Banna ni Katoto Rimoa, Berita aika Boou
Te Maroro e bon aki bebete irou, ma I karekea te korakora man aia banna ni katoto aika kaokaonimaki man koroboki aika tabu.
E ngae ngke I kunei angiin kaeka aika rangi ni kakukurei, I korakai n taraan te maroro. I bon tuai man maroro ma imwaain au mition, ao ngke I a okira mweengau imwiin uoua te ririki, I namakinna ae e karako au atatai iai.
Inanon te bwiina te ririki man te tai anne, taraakina ao I a kataa “ni kabane are [I kona] ni karaoia” (2 Nibwaai 25:23) ni mare—te bwai are I a tia ni beritanaki iai inanon ana kakabwaia te tamanuea—ma akea te tokanikai ae reke. N taai tabetai ao I namakinna bwa I kaririaki nakon te bwarannano ni kakaaean temanna, ao inanon taai aika I rawawata iai, I a tia n tang inanon te tataro. “Taiaoka buokai. I aki ataa te bwai ae N na karaoia.”
N te tai naba arei, I a kunea te karaunano ae bati inanon katoto man koroboki aika a tabu. Teniua karaki aika imwiina a bon rangin korakora ni buokakiu n onimakinan Tamara are i Karawa ao Ana babaire.
Iotebwa mai Aikubita: Kateimatoa te Onimaki ao te Kantaninga inanon te Atua
Iotebwa e bon kairoroaki n anaaki man mweengana ngke 17 ana ririki ao ni kanakoaki ma te matoa nakon te aba ae ianena ike tabeman a tibwaua ana koaua n te aro. N aki ongea te kataaki ae matoatoa aei, e kaawakina te anua ae tamaroa ao n teimatoa ni kaokaonimaki nakon ana mwaatita ao nakon te Atua. (tara Karikani B’ai 37; 39–41). N arona naba, inanon 13 te ririki e rinanon teuana imwiin teuana te bwai ae aki kantaningaaki. Ana mwakuri korakora e riki bwa te bwai ae uarereke ma a katikua n te karabuuti, ike e teimatoa n tiku iai nikarokoa ae e a mwaane.
I mimii n taai tabetai ngkana Iotebwa e a tia n iangoia bwa te Atua e a tia ni mwanuokinna ke ngkana e a tia n titiraki Iotebwa bwa maanra tikuna inanon te karabuuti ke ngkana e na kona ni kainaomataaki. I mimii ngkana mii ake Iotebwa e a kaman tia ni kamiiaki iai mai imwaaina inanon maiuna (tara Karikan B’ai 37:5–11) e anganna te kantaninga ibukin kanakoraoan ana bong aika a na roko.
Ni koauana, te Atua e bon uringa Iotebwa, n aron are E a tia naba iroun tinan Iotebwa, Rakera (tara Karikan B’ai 30:22). E kakabwaiaki Iotebwa ni maiu raoi e ngae ngke inanon kanganga aika aki kakukurei. N onean mwiin ana rinerine ni kaaitara, n un ke ni kamaraia te Atua, Iotebwa e kammwakura ana onimaki ae kamimii. N tokina, e a bon kakabwaiaaki n ae rangin korakora.
Ti kona ni kaririaki bwa ti na ngurengure iaon oin marakira, ni kamatakiira man ara konaa n noori ana kakabwaia te Atua are e a tia n anganiira. Ma kateimatoaan te onimaki ao te kantaninga a kona n uota te kakabwaia ae korakora, n aron are a karaoia ibukin Iotebwa. Ao e ngae naba ngke e aki kabooaki mwiin ara onimaki n aron are ti tangiria, kamatoaakina bwa te onimaki e kona n teimatoa ni buokiira ni maiuakin maiu aika a kakukurei.
Te bwai are e a tia n rinanona Iotebwa bon kakoaua ibukin ana tararua ao mwaakan ma wanawanan te Atua. Inanon ririki ana konabwai Iotebwa e taraa n akea te tabo ae e kona n roko iai, ma rinanon bain te Atua, Iotebwa e bon kainaomataaki man te karabuuti ao ni karietataaki tii teutana iaan Bwarao (tara Karikan B’ai 41:41–43). E kona Iotebwa ni kaman noora ke ni kantaningai taai aika angaraoi aikai?
N taai tabetai ti kata ae korakora ni karekea te bwai, ma oin ara kekeiaki, e boni ngae ngke a korakora, a bon aki tau ibukin te mwakuri. I ataia Tamara are i Karawa e kona ni kakabwaiaira ibukin ara onimaki ao ara ongeaaba ma te kakabwaia riki ae korakora nakon ae ti kantaningaia n aron te moan tai. I onimakina bwa ngkana a tamaroa anuau ao ni karaoi bwaai aika a kanganga, n aron are e a tia ni karaoia Iotebwa, n te tai—ana tai te Uea—E kona n “[kaota] baina aika a tabu” (Itaia 52:10). Au mwakuri e na bon aki kona n ae e na akea uaana. E bon uringiira, ni koauana, E bon kinai n taai nako ao ni katauraoi bwaai ibukira n tatabemaniira nako ngkana ti teimatoa ni kaokaonimaki.
