Te Nakoanibonga ae te Aaron—E korakora riki Nakon ae Ko kona n Iangoia
Te Rongorongo ibukin te Beku ibukin te Atua
Aua te ririki n nako ao I nako ni kaea te taromauri n ururing ibukin tariu ae Gary. Temanna ma ibuakoia taan taetae e anga ana taeka ni kamoamoa nakon tariu. I a kaman iangoia n te tai ae maan. E taku, “Gary bon te mwaane ae iai irouna te nakoanibonga. … E oota n te nakoanibonga, e karinea te nakoanibonga, ao ni bauta te nakoanibonga ao ana reirei.”
Ngke e mate tariu, bon te ibonga ae rietata ngaia n te Nakoanibonga ae te Merekitereka, ao e rangin kimwareirei inanon ana 50 n ririki n ibuobuoki n te nakoanibonga. Gary bon te buu temwaane ae tangiraki ao te karo ae e a tia ni beku n te mwakuri ni mitinare ae bwanin taina ma te karineaki, mare n te tembora, kakaraoa raoi nakoana n te nakoanibonga, ao ni beku ma te taningamarau n aron te tia reirei n te mweenga.
Boni ngkoe kaain te nakoanibonga ae te Aaron. Am mwakuri n ibuobuoki n te nakoanibonga ae e moanna ni waaki. Ko na bae n tuai ni karekea te taneiai ni mwakuri n te nakoanibonga inanon 50 te bong. Ma ko kona n tau n te taetae ni karinerine are e karekea Gary. Irarikin anne, ko na riai n tau n te aro ni karinerine arei. E a tia ni weteiko te Uea nakon te mwakuri ae kamimi, ao E kantaningaiko bwa ko na riki bwa te mwaane ae iai iroum te nakoanibonga.
Kakannaton te Nakoanibonga ae te Aaron
Tii iangoa bukin kakannaton te Nakoanibonga ae te Aaron are ko butimwaia.
-
Te Uea e a tia ni kanakoa Ioane te tia Bwabetito are e a tia ni manga kautaki bwa e na kaoka te nakoanibonga ae te Aaron. Ngke e anga Ioane te nakoanibonga nako aon Iotebwa Timiti ao Oriwa Kautere, e araniia bwa—“raona n toro.” (D&C 13:1). Beretitenti Gordon B. Hinckley (1910–2008) e kamatata bwa Ioane, “e aki karieta arona iaon Iotebwa ao Oriwa. E karikiia bwa kanga aiaron ana karinan ngke e tuangiia kanga raona n toro.” Ngkanne e taku Beretitenti Hinckley bwa te riikan ae 12 ana ririki ni maiu e kona naba n riki bwa raon Ioane n toro.1
-
Te nakoanibonga ae te Aaron e tauii kiingin aia mwakuri n ibuobuoki anera (tara D&C 13:1). Ngkana ko maiu ni kororaoi ao ni beku ma te taningamarau, ko kona ni karekea aia ibuobuoki anera ake a na kairiko ao ni kakorakorako. Rinanon am tararua n te bootaki n toa, ko kona ni buokiia tabemwaang ni karekea naba te kakabwaia.2
-
Te Nakoanibonga ae te Aaron e tauii kiingin … te euangkerio ibukin te rairannano, ao ibukin te bwabetito n te kateboaki iaan te ran ibukin kabwaraan buure (tara D&C 13:1). Te rairannano ao te bwabetitio a ikotaki ni katea te mataroa bwa aonga n rin aomata ni moana kawaia nakon te maiu are akea tokina (tara 2 Nibwaai 31:17–18). Te mwakuri iaan aia kaetieti am tia kairiri n te nakoanibonga, ko kona ni buokiia aomata ni kauka te mataroa aei.
-
Te Nakoanibonga ae te Aaron e kaira te kariaia n tararua te toa. Ngkana ko katauraoi, ni kakabwaia, ke ni kabuta te toa, ko tei ibukin Iesu Kristo (tara 3 Nibwaai 18:1–12). Ko buokiia membwa n am utu ao raoraom n Uringnga, ni kabouii aia berita aika a tabu, ao ni kona ni karekea ana iraorao te Tamnei ae Raoiroi.
Te nakoa aei e kainnanoa te mwakuri irouia mwaane n te nakoanibonga—mwaane aika a korakora n te maiu n tamnei ao ake a kakoroi nanon aia beku n te nakoanibonga.
Te Boki ae te Beku Nakon te Atua Ae Boou
Iaan aia kaetieti ara burabeti aika a maiu, e a kaman katauraoaki te bwai n reirei ae e na buokiko ni karikiko bwa te mwane ngkoe n te nakoanibonga. E ngae ngke e boou te bwai n reirei, e ataaki n arana: Beku Ibukin te Atua.
I bon rangin ni kukurei ibukin te boki ae te Beku Ibukin te Atua ae boou. E kona ni buokiko n ongeaaba nakon ana tua te Uea n reiakina [am] beku ao ni mwakuri n te nakoa are [ko bon] rineaki iai, inanon te taningamarau (tara D&C 107:99).
Kabonganaakin te boki ngkai te riikan, tia reirei, ao ibonga, ko na ira te waaki ni kakukurei inanon bwaai aika uoua: te korakora n te maiu n tamnei ao beku n te nakoanibonga.
Te Baeten ibukin te Rikirake n Tamaroa
Ni katoa waaki ni kakukurei n te boki ae Beku Ibukin te Atua e rimwiin te baeten are e na buokiko ni karikiko bwa kaain te nakoanibonga are e tangiriko te Uea bwa ko na karekea. Te moan ko na reiakina taekan ana koaua te euangkerio ke te beku n te nakoanibonga. Ngkanne ko na mwakuri iaon are koa tia n reiakinna. N te kabane, ko na tibwaua am iango ao am namakin ibukin te bwai are koa tia n reiakinna ao n rinanona. Tabeua mai ibuakon waaki ni kakukurei aikai a bon onoti. Tabeua anaaki ibukin am kooram ae bwanin ni kabonganaaki n reirei n Taabati ke inanon waaki ni kakukurei inanon te wiiki.
Iaon iteraniba 39 te katoto man te boki e kaotia aron mwakurin te baeten aei. Taeka ni kamatata bon mairouia kairake n ataeinmwaane ake a tia ni karekei taneiai aika a kakawaki ma te boki ae boou.
Te Mwaane ae kaain te Nakoanibonga
Ngkana I iangoa te kibuntaeka “te mwaane ae kaain te nakoanibonga,” I ataia raoi bwa I iango tariu ae Gary. Ma I bon iango naba ibukiia tabemwaang. I iangoa Beretitenti Thomas S. Monson, are, ngke te riikan, e namakinna bwa e tei iaon te tano ae tabu ngke e buoka te mwaane ae aki toamau ni butimwaea te toa.3 I iangoa Ioane te tia Bwabetito, kaain te nakoanibonga ae te Aaron ae kakannato are e katauraoa te kawai ibukin ana mwakuri ni mitinare te Tia Kamaiu man reiakinan, kakoauan, ao n ibuobuoki n otenanti aika tabu ibukin te bwabetito. Ao I iangoiko. Ngkai ko rikirake n te maiu n tamnei ao ni buokiia tabemwaang n roko nakon Kristo rinanon am mwakuri n ibuobuoki n te nakoanibonga, bon te mwaane ni koaua ngkoe ae kaain te nakoanibonga.
Rawetamnei ao kamatata iroun Craig Dimond
Rawetamnei ao kamatata iroun Steve Bunderson © 2000; Rawetamnei iroun John Luke © IRI