Te ora i to outou varua
Te iteraa i te ora i to tatou varua o te iteraa ïa i te hau o te varua e o te aau, o te reira te hopea o te haapiiraa e te peeraa i te haapiiraa tumu a te Mesia.
I te oire no Gothenburg, i Tuete, te vai ra hoê aroa purumu aano roa e i te hiti te mau tumu raau nehenehe. I te hoê mahana ua ite au i te hoê apoo i roto i te tumu o te hoê o te mau tumu raau, e no reira, ua hi‘o vau i roto e ua ite au e, ua apoo-roa-hia taua tumu raau ra. Oia mau ua apoohia, tera râ aita i pau ! Ua î roa i te mau huru pehu atoa.
Ua maere au i te mea e, te ti‘a noa ra â taua tumu raau ra. No reira ua hi‘o a‘e ra vau i ni‘a e ua ite atu ra vau i te hoê hatua aano ua haatihia i ni‘a i te ni‘araa o te tumu raau. I ni‘a i te reira hatua ua taamuhia te tahi mau niuniu, e o ratou iho ua taamuhia ïa i ni‘a i te mau fare fatata mai. Ia hi‘ohia na te atea, e au oia mai te tahi atu mau tumu raau ; ia hi‘ohia ana‘e râ i roto, i reira te taata e ite ai e, e tumu raau apoo, e ere râ i te tumu raau paari. E rave rahi matahiti na mua’tu na te hoê mea i haamata i te faaino i te reira tumu raau, maa vahi iti i ô nei e maa vahi iti i ô atu. Aita te reira i tupu i te hoê noa pô. Tera râ, mai te hoê tumu raau apî e tupu e a riro mai ai ei tumu raau etaeta, mai te reira atoa tatou ia tupu, te tahi taahiraa i muri i te tahi taahiraa, i roto i to tatou mau vahi maitai e a paari ai e ia î maitai, mai roto haere ti‘a mai i rapae, eiaha râ mai te tumu raau apoo.
E mea na roto i te Taraehara faaora a Iesu Mesia e roaa ai ia tatou te puai, ia ti‘a papû e ia etaeta e ia faaîhia to tatou varua – i te maramarama, te haro‘aro‘a, te oaoa, e te here. No te taato‘araa Ta’na aniraa « ia haere mai ia’na ra, e ia rave i to’na ra maitai ; e aita roa oia e faaore i te hoê tei hinaaro ia’na ra » (2 Nephi 26:33). Ta’na fafauraa oia ia :
« E haere mai outou ia‘u nei, e te feia atoa i haa rahi, e tei teiaha i te hopoi‘a, e na‘u outou e faaora.
« A rave mai i tau zugo i ni‘a ia outou, e ia haapiihia outou e au, te maru hoi au e te haehaa o te aau : e e noaa ho‘i te ora i to outou varua » (Mataio 11:28‐29).
Teie ta Joseph F. Smith i parau no ni‘a i taua ora ra : « I to‘u feruriraa, to’na auraa, o te tomoraa ïa i roto i te ite e i te here o te Atua, ia faaroo i Ta’na opuaraa e i Ta’na faanahoraa, e tae roa’tu e, e ite tatou e, ua ti‘a tatou, e aita ho‘i tatou e imi haere noa ra i te tahi atu mea, aita tatou e aueue i te mata‘i o te haapiiraa tumu, e aore râ, i te paari huna o te taata nei na roto i te reira ratou e tia‘i ai ia haavare. Ua ite tatou i ta te Atua haapiiraa tumu, e aita tatou e ui faahou i te tahi taata no te reira ; e fariihia to ratou mau feruriraa, to ratou mau mana‘o e to ratou mau ite mana‘o-ore-hia. Te taata tei tae‘ahia ia’na taua faito o te faaroo i te Atua ra, aita ho‘i e tapitapi e aita e mata‘u faahou i roto ia’na, tei roto ïa oia i te ‘ora o te Atua’ » (Te Mau Haapiiraa a te Mau Peresideni o te Ekalesia : Joseph F. Smith [1998], 56).
