Te mau Mea Faufaa A‘e
Mai te mea e, aita i ti‘a ia outou ia farii i te oaoa no te vitiviti o te tere o te oraraa e to’na mau pe‘ape‘a e rave rahi, teie paha ïa te taime maitai no te faatumu ia tatou i ni‘a i te mau mea faufaa a‘e.
E mea faahiahia ia ite i te rahiraa ohipa ta tatou e apo mai no ni‘a i te oraraa na roto noa i te hi‘oraa i te natura. Ei hi‘oraa, na roto noa i te hi‘oraa i te mau reni haati i ni‘a i te tumu raau,e nehenehe ta te mau taata aravihi no te pae ihi, e faaite mai i te huru o te ahura‘i e te tupuraa o te mau raau e rave rahi hanere e tauatini roa’tu matahiti i ma‘iri. Te hoê o te mau mea ta tatou e apo mai na roto i te tuatapaparaa i te tupuraa o te tumu raau maori râ, ia tae i te tau e mea maitai te mau rave‘a faatupuraa, e tupu ïa te mau raau mai tei matarohia. Ia tae râ i te mau tau e ere te mau rave‘a faatupuraa i te mea maitai, e faataere ïa te raau i to’na tupu no te horo‘a i to’na puai taatoa i roto i te mau mea tumu e titauhia no te ora.
I teie taime te feruri ra paha outou e, « Mea nehenehe e e mea maitai te reira mau mea, eaha ho‘i te tuatiraa i ni‘a i te parau no te tereraa manureva ? » Na reira, e faataa’tu vau ia outou.
Ua tere a‘e nei outou na ni‘a i te manureva e a arepurepu ai te reva ? Te tumu rahi o te arepurepuraa o te taui-ta‘ue-raa ïa te tereraa o te mata‘i, e na te reira e faaaueue i te manureva mai ni‘a e i raro, i te atau e i te aui, e ia hurihuri. Ua hamanihia te mau manureva ia ore ratou e fifi i roto i te mau arepurepuraa hau atu i te puai i ta outou i farerei a‘e nei i roto i te hoê tere matarohia, tera râ, e faari‘ari‘arii hoa te reira i te mau horopatete.
I to outou mana‘o, eaha te ohipa ta te mau pairati e rave ia farerei ratou i te arepurepuraa ? Te hoê piahi pairati e feruri paha oia e, e mea maitai ia tura‘i faahou i te tere o te manureva no te mea, e mahuti oioi atoa ïa te manureva i rapae i te arepurepuraa. Tera râ, te reira paha te ohipa hape ia rave. Te mau pairati aravihi ua taa ia ratou e, te vai ra hoê faito tere e au i te manureva ia tere na roto i te arepurepuraa o te faaiti i te fifi ta te arepurepu e faatupu. Te auraa, i te rahiraa o te taime, o te faaitiraa mai ïa i te tere o te manureva. Hoê â huru teie e te tua ateni i ni‘a i te purumu.
No reira, e mea maitai roa ia haere marû rii, haapapû te tere, e ia faatumu i ni‘a i te mau mea faufaa ia farerei ana‘e i te mau fifi.
Te Faito Tere o te Oraraa o teie Tau
E haapiiraa ohie roa teie e te faufaa atoa ho‘i ia apo mai. E mea papû maitai te reira haapiiraa no te tumu raau e aore râ, no te arepurepuraa, tera râ e mea maere ia ite e mea ohie ia tau‘a ore i teie haapiiraa, no te faaohiparaa i teie mau parau tumu i roto i to tatou oraraa i te mau mahana atoa. Ia rahi ana‘e te pe‘ape‘a, ia tupu mai te ahoaho, ia topa mai te ati rahi, e mea pinepine tatou i te tamata ia tape‘a noa i te tere puai e aore râ, ia haapuai roa’tu â, ma te feruri e, ia puai atu to tatou tere, e vitiviti atoa’tu ïa tatou i te mahuti i rapae.
E au ra e, te hoê o te mau huru o te oraraa no teie tau, o to tatou ïa tere, haere noa i te puairaa, noa’tu te arepurepu e aore râ, te mau fifi.