Aberaam E Tangira te Atua iaon Bwaai ni Kabane
Tabeua taai aika a nako te reitaki n te maroro ma temanna are I rangi n tabe mangaia e a toki. I a kaman ingainga ibukin ae I tuai ni mare, I nanououa ngkana I kona ni kunea temanna te aomata ae I taku bwa e bon tau ibukiu.
E aki maan imwiina, I kauringaaki ibukin karakin Aberaam are e tuangaki bwa e na anga Itaaka bwa ana karea (tara Karikan B’ai 22:1–14). I nooria bwa ngaira ni kabane bwa ti na anga temanna are ti tangiria. Ni koauana, bwaai ake I a tia n rinanona ni kabotauaki nakon Aberaam, ma I kunea bwa te bwai are e a tia n rinanona e reireinai baeten ake I kona n irii.
E tataninga Aberaam n te tai ae maan ibukin natina te mwaane ae e na bungiaki nakoina ao Taara. Bungiakin Itaaka bon te kakai, ao Aberaam e tuangaki, “A na atongaki am kariki nako i nanon Itaaka” (Ebera 11:18). Ni karokoa ngkai te Uea e tuanga Aberaam bwa e na anga Itaaka bwa ana karea. E kanga ana kariki Aberaam “n aranaki” inanon Itaaka ngkana Itaaka e karaoaki bwa te karea?
Ataakin anne—man akea kakawakina e kanga—te Atua ni kaawakin Ana berita, Aberaam e bon ongeaaba. Ana tangira ibukin natina te mwaane e bon korakora, ma ana kaeka e kaotia bwa e tangira te Uea iaon bwaai nako. Ti titirakinaki bwa ti na kaota te bwai ae ti tebo (tara D&C 101:4–5), ao ngaira naba ti karekea te berita ibukin te kaniwanga ae korakora iaon ara kaokaonimaki ae teimatoa (tara Mataio 24:13). Ngke e a toki au reitaki, e bon kanganga ni waakinna nako. Ni karekeakin te berita are N na mare, te waaki nako e tara n akea te reitaki ni kakoroan nanon te berita anne. Ma te berita e anganai te kantaninga, are e buokai ni kataia riki ao ni kaotia nakon Tamara are i Karawa bwa I tangiria iaon bwaai ni kabane.
Ana kaokaonimaki Aberaam e bon anganaki kaniwangana iai tiaki tii ni maiun natina te mwaane ma nakon naba kanoana ae e aki kona ni warekaki ao kakabwaia tabeua (tara Karikan B’ai 22:15–18). Ngaira naba ti bon anganaki kaniwangara n anga karea are e tuangiira te Uea ao ibukin kaotakin ara tangira nakoina. Anne kakawakin kataakin ara onimaki.
Takaria: E Kakoaua Bwa ana Berita te Atua a bon Koaua
N taai tabetai ti aki ataia bwa a kanga berita ake e anganiira te Uea ni kona ni koro bukiia—n aron te berita are ngkana ti baireia ao n teimatoa ni kaokaonimaki, tina bon kakabwaiaaki ma te mare are akea tokina. Beretitenti Dieter F. Uchtdorf, te Kauoman ni Kauntira n te Moan Betetitentii, e reirei taekan te koaua aei, “Ana iai taai ngkana ti karaoa te babaire ae ninikoria nakon te kantaninga e ngae ngke bwaai ni kabane ake a katobibira ana kaitarai [ara] kantaninga.”1
Takaria ma kaain abana ae, Eritabeta, a tataro ma te kaokaonimaki ao n tataninga natia inanon ni kabane maiuia. N tokina, ao e anganaki Takaria te berita iroun te anera bwa kaainnabana te aine e na kona ni bikoukou ao ni bungia te nati are e na katauraoa te kawai ibukin te Tia Kamaiu. E rangi ni korakora te kakabwaia n te aro are e aki kona ni kabwarabwara Takaria. E ngae ngke e kabwarabwaraa te anera, e titiraki Takaria, “N na ata anne n tera?” (Ruka 1:18).
Ai arona naba ma Takaria, ti kona n taneiai n namakina rawawata ni bwaai ake ti tangirii—ke kakabwaia ake a tia ni beritanaki a taraa n aki kakoauaaki—ti mwanuokina are “ma a konaki b’ai nako iroun te Atua” (Mataio 19:26). Te bwai are e a tia n rinanona Takaria e kauringai bwa ana berita Tamara are i Karawa a boni koaua ao E bon kaawakini n taai nako.
Karakin Iotebwa, Aberaam, ao Takaria bon tiaki tii ngaiia are a kaungaa au onimaki ao n anganai te kantaninga. A mwaiti rongorongoia aomata ni koroboki aika a tabu ake a kauringai man aia onimaki bwa N na karekea au onimaki n aron are e kaineti ma are e berita iai te Uea nakoiu. I aki kona ni wareka te mwakoro n te koroboki ae tabu ni boong aikai n akean te kauring bwa te Uea e kaawakin ana berita n taai nako. Te atatai aei e anganai te kantaninga ae korakora ibukin taai aika a na roko.
Kamatata iroun Jeff Ward