Te iteraa i te ora i to tatou varua o te iteraa ïa i te hau o te varua e o te aau, o te reira te hopea o te haapiiraa e te peeraa i te haapiiraa tumu a te Mesia, e i te riroraa ei rima toro no te Mesia no te tavini e no te tauturu ia vetahi ê. Na te faaroo ia Iesu Mesia e te peeraa i Ta’na mau haapiiraa e horo‘a mai ia tatou i te hoê tia‘iraa pautuutu, e e riro mai teie tia‘iraa ei tutau paari no to tatou varua. E nehenehe tatou e riro ei mau taata etaeta e te aueue ore. E nehenehe tatou e farii i te hau vai măoro ; e nehenehe tatou e tomo i roto i te ora o te Fatu. Ia fariu ê râ tatou i te maramarama e te parau mau, i reira te mana‘o apoo pau, mai to te tumu raau ra, e ô mai ai i roto i te mau piha o to tatou varua, e e riro tatou i te tamata i te faaî i taua pau ra i te mau mea aore to ratou e faufaa vai măoro.
Ia hi‘o tatou i to tatou oraraa ei mau tamarii varua hou a haere mai ai tatou i te fenua nei e i te tahuti nei i roto i teie oraraa, ua riro ïa teie oraraa i te fenua nei ei taime poto roa.
E mahana atoa râ no te mau rave‘a mai te mea e, e ma‘iti tatou ia haapa‘o i te aniraa eiaha e haamau‘a i te taime o to tatou tamataraa (hi‘o 2 Nephi 9:27). Te mau mana‘o ta tatou e tape‘a nei i roto i to tatou feruriraa, te mau aehuehu ta tatou e faatupu i roto i to tatou aau, e te mau ohipa ta tatou e faaoti ia rave, e hopearaa papû to te reira i ni‘a i to tatou oraraa, i teie mahana e amuri a‘e.
Te tahi peu maitai roa o te faateiteiraa ïa i ta tatou hi‘oraa i te mau mahana atoa ia ti‘a ia tatou ia tape‘a noa i te hoê hi‘oraa mure ore o te mau mea ta tatou e faanaho e e rave, mai te mea hoa râ e, te ite ra tatou i te tahi huru faatia‘iraa e tae roa’tu i te hoê ananahi e tae mai no te rave i te mea ta tatou i ite e, e ti‘a ia tatou ia rave i teie taime a vaivai a‘e â to tatou mahana i teie taime.
I ni‘a i to tatou haere‘a te tauturuhia nei tatou e te faaururaa a te Varua i roto i ta tatou mau ma‘itiraa. I teie nei, mai te mea e, e faaoti tatou e pato‘i i te maramarama e te ite i roto ia tatou, e tupu ïa te mana‘o ino i roto ia tatou, e aita ïa tatou e maitai. Tera râ, ua riro te mana‘o ino ei haamaitairaa i te mea e, e haamana‘o oioi noa tatou e, ua tae i te taime no te tatarahapa. Mai te mea e, te vai ra te haehaa i roto ia tatou e te hinaaro ia rave i te maitai, e tupu ïa te hinaaro rahi i roto ia tatou ia haa oioi no te taui i to tatou mau haere‘a, area tei te‘ote‘o ra e tei titau ia « riro ho‘i ei ture [ratou iho ra] » (PH&PF 88:35) e vaiiho ïa ratou ia Satane ia arata‘i « ia ratou i te a‘i ma te taura vavai, ia ruuruu oia ia ratou i ta’na mau taura etaeta e amuri noa’tu » (2 Nephi 26:22) maori râ e tomo atu te varua tatarahapa i roto i to ratou aau. Eita te peeraa i te mau faaururaa iino e horo‘a mai i te mana‘o hau, no te mea, te hau, e horo‘a ïa no ô mai i te Atua ra, e te Varua ana‘e o te Atua te horo‘a mai i te reira. « E ere roa te parau-ino i te oaoa » (Alama 41:10).