Ia vai parau-ti‘a noa ; e mea ohie a‘e ia rahi ta tatou ohipa. E nehenehe tatou paatoa e feruri i te hoê tapura ohipa e î roa’tu to tatou taime. Te feruri atoa nei te tahi pae e, to ratou maitai, tei te huru ïa te roa o ta ratou tapura ohipa e rave. E faaî hope roa ratou i te mau area atoa o to ratou taime i te apooraa e i te tahi atu mau mea rii – e i roto roa’toa i te mau taime pe‘ape‘a e te rohirohi. Na roto i to ratou faaohipa-rahi-faufaa-ore-raa i to ratou oraraa, e mea pinepine ratou i te ite i te hitahita ia tupu i te rahi, te oaoa iti, e te faufaa ore o to ratou oraraa.
Te parauhia ra e, noa’tu te huru o te maitai, mai te mea e, e tura‘ihia te reira i te faito puai roa, e nehenehe e riro mai ei ino. E riro ta tatou rahiraa ohipa i te mau mahana ei mea maitai. E ia tae i te hoê taime e riro mai teie mau ohipa e mea teiaha e ei mau titauraa, o te haafifi roa ia tatou.
Eaha te rave‘a?
Ua ite te taata paari e e faaohipa oia i te mau haapiiraa o te mau reni faaati o te tumu raau e te arepurepu i roto i te reva. Te aro nei ratou i te mau tamataraa o te âpu atu ia ratou i roto i te opape rû o te oraraa nei. Te pee nei ratou i te a‘o « te vai ra â te tahi atu mau mea i roto i te oraraa nei ».1 Oia ho‘i, e faatumu ratou i ni‘a i te mau mea faufaa a‘e.
I roto i te hoê amuiraa rahi aita i maoro a‘e nei, ua haapii mai o Elder Dallin H. Oaks, « E mea ti‘a ia tatou ia haapae i te tahi mau mea maitai, ia nehenehe tatou ia ma‘iti i te tahi atu mea maitai a‘e, e aore râ maitai roa a‘e, no te mea, e faahotu te reira i te faaroo i te Fatu ia Iesu Mesia, e e haapuai te reira i to tatou utuafare ».2
Te imiraa i te mau mea maitai a‘e, e arata‘i te reira i te mau parau tumu rarahi o te evanelia a Iesu Mesia – oia ho‘i, te mau parau mau ohie e te nehenehe tei heheuhia mai ia tatou nei na te hoê Metua i te Ao ra here, mure ore e tei ite i te mau mea atoa. Teie mau tumu haapiiraa e te mau parau tumu faufaa, noa’tu e, e mea ohie i hoê tamarii ia taa, na te reira e horo‘a mai i te mau pahonoraa i te mau uiraa etaeta roa o te oraraa nei.
Te vai ra te haviti e te maramarama te itehia i roto i te ohie, aita râ tatou e au roa i te reira i te tahi taime, i te mea e, e hinaaro to tatou i te mau rave‘a faahiahia a‘e.
Ei hi‘oraa, aita i maoro i muri iho i te manuïaraa te mau astronautes e te mau cosmonautes i te faaohu i te fenua nei, ua ite a‘e ra ratou e, eita te tuira e papa‘i i roto i te reva. E no reira ua haamata a‘e ra te tahi mau taata maramarama i te imi i te rave‘a no te tatara i taua fifi ra. Ua pau e rave rahi tauatini hora e e rave rahi mirioni tara marite, tera râ i te hopea, ua hamani ratou i te hoê tuira e nehenehe e papa‘i i te mau huru vahi atoa, i roto i te mau huru anuvera atoa, e fatata i ni‘a i te mau huru tao‘a atoa. Te uiraa râ, e mea nahea te mau astronautes e te mau cosmonautes ia papa‘i, a tia’i noa ai ratou ia afaro taua fifi ra ? Ua faaohipa noa ïa ratou i te penitara.
Ua faahiti o Leonard de Vinci i te parau e, « te rave‘a ohie ra, te rave‘a maitai roa a‘e ïa. »3 Ia hi‘o tatou i te tumu o te mau parau tumu o te rave‘a no te oaoa, te rave‘a no te faaoraraa, e ite tatou e e mauruuru atoa ho‘i tatou i te ieie e te nehenehe o te paari o te Metua i te Ao ra, no to’na maramarama e te ohie. No reira, ia rave tatou mai Ta’na i faaue mai ra, te haamata ra ïa to tatou paari.
