Koroboki aika tabu Bon Ana Taeka te Atua

Iroun JoAnn Child ao Cristina Franco

“Kakukurei ngkami n ana taeka Kristo; bwa taraia, a na tuangko ana taeka Kristo bwaai aika ko riai ni karaoi” (2 Nibwaai 32:3).

N ana Boki Moomon, Riaai e tuangiia ana utu taekan miina, ibukin te kai ni kamaiu. Inanon miina, e tangiriia ana utu Riaai bwa ana katoonga uaan te aroka, ae “moan te kangkang riki nakon uaanikai nako” (1 Nibwaai 8:15). E nooria aomata aika a mwaiti ake a waaki n toua te kawai are e kaineti nakon te kai ni kamaiu, ao a bua kawaia tabeman n te bubu n nang ae roo ao a kitana te kawai ao a bua. Tabemwaang a waaki n taua te kai te biti are e bangaki nakon te aroka. A mwananga, ni kamatoaia n taua te kai te biti ni karokoa are a roko n te aroka ao a kana uaana, are e kona ni kakukurei nanoia. (Tara 1 Nibwaai 8.)

Natin Riaai te mwaane ae Nibwaai e tataro ni kan ataa nanon bwaai ake e a tia n noori tamana. E kaotaki nakon Nibwaai te mii ae ti tebo ma are miia tamana. Te Tamnei e reireina Nibwaai bwa te kai ni kamaiu e bon tei ibukin ana tangira te Atua. E kaotaki Iesu Kristo nakon Nibwaai, natin te Atua, e reireiniia ao ni kakabwaiaia aomata iaon te aba. E reireinaki naba Nibwaai bwa te kai te biti e tei ibukin ana taeka te Atua. (Tara 1 Nibwaai 11.)

Koroboki aika tabu Bon Ana Taeka te Atua. Warekan koroboki aika a tabu aiaron kamatoan tauan te kai te biti. Ti ataa te bwai ae tangiria Iesu Kristo ni kan karaoia ao n taekinna. Ti na karekea te mwaaka ni kaaitarai karirii ao ni karaoa kawaira nakon te kai ni kamaiu ao n namakina ana tangira te Atua.

Te Waaki ae na Karaoaki

Tarai kabwarabwaraan koroboki aika a tabu ibukin kariaia iaon iteraniba 65 ni kakaai nanon bwaai are a noori Riaai ao Nibwaai inanon te mii ni burabeti ibukin te kai ni kamaiu. Korei ao kabonganai korotamnei n tibwai bwaai ake ko a tia n reiakin ma tabeman. Ko kona ni bubutia am karo ngkana ko kona n tibwa te karaki inanon te bootaki n utu n te tairiki.

Kamataata n te Korotamnei iroun Dilleen Marsh

Kai ni Kamaiu

1 Nibwaai 11:21–22

Te Kateitei ae Bubura

1 Nibwaai 8:20

I Nuukan te Nangiroo

1 Nibwaai 12:17

Te Kai te Biti

1 Nibwaai 11:25

Aomata aika a Bwainingare

1 Nibwaai 8:26–27

Kateitei ae Bubura

1 Nibwaai 11:35–36

Te Kawai ae Eti man Irariki

1 Nibwaai 8:20

Sariah, Sam, ao Nibwaai

1 Nibwaai 8:13–14