I roto i ta tatou mau ohipa i te mau mahana atoa, e mea pinepine te mau ohipa iti e te ohie i te faatupu i te mau mea e vai măoro (hi‘o Alama 37:6‐7). Ta tatou parau, ta tatou ohipa, te huru no ta tatou pahonoraa, na teie mau mea e faauru eiaha ia tatou noa iho, i te mau taata atoa râ ati a‘e ia tatou. E nehenehe tatou e patu, e aore râ, e nehenehe e vavahi. Te hoê hi‘oraa ohie e te ti‘a o te hoê aamu i faati‘ahia no ni‘a i to‘u mama ruau. Ua faaue oia i te hoê o ta’na mau tamarii ia haere e hoo mai i te huero moa. Ua haere paha teie tamarii ti‘aturihia na ni‘a i te purumu ma te oaoa no te ho‘i mai i te fare, tera râ, te rahiraa o te huero moa ua papararî ïa i to’na taeraa mai i te fare. Tei reira atoa te hoê hoa o te utuafare, e ua faahepo oia i to‘u mama ruau ia tama‘i i tera tamarii no te hape ta’na i rave. Tera râ, ua parau maira o mama ruau ma te hau e te paari e, « aita, eita te reira e faaora faahou i te mau huero moa. E faaohipa noa tatou i te toe‘a e vaira e e hamani tatou i te tahi mau « pancakes [faraoa farai) ia nehenehe tatou paatoa ia oaoa ».
Ia ite ana‘e tatou i te arai i te mau ohipa ha‘iha‘i e te ohie o te mau mahana atoa na roto i te hoê raveraa paari e te faauruhia, e faaururaa maitai ta te reira e horo‘a mai e o te haapaari i te au-maite-raa i roto i to tatou varua e o te patu e o te faaitoito i te mau taata ati a‘e ia tatou nei. E parau mau teie no te mea, te mau mea atoa ho‘i te titau mai ia tatou ia rave i te maitai, « ua haponohia mai ïa e te mana e te hamani maitai a te Mesia ; no reira e ti‘a ai outou i te ite papû roa e, no ô mai ïa i te Atua ra » (Moroni 7:16).
I teie nei, tera tumu raau apoo ta‘u i parau atu ia outou, aita ïa e ti‘a faahou ra. Ua tuu te tahi mau taure‘are‘a i te mau haitiri i roto i te apoo, e ua paapaa taua tumu raau ra. Eita oia e ora faahou, e e mea ti‘a ia faahi‘ahia i raro. A ara i te mau mea e haamou na roto mai, e mau mea rarahi anei e aore râ, e mau mea ha‘iha‘i anei ! E nehenehe te reira e riro mai ei hoê tupita e o te faatupu i te pohe pae varua.
Ia rotahi râ tatou i te mata i ni‘a i te mau mea e turu i te hoê hau vai măoro o te varua e o te aau. Ei reira « to outou ti‘aturiraa e puai roa ai i mua i te aro no te Atua » (PH&PF 121:45). Te fafauraa no te tomo i roto i te ora o te Fatu, no te farii i te horo‘araa o te hau, e mea atea te reira i te oaoa tahuti o teie oraraa. E horo‘araa te reira no te ra‘i mai : « E hau ta‘u e vaiiho ia outou nei, o to‘u nei hau ta‘u e hô atu no outou ; e ere mai ta to te ao nei horo‘a ta‘u horo‘a ia outou. Eiaha e taiâ to outou aau, eiaha ho‘i e măta‘u » (Ioane 14:27). Tei Ia’na te mana no te faaora e no te faaitoito i te varua. O Iesu Mesia Oia, o ta‘u e faaite papû nei na roto i te i‘oa o Iesu Mesia ra, amene.