Te Mana o te mau Mea Tumu
Te faati‘ahia ra te aamu no te hoê taata faaineine tu’iroo no te ha‘uti faahoro popo marite, o Vince Lombardi to’na i‘oa ; i te mahana matamua o te faaineineraa e rave oia i te hoê oro‘a. E tape‘a oia i te hoê popo, e faaite i te mau taata ha‘uti, teie mau taata te ha‘uti nei i teie ha‘uti e rave rahi matahiti i teie nei, e a parau ai e, « E homa… teie te hoê popo ». E paraparau oia no ni‘a i te rahi e i te hoho‘a o te popo, nahea ia tu‘e, ia amo, e aore râ, ia horo‘a. I muri iho, e arata‘i oia i te pŭpŭ i ni‘a i te tahua ha‘utiraa e a parau ai e, « Teie te hoê tahua faahororaa popo ». E faahaere oia ia ratou e ati a‘e te tahua, ma te faaite i to’na mau faito, to’na rahi, te mau ture, e e mea nahea ia ha‘uti.4
Ua ite teie taata faaineine e, noa’tu te aravihi o teie mau ma‘ona, hoê noa iho rave‘a e riro ai ratou e ta ratou pŭpŭ ei mau taata faahiahia, na roto ïa i te arairaa ratou i te mau mea tumu. E pau ta ratou haapii i te mau huru pereraa atoa, mai te mea e, aita ratou e arai i te mau mea tumu o te pereraa, eita ratou e riro ei pŭpŭ aito.
Te feruri nei au te rahiraa o tatou ua maramarama tatou i te faufaa o te mau mea tumu. Te fifi noa, maori râ, i te tahi taime, ua nevaneva-rii-hia tatou i mua i te mau mea navenave a‘e paha ia hi‘ohia’tu.
Te mau materia nene‘ihia, te mau rave‘a haapurororaa, te mau matini e te mau tao‘a ha‘uti uira – e mau mea maitata‘i ana‘e ho‘i mai te mea e, e faaohipa-maitai-hia – e nehenehe te reira mau mea e riro ei rave‘a faaanaanataeraa ino e aore râ, ei mauhaa ino rahi no te faatupu otahi i te tahi e tahi.
Tera râ, i rotopu i te rahiraa reo e te ma‘itiraa, te ti‘a noa nei te Taata haehaa ra no Galilea ma te rima mahora. Ta’na poro‘i ohie roa : « a haere mai, a pee mai ia‘u ».5 E aita Oia e parau i roto i te hoê micro puai, e reo iti ha‘iha‘i râ.6 E mea ohie roa no te poro‘i tumu o te evanelia ia mo‘e i roto i te diluvi o te parau faaite e haruru mai nei i ni‘a ia tatou na te mau pae atoa.
Na te mau papa‘iraa mo‘a e te mau parau a te mau peropheta ora e horo‘a mai i te haapapûraa i te mau parau tumu e te mau tumu haapiiraa o te evanelia. Te tumu tatou e ho‘i ai i roto i te mau parau tumu hohohu, te mau tumu haapiiraa mâ, no te mea ïa e, o te reira te uputa e tae atu ai i te mau parau mau faufaa rahi. Te uputa te reira no te mau iteraa faufaa rahi eita e tae‘ahia i to tatou haroaroaraa na roto i te tahi atu raveraa. Teie mau parau tumu ohie, o te mau taviri ïa no te oraraa ma te au maite i piha‘iho i te Atua e te taata. E mau taviri te reira no te iriti i te mau maramarama o te ra‘i. E arata‘i te reira ia tatou i te hau, te oaoa e te ite ta te Metua i te Ao ra i fafau mai i Ta’na mau tamarii o te faaroo e o te haapa‘o i Ta’na parau.
E te mau taea‘e e te mau tuahine, e mea tano ia tatou ia haere marû rii, a rave hope i te mau mea o to tatou oraraa, a rotahi i ni‘a i te mau mea faufaa, a hi‘o i ni‘a, e a hi‘o i te mau mea faufaa a‘e. A haapa‘o maite i te mau ture tumu ta to tatou Metua i te Ao ra i horo‘a mai i Ta’na mau tamarii, o tei riro ho‘i ei niu no te hoê oraraa tahuti tao‘a rahi e te hotu i te mau fafauraa o te oaoa mure ore. Na te reira e haapii mai ia tatou « Ia ravehia teie mau mea ma te paari e ma te nahonaho ; aita ho‘i i hinaarohia ia horo [tatou] i te oioi e au ore i [to tatou] ra puai. E tena na, ia itoito [tatou] i au ai, [e] ia roaa te berabeio ».7
E te mau taea‘e e te mau tuahine, mai te mea e, e rave itoito tatou i te mau ohipa faufaa a‘e, na te reira e arata‘i ia tatou i te Faaora o te ao nei. « No reira tatou e parau ai no te Mesia, e oaoa ai i roto i te Mesia, e a‘o ai i te parau a te Mesia, e tohu ai i te Mesia, ia ite [tatou] i te tumu e hi‘ohia’tu e [tatou] no te matararaa [ta tatou] mau hara ».8 I roto i teie oraraa fifi, te aehuehu e te rû o teie tau, teie ïa te mea « o tei hau râ ».9
Eaha te mau mea tumu ?
