Weteia Am Taan Reirei n te Mweenga
Diana Loski, Pennsylvania, USA
Ni mwaitin ririki aika bwaka nako ngke a uarereke natira aika aman, buu temwaane e reke ana mwakuri n te tabo teuana ngke I a tiku imwiina ni karokoa are a bane aia reirei natira ake a ikawai riki inanon teuana te ririki. A tibwa karekeaki ara taan reirei n te mweenga, are a tia n reke aia tai ni kawariira uatai te tai imwaain are e kamwaingaki kaainnabau.
N te tairiki teuana ngke I a nako ni kamatuuia natiu, I a ongo tangin natira te aine ae uarereke inanon ana ruu. Ngke I a tabekia, I a nooria bwa e a rootaki n te kabuebue man biua. I iangoia bwa N na uotia nakon te onaoraki, ma taraakin tuan ara intuaranti ae boou n te tai ae waekoa e kaotia bwa e ti butimwaiia taan maeka i Idaho—te tabo are e mwakuri ngkai iai kainnabau. Nikirana maibuakora bon taan ni maeka n te tabo ae Washington.
I a rikirake n raraoma ngke I a taua kabuebuen natiu te aine—105 degrees Fahrenheit (41 degrees C). I waekoa ni katorobubua n tataro ao ni bubuti ma te onnon ibukin te ibuobuoki. E kaoti te kaeka are I aki kaman iangoia: “Weteia am taan reirei n te mweenga.”
E a taraa ni bwaka nako te tai, ao I ataia bwa mwaane aika uoman, te Tari Halverson ao Bird, a bae n tia ni matuu n te tairiki anne. Ma I a tabeka te tareboon ao ni bon wetea naba te Tari Bird, ni waekoa n tuangnga te bwai ae riki. Inanon nimaua te miniti, n te aoa 11:00 n te tairiki, a roko au taan reirei n te mweenga imatan te mataroa—n aia tiute ma aia neketai.
N te tai aei taban natiu ae uarereke ma matana a bon takauraura, ao irana ae e nimnim ni maonona. E tang ma te maraki, ma te Tari Bird ao Halverson a bon rau ngke a anaia. Ngkanne, a katokaa baia iaon atuna, anganna te kakabwaia ao n tuangnga n aran te Tia Kamaiu bwa e na kamarurungaki.
Ngke I a kauka matau imwiin te kakabwaia, I aki kakoaua te bwai are I nooria. E a ngarengare ao ni kakamwakuri ni karuoaki n tatakaro inano. E abua biuana!
“I a namakina rauna ngke ti kakabwaia,” e taku nakoiu te Tari Bird ngke ti tabe ni matuakina natiu ma te mimii. E aki maan ao a nako, imwiina teutana ao I a taratara inanon tabeua te aoa ma te teei are e tangiria n taratara ao n takakaro. I aki tabe iai.
N ririki aika a mwaiti aika a tia n nako inanon te tairiki are a karaoa aia mwakuri n ibuobuoki anera aika uoman n rabwataniia irouia taan reirei n te mweenga, a kakabwaia natiu. Imwiina n te tai ae aki maan tia mwaing nako Idaho ao e a bua ara reitaki mangaiia, ma N na kakaitau n taai nako nakoia uoman taan reirei n te mweenga aika akoi ake a roko n te katebwi ma teuana n aoa n ana mwakuri te Uea.