime i muri mai i roto i ta matou haapiipiiraa, ua ui au i te tahi atu uiraa. Ua pahono faahou mai oia, « E uiraa maitai. E hi‘o na tatou i roto i te buka arata‘i ». Aita vau i tamata faahou i te ui i te tahi atu mau uiraa. Ua feruri au e e mea maitai a‘e ia tai‘o i te buka arata‘i.
Ua feruri au mai taua taime ra e e nehenehe ta te Fatu e horo‘a i te hoê â pahonoraa ia tatou tata‘itahi ia haere ana‘e tatou Ia’na no te mau mana‘ona‘oraa aore râ uiraa. E nehenehe Ta’na e parau mai, « e uiraa maitai te reira. Mai te mea e tai‘o faahou outou i te Alama pene 5 aore râ te Parau Haapiiraa e te Mau Parau Fafau tufaa 76, e haamana‘o ïa outou e ua parau a‘e na vau ia outou no ni‘a i teie uiraa ».
Te mau taea‘e e te mau tuahine, e ere te ture rahi no te ra‘i no te mea ra e tapiti te Fatu i te parau ia tatou tata‘itahi i te mea Ta’na i heheu a‘e na ia tatou paatoa. Tei roto i te mau papa‘iraa mo‘a te mau parau a te Mesia. E reo ratou no te Fatu. E haapii te mau papa‘iraa mo‘a ia tatou ia faaroo i te reo o te Fatu.
Te piti, a faaohipa i roto i to outou oraraa te mau mea ta outou i haapii mai. I to Hairamu Semita hinaaroraa ia riro ei tuhaa no teie ohipa rahi no te mau mahana hopea nei, ua parau te Fatu ia’na, « inaha, o teie ta oe ohipa, ia haapa‘o i ta‘u mau faaueraa, oia ïa, ma to oe itoito atoa, to oe mana‘o e ma to oe puai ho‘i ».10 Ta tatou ohipa matamua roa e tei hau atu i te faufaa ei orometua, o te haapa‘oraa ïa i te mau faaueraaa ma to tatou itoito atoa, to tatou mana‘o e to tatou puai ho‘i.
Te toru, a imi i te tautururaa no te ra‘i mai. A ti‘aoro i te Fatu no To’na Varua, ma te itoito o to outou aau. Te faaite nei te mau papa‘iraa mo‘a, « mai te mea e ore roa outou e farii i te Varua ra e ore ho‘i outou e haapii atu ».11 Te auraa, noa’tu e faaohipa outou i te mau rave‘a tano atoa no te haapii, e ia ore te Varua eita ïa te haapiiraa mau e tupu.
Te ohipa a te orometua o te « tautururaa i te taata tata‘itahi ia rave i te hopoi‘a no te haapiiraa mai i te evanelia – no te faaara i roto ia ratou te hiaai ia tuatapapa, ia taa e ia ora i te evanelia ».12 Te auraa, ei mau orometua e ti‘a ia tatou eiaha e faatumu noa i ni‘a i ta tatou ohipa, i ni‘a râ i te mau rave‘a e tauturu ai tatou ia vetahi ê ia haapii mai e ia ora i te evanelia.13
Eaha te taime hopea i tuturi ai outou no te pure e i ani ai outou i te Fatu, eiaha noa no te tauturu ia outou e ta outou haapiiraa no te tauturu atoa râ ia outou ia ite e ia pahono i te mau hinaaro o te piahi tata‘itahi i roto i ta outou piha haapiiraa ? Eiaha no te mea e mea rarahi roa te piha eita ïa e nehenehe ia outou ia pure no te faaurûraa e nahea ia haaputapû i te aau o te piahi tata‘itahi.
E huru ihoa no te mau orometua ia ite i to ratou paruparu. E ti‘a ia outou ia ite « e aita roa’tu te faito matahiti e te paari e te haapiiraa i titauhia no te aparauraa’tu i te Fatu e To’na Varua ».14
E mea papû te mau fafauraa a te Fatu. Mai te mea e imi outou ma te aau tae i te mau papa‘iraa mo‘a e ia haaputu te reira i roto i to outou mau feruriraa te mau parau no te ora, mai te mea e haapa‘o outou i te mau faaueraa ma to outou aau atoa e ia pure no te piahi tata‘itahi, e haapopou outou i te hoaraa o te Varua Maitai e e farii outou i te heheuraa.15
Te maha, te mau taea‘e e te mau tuahine, e mea faufaa rahi roa ia faaohipa tatou i to tatou ti‘amâraa e ia rave, ma te oti‘a ore, mai te au i te mau faaiteraa a te Varua ta tatou e farii.
Ua haapii te peresideni Thomas S. Monson : « E ara tatou. E tia’i tatou. E faaroo tatou i taua reo iti ha‘iha‘i ra. Ia parau ana‘e oia, e haapa‘o te mau tane e te mau vahine paari. Eita roa te mau faaueraa a te Varua e faataimehia ».16
Eiaha e mata‘u i te faaohipa i to outou ti‘amâraa e ia rave mai te au i te mau mana‘o e te mau faaiteraa ta te Varua o te Fatu e tuu i roto i to outou aau. Eita paha outou e papû maitai roa i te haamataraa, te fafau atu nei râ vau ia outou e te mau ohipa maitai e te oaoa roa‘e ta outou e ite ei orometua haapii e tupu ïa ia auraro ana‘e outou i te hinaaro o te Fatu e ia pee ana‘e outou i te mau faaiteraa ta outou e farii no ô mai i te Varua Maitai ra. E haapuai to outou iteraa rau i to outou faaroo e e horo‘a ia outou te itoito rahi a‘e no te rave i te mau mahana i mua nei.
E te mau orometua, ua riro outou ei hoê o te mau semeio rahi no teie nei Ekalesia. E hopoi‘a mo‘a ta outou. Te here nei matou ia outou e te ti‘aturi nei matou ia outou. Ua ite au e mai te mea e imi tatou i te mau papa‘iraa mo‘a e ia ora parau-ti‘a tatou no te farii i te hoaraa a te Varua Maitai, e haamanuïa ïa te Fatu ia tatou i roto i to tatou mau piiraa e mau hopoi‘a ia nehenehe ia tatou ia rave faaoti i ta tatou parau no ô mai i te Fatu ra. Ia nehenehe ia tatou paatoa ia na reira, o ta‘u ïa pure, i te i‘oa o Iesu Mesia, amene.