Mai te mea e, e fariu atu tatou i te Metua i te Ao ra ra e ia imi i To’na ra paari no ni‘a i te mau mea faufaa a‘e, e haapii tatou ma te hopea ore i te faufaa o na autaatiraa e maha : i to tatou Atua, i to tatou utuafare, i to tatou taata tupu, e ia tatou iho. Mai te mea e hi‘opo‘a tatou i to tatou oraraa ma te hinaaro papû mau, e ite tatou e, i hea tatou i te opa‘i-ê-raa i te e‘a hau roa a‘e i te maitai. E iritihia te paruru no to tatou feruriraa, ei reira tatou e ite ai eaha te titauhia ia rave no te tamâ i to tatou aau e ia faatano faahou i to tatou oraraa.
A tahi, e mea mo‘a a‘e e te faufaa to tatou autaatiraa e te Atua. E mau tamarii varua tatou Na’na. O Oia to tatou Metua. To’na hinaaro, to tatou ïa oaoa. Ia imi tatou Ia’na, ia haapii tatou no ni‘a i Ta’na Tamaiti o Iesu Mesia, ia iriti tatou i to tatou aau i te faaururaa a te Varua Maitai, e papû maitai e e paruruhia to tatou oraraa. E ite tatou i te hau, te oaoa, e te îraa rahi a‘e mai te mea e, e imi tatou i te mau rave‘a atoa no te ora ia au i te rave‘a mure ore a te Atua e ia haapa‘o i Ta’na ra mau faaueraa.
E haamaitai atu tatou i to tatou autaatiraa i to tatou Metua i te Ao ra na roto i te haapiiraa mai no ni‘a Ia’na ; na roto i te paraparauraa Ia’na, te tatarahaparaa i ta tatou mau hara, e i te pee-itoito-raa ia Iesu Mesia ; no te mea « aore roa e taata e tae i te Metua ra, maori râ ei [te Mesia] ».10 No te haapaari i to tatou autaatiraa i te Atua e titauhia ia tatou ia faataa i te tahi mau taime papû maitai no te parahi o tatou ana‘e i piha‘iho Ia’na. Ia rotahi ma te hau i ni‘a i te pure o te taata iho e te tai‘oraa i te papa‘iraa mo‘a i te mau mahana atoa, ia titau ia vai ti‘amâ noa no te farii i te parau faati‘a no te hiero – teie te tahi mau faaohiparaa paari o to tatou taime e ta tatou mau tautooraa no te haafatata ia tatou i piha‘iho i to tatou Metua i te Ao ra. E mata na tatou i te haapa‘o i te aniraa a te papa‘i Salamo « A faatupua na, ia ite mai e o vau te Atua ».11
Te piti o ta tatou autaatiraa tumu e to tatou utuafare. I te mea ho‘i e, aore e manuïaraa ê atu e nehenehe e mono i te manuïa-ore-raa i roto i te utuafare,12 o teie ïa te hoê o te mau vahi matamua roa ta tatou e haapa‘o. E patu tatou i te mau autaatiraa utuafare hohonu e te maitai na roto i te rave-amui-raa i te mau ohipa ohie, mai te tamaaraa utuafare i te ahiahi, te pô utuafare, e na roto i te arearearaa. I roto i te autaatiraa utuafare, te here o te t-a-i-m-e, taime ïa ta tatou e horo‘a. Te horo‘araa i te taime no te tahi e te tahi o te taviri ïa e vai ai te au maite i roto i te utuafare. E paraparau tatou te tahi e te tahi, eiaha râ no te tahi e no te tahi. E haapii tatou na roto mai i te tahi e te tahi, e e oaoa tatou no to tatou mau taa-ê-raa e no to tatou mau vahi faito. E haamau tatou i te hoê taamuraa hanahana te tahi e te tahi na roto i to tatou haafatataraa i te Atua ma te tahoê i roto i te pure utuafare, te haapiiraa i te evanelia e te haereraa i te pureraa i te sabati.
Te toru o ta tatou autaatiraa tumu e to tatou taata tupu. E patu tatou i te reira autaatiraa hoê taata i te taime hoê – na roto i te iteraa i te mau hinaaro o vetahi ê, te taviniraa ia ratou, e te horo‘araa i to tatou taime e ta tatou mau tareni. Ua tupu te maere i roto ia‘u no te hoê tuahine tei teimaha i te mau titauraa o te matahiti paari e o te ma‘i, tera râ, ua faaoti oia e, noa’tu e, aita e ohipa rahi e oti ia’na, e nehenehe ra ta’na e faaroo. No reira ua hi‘ohi‘o oia i te mau taata e fifi to ratou e aore râ, te paruparu ra te mana‘o, e e faaea oia i piha‘iho ia ratou no te faaroo ia ratou. Ua riro mau oia ei haamaitairaa no te oraraa o te mau taata e rave rahi.
Te maha o te autaatiraa tumu e o tatou iho ia. E mea huru-ê-rii paha ia parau i te parau no te autaatiraa e o tatou iho, tera râ, o te reira mau hoa te parau. Te vai ra te tahi mau taata aita ratou e au ia ratou iho. E faaino e e haafaufaa ore ratou ia ratou iho i te mahana atoa e tae roa’tu ua hamata ratou i te riri ia ratou iho. Te hinaaro nei au e parau atu ia outou e, a haere marû rii, e a rave maa taime no te ite maitai a‘e ia outou iho. Haere a orihaere na roto i te natura, a mata‘ita‘i i te hitiraa mahana, a oaoa i te mau mea i hamanihia e te Atua, a feruri hohonu i te mau parau mau o te evanelia tei faaho‘i-faahou-hia mai, e a imi eaha to ratou auraa no outou iho. A haapii ia hi‘o ia outou iho mai ta te Metua i te Ao ra e hi‘o mai nei – ei tamahine e aore râ, ei tamaiti faufaa rahi Na’na tei mau i te mana hanahana.
A Oaoa i roto i te Evanelia Mâ
E te mau taea‘e e te mau tuahine, e mata na tatou i te imi i te paari. E fariu ana‘e tatou i ni‘a i te mau pape viivii-ore o te tumu haapiiraa o te evanelia a Iesu Mesia i faaho‘ihia mai. E inu ana‘e tatou ma te oaoa i te reira pape i roto i to ratou huru mau e te maramarama. Ua vetea faahou â te mau ra’i. Tei te fenua faahou nei te evanelia a Iesu Mesia ; e ta’na mau parau mau ohie, o te pû mau ïa no te oaoa !
E te mau taea‘e e te mau tuahine, oia mau, e tumu papû mau ta tatou no te oaoa. Mai te mea e, aita i ti‘a ia outou ia farii i te oaoa no te vitiviti o te tere o te oraraa e to’na mau pe‘ape‘a e rave rahi, teie paha ïa te taime maitai no te faatumu ia tatou i ni‘a i te mau mea faufaa a‘e.
E roaa te puai eiaha mai roto mai i te ohipa aehuehu, na roto mai râ i te vairaa i ni‘a i te hoê niu papû o te parau mau e te maramarama. Na roto atoa mai i te tuuraa i to tatou mana‘o e ta tatou tautooraa i ni‘a i te mau mea tumu o te evanelia a Iesu Mesia i faaho‘ihia mai. Na roto atoa mai i te faatumuraa te mana‘o i ni‘a i te mau mea hanahana e te faufaa a‘e.
E mata na tatou i te faaohie rii i to tatou oraraa. E rave ana‘e tatou i te mau tauiraa e titauhia no te rotahi i to tatou oraraa i ni‘a i te nehenehe hope o te e‘a ohie e te haehaa o te taata keretetiano – oia te e‘a e tae mau atu ai i te hoê oraraa papû, te oaoa e te hau. Te pure nei au no te reira e te vaiiho atu nei au i ta‘u haamaitairaa, na roto i te i‘oa mo‘a o Iesu Mesia ra